𑁯. 𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀁

𑁩𑁯𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀼𑀧𑀡𑁆𑀡𑀬𑁄𑀦𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀅𑀡𑁆𑀟𑀚𑀸 𑀲𑀼𑀧𑀡𑁆𑀡𑀸, 𑀚𑀮𑀸𑀩𑀼𑀚𑀸 𑀲𑀼𑀧𑀡𑁆𑀡𑀸, 𑀲𑀁𑀲𑁂𑀤𑀚𑀸 𑀲𑀼𑀧𑀡𑁆𑀡𑀸, 𑀑𑀧𑀧𑀸𑀢𑀺𑀓𑀸 𑀲𑀼𑀧𑀡𑁆𑀡𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄’’𑀢𑀺. 𑀧𑀞𑀫𑀁.

𑁨. 𑀳𑀭𑀦𑁆𑀢𑀺𑀲𑀼𑀢𑁆𑀢𑀁

𑁩𑁯𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀼𑀧𑀡𑁆𑀡𑀬𑁄𑀦𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀅𑀡𑁆𑀟𑀚𑀸…𑀧𑁂… 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀅𑀡𑁆𑀟𑀚𑀸 𑀲𑀼𑀧𑀡𑁆𑀡𑀸 𑀅𑀡𑁆𑀟𑀚𑁂𑀯 𑀦𑀸𑀕𑁂 𑀳𑀭𑀦𑁆𑀢𑀺, 𑀦 𑀚𑀮𑀸𑀩𑀼𑀚𑁂, 𑀦 𑀲𑀁𑀲𑁂𑀤𑀚𑁂, 𑀦 𑀑𑀧𑀧𑀸𑀢𑀺𑀓𑁂. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀚𑀮𑀸𑀩𑀼𑀚𑀸 𑀲𑀼𑀧𑀡𑁆𑀡𑀸 𑀅𑀡𑁆𑀟𑀚𑁂 𑀘 𑀚𑀮𑀸𑀩𑀼𑀚𑁂 𑀘 𑀦𑀸𑀕𑁂 𑀳𑀭𑀦𑁆𑀢𑀺, 𑀦 𑀲𑀁𑀲𑁂𑀤𑀚𑁂, 𑀦 𑀑𑀧𑀧𑀸𑀢𑀺𑀓𑁂. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀁𑀲𑁂𑀤𑀚𑀸 𑀲𑀼𑀧𑀡𑁆𑀡𑀸 𑀅𑀡𑁆𑀟𑀚𑁂 𑀘 𑀚𑀮𑀸𑀩𑀼𑀚𑁂 𑀘 𑀲𑀁𑀲𑁂𑀤𑀚𑁂 𑀘 𑀦𑀸𑀕𑁂 𑀳𑀭𑀦𑁆𑀢𑀺, 𑀦 𑀑𑀧𑀧𑀸𑀢𑀺𑀓𑁂. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀑𑀧𑀧𑀸𑀢𑀺𑀓𑀸 𑀲𑀼𑀧𑀡𑁆𑀡𑀸 𑀅𑀡𑁆𑀟𑀚𑁂 𑀘 𑀚𑀮𑀸𑀩𑀼𑀚𑁂 𑀘 𑀲𑀁𑀲𑁂𑀤𑀚𑁂 𑀘 𑀑𑀧𑀧𑀸𑀢𑀺𑀓𑁂 𑀘 𑀦𑀸𑀕𑁂 𑀳𑀭𑀦𑁆𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀤𑁆𑀯𑀬𑀓𑀸𑀭𑀻𑀲𑀼𑀢𑁆𑀢𑀁

𑁩𑁯𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻 𑀳𑁄𑀢𑀺, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀅𑀡𑁆𑀟𑀚𑀸 𑀲𑀼𑀧𑀡𑁆𑀡𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁.

𑁪-𑁬. 𑀤𑀼𑀢𑀺𑀬𑀸𑀤𑀺𑀤𑁆𑀯𑀬𑀓𑀸𑀭𑀻𑀲𑀼𑀢𑁆𑀢𑀢𑁆𑀢𑀺𑀓𑀁

𑁩𑁯𑁫-𑁩𑁯𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀚𑀮𑀸𑀩𑀼𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁…𑀧𑁂… 𑀲𑀁𑀲𑁂𑀤𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁…𑀧𑁂… 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻 𑀳𑁄𑀢𑀺, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀑𑀧𑀧𑀸𑀢𑀺𑀓𑀸 𑀲𑀼𑀧𑀡𑁆𑀡𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀙𑀝𑁆𑀞𑀁.

𑁭-𑁧𑁬. 𑀅𑀡𑁆𑀟𑀚𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀤𑀲𑀓𑀁

𑁩𑁯𑁮-𑁪𑁦𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻 𑀳𑁄𑀢𑀺, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀅𑀡𑁆𑀟𑀚𑀸 𑀲𑀼𑀧𑀡𑁆𑀡𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀸𑀦𑀁 𑀤𑁂𑀢𑀺… 𑀯𑀢𑁆𑀣𑀁 𑀤𑁂𑀢𑀺… 𑀬𑀸𑀦𑀁 𑀤𑁂𑀢𑀺… 𑀫𑀸𑀮𑀁 𑀤𑁂𑀢𑀺… 𑀕𑀦𑁆𑀥𑀁 𑀤𑁂𑀢𑀺… 𑀯𑀺𑀮𑁂𑀧𑀦𑀁 𑀤𑁂𑀢𑀺… 𑀲𑁂𑀬𑁆𑀬𑀁 𑀤𑁂𑀢𑀺… 𑀆𑀯𑀲𑀣𑀁 𑀤𑁂𑀢𑀺… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀡𑁆𑀟𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀲𑁄𑀴𑀲𑀫𑀁.

𑁧𑁭-𑁪𑁬. 𑀚𑀮𑀸𑀩𑀼𑀚𑀸𑀤𑀺𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀢𑀺𑀁𑀲𑀓𑀁

𑁪𑁦𑁮-𑁪𑁩𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀚𑀮𑀸𑀩𑀼𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁…𑀧𑁂… 𑀲𑀁𑀲𑁂𑀤𑀚𑀸𑀦𑀁 𑀲𑀼𑀧𑀡𑁆𑀡𑀸𑀦𑀁…𑀧𑁂… 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻 𑀳𑁄𑀢𑀺, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀑𑀧𑀧𑀸𑀢𑀺𑀓𑀸 𑀲𑀼𑀧𑀡𑁆𑀡𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀸𑀦𑀁 𑀤𑁂𑀢𑀺…𑀧𑁂… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀑𑀧𑀧𑀸𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀙𑀘𑀢𑁆𑀢𑀸𑀮𑀻𑀲𑀫𑀁.

(𑀏𑀯𑀁 𑀧𑀺𑀡𑁆𑀟𑀓𑁂𑀦 𑀙𑀘𑀢𑁆𑀢𑀸𑀮𑀻𑀲𑀁 𑀲𑀼𑀢𑁆𑀢𑀦𑁆𑀢𑀸 𑀳𑁄𑀦𑁆𑀢𑀺.)

𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.