𑁮. 𑀔𑀚𑁆𑀚𑀦𑀻𑀬𑀯𑀕𑁆𑀕𑁄

𑁧. 𑀅𑀲𑁆𑀲𑀸𑀤𑀲𑀼𑀢𑁆𑀢𑀁

𑁭𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸 … 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀧𑀞𑀫𑀁.

𑁨. 𑀲𑀫𑀼𑀤𑀬𑀲𑀼𑀢𑁆𑀢𑀁

𑁭𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀭𑀽𑀧𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀤𑀼𑀢𑀺𑀬𑀲𑀫𑀼𑀤𑀬𑀲𑀼𑀢𑁆𑀢𑀁

𑁭𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁭𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁; 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸; 𑀬𑀤𑀦𑀢𑁆𑀢𑀸 𑀢𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁; 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸; 𑀬𑀤𑀦𑀢𑁆𑀢𑀸 𑀢𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁’’.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺… 𑀲𑀜𑁆𑀜𑀸𑀬𑀧𑀺… 𑀲𑀗𑁆𑀔𑀸𑀭𑁂𑀲𑀼𑀧𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀯𑀸𑀲𑀸, 𑀬𑀸𑀯𑀢𑀸 𑀪𑀯𑀕𑁆𑀕𑀁, 𑀏𑀢𑁂 𑀅𑀕𑁆𑀕𑀸, 𑀏𑀢𑁂 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑀅𑀭𑀳𑀦𑁆𑀢𑁄’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀲𑀼𑀔𑀺𑀦𑁄 𑀯𑀢 𑀅𑀭𑀳𑀦𑁆𑀢𑁄, 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀺;

𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀫𑁄𑀳𑀚𑀸𑀮𑀁 𑀧𑀤𑀸𑀮𑀺𑀢𑀁.

‘‘𑀅𑀦𑁂𑀚𑀁 𑀢𑁂 𑀅𑀦𑀼𑀧𑁆𑀧𑀢𑁆𑀢𑀸, 𑀘𑀺𑀢𑁆𑀢𑀁 𑀢𑁂𑀲𑀁 𑀅𑀦𑀸𑀯𑀺𑀮𑀁;

𑀮𑁄𑀓𑁂 𑀅𑀦𑀼𑀧𑀮𑀺𑀢𑁆𑀢𑀸 𑀢𑁂, 𑀩𑁆𑀭𑀳𑁆𑀫𑀪𑀽𑀢𑀸 𑀅𑀦𑀸𑀲𑀯𑀸.

‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀕𑁄𑀘𑀭𑀸;

𑀧𑀲𑀁𑀲𑀺𑀬𑀸 𑀲𑀧𑁆𑀧𑀼𑀭𑀺𑀲𑀸, 𑀧𑀼𑀢𑁆𑀢𑀸 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸.

‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀺𑀢𑀸;

𑀅𑀦𑀼𑀯𑀺𑀘𑀭𑀦𑁆𑀢𑀺 𑀫𑀳𑀸𑀯𑀻𑀭𑀸, 𑀧𑀳𑀻𑀦𑀪𑀬𑀪𑁂𑀭𑀯𑀸.

‘‘𑀤𑀲𑀳𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀸, 𑀫𑀳𑀸𑀦𑀸𑀕𑀸 𑀲𑀫𑀸𑀳𑀺𑀢𑀸;

𑀏𑀢𑁂 𑀔𑁄 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀺.

‘‘𑀅𑀲𑁂𑀔𑀜𑀸𑀡𑀫𑀼𑀧𑁆𑀧𑀦𑁆𑀦𑀁, 𑀅𑀦𑁆𑀢𑀺𑀫𑁄𑀬𑀁 [𑀅𑀦𑁆𑀢𑀺𑀫𑀲𑁆𑀲 (𑀓.)] 𑀲𑀫𑀼𑀲𑁆𑀲𑀬𑁄;

𑀬𑁄 𑀲𑀸𑀭𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀢𑀲𑁆𑀫𑀺𑀁 𑀅𑀧𑀭𑀧𑀘𑁆𑀘𑀬𑀸.

‘‘𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀺, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀼𑀦𑀩𑁆𑀪𑀯𑀸;

𑀤𑀦𑁆𑀢𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀸, 𑀢𑁂 𑀮𑁄𑀓𑁂 𑀯𑀺𑀚𑀺𑀢𑀸𑀯𑀺𑀦𑁄.

‘‘𑀉𑀤𑁆𑀥𑀁 𑀢𑀺𑀭𑀺𑀬𑀁 𑀅𑀧𑀸𑀘𑀻𑀦𑀁, 𑀦𑀦𑁆𑀤𑀻 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀺;

𑀦𑀤𑀦𑁆𑀢𑀺 𑀢𑁂 𑀲𑀻𑀳𑀦𑀸𑀤𑀁, 𑀩𑀼𑀤𑁆𑀥𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀤𑀼𑀢𑀺𑀬𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁭𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁; 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸; 𑀬𑀤𑀦𑀢𑁆𑀢𑀸 𑀢𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺…𑀧𑁂… 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁’’.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺… 𑀲𑀜𑁆𑀜𑀸𑀬𑀧𑀺… 𑀲𑀗𑁆𑀔𑀸𑀭𑁂𑀲𑀼𑀧𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀯𑀸𑀲𑀸, 𑀬𑀸𑀯𑀢𑀸 𑀪𑀯𑀕𑁆𑀕𑀁, 𑀏𑀢𑁂 𑀅𑀕𑁆𑀕𑀸, 𑀏𑀢𑁂 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑀅𑀭𑀳𑀦𑁆𑀢𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀻𑀳𑀲𑀼𑀢𑁆𑀢𑀁

𑁭𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀢𑀺; 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀢𑀺; 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀺; 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺; 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀲𑀻𑀳𑀲𑁆𑀲 𑀫𑀺𑀕𑀭𑀜𑁆𑀜𑁄 𑀦𑀤𑀢𑁄 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺; 𑀬𑁂𑀪𑀼𑀬𑁆𑀬𑁂𑀦 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺; 𑀩𑀺𑀮𑀁 𑀩𑀺𑀮𑀸𑀲𑀬𑀸 𑀧𑀯𑀺𑀲𑀦𑁆𑀢𑀺; 𑀤𑀓𑀁 𑀤𑀓𑀸𑀲𑀬𑀸 𑀧𑀯𑀺𑀲𑀦𑁆𑀢𑀺; 𑀯𑀦𑀁 𑀯𑀦𑀸𑀲𑀬𑀸 𑀧𑀯𑀺𑀲𑀦𑁆𑀢𑀺; 𑀆𑀓𑀸𑀲𑀁 𑀧𑀓𑁆𑀔𑀺𑀦𑁄 𑀪𑀚𑀦𑁆𑀢𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀦𑀸𑀕𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼, 𑀤𑀴𑁆𑀳𑁂𑀳𑀺 𑀯𑀭𑀢𑁆𑀢𑁂𑀳𑀺 𑀩𑀤𑁆𑀥𑀸, 𑀢𑁂𑀧𑀺 𑀢𑀸𑀦𑀺 𑀩𑀦𑁆𑀥𑀦𑀸𑀦𑀺 𑀲𑀜𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀧𑀤𑀸𑀮𑁂𑀢𑁆𑀯𑀸 𑀪𑀻𑀢𑀸 𑀫𑀼𑀢𑁆𑀢𑀓𑀭𑀻𑀲𑀁 𑀘𑀚𑀫𑀸𑀦𑀸 [𑀫𑁄𑀘𑀦𑁆𑀢𑀸 (𑀧𑀻. 𑀓.)], 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑁆𑀢𑀺. 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀡𑀸𑀦𑀁, 𑀏𑀯𑀁 𑀫𑀳𑁂𑀲𑀓𑁆𑀔𑁄, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸 𑀉𑀘𑁆𑀘𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀓𑀸 𑀢𑁂𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺 𑁋 ‘𑀅𑀦𑀺𑀘𑁆𑀘𑀸𑀯 𑀓𑀺𑀭, 𑀪𑁄, 𑀫𑀬𑀁 𑀲𑀫𑀸𑀦𑀸 𑀦𑀺𑀘𑁆𑀘𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳. 𑀅𑀤𑁆𑀥𑀼𑀯𑀸𑀯 𑀓𑀺𑀭, 𑀪𑁄, 𑀫𑀬𑀁 𑀲𑀫𑀸𑀦𑀸 𑀥𑀼𑀯𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳. 𑀅𑀲𑀲𑁆𑀲𑀢𑀸𑀯 𑀓𑀺𑀭, 𑀪𑁄, 𑀫𑀬𑀁 𑀲𑀫𑀸𑀦𑀸 𑀲𑀲𑁆𑀲𑀢𑀫𑁆𑀳𑀸𑀢𑀺 𑀅𑀫𑀜𑁆𑀜𑀺𑀫𑁆𑀳. 𑀫𑀬𑀫𑁆𑀧𑀺 𑀓𑀺𑀭, 𑀪𑁄, 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸’𑀢𑀺. 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀏𑀯𑀁 𑀫𑀳𑁂𑀲𑀓𑁆𑀔𑁄, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀬𑀤𑀸 𑀩𑀼𑀤𑁆𑀥𑁄 𑀅𑀪𑀺𑀜𑁆𑀜𑀸𑀬, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀲𑀢𑁆𑀣𑀸 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

‘‘𑀲𑀓𑁆𑀓𑀸𑀬𑀜𑁆𑀘 𑀦𑀺𑀭𑁄𑀥𑀜𑁆𑀘, 𑀲𑀓𑁆𑀓𑀸𑀬𑀲𑁆𑀲 𑀘 𑀲𑀫𑁆𑀪𑀯𑀁;

𑀅𑀭𑀺𑀬𑀜𑁆𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

‘‘𑀬𑁂𑀧𑀺 𑀤𑀻𑀖𑀸𑀬𑀼𑀓𑀸 𑀤𑁂𑀯𑀸, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀪𑀻𑀢𑀸 𑀲𑀦𑁆𑀢𑀸𑀲𑀫𑀸𑀧𑀸𑀤𑀼𑀁, 𑀲𑀻𑀳𑀲𑁆𑀲𑁂𑀯𑀺𑀢𑀭𑁂 𑀫𑀺𑀕𑀸.

𑀅𑀯𑀻𑀢𑀺𑀯𑀢𑁆𑀢𑀸 𑀲𑀓𑁆𑀓𑀸𑀬𑀁, 𑀅𑀦𑀺𑀘𑁆𑀘𑀸 𑀓𑀺𑀭 𑀪𑁄 𑀫𑀬𑀁;

𑀲𑀼𑀢𑁆𑀯𑀸 𑀅𑀭𑀳𑀢𑁄 𑀯𑀸𑀓𑁆𑀬𑀁, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑀸𑀤𑀺𑀦𑁄’’𑀢𑀺. 𑀙𑀝𑁆𑀞𑀁;

𑁭. 𑀔𑀚𑁆𑀚𑀦𑀻𑀬𑀲𑀼𑀢𑁆𑀢𑀁

𑁭𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀫𑀸𑀦𑀸 𑀅𑀦𑀼𑀲𑁆𑀲𑀭𑀦𑁆𑀢𑀺 𑀲𑀩𑁆𑀩𑁂𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀦𑀼𑀲𑁆𑀲𑀭𑀦𑁆𑀢𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑀁. 𑀓𑀢𑀫𑁂 𑀧𑀜𑁆𑀘? ‘𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀫𑀸𑀦𑁄 𑀭𑀽𑀧𑀁𑀬𑁂𑀯 𑀅𑀦𑀼𑀲𑁆𑀲𑀭𑀢𑀺. ‘𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀫𑀸𑀦𑁄 𑀯𑁂𑀤𑀦𑀁𑀬𑁂𑀯 𑀅𑀦𑀼𑀲𑁆𑀲𑀭𑀢𑀺. ‘𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺… ‘𑀏𑀯𑀁𑀲𑀗𑁆𑀔𑀸𑀭𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺… ‘𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀭𑀫𑀸𑀦𑁄 𑀯𑀺𑀜𑁆𑀜𑀸𑀡𑀫𑁂𑀯 𑀅𑀦𑀼𑀲𑁆𑀲𑀭𑀢𑀺’’.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣? 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 [… 𑀲𑀺𑀭𑀺𑀁𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 (𑀲𑀻. 𑀧𑀻.)] 𑀭𑀼𑀧𑁆𑀧𑀢𑀺. 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀁 𑀯𑀤𑁂𑀣? 𑀯𑁂𑀤𑀬𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀯𑁂𑀤𑀦𑀸’𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀯𑁂𑀤𑀬𑀢𑀺? 𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑀬𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀺. 𑀯𑁂𑀤𑀬𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀯𑁂𑀤𑀦𑀸’𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀁 𑀯𑀤𑁂𑀣? 𑀲𑀜𑁆𑀚𑀸𑀦𑀸𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀲𑀜𑁆𑀜𑀸’𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀜𑁆𑀚𑀸𑀦𑀸𑀢𑀺? 𑀦𑀻𑀮𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀧𑀻𑀢𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀮𑁄𑀳𑀺𑀢𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀑𑀤𑀸𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺. 𑀲𑀜𑁆𑀚𑀸𑀦𑀸𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀲𑀜𑁆𑀜𑀸’𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑁂 𑀯𑀤𑁂𑀣? 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀲𑀗𑁆𑀔𑀸𑀭𑀸’𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺? 𑀭𑀽𑀧𑀁 𑀭𑀽𑀧𑀢𑁆𑀢𑀸𑀬 [𑀭𑀽𑀧𑀢𑁆𑀣𑀸𑀬 (𑀓.)] 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀯𑁂𑀤𑀦𑀁 𑀯𑁂𑀤𑀦𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀲𑀜𑁆𑀜𑀁 𑀲𑀜𑁆𑀜𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀲𑀗𑁆𑀔𑀸𑀭𑁂 𑀲𑀗𑁆𑀔𑀸𑀭𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀲𑀗𑁆𑀔𑀸𑀭𑀸’𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀯𑀤𑁂𑀣? 𑀯𑀺𑀚𑀸𑀦𑀸𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀯𑀺𑀚𑀸𑀦𑀸𑀢𑀺? 𑀅𑀫𑁆𑀩𑀺𑀮𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀢𑀺𑀢𑁆𑀢𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀓𑀝𑀼𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀫𑀥𑀼𑀭𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀔𑀸𑀭𑀺𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀅𑀔𑀸𑀭𑀺𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀮𑁄𑀡𑀺𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺, 𑀅𑀮𑁄𑀡𑀺𑀓𑀫𑁆𑀧𑀺 𑀯𑀺𑀚𑀸𑀦𑀸𑀢𑀺. 𑀯𑀺𑀚𑀸𑀦𑀸𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀭𑀽𑀧𑁂𑀦 𑀔𑀚𑁆𑀚𑀸𑀫𑀺. 𑀅𑀢𑀻𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀭𑀽𑀧𑁂𑀦 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀭𑀽𑀧𑁂𑀦 𑀔𑀚𑁆𑀚𑀸𑀫𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑀁 𑀭𑀽𑀧𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁, 𑀅𑀦𑀸𑀕𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀭𑀽𑀧𑁂𑀦 𑀔𑀚𑁆𑀚𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀭𑀽𑀧𑁂𑀦 𑀔𑀚𑁆𑀚𑀸𑀫𑀻’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀢𑀻𑀢𑀲𑁆𑀫𑀺𑀁 𑀭𑀽𑀧𑀲𑁆𑀫𑀺𑀁 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺; 𑀅𑀦𑀸𑀕𑀢𑀁 𑀭𑀽𑀧𑀁 𑀦𑀸𑀪𑀺𑀦𑀦𑁆𑀤𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘‘𑀅𑀳𑀁 𑀔𑁄 𑀏𑀢𑀭𑀳𑀺 𑀯𑁂𑀤𑀦𑀸𑀬 𑀔𑀚𑁆𑀚𑀸𑀫𑀺. 𑀅𑀢𑀻𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀯𑁂𑀤𑀦𑀸𑀬 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀔𑀚𑁆𑀚𑀸𑀫𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁; 𑀅𑀦𑀸𑀕𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀯𑁂𑀤𑀦𑀸𑀬 𑀔𑀚𑁆𑀚𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀔𑀚𑁆𑀚𑀸𑀫𑀻’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀢𑀻𑀢𑀸𑀬 𑀯𑁂𑀤𑀦𑀸𑀬 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺; 𑀅𑀦𑀸𑀕𑀢𑀁 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘‘𑀅𑀳𑀁 𑀔𑁄 𑀏𑀢𑀭𑀳𑀺 𑀲𑀜𑁆𑀜𑀸𑀬 𑀔𑀚𑁆𑀚𑀸𑀫𑀺…𑀧𑁂… 𑀅𑀳𑀁 𑀔𑁄 𑀏𑀢𑀭𑀳𑀺 𑀲𑀗𑁆𑀔𑀸𑀭𑁂𑀳𑀺 𑀔𑀚𑁆𑀚𑀸𑀫𑀺. 𑀅𑀢𑀻𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀲𑀗𑁆𑀔𑀸𑀭𑁂𑀳𑀺 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀔𑀚𑁆𑀚𑀸𑀫𑀻𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂 𑀅𑀪𑀺𑀦𑀦𑁆𑀤𑁂𑀬𑁆𑀬𑀁; 𑀅𑀦𑀸𑀕𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀲𑀗𑁆𑀔𑀸𑀭𑁂𑀳𑀺 𑀔𑀚𑁆𑀚𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀔𑀚𑁆𑀚𑀸𑀫𑀻’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀢𑀻𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺; 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂 𑀦𑀸𑀪𑀺𑀦𑀦𑁆𑀤𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘‘𑀅𑀳𑀁 𑀔𑁄 𑀏𑀢𑀭𑀳𑀺 𑀯𑀺𑀜𑁆𑀜𑀸𑀡𑁂𑀦 𑀔𑀚𑁆𑀚𑀸𑀫𑀺. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑁂𑀦 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀯𑀺𑀜𑁆𑀜𑀸𑀡𑁂𑀦 𑀔𑀚𑁆𑀚𑀸𑀫𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁; 𑀅𑀦𑀸𑀕𑀢𑀫𑁆𑀧𑀸𑀳𑀁 𑀅𑀤𑁆𑀥𑀸𑀦𑀁 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑁂𑀦 𑀔𑀚𑁆𑀚𑁂𑀬𑁆𑀬𑀁, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀯𑀺𑀜𑁆𑀜𑀸𑀡𑁂𑀦 𑀔𑀚𑁆𑀚𑀸𑀫𑀻’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀗𑁆𑀔𑀸𑀬 𑀅𑀢𑀻𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺; 𑀅𑀦𑀸𑀕𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀪𑀺𑀦𑀦𑁆𑀤𑀢𑀺; 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸 … 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁’’.

‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀧𑀘𑀺𑀦𑀸𑀢𑀺, 𑀦𑁄 𑀆𑀘𑀺𑀦𑀸𑀢𑀺; 𑀧𑀚𑀳𑀢𑀺 [𑀦𑁄 (𑀲𑀻.)], 𑀦 𑀉𑀧𑀸𑀤𑀺𑀬𑀢𑀺; 𑀯𑀺𑀲𑀺𑀦𑁂𑀢𑀺 [𑀦𑁄 (𑀲𑀻.)], 𑀦 𑀉𑀲𑁆𑀲𑀺𑀦𑁂𑀢𑀺; 𑀯𑀺𑀥𑀽𑀧𑁂𑀢𑀺 [𑀦𑁄 (𑀲𑀻.)], 𑀦 𑀲𑀦𑁆𑀥𑀽𑀧𑁂𑀢𑀺. 𑀓𑀺𑀜𑁆𑀘 𑀅𑀧𑀘𑀺𑀦𑀸𑀢𑀺, 𑀦𑁄 𑀆𑀘𑀺𑀦𑀸𑀢𑀺? 𑀭𑀽𑀧𑀁 𑀅𑀧𑀘𑀺𑀦𑀸𑀢𑀺, 𑀦𑁄 𑀆𑀘𑀺𑀦𑀸𑀢𑀺; 𑀯𑁂𑀤𑀦𑀁 … 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀧𑀘𑀺𑀦𑀸𑀢𑀺, 𑀦𑁄 𑀆𑀘𑀺𑀦𑀸𑀢𑀺. 𑀓𑀺𑀜𑁆𑀘 𑀧𑀚𑀳𑀢𑀺, 𑀦 𑀉𑀧𑀸𑀤𑀺𑀬𑀢𑀺? 𑀭𑀽𑀧𑀁 𑀧𑀚𑀳𑀢𑀺, 𑀦 𑀉𑀧𑀸𑀤𑀺𑀬𑀢𑀺; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀧𑀚𑀳𑀢𑀺, 𑀦 𑀉𑀧𑀸𑀤𑀺𑀬𑀢𑀺. 𑀓𑀺𑀜𑁆𑀘 𑀯𑀺𑀲𑀺𑀦𑁂𑀢𑀺, 𑀦 𑀉𑀲𑁆𑀲𑀺𑀦𑁂𑀢𑀺? 𑀭𑀽𑀧𑀁 𑀯𑀺𑀲𑀺𑀦𑁂𑀢𑀺, 𑀦 𑀉𑀲𑁆𑀲𑀺𑀦𑁂𑀢𑀺; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀲𑀺𑀦𑁂𑀢𑀺, 𑀦 𑀉𑀲𑁆𑀲𑀺𑀦𑁂𑀢𑀺. 𑀓𑀺𑀜𑁆𑀘 𑀯𑀺𑀥𑀽𑀧𑁂𑀢𑀺, 𑀦 𑀲𑀦𑁆𑀥𑀽𑀧𑁂𑀢𑀺? 𑀭𑀽𑀧𑀁 𑀯𑀺𑀥𑀽𑀧𑁂𑀢𑀺, 𑀦 𑀲𑀦𑁆𑀥𑀽𑀧𑁂𑀢𑀺; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀥𑀽𑀧𑁂𑀢𑀺, 𑀦 𑀲𑀦𑁆𑀥𑀽𑀧𑁂𑀢𑀺.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺… 𑀲𑀜𑁆𑀜𑀸𑀬𑀧𑀺… 𑀲𑀗𑁆𑀔𑀸𑀭𑁂𑀲𑀼𑀧𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑁂𑀯𑀸𑀘𑀺𑀦𑀸𑀢𑀺 𑀦 𑀅𑀧𑀘𑀺𑀦𑀸𑀢𑀺, 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺, 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀺, 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺. 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄 𑀓𑀺𑀜𑁆𑀘 𑀦𑁂𑀯𑀸𑀘𑀺𑀦𑀸𑀢𑀺 𑀦 𑀅𑀧𑀘𑀺𑀦𑀸𑀢𑀺? 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 𑀭𑀽𑀧𑀁 𑀦𑁂𑀯𑀸𑀘𑀺𑀦𑀸𑀢𑀺 𑀦 𑀅𑀧𑀘𑀺𑀦𑀸𑀢𑀺; 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀦𑁂𑀯𑀸𑀘𑀺𑀦𑀸𑀢𑀺 𑀦 𑀅𑀧𑀘𑀺𑀦𑀸𑀢𑀺. 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 𑀓𑀺𑀜𑁆𑀘 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺? 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀭𑀽𑀧𑀁 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺; 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺. 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀺𑀜𑁆𑀘 𑀦𑁂𑀯 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀺? 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀭𑀽𑀧𑀁 𑀦𑁂𑀯 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀺; 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀦𑁂𑀯 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀺. 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀓𑀺𑀜𑁆𑀘 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺? 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄 𑀭𑀽𑀧𑀁 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺; 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺. 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄 𑀏𑀯𑀁𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀆𑀭𑀓𑀸𑀯 𑀦𑀫𑀲𑁆𑀲𑀦𑁆𑀢𑀺 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀬𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺. 𑀲𑀢𑁆𑀢𑀫𑀁;

𑁮. 𑀧𑀺𑀡𑁆𑀟𑁄𑀮𑁆𑀬𑀲𑀼𑀢𑁆𑀢𑀁

𑁮𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀸𑀫𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀧𑀺𑀮𑀯𑀢𑁆𑀣𑀼𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀫𑀳𑀸𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀩𑁂𑀮𑀼𑀯𑀮𑀝𑁆𑀞𑀺𑀓𑀸𑀬 𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺.

𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀫𑀬𑀸 𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀩𑀸𑀴𑁆𑀳𑁄. 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁. 𑀢𑁂𑀲𑀁 𑀫𑀫𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀯𑀘𑁆𑀙𑀲𑁆𑀲 𑀢𑀭𑀼𑀡𑀲𑁆𑀲 𑀫𑀸𑀢𑀭𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄, 𑀏𑀯𑀫𑁂𑀯 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀢𑁂𑀲𑀁 𑀫𑀫𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀻𑀚𑀸𑀦𑀁 𑀢𑀭𑀼𑀡𑀸𑀦𑀁 𑀉𑀤𑀓𑀁 𑀅𑀮𑀪𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄, 𑀏𑀯𑀫𑁂𑀯 𑀲𑀦𑁆𑀢𑁂𑀢𑁆𑀣…𑀧𑁂… 𑀢𑁂𑀲𑀁 𑀫𑀫𑀁 𑀅𑀮𑀪𑀦𑁆𑀢𑀸𑀦𑀁 𑀤𑀲𑁆𑀲𑀦𑀸𑀬 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀬𑀁𑀦𑀽𑀦𑀸𑀳𑀁 𑀬𑀣𑁂𑀯 𑀫𑀬𑀸 𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀼𑀕𑁆𑀕𑀳𑀺𑀢𑁄, 𑀏𑀯𑀫𑁂𑀯 𑀏𑀢𑀭𑀳𑀺 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀁 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 [𑀲𑀫𑁆𑀫𑀺𑀜𑁆𑀚𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸; 𑀏𑀯𑀫𑁂𑀢𑀁, 𑀲𑀼𑀕𑀢! 𑀪𑀕𑀯𑀢𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀩𑀸𑀴𑁆𑀳𑁄. 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁. 𑀢𑁂𑀲𑀁 𑀪𑀕𑀯𑀦𑁆𑀢𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀯𑀘𑁆𑀙𑀲𑁆𑀲 𑀢𑀭𑀼𑀡𑀲𑁆𑀲 𑀫𑀸𑀢𑀭𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄, 𑀏𑀯𑀫𑁂𑀯 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀢𑁂𑀲𑀁 𑀪𑀕𑀯𑀦𑁆𑀢𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀻𑀚𑀸𑀦𑀁 𑀢𑀭𑀼𑀡𑀸𑀦𑀁 𑀉𑀤𑀓𑀁 𑀅𑀮𑀪𑀦𑁆𑀢𑀸𑀦𑀁 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄, 𑀏𑀯𑀫𑁂𑀯 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀢𑁂𑀲𑀁 𑀪𑀕𑀯𑀦𑁆𑀢𑀁 𑀅𑀮𑀪𑀦𑁆𑀢𑀸𑀦𑀁 𑀤𑀲𑁆𑀲𑀦𑀸𑀬 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄. 𑀅𑀪𑀺𑀦𑀦𑁆𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁; 𑀅𑀪𑀺𑀯𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁. 𑀬𑀣𑁂𑀯 𑀪𑀕𑀯𑀢𑀸 𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀼𑀕𑁆𑀕𑀳𑀺𑀢𑁄, 𑀏𑀯𑀫𑁂𑀯 𑀏𑀢𑀭𑀳𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀼 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺.

𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀦𑀺𑀕𑁆𑀭𑁄𑀥𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 [𑀅𑀪𑀺𑀲𑀗𑁆𑀔𑀸𑀭𑁂𑀲𑀺 (𑀲𑁆𑀬𑀸. 𑀓𑀁.), 𑀅𑀪𑀺𑀲𑀗𑁆𑀔𑀸𑀬𑀺 (𑀧𑀻.), 𑀅𑀪𑀺𑀲𑀗𑁆𑀔𑀭𑁄𑀢𑀺 (𑀓.)] 𑀬𑀣𑀸 𑀢𑁂 𑀪𑀺𑀓𑁆𑀔𑀽 (𑀏𑀓𑀤𑁆𑀯𑀻𑀳𑀺𑀓𑀸𑀬 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑀸 𑀬𑁂𑀦𑀸𑀳𑀁 [𑀬𑁂𑀦 𑀪𑀕𑀯𑀸 (?)] 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀼𑀁. 𑀢𑁂𑀧𑀺 𑀪𑀺𑀓𑁆𑀔𑀽 ) [( ) 𑀲𑀻. 𑀲𑁆𑀬𑀸. 𑀓𑀁. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀏𑀓𑀤𑁆𑀯𑀻𑀳𑀺𑀓𑀸𑀬 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬𑀁. 𑀅𑀪𑀺𑀲𑀸𑀧𑁄𑀬𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀫𑀺𑀁 𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀲𑀺 𑀧𑀢𑁆𑀢𑀧𑀸𑀡𑀻𑀢𑀺. 𑀢𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀉𑀧𑁂𑀦𑁆𑀢𑀺 𑀅𑀢𑁆𑀣𑀯𑀲𑀺𑀓𑀸, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘; 𑀦𑁂𑀯 𑀭𑀸𑀚𑀸𑀪𑀺𑀦𑀻𑀢𑀸, 𑀦 𑀘𑁄𑀭𑀸𑀪𑀺𑀦𑀻𑀢𑀸, 𑀦 𑀇𑀡𑀝𑁆𑀝𑀸, 𑀦 𑀪𑀬𑀝𑁆𑀝𑀸, 𑀦 𑀆𑀚𑀻𑀯𑀺𑀓𑀸𑀧𑀓𑀢𑀸; 𑀅𑀧𑀺 𑀘 𑀔𑁄 𑀑𑀢𑀺𑀡𑁆𑀡𑀸𑀫𑁆𑀳 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀤𑀼𑀓𑁆𑀔𑁄𑀢𑀺𑀡𑁆𑀡𑀸 𑀤𑀼𑀓𑁆𑀔𑀧𑀭𑁂𑀢𑀸 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸𑀢𑀺.

‘‘𑀏𑀯𑀁 𑀧𑀩𑁆𑀩𑀚𑀺𑀢𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄. 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀙𑀯𑀸𑀮𑀸𑀢𑀁 𑀉𑀪𑀢𑁄𑀧𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀕𑀢𑀁, 𑀦𑁂𑀯 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺, 𑀦𑀸𑀭𑀜𑁆𑀜𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺. 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺 𑀕𑀺𑀳𑀺𑀪𑁄𑀕𑀸 𑀘 𑀧𑀭𑀺𑀳𑀻𑀦𑁄, 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀦 𑀧𑀭𑀺𑀧𑀽𑀭𑁂𑀢𑀺.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀇𑀫𑁂 𑀘 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀓𑁆𑀯 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺? 𑀘𑀢𑀽𑀲𑀼 𑀯𑀸 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀦𑀺𑀫𑀺𑀢𑁆𑀢𑀁 𑀯𑀸 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀅𑀦𑀺𑀫𑀺𑀢𑁆𑀢𑁄 𑀲𑀫𑀸𑀥𑀺 𑀪𑀸𑀯𑁂𑀢𑀼𑀁. 𑀅𑀦𑀺𑀫𑀺𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄.

‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑁄 𑁋 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘. 𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀢𑀁 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀁 𑀬𑀫𑀳𑀁 𑀉𑀧𑀸𑀤𑀺𑀬𑀫𑀸𑀦𑁄 𑀦 𑀯𑀚𑁆𑀚𑀯𑀸 𑀅𑀲𑁆𑀲’𑀦𑁆𑀢𑀺? 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀦𑀼 𑀔𑁄 𑀢𑀁 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀁 𑀬𑀫𑀳𑀁 𑀉𑀧𑀸𑀤𑀺𑀬𑀫𑀸𑀦𑁄 𑀦 𑀯𑀚𑁆𑀚𑀯𑀸 𑀅𑀲𑁆𑀲𑀁. 𑀅𑀳𑀜𑁆𑀳𑀺 𑀭𑀽𑀧𑀜𑁆𑀜𑁂𑀯 𑀉𑀧𑀸𑀤𑀺𑀬𑀫𑀸𑀦𑁄 𑀉𑀧𑀸𑀤𑀺𑀬𑁂𑀬𑁆𑀬𑀁 𑀯𑁂𑀤𑀦𑀜𑁆𑀜𑁂𑀯… 𑀲𑀜𑁆𑀜𑀜𑁆𑀜𑁂𑀯… 𑀲𑀗𑁆𑀔𑀸𑀭𑁂𑀬𑁂𑀯 𑀯𑀺𑀜𑁆𑀜𑀸𑀡𑀜𑁆𑀜𑁂𑀯 𑀉𑀧𑀸𑀤𑀺𑀬𑀫𑀸𑀦𑁄 𑀉𑀧𑀸𑀤𑀺𑀬𑁂𑀬𑁆𑀬𑀁. 𑀢𑀲𑁆𑀲 𑀫𑁂 𑀅𑀲𑁆𑀲 [𑀅𑀬𑀁 (𑀓.)] 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄; 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺; 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑁂𑀬𑁆𑀬𑀼𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀅𑀲𑁆𑀲𑀸’’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁…𑀧𑁂… 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀧𑀲𑁆𑀲𑀁… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀸𑀮𑀺𑀮𑁂𑀬𑁆𑀬𑀲𑀼𑀢𑁆𑀢𑀁

𑁮𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑀸𑀯𑀼𑀲𑁄, 𑀆𑀦𑀦𑁆𑀤, 𑀪𑀕𑀯𑀸 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’’𑀢𑀺. ‘‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀲𑀫𑀬𑁂 𑀪𑀕𑀯𑀸 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀘𑀸𑀭𑀺𑀓𑀁 𑀧𑀓𑁆𑀓𑀫𑀢𑀺, 𑀏𑀓𑁄𑀯 𑀪𑀕𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀺𑀢𑀼𑀓𑀸𑀫𑁄 𑀳𑁄𑀢𑀺; 𑀦 𑀪𑀕𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑁂𑀦𑀘𑀺 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 [𑀧𑀸𑀭𑀺𑀮𑁂𑀬𑁆𑀬𑀓𑀁 (𑀲𑀻. 𑀧𑀻.)] 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀪𑀤𑁆𑀤𑀲𑀸𑀮𑀫𑀽𑀮𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀘𑀺𑀭𑀲𑁆𑀲𑀼𑀢𑀸 𑀔𑁄 𑀦𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀻 𑀓𑀣𑀸; 𑀇𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀪𑀤𑁆𑀤𑀲𑀸𑀮𑀫𑀽𑀮𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑀣𑀁 𑀦𑀼 𑀔𑁄 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀯𑀺𑀘𑀬𑀲𑁄 𑀤𑁂𑀲𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺; 𑀯𑀺𑀘𑀬𑀲𑁄 𑀤𑁂𑀲𑀺𑀢𑀸 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸; 𑀯𑀺𑀘𑀬𑀲𑁄 𑀤𑁂𑀲𑀺𑀢𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀏𑀯𑀁 𑀯𑀺𑀘𑀬𑀲𑁄 𑀤𑁂𑀲𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄. 𑀏𑀯𑀁 𑀯𑀺𑀘𑀬𑀲𑁄 𑀤𑁂𑀲𑀺𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀅𑀣 𑀘 𑀧𑀦𑀺𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀣𑀁 𑀦𑀼 𑀔𑁄 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’’𑀢𑀺?

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂𑀦 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀲𑀸𑀧𑀺 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀲𑁄𑀧𑀺 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂𑀦 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸… 𑀲𑀸𑀧𑀺 𑀯𑁂𑀤𑀦𑀸… 𑀲𑁄𑀧𑀺 𑀨𑀲𑁆𑀲𑁄… 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂𑀦 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸… 𑀲𑀸𑀧𑀺 𑀯𑁂𑀤𑀦𑀸… 𑀲𑁄𑀧𑀺 𑀨𑀲𑁆𑀲𑁄… 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸 … 𑀲𑀸𑀧𑀺 𑀯𑁂𑀤𑀦𑀸… 𑀲𑁄𑀧𑀺 𑀨𑀲𑁆𑀲𑁄… 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄…𑀧𑁂… 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀯𑁂𑀤𑀦𑀸𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀲𑀜𑁆𑀜𑀁… 𑀅𑀧𑀺 𑀘 𑀔𑁄 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀲𑀗𑁆𑀔𑀸𑀭𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀅𑀢𑁆𑀢𑀦𑀺 𑀲𑀗𑁆𑀔𑀸𑀭𑁂 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀧𑀺 𑀘 𑀔𑁄 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁, 𑀅𑀧𑀺 𑀘 𑀔𑁄 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁, 𑀅𑀧𑀺 𑀘 𑀔𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄…𑀧𑁂… 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸… 𑀲𑀸𑀧𑀺 𑀯𑁂𑀤𑀦𑀸… 𑀲𑁄𑀧𑀺 𑀨𑀲𑁆𑀲𑁄 … 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺; 𑀅𑀧𑀺 𑀘 𑀔𑁄 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀲𑁄 𑀅𑀢𑁆𑀢𑀸 𑀲𑁄 𑀮𑁄𑀓𑁄, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀲𑀲𑁆𑀲𑀢𑀤𑀺𑀝𑁆𑀞𑀺 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑁂𑀤𑀦𑀁 … 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺; 𑀦𑀸𑀧𑀺 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀲𑁄 𑀅𑀢𑁆𑀢𑀸 𑀲𑁄 𑀮𑁄𑀓𑁄, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’𑀢𑀺. 𑀅𑀧𑀺 𑀘 𑀔𑁄 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲𑀁 𑀦𑁄 𑀘 𑀫𑁂 𑀲𑀺𑀬𑀸 𑀦𑀸𑀪𑀯𑀺𑀲𑁆𑀲𑀁 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂𑀦 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

‘‘𑀦 𑀳𑁂𑀯 𑀔𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦𑀸𑀧𑀺 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀲𑁄 𑀅𑀢𑁆𑀢𑀸 𑀲𑁄 𑀮𑁄𑀓𑁄, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’𑀢𑀺; 𑀦𑀸𑀧𑀺 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲𑀁 𑀦𑁄 𑀘 𑀫𑁂 𑀲𑀺𑀬𑀸 𑀦𑀸𑀪𑀯𑀺𑀲𑁆𑀲𑀁 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺; 𑀅𑀧𑀺 𑀘 𑀔𑁄 𑀓𑀗𑁆𑀔𑀻 𑀳𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀻 𑀅𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂. 𑀬𑀸 𑀔𑁄 𑀧𑀦 𑀲𑀸, 𑀪𑀺𑀓𑁆𑀔𑀯𑁂, 𑀓𑀗𑁆𑀔𑀺𑀢𑀸 𑀯𑀺𑀘𑀺𑀓𑀺𑀘𑁆𑀙𑀺𑀢𑀸 𑀅𑀦𑀺𑀝𑁆𑀞𑀗𑁆𑀕𑀢𑀢𑀸 𑀲𑀤𑁆𑀥𑀫𑁆𑀫𑁂 𑀲𑀗𑁆𑀔𑀸𑀭𑁄 𑀲𑁄. 𑀲𑁄 𑀧𑀦 𑀲𑀗𑁆𑀔𑀸𑀭𑁄 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦, 𑀪𑀺𑀓𑁆𑀔𑀯𑁂, 𑀯𑁂𑀤𑀬𑀺𑀢𑁂𑀦 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸; 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀢𑀡𑁆𑀳𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀲𑀸𑀧𑀺 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀲𑁄𑀧𑀺 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄. 𑀲𑀸𑀧𑀺 𑀅𑀯𑀺𑀚𑁆𑀚𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀧𑀼𑀡𑁆𑀡𑀫𑀲𑀼𑀢𑁆𑀢𑀁

𑁮𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 [𑀓𑀜𑁆𑀘𑀺𑀤𑁂𑀯 (?)] 𑀤𑁂𑀲𑀁, 𑀲𑀘𑁂 𑀫𑁂 𑀪𑀕𑀯𑀸 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄’’𑀢𑀺.

‘‘𑀇𑀫𑁂 𑀔𑁄 𑀧𑀦, 𑀪𑀺𑀓𑁆𑀔𑀼, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸; 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀇𑀫𑁂 𑀔𑁄 𑀧𑀦, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀓𑀺𑀁𑀫𑀽𑀮𑀓𑀸’’𑀢𑀺? ‘‘𑀇𑀫𑁂 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀙𑀦𑁆𑀤𑀫𑀽𑀮𑀓𑀸’’𑀢𑀺…𑀧𑁂… 𑀢𑀜𑁆𑀜𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀉𑀤𑀸𑀳𑀼 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀦𑁆𑀢𑀺? ‘‘𑀦 𑀔𑁄, 𑀪𑀺𑀓𑁆𑀔𑀼, 𑀢𑀜𑁆𑀜𑁂𑀯 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀦𑀸𑀧𑀺 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀁, 𑀅𑀧𑀺 𑀘 𑀬𑁄 𑀢𑀢𑁆𑀣 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀉𑀧𑀸𑀤𑀸𑀦’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀯𑁂𑀫𑀢𑁆𑀢𑀢𑀸’’𑀢𑀺? ‘‘𑀲𑀺𑀬𑀸, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀏𑀯𑀁𑀯𑁂𑀤𑀦𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀲𑀺𑀬𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀯𑁂𑀫𑀢𑁆𑀢𑀢𑀸’’𑀢𑀺? ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀔𑀦𑁆𑀥𑀸𑀦𑀁 𑀔𑀦𑁆𑀥𑀸𑀥𑀺𑀯𑀘𑀦’’𑀦𑁆𑀢𑀺? ‘‘𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀼, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀬𑀸 𑀓𑀸𑀘𑀺 𑀲𑀜𑁆𑀜𑀸 … 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑀺𑀓𑁆𑀔𑀼, 𑀔𑀦𑁆𑀥𑀸𑀦𑀁 𑀔𑀦𑁆𑀥𑀸𑀥𑀺𑀯𑀘𑀦’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀅𑀧𑀼𑀘𑁆𑀙𑀺 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬; 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬; 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬; 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬; 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺? ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀼, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼, 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬. 𑀦𑀸𑀫𑀭𑀽𑀧𑀁 𑀳𑁂𑀢𑀼, 𑀦𑀸𑀫𑀭𑀽𑀧𑀁 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼…𑀧𑁂… 𑀅𑀧𑀼𑀘𑁆𑀙𑀺 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁; 𑀓𑁄 𑀯𑁂𑀤𑀦𑀸𑀬… 𑀓𑁄 𑀲𑀜𑁆𑀜𑀸𑀬… 𑀓𑁄 𑀲𑀗𑁆𑀔𑀸𑀭𑀸𑀦𑀁… 𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺? ‘‘𑀬𑀁 𑀔𑁄, 𑀪𑀺𑀓𑁆𑀔𑀼, 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘… 𑀬𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘… 𑀬𑁂 𑀲𑀗𑁆𑀔𑀸𑀭𑁂 𑀧𑀝𑀺𑀘𑁆𑀘… 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀸𑀦𑀢𑁄, 𑀓𑀣𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀻’’𑀢𑀺? ‘‘𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀼, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀇𑀢𑀺 𑀓𑀺𑀭 𑀪𑁄 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸; 𑀅𑀦𑀢𑁆𑀢𑀓𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀣𑀫𑀢𑁆𑀢𑀸𑀦𑀁 [𑀓𑀢𑀫𑀢𑁆𑀢𑀸𑀦𑀁 (𑀧𑀻.), 𑀓𑀫𑁆𑀫𑀢𑁆𑀢𑀸𑀦𑀁 (𑀲𑁆𑀬𑀸. 𑀓𑀁. 𑀓.)] 𑀨𑀼𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀫𑁄𑀖𑀧𑀼𑀭𑀺𑀲𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦 𑀘𑁂𑀢𑀲𑀸 𑀲𑀢𑁆𑀣𑀼𑀲𑀸𑀲𑀦𑀁 𑀅𑀢𑀺𑀥𑀸𑀯𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬. 𑀇𑀢𑀺 𑀓𑀺𑀭, 𑀪𑁄, 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀅𑀦𑀢𑁆𑀢𑀓𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀣𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻𑀢𑀺? 𑀧𑀝𑀺𑀧𑀼𑀘𑁆𑀙𑀸𑀯𑀺𑀦𑀻𑀢𑀸 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀢𑁆𑀭 𑀢𑀢𑁆𑀭 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

‘‘𑀤𑁆𑀯𑁂 𑀔𑀦𑁆𑀥𑀸 𑀢𑀜𑁆𑀜𑁂𑀯 𑀲𑀺𑀬𑀁, 𑀅𑀥𑀺𑀯𑀘𑀦𑀜𑁆𑀘 𑀳𑁂𑀢𑀼𑀦𑀸;

𑀲𑀓𑁆𑀓𑀸𑀬𑁂𑀦 𑀤𑀼𑀯𑁂 𑀯𑀼𑀢𑁆𑀢𑀸, 𑀅𑀲𑁆𑀲𑀸𑀤𑀯𑀺𑀜𑁆𑀜𑀸𑀡𑀓𑁂𑀦 𑀘;

𑀏𑀢𑁂 𑀤𑀲𑀯𑀺𑀥𑀸 𑀯𑀼𑀢𑁆𑀢𑀸, 𑀳𑁄𑀢𑀺 𑀪𑀺𑀓𑁆𑀔𑀼 𑀧𑀼𑀘𑁆𑀙𑀸𑀬𑀸’’𑀢𑀺. 𑀤𑀲𑀫𑀁;

𑀔𑀚𑁆𑀚𑀦𑀻𑀬𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀲𑁆𑀲𑀸𑀤𑁄 𑀤𑁆𑀯𑁂 𑀲𑀫𑀼𑀤𑀬𑀸, 𑀅𑀭𑀳𑀦𑁆𑀢𑁂𑀳𑀺 𑀅𑀧𑀭𑁂 𑀤𑁆𑀯𑁂;

𑀲𑀻𑀳𑁄 𑀔𑀚𑁆𑀚𑀦𑀻 𑀧𑀺𑀡𑁆𑀟𑁄𑀮𑁆𑀬𑀁, 𑀧𑀸𑀮𑀺𑀮𑁂𑀬𑁆𑀬𑁂𑀦 𑀧𑀼𑀡𑁆𑀡𑀫𑀸𑀢𑀺.