𑁩. 𑀪𑀯𑀦𑁂𑀢𑁆𑀢𑀺𑀲𑀼𑀢𑁆𑀢𑀁

𑁧𑁬𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄 [𑀪𑀯𑀦𑁂𑀢𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’𑀢𑀺 [𑀪𑀯𑀦𑁂𑀢𑁆𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁.)], 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑀦𑁂𑀢𑁆𑀢𑀺, 𑀓𑀢𑀫𑁄 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’’𑀢𑀺? ‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀦𑁂𑀢𑁆𑀢𑀺. 𑀢𑁂𑀲𑀁 𑀦𑀺𑀭𑁄𑀥𑁄 [𑀦𑀺𑀭𑁄𑀥𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 … 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄…𑀧𑁂… 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀦𑁂𑀢𑁆𑀢𑀺. 𑀢𑁂𑀲𑀁 𑀦𑀺𑀭𑁄𑀥𑁄 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’’𑀢𑀺. 𑀢𑀢𑀺𑀬𑀁.