𑁭. 𑀲𑀳𑁂𑀢𑀼𑀅𑀦𑀺𑀘𑁆𑀘𑀲𑀼𑀢𑁆𑀢𑀁

𑁧𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁. 𑀬𑁄𑀧𑀺 𑀳𑁂𑀢𑀼, 𑀬𑁄𑀧𑀺 𑀧𑀘𑁆𑀘𑀬𑁄 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺! 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸. 𑀬𑁄𑀧𑀺 𑀳𑁂𑀢𑀼, 𑀬𑁄𑀧𑀺 𑀧𑀘𑁆𑀘𑀬𑁄 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀺! 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸… 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀦𑁆𑀢𑀺! 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺! 𑀏𑀯𑀁 𑀧𑀲𑁆𑀲𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.