𑁧𑁦. 𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀁

𑁪𑁩𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 …𑀧𑁂… 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑁂 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸 𑀤𑁂𑀯𑀸? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀭𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀨𑁂𑀕𑁆𑀕𑀼𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀘𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀧𑀝𑀺𑀓𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀢𑁆𑀢𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀧𑁆𑀨𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀨𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀭𑀲𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸 𑀤𑁂𑀯𑀸’’𑀢𑀺. 𑀧𑀞𑀫𑀁.

𑁨. 𑀲𑀼𑀘𑀭𑀺𑀢𑀲𑀼𑀢𑁆𑀢𑀁

𑁪𑁩𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀽𑀮𑀕𑀦𑁆𑀥𑀤𑀸𑀢𑀸𑀲𑀼𑀢𑁆𑀢𑀁

𑁪𑁪𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀤𑀸𑀢𑀸 𑀳𑁄𑀢𑀺 𑀫𑀽𑀮𑀕𑀦𑁆𑀥𑀸𑀦𑀁. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼…𑀧𑁂… 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁.

𑁪-𑁧𑁨. 𑀲𑀸𑀭𑀕𑀦𑁆𑀥𑀸𑀤𑀺𑀤𑀸𑀢𑀸𑀲𑀼𑀢𑁆𑀢𑀦𑀯𑀓𑀁

𑁪𑁪𑁧-𑁪𑁪𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀸𑀭𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀨𑁂𑀕𑁆𑀕𑀼𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀢𑀘𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀧𑀝𑀺𑀓𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀢𑁆𑀢𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀼𑀧𑁆𑀨𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀨𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀭𑀲𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀸𑀭𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀸𑀭𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀨𑁂𑀕𑁆𑀕𑀼𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀢𑀘𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀧𑀝𑀺𑀓𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀢𑁆𑀢𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀼𑀧𑁆𑀨𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀨𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀭𑀲𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀤𑀸𑀢𑀸 𑀳𑁄𑀢𑀺 𑀲𑀸𑀭𑀕𑀦𑁆𑀥𑀸𑀦𑀁…𑀧𑁂… 𑀲𑁄 𑀤𑀸𑀢𑀸 𑀳𑁄𑀢𑀺 𑀨𑁂𑀕𑁆𑀕𑀼𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀢𑀘𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀧𑀧𑀝𑀺𑀓𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀧𑀢𑁆𑀢𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀧𑀼𑀧𑁆𑀨𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀨𑀮𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀭𑀲𑀕𑀦𑁆𑀥𑀸𑀦𑀁… 𑀲𑁄 𑀤𑀸𑀢𑀸 𑀳𑁄𑀢𑀺 𑀕𑀦𑁆𑀥𑀕𑀦𑁆𑀥𑀸𑀦𑀁. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑀸𑀤𑀲𑀫𑀁.

𑁧𑁩-𑁨𑁨. 𑀫𑀽𑀮𑀕𑀦𑁆𑀥𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀤𑀲𑀓𑀁

𑁪𑁫𑁦-𑁪𑁫𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀸𑀦𑀁 𑀤𑁂𑀢𑀺… 𑀯𑀢𑁆𑀣𑀁 𑀤𑁂𑀢𑀺… 𑀬𑀸𑀦𑀁 𑀤𑁂𑀢𑀺… 𑀫𑀸𑀮𑀁 𑀤𑁂𑀢𑀺… 𑀕𑀦𑁆𑀥𑀁 𑀤𑁂𑀢𑀺… 𑀯𑀺𑀮𑁂𑀧𑀦𑀁 𑀤𑁂𑀢𑀺… 𑀲𑁂𑀬𑁆𑀬𑀁 𑀤𑁂𑀢𑀺… 𑀆𑀯𑀲𑀣𑀁 𑀤𑁂𑀢𑀺… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀩𑀸𑀯𑀻𑀲𑀢𑀺𑀫𑀁.

𑁨𑁩-𑁧𑁧𑁨. 𑀲𑀸𑀭𑀕𑀦𑁆𑀥𑀸𑀤𑀺𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀦𑀯𑀼𑀢𑀺𑀓𑀁

𑁪𑁬𑁦-𑁫𑁪𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀸𑀭𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀨𑁂𑀕𑁆𑀕𑀼𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀢𑀘𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 … 𑀧𑀧𑀝𑀺𑀓𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀢𑁆𑀢𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀧𑀼𑀧𑁆𑀨𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀨𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀭𑀲𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁… 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀸𑀦𑀁 𑀤𑁂𑀢𑀺… 𑀯𑀢𑁆𑀣𑀁 𑀤𑁂𑀢𑀺… 𑀬𑀸𑀦𑀁 𑀤𑁂𑀢𑀺… 𑀫𑀸𑀮𑀁 𑀤𑁂𑀢𑀺… 𑀕𑀦𑁆𑀥𑀁 𑀤𑁂𑀢𑀺… 𑀯𑀺𑀮𑁂𑀧𑀦𑀁 𑀤𑁂𑀢𑀺… 𑀲𑁂𑀬𑁆𑀬𑀁 𑀤𑁂𑀢𑀺… 𑀆𑀯𑀲𑀣𑀁 𑀤𑁂𑀢𑀺… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀕𑀦𑁆𑀥𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑀸𑀤𑀲𑀲𑀢𑀺𑀫𑀁.

(𑀏𑀯𑀁 𑀧𑀺𑀡𑁆𑀟𑀓𑁂𑀦 𑀏𑀓𑀲𑀢𑀜𑁆𑀘 𑀤𑁆𑀯𑀸𑀤𑀲 𑀘 𑀲𑀼𑀢𑁆𑀢𑀦𑁆𑀢𑀸 𑀳𑁄𑀦𑁆𑀢𑀺.)

𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.