𑁬. 𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀸𑀭𑀼𑀡𑀲𑀼𑀢𑁆𑀢𑀁

𑁧𑁫𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀩𑀴𑀺𑀲𑀲𑀼𑀢𑁆𑀢𑀁

𑁧𑁫𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀸𑀴𑀺𑀲𑀺𑀓𑁄 𑀆𑀫𑀺𑀲𑀕𑀢𑀁 𑀩𑀴𑀺𑀲𑀁 𑀕𑀫𑁆𑀪𑀻𑀭𑁂 𑀉𑀤𑀓𑀭𑀳𑀤𑁂 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀆𑀫𑀺𑀲𑀘𑀓𑁆𑀔𑀼 𑀫𑀘𑁆𑀙𑁄 𑀕𑀺𑀮𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀘𑁆𑀙𑁄 𑀕𑀺𑀮𑀩𑀴𑀺𑀲𑁄 𑀩𑀸𑀴𑀺𑀲𑀺𑀓𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀴𑀺𑀲𑀺𑀓𑀲𑁆𑀲’’.

‘‘𑀩𑀸𑀴𑀺𑀲𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑀲𑁆𑀲𑁂𑀢𑀁 𑀧𑀸𑀧𑀺𑀫𑀢𑁄 𑀅𑀥𑀺𑀯𑀘𑀦𑀁. 𑀩𑀴𑀺𑀲𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀲𑁆𑀲𑀸𑀤𑁂𑀢𑀺 𑀦𑀺𑀓𑀸𑀫𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀩𑀴𑀺𑀲𑁄 𑀫𑀸𑀭𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀓𑀼𑀫𑁆𑀫𑀲𑀼𑀢𑁆𑀢𑀁

𑁧𑁫𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀤𑀓𑀭𑀳𑀤𑁂 𑀫𑀳𑀸𑀓𑀼𑀫𑁆𑀫𑀓𑀼𑀮𑀁 𑀘𑀺𑀭𑀦𑀺𑀯𑀸𑀲𑀺 𑀅𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀓𑀼𑀫𑁆𑀫𑁄 𑀅𑀜𑁆𑀜𑀢𑀭𑀁 𑀓𑀼𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀓𑀼𑀫𑁆𑀫, 𑀏𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀻’𑀢𑀺. 𑀅𑀕𑀫𑀸𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀓𑀼𑀫𑁆𑀫𑁄 𑀢𑀁 𑀧𑀤𑁂𑀲𑀁. 𑀢𑀫𑁂𑀦𑀁 𑀮𑀼𑀤𑁆𑀤𑁄 𑀧𑀧𑀢𑀸𑀬 𑀯𑀺𑀚𑁆𑀛𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀓𑀼𑀫𑁆𑀫𑁄 𑀬𑁂𑀦 𑀲𑁄 𑀓𑀼𑀫𑁆𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀓𑀼𑀫𑁆𑀫𑁄 𑀢𑀁 𑀓𑀼𑀫𑁆𑀫𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀢𑀁 𑀓𑀼𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺 𑀢𑁆𑀯𑀁, 𑀢𑀸𑀢 𑀓𑀼𑀫𑁆𑀫, 𑀦 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀻’𑀢𑀺? ‘𑀅𑀕𑀫𑀸𑀲𑀺𑀁 𑀔𑁆𑀯𑀸𑀳𑀁, 𑀢𑀸𑀢 𑀓𑀼𑀫𑁆𑀫, 𑀢𑀁 𑀧𑀤𑁂𑀲’𑀦𑁆𑀢𑀺. ‘𑀓𑀘𑁆𑀘𑀺 𑀧𑀦𑀸𑀲𑀺, 𑀢𑀸𑀢 𑀓𑀼𑀫𑁆𑀫, 𑀅𑀓𑁆𑀔𑀢𑁄 𑀅𑀦𑀼𑀧𑀳𑀢𑁄’𑀢𑀺? ‘𑀅𑀓𑁆𑀔𑀢𑁄 𑀔𑁄𑀫𑁆𑀳𑀺, 𑀢𑀸𑀢 𑀓𑀼𑀫𑁆𑀫, 𑀅𑀦𑀼𑀧𑀳𑀢𑁄, 𑀅𑀢𑁆𑀣𑀺 𑀘 𑀫𑁂 𑀇𑀤𑀁 𑀲𑀼𑀢𑁆𑀢𑀓𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥’𑀦𑁆𑀢𑀺. ‘𑀢𑀕𑁆𑀖𑀲𑀺, 𑀢𑀸𑀢 𑀓𑀼𑀫𑁆𑀫, 𑀔𑀢𑁄, 𑀢𑀕𑁆𑀖 𑀉𑀧𑀳𑀢𑁄. 𑀏𑀢𑁂𑀦 𑀳𑀺 𑀢𑁂, 𑀢𑀸𑀢 𑀓𑀼𑀫𑁆𑀫, 𑀲𑀼𑀢𑁆𑀢𑀓𑁂𑀦 𑀧𑀺𑀢𑀭𑁄 𑀘 𑀧𑀺𑀢𑀸𑀫𑀳𑀸 𑀘 𑀅𑀦𑀬𑀁 𑀆𑀧𑀦𑁆𑀦𑀸 𑀩𑁆𑀬𑀲𑀦𑀁 𑀆𑀧𑀦𑁆𑀦𑀸. 𑀕𑀘𑁆𑀙 𑀤𑀸𑀦𑀺 𑀢𑁆𑀯𑀁, 𑀢𑀸𑀢 𑀓𑀼𑀫𑁆𑀫, 𑀦 𑀤𑀸𑀦𑀺 𑀢𑁆𑀯𑀁 𑀅𑀫𑁆𑀳𑀸𑀓’’’𑀦𑁆𑀢𑀺.

‘‘𑀮𑀼𑀤𑁆𑀤𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑀲𑁆𑀲𑁂𑀢𑀁 𑀧𑀸𑀧𑀺𑀫𑀢𑁄 𑀅𑀥𑀺𑀯𑀘𑀦𑀁. 𑀧𑀧𑀢𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀼𑀢𑁆𑀢𑀓𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀲𑁆𑀲𑀸𑀤𑁂𑀢𑀺 𑀦𑀺𑀓𑀸𑀫𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀤𑁆𑀥𑁄 𑀧𑀧𑀢𑀸𑀬 [𑀪𑀺𑀓𑁆𑀔𑀼 𑀧𑀧𑀢𑀸𑀬 (𑀲𑁆𑀬𑀸. 𑀓𑀁.), 𑀪𑀺𑀓𑁆𑀔𑀼 𑀯𑀺𑀤𑁆𑀥𑁄 𑀧𑀧𑀢𑀸𑀬 (?)] 𑀅𑀦𑀬𑀁 𑀆𑀧𑀦𑁆𑀦𑁄 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀤𑀻𑀖𑀮𑁄𑀫𑀺𑀓𑀲𑀼𑀢𑁆𑀢𑀁

𑁧𑁬𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀻𑀖𑀮𑁄𑀫𑀺𑀓𑀸 𑀏𑀴𑀓𑀸 𑀓𑀡𑁆𑀝𑀓𑀕𑀳𑀦𑀁 𑀧𑀯𑀺𑀲𑁂𑀬𑁆𑀬. 𑀲𑀸 𑀢𑀢𑁆𑀭 𑀢𑀢𑁆𑀭 𑀲𑀚𑁆𑀚𑁂𑀬𑁆𑀬, 𑀢𑀢𑁆𑀭 𑀢𑀢𑁆𑀭 𑀕𑀬𑁆𑀳𑁂𑀬𑁆𑀬 [𑀕𑀘𑁆𑀙𑁂𑀬𑁆𑀬 (𑀲𑀻.), 𑀕𑀡𑁆𑀳𑁂𑀬𑁆𑀬 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀢𑀢𑁆𑀭 𑀢𑀢𑁆𑀭 𑀩𑀚𑁆𑀛𑁂𑀬𑁆𑀬, 𑀢𑀢𑁆𑀭 𑀢𑀢𑁆𑀭 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑁂𑀬𑁆𑀬. ‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀲𑁄 𑀢𑀢𑁆𑀭 𑀢𑀢𑁆𑀭 𑀲𑀚𑁆𑀚𑀢𑀺, 𑀢𑀢𑁆𑀭 𑀢𑀢𑁆𑀭 𑀕𑀬𑁆𑀳𑀢𑀺, 𑀢𑀢𑁆𑀭 𑀢𑀢𑁆𑀭 𑀩𑀚𑁆𑀛𑀢𑀺, 𑀢𑀢𑁆𑀭 𑀢𑀢𑁆𑀭 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀻𑀴𑁆𑀳𑀓𑀲𑀼𑀢𑁆𑀢𑀁

𑁧𑁬𑁧. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀻𑀴𑁆𑀳𑀓𑀸 𑀕𑀽𑀣𑀸𑀤𑀻 𑀕𑀽𑀣𑀧𑀽𑀭𑀸 𑀧𑀼𑀡𑁆𑀡𑀸 𑀕𑀽𑀣𑀲𑁆𑀲. 𑀧𑀼𑀭𑀢𑁄 𑀘𑀲𑁆𑀲 𑀫𑀳𑀸𑀕𑀽𑀣𑀧𑀼𑀜𑁆𑀚𑁄. 𑀲𑀸 𑀢𑁂𑀦 𑀅𑀜𑁆𑀜𑀸 𑀫𑀻𑀴𑁆𑀳𑀓𑀸 𑀅𑀢𑀺𑀫𑀜𑁆𑀜𑁂𑀬𑁆𑀬 𑁋 ‘𑀅𑀳𑀫𑁆𑀳𑀺 𑀕𑀽𑀣𑀸𑀤𑀻 𑀕𑀽𑀣𑀧𑀽𑀭𑀸 𑀧𑀼𑀡𑁆𑀡𑀸 𑀕𑀽𑀣𑀲𑁆𑀲, 𑀧𑀼𑀭𑀢𑁄 𑀘 𑀫𑁆𑀬𑀸𑀬𑀁 𑀫𑀳𑀸𑀕𑀽𑀣𑀧𑀼𑀜𑁆𑀚𑁄’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀲𑁄 𑀢𑀢𑁆𑀣 𑀪𑀼𑀢𑁆𑀢𑀸𑀯𑀻 𑀘 𑀳𑁄𑀢𑀺 𑀬𑀸𑀯𑀤𑀢𑁆𑀣𑁄, 𑀦𑀺𑀫𑀦𑁆𑀢𑀺𑀢𑁄 𑀘 𑀲𑁆𑀯𑀸𑀢𑀦𑀸𑀬, 𑀧𑀺𑀡𑁆𑀟𑀧𑀸𑀢𑁄 𑀘𑀲𑁆𑀲 𑀧𑀽𑀭𑁄. 𑀲𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂 𑀯𑀺𑀓𑀢𑁆𑀣𑀢𑀺 𑁋 ‘𑀪𑀼𑀢𑁆𑀢𑀸𑀯𑀻 𑀘𑀫𑁆𑀳𑀺 𑀬𑀸𑀯𑀤𑀢𑁆𑀣𑁄, 𑀦𑀺𑀫𑀦𑁆𑀢𑀺𑀢𑁄 𑀘𑀫𑁆𑀳𑀺 𑀲𑁆𑀯𑀸𑀢𑀦𑀸𑀬, 𑀧𑀺𑀡𑁆𑀟𑀧𑀸𑀢𑁄 𑀘 𑀫𑁆𑀬𑀸𑀬𑀁 𑀧𑀽𑀭𑁄, 𑀮𑀸𑀪𑀻 𑀘𑀫𑁆𑀳𑀺 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀅𑀧𑁆𑀧𑀧𑀼𑀜𑁆𑀜𑀸 𑀅𑀧𑁆𑀧𑁂𑀲𑀓𑁆𑀔𑀸 𑀦 𑀮𑀸𑀪𑀺𑀦𑁄 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚-𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺. 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀅𑀜𑁆𑀜𑁂 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀢𑀺𑀫𑀜𑁆𑀜𑀢𑀺. 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀲𑁆𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀲𑀦𑀺𑀲𑀼𑀢𑁆𑀢𑀁

𑁧𑁬𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. [𑀉𑀧𑀭𑀺 𑀢𑀢𑀺𑀬𑀯𑀕𑁆𑀕𑁂 𑀢𑀢𑀺𑀬𑀘𑀢𑀼𑀢𑁆𑀣𑀲𑀼𑀢𑁆𑀢𑁂𑀲𑀼 ‘‘𑀫𑀸 𑀘 𑀔𑁄 𑀢𑁆𑀯𑀁 𑀢𑀸𑀢 𑀲𑁂𑀔𑀁… 𑀅𑀦𑀼𑀧𑀸𑀧𑀼𑀡𑀸𑀢𑀽’’𑀢𑀺 𑀆𑀕𑀢𑀁. 𑀢𑁂𑀦 𑀦𑀬𑁂𑀦 𑀇𑀥𑀸𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀓𑀺𑀁 𑀲𑀤𑁆𑀤𑁂𑀦 𑀧𑀝𑀺𑀓𑁆𑀔𑁂𑀧𑀢𑁆𑀣𑁄𑀧𑀺 𑀲𑀓𑁆𑀓𑀸 𑀜𑀸𑀢𑀼𑀁, 𑀬𑀣𑀸 ‘‘𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀸 𑀓𑀁… 𑀆𑀕𑀘𑁆𑀙𑀢𑀽𑀢𑀺 𑀏𑀢𑁆𑀣 𑀓𑀫𑀧𑀺… 𑀫𑀸 𑀆𑀕𑀘𑁆𑀙𑀢𑀽𑀢𑀺 𑀘, 𑀓𑀁 𑀲𑁂𑀔𑀁… 𑀅𑀦𑀼𑀧𑀸𑀧𑀼𑀡𑀸𑀢𑀽𑀢𑀺 𑀏𑀢𑁆𑀣 𑀓𑀫𑀧𑀺 𑀲𑁂𑀔𑀁… 𑀫𑀸 𑀧𑀸𑀧𑀼𑀡𑀸𑀢𑀽𑀢𑀺 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀅𑀬𑀫𑁂𑀯𑀢𑁆𑀣𑁄 𑀜𑀸𑀧𑀺𑀢𑁄] 𑀓𑀁, 𑀪𑀺𑀓𑁆𑀔𑀯𑁂, 𑀅𑀲𑀦𑀺𑀯𑀺𑀘𑀓𑁆𑀓𑀁 𑀆𑀕𑀘𑁆𑀙𑀢𑀼 [𑀉𑀧𑀭𑀺 𑀢𑀢𑀺𑀬𑀯𑀕𑁆𑀕𑁂 𑀢𑀭𑀺𑀬𑀘𑀢𑀼𑀢𑁆𑀣𑀲𑀼𑀢𑁆𑀢𑁂𑀲𑀼 ‘‘𑀫𑀸 𑀘 𑀔𑁄 𑀢𑁆𑀯𑀁 𑀢𑀸𑀢 𑀲𑁂𑀔𑀁… 𑀅𑀦𑀼𑀧𑀸𑀧𑀼𑀡𑀸𑀢𑀽’’𑀢𑀺 𑀆𑀕𑀢𑀁. 𑀢𑁂𑀦 𑀦𑀬𑁂𑀦 𑀇𑀥𑀸𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀓𑀺𑀁 𑀲𑀤𑁆𑀤𑁂𑀦 𑀧𑀝𑀺𑀓𑁆𑀔𑁂𑀧𑀢𑁆𑀣𑁄𑀧𑀺 𑀲𑀓𑁆𑀓𑀸 𑀜𑀸𑀢𑀼𑀁, 𑀬𑀣𑀸 ‘‘𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀸 𑀓𑀁… 𑀆𑀕𑀘𑁆𑀙𑀢𑀽𑀢𑀺 𑀏𑀢𑁆𑀣 𑀓𑀫𑀧𑀺… 𑀫𑀸 𑀆𑀕𑀘𑁆𑀙𑀢𑀽𑀢𑀺𑀘, 𑀢𑀁 𑀲𑁂𑀔𑀁… 𑀅𑀦𑀼𑀧𑀸𑀧𑀼𑀡𑀸𑀢𑀽𑀢𑀺 𑀏𑀢𑁆𑀣 𑀓𑀫𑀧𑀺 𑀲𑁂𑀔𑀁… 𑀫𑀸 𑀧𑀸𑀧𑀼𑀡𑀸𑀢𑀽𑀢𑀺 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀅𑀬𑀫𑁂𑀯𑀢𑁆𑀣𑁄 𑀜𑀸𑀧𑀺𑀢𑁄], 𑀲𑁂𑀔𑀁 [𑀅𑀲𑀦𑀺𑀯𑀺𑀘𑀓𑁆𑀓𑀁, 𑀢𑀁 𑀲𑁂𑀔𑀁 (𑀧𑀻. 𑀓.), 𑀅𑀲𑀦𑀺𑀯𑀺𑀘𑀓𑁆𑀓𑀁, 𑀲𑁂𑀔𑀁 (𑀲𑁆𑀬𑀸. 𑀓𑀁.), 𑀅𑀲𑀦𑀺𑀯𑀺𑀘𑀓𑁆𑀓𑀁 𑀆𑀕𑀘𑁆𑀙𑀢𑀼, 𑀓𑀁 𑀲𑁂𑀔𑀁 (?)] 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀼’’ [𑀅𑀦𑀼𑀧𑀸𑀧𑀼𑀡𑀸𑀢𑀺 (𑀧𑀻. 𑀓.)].

‘‘𑀅𑀲𑀦𑀺𑀯𑀺𑀘𑀓𑁆𑀓𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀤𑀺𑀤𑁆𑀥𑀲𑀼𑀢𑁆𑀢𑀁

𑁧𑁬𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀓𑀁, 𑀪𑀺𑀓𑁆𑀔𑀯𑁂, 𑀤𑀺𑀤𑁆𑀥𑀕𑀢𑁂𑀦 𑀯𑀺𑀲𑀮𑁆𑀮𑁂𑀦 𑀲𑀮𑁆𑀮𑁂𑀦 [𑀤𑀺𑀝𑁆𑀞𑀺𑀕𑀢𑁂𑀦 𑀯𑀺𑀲𑀮𑁆𑀮𑁂𑀦 (𑀓. 𑀲𑀻.), 𑀤𑀺𑀝𑁆𑀞𑀺𑀕𑀢𑁂𑀦 𑀲𑀮𑁆𑀮𑁂𑀦 (𑀲𑁆𑀬𑀸. 𑀓𑀁.), 𑀤𑀺𑀝𑁆𑀞𑀺𑀕𑀢𑁂𑀦 𑀯𑀺𑀲𑀮𑁆𑀮𑁂𑀦 𑀲𑀮𑁆𑀮𑁂𑀦 (𑀓.), 𑀤𑀺𑀝𑁆𑀞𑀕𑀢𑁂𑀦 𑀯𑀺𑀲𑀮𑁆𑀮𑁂𑀦 𑀲𑀮𑁆𑀮𑁂𑀦 (𑀧𑀻.)] 𑀯𑀺𑀚𑁆𑀛𑀢𑀼, 𑀲𑁂𑀔𑀁 [𑀯𑀺𑀚𑁆𑀛𑀢𑀼, 𑀢𑀁 𑀲𑁂𑀔𑀁 (𑀲𑀻.), 𑀯𑀺𑀚𑁆𑀛𑀢𑀺, 𑀢𑀁 𑀲𑁂𑀔𑀁 (𑀧𑀻. 𑀓.)] 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀼’’ [𑀅𑀦𑀼𑀧𑀸𑀧𑀼𑀡𑀸𑀢𑀺 (𑀧𑀻. 𑀓.)].

‘‘𑀲𑀮𑁆𑀮𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀁

𑁧𑁬𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀅𑀲𑁆𑀲𑀼𑀢𑁆𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 [𑀲𑀺𑀗𑁆𑀕𑀸𑀮𑀲𑁆𑀲 (𑀓.), 𑀚𑀭𑀲𑀺𑀕𑀸𑀮𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁.)] 𑀯𑀲𑁆𑀲𑀫𑀸𑀦𑀲𑁆𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀲𑁄 𑀔𑁄, 𑀪𑀺𑀓𑁆𑀔𑀯𑁂, 𑀚𑀭𑀲𑀺𑀗𑁆𑀕𑀸𑀮𑁄 𑀉𑀓𑁆𑀓𑀡𑁆𑀟𑀓𑁂𑀦 [𑀉𑀓𑁆𑀓𑀡𑁆𑀟𑀓𑁂𑀦 (𑀲𑀻.), 𑀉𑀓𑁆𑀓𑀡𑁆𑀡𑀓𑁂𑀦 (𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫 𑀭𑁄𑀕𑀚𑀸𑀢𑁂𑀦 𑀨𑀼𑀝𑁆𑀞𑁄 𑀦𑁂𑀯 𑀩𑀺𑀮𑀕𑀢𑁄 𑀭𑀫𑀢𑀺, 𑀦 𑀭𑀼𑀓𑁆𑀔𑀫𑀽𑀮𑀕𑀢𑁄 𑀭𑀫𑀢𑀺, 𑀦 𑀅𑀚𑁆𑀛𑁄𑀓𑀸𑀲𑀕𑀢𑁄 𑀭𑀫𑀢𑀺; 𑀬𑁂𑀦 𑀬𑁂𑀦 𑀕𑀘𑁆𑀙𑀢𑀺, 𑀬𑀢𑁆𑀣 𑀬𑀢𑁆𑀣 𑀢𑀺𑀝𑁆𑀞𑀢𑀺, 𑀬𑀢𑁆𑀣 𑀬𑀢𑁆𑀣 𑀦𑀺𑀲𑀻𑀤𑀢𑀺, 𑀬𑀢𑁆𑀣 𑀬𑀢𑁆𑀣 𑀦𑀺𑀧𑀚𑁆𑀚𑀢𑀺; 𑀢𑀢𑁆𑀣 𑀢𑀢𑁆𑀣 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀦𑁂𑀯 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀭𑀫𑀢𑀺, 𑀦 𑀭𑀼𑀓𑁆𑀔𑀫𑀽𑀮𑀕𑀢𑁄 𑀭𑀫𑀢𑀺, 𑀦 𑀅𑀚𑁆𑀛𑁄𑀓𑀸𑀲𑀕𑀢𑁄 𑀭𑀫𑀢𑀺; 𑀬𑁂𑀦 𑀬𑁂𑀦 𑀕𑀘𑁆𑀙𑀢𑀺, 𑀬𑀢𑁆𑀣 𑀬𑀢𑁆𑀣 𑀢𑀺𑀝𑁆𑀞𑀢𑀺, 𑀬𑀢𑁆𑀣 𑀬𑀢𑁆𑀣 𑀦𑀺𑀲𑀻𑀤𑀢𑀺, 𑀬𑀢𑁆𑀣 𑀬𑀢𑁆𑀣 𑀦𑀺𑀧𑀚𑁆𑀚𑀢𑀺; 𑀢𑀢𑁆𑀣 𑀢𑀢𑁆𑀣 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀯𑁂𑀭𑀫𑁆𑀪𑀲𑀼𑀢𑁆𑀢𑀁

𑁧𑁬𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀉𑀧𑀭𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑁂 𑀯𑁂𑀭𑀫𑁆𑀪𑀸 [𑀯𑁂𑀭𑀫𑁆𑀩𑀸 (𑀲𑀻. 𑀧𑀻.)] 𑀦𑀸𑀫 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀢𑀢𑁆𑀣 𑀬𑁄 𑀧𑀓𑁆𑀔𑀻 𑀕𑀘𑁆𑀙𑀢𑀺 𑀢𑀫𑁂𑀦𑀁 𑀯𑁂𑀭𑀫𑁆𑀪𑀸 𑀯𑀸𑀢𑀸 𑀔𑀺𑀧𑀦𑁆𑀢𑀺. 𑀢𑀲𑁆𑀲 𑀯𑁂𑀭𑀫𑁆𑀪𑀯𑀸𑀢𑀓𑁆𑀔𑀺𑀢𑁆𑀢𑀲𑁆𑀲 𑀅𑀜𑁆𑀜𑁂𑀦𑁂𑀯 𑀧𑀸𑀤𑀸 𑀕𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂𑀦 𑀧𑀓𑁆𑀔𑀸 𑀕𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂𑀦 𑀲𑀻𑀲𑀁 𑀕𑀘𑁆𑀙𑀢𑀺, 𑀅𑀜𑁆𑀜𑁂𑀦 𑀓𑀸𑀬𑁄 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸, 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀣 𑀧𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸. 𑀢𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀢𑀲𑁆𑀲 𑀅𑀜𑁆𑀜𑁂 𑀘𑀻𑀯𑀭𑀁 𑀳𑀭𑀦𑁆𑀢𑀺, 𑀅𑀜𑁆𑀜𑁂 𑀧𑀢𑁆𑀢𑀁 𑀳𑀭𑀦𑁆𑀢𑀺, 𑀅𑀜𑁆𑀜𑁂 𑀦𑀺𑀲𑀻𑀤𑀦𑀁 𑀳𑀭𑀦𑁆𑀢𑀺, 𑀅𑀜𑁆𑀜𑁂 𑀲𑀽𑀘𑀺𑀖𑀭𑀁 𑀳𑀭𑀦𑁆𑀢𑀺, 𑀯𑁂𑀭𑀫𑁆𑀪𑀯𑀸𑀢𑀓𑁆𑀔𑀺𑀢𑁆𑀢𑀲𑁆𑀲𑁂𑀯 𑀲𑀓𑀼𑀡𑀲𑁆𑀲. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀲𑀕𑀸𑀣𑀓𑀲𑀼𑀢𑁆𑀢𑀁

𑁧𑁬𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀲𑁆𑀲𑀸𑀫𑀺 𑀲𑀓𑁆𑀓𑀸𑀭𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀁. 𑀇𑀥 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀲𑁆𑀲𑀸𑀫𑀺 𑀅𑀲𑀓𑁆𑀓𑀸𑀭𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀁. 𑀇𑀥 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀲𑁆𑀲𑀸𑀫𑀺 𑀲𑀓𑁆𑀓𑀸𑀭𑁂𑀦 𑀘 𑀅𑀲𑀓𑁆𑀓𑀸𑀭𑁂𑀦 𑀘 𑀢𑀤𑀼𑀪𑀬𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀬𑀲𑁆𑀲 𑀲𑀓𑁆𑀓𑀭𑀺𑀬𑀫𑀸𑀦𑀲𑁆𑀲, 𑀅𑀲𑀓𑁆𑀓𑀸𑀭𑁂𑀦 𑀘𑀽𑀪𑀬𑀁;

𑀲𑀫𑀸𑀥𑀺 𑀦 𑀯𑀺𑀓𑀫𑁆𑀧𑀢𑀺, 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀺𑀦𑁄 [𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄 (𑀧𑀻. 𑀓.) 𑀅𑀧𑁆𑀧𑀫𑀸𑀡𑁄𑀢𑀺 𑀳𑁂𑀢𑁆𑀣 𑀨𑀮𑀲𑀫𑀸𑀥𑀺, 𑀦 𑀲𑀢𑀺].

‘‘𑀢𑀁 𑀛𑀸𑀬𑀺𑀦𑀁 𑀲𑀸𑀢𑀢𑀺𑀓𑀁, 𑀲𑀼𑀔𑀼𑀫𑀁 𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀓𑀁;

𑀉𑀧𑀸𑀤𑀸𑀦𑀓𑁆𑀔𑀬𑀸𑀭𑀸𑀫𑀁, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻’’𑀢𑀺. 𑀤𑀲𑀫𑀁;

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀸𑀭𑀼𑀡𑁄 𑀩𑀴𑀺𑀲𑀁 𑀓𑀼𑀫𑁆𑀫𑀁, 𑀤𑀻𑀖𑀮𑁄𑀫𑀺 𑀘 𑀫𑀻𑀴𑁆𑀳𑀓𑀁;

𑀅𑀲𑀦𑀺 𑀤𑀺𑀤𑁆𑀥𑀁 𑀲𑀺𑀗𑁆𑀕𑀸𑀮𑀁, 𑀯𑁂𑀭𑀫𑁆𑀪𑁂𑀦 𑀲𑀕𑀸𑀣𑀓𑀦𑁆𑀢𑀺.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀼𑀯𑀡𑁆𑀡𑀧𑀸𑀢𑀺𑀲𑀼𑀢𑁆𑀢𑀁

𑁧𑁬𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀅𑀥𑀺𑀕𑀫𑀸𑀬. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀸𑀧𑀺 𑀭𑀽𑀧𑀺𑀬𑀘𑀼𑀡𑁆𑀡𑀧𑀭𑀺𑀧𑀽𑀭𑀸𑀬 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀭𑀽𑀧𑀺𑀬𑀧𑀸𑀢𑀺𑀲𑀼𑀢𑁆𑀢𑀁

𑁧𑁬𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀭𑀽𑀧𑀺𑀬𑀧𑀸𑀢𑀺𑀬𑀸𑀧𑀺 𑀲𑀼𑀯𑀡𑁆𑀡𑀘𑀼𑀡𑁆𑀡𑀧𑀭𑀺𑀧𑀽𑀭𑀸𑀬 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩-𑁧𑁦. 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀼𑀢𑁆𑀢𑀸𑀤𑀺𑀅𑀝𑁆𑀞𑀓𑀁

𑁧𑁬𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑁆𑀲𑀸𑀧𑀺 𑀳𑁂𑀢𑀼…𑀧𑁂… 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢𑀲𑁆𑀲𑀸𑀧𑀺 𑀳𑁂𑀢𑀼… 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑁆𑀲𑀸𑀧𑀺 𑀳𑁂𑀢𑀼… 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀢𑀲𑁆𑀲𑀸𑀧𑀺 𑀳𑁂𑀢𑀼… 𑀧𑀣𑀯𑀺𑀬𑀸𑀧𑀺 𑀚𑀸𑀢𑀭𑀽𑀧𑀧𑀭𑀺𑀧𑀽𑀭𑀸𑀬 𑀳𑁂𑀢𑀼… 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼𑀧𑀺… 𑀚𑀻𑀯𑀺𑀢𑀳𑁂𑀢𑀼𑀧𑀺… 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸𑀧𑀺 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀧𑀸𑀢𑀺 𑀤𑁆𑀯𑁂 𑀲𑀼𑀯𑀡𑁆𑀡𑀸 𑀘, 𑀲𑀺𑀗𑁆𑀕𑀻𑀳𑀺 𑀅𑀧𑀭𑁂 𑀤𑀼𑀯𑁂;

𑀧𑀣𑀯𑀻 𑀓𑀺𑀜𑁆𑀘𑀺𑀓𑁆𑀔𑀚𑀻𑀯𑀺𑀢𑀁, 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀤𑀲𑀸𑀢𑀺.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀁

𑁧𑁭𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀦 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄 𑀏𑀓𑁄 𑀏𑀓𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀬𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 …𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀓𑀮𑁆𑀬𑀸𑀡𑀻𑀲𑀼𑀢𑁆𑀢𑀁

𑁧𑁭𑁧. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀦 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀚𑀦𑀧𑀤𑀓𑀮𑁆𑀬𑀸𑀡𑀻 𑀏𑀓𑀸 𑀏𑀓𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀬𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀁

𑁧𑁭𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸 𑀏𑀓𑀧𑀼𑀢𑁆𑀢𑀓𑀁 𑀧𑀺𑀬𑀁 𑀫𑀦𑀸𑀧𑀁 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄, 𑀢𑀸𑀢, 𑀪𑀯𑀸𑀳𑀺 𑀬𑀸𑀤𑀺𑀲𑁄 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁, 𑀬𑀤𑀺𑀤𑀁 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄. 𑀲𑀘𑁂 𑀔𑁄 𑀢𑁆𑀯𑀁, 𑀢𑀸𑀢, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀲𑀺; 𑀢𑀸𑀤𑀺𑀲𑁄, 𑀢𑀸𑀢, 𑀪𑀯𑀸𑀳𑀺 𑀬𑀸𑀤𑀺𑀲𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸. 𑀫𑀸 𑀘 𑀔𑁄 𑀢𑁆𑀯𑀁, 𑀢𑀸𑀢, 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀽𑀢𑀺. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀺, 𑀲𑁄 𑀢𑀲𑁆𑀲 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀏𑀓𑀥𑀻𑀢𑀼𑀲𑀼𑀢𑁆𑀢𑀁

𑁧𑁭𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀤𑁆𑀥𑀸 𑀪𑀺𑀓𑁆𑀔𑀯𑁂 𑀉𑀧𑀸𑀲𑀺𑀓𑀸 𑀏𑀓𑀁 𑀥𑀻𑀢𑀭𑀁 𑀧𑀺𑀬𑀁 𑀫𑀦𑀸𑀧𑀁 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑀸, 𑀅𑀬𑁆𑀬𑁂, 𑀪𑀯𑀸𑀳𑀺 𑀬𑀸𑀤𑀺𑀲𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 [𑀯𑁂𑀴𑀼𑀓𑀡𑁆𑀟𑀓𑀻 (𑀲𑀻. 𑀙𑀓𑁆𑀓𑀗𑁆𑀕𑀼𑀢𑁆𑀢𑀭𑁂𑀧𑀺)] 𑀘 𑀦𑀦𑁆𑀤𑀫𑀸𑀢𑀸’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸. 𑀲𑀘𑁂 𑀔𑁄 𑀢𑁆𑀯𑀁, 𑀅𑀬𑁆𑀬𑁂, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀲𑀺; 𑀢𑀸𑀤𑀺𑀲𑀸, 𑀅𑀬𑁆𑀬𑁂, 𑀪𑀯𑀸𑀳𑀺 𑀬𑀸𑀤𑀺𑀲𑀸 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘𑀸𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀬𑀤𑀺𑀤𑀁 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘. 𑀫𑀸 𑀘 𑀔𑁄 𑀢𑁆𑀯𑀁, 𑀅𑀬𑁆𑀬𑁂, 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀽𑀢𑀺. 𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀁 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀺, 𑀲𑁄 𑀢𑀲𑁆𑀲𑀸 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁭𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑀸 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂 𑀘 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁭𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺…𑀧𑁂… 𑀧𑀚𑀸𑀦𑀦𑁆𑀢𑀺…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀢𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁭𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺 …𑀧𑁂… 𑀧𑀚𑀸𑀦𑀦𑁆𑀢𑀺…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀙𑀯𑀺𑀲𑀼𑀢𑁆𑀢𑀁

𑁧𑁭𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄, 𑀪𑀺𑀓𑁆𑀔𑀯𑁂, 𑀙𑀯𑀺𑀁 𑀙𑀺𑀦𑁆𑀤𑀢𑀺, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑀢𑀺, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑀢𑀺, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀢𑀺, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑀢𑀺, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀭𑀚𑁆𑀚𑀼𑀲𑀼𑀢𑁆𑀢𑀁

𑁧𑁭𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄, 𑀪𑀺𑀓𑁆𑀔𑀯𑁂, 𑀙𑀯𑀺𑀁 𑀙𑀺𑀦𑁆𑀤𑀢𑀺, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑀢𑀺, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑀢𑀺, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀢𑀺, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑀢𑀺, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑀸𑀬 𑀯𑀸𑀴𑀭𑀚𑁆𑀚𑀼𑀬𑀸 𑀚𑀗𑁆𑀖𑀁 𑀯𑁂𑀞𑁂𑀢𑁆𑀯𑀸 𑀖𑀁𑀲𑁂𑀬𑁆𑀬. 𑀲𑀸 𑀙𑀯𑀺𑀁 𑀙𑀺𑀦𑁆𑀤𑁂𑀬𑁆𑀬, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑁂𑀬𑁆𑀬, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑁂𑀬𑁆𑀬, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑁂𑀬𑁆𑀬, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑁂𑀬𑁆𑀬, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀙𑀯𑀺𑀁 𑀙𑀺𑀦𑁆𑀤𑀢𑀺, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑀢𑀺, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑀢𑀺, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀢𑀺, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑀢𑀺, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁧𑁭𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀢𑀲𑁆𑀲𑀧𑀸𑀳𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀧𑀦, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺? ‘‘𑀬𑀸 𑀳𑀺𑀲𑁆𑀲 𑀲𑀸, 𑀆𑀦𑀦𑁆𑀤, 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀳𑀁 𑀢𑀲𑁆𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀺. 𑀬𑁂 𑀘 𑀔𑁆𑀯𑀲𑁆𑀲, 𑀆𑀦𑀦𑁆𑀤, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀅𑀥𑀺𑀕𑀢𑀸 𑀢𑁂𑀲𑀸𑀳𑀫𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀆𑀦𑀦𑁆𑀤, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀆𑀦𑀦𑁆𑀤, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀢𑀼𑀕𑀸𑀫𑁄 𑀘 𑀓𑀮𑁆𑀬𑀸𑀡𑀻, 𑀧𑀼𑀢𑁆𑀢𑁄 𑀘 𑀏𑀓𑀥𑀻𑀢𑀼 𑀘;

𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀻𑀡𑀺, 𑀙𑀯𑀺 𑀭𑀚𑁆𑀚𑀼 𑀘 𑀪𑀺𑀓𑁆𑀔𑀼𑀦𑀸𑀢𑀺.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀪𑀺𑀦𑁆𑀤𑀺𑀲𑀼𑀢𑁆𑀢𑀁

𑁧𑁮𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀓𑀼𑀲𑀮𑀫𑀽𑀮𑀲𑀼𑀢𑁆𑀢𑀁

𑁧𑁮𑁧. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀓𑀼𑀲𑀮𑀫𑀽𑀮𑀁 𑀲𑀫𑀼𑀘𑁆𑀙𑁂𑀤𑀫𑀕𑀫𑀸. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀓𑀼𑀲𑀮𑀥𑀫𑁆𑀫𑀲𑀼𑀢𑁆𑀢𑀁

𑁧𑁮𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀓𑀼𑀲𑀮𑁄 𑀥𑀫𑁆𑀫𑁄 𑀲𑀫𑀼𑀘𑁆𑀙𑁂𑀤𑀫𑀕𑀫𑀸. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀲𑀼𑀓𑁆𑀓𑀥𑀫𑁆𑀫𑀲𑀼𑀢𑁆𑀢𑀁

𑁧𑁮𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀲𑀼𑀓𑁆𑀓𑁄 𑀥𑀫𑁆𑀫𑁄 𑀲𑀫𑀼𑀘𑁆𑀙𑁂𑀤𑀫𑀕𑀫𑀸. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑀼𑀢𑁆𑀢𑀁

𑁧𑁮𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀤𑁂𑀯𑀤𑀢𑁆𑀢𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀢𑀯𑀥𑀸𑀬, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀤𑀮𑀻 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑁂𑀴𑀼 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀴𑁄 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀢𑀭𑀻 𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀸𑀪𑀯𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸𑀢𑀺’’. 𑀧𑀜𑁆𑀘𑀫𑀁;

𑁬. 𑀧𑀜𑁆𑀘𑀭𑀣𑀲𑀢𑀲𑀼𑀢𑁆𑀢𑀁

𑁧𑁮𑁫. 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁂𑀯𑀤𑀢𑁆𑀢𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀢𑀻’’𑀢𑀺. ‘‘𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀺𑀳𑀬𑀺𑀢𑁆𑀣. 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀆𑀳𑀭𑀻𑀬𑀺𑀲𑁆𑀲𑀢𑀺, 𑀳𑀸𑀦𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀼𑀁, 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀭𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀡𑁆𑀟𑀢𑀭𑁄 𑀅𑀲𑁆𑀲; 𑀏𑀯𑀫𑁂𑀯, 𑀪𑀺𑀓𑁆𑀔𑀯𑁂, 𑀬𑀸𑀯𑀓𑀻𑀯𑀜𑁆𑀘 𑀤𑁂𑀯𑀤𑀢𑁆𑀢𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀆𑀳𑀭𑀻𑀬𑀺𑀲𑁆𑀲𑀢𑀺, 𑀳𑀸𑀦𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀫𑀸𑀢𑀼𑀲𑀼𑀢𑁆𑀢𑀁

𑁧𑁮𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀫𑀸𑀢𑀼𑀧𑀺 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫. 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮-𑁧𑁩. 𑀧𑀺𑀢𑀼𑀲𑀼𑀢𑁆𑀢𑀸𑀤𑀺𑀙𑀓𑁆𑀓𑀁

𑁧𑁮𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦 𑀘𑀸𑀬𑀫𑀸𑀬𑀲𑁆𑀫𑀸 𑀧𑀺𑀢𑀼𑀧𑀺 𑀳𑁂𑀢𑀼…𑀧𑁂… 𑀪𑀸𑀢𑀼𑀧𑀺 𑀳𑁂𑀢𑀼… 𑀪𑀕𑀺𑀦𑀺𑀬𑀸𑀧𑀺 𑀳𑁂𑀢𑀼… 𑀧𑀼𑀢𑁆𑀢𑀲𑁆𑀲𑀧𑀺 𑀳𑁂𑀢𑀼… 𑀥𑀻𑀢𑀼𑀬𑀸𑀧𑀺 𑀳𑁂𑀢𑀼… 𑀧𑀚𑀸𑀧𑀢𑀺𑀬𑀸𑀧𑀺 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’𑀢𑀺. 𑀢𑀫𑁂𑀦𑀁 𑀧𑀲𑁆𑀲𑀸𑀫𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀁. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀭𑀲𑀫𑀁.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀪𑀺𑀦𑁆𑀤𑀺 𑀫𑀽𑀮𑀁 𑀤𑀼𑀯𑁂 𑀥𑀫𑁆𑀫𑀸, 𑀧𑀓𑁆𑀓𑀦𑁆𑀢𑀁 𑀭𑀣 𑀫𑀸𑀢𑀭𑀺;

𑀧𑀺𑀢𑀸 𑀪𑀸𑀢𑀸 𑀘 𑀪𑀕𑀺𑀦𑀻, 𑀧𑀼𑀢𑁆𑀢𑁄 𑀥𑀻𑀢𑀸 𑀧𑀚𑀸𑀧𑀢𑀻𑀢𑀺.

𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.