𑁨. 𑀭𑀸𑀥𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀫𑀸𑀭𑀲𑀼𑀢𑁆𑀢𑀁

𑁧𑁬𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀫𑀸𑀭𑁄, 𑀫𑀸𑀭𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀭𑁄’’𑀢𑀺? ‘‘𑀭𑀽𑀧𑁂 𑀔𑁄, 𑀭𑀸𑀥, 𑀲𑀢𑀺 𑀫𑀸𑀭𑁄 𑀯𑀸 𑀅𑀲𑁆𑀲 𑀫𑀸𑀭𑁂𑀢𑀸 𑀯𑀸 𑀬𑁄 𑀯𑀸 𑀧𑀦 𑀫𑀻𑀬𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀭𑀸𑀥, 𑀭𑀽𑀧𑀁 𑀫𑀸𑀭𑁄𑀢𑀺 𑀧𑀲𑁆𑀲, 𑀫𑀸𑀭𑁂𑀢𑀸𑀢𑀺 𑀧𑀲𑁆𑀲, 𑀫𑀻𑀬𑀢𑀻𑀢𑀺 𑀧𑀲𑁆𑀲, 𑀭𑁄𑀕𑁄𑀢𑀺 𑀧𑀲𑁆𑀲, 𑀕𑀡𑁆𑀟𑁄𑀢𑀺 𑀧𑀲𑁆𑀲, 𑀲𑀮𑁆𑀮𑀦𑁆𑀢𑀺 𑀧𑀲𑁆𑀲, 𑀅𑀖𑀦𑁆𑀢𑀺 𑀧𑀲𑁆𑀲, 𑀅𑀖𑀪𑀽𑀢𑀦𑁆𑀢𑀺 𑀧𑀲𑁆𑀲. 𑀬𑁂 𑀦𑀁 𑀏𑀯𑀁 𑀧𑀲𑁆𑀲𑀦𑁆𑀢𑀺 𑀢𑁂 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀺. 𑀯𑁂𑀤𑀦𑀸𑀬 𑀲𑀢𑀺… 𑀲𑀜𑁆𑀜𑀸𑀬 𑀲𑀢𑀺… 𑀲𑀗𑁆𑀔𑀸𑀭𑁂𑀲𑀼 𑀲𑀢𑀺… 𑀯𑀺𑀜𑁆𑀜𑀸𑀡𑁂 𑀲𑀢𑀺 𑀫𑀸𑀭𑁄 𑀯𑀸 𑀅𑀲𑁆𑀲 𑀫𑀸𑀭𑁂𑀢𑀸 𑀯𑀸 𑀬𑁄 𑀯𑀸 𑀧𑀦 𑀫𑀻𑀬𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀭𑀸𑀥, 𑀯𑀺𑀜𑁆𑀜𑀸𑀡𑀁 𑀫𑀸𑀭𑁄𑀢𑀺 𑀧𑀲𑁆𑀲, 𑀫𑀸𑀭𑁂𑀢𑀸𑀢𑀺 𑀧𑀲𑁆𑀲, 𑀫𑀻𑀬𑀢𑀻𑀢𑀺 𑀧𑀲𑁆𑀲, 𑀭𑁄𑀕𑁄𑀢𑀺 𑀧𑀲𑁆𑀲, 𑀕𑀡𑁆𑀟𑁄𑀢𑀺 𑀧𑀲𑁆𑀲, 𑀲𑀮𑁆𑀮𑀦𑁆𑀢𑀺 𑀧𑀲𑁆𑀲, 𑀅𑀖𑀦𑁆𑀢𑀺 𑀧𑀲𑁆𑀲, 𑀅𑀖𑀪𑀽𑀢𑀦𑁆𑀢𑀺 𑀧𑀲𑁆𑀲. 𑀬𑁂 𑀦𑀁 𑀏𑀯𑀁 𑀧𑀲𑁆𑀲𑀦𑁆𑀢𑀺, 𑀢𑁂 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀻’’𑀢𑀺.

‘‘𑀲𑀫𑁆𑀫𑀸𑀤𑀲𑁆𑀲𑀦𑀁 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬’’𑀦𑁆𑀢𑀺? ‘‘𑀲𑀫𑁆𑀫𑀸𑀤𑀲𑁆𑀲𑀦𑀁 𑀔𑁄, 𑀭𑀸𑀥, 𑀦𑀺𑀩𑁆𑀩𑀺𑀤𑀢𑁆𑀣𑀁’’. ‘‘𑀦𑀺𑀩𑁆𑀩𑀺𑀤𑀸 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀸’’𑀢𑀺? ‘‘𑀦𑀺𑀩𑁆𑀩𑀺𑀤𑀸 𑀔𑁄, 𑀭𑀸𑀥, 𑀯𑀺𑀭𑀸𑀕𑀢𑁆𑀣𑀸’’. ‘‘𑀯𑀺𑀭𑀸𑀕𑁄 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑁄’’𑀢𑀺? ‘‘𑀯𑀺𑀭𑀸𑀕𑁄 𑀔𑁄, 𑀭𑀸𑀥, 𑀯𑀺𑀫𑀼𑀢𑁆𑀢𑀢𑁆𑀣𑁄’’. ‘‘𑀯𑀺𑀫𑀼𑀢𑁆𑀢𑀺 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬𑀸’’𑀢𑀺? ‘‘𑀯𑀺𑀫𑀼𑀢𑁆𑀢𑀺 𑀔𑁄, 𑀭𑀸𑀥, 𑀦𑀺𑀩𑁆𑀩𑀸𑀦𑀢𑁆𑀣𑀸’’. ‘‘𑀦𑀺𑀩𑁆𑀩𑀸𑀦𑀁 𑀧𑀦, 𑀪𑀦𑁆𑀢𑁂, 𑀓𑀺𑀫𑀢𑁆𑀣𑀺𑀬’’𑀦𑁆𑀢𑀺? ‘‘𑀅𑀘𑁆𑀘𑀬𑀸𑀲𑀺 [𑀅𑀘𑁆𑀘𑀲𑀭𑀸 (𑀲𑀻. 𑀲𑁆𑀬𑀸. 𑀓𑀁.), 𑀅𑀲𑁆𑀲 (𑀧𑀻.), 𑀅𑀘𑁆𑀘𑀬𑀸 (𑀓.)], 𑀭𑀸𑀥, 𑀧𑀜𑁆𑀳𑀁, 𑀦𑀸𑀲𑀓𑁆𑀔𑀺 𑀧𑀜𑁆𑀳𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀁. 𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺, 𑀭𑀸𑀥, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀦𑀺𑀩𑁆𑀩𑀸𑀦𑀧𑀭𑀸𑀬𑀦𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀧𑀞𑀫𑀁.

𑁨. 𑀲𑀢𑁆𑀢𑀲𑀼𑀢𑁆𑀢𑀁

𑁧𑁬𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀢𑁆𑀢𑁄, 𑀲𑀢𑁆𑀢𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄, 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄, 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀭𑀸𑀥, 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑀸 𑀧𑀁𑀲𑁆𑀯𑀸𑀕𑀸𑀭𑀓𑁂𑀳𑀺 𑀓𑀻𑀴𑀦𑁆𑀢𑀺. 𑀬𑀸𑀯𑀓𑀻𑀯𑀜𑁆𑀘 𑀢𑁂𑀲𑀼 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀅𑀯𑀺𑀕𑀢𑀭𑀸𑀕𑀸 𑀳𑁄𑀦𑁆𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑀸 𑀅𑀯𑀺𑀕𑀢𑀧𑁂𑀫𑀸 𑀅𑀯𑀺𑀕𑀢𑀧𑀺𑀧𑀸𑀲𑀸 𑀅𑀯𑀺𑀕𑀢𑀧𑀭𑀺𑀴𑀸𑀳𑀸 𑀅𑀯𑀺𑀕𑀢𑀢𑀡𑁆𑀳𑀸, 𑀢𑀸𑀯 𑀢𑀸𑀦𑀺 𑀧𑀁𑀲𑁆𑀯𑀸𑀕𑀸𑀭𑀓𑀸𑀦𑀺 𑀅𑀮𑁆𑀮𑀻𑀬𑀦𑁆𑀢𑀺 𑀓𑁂𑀴𑀸𑀬𑀦𑁆𑀢𑀺 𑀥𑀦𑀸𑀬𑀦𑁆𑀢𑀺 [𑀫𑀦𑀸𑀬𑀦𑁆𑀢𑀺 (𑀲𑀻. 𑀧𑀻. 𑀓.)] 𑀫𑀫𑀸𑀬𑀦𑁆𑀢𑀺. 𑀬𑀢𑁄 𑀘 𑀔𑁄, 𑀭𑀸𑀥, 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑀸 𑀢𑁂𑀲𑀼 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀯𑀺𑀕𑀢𑀭𑀸𑀕𑀸 𑀳𑁄𑀦𑁆𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑀸 𑀯𑀺𑀕𑀢𑀧𑁂𑀫𑀸 𑀯𑀺𑀕𑀢𑀧𑀺𑀧𑀸𑀲𑀸 𑀯𑀺𑀕𑀢𑀧𑀭𑀺𑀴𑀸𑀳𑀸 𑀯𑀺𑀕𑀢𑀢𑀡𑁆𑀳𑀸, 𑀅𑀣 𑀔𑁄 𑀢𑀸𑀦𑀺 𑀧𑀁𑀲𑁆𑀯𑀸𑀕𑀸𑀭𑀓𑀸𑀦𑀺 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀺𑀓𑀺𑀭𑀦𑁆𑀢𑀺 𑀯𑀺𑀥𑀫𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀺 𑀯𑀺𑀓𑀻𑀴𑀦𑀺𑀬𑀁 [𑀯𑀺𑀓𑀻𑀴𑀦𑀺𑀓𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀭𑁄𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀭𑀸𑀥, 𑀢𑀼𑀫𑁆𑀳𑁂𑀧𑀺 𑀭𑀽𑀧𑀁 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀣 𑀢𑀡𑁆𑀳𑀸𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀯𑁂𑀤𑀦𑀁 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀣 𑀢𑀡𑁆𑀳𑀸𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀣 𑀢𑀡𑁆𑀳𑀸𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀯𑀺𑀜𑁆𑀜𑀸𑀡𑀁 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀣 𑀢𑀡𑁆𑀳𑀸𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀢𑀡𑁆𑀳𑀸𑀓𑁆𑀔𑀬𑁄 𑀳𑀺, 𑀭𑀸𑀥, 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀪𑀯𑀦𑁂𑀢𑁆𑀢𑀺𑀲𑀼𑀢𑁆𑀢𑀁

𑁧𑁬𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄 [𑀪𑀯𑀦𑁂𑀢𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’𑀢𑀺 [𑀪𑀯𑀦𑁂𑀢𑁆𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁.)], 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑀦𑁂𑀢𑁆𑀢𑀺, 𑀓𑀢𑀫𑁄 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’’𑀢𑀺? ‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀦𑁂𑀢𑁆𑀢𑀺. 𑀢𑁂𑀲𑀁 𑀦𑀺𑀭𑁄𑀥𑁄 [𑀦𑀺𑀭𑁄𑀥𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 … 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄…𑀧𑁂… 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀦𑁂𑀢𑁆𑀢𑀺. 𑀢𑁂𑀲𑀁 𑀦𑀺𑀭𑁄𑀥𑁄 𑀪𑀯𑀦𑁂𑀢𑁆𑀢𑀺𑀦𑀺𑀭𑁄𑀥𑁄’’𑀢𑀺. 𑀢𑀢𑀺𑀬𑀁.

𑁪. 𑀧𑀭𑀺𑀜𑁆𑀜𑁂𑀬𑁆𑀬𑀲𑀼𑀢𑁆𑀢𑀁

𑁧𑁬𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀆𑀬𑀲𑁆𑀫𑀸 𑀭𑀸𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀭𑀺𑀜𑁆𑀜𑁂𑀬𑁆𑀬𑁂 𑀘, 𑀭𑀸𑀥, 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺 𑀧𑀭𑀺𑀜𑁆𑀜𑀜𑁆𑀘 𑀧𑀭𑀺𑀜𑁆𑀜𑀸𑀢𑀸𑀯𑀺𑀁 𑀧𑀼𑀕𑁆𑀕𑀮𑀜𑁆𑀘. 𑀢𑀁 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂 𑀘, 𑀭𑀸𑀥, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸? 𑀭𑀽𑀧𑀁 𑀔𑁄, 𑀭𑀸𑀥, 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀯𑁂𑀤𑀦𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀲𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀭𑀸𑀥, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀓𑀢𑀫𑀸 𑀘, 𑀭𑀸𑀥, 𑀧𑀭𑀺𑀜𑁆𑀜𑀸? 𑀬𑁄 𑀔𑁄, 𑀭𑀸𑀥, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀸𑀥, 𑀧𑀭𑀺𑀜𑁆𑀜𑀸. 𑀓𑀢𑀫𑁄 𑀘, 𑀭𑀸𑀥, 𑀧𑀭𑀺𑀜𑁆𑀜𑀸𑀢𑀸𑀯𑀻 𑀧𑀼𑀕𑁆𑀕𑀮𑁄? ‘𑀅𑀭𑀳𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀸𑀥, 𑀧𑀭𑀺𑀜𑁆𑀜𑀸𑀢𑀸𑀯𑀻 𑀧𑀼𑀕𑁆𑀕𑀮𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑀡𑀲𑀼𑀢𑁆𑀢𑀁

𑁧𑁬𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀺𑀫𑁂, 𑀭𑀸𑀥, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑁂 𑀳𑀺 𑀓𑁂𑀘𑀺, 𑀭𑀸𑀥, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺; 𑀦 𑀫𑁂 𑀢𑁂, 𑀭𑀸𑀥, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀬𑁂 𑀘 𑀔𑁄 𑀓𑁂𑀘𑀺, 𑀭𑀸𑀥, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺; 𑀢𑁂 𑀔𑁄 𑀫𑁂, 𑀭𑀸𑀥, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀫𑀡𑀲𑀼𑀢𑁆𑀢𑀁

𑁧𑁬𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀺𑀫𑁂, 𑀭𑀸𑀥, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑁂 𑀳𑀺 𑀓𑁂𑀘𑀺, 𑀭𑀸𑀥, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑁄𑀢𑀸𑀧𑀦𑁆𑀦𑀲𑀼𑀢𑁆𑀢𑀁

𑁧𑁬𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀺𑀫𑁂, 𑀭𑀸𑀥, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀢𑁄 𑀔𑁄, 𑀭𑀸𑀥, 𑀅𑀭𑀺𑀬𑀲𑀸𑀯𑀓𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀸𑀥, 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁧𑁬𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀺𑀫𑁂, 𑀭𑀸𑀥, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀢𑁄 𑀔𑁄, 𑀭𑀸𑀥, 𑀪𑀺𑀓𑁆𑀔𑀼 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀸𑀥, 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀁

𑁧𑁬𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀯𑁂𑀤𑀦𑀸𑀬 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀲𑀸 𑀯𑁂𑀤𑀦𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑁂 𑀲𑀗𑁆𑀔𑀸𑀭𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺…𑀧𑁂… 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀁

𑁧𑁬𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀯𑁂𑀤𑀦𑀸𑀬 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀲𑀸 𑀯𑁂𑀤𑀦𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀢𑁂 𑀲𑀗𑁆𑀔𑀸𑀭𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀤𑀲𑀫𑀁.

𑀭𑀸𑀥𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀭𑁄 𑀲𑀢𑁆𑀢𑁄 𑀪𑀯𑀦𑁂𑀢𑁆𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀲𑀫𑀡𑀸 𑀤𑀼𑀯𑁂;

𑀲𑁄𑀢𑀸𑀧𑀦𑁆𑀦𑁄 𑀅𑀭𑀳𑀸 𑀘, 𑀙𑀦𑁆𑀤𑀭𑀸𑀕𑀸𑀧𑀭𑁂 𑀤𑀼𑀯𑁂𑀢𑀺.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀫𑀸𑀭𑀲𑀼𑀢𑁆𑀢𑀁

𑁧𑁭𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀫𑀸𑀭𑁄, 𑀫𑀸𑀭𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀭𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀫𑀸𑀭𑁄, 𑀯𑁂𑀤𑀦𑀸 𑀫𑀸𑀭𑁄, 𑀲𑀜𑁆𑀜𑀸 𑀫𑀸𑀭𑁄, 𑀲𑀗𑁆𑀔𑀸𑀭𑀸 𑀫𑀸𑀭𑁄, 𑀯𑀺𑀜𑁆𑀜𑀸𑀡𑀁 𑀫𑀸𑀭𑁄. 𑀏𑀯𑀁 𑀧𑀲𑁆𑀲𑀁, 𑀭𑀸𑀥, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀧𑀞𑀫𑀁.

𑁨. 𑀫𑀸𑀭𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀫𑀸𑀭𑀥𑀫𑁆𑀫𑁄, 𑀫𑀸𑀭𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀭𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀫𑀸𑀭𑀥𑀫𑁆𑀫𑁄, 𑀯𑁂𑀤𑀦𑀸 𑀫𑀸𑀭𑀥𑀫𑁆𑀫𑁄, 𑀲𑀜𑁆𑀜𑀸 𑀫𑀸𑀭𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀫𑀸𑀭𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀫𑀸𑀭𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀦𑀺𑀘𑁆𑀘𑀲𑀼𑀢𑁆𑀢𑀁

𑁧𑁭𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘’𑀦𑁆𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀺𑀘𑁆𑀘’’𑀦𑁆𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀦𑀺𑀘𑁆𑀘𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀅𑀦𑀺𑀘𑁆𑀘𑀥𑀫𑁆𑀫𑁄, 𑀅𑀦𑀺𑀘𑁆𑀘𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀺𑀘𑁆𑀘𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀥𑀫𑁆𑀫𑁄, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀥𑀫𑁆𑀫𑁄, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀓𑁆𑀔𑀲𑀼𑀢𑁆𑀢𑀁

𑁧𑁭𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀤𑀼𑀓𑁆𑀔𑀁, 𑀤𑀼𑀓𑁆𑀔’𑀦𑁆𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀤𑀼𑀓𑁆𑀔’’𑀦𑁆𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀤𑀼𑀓𑁆𑀔𑀁, 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀲𑀜𑁆𑀜𑀸 𑀤𑀼𑀓𑁆𑀔𑀸, 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀁. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀓𑁆𑀔𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀤𑀼𑀓𑁆𑀔𑀥𑀫𑁆𑀫𑁄, 𑀤𑀼𑀓𑁆𑀔𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀤𑀼𑀓𑁆𑀔𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀤𑀼𑀓𑁆𑀔𑀥𑀫𑁆𑀫𑁄, 𑀯𑁂𑀤𑀦𑀸 𑀤𑀼𑀓𑁆𑀔𑀥𑀫𑁆𑀫𑁄, 𑀲𑀜𑁆𑀜𑀸 𑀤𑀼𑀓𑁆𑀔𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀅𑀦𑀢𑁆𑀢𑀲𑀼𑀢𑁆𑀢𑀁

𑁧𑁭𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀅𑀦𑀢𑁆𑀢𑀸, 𑀅𑀦𑀢𑁆𑀢𑀸’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀢𑁆𑀢𑀸’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀦𑀢𑁆𑀢𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀅𑀦𑀢𑁆𑀢𑀥𑀫𑁆𑀫𑁄, 𑀅𑀦𑀢𑁆𑀢𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀢𑁆𑀢𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀅𑀦𑀢𑁆𑀢𑀥𑀫𑁆𑀫𑁄, 𑀯𑁂𑀤𑀦𑀸 𑀅𑀦𑀢𑁆𑀢𑀥𑀫𑁆𑀫𑁄, 𑀲𑀜𑁆𑀜𑀸 𑀅𑀦𑀢𑁆𑀢𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯.𑀔𑀬𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀔𑀬𑀥𑀫𑁆𑀫𑁄, 𑀔𑀬𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀔𑀬𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀔𑀬𑀥𑀫𑁆𑀫𑁄, 𑀯𑁂𑀤𑀦𑀸 𑀔𑀬𑀥𑀫𑁆𑀫𑁄, 𑀲𑀜𑁆𑀜𑀸 𑀔𑀬𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀔𑀬𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀔𑀬𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀯𑀬𑀥𑀫𑁆𑀫𑀲𑀼𑀢𑁆𑀢𑀁

𑁧𑁭𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀯𑀬𑀥𑀫𑁆𑀫𑁄, 𑀯𑀬𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀬𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀯𑀬𑀥𑀫𑁆𑀫𑁄, 𑀯𑁂𑀤𑀦𑀸 𑀯𑀬𑀥𑀫𑁆𑀫𑁄, 𑀲𑀜𑁆𑀜𑀸 𑀯𑀬𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀯𑀬𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀯𑀬𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀤𑀲𑀫𑀁.

𑁧𑁧. 𑀲𑀫𑀼𑀤𑀬𑀥𑀫𑁆𑀫𑀲𑀼𑀢𑁆𑀢𑀁

𑁧𑁮𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀫𑀼𑀤𑀬𑀥𑀫𑁆𑀫𑁄, 𑀲𑀫𑀼𑀤𑀬𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀼𑀤𑀬𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀲𑀫𑀼𑀤𑀬𑀥𑀫𑁆𑀫𑁄, 𑀯𑁂𑀤𑀦𑀸 𑀲𑀫𑀼𑀤𑀬𑀥𑀫𑁆𑀫𑁄, 𑀲𑀜𑁆𑀜𑀸 𑀲𑀫𑀼𑀤𑀬𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀲𑀫𑀼𑀤𑀬𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀲𑀫𑀼𑀤𑀬𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀦𑀺𑀭𑁄𑀥𑀥𑀫𑁆𑀫𑀲𑀼𑀢𑁆𑀢𑀁

𑁧𑁮𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀦𑀺𑀭𑁄𑀥𑀥𑀫𑁆𑀫𑁄, 𑀦𑀺𑀭𑁄𑀥𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀦𑀺𑀭𑁄𑀥𑀥𑀫𑁆𑀫𑁄’’𑀢𑀺? ‘‘𑀭𑀽𑀧𑀁 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄, 𑀯𑁂𑀤𑀦𑀸 𑀦𑀺𑀭𑁄𑀥𑀥𑀫𑁆𑀫𑁄, 𑀲𑀜𑁆𑀜𑀸 𑀦𑀺𑀭𑁄𑀥𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀦𑀺𑀭𑁄𑀥𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀦𑀺𑀭𑁄𑀥𑀥𑀫𑁆𑀫𑁄. 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀤𑁆𑀯𑀸𑀤𑀲𑀫𑀁.

𑀭𑀸𑀥𑀲𑀁𑀬𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀭𑁄 𑀘 𑀫𑀸𑀭𑀥𑀫𑁆𑀫𑁄 𑀘, 𑀅𑀦𑀺𑀘𑁆𑀘𑁂𑀦 𑀅𑀧𑀭𑁂 𑀤𑀼𑀯𑁂;

𑀤𑀼𑀓𑁆𑀔𑁂𑀦 𑀘 𑀤𑀼𑀯𑁂 𑀯𑀼𑀢𑁆𑀢𑀸, 𑀅𑀦𑀢𑁆𑀢𑁂𑀦 [𑀅𑀦𑀢𑁆𑀢𑁂𑀳𑀺 (𑀲𑀻. 𑀲𑁆𑀬𑀸. 𑀓𑀁.)] 𑀢𑀣𑁂𑀯 𑀘;

𑀔𑀬𑀯𑀬𑀲𑀫𑀼𑀤𑀬𑀁, 𑀦𑀺𑀭𑁄𑀥𑀥𑀫𑁆𑀫𑁂𑀦 𑀤𑁆𑀯𑀸𑀤𑀲𑀸𑀢𑀺.

𑁩. 𑀆𑀬𑀸𑀘𑀦𑀯𑀕𑁆𑀕𑁄

𑁧-𑁧𑁧. 𑀫𑀸𑀭𑀸𑀤𑀺𑀲𑀼𑀢𑁆𑀢𑀏𑀓𑀸𑀤𑀲𑀓𑀁

𑁧𑁮𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀬𑁄 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄 [𑀲𑀻𑀳𑀴𑀧𑁄𑀢𑁆𑀣𑀓𑁂 𑀧𑀦 ‘‘𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢𑀁, 𑀢𑀢𑁆𑀭 𑀢𑁂 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢𑀁, 𑀢𑀢𑁆𑀭 𑀢𑁂 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀻𑀡𑀺 𑀲𑀼𑀢𑁆𑀢𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀏𑀯𑀫𑀼𑀧𑀭𑀺𑀲𑀼𑀢𑁆𑀢𑁂𑀲𑀼𑀧𑀺]. 𑀓𑁄 𑀘, 𑀭𑀸𑀥, 𑀫𑀸𑀭𑁄? 𑀭𑀽𑀧𑀁 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄 [𑀲𑀻𑀳𑀴𑀧𑁄𑀢𑁆𑀣𑀓𑁂 𑀧𑀦 ‘‘𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢𑀁, 𑀢𑀢𑁆𑀭 𑀢𑁂 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢𑀁, 𑀢𑀢𑁆𑀭 𑀢𑁂 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄𑀢𑀺 𑀏𑀓𑀁 𑀲𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀻𑀡𑀺 𑀲𑀼𑀢𑁆𑀢𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀏𑀯𑀫𑀼𑀧𑀭𑀺𑀲𑀼𑀢𑁆𑀢𑁂𑀲𑀼𑀧𑀺]. 𑀯𑁂𑀤𑀦𑀸 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀲𑀜𑁆𑀜𑀸 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀲𑀗𑁆𑀔𑀸𑀭𑀸 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀯𑀺𑀜𑁆𑀜𑀸𑀡𑀁 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀬𑁄 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄’’𑀢𑀺.

𑁧𑁮𑁩. 𑀬𑁄 𑀔𑁄, 𑀭𑀸𑀥, 𑀫𑀸𑀭𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄…𑀧𑁂….

𑁧𑁮𑁪. 𑀬𑀁 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀁…𑀧𑁂….

𑁧𑁮𑁫. 𑀬𑁄 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀥𑀫𑁆𑀫𑁄…𑀧𑁂….

𑁧𑁮𑁬. 𑀬𑀁 𑀔𑁄, 𑀭𑀸𑀥, 𑀤𑀼𑀓𑁆𑀔𑀁…𑀧𑁂….

𑁧𑁮𑁭. 𑀬𑁄 𑀔𑁄, 𑀭𑀸𑀥, 𑀤𑀼𑀓𑁆𑀔𑀥𑀫𑁆𑀫𑁄…𑀧𑁂….

𑁧𑁮𑁮. 𑀬𑁄 𑀔𑁄, 𑀭𑀸𑀥, 𑀅𑀦𑀢𑁆𑀢𑀸…𑀧𑁂….

𑁧𑁮𑁯. 𑀬𑁄 𑀔𑁄, 𑀭𑀸𑀥, 𑀅𑀦𑀢𑁆𑀢𑀥𑀫𑁆𑀫𑁄…𑀧𑁂….

𑁧𑁯𑁦. 𑀬𑁄 𑀔𑁄, 𑀭𑀸𑀥, 𑀔𑀬𑀥𑀫𑁆𑀫𑁄…𑀧𑁂….

𑁧𑁯𑁧. 𑀬𑁄 𑀔𑁄, 𑀭𑀸𑀥, 𑀯𑀬𑀥𑀫𑁆𑀫𑁄…𑀧𑁂….

𑁧𑁯𑁨. 𑀬𑁄 𑀔𑁄, 𑀭𑀸𑀥, 𑀲𑀫𑀼𑀤𑀬𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄…𑀧𑁂….

𑁧𑁨. 𑀦𑀺𑀭𑁄𑀥𑀥𑀫𑁆𑀫𑀲𑀼𑀢𑁆𑀢𑀁

𑁧𑁯𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

‘‘𑀬𑁄 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄. 𑀓𑁄 𑀘, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄? 𑀭𑀽𑀧𑀁 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀯𑁂𑀤𑀦𑀸 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀲𑀜𑁆𑀜𑀸 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀲𑀗𑁆𑀔𑀸𑀭𑀸 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀬𑁄 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄’’𑀢𑀺 [𑀲𑀻𑀳𑀴𑀧𑁄𑀢𑁆𑀣𑀓𑁂 𑀧𑀦 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀙𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀏𑀓𑁂𑀓𑀁 𑀲𑀼𑀢𑁆𑀢𑀁 𑀢𑀻𑀡𑀺 𑀢𑀻𑀡𑀺 𑀓𑀢𑁆𑀯𑀸, 𑀏𑀯𑀁 𑀘𑀢𑀼𑀢𑁆𑀣𑀯𑀕𑁆𑀕𑁂𑀧𑀺].

𑀆𑀬𑀸𑀘𑀦𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀭𑁄 𑀘 𑀫𑀸𑀭𑀥𑀫𑁆𑀫𑁄 𑀘, 𑀅𑀦𑀺𑀘𑁆𑀘𑁂𑀦 𑀅𑀧𑀭𑁂 𑀤𑀼𑀯𑁂;

𑀤𑀼𑀓𑁆𑀔𑁂𑀦 𑀘 𑀤𑀼𑀯𑁂 𑀯𑀼𑀢𑁆𑀢𑀸, 𑀅𑀦𑀢𑁆𑀢𑁂𑀦 𑀢𑀣𑁂𑀯 𑀘;

𑀔𑀬𑀯𑀬𑀲𑀫𑀼𑀤𑀬𑀁, 𑀦𑀺𑀭𑁄𑀥𑀥𑀫𑁆𑀫𑁂𑀦 𑀤𑁆𑀯𑀸𑀤𑀲𑀸𑀢𑀺.

𑁪. 𑀉𑀧𑀦𑀺𑀲𑀺𑀦𑁆𑀦𑀯𑀕𑁆𑀕𑁄

𑁧-𑁧𑁧. 𑀫𑀸𑀭𑀸𑀤𑀺𑀲𑀼𑀢𑁆𑀢𑀏𑀓𑀸𑀤𑀲𑀓𑀁

𑁧𑁯𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀬𑁄 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄. 𑀓𑁄 𑀘, 𑀭𑀸𑀥, 𑀫𑀸𑀭𑁄? 𑀭𑀽𑀧𑀁 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀯𑀺𑀜𑁆𑀜𑀸𑀡𑀁 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀬𑁄 𑀔𑁄, 𑀭𑀸𑀥, 𑀫𑀸𑀭𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄’’𑀢𑀺.

𑁧𑁯𑁫. 𑀬𑁄 𑀔𑁄, 𑀭𑀸𑀥, 𑀫𑀸𑀭𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄…𑀧𑁂….

𑁧𑁯𑁬. 𑀬𑀁 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀁…𑀧𑁂….

𑁧𑁯𑁭. 𑀬𑁄 𑀔𑁄, 𑀭𑀸𑀥, 𑀅𑀦𑀺𑀘𑁆𑀘𑀥𑀫𑁆𑀫𑁄…𑀧𑁂….

𑁧𑁯𑁮. 𑀬𑀁 𑀔𑁄, 𑀭𑀸𑀥, 𑀤𑀼𑀓𑁆𑀔𑀁…𑀧𑁂….

𑁧𑁯𑁯. 𑀬𑁄 𑀔𑁄, 𑀭𑀸𑀥, 𑀤𑀼𑀓𑁆𑀔𑀥𑀫𑁆𑀫𑁄…𑀧𑁂….

𑁨𑁦𑁦. 𑀬𑁄 𑀔𑁄, 𑀭𑀸𑀥, 𑀅𑀦𑀢𑁆𑀢𑀸…𑀧𑁂….

𑁨𑁦𑁧. 𑀬𑁄 𑀔𑁄, 𑀭𑀸𑀥, 𑀅𑀦𑀢𑁆𑀢𑀥𑀫𑁆𑀫𑁄…𑀧𑁂….

𑁨𑁦𑁨. 𑀬𑁄 𑀔𑁄, 𑀭𑀸𑀥, 𑀔𑀬𑀥𑀫𑁆𑀫𑁄…𑀧𑁂….

𑁨𑁦𑁩. 𑀬𑁄 𑀔𑁄, 𑀭𑀸𑀥, 𑀯𑀬𑀥𑀫𑁆𑀫𑁄…𑀧𑁂….

𑁨𑁦𑁪. 𑀬𑁄 𑀔𑁄, 𑀭𑀸𑀥, 𑀲𑀫𑀼𑀤𑀬𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄…𑀧𑁂….

𑁧𑁨. 𑀦𑀺𑀭𑁄𑀥𑀥𑀫𑁆𑀫𑀲𑀼𑀢𑁆𑀢𑀁

𑁨𑁦𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀬𑁄 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄. 𑀓𑁄 𑀘, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄? 𑀭𑀽𑀧𑀁 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄. 𑀬𑁄 𑀔𑁄, 𑀭𑀸𑀥, 𑀦𑀺𑀭𑁄𑀥𑀥𑀫𑁆𑀫𑁄; 𑀢𑀢𑁆𑀭 𑀢𑁂 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄, 𑀭𑀸𑀕𑁄 𑀧𑀳𑀸𑀢𑀩𑁆𑀩𑁄, 𑀙𑀦𑁆𑀤𑀭𑀸𑀕𑁄 𑀧𑀳𑀸𑀢𑀩𑁆𑀩𑁄’’𑀢𑀺.

𑀉𑀧𑀦𑀺𑀲𑀺𑀦𑁆𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀭𑁄 𑀘 𑀫𑀸𑀭𑀥𑀫𑁆𑀫𑁄 𑀘, 𑀅𑀦𑀺𑀘𑁆𑀘𑁂𑀦 𑀅𑀧𑀭𑁂 𑀤𑀼𑀯𑁂;

𑀤𑀼𑀓𑁆𑀔𑁂𑀦 𑀘 𑀤𑀼𑀯𑁂 𑀯𑀼𑀢𑁆𑀢𑀸, 𑀅𑀦𑀢𑁆𑀢𑁂𑀦 𑀢𑀣𑁂𑀯 𑀘;

𑀔𑀬𑀯𑀬𑀲𑀫𑀼𑀤𑀬𑀁, 𑀦𑀺𑀭𑁄𑀥𑀥𑀫𑁆𑀫𑁂𑀦 𑀤𑁆𑀯𑀸𑀤𑀲𑀸𑀢𑀺.

𑀭𑀸𑀥𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.