𑁮-𑁧𑁩. 𑀧𑀺𑀢𑀼𑀲𑀼𑀢𑁆𑀢𑀸𑀤𑀺𑀙𑀓𑁆𑀓𑀁

𑁧𑁮𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀧𑀺𑀢𑀼𑀧𑀺 𑀳𑁂𑀢𑀼…𑀧𑁂… 𑀪𑀸𑀢𑀼𑀧𑀺 𑀳𑁂𑀢𑀼… 𑀪𑀕𑀺𑀦𑀺𑀬𑀸𑀧𑀺 𑀳𑁂𑀢𑀼… 𑀧𑀼𑀢𑁆𑀢𑀲𑁆𑀲𑀧𑀺 𑀳𑁂𑀢𑀼… 𑀥𑀻𑀢𑀼𑀬𑀸𑀧𑀺 𑀳𑁂𑀢𑀼… 𑀧𑀚𑀸𑀧𑀢𑀺𑀬𑀸𑀧𑀺 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀭𑀲𑀫𑀁.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀪𑀺𑀦𑁆𑀤𑀺 𑀫𑀽𑀮𑀁 𑀤𑀼𑀯𑁂 𑀥𑀫𑁆𑀫𑀸, 𑀧𑀓𑁆𑀓𑀦𑁆𑀢𑀁 𑀭𑀣 𑀫𑀸𑀢𑀭𑀺;

𑀧𑀺𑀢𑀸 𑀪𑀸𑀢𑀸 𑀘 𑀪𑀕𑀺𑀦𑀻, 𑀧𑀼𑀢𑁆𑀢𑁄 𑀥𑀻𑀢𑀸 𑀧𑀚𑀸𑀧𑀢𑀻𑀢𑀺.

𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.