𑁬. 𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀁

𑁧. 𑀘𑀓𑁆𑀔𑀼𑀲𑀼𑀢𑁆𑀢𑀁

𑁩𑁨𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑁄𑀢𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀖𑀸𑀦𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀚𑀺𑀯𑁆𑀳𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀓𑀸𑀬𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀫𑀦𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀜𑁆𑀘𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀔𑀸𑀬𑀢𑀺, 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀧𑀞𑀫𑀁.

𑁨. 𑀭𑀽𑀧𑀲𑀼𑀢𑁆𑀢𑀁

𑁩𑁨𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑁂𑀲𑀼 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑀤𑁆𑀤𑁂𑀲𑀼… 𑀬𑁄 𑀕𑀦𑁆𑀥𑁂𑀲𑀼… 𑀬𑁄 𑀭𑀲𑁂𑀲𑀼… 𑀬𑁄 𑀨𑁄𑀝𑁆𑀞𑀩𑁆𑀩𑁂𑀲𑀼… 𑀬𑁄 𑀥𑀫𑁆𑀫𑁂𑀲𑀼 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀜𑁆𑀘𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀔𑀸𑀬𑀢𑀺, 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀤𑀼𑀢𑀺𑀬𑀁.

𑁩. 𑀯𑀺𑀜𑁆𑀜𑀸𑀡𑀲𑀼𑀢𑁆𑀢𑀁

𑁩𑁨𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀫𑀺𑀁… 𑀬𑁄 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀫𑀺𑀁… 𑀬𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀫𑀺𑀁… 𑀬𑁄 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀫𑀺𑀁… 𑀬𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀜𑁆𑀘𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀔𑀸𑀬𑀢𑀺, 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀢𑀢𑀺𑀬𑀁.

𑁪. 𑀲𑀫𑁆𑀨𑀲𑁆𑀲𑀲𑀼𑀢𑁆𑀢𑀁

𑁩𑁨𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑁄𑀢𑀲𑀫𑁆𑀨𑀲𑁆𑀲𑀲𑁆𑀫𑀺𑀁… 𑀬𑁄 𑀖𑀸𑀦𑀲𑀫𑁆𑀨𑀲𑁆𑀲𑀲𑁆𑀫𑀺𑀁… 𑀬𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀲𑁆𑀫𑀺𑀁… 𑀬𑁄 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀫𑀺𑀁… 𑀬𑁄 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄…𑀧𑁂… 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑁆𑀨𑀲𑁆𑀲𑀚𑀲𑀼𑀢𑁆𑀢𑀁

𑁩𑁨𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑁄𑀢𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬… 𑀬𑁄 𑀖𑀸𑀦𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬… 𑀬𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬… 𑀬𑁄 𑀓𑀸𑀬𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬… 𑀬𑁄 𑀫𑀦𑁄𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄…𑀧𑁂… 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀜𑁆𑀜𑀸𑀲𑀼𑀢𑁆𑀢𑀁

𑁩𑁨𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑀜𑁆𑀜𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑀤𑁆𑀤𑀲𑀜𑁆𑀜𑀸𑀬… 𑀬𑁄 𑀕𑀦𑁆𑀥𑀲𑀜𑁆𑀜𑀸𑀬… 𑀬𑁄 𑀭𑀲𑀲𑀜𑁆𑀜𑀸𑀬… 𑀬𑁄 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸𑀬… 𑀬𑁄 𑀥𑀫𑁆𑀫𑀲𑀜𑁆𑀜𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄…𑀧𑁂… 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀙𑀝𑁆𑀞𑀁.

𑁭. 𑀲𑀜𑁆𑀘𑁂𑀢𑀦𑀸𑀲𑀼𑀢𑁆𑀢𑀁

𑁩𑁨𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑀜𑁆𑀘𑁂𑀢𑀦𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑀤𑁆𑀤𑀲𑀜𑁆𑀘𑁂𑀢𑀦𑀸𑀬… 𑀬𑁄 𑀕𑀦𑁆𑀥𑀲𑀜𑁆𑀘𑁂𑀢𑀦𑀸𑀬… 𑀬𑁄 𑀭𑀲𑀲𑀜𑁆𑀘𑁂𑀢𑀦𑀸𑀬… 𑀬𑁄 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸𑀬… 𑀬𑁄 𑀥𑀫𑁆𑀫𑀲𑀜𑁆𑀘𑁂𑀢𑀦𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄…𑀧𑁂… 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀲𑀢𑁆𑀢𑀫𑀁.

𑁮. 𑀢𑀡𑁆𑀳𑀸𑀲𑀼𑀢𑁆𑀢𑀁

𑁩𑁨𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀢𑀡𑁆𑀳𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀲𑀤𑁆𑀤𑀢𑀡𑁆𑀳𑀸𑀬… 𑀬𑁄 𑀕𑀦𑁆𑀥𑀢𑀡𑁆𑀳𑀸𑀬… 𑀬𑁄 𑀭𑀲𑀢𑀡𑁆𑀳𑀸𑀬… 𑀬𑁄 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸𑀬… 𑀬𑁄 𑀥𑀫𑁆𑀫𑀢𑀡𑁆𑀳𑀸𑀬 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄…𑀧𑁂… 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀅𑀝𑁆𑀞𑀫𑀁.

𑁯. 𑀥𑀸𑀢𑀼𑀲𑀼𑀢𑁆𑀢𑀁

𑁩𑁩𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀧𑀣𑀯𑀻𑀥𑀸𑀢𑀼𑀬𑀸 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑁄 𑀆𑀧𑁄𑀥𑀸𑀢𑀼𑀬𑀸… 𑀬𑁄 𑀢𑁂𑀚𑁄𑀥𑀸𑀢𑀼𑀬𑀸… 𑀬𑁄 𑀯𑀸𑀬𑁄𑀥𑀸𑀢𑀼𑀬𑀸… 𑀬𑁄 𑀆𑀓𑀸𑀲𑀥𑀸𑀢𑀼𑀬𑀸… 𑀬𑁄 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀜𑁆𑀘𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀔𑀸𑀬𑀢𑀺, 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀦𑀯𑀫𑀁.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀁

𑁩𑁩𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄…𑀧𑁂… 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀜𑁆𑀘𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀔𑀸𑀬𑀢𑀺, 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀤𑀲𑀫𑀁.

𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.