𑁯. 𑀣𑁂𑀭𑀯𑀕𑁆𑀕𑁄

𑁧. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁮𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀧𑀼𑀡𑁆𑀡𑁄 𑀦𑀸𑀫, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 [𑀫𑀦𑁆𑀢𑀸𑀦𑀺𑀧𑀼𑀢𑁆𑀢𑁄 (𑀓. 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀓.)] 𑀅𑀫𑁆𑀳𑀸𑀓𑀁 𑀦𑀯𑀓𑀸𑀦𑀁 𑀲𑀢𑀁 𑀩𑀳𑀽𑀧𑀓𑀸𑀭𑁄 𑀳𑁄𑀢𑀺. 𑀲𑁄 𑀅𑀫𑁆𑀳𑁂 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀢𑀺 𑁋 ‘𑀉𑀧𑀸𑀤𑀸𑀬, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬. 𑀓𑀺𑀜𑁆𑀘 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬? 𑀭𑀽𑀧𑀁 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬’’’.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀆𑀤𑀸𑀲𑁂 𑀯𑀸 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀘𑁆𑀙𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀉𑀧𑀸𑀤𑀸𑀬 𑀧𑀲𑁆𑀲𑁂𑀬𑁆𑀬, 𑀦𑁄 𑀅𑀦𑀼𑀧𑀸𑀤𑀸𑀬; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀭𑀽𑀧𑀁 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀆𑀦𑀦𑁆𑀤, ‘𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’’𑀢𑀺? ‘𑀅𑀦𑀺𑀘𑁆𑀘𑀁, 𑀆𑀯𑀼𑀲𑁄’. 𑀯𑁂𑀤𑀦𑀸… 𑀲𑀜𑁆𑀜𑀸 … 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’𑀢𑀺? ‘𑀅𑀦𑀺𑀘𑁆𑀘𑀁, 𑀆𑀯𑀼𑀲𑁄’. 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺. 𑀧𑀼𑀡𑁆𑀡𑁄 𑀦𑀸𑀫 𑀆𑀯𑀼𑀲𑁄 𑀆𑀬𑀲𑁆𑀫𑀸 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀅𑀫𑁆𑀳𑀸𑀓𑀁 𑀦𑀯𑀓𑀸𑀦𑀁 𑀲𑀢𑀁 𑀩𑀳𑀽𑀧𑀓𑀸𑀭𑁄 𑀳𑁄𑀢𑀺. 𑀲𑁄 𑀅𑀫𑁆𑀳𑁂 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀢𑀺. 𑀇𑀤𑀜𑁆𑀘 𑀧𑀦 𑀫𑁂 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑁄 𑀅𑀪𑀺𑀲𑀫𑀺𑀢𑁄𑀢𑀺. 𑀧𑀞𑀫𑀁.

𑁨. 𑀢𑀺𑀲𑁆𑀲𑀲𑀼𑀢𑁆𑀢𑀁

𑁮𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀢𑀺𑀲𑁆𑀲𑁄 𑀪𑀕𑀯𑀢𑁄 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀫𑀸𑀭𑁄𑀘𑁂𑀢𑀺 𑁋 ‘‘𑀅𑀧𑀺 𑀫𑁂, 𑀆𑀯𑀼𑀲𑁄, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄; 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺; 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀺; 𑀣𑀺𑀦𑀫𑀺𑀤𑁆𑀥𑀜𑁆𑀘 [𑀣𑀻𑀦𑀫𑀺𑀤𑁆𑀥𑀜𑁆𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑁂 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺; 𑀅𑀦𑀪𑀺𑀭𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺; 𑀳𑁄𑀢𑀺 𑀘 𑀫𑁂 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀢𑀺𑀲𑁆𑀲𑁄 𑀪𑀕𑀯𑀢𑁄 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀫𑀸𑀭𑁄𑀘𑁂𑀢𑀺 𑁋 ‘𑀅𑀧𑀺 𑀫𑁂, 𑀆𑀯𑀼𑀲𑁄, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄; 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺; 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀺; 𑀣𑀺𑀦𑀫𑀺𑀤𑁆𑀥𑀜𑁆𑀘 𑀫𑁂 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺; 𑀅𑀦𑀪𑀺𑀭𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺; 𑀳𑁄𑀢𑀺 𑀘 𑀫𑁂 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸’’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀢𑀺𑀲𑁆𑀲𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀢𑀺𑀲𑁆𑀲𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀢𑀺𑀲𑁆𑀲, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀢𑀺𑀲𑁆𑀲𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀢𑀺𑀲𑁆𑀲𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀢𑀺𑀲𑁆𑀲, 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀫𑀸𑀭𑁄𑀘𑁂𑀲𑀺 𑁋 ‘𑀅𑀧𑀺 𑀫𑁂, 𑀆𑀯𑀼𑀲𑁄, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄…𑀧𑁂… 𑀳𑁄𑀢𑀺 𑀘 𑀫𑁂 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀢𑀺𑀲𑁆𑀲, 𑀭𑀽𑀧𑁂 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀅𑀯𑀺𑀕𑀢𑀢𑀡𑁆𑀳𑀲𑁆𑀲, 𑀢𑀲𑁆𑀲 𑀭𑀽𑀧𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲! 𑀏𑀯𑀜𑁆𑀳𑁂𑀢𑀁, 𑀢𑀺𑀲𑁆𑀲, 𑀳𑁄𑀢𑀺. 𑀬𑀣𑀸 𑀢𑀁 𑀭𑀽𑀧𑁂 𑀅𑀯𑀺𑀕𑀢𑀭𑀸𑀕𑀲𑁆𑀲… 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 𑀅𑀯𑀺𑀕𑀢𑀭𑀸𑀕𑀲𑁆𑀲…𑀧𑁂… 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲! 𑀏𑀯𑀜𑁆𑀳𑁂𑀢𑀁, 𑀢𑀺𑀲𑁆𑀲, 𑀳𑁄𑀢𑀺. 𑀬𑀣𑀸 𑀢𑀁 𑀯𑀺𑀜𑁆𑀜𑀸𑀡𑁂 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀅𑀯𑀺𑀕𑀢𑀢𑀡𑁆𑀳𑀲𑁆𑀲, 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲! 𑀏𑀯𑀜𑁆𑀳𑁂𑀢𑀁, 𑀢𑀺𑀲𑁆𑀲, 𑀳𑁄𑀢𑀺. 𑀬𑀣𑀸 𑀢𑀁 𑀯𑀺𑀜𑁆𑀜𑀸𑀡𑁂 𑀅𑀯𑀺𑀕𑀢𑀭𑀸𑀕𑀲𑁆𑀲. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀢𑀺𑀲𑁆𑀲, 𑀭𑀽𑀧𑁂 𑀯𑀺𑀕𑀢𑀭𑀸𑀕𑀲𑁆𑀲 𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀯𑀺𑀕𑀢𑀧𑁂𑀫𑀲𑁆𑀲 𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀯𑀺𑀕𑀢𑀢𑀡𑁆𑀳𑀲𑁆𑀲, 𑀢𑀲𑁆𑀲 𑀭𑀽𑀧𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲! 𑀏𑀯𑀜𑁆𑀳𑁂𑀢𑀁, 𑀢𑀺𑀲𑁆𑀲, 𑀳𑁄𑀢𑀺. 𑀬𑀣𑀸 𑀢𑀁 𑀭𑀽𑀧𑁂 𑀯𑀺𑀕𑀢𑀭𑀸𑀕𑀲𑁆𑀲… 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 𑀯𑀺𑀕𑀢𑀭𑀸𑀕𑀲𑁆𑀲… 𑀯𑀺𑀜𑁆𑀜𑀸𑀡𑁂 𑀯𑀺𑀕𑀢𑀭𑀸𑀕𑀲𑁆𑀲 𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀯𑀺𑀕𑀢𑀧𑁂𑀫𑀲𑁆𑀲 𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀯𑀺𑀕𑀢𑀢𑀡𑁆𑀳𑀲𑁆𑀲 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲! 𑀏𑀯𑀜𑁆𑀳𑁂𑀢𑀁, 𑀢𑀺𑀲𑁆𑀲, 𑀳𑁄𑀢𑀺. 𑀬𑀣𑀸 𑀢𑀁 𑀯𑀺𑀜𑁆𑀜𑀸𑀡𑁂 𑀯𑀺𑀕𑀢𑀭𑀸𑀕𑀲𑁆𑀲. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀢𑀺𑀲𑁆𑀲, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸 … 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀢𑀺𑀲𑁆𑀲, 𑀤𑁆𑀯𑁂 𑀧𑀼𑀭𑀺𑀲𑀸 𑁋 𑀏𑀓𑁄 𑀧𑀼𑀭𑀺𑀲𑁄 𑀅𑀫𑀕𑁆𑀕𑀓𑀼𑀲𑀮𑁄, 𑀏𑀓𑁄 𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄. 𑀢𑀫𑁂𑀦𑀁 𑀲𑁄 𑀅𑀫𑀕𑁆𑀕𑀓𑀼𑀲𑀮𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀫𑀕𑁆𑀕𑀓𑀼𑀲𑀮𑀁 𑀧𑀼𑀭𑀺𑀲𑀁 𑀫𑀕𑁆𑀕𑀁 𑀧𑀼𑀘𑁆𑀙𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀳𑀺, 𑀪𑁄 𑀧𑀼𑀭𑀺𑀲, 𑀅𑀬𑀁 𑀫𑀕𑁆𑀕𑁄. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀘𑁆𑀙. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀲𑁆𑀲𑀲𑀺 𑀤𑁆𑀯𑁂𑀥𑀸𑀧𑀣𑀁, 𑀢𑀢𑁆𑀣 𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸𑀳𑀺. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀘𑁆𑀙. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀲𑁆𑀲𑀲𑀺 𑀢𑀺𑀩𑁆𑀩𑀁 𑀯𑀦𑀲𑀡𑁆𑀟𑀁. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀘𑁆𑀙. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀲𑁆𑀲𑀲𑀺 𑀫𑀳𑀦𑁆𑀢𑀁 𑀦𑀺𑀦𑁆𑀦𑀁 𑀧𑀮𑁆𑀮𑀮𑀁. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀘𑁆𑀙. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀲𑁆𑀲𑀲𑀺 𑀲𑁄𑀩𑁆𑀪𑀁 𑀧𑀧𑀸𑀢𑀁. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀘𑁆𑀙. 𑀢𑁂𑀦 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀲𑁆𑀲𑀲𑀺 𑀲𑀫𑀁 𑀪𑀽𑀫𑀺𑀪𑀸𑀕𑀁 𑀭𑀫𑀡𑀻𑀬’’’𑀦𑁆𑀢𑀺.

‘‘𑀉𑀧𑀫𑀸 𑀔𑁄 𑀫𑁆𑀬𑀸𑀬𑀁, 𑀢𑀺𑀲𑁆𑀲, 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀁 𑀘𑁂𑀯𑁂𑀢𑁆𑀣 𑀅𑀢𑁆𑀣𑁄 𑁋 ‘𑀧𑀼𑀭𑀺𑀲𑁄 𑀅𑀫𑀕𑁆𑀕𑀓𑀼𑀲𑀮𑁄’𑀢𑀺 𑀔𑁄, 𑀢𑀺𑀲𑁆𑀲, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄’𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀤𑁆𑀯𑁂𑀥𑀸𑀧𑀣𑁄’𑀢𑀺 𑀔𑁄, 𑀢𑀺𑀲𑁆𑀲, 𑀯𑀺𑀘𑀺𑀓𑀺𑀘𑁆𑀙𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. ‘𑀯𑀸𑀫𑁄 𑀫𑀕𑁆𑀕𑁄’𑀢𑀺 𑀔𑁄, 𑀢𑀺𑀲𑁆𑀲, 𑀅𑀝𑁆𑀞𑀗𑁆𑀕𑀺𑀓𑀲𑁆𑀲𑁂𑀢𑀁 𑀫𑀺𑀘𑁆𑀙𑀸𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑁆𑀲. ‘𑀤𑀓𑁆𑀔𑀺𑀡𑁄 𑀫𑀕𑁆𑀕𑁄’𑀢𑀺 𑀔𑁄, 𑀢𑀺𑀲𑁆𑀲, 𑀅𑀭𑀺𑀬𑀲𑁆𑀲𑁂𑀢𑀁 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲. ‘𑀢𑀺𑀩𑁆𑀩𑁄 𑀯𑀦𑀲𑀡𑁆𑀟𑁄’𑀢𑀺 𑀔𑁄, 𑀢𑀺𑀲𑁆𑀲, 𑀅𑀯𑀺𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. ‘𑀫𑀳𑀦𑁆𑀢𑀁 𑀦𑀺𑀦𑁆𑀦𑀁 𑀧𑀮𑁆𑀮𑀮’𑀦𑁆𑀢𑀺 𑀔𑁄, 𑀢𑀺𑀲𑁆𑀲, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀲𑁄𑀩𑁆𑀪𑁄 𑀧𑀧𑀸𑀢𑁄’𑀢𑀺 𑀔𑁄, 𑀢𑀺𑀲𑁆𑀲, 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀲𑀫𑁄 𑀪𑀽𑀫𑀺𑀪𑀸𑀕𑁄 𑀭𑀫𑀡𑀻𑀬𑁄’𑀢𑀺 𑀔𑁄, 𑀢𑀺𑀲𑁆𑀲, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀺𑀭𑀫, 𑀢𑀺𑀲𑁆𑀲, 𑀅𑀪𑀺𑀭𑀫, 𑀢𑀺𑀲𑁆𑀲! 𑀅𑀳𑀫𑁄𑀯𑀸𑀤𑁂𑀦 𑀅𑀳𑀫𑀦𑀼𑀕𑁆𑀕𑀳𑁂𑀦 𑀅𑀳𑀫𑀦𑀼𑀲𑀸𑀲𑀦𑀺𑀬𑀸’’𑀢𑀺 [𑀅𑀳𑀫𑀸𑀫𑀺𑀲𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀫𑀫𑁄𑀯𑀸𑀤𑁂𑀦 𑀫𑀫𑀸𑀦𑀼𑀲𑀸𑀲𑀦𑀺𑀬𑀸𑀢𑀺 (𑀓.)].

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀢𑀺𑀲𑁆𑀲𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺. 𑀤𑀼𑀢𑀺𑀬𑀁.

𑁩. 𑀬𑀫𑀓𑀲𑀼𑀢𑁆𑀢𑀁

𑁮𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑀫𑀓𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑀫𑀓𑀲𑁆𑀲 𑀓𑀺𑀭 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀬𑀫𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀬𑀫𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀬𑀫𑀓𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀬𑀫𑀓, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺? ‘‘𑀏𑀯𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀫𑀸, 𑀆𑀯𑀼𑀲𑁄 𑀬𑀫𑀓, 𑀏𑀯𑀁 𑀅𑀯𑀘, 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀸𑀘𑀺𑀓𑁆𑀔𑀦𑀁. 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀬𑀫𑀓𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑁄 𑀢𑀣𑁂𑀯 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺.

𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀆𑀬𑀲𑁆𑀫𑀦𑁆𑀢𑀁 𑀬𑀫𑀓𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀫𑀓𑀲𑁆𑀲 𑀦𑀸𑀫, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’𑀢𑀺. 𑀲𑀸𑀥𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀬𑀫𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀬𑀫𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀬𑀫𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀬𑀫𑀓𑀁 𑀏𑀢𑀤𑀯𑁄𑀘 𑁋

‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀬𑀫𑀓, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺? ‘‘𑀏𑀯𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀆𑀯𑀼𑀲𑁄’’. ‘‘𑀯𑁂𑀤𑀦𑀸 𑀦𑀺𑀘𑁆𑀘𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀆𑀯𑀼𑀲𑁄’’. 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’ … ‘‘𑀯𑁂𑀤𑀦𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’… ‘‘𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀲𑁆𑀫𑀺𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀯𑁂𑀤𑀦𑀸𑀬… 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀅𑀜𑁆𑀜𑀢𑁆𑀭 𑀲𑀗𑁆𑀔𑀸𑀭𑁂𑀳𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀅𑀬𑀁 𑀲𑁄 𑀅𑀭𑀽𑀧𑀻… 𑀅𑀯𑁂𑀤𑀦𑁄… 𑀅𑀲𑀜𑁆𑀜𑀻… 𑀅𑀲𑀗𑁆𑀔𑀸𑀭𑁄… 𑀅𑀯𑀺𑀜𑁆𑀜𑀸𑀡𑁄 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀏𑀢𑁆𑀣 𑀘 𑀢𑁂, 𑀆𑀯𑀼𑀲𑁄 𑀬𑀫𑀓, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀘𑀢𑁄 𑀣𑁂𑀢𑀢𑁄 [𑀢𑀣𑀢𑁄 (𑀲𑁆𑀬𑀸. 𑀓𑀁.)] 𑀢𑀣𑀸𑀕𑀢𑁂 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 [𑀢𑀣𑀸𑀕𑀢𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 (?)], 𑀓𑀮𑁆𑀮𑀁 𑀦𑀼 𑀢𑁂 𑀢𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺?

‘‘𑀅𑀳𑀼 𑀔𑁄 𑀫𑁂 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀩𑁆𑀩𑁂 𑀅𑀯𑀺𑀤𑁆𑀤𑀲𑀼𑀦𑁄 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁; 𑀇𑀤𑀜𑁆𑀘 𑀧𑀦𑀸𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀜𑁆𑀘𑁂𑀯 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀳𑀻𑀦𑀁, 𑀥𑀫𑁆𑀫𑁄 𑀘 𑀫𑁂 𑀅𑀪𑀺𑀲𑀫𑀺𑀢𑁄’’𑀢𑀺.

‘‘𑀲𑀘𑁂 𑀢𑀁, 𑀆𑀯𑀼𑀲𑁄 𑀬𑀫𑀓, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀬𑁄 𑀲𑁄, 𑀆𑀯𑀼𑀲𑁄 𑀬𑀫𑀓, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀓𑀺𑀁 𑀳𑁄𑀢𑀻’𑀢𑀺? 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀆𑀯𑀼𑀲𑁄 𑀬𑀫𑀓, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀆𑀯𑀼𑀲𑁄, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀬𑁄 𑀲𑁄, 𑀆𑀯𑀼𑀲𑁄 𑀬𑀫𑀓, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀓𑀺𑀁 𑀳𑁄𑀢𑀻’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀆𑀯𑀼𑀲𑁄, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀭𑀽𑀧𑀁 𑀔𑁄, 𑀆𑀯𑀼𑀲𑁄, 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁; 𑀬𑀁 𑀤𑀼𑀓𑁆𑀔𑀁 𑀢𑀁 𑀦𑀺𑀭𑀼𑀤𑁆𑀥𑀁 𑀢𑀤𑀢𑁆𑀣𑀗𑁆𑀕𑀢𑀁. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁; 𑀬𑀁 𑀤𑀼𑀓𑁆𑀔𑀁 𑀢𑀁 𑀦𑀺𑀭𑀼𑀤𑁆𑀥𑀁 𑀢𑀤𑀢𑁆𑀣𑀗𑁆𑀕𑀢’𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀆𑀯𑀼𑀲𑁄, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀆𑀯𑀼𑀲𑁄 𑀬𑀫𑀓! 𑀢𑁂𑀦 𑀳𑀸𑀯𑀼𑀲𑁄, 𑀬𑀫𑀓, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀜𑀸𑀡𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄 𑀬𑀫𑀓, 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄; 𑀲𑁄 𑀘 𑀆𑀭𑀓𑁆𑀔𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀦𑀢𑁆𑀣𑀓𑀸𑀫𑁄 𑀅𑀳𑀺𑀢𑀓𑀸𑀫𑁄 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄; 𑀲𑁄 𑀘 𑀆𑀭𑀓𑁆𑀔𑀲𑀫𑁆𑀧𑀦𑁆𑀦𑁄; 𑀦𑀸𑀬𑀁 [𑀦 𑀳𑀸𑀬𑀁 (𑀲𑁆𑀬𑀸. 𑀓𑀁.)] 𑀲𑀼𑀓𑀭𑁄 𑀧𑀲𑀬𑁆𑀳 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀅𑀦𑀼𑀧𑀔𑀚𑁆𑀚 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’𑀦𑁆𑀢𑀺. 𑀲𑁄 𑀢𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀉𑀧𑀝𑁆𑀞𑀳𑁂𑀬𑁆𑀬𑀁 𑀢𑀁, 𑀪𑀦𑁆𑀢𑁂’𑀢𑀺. 𑀢𑀫𑁂𑀦𑀁 𑀲𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀉𑀧𑀝𑁆𑀞𑀸𑀧𑁂𑀬𑁆𑀬. 𑀲𑁄 𑀉𑀧𑀝𑁆𑀞𑀳𑁂𑀬𑁆𑀬 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻. 𑀢𑀲𑁆𑀲 𑀲𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀫𑀺𑀢𑁆𑀢𑀢𑁄𑀧𑀺 𑀦𑀁 𑀲𑀤𑁆𑀤𑀳𑁂𑀬𑁆𑀬 [𑀤𑀳𑁂𑀬𑁆𑀬 (𑀲𑁆𑀬𑀸. 𑀓𑀁. 𑀧𑀻. 𑀓.)]; 𑀲𑀼𑀳𑀚𑁆𑀚𑀢𑁄𑀧𑀺 𑀦𑀁 𑀲𑀤𑁆𑀤𑀳𑁂𑀬𑁆𑀬; 𑀢𑀲𑁆𑀫𑀺𑀜𑁆𑀘 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑁂𑀬𑁆𑀬. 𑀬𑀤𑀸 𑀔𑁄, 𑀆𑀯𑀼𑀲𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀯𑀫𑀲𑁆𑀲 𑁋 ‘𑀲𑀁𑀯𑀺𑀲𑁆𑀲𑀢𑁆𑀣𑁄 𑀔𑁄 𑀫𑁆𑀬𑀸𑀬𑀁 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸’𑀢𑀺, 𑀅𑀣 𑀦𑀁 𑀭𑀳𑁄𑀕𑀢𑀁 𑀯𑀺𑀤𑀺𑀢𑁆𑀯𑀸 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀬𑀤𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀆𑀳 𑁋 ‘𑀉𑀧𑀝𑁆𑀞𑀳𑁂𑀬𑁆𑀬𑀁 𑀢𑀁, 𑀪𑀦𑁆𑀢𑁂’𑀢𑀺, 𑀢𑀤𑀸𑀧𑀺 𑀲𑁄 𑀯𑀥𑀓𑁄𑀯. 𑀯𑀥𑀓𑀜𑁆𑀘 𑀧𑀦 𑀲𑀦𑁆𑀢𑀁 𑀦 𑀅𑀜𑁆𑀜𑀸𑀲𑀺 𑁋 ‘𑀯𑀥𑀓𑁄 𑀫𑁂’𑀢𑀺. 𑀬𑀤𑀸𑀧𑀺 𑀲𑁄 𑀉𑀧𑀝𑁆𑀞𑀳𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻, 𑀢𑀤𑀸𑀧𑀺 𑀲𑁄 𑀯𑀥𑀓𑁄𑀯. 𑀯𑀥𑀓𑀜𑁆𑀘 𑀧𑀦 𑀲𑀦𑁆𑀢𑀁 𑀦 𑀅𑀜𑁆𑀜𑀸𑀲𑀺 𑁋 ‘𑀯𑀥𑀓𑁄 𑀫𑁂’𑀢𑀺. 𑀬𑀤𑀸𑀧𑀺 𑀦𑀁 𑀭𑀳𑁄𑀕𑀢𑀁 𑀯𑀺𑀤𑀺𑀢𑁆𑀯𑀸 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀤𑀸𑀧𑀺 𑀲𑁄 𑀯𑀥𑀓𑁄𑀯. 𑀯𑀥𑀓𑀜𑁆𑀘 𑀧𑀦 𑀲𑀦𑁆𑀢𑀁 𑀦 𑀅𑀜𑁆𑀜𑀸𑀲𑀺 𑁋 ‘𑀯𑀥𑀓𑁄 𑀫𑁂’’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁’’.

‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀁 𑀯𑁂𑀤𑀦𑀁 ‘𑀅𑀦𑀺𑀘𑁆𑀘𑀸 𑀯𑁂𑀤𑀦𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀁 𑀲𑀜𑁆𑀜𑀁 ‘𑀅𑀦𑀺𑀘𑁆𑀘𑀸 𑀲𑀜𑁆𑀜𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑁂 𑀲𑀗𑁆𑀔𑀸𑀭𑁂 ‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀤𑀼𑀓𑁆𑀔𑀁 𑀭𑀽𑀧𑀁 ‘𑀤𑀼𑀓𑁆𑀔𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁… 𑀤𑀼𑀓𑁆𑀔𑀁 𑀲𑀜𑁆𑀜𑀁… 𑀤𑀼𑀓𑁆𑀔𑁂 𑀲𑀗𑁆𑀔𑀸𑀭𑁂… 𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡𑀁 ‘𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀅𑀦𑀢𑁆𑀢𑀁 𑀭𑀽𑀧𑀁 ‘𑀅𑀦𑀢𑁆𑀢𑀸 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀢𑁆𑀢𑀁 𑀯𑁂𑀤𑀦𑀁… 𑀅𑀦𑀢𑁆𑀢𑀁 𑀲𑀜𑁆𑀜𑀁… 𑀅𑀦𑀢𑁆𑀢𑁂 𑀲𑀗𑁆𑀔𑀸𑀭𑁂… 𑀅𑀦𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀢𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀲𑀗𑁆𑀔𑀢𑀁 𑀭𑀽𑀧𑀁 ‘𑀲𑀗𑁆𑀔𑀢𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑀗𑁆𑀔𑀢𑀁 𑀯𑁂𑀤𑀦𑀁… 𑀲𑀗𑁆𑀔𑀢𑀁 𑀲𑀜𑁆𑀜𑀁… 𑀲𑀗𑁆𑀔𑀢𑁂 𑀲𑀗𑁆𑀔𑀸𑀭𑁂… 𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡𑀁 ‘𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀯𑀥𑀓𑀁 𑀭𑀽𑀧𑀁 ‘𑀯𑀥𑀓𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀯𑀥𑀓𑀁 𑀯𑁂𑀤𑀦𑀁 ‘𑀯𑀥𑀓𑀸 𑀯𑁂𑀤𑀦𑀸’𑀢𑀺… 𑀯𑀥𑀓𑀁 𑀲𑀜𑁆𑀜𑀁 ‘𑀯𑀥𑀓𑀸 𑀲𑀜𑁆𑀜𑀸’𑀢𑀺… 𑀯𑀥𑀓𑁂 𑀲𑀗𑁆𑀔𑀸𑀭𑁂 ‘𑀯𑀥𑀓𑀸 𑀲𑀗𑁆𑀔𑀸𑀭𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀯𑀥𑀓𑀁 𑀯𑀺𑀜𑁆𑀜𑀸𑀡𑀁 ‘𑀯𑀥𑀓𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀲𑁄 𑀭𑀽𑀧𑀁 𑀉𑀧𑁂𑀢𑀺 𑀉𑀧𑀸𑀤𑀺𑀬𑀢𑀺 𑀅𑀥𑀺𑀝𑁆𑀞𑀸𑀢𑀺 ‘𑀅𑀢𑁆𑀢𑀸 𑀫𑁂’𑀢𑀺. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀉𑀧𑁂𑀢𑀺 𑀉𑀧𑀸𑀤𑀺𑀬𑀢𑀺 𑀅𑀥𑀺𑀝𑁆𑀞𑀸𑀢𑀺 ‘𑀅𑀢𑁆𑀢𑀸 𑀫𑁂’𑀢𑀺. 𑀢𑀲𑁆𑀲𑀺𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀉𑀧𑁂𑀢𑀸 𑀉𑀧𑀸𑀤𑀺𑀦𑁆𑀦𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀲𑀼𑀢𑀯𑀸 𑀘 𑀔𑁄, 𑀆𑀯𑀼𑀲𑁄, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁; 𑀦 𑀅𑀢𑁆𑀢𑀦𑀺 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁. 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁; 𑀦 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁.

‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀁 𑀯𑁂𑀤𑀦𑀁 … 𑀅𑀦𑀺𑀘𑁆𑀘𑀁 𑀲𑀜𑁆𑀜𑀁… 𑀅𑀦𑀺𑀘𑁆𑀘𑁂 𑀲𑀗𑁆𑀔𑀸𑀭𑁂 … 𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀤𑀼𑀓𑁆𑀔𑀁 𑀭𑀽𑀧𑀁 ‘𑀤𑀼𑀓𑁆𑀔𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁… 𑀤𑀼𑀓𑁆𑀔𑀁 𑀲𑀜𑁆𑀜𑀁… 𑀤𑀼𑀓𑁆𑀔𑁂 𑀲𑀗𑁆𑀔𑀸𑀭𑁂… 𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡𑀁 ‘𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀅𑀦𑀢𑁆𑀢𑀁 𑀭𑀽𑀧𑀁 ‘𑀅𑀦𑀢𑁆𑀢𑀸 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀦𑀢𑁆𑀢𑀁 𑀯𑁂𑀤𑀦𑀁… 𑀅𑀦𑀢𑁆𑀢𑀁 𑀲𑀜𑁆𑀜𑀁… 𑀅𑀦𑀢𑁆𑀢𑁂 𑀲𑀗𑁆𑀔𑀸𑀭𑁂… 𑀅𑀦𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀢𑁆𑀢𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀲𑀗𑁆𑀔𑀢𑀁 𑀭𑀽𑀧𑀁 ‘𑀲𑀗𑁆𑀔𑀢𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑀗𑁆𑀔𑀢𑀁 𑀯𑁂𑀤𑀦𑀁… 𑀲𑀗𑁆𑀔𑀢𑀁 𑀲𑀜𑁆𑀜𑀁… 𑀲𑀗𑁆𑀔𑀢𑁂 𑀲𑀗𑁆𑀔𑀸𑀭𑁂… 𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡𑀁 ‘𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀯𑀥𑀓𑀁 𑀭𑀽𑀧𑀁 ‘𑀯𑀥𑀓𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑀥𑀓𑀁 𑀯𑁂𑀤𑀦𑀁… 𑀯𑀥𑀓𑀁 𑀲𑀜𑁆𑀜𑀁… 𑀯𑀥𑀓𑁂 𑀲𑀗𑁆𑀔𑀸𑀭𑁂 ‘‘𑀯𑀥𑀓𑀸 𑀲𑀗𑁆𑀔𑀸𑀭𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑀥𑀓𑀁 𑀯𑀺𑀜𑁆𑀜𑀸𑀡𑀁 ‘𑀯𑀥𑀓𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀲𑁄 𑀭𑀽𑀧𑀁 𑀦 𑀉𑀧𑁂𑀢𑀺, 𑀦 𑀉𑀧𑀸𑀤𑀺𑀬𑀢𑀺, 𑀦𑀸𑀥𑀺𑀝𑁆𑀞𑀸𑀢𑀺 𑁋 ‘𑀅𑀢𑁆𑀢𑀸 𑀫𑁂’𑀢𑀺. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀦 𑀉𑀧𑁂𑀢𑀺, 𑀦 𑀉𑀧𑀸𑀤𑀺𑀬𑀢𑀺, 𑀦𑀸𑀥𑀺𑀝𑁆𑀞𑀸𑀢𑀺 𑁋 ‘𑀅𑀢𑁆𑀢𑀸 𑀫𑁂’𑀢𑀺. 𑀢𑀲𑁆𑀲𑀺𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀦𑀼𑀧𑁂𑀢𑀸 𑀅𑀦𑀼𑀧𑀸𑀤𑀺𑀦𑁆𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁄𑀢𑀺 𑀬𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀢𑀸𑀤𑀺𑀲𑀸 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀦𑀼𑀓𑀫𑁆𑀧𑀓𑀸 𑀅𑀢𑁆𑀣𑀓𑀸𑀫𑀸 𑀑𑀯𑀸𑀤𑀓𑀸 𑀅𑀦𑀼𑀲𑀸𑀲𑀓𑀸. 𑀇𑀤𑀜𑁆𑀘 𑀧𑀦 𑀫𑁂 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀦𑀼𑀭𑀸𑀥𑀲𑀼𑀢𑁆𑀢𑀁

𑁮𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀅𑀦𑀼𑀭𑀸𑀥𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁄 𑀲𑁄, 𑀆𑀯𑀼𑀲𑁄 𑀅𑀦𑀼𑀭𑀸𑀥, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺?

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘 𑁋 ‘‘𑀬𑁄 𑀲𑁄 𑀆𑀯𑀼𑀲𑁄 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀦𑀯𑁄 𑀪𑀯𑀺𑀲𑁆𑀲𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀣𑁂𑀭𑁄 𑀯𑀸 𑀧𑀦 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄’’𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀦𑀯𑀯𑀸𑀤𑁂𑀦 𑀘 𑀩𑀸𑀮𑀯𑀸𑀤𑁂𑀦 𑀘 𑀅𑀧𑀲𑀸𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀸𑀥𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀁 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁. 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁆𑀯𑀸𑀳𑀁 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀁, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀁, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀸𑀫𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 …𑀧𑁂… 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀬𑁄 𑀲𑁄, 𑀆𑀯𑀼𑀲𑁄 𑀅𑀦𑀼𑀭𑀸𑀥, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀁 𑀢𑀣𑀸𑀕𑀢𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’’𑀢𑀺?

𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘𑀁 𑁋 ‘‘𑀬𑁄 𑀲𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀲𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀦 𑀯𑁄 𑀪𑀯𑀺𑀲𑁆𑀲𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀣𑁂𑀭𑁄 𑀯𑀸 𑀧𑀦 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄’𑀢𑀺. 𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦𑀯𑀯𑀸𑀤𑁂𑀦 𑀩𑀸𑀮𑀯𑀸𑀤𑁂𑀦 𑀘 𑀅𑀧𑀲𑀸𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼’’.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀏𑀢𑀤𑀳𑁄𑀲𑀺 𑁋 ‘𑀲𑀘𑁂 𑀔𑁄 𑀫𑀁 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁. 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁆𑀯𑀸𑀳𑀁 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀁, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀁, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’’𑀢𑀺?

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁 𑀪𑀦𑁆𑀢𑁂’’…𑀧𑁂… 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀲𑁆𑀫𑀺𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸𑀬…𑀧𑁂… 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀅𑀜𑁆𑀜𑀢𑁆𑀭 𑀲𑀗𑁆𑀔𑀸𑀭𑁂𑀳𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀁… 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁… 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀅𑀬𑀁 𑀲𑁄 𑀅𑀭𑀽𑀧𑀻 𑀅𑀯𑁂𑀤𑀦𑁄 𑀅𑀲𑀜𑁆𑀜𑀻 𑀅𑀲𑀗𑁆𑀔𑀸𑀭𑁄 𑀅𑀯𑀺𑀜𑁆𑀜𑀸𑀡𑁄 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀢𑁆𑀣 𑀘 𑀢𑁂, 𑀅𑀦𑀼𑀭𑀸𑀥, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀢𑀣𑀸𑀕𑀢𑁂 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 𑀓𑀮𑁆𑀮𑀁 𑀦𑀼 𑀢𑁂 𑀢𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀬𑁄 𑀲𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀸𑀥! 𑀧𑀼𑀩𑁆𑀩𑁂 𑀘𑀸𑀳𑀁, 𑀅𑀦𑀼𑀭𑀸𑀥, 𑀏𑀢𑀭𑀳𑀺 𑀘 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀧𑁂𑀫𑀺, 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀓𑁆𑀓𑀮𑀺𑀲𑀼𑀢𑁆𑀢𑀁

𑁮𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀯𑀺𑀳𑀭𑀢𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀉𑀧𑀝𑁆𑀞𑀸𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀣 𑁋 ‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄, 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀣 𑁋 ‘𑀲𑀸𑀥𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀯𑀓𑁆𑀓𑀮𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀢𑀼; 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄, 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺; 𑀏𑀯𑀜𑁆𑀘 𑀧𑀦 𑀯𑀤𑁂𑀢𑀺 𑁋 ‘𑀲𑀸𑀥𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀯𑀓𑁆𑀓𑀮𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀢𑀼; 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦𑀸𑀬𑀲𑁆𑀫𑀸 𑀯𑀓𑁆𑀓𑀮𑀺 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺 [𑀲𑀫𑀜𑁆𑀘𑁄𑀲𑀺 (𑀲𑀻.), 𑀲𑀫𑀜𑁆𑀘𑁄𑀧𑀺 (𑀲𑁆𑀬𑀸. 𑀓𑀁.) 𑀲𑀁 + 𑀥𑀽 + 𑀈 = 𑀲𑀫𑀥𑁄𑀲𑀺]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀯𑀓𑁆𑀓𑀮𑀺, 𑀫𑀸 𑀢𑁆𑀯𑀁 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺. 𑀲𑀦𑁆𑀢𑀺𑀫𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺; 𑀢𑀢𑁆𑀣𑀸𑀳𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀯𑀓𑁆𑀓𑀮𑀺, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺; 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺? ‘‘𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁; 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺. ‘‘𑀓𑀘𑁆𑀘𑀺 𑀢𑁂, 𑀯𑀓𑁆𑀓𑀮𑀺, 𑀦 𑀓𑀺𑀜𑁆𑀘𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀦 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺? ‘‘𑀢𑀕𑁆𑀖 𑀫𑁂, 𑀪𑀦𑁆𑀢𑁂, 𑀅𑀦𑀧𑁆𑀧𑀓𑀁 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀦𑀧𑁆𑀧𑀓𑁄 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺. ‘‘𑀓𑀘𑁆𑀘𑀺 𑀧𑀦 𑀢𑀁, 𑀯𑀓𑁆𑀓𑀮𑀺, 𑀅𑀢𑁆𑀢𑀸 𑀲𑀻𑀮𑀢𑁄 𑀦 𑀉𑀧𑀯𑀤𑀢𑀻’’𑀢𑀺? ‘‘𑀦 𑀔𑁄 𑀫𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀲𑀻𑀮𑀢𑁄 𑀉𑀧𑀯𑀤𑀢𑀻’’𑀢𑀺. ‘‘𑀦𑁄 𑀘𑁂 𑀓𑀺𑀭 𑀢𑀁, 𑀯𑀓𑁆𑀓𑀮𑀺, 𑀅𑀢𑁆𑀢𑀸 𑀲𑀻𑀮𑀢𑁄 𑀉𑀧𑀯𑀤𑀢𑀺; 𑀅𑀣 𑀓𑀺𑀜𑁆𑀘 𑀢𑁂 𑀓𑀼𑀓𑁆𑀓𑀼𑀘𑁆𑀘𑀁 𑀓𑁄 𑀘 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺? ‘‘𑀘𑀺𑀭𑀧𑀝𑀺𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄, 𑀦𑀢𑁆𑀣𑀺 𑀘 𑀫𑁂 𑀓𑀸𑀬𑀲𑁆𑀫𑀺𑀁 𑀢𑀸𑀯𑀢𑀺𑀓𑀸 𑀩𑀮𑀫𑀢𑁆𑀢𑀸, 𑀬𑀸𑀯𑀢𑀸𑀳𑀁 [𑀬𑀸𑀳𑀁 (𑀲𑀻.), 𑀬𑀸𑀬𑀸𑀳𑀁 (𑀧𑀻.)] 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺.

‘‘𑀅𑀮𑀁, 𑀯𑀓𑁆𑀓𑀮𑀺, 𑀓𑀺𑀁 𑀢𑁂 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺 𑀲𑁄 𑀫𑀁 𑀧𑀲𑁆𑀲𑀢𑀺; 𑀬𑁄 𑀫𑀁 𑀧𑀲𑁆𑀲𑀢𑀺 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺. 𑀥𑀫𑁆𑀫𑀜𑁆𑀳𑀺, 𑀯𑀓𑁆𑀓𑀮𑀺, 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀺; 𑀫𑀁 𑀧𑀲𑁆𑀲𑀦𑁆𑀢𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀓𑁆𑀓𑀮𑀺, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’…𑀧𑁂… 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀫𑀁, 𑀆𑀯𑀼𑀲𑁄, 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀣. 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀅𑀦𑁆𑀢𑀭𑀖𑀭𑁂 𑀓𑀸𑀮𑀁 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀢𑀜𑁆𑀘 𑀭𑀢𑁆𑀢𑀺𑀁 𑀢𑀜𑁆𑀘 𑀤𑀺𑀯𑀸𑀯𑀲𑁂𑀲𑀁 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀸𑀲𑀺. 𑀅𑀣 𑀔𑁄 𑀤𑁆𑀯𑁂 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼…𑀧𑁂… 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀺𑀫𑁄𑀓𑁆𑀔𑀸𑀬 𑀘𑁂𑀢𑁂𑀢𑀻’’𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑁄 𑀳𑀺 𑀦𑀽𑀦, 𑀪𑀦𑁆𑀢𑁂, 𑀲𑀼𑀯𑀺𑀫𑀼𑀢𑁆𑀢𑁄 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺. 𑀇𑀤𑀫𑀯𑁄𑀘𑀼𑀁 𑀢𑀸 𑀤𑁂𑀯𑀢𑀸𑀬𑁄. 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀓𑁆𑀓𑀮𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀓𑁆𑀓𑀮𑀺𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀣 𑁋

‘‘‘𑀲𑀼𑀡𑀸𑀯𑀼𑀲𑁄 𑀢𑁆𑀯𑀁, 𑀯𑀓𑁆𑀓𑀮𑀺, 𑀪𑀕𑀯𑀢𑁄 𑀯𑀘𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀤𑁂𑀯𑀢𑀸𑀦𑀁. 𑀇𑀫𑀁, 𑀆𑀯𑀼𑀲𑁄, 𑀭𑀢𑁆𑀢𑀺𑀁 𑀤𑁆𑀯𑁂 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀆𑀯𑀼𑀲𑁄, 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀺𑀫𑁄𑀓𑁆𑀔𑀸𑀬 𑀘𑁂𑀢𑁂𑀢𑀻𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀲𑁄 𑀳𑀺 𑀦𑀽𑀦, 𑀪𑀦𑁆𑀢𑁂, 𑀲𑀼𑀯𑀺𑀫𑀼𑀢𑁆𑀢𑁄 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺. 𑀪𑀕𑀯𑀸 𑀘 𑀢𑀁, 𑀆𑀯𑀼𑀲𑁄 𑀯𑀓𑁆𑀓𑀮𑀺, 𑀏𑀯𑀫𑀸𑀳 𑁋 𑀫𑀸 𑀪𑀸𑀬𑀺, 𑀯𑀓𑁆𑀓𑀮𑀺; 𑀫𑀸 𑀪𑀸𑀬𑀺, 𑀯𑀓𑁆𑀓𑀮𑀺! 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀸𑀧𑀺𑀓𑀸 𑀓𑀸𑀮𑀓𑀺𑀭𑀺𑀬𑀸’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀯𑀓𑁆𑀓𑀮𑀺 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀼𑀡𑀸𑀯𑀼𑀲𑁄 𑀯𑀓𑁆𑀓𑀮𑀺, 𑀪𑀕𑀯𑀢𑁄 𑀯𑀘𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀤𑁂𑀯𑀢𑀸𑀦’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀉𑀧𑀝𑁆𑀞𑀸𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀫𑀁, 𑀆𑀯𑀼𑀲𑁄, 𑀫𑀜𑁆𑀘𑀓𑀸 𑀑𑀭𑁄𑀧𑁂𑀣. 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀲𑁄𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺! ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀫𑀜𑁆𑀘𑀓𑀸 𑀑𑀭𑁄𑀧𑁂𑀲𑀼𑀁. ‘‘𑀇𑀫𑀁, 𑀆𑀯𑀼𑀲𑁄, 𑀭𑀢𑁆𑀢𑀺𑀁 𑀤𑁆𑀯𑁂 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸…𑀧𑁂… 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀆𑀯𑀼𑀲𑁄, 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀺𑀫𑁄𑀓𑁆𑀔𑀸𑀬 𑀘𑁂𑀢𑁂𑀢𑀻’𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀲𑁄 𑀳𑀺 𑀦𑀽𑀦, 𑀪𑀦𑁆𑀢𑁂, 𑀲𑀼𑀯𑀺𑀫𑀼𑀢𑁆𑀢𑁄 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺. 𑀪𑀕𑀯𑀸 𑀘 𑀢𑀁, 𑀆𑀯𑀼𑀲𑁄 𑀯𑀓𑁆𑀓𑀮𑀺, 𑀏𑀯𑀫𑀸𑀳 𑁋 ‘𑀫𑀸 𑀪𑀸𑀬𑀺, 𑀯𑀓𑁆𑀓𑀮𑀺; 𑀫𑀸 𑀪𑀸𑀬𑀺, 𑀯𑀓𑁆𑀓𑀮𑀺! 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀸𑀧𑀺𑀓𑀸 𑀓𑀸𑀮𑀓𑀺𑀭𑀺𑀬𑀸’’’𑀢𑀺. ‘‘𑀢𑁂𑀦 𑀳𑀸𑀯𑀼𑀲𑁄, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀣 𑁋 ‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀣 𑁋 ‘𑀭𑀽𑀧𑀁 𑀅𑀦𑀺𑀘𑁆𑀘𑀁. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀻’’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀢𑁆𑀣𑀁 𑀆𑀳𑀭𑁂𑀲𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀯𑀓𑁆𑀓𑀮𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄; 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘𑀭𑀽𑀧𑀁 𑀅𑀦𑀺𑀘𑁆𑀘𑀁. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸 … 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀢𑀸𑀳𑀁, 𑀪𑀦𑁆𑀢𑁂, 𑀦 𑀓𑀗𑁆𑀔𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀺. 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀻’’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫, 𑀪𑀺𑀓𑁆𑀔𑀯𑁂, 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀬𑀢𑁆𑀣 𑀯𑀓𑁆𑀓𑀮𑀺𑀦𑀸 𑀓𑀼𑀮𑀧𑀼𑀢𑁆𑀢𑁂𑀦 𑀲𑀢𑁆𑀣𑀫𑀸𑀳𑀭𑀺𑀢’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀤𑀽𑀭𑀢𑁄𑀯 𑀫𑀜𑁆𑀘𑀓𑁂 𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑀁 𑀲𑁂𑀫𑀸𑀦𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁 𑀕𑀘𑁆𑀙𑀢𑁂𑀯 𑀧𑀼𑀭𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀢𑁆𑀢𑀭𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀤𑁆𑀥𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀅𑀥𑁄 𑀤𑀺𑀲𑀁, 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲𑀁. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀁 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁 𑀕𑀘𑁆𑀙𑀢𑁂𑀯 𑀧𑀼𑀭𑀺𑀫𑀁 𑀤𑀺𑀲𑀁…𑀧𑁂… 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀲𑁄 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀓𑁆𑀓𑀮𑀺𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑀺 [𑀲𑀫𑀦𑁆𑀦𑁂𑀲𑀢𑀺 (𑀓. 𑀲𑀻. 𑀧𑀻.)] 𑁋 ‘𑀓𑀢𑁆𑀣 𑀯𑀓𑁆𑀓𑀮𑀺𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺? 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦 𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂𑀦 𑀯𑀓𑁆𑀓𑀮𑀺 𑀓𑀼𑀮𑀧𑀼𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀅𑀲𑁆𑀲𑀚𑀺𑀲𑀼𑀢𑁆𑀢𑀁

𑁮𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀓𑀲𑁆𑀲𑀧𑀓𑀸𑀭𑀸𑀫𑁂 𑀯𑀺𑀳𑀭𑀢𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀉𑀧𑀝𑁆𑀞𑀸𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀣 𑁋 ‘𑀅𑀲𑁆𑀲𑀚𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀣 𑁋 ‘𑀲𑀸𑀥𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀅𑀲𑁆𑀲𑀚𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀅𑀲𑁆𑀲𑀚𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀲𑁆𑀲𑀚𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄…𑀧𑁂… 𑀲𑀸𑀥𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀅𑀲𑁆𑀲𑀚𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀚𑀺 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 [𑀆𑀬𑀲𑁆𑀫𑀢𑁄 𑀅𑀲𑁆𑀲𑀚𑀺𑀲𑁆𑀲 (𑀧𑀻. 𑀓.)] 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀅𑀲𑁆𑀲𑀚𑀺, 𑀫𑀸 𑀢𑁆𑀯𑀁 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺. 𑀲𑀦𑁆𑀢𑀺𑀫𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀢𑀢𑁆𑀣𑀸𑀳𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀅𑀲𑁆𑀲𑀚𑀺, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁…𑀧𑁂… 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺?

‘‘𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁…𑀧𑁂… 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺. ‘‘𑀓𑀘𑁆𑀘𑀺 𑀢𑁂, 𑀅𑀲𑁆𑀲𑀚𑀺, 𑀦 𑀓𑀺𑀜𑁆𑀘𑀺 𑀓𑀼𑀓𑁆𑀓𑀼𑀘𑁆𑀘𑀁 𑀦 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺? ‘‘𑀢𑀕𑁆𑀖 𑀫𑁂, 𑀪𑀦𑁆𑀢𑁂, 𑀅𑀦𑀧𑁆𑀧𑀓𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀦𑀧𑁆𑀧𑀓𑁄 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺. ‘‘𑀓𑀘𑁆𑀘𑀺 𑀧𑀦 𑀢𑀁, 𑀅𑀲𑁆𑀲𑀚𑀺, 𑀅𑀢𑁆𑀢𑀸 𑀲𑀻𑀮𑀢𑁄 𑀦 𑀉𑀧𑀯𑀤𑀢𑀻’’𑀢𑀺? ‘‘𑀦 𑀔𑁄 𑀫𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀲𑀻𑀮𑀢𑁄 𑀉𑀧𑀯𑀤𑀢𑀻’’𑀢𑀺. ‘‘𑀦𑁄 𑀘𑁂 𑀓𑀺𑀭 𑀢𑀁, 𑀅𑀲𑁆𑀲𑀚𑀺, 𑀅𑀢𑁆𑀢𑀸 𑀲𑀻𑀮𑀢𑁄 𑀉𑀧𑀯𑀤𑀢𑀺, 𑀅𑀣 𑀓𑀺𑀜𑁆𑀘 𑀢𑁂 𑀓𑀼𑀓𑁆𑀓𑀼𑀘𑁆𑀘𑀁 𑀓𑁄 𑀘 𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺? ‘‘𑀧𑀼𑀩𑁆𑀩𑁂 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀕𑁂𑀮𑀜𑁆𑀜𑁂 𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀓𑀸𑀬𑀲𑀗𑁆𑀔𑀸𑀭𑁂 𑀯𑀺𑀳𑀭𑀸𑀫𑀺, 𑀲𑁄𑀳𑀁 𑀲𑀫𑀸𑀥𑀺𑀁 𑀦𑀧𑁆𑀧𑀝𑀺𑀮𑀪𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀁 𑀲𑀫𑀸𑀥𑀺𑀁 𑀅𑀧𑁆𑀧𑀝𑀺𑀮𑀪𑀢𑁄 𑀏𑀯𑀁 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲𑀸𑀳𑀁 𑀧𑀭𑀺𑀳𑀸𑀬𑀸𑀫𑀻’’’𑀢𑀺. ‘‘𑀬𑁂 𑀢𑁂, 𑀅𑀲𑁆𑀲𑀚𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀸𑀥𑀺𑀲𑀸𑀭𑀓𑀸 𑀲𑀫𑀸𑀥𑀺𑀲𑀸𑀫𑀜𑁆𑀜𑀸 𑀢𑁂𑀲𑀁 𑀢𑀁 𑀲𑀫𑀸𑀥𑀺𑀁 𑀅𑀧𑁆𑀧𑀝𑀺𑀮𑀪𑀢𑀁 𑀏𑀯𑀁 𑀳𑁄𑀢𑀺 𑁋 ‘𑀦𑁄 𑀘𑀲𑁆𑀲𑀼 𑀫𑀬𑀁 𑀧𑀭𑀺𑀳𑀸𑀬𑀸𑀫𑀸’’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀲𑁆𑀲𑀚𑀺, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’…𑀧𑁂… 𑀯𑀺𑀜𑁆𑀜𑀸𑀡𑀁 …𑀧𑁂… 𑀢𑀲𑁆𑀫𑀸𑀢𑀺𑀳…𑀧𑁂… 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺. 𑀲𑁄 𑀲𑀼𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺 [𑀯𑁂𑀤𑀺𑀬𑀢𑀺 (𑀲𑀻. 𑀧𑀻.)], 𑀲𑀸 ‘𑀅𑀦𑀺𑀘𑁆𑀘𑀸’𑀢𑀺 𑀧𑀚𑀸𑀦𑀸𑀢𑀺. ‘𑀅𑀦𑀚𑁆𑀛𑁄𑀲𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. ‘𑀅𑀦𑀪𑀺𑀦𑀦𑁆𑀤𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀸 ‘𑀅𑀦𑀺𑀘𑁆𑀘𑀸’𑀢𑀺 𑀧𑀚𑀸𑀦𑀸𑀢𑀺. ‘𑀅𑀦𑀚𑁆𑀛𑁄𑀲𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. ‘𑀅𑀦𑀪𑀺𑀦𑀦𑁆𑀤𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀲𑀸 ‘𑀅𑀦𑀺𑀘𑁆𑀘𑀸’𑀢𑀺 𑀧𑀚𑀸𑀦𑀸𑀢𑀺…𑀧𑁂… ‘𑀅𑀦𑀪𑀺𑀦𑀦𑁆𑀤𑀺𑀢𑀸’𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀲𑀼𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀁𑀬𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺; 𑀤𑀼𑀓𑁆𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀁𑀬𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺; 𑀅𑀤𑀼𑀓𑁆𑀔𑀫𑀲𑀼𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀯𑀺𑀲𑀁𑀬𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀺. 𑀲𑁄 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀅𑀲𑁆𑀲𑀚𑀺, 𑀢𑁂𑀮𑀜𑁆𑀘 𑀧𑀝𑀺𑀘𑁆𑀘, 𑀯𑀝𑁆𑀝𑀺𑀜𑁆𑀘 𑀧𑀝𑀺𑀘𑁆𑀘, 𑀢𑁂𑀮𑀧𑁆𑀧𑀤𑀻𑀧𑁄 𑀛𑀸𑀬𑁂𑀬𑁆𑀬; 𑀢𑀲𑁆𑀲𑁂𑀯 𑀢𑁂𑀮𑀲𑁆𑀲 𑀘 𑀯𑀝𑁆𑀝𑀺𑀬𑀸 𑀘 𑀧𑀭𑀺𑀬𑀸𑀤𑀸𑀦𑀸 𑀅𑀦𑀸𑀳𑀸𑀭𑁄 𑀦𑀺𑀩𑁆𑀩𑀸𑀬𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀅𑀲𑁆𑀲𑀚𑀺, 𑀪𑀺𑀓𑁆𑀔𑀼 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀔𑁂𑀫𑀓𑀲𑀼𑀢𑁆𑀢𑀁

𑁮𑁯. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀩𑀤𑀭𑀺𑀓𑀸𑀭𑀸𑀫𑁂 𑀯𑀺𑀳𑀭𑀢𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑀸 𑀆𑀬𑀲𑁆𑀫𑀦𑁆𑀢𑀁 𑀤𑀸𑀲𑀓𑀁 𑀆𑀫𑀦𑁆𑀢𑁂𑀲𑀼𑀁 𑁋 ‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀤𑀸𑀲𑀓, 𑀬𑁂𑀦 𑀔𑁂𑀫𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑁂𑀫𑀓𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 𑀓𑀘𑁆𑀘𑀺 𑀢𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀔𑁂𑀫𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀏𑀢𑀤𑀯𑁄𑀘 𑁋 ‘‘𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 ‘𑀓𑀘𑁆𑀘𑀺 𑀢𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁…𑀧𑁂… 𑀦𑁄 𑀅𑀪𑀺𑀓𑁆𑀓𑀫𑁄’’’𑀢𑀺? ‘‘𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁…𑀧𑁂… 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀔𑁂𑀫𑀓𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘𑀦 𑀫𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁…𑀧𑁂… 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’’’𑀢𑀺. ‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀤𑀸𑀲𑀓, 𑀬𑁂𑀦 𑀔𑁂𑀫𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑁂𑀫𑀓𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀢𑀻’’’𑀢𑀺?

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀔𑁂𑀫𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 ‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺? ‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀔𑁂𑀫𑀓𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀸𑀫𑀻’’’𑀢𑀺. ‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀤𑀸𑀲𑀓, 𑀬𑁂𑀦 𑀔𑁂𑀫𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑁂𑀫𑀓𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀦𑁄 𑀘𑁂 𑀓𑀺𑀭𑀸𑀬𑀲𑁆𑀫𑀸 𑀔𑁂𑀫𑀓𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀢𑀺. 𑀢𑁂𑀦𑀳𑀸𑀬𑀲𑁆𑀫𑀸 𑀔𑁂𑀫𑀓𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄’’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀔𑁂𑀫𑀓𑁄…𑀧𑁂… 𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 ‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄; 𑀦𑁄 𑀘𑁂 𑀓𑀺𑀭𑀸𑀬𑀲𑁆𑀫𑀸 𑀔𑁂𑀫𑀓𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀢𑀺, 𑀢𑁂𑀦𑀳𑀸𑀬𑀲𑁆𑀫𑀸 𑀔𑁂𑀫𑀓𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺. ‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀦 𑀘𑀫𑁆𑀳𑀺 𑀅𑀭𑀳𑀁 𑀔𑀻𑀡𑀸𑀲𑀯𑁄; 𑀅𑀧𑀺 𑀘 𑀫𑁂, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ‘𑀅𑀲𑁆𑀫𑀻’𑀢𑀺 𑀅𑀥𑀺𑀕𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀦 𑀘 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽…𑀧𑁂… 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀔𑁂𑀫𑀓𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂𑀲𑀼 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀦 𑀘𑀫𑁆𑀳𑀺 𑀅𑀭𑀳𑀁 𑀔𑀻𑀡𑀸𑀲𑀯𑁄; 𑀅𑀧𑀺 𑀘 𑀫𑁂, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ‘𑀅𑀲𑁆𑀫𑀻’𑀢𑀺 𑀅𑀥𑀺𑀕𑀢𑀁, ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀦 𑀘 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀤𑀸𑀲𑀓, 𑀬𑁂𑀦 𑀔𑁂𑀫𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑁂𑀫𑀓𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺, 𑀓𑀺𑀫𑁂𑀢𑀁 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺? 𑀭𑀽𑀧𑀁 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺, 𑀅𑀜𑁆𑀜𑀢𑁆𑀭 𑀭𑀽𑀧𑀸 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺, 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺. 𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀅𑀲𑁆𑀫𑀻𑀢𑀺 𑀯𑀤𑁂𑀲𑀺. 𑀓𑀺𑀫𑁂𑀢𑀁 𑀅𑀲𑁆𑀫𑀻𑀢𑀺 𑀯𑀤𑁂𑀲𑀻’’’𑀢𑀺?

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀤𑀸𑀲𑀓𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀔𑁂𑀫𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀏𑀢𑀤𑀯𑁄𑀘 𑁋 𑀣𑁂𑀭𑀸 𑀢𑀁, 𑀆𑀯𑀼𑀲𑁄 𑀔𑁂𑀫𑀓, 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀓𑀺𑀫𑁂𑀢𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀭𑀽𑀧𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺 𑀅𑀜𑁆𑀜𑀢𑁆𑀭 𑀭𑀽𑀧𑀸 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀓𑀺𑀫𑁂𑀢𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺’’𑀢𑀺? ‘‘𑀅𑀮𑀁, 𑀆𑀯𑀼𑀲𑁄 𑀤𑀸𑀲𑀓, 𑀓𑀺𑀁 𑀇𑀫𑀸𑀬 𑀲𑀦𑁆𑀥𑀸𑀯𑀦𑀺𑀓𑀸𑀬! 𑀆𑀳𑀭𑀸𑀯𑀼𑀲𑁄, 𑀤𑀡𑁆𑀟𑀁; 𑀅𑀳𑀫𑁂𑀯 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀤𑀡𑁆𑀟𑀫𑁄𑀮𑀼𑀩𑁆𑀪 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀓𑀺𑀫𑁂𑀢𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀭𑀽𑀧𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀅𑀜𑁆𑀜𑀢𑁆𑀭 𑀭𑀽𑀧𑀸 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺? 𑀬𑀫𑁂𑀢𑀁, 𑀆𑀯𑀼𑀲𑁄 𑀔𑁂𑀫𑀓, ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀺, 𑀓𑀺𑀫𑁂𑀢𑀁 ‘𑀅𑀲𑁆𑀫𑀻’𑀢𑀺 𑀯𑀤𑁂𑀲𑀻’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀭𑀽𑀧𑀁 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺; 𑀦𑀧𑀺 𑀅𑀜𑁆𑀜𑀢𑁆𑀭 𑀭𑀽𑀧𑀸 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺. 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺; 𑀦𑀧𑀺 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺. 𑀅𑀧𑀺 𑀘 𑀫𑁂, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ‘𑀅𑀲𑁆𑀫𑀻’𑀢𑀺 𑀅𑀥𑀺𑀕𑀢𑀁 ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀦 𑀘 𑀲𑀫𑀦𑀼𑀧𑀲𑁆𑀲𑀸𑀫𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀉𑀧𑁆𑀧𑀮𑀲𑁆𑀲 𑀯𑀸 𑀧𑀤𑀼𑀫𑀲𑁆𑀲 𑀯𑀸 𑀧𑀼𑀡𑁆𑀟𑀭𑀻𑀓𑀲𑁆𑀲 𑀯𑀸 𑀕𑀦𑁆𑀥𑁄. 𑀬𑁄 𑀦𑀼 𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀧𑀢𑁆𑀢𑀲𑁆𑀲 𑀕𑀦𑁆𑀥𑁄’𑀢𑀺 𑀯𑀸 ‘𑀯𑀡𑁆𑀡𑀲𑁆𑀲 [𑀯𑀡𑁆𑀟𑀲𑁆𑀲 (𑀓𑀢𑁆𑀣𑀘𑀺)] 𑀕𑀦𑁆𑀥𑁄’𑀢𑀺 𑀯𑀸 ‘𑀓𑀺𑀜𑁆𑀚𑀓𑁆𑀔𑀲𑁆𑀲 𑀕𑀦𑁆𑀥𑁄’𑀢𑀺 𑀯𑀸 𑀲𑀫𑁆𑀫𑀸 𑀦𑀼 𑀔𑁄 𑀲𑁄 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’. ‘‘𑀬𑀣𑀸 𑀓𑀣𑀁, 𑀧𑀦𑀸𑀯𑀼𑀲𑁄, 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺? ‘‘‘𑀧𑀼𑀧𑁆𑀨𑀲𑁆𑀲 𑀕𑀦𑁆𑀥𑁄’𑀢𑀺 𑀔𑁄, 𑀆𑀯𑀼𑀲𑁄, 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀦 𑀭𑀽𑀧𑀁 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺, 𑀦𑀧𑀺 𑀅𑀜𑁆𑀜𑀢𑁆𑀭 𑀭𑀽𑀧𑀸 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺. 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺, 𑀦𑀧𑀺 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 ‘𑀅𑀲𑁆𑀫𑀻’𑀢𑀺 𑀯𑀤𑀸𑀫𑀺. 𑀅𑀧𑀺 𑀘 𑀫𑁂, 𑀆𑀯𑀼𑀲𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ‘𑀅𑀲𑁆𑀫𑀻’𑀢𑀺 𑀅𑀥𑀺𑀕𑀢𑀁 ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀦 𑀘 𑀲𑀫𑀦𑀼𑀧𑀲𑁆𑀲𑀸𑀫𑀺’’.

‘‘𑀓𑀺𑀜𑁆𑀘𑀸𑀧𑀺, 𑀆𑀯𑀼𑀲𑁄, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺, 𑀅𑀣 𑀔𑁆𑀯𑀲𑁆𑀲 𑀳𑁄𑀢𑀺 𑁋 ‘𑀬𑁄 𑀘 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀳𑀕𑀢𑁄 𑀅𑀲𑁆𑀫𑀻𑀢𑀺 𑀫𑀸𑀦𑁄, 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄, 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑁋 𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀢𑀲𑁆𑀲𑀺𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑁄𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀳𑀕𑀢𑁄 ‘𑀅𑀲𑁆𑀫𑀻’𑀢𑀺, 𑀫𑀸𑀦𑁄 ‘𑀅𑀲𑁆𑀫𑀻’𑀢𑀺, 𑀙𑀦𑁆𑀤𑁄 ‘𑀅𑀲𑁆𑀫𑀻’𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄, 𑀲𑁄𑀧𑀺 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀯𑀢𑁆𑀣𑀁 𑀲𑀁𑀓𑀺𑀮𑀺𑀝𑁆𑀞𑀁 𑀫𑀮𑀕𑁆𑀕𑀳𑀺𑀢𑀁. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀭𑀚𑀓𑀲𑁆𑀲 𑀅𑀦𑀼𑀧𑀤𑀚𑁆𑀚𑀼𑀁. 𑀢𑀫𑁂𑀦𑀁 𑀭𑀚𑀓𑁄 𑀊𑀲𑁂 𑀯𑀸 𑀔𑀸𑀭𑁂 𑀯𑀸 𑀕𑁄𑀫𑀬𑁂 𑀯𑀸 𑀲𑀫𑁆𑀫𑀤𑁆𑀤𑀺𑀢𑁆𑀯𑀸 𑀅𑀘𑁆𑀙𑁂 𑀉𑀤𑀓𑁂 𑀯𑀺𑀓𑁆𑀔𑀸𑀮𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀢𑀁 𑀳𑁄𑀢𑀺 𑀯𑀢𑁆𑀣𑀁 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁, 𑀅𑀣 𑀔𑁆𑀯𑀲𑁆𑀲 𑀳𑁄𑀢𑀺 𑀬𑁂𑀯 𑀅𑀦𑀼𑀲𑀳𑀕𑀢𑁄 𑀊𑀲𑀕𑀦𑁆𑀥𑁄 𑀯𑀸 𑀔𑀸𑀭𑀕𑀦𑁆𑀥𑁄 𑀯𑀸 𑀕𑁄𑀫𑀬𑀕𑀦𑁆𑀥𑁄 𑀯𑀸 𑀅𑀲𑀫𑀽𑀳𑀢𑁄. 𑀢𑀫𑁂𑀦𑀁 𑀭𑀚𑀓𑁄 𑀲𑀸𑀫𑀺𑀓𑀸𑀦𑀁 𑀤𑁂𑀢𑀺. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑁂 𑀓𑀭𑀡𑁆𑀟𑀓𑁂 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀬𑁄𑀧𑀺𑀲𑁆𑀲 𑀳𑁄𑀢𑀺 𑀅𑀦𑀼𑀲𑀳𑀕𑀢𑁄 𑀊𑀲𑀕𑀦𑁆𑀥𑁄 𑀯𑀸 𑀔𑀸𑀭𑀕𑀦𑁆𑀥𑁄 𑀯𑀸 𑀕𑁄𑀫𑀬𑀕𑀦𑁆𑀥𑁄 𑀯𑀸 𑀅𑀲𑀫𑀽𑀳𑀢𑁄, 𑀲𑁄𑀧𑀺 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺, 𑀅𑀣 𑀔𑁆𑀯𑀲𑁆𑀲 𑀳𑁄𑀢𑀺 𑀬𑁂𑀯 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀳𑀕𑀢𑁄 ‘𑀅𑀲𑁆𑀫𑀻’𑀢𑀺, 𑀫𑀸𑀦𑁄 ‘𑀅𑀲𑁆𑀫𑀻’𑀢𑀺, 𑀙𑀦𑁆𑀤𑁄 ‘𑀅𑀲𑁆𑀫𑀻’𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀢𑀲𑁆𑀲 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑁄𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀳𑀕𑀢𑁄 ‘𑀅𑀲𑁆𑀫𑀻’𑀢𑀺, 𑀫𑀸𑀦𑁄 ‘𑀅𑀲𑁆𑀫𑀻’𑀢𑀺, 𑀙𑀦𑁆𑀤𑁄 ‘𑀅𑀲𑁆𑀫𑀻’𑀢𑀺 𑀅𑀦𑀼𑀲𑀬𑁄 𑀅𑀲𑀫𑀽𑀳𑀢𑁄, 𑀲𑁄𑀧𑀺 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀦 𑀔𑁄 [𑀦 𑀔𑁄 𑀧𑀦 (𑀓.)] 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀯𑀺𑀳𑁂𑀲𑀸𑀧𑁂𑀔𑀸 𑀧𑀼𑀘𑁆𑀙𑀺𑀫𑁆𑀳, 𑀅𑀧𑀺 𑀘𑀸𑀬𑀲𑁆𑀫𑀸 𑀔𑁂𑀫𑀓𑁄 𑀧𑀳𑁄𑀲𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁. 𑀢𑀬𑀺𑀤𑀁 𑀆𑀬𑀲𑁆𑀫𑀢𑀸 𑀔𑁂𑀫𑀓𑁂𑀦 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀸𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀭𑀺𑀢𑀁 𑀯𑀺𑀪𑀚𑀺𑀢𑀁 𑀉𑀢𑁆𑀢𑀸𑀦𑀻𑀓𑀢’’𑀦𑁆𑀢𑀺.

𑀇𑀤𑀫𑀯𑁄𑀘 𑀆𑀬𑀲𑁆𑀫𑀸 𑀔𑁂𑀫𑀓𑁄. 𑀅𑀢𑁆𑀢𑀫𑀦𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀔𑁂𑀫𑀓𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀁. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼, 𑀆𑀬𑀲𑁆𑀫𑀢𑁄 𑀔𑁂𑀫𑀓𑀲𑁆𑀲 𑀘𑀸𑀢𑀺. 𑀲𑀢𑁆𑀢𑀫𑀁.

𑁮. 𑀙𑀦𑁆𑀦𑀲𑀼𑀢𑁆𑀢𑀁

𑁯𑁦. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀯𑀸𑀧𑀼𑀭𑀡𑀁 [𑀅𑀧𑀸𑀧𑀼𑀭𑀡𑀁 (𑀲𑀻. 𑀲𑁆𑀬𑀸. 𑀓𑀁.)] 𑀆𑀤𑀸𑀬 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀑𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸, 𑀅𑀦𑀼𑀲𑀸𑀲𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸, 𑀓𑀭𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸 𑀥𑀫𑁆𑀫𑀺𑀁 𑀓𑀣𑀁, 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀭𑀽𑀧𑀁 𑀔𑁄, 𑀆𑀯𑀼𑀲𑁄 𑀙𑀦𑁆𑀦, 𑀅𑀦𑀺𑀘𑁆𑀘𑀁; 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸; 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸; 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸; 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀭𑀽𑀧𑀁 𑀅𑀦𑀢𑁆𑀢𑀸; 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸; 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄 𑀏𑀢𑀁 𑀏𑀯𑀁 [𑀫𑀬𑁆𑀳𑀫𑁆𑀧𑀺 𑀔𑁄 𑀏𑀯𑀁 (𑀲𑁆𑀬𑀸. 𑀓𑀁.)] 𑀳𑁄𑀢𑀺 𑁋 ‘𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁; 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸 … 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’𑀢𑀺. 𑀅𑀣 𑀘 𑀧𑀦 𑀫𑁂 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁂 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀭𑀸𑀕𑁂 𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀦𑀁 𑀉𑀧𑁆𑀧𑀚𑁆𑀚𑀢𑀺; 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀫𑀸𑀦𑀲𑀁 𑁋 ‘𑀅𑀣 𑀓𑁄 𑀘𑀭𑀳𑀺 𑀫𑁂 𑀅𑀢𑁆𑀢𑀸’𑀢𑀺? 𑀦 𑀔𑁄 𑀧𑀦𑁂𑀯𑀁 𑀥𑀫𑁆𑀫𑀁 𑀧𑀲𑁆𑀲𑀢𑁄 𑀳𑁄𑀢𑀺. 𑀓𑁄 𑀦𑀼 𑀔𑁄 𑀫𑁂 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀧𑀳𑁄𑀢𑀺 𑀘 𑀫𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬𑀁; 𑀅𑀢𑁆𑀣𑀺 𑀘 𑀫𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀢𑀸𑀯𑀢𑀺𑀓𑀸 𑀯𑀺𑀲𑁆𑀲𑀝𑁆𑀞𑀺 [𑀯𑀺𑀲𑁆𑀲𑀢𑁆𑀣𑀺 (?)]. 𑀬𑀁𑀦𑀽𑀦𑀸𑀳𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀓𑁄𑀲𑀫𑁆𑀩𑀻 𑀖𑁄𑀲𑀺𑀢𑀸𑀭𑀸𑀫𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀫𑀬𑀁 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀸𑀫𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀁 𑁋 ‘𑀑𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸, 𑀅𑀦𑀼𑀲𑀸𑀲𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸, 𑀓𑀭𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀣𑁂𑀭𑀸 𑀥𑀫𑁆𑀫𑀺𑀁 𑀓𑀣𑀁 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑀁, 𑀆𑀯𑀼𑀲𑁄, 𑀣𑁂𑀭𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘𑀭𑀽𑀧𑀁 𑀔𑁄, 𑀆𑀯𑀼𑀲𑁄 𑀙𑀦𑁆𑀦, 𑀅𑀦𑀺𑀘𑁆𑀘𑀁; 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁; 𑀭𑀽𑀧𑀁 𑀅𑀦𑀢𑁆𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’’𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑁋 ‘𑀫𑀬𑁆𑀳𑀫𑁆𑀧𑀺 𑀔𑁄 𑀏𑀢𑀁 𑀏𑀯𑀁 𑀳𑁄𑀢𑀺 𑁋 𑀭𑀽𑀧𑀁 𑀅𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁, 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’𑀢𑀺. 𑀅𑀣 𑀘 𑀧𑀦 𑀫𑁂 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁂 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀭𑀸𑀕𑁂 𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀦𑀁 𑀉𑀧𑁆𑀧𑀚𑁆𑀚𑀢𑀺; 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀫𑀸𑀦𑀲𑀁 𑁋 ‘𑀅𑀣 𑀓𑁄 𑀘𑀭𑀳𑀺 𑀫𑁂 𑀅𑀢𑁆𑀢𑀸’𑀢𑀺? 𑀦 𑀔𑁄 𑀧𑀦𑁂𑀯𑀁 𑀥𑀫𑁆𑀫𑀁 𑀧𑀲𑁆𑀲𑀢𑁄 𑀳𑁄𑀢𑀺. 𑀓𑁄 𑀦𑀼 𑀔𑁄 𑀫𑁂 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬𑀦𑁆𑀢𑀺!

‘‘𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀭𑀸𑀫𑁂 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀧𑀳𑁄𑀢𑀺 𑀘 𑀫𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬𑀁. 𑀅𑀢𑁆𑀣𑀺 𑀘 𑀫𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀢𑀸𑀯𑀢𑀺𑀓𑀸 𑀯𑀺𑀲𑁆𑀲𑀝𑁆𑀞𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀑𑀯𑀤𑀢𑀼 𑀫𑀁, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄; 𑀅𑀦𑀼𑀲𑀸𑀲𑀢𑀼 𑀫𑀁, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄; 𑀓𑀭𑁄𑀢𑀼 𑀫𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀥𑀫𑁆𑀫𑀺𑀁 𑀓𑀣𑀁 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺.

‘‘𑀏𑀢𑁆𑀢𑀓𑁂𑀦𑀧𑀺 𑀫𑀬𑀁 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀅𑀢𑁆𑀢𑀫𑀦𑀸 𑀅𑀧𑀺 𑀦𑀸𑀫 𑀢𑀁 [𑀅𑀢𑁆𑀢𑀫𑀦𑀸 𑀅𑀪𑀺𑀭𑀤𑁆𑀥𑀸, 𑀢𑀁 (𑀲𑀻. 𑀲𑁆𑀬𑀸. 𑀓𑀁.)] 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀯𑀺 𑀅𑀓𑀸𑀲𑀺 𑀔𑀻𑀮𑀁 𑀙𑀺𑀦𑁆𑀤𑀺 [𑀧𑀪𑀺𑀦𑁆𑀤𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀑𑀤𑀳𑀸𑀯𑀼𑀲𑁄, 𑀙𑀦𑁆𑀦, 𑀲𑁄𑀢𑀁; 𑀪𑀩𑁆𑀩𑁄𑀲𑀺 [𑀪𑀩𑁆𑀩𑁄 𑀢𑁆𑀯𑀁 (𑀓.)] 𑀥𑀫𑁆𑀫𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀢𑀸𑀯𑀢𑀓𑁂𑀦𑁂𑀯 [𑀢𑀸𑀯𑀤𑁂𑀯 (𑀲𑀻.)] 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀺 𑁋 ‘‘𑀪𑀩𑁆𑀩𑁄 𑀓𑀺𑀭𑀲𑁆𑀫𑀺 𑀥𑀫𑁆𑀫𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄 𑀙𑀦𑁆𑀦, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀘 𑀧𑀝𑀺𑀕𑁆𑀕𑀳𑀺𑀢𑀁 𑀓𑀘𑁆𑀘𑀸𑀦𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀑𑀯𑀤𑀦𑁆𑀢𑀲𑁆𑀲 𑁋 𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁆𑀯𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀜𑁆𑀘𑁂𑀯 𑀦𑀢𑁆𑀣𑀺𑀢𑀜𑁆𑀘. 𑀮𑁄𑀓𑀲𑀫𑀼𑀤𑀬𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀺. 𑀮𑁄𑀓𑀦𑀺𑀭𑁄𑀥𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀅𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀺. 𑀉𑀧𑀬𑀼𑀧𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑁄 𑀔𑁆𑀯𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀘𑀸𑀬𑀁 𑀉𑀧𑀬𑀼𑀧𑀸𑀤𑀸𑀦𑀁 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀁 𑀦 𑀉𑀧𑁂𑀢𑀺 𑀦 𑀉𑀧𑀸𑀤𑀺𑀬𑀢𑀺 𑀦𑀸𑀥𑀺𑀝𑁆𑀞𑀸𑀢𑀺 ‘𑀅𑀢𑁆𑀢𑀸 𑀫𑁂’𑀢𑀺. 𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀅𑀧𑀭𑀧𑁆𑀧𑀘𑁆𑀘𑀬𑀸 𑀜𑀸𑀡𑀫𑁂𑀯𑀲𑁆𑀲 𑀏𑀢𑁆𑀣 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀓𑀘𑁆𑀘𑀸𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀲𑀩𑁆𑀩𑀫𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄. 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄. 𑀏𑀢𑁂 𑀢𑁂, 𑀓𑀘𑁆𑀘𑀸𑀦, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

‘‘𑀏𑀯𑀫𑁂𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀳𑁄𑀢𑀺 𑀬𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀢𑀸𑀤𑀺𑀲𑀸 𑀲𑀩𑁆𑀭𑀳𑁆𑀫𑀘𑀸𑀭𑀬𑁄 𑀅𑀦𑀼𑀓𑀫𑁆𑀧𑀓𑀸 𑀅𑀢𑁆𑀣𑀓𑀸𑀫𑀸 𑀑𑀯𑀸𑀤𑀓𑀸 𑀅𑀦𑀼𑀲𑀸𑀲𑀓𑀸. 𑀇𑀤𑀜𑁆𑀘 𑀧𑀦 𑀫𑁂 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑁄 𑀅𑀪𑀺𑀲𑀫𑀺𑀢𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀭𑀸𑀳𑀼𑀮𑀲𑀼𑀢𑁆𑀢𑀁

𑁯𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀻’’𑀢𑀺?

‘‘𑀬𑀁 𑀓𑀺𑀜𑁆𑀘𑀺, 𑀭𑀸𑀳𑀼𑀮, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀸 𑀓𑀸𑀘𑀺 𑀯𑁂𑀤𑀦𑀸 … 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸…𑀧𑁂… 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀭𑀸𑀳𑀼𑀮, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀭𑀸𑀳𑀼𑀮𑀲𑀼𑀢𑁆𑀢𑀁

𑁯𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀁 𑀫𑀸𑀦𑀲𑀁 𑀳𑁄𑀢𑀺 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢’’𑀦𑁆𑀢𑀺? ‘‘𑀬𑀁 𑀓𑀺𑀜𑁆𑀘𑀺, 𑀭𑀸𑀳𑀼𑀮, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀭𑀸𑀳𑀼𑀮, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀁 𑀫𑀸𑀦𑀲𑀁 𑀳𑁄𑀢𑀺 𑀯𑀺𑀥𑀸 𑀲𑀫𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀤𑀲𑀫𑀁.

𑀣𑁂𑀭𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀦𑀦𑁆𑀤𑁄 𑀢𑀺𑀲𑁆𑀲𑁄 𑀬𑀫𑀓𑁄, 𑀅𑀦𑀼𑀭𑀸𑀥𑁄 𑀘 𑀯𑀓𑁆𑀓𑀮𑀺;

𑀅𑀲𑁆𑀲𑀚𑀺 𑀔𑁂𑀫𑀓𑁄 𑀙𑀦𑁆𑀦𑁄, 𑀭𑀸𑀳𑀼𑀮𑀸 𑀅𑀧𑀭𑁂 𑀤𑀼𑀯𑁂.