𑁧𑁨. 𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀭𑀽𑀧𑀅𑀜𑁆𑀜𑀸𑀡𑀲𑀼𑀢𑁆𑀢𑀁

𑁬𑁦𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 [𑀬𑁂𑀦𑀺𑀫𑀸𑀦𑀺 (?)] 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? ‘‘𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀜𑁆𑀜𑀸𑀡𑀸, 𑀭𑀽𑀧𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀸, 𑀭𑀽𑀧𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀸, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 [𑀬𑁂𑀦 (𑀲𑀻.), 𑀬𑁂𑀦𑀺𑀫𑀸𑀦𑀺 (?)] 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀧𑀞𑀫𑀁.

𑁨. 𑀯𑁂𑀤𑀦𑀸𑀅𑀜𑁆𑀜𑀸𑀡𑀲𑀼𑀢𑁆𑀢𑀁

𑁬𑁦𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? ‘‘𑀯𑁂𑀤𑀦𑀸𑀬 𑀔𑁄, 𑀯𑀘𑁆𑀙, 𑀅𑀜𑁆𑀜𑀸𑀡𑀸, 𑀯𑁂𑀤𑀦𑀸𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀸, 𑀯𑁂𑀤𑀦𑀸𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀸, 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀜𑁆𑀜𑀸𑀅𑀜𑁆𑀜𑀸𑀡𑀲𑀼𑀢𑁆𑀢𑀁

𑁬𑁦𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? ‘‘𑀲𑀜𑁆𑀜𑀸𑀬 𑀔𑁄, 𑀯𑀘𑁆𑀙, 𑀅𑀜𑁆𑀜𑀸𑀡𑀸, 𑀲𑀜𑁆𑀜𑀸𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀸, 𑀲𑀜𑁆𑀜𑀸𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀸, 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀢𑀢𑀺𑀬𑀁.

𑁪. 𑀲𑀗𑁆𑀔𑀸𑀭𑀅𑀜𑁆𑀜𑀸𑀡𑀲𑀼𑀢𑁆𑀢𑀁

𑁬𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? ‘‘𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀯𑀘𑁆𑀙, 𑀅𑀜𑁆𑀜𑀸𑀡𑀸, 𑀲𑀗𑁆𑀔𑀸𑀭𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀺𑀜𑁆𑀜𑀸𑀡𑀅𑀜𑁆𑀜𑀸𑀡𑀲𑀼𑀢𑁆𑀢𑀁

𑁬𑁧𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 …𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? ‘‘𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀜𑁆𑀜𑀸𑀡𑀸, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀸, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀸, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀧𑀜𑁆𑀘𑀫𑀁.

𑁬-𑁧𑁦. 𑀭𑀽𑀧𑀅𑀤𑀲𑁆𑀲𑀦𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁧𑁨-𑁬𑁧𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀤𑀲𑁆𑀲𑀦𑀸…𑀧𑁂… 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀤𑀲𑁆𑀲𑀦𑀸…𑀧𑁂… 𑀯𑁂𑀤𑀦𑀸𑀬 … 𑀲𑀜𑁆𑀜𑀸𑀬 … 𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀯𑀘𑁆𑀙, 𑀅𑀤𑀲𑁆𑀲𑀦𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀤𑀲𑁆𑀲𑀦𑀸…𑀧𑁂… 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀤𑀲𑁆𑀲𑀦𑀸…𑀧𑁂…. 𑀤𑀲𑀫𑀁.

𑁧𑁧-𑁧𑁫. 𑀭𑀽𑀧𑀅𑀦𑀪𑀺𑀲𑀫𑀬𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁧𑁭-𑁬𑁨𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀦𑀪𑀺𑀲𑀫𑀬𑀸…𑀧𑁂… 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀦𑀪𑀺𑀲𑀫𑀬𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀯𑁂𑀤𑀦𑀸𑀬 𑀔𑁄, 𑀯𑀘𑁆𑀙, 𑀅𑀦𑀪𑀺𑀲𑀫𑀬𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀜𑁆𑀜𑀸𑀬 𑀔𑁄, 𑀯𑀘𑁆𑀙, 𑀅𑀦𑀪𑀺𑀲𑀫𑀬𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀯𑀘𑁆𑀙, 𑀅𑀦𑀪𑀺𑀲𑀫𑀬𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀦𑀪𑀺𑀲𑀫𑀬𑀸…𑀧𑁂…. 𑀧𑀦𑁆𑀦𑀭𑀲𑀫𑀁.

𑁧𑁬-𑁨𑁦. 𑀭𑀽𑀧𑀅𑀦𑀦𑀼𑀩𑁄𑀥𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁨𑁨-𑁬𑁨𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄…𑀧𑁂… 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀦𑀦𑀼𑀩𑁄𑀥𑀸…𑀧𑁂… 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀦𑀦𑀼𑀩𑁄𑀥𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀯𑁂𑀤𑀦𑀸𑀬 𑀔𑁄, 𑀯𑀘𑁆𑀙…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀜𑁆𑀜𑀸𑀬 𑀔𑁄, 𑀯𑀘𑁆𑀙…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀯𑀘𑁆𑀙…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙 𑀅𑀦𑀦𑀼𑀩𑁄𑀥𑀸…𑀧𑁂… 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀦𑀦𑀼𑀩𑁄𑀥𑀸. 𑀯𑀻𑀲𑀢𑀺𑀫𑀁.

𑁨𑁧-𑁨𑁫. 𑀭𑀽𑀧𑀅𑀧𑁆𑀧𑀝𑀺𑀯𑁂𑀥𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁨𑁭-𑁬𑁩𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄…𑀧𑁂…. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀝𑀺𑀯𑁂𑀥𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀝𑀺𑀯𑁂𑀥𑀸…𑀧𑁂…. 𑀧𑀜𑁆𑀘𑀯𑀻𑀲𑀢𑀺𑀫𑀁.

𑁨𑁬-𑁩𑁦. 𑀭𑀽𑀧𑀅𑀲𑀮𑁆𑀮𑀓𑁆𑀔𑀡𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁩𑁨-𑁬𑁩𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀲𑀮𑁆𑀮𑀓𑁆𑀔𑀡𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀲𑀮𑁆𑀮𑀓𑁆𑀔𑀡𑀸…𑀧𑁂…. 𑀢𑀺𑀁𑀲𑀢𑀺𑀫𑀁.

𑁩𑁧-𑁩𑁫. 𑀭𑀽𑀧𑀅𑀦𑀼𑀧𑀮𑀓𑁆𑀔𑀡𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁩𑁭-𑁬𑁪𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀦𑀼𑀧𑀮𑀓𑁆𑀔𑀡𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀦𑀼𑀧𑀮𑀓𑁆𑀔𑀡𑀸…𑀧𑁂…. 𑀧𑀜𑁆𑀘𑀢𑀺𑀁𑀲𑀢𑀺𑀫𑀁.

𑁩𑁬-𑁪𑁦. 𑀭𑀽𑀧𑀅𑀧𑁆𑀧𑀘𑁆𑀘𑀼𑀧𑀮𑀓𑁆𑀔𑀡𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁪𑁨-𑁬𑁪𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀼𑀧𑀮𑀓𑁆𑀔𑀡𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀼𑀧𑀮𑀓𑁆𑀔𑀡𑀸…𑀧𑁂…. 𑀘𑀢𑁆𑀢𑀸𑀮𑀻𑀲𑀫𑀁.

𑁪𑁧-𑁪𑁫. 𑀭𑀽𑀧𑀅𑀲𑀫𑀧𑁂𑀓𑁆𑀔𑀡𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁪𑁭-𑁬𑁫𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀲𑀫𑀧𑁂𑀓𑁆𑀔𑀡𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀲𑀫𑀧𑁂𑀓𑁆𑀔𑀡𑀸…𑀧𑁂…. 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀫𑀁.

𑁪𑁬-𑁫𑁦. 𑀭𑀽𑀧𑀅𑀧𑁆𑀧𑀘𑁆𑀘𑀼𑀧𑁂𑀓𑁆𑀔𑀡𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁬𑁫𑁨-𑁬𑁫𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀼𑀧𑁂𑀓𑁆𑀔𑀡𑀸…𑀧𑁂… 𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀼𑀧𑁂𑀓𑁆𑀔𑀡𑀸…𑀧𑁂…. 𑀧𑀜𑁆𑀜𑀸𑀲𑀫𑀁.

𑁫𑁧-𑁫𑁪. 𑀭𑀽𑀧𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸𑀤𑀺𑀲𑀼𑀢𑁆𑀢𑀘𑀢𑀼𑀓𑁆𑀓𑀁

𑁬𑁫𑁭-𑁬𑁬𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺? 𑀭𑀽𑀧𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀭𑀽𑀧𑀲𑀫𑀼𑀤𑀬𑁂 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀭𑀽𑀧𑀦𑀺𑀭𑁄𑀥𑁂 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀯𑁂𑀤𑀦𑀸𑀬 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂… 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀜𑁆𑀜𑀸𑀬 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂… 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂….

𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂… 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸…𑀧𑁂…. 𑀘𑀢𑀼𑀧𑀜𑁆𑀜𑀸𑀲𑀫𑀁.

𑁫𑁫. 𑀯𑀺𑀜𑁆𑀜𑀸𑀡𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀲𑀼𑀢𑁆𑀢𑀁

𑁬𑁬𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀯𑀺𑀜𑁆𑀜𑀸𑀡𑁂 𑀔𑁄, 𑀯𑀘𑁆𑀙, 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁂 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀸; 𑀏𑀯𑀫𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸𑀢𑀺. 𑀅𑀬𑀁 𑀔𑁄, 𑀯𑀘𑁆𑀙, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑀸𑀦𑀺𑀫𑀸𑀦𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀧𑀜𑁆𑀘𑀧𑀜𑁆𑀜𑀸𑀲𑀫𑀁.

𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.