𑁩. 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀁

𑁧𑁭𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀸𑀭𑀼𑀡𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸 𑀏𑀓𑀧𑀼𑀢𑁆𑀢𑀓𑀁 𑀧𑀺𑀬𑀁 𑀫𑀦𑀸𑀧𑀁 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄, 𑀢𑀸𑀢, 𑀪𑀯𑀸𑀳𑀺 𑀬𑀸𑀤𑀺𑀲𑁄 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁, 𑀬𑀤𑀺𑀤𑀁 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄. 𑀲𑀘𑁂 𑀔𑁄 𑀢𑁆𑀯𑀁, 𑀢𑀸𑀢, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀲𑀺; 𑀢𑀸𑀤𑀺𑀲𑁄, 𑀢𑀸𑀢, 𑀪𑀯𑀸𑀳𑀺 𑀬𑀸𑀤𑀺𑀲𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸. 𑀫𑀸 𑀘 𑀔𑁄 𑀢𑁆𑀯𑀁, 𑀢𑀸𑀢, 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀽𑀢𑀺. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀺, 𑀲𑁄 𑀢𑀲𑁆𑀲 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬. 𑀏𑀯𑀁 𑀤𑀸𑀭𑀼𑀡𑁄 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄…𑀧𑁂… 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.