𑁧𑁦. 𑀔𑀦𑁆𑀥𑀲𑀼𑀢𑁆𑀢𑀁

𑁩𑁨𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄, 𑀭𑁄𑀕𑀸𑀦𑀁 𑀞𑀺𑀢𑀺, 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀯𑁂𑀤𑀦𑀸𑀬… 𑀬𑁄 𑀲𑀜𑁆𑀜𑀸𑀬… 𑀬𑁄 𑀲𑀗𑁆𑀔𑀸𑀭𑀸𑀦𑀁… 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄, 𑀭𑁄𑀕𑀸𑀦𑀁 𑀞𑀺𑀢𑀺, 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀦𑀺𑀭𑁄𑀥𑁄, 𑀭𑁄𑀕𑀸𑀦𑀁 𑀯𑀽𑀧𑀲𑀫𑁄, 𑀚𑀭𑀸𑀫𑀭𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀬𑁄 𑀯𑁂𑀤𑀦𑀸𑀬… 𑀬𑁄 𑀲𑀜𑁆𑀜𑀸𑀬… 𑀬𑁄 𑀲𑀗𑁆𑀔𑀸𑀭𑀸𑀦𑀁… 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀦𑀺𑀭𑁄𑀥𑁄, 𑀭𑁄𑀕𑀸𑀦𑀁 𑀯𑀽𑀧𑀲𑀫𑁄, 𑀚𑀭𑀸𑀫𑀭𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’’𑀢𑀺. 𑀤𑀲𑀫𑀁.

𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.