𑁧𑁧. 𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀁

𑁫𑁫𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀯𑀮𑀸𑀳𑀓𑀓𑀸𑀬𑀺𑀓𑁂 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀯𑀮𑀸𑀳𑀓𑀓𑀸𑀬𑀺𑀓𑀸 𑀤𑁂𑀯𑀸? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀢𑀯𑀮𑀸𑀳𑀓𑀸 𑀤𑁂𑀯𑀸; 𑀲𑀦𑁆𑀢𑀺 𑀉𑀡𑁆𑀳𑀯𑀮𑀸𑀳𑀓𑀸 𑀤𑁂𑀯𑀸; 𑀲𑀦𑁆𑀢𑀺 𑀅𑀩𑁆𑀪𑀯𑀮𑀸𑀳𑀓𑀸 𑀤𑁂𑀯𑀸; 𑀲𑀦𑁆𑀢𑀺 𑀯𑀸𑀢𑀯𑀮𑀸𑀳𑀓𑀸 𑀤𑁂𑀯𑀸; 𑀲𑀦𑁆𑀢𑀺 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, ‘𑀯𑀮𑀸𑀳𑀓𑀓𑀸𑀬𑀺𑀓𑀸 𑀤𑁂𑀯𑀸’’’𑀢𑀺. 𑀧𑀞𑀫𑀁.

𑁨. 𑀲𑀼𑀘𑀭𑀺𑀢𑀲𑀼𑀢𑁆𑀢𑀁

𑁫𑁫𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀮𑀸𑀳𑀓𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀯𑀮𑀸𑀳𑀓𑀓𑀸𑀬𑀺𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀮𑀸𑀳𑀓𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀮𑀸𑀳𑀓𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀮𑀸𑀳𑀓𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩-𑁧𑁨. 𑀲𑀻𑀢𑀯𑀮𑀸𑀳𑀓𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀤𑀲𑀓𑀁

𑁫𑁫𑁨-𑁫𑁬𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀻𑀢𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀲𑀻𑀢𑀯𑀮𑀸𑀳𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀻𑀢𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀻𑀢𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀻𑀢𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑀸𑀤𑀲𑀫𑀁.

𑁧𑁩-𑁫𑁨. 𑀉𑀡𑁆𑀳𑀯𑀮𑀸𑀳𑀓𑀤𑀸𑀦𑀽𑀧𑀓𑀸𑀭𑀲𑀼𑀢𑁆𑀢𑀘𑀸𑀮𑀻𑀲𑀓𑀁

𑁫𑁬𑁨-𑁬𑁦𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀉𑀡𑁆𑀳𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀅𑀩𑁆𑀪𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀯𑀸𑀢𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀯𑀲𑁆𑀲𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀢𑀲𑁆𑀲 𑀲𑀼𑀢𑀁 𑀳𑁄𑀢𑀺 𑁋 ‘𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀲𑁆𑀲𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀦𑁆𑀦𑀁 𑀤𑁂𑀢𑀺…𑀧𑁂… 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀲𑁆𑀲𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀲𑁆𑀲𑀯𑀮𑀸𑀳𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑁂𑀧𑀜𑁆𑀜𑀸𑀲𑀫𑀁.

𑁫𑁩. 𑀲𑀻𑀢𑀯𑀮𑀸𑀳𑀓𑀲𑀼𑀢𑁆𑀢𑀁

𑁬𑁦𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀲𑀻𑀢𑀁 𑀳𑁄𑀢𑀻’’𑀢𑀺? ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀼, 𑀲𑀻𑀢𑀯𑀮𑀸𑀳𑀓𑀸 𑀦𑀸𑀫 𑀤𑁂𑀯𑀸. 𑀢𑁂𑀲𑀁 𑀬𑀤𑀸 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦 𑀫𑀬𑀁 𑀲𑀓𑀸𑀬 𑀭𑀢𑀺𑀬𑀸 𑀯𑀲𑁂𑀬𑁆𑀬𑀸𑀫𑀸’𑀢𑀺 [𑀭𑀫𑁂𑀬𑁆𑀬𑀸𑀫𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀏𑀯𑀫𑀼𑀧𑀭𑀺𑀧𑀺], 𑀢𑁂𑀲𑀁 𑀢𑀁 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬 𑀲𑀻𑀢𑀁 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀲𑀻𑀢𑀁 𑀳𑁄𑀢𑀻’’𑀢𑀺. 𑀢𑁂𑀧𑀜𑁆𑀜𑀸𑀲𑀫𑀁.

𑁫𑁪. 𑀉𑀡𑁆𑀳𑀯𑀮𑀸𑀳𑀓𑀲𑀼𑀢𑁆𑀢𑀁

𑁬𑁦𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀉𑀡𑁆𑀳𑀁 𑀳𑁄𑀢𑀻’’𑀢𑀺? ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀼, 𑀉𑀡𑁆𑀳𑀯𑀮𑀸𑀳𑀓𑀸 𑀦𑀸𑀫 𑀤𑁂𑀯𑀸. 𑀢𑁂𑀲𑀁 𑀬𑀤𑀸 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦 𑀫𑀬𑀁 𑀲𑀓𑀸𑀬 𑀭𑀢𑀺𑀬𑀸 𑀯𑀲𑁂𑀬𑁆𑀬𑀸𑀫𑀸’𑀢𑀺, 𑀢𑁂𑀲𑀁 𑀢𑀁 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬 𑀉𑀡𑁆𑀳𑀁 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀉𑀡𑁆𑀳𑀁 𑀳𑁄𑀢𑀻’’𑀢𑀺. 𑀘𑀢𑀼𑀧𑀜𑁆𑀜𑀸𑀲𑀫𑀁.

𑁫𑁫. 𑀅𑀩𑁆𑀪𑀯𑀮𑀸𑀳𑀓𑀲𑀼𑀢𑁆𑀢𑀁

𑁬𑁦𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀅𑀩𑁆𑀪𑀁 𑀳𑁄𑀢𑀻’’𑀢𑀺? ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀼, 𑀅𑀩𑁆𑀪𑀯𑀮𑀸𑀳𑀓𑀸 𑀦𑀸𑀫 𑀤𑁂𑀯𑀸. 𑀢𑁂𑀲𑀁 𑀬𑀤𑀸 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦 𑀫𑀬𑀁 𑀲𑀓𑀸𑀬 𑀭𑀢𑀺𑀬𑀸 𑀯𑀲𑁂𑀬𑁆𑀬𑀸𑀫𑀸’𑀢𑀺, 𑀢𑁂𑀲𑀁 𑀢𑀁 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬 𑀅𑀩𑁆𑀪𑀁 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀅𑀩𑁆𑀪𑀁 𑀳𑁄𑀢𑀻’’𑀢𑀺. 𑀧𑀜𑁆𑀘𑀧𑀜𑁆𑀜𑀸𑀲𑀫𑀁.

𑁫𑁬. 𑀯𑀸𑀢𑀯𑀮𑀸𑀳𑀓𑀲𑀼𑀢𑁆𑀢𑀁

𑁬𑁦𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀯𑀸𑀢𑁄 𑀳𑁄𑀢𑀻’’𑀢𑀺? ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀼, 𑀯𑀸𑀢𑀯𑀮𑀸𑀳𑀓𑀸 𑀦𑀸𑀫 𑀤𑁂𑀯𑀸. 𑀢𑁂𑀲𑀁 𑀬𑀤𑀸 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦 𑀫𑀬𑀁 𑀲𑀓𑀸𑀬 𑀭𑀢𑀺𑀬𑀸 𑀯𑀲𑁂𑀬𑁆𑀬𑀸𑀫𑀸’𑀢𑀺, 𑀢𑁂𑀲𑀁 𑀢𑀁 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬 𑀯𑀸𑀢𑁄 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀯𑀸𑀢𑁄 𑀳𑁄𑀢𑀻’’𑀢𑀺. 𑀙𑀧𑁆𑀧𑀜𑁆𑀜𑀸𑀲𑀫𑀁.

𑁫𑁭. 𑀯𑀲𑁆𑀲𑀯𑀮𑀸𑀳𑀓𑀲𑀼𑀢𑁆𑀢𑀁

𑁬𑁦𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺? ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀼, 𑀯𑀲𑁆𑀲𑀯𑀮𑀸𑀳𑀓𑀸 𑀦𑀸𑀫 𑀤𑁂𑀯𑀸. 𑀢𑁂𑀲𑀁 𑀬𑀤𑀸 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦 𑀫𑀬𑀁 𑀲𑀓𑀸𑀬 𑀭𑀢𑀺𑀬𑀸 𑀯𑀲𑁂𑀬𑁆𑀬𑀸𑀫𑀸’𑀢𑀺, 𑀢𑁂𑀲𑀁 𑀢𑀁 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬 𑀤𑁂𑀯𑁄 𑀯𑀲𑁆𑀲𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀼, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀓𑀤𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺. 𑀲𑀢𑁆𑀢𑀧𑀜𑁆𑀜𑀸𑀲𑀫𑀁.

𑀲𑀢𑁆𑀢𑀧𑀜𑁆𑀜𑀸𑀲𑀲𑀼𑀢𑁆𑀢𑀦𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.