𑁧𑁦. 𑀉𑀤𑀓𑀲𑀼𑀢𑁆𑀢𑀁

𑁧𑁦𑁩. ‘‘𑀉𑀤𑀓𑁄 [𑀉𑀤𑁆𑀤𑀓𑁄 (𑀲𑀻. 𑀧𑀻.)] 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀭𑀸𑀫𑀧𑀼𑀢𑁆𑀢𑁄 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻 [𑀲𑀩𑁆𑀩𑀚𑀺 (𑀧𑀻.)], 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’𑀦𑁆𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀅𑀯𑁂𑀤𑀕𑀽𑀬𑁂𑀯 𑀲𑀫𑀸𑀦𑁄 ‘𑀯𑁂𑀤𑀕𑀽𑀲𑁆𑀫𑀻’𑀢𑀺 𑀪𑀸𑀲𑀢𑀺, 𑀅𑀲𑀩𑁆𑀩𑀚𑀻𑀬𑁂𑀯 𑀲𑀫𑀸𑀦𑁄 ‘𑀲𑀩𑁆𑀩𑀚𑀻𑀲𑁆𑀫𑀻’𑀢𑀺 𑀪𑀸𑀲𑀢𑀺, 𑀅𑀧𑀮𑀺𑀔𑀢𑀁𑀬𑁂𑀯 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀢𑀁 𑀫𑁂 ‘𑀕𑀡𑁆𑀟𑀫𑀽𑀮’𑀦𑁆𑀢𑀺 𑀪𑀸𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻, 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’’’𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀕𑀽 𑀳𑁄𑀢𑀺? 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀕𑀽 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀚𑀻 𑀳𑁄𑀢𑀺? 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺; 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀚𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀢𑀁 𑀳𑁄𑀢𑀺? 𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲. 𑀕𑀡𑁆𑀟𑀫𑀽𑀮𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀢𑀁 𑀳𑁄𑀢𑀺.

‘‘𑀉𑀤𑀓𑁄 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀭𑀸𑀫𑀧𑀼𑀢𑁆𑀢𑁄 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻, 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’𑀦𑁆𑀢𑀺. 𑀢𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀅𑀯𑁂𑀤𑀕𑀽𑀬𑁂𑀯 𑀲𑀫𑀸𑀦𑁄 ‘𑀯𑁂𑀤𑀕𑀽𑀲𑁆𑀫𑀻’𑀢𑀺 𑀪𑀸𑀲𑀢𑀺, 𑀅𑀲𑀩𑁆𑀩𑀚𑀻𑀬𑁂𑀯 𑀲𑀫𑀸𑀦𑁄 ‘𑀲𑀩𑁆𑀩𑀚𑀻𑀲𑁆𑀫𑀻’𑀢𑀺 𑀪𑀸𑀲𑀢𑀺; 𑀅𑀧𑀮𑀺𑀔𑀢𑀁𑀬𑁂𑀯 𑀕𑀡𑁆𑀟𑀫𑀽𑀮𑀁 ‘𑀧𑀮𑀺𑀔𑀢𑀁 𑀫𑁂 𑀕𑀡𑁆𑀟𑀫𑀽𑀮’𑀦𑁆𑀢𑀺 𑀪𑀸𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽, 𑀇𑀤𑀁 𑀚𑀸𑀢𑀼 𑀲𑀩𑁆𑀩𑀚𑀻, 𑀇𑀤𑀁 𑀚𑀸𑀢𑀼 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀁 𑀧𑀮𑀺𑀔𑀡𑀺’’’𑀦𑁆𑀢𑀺. 𑀤𑀲𑀫𑀁.

𑀲𑀴𑀯𑀕𑁆𑀕𑁄 𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀲𑀁𑀕𑀬𑁆𑀳𑀸 𑀧𑀭𑀺𑀳𑀸𑀦𑀁, 𑀧𑀫𑀸𑀤𑀯𑀺𑀳𑀸𑀭𑀻 𑀘 𑀲𑀁𑀯𑀭𑁄;

𑀲𑀫𑀸𑀥𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀤𑁆𑀯𑁂 𑀦𑀢𑀼𑀫𑁆𑀳𑀸𑀓𑁂𑀦 𑀉𑀤𑁆𑀤𑀓𑁄𑀢𑀺.

𑀲𑀴𑀸𑀬𑀢𑀦𑀯𑀕𑁆𑀕𑁂 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑀢𑀲𑁆𑀲 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀅𑀯𑀺𑀚𑁆𑀚𑀸 𑀫𑀺𑀕𑀚𑀸𑀮𑀜𑁆𑀘, 𑀕𑀺𑀮𑀸𑀦𑀁 𑀙𑀦𑁆𑀦𑀁 𑀘𑀢𑀼𑀢𑁆𑀣𑀓𑀁;

𑀲𑀴𑀯𑀕𑁆𑀕𑁂𑀦 𑀧𑀜𑁆𑀜𑀸𑀲𑀁, 𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄 𑀅𑀬𑀦𑁆𑀢𑀺.

𑀧𑀞𑀫𑀲𑀢𑀓𑀁.