𑁫. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁

𑁧. 𑀲𑀦𑁆𑀢𑀼𑀝𑁆𑀞𑀲𑀼𑀢𑁆𑀢𑀁

𑁧𑁪𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀲𑀦𑁆𑀢𑀼𑀝𑁆𑀞𑀸𑀬𑀁 [𑀲𑀦𑁆𑀢𑀼𑀝𑁆𑀞𑁄𑀬𑀁 (𑀲𑀻.)], 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻; 𑀦 𑀘 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺; 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺; 𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀅𑀕𑀥𑀺𑀢𑁄 [𑀅𑀕𑀣𑀺𑀢𑁄 (𑀲𑀻.)] 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺’’.

‘‘𑀲𑀦𑁆𑀢𑀼𑀝𑁆𑀞𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀇𑀢𑀭𑀻𑀢𑀭𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻; 𑀦 𑀘 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺; 𑀅𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀦 𑀧𑀭𑀺𑀢𑀲𑁆𑀲𑀢𑀺; 𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺.

‘‘𑀲𑀦𑁆𑀢𑀼𑀝𑁆𑀞𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦, 𑀇𑀢𑀭𑀻𑀢𑀭𑀲𑁂𑀦𑀸𑀲𑀦𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻; 𑀦 𑀘 𑀲𑁂𑀦𑀸𑀲𑀦𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺; 𑀅𑀮𑀤𑁆𑀥𑀸 𑀘 𑀲𑁂𑀦𑀸𑀲𑀦𑀁 𑀦 𑀧𑀭𑀺𑀢𑀲𑁆𑀲𑀢𑀺; 𑀮𑀤𑁆𑀥𑀸 𑀘 𑀲𑁂𑀦𑀸𑀲𑀦𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺.

‘‘𑀲𑀦𑁆𑀢𑀼𑀝𑁆𑀞𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻; 𑀦 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺; 𑀅𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺; 𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀲𑀦𑁆𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀸𑀫 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀺𑀦𑁄; 𑀦 𑀘 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀸𑀫; 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀘 𑀧𑀭𑀺𑀢𑀲𑁆𑀲𑀺𑀲𑁆𑀲𑀸𑀫; 𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀅𑀕𑀥𑀺𑀢𑀸 𑀅𑀫𑀼𑀘𑁆𑀙𑀺𑀢𑀸 𑀅𑀦𑀚𑁆𑀛𑀸𑀧𑀦𑁆𑀦𑀸 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀦𑀺𑀲𑁆𑀲𑀭𑀡𑀧𑀜𑁆𑀜𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫’’’. (𑀏𑀯𑀁 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁).

‘‘‘𑀲𑀦𑁆𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀸𑀫 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦…𑀧𑁂… 𑀲𑀦𑁆𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀸𑀫 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦…𑀧𑁂… 𑀲𑀦𑁆𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀸𑀫 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀺𑀦𑁄; 𑀦 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀸𑀫 𑀅𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀦 𑀧𑀭𑀺𑀢𑀲𑁆𑀲𑀺𑀲𑁆𑀲𑀸𑀫; 𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀕𑀥𑀺𑀢𑀸 𑀅𑀫𑀼𑀘𑁆𑀙𑀺𑀢𑀸 𑀅𑀦𑀚𑁆𑀛𑀸𑀧𑀦𑁆𑀦𑀸 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀦𑀺𑀲𑁆𑀲𑀭𑀡𑀧𑀜𑁆𑀜𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀓𑀲𑁆𑀲𑀧𑁂𑀦 𑀯𑀸 𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 [𑀬𑁄 𑀯𑀸 𑀧𑀦 (𑀲𑀻.), 𑀬𑁄 𑀯𑀸 (𑀧𑀻.)] 𑀓𑀲𑁆𑀲𑀧𑀲𑀤𑀺𑀲𑁄, 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀅𑀦𑁄𑀢𑁆𑀢𑀧𑁆𑀧𑀻𑀲𑀼𑀢𑁆𑀢𑀁

𑁧𑁪𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀯𑀼𑀘𑁆𑀘𑀢𑀺 𑀳𑀺𑀤𑀁, 𑀆𑀯𑀼𑀲𑁄 𑀓𑀲𑁆𑀲𑀧, 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀧𑁆𑀧𑀻 𑀅𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀅𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀅𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬; 𑀆𑀢𑀸𑀧𑀻 𑀘 𑀔𑁄 𑀑𑀢𑁆𑀢𑀧𑁆𑀧𑀻 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀅𑀦𑀸𑀢𑀸𑀧𑀻 𑀳𑁄𑀢𑀺 𑀅𑀦𑁄𑀢𑁆𑀢𑀧𑁆𑀧𑀻 𑀅𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀅𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀅𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬; 𑀓𑀺𑀢𑁆𑀢𑀸𑀯𑀢𑀸 𑀘 𑀧𑀦𑀸𑀯𑀼𑀲𑁄, 𑀆𑀢𑀸𑀧𑀻 𑀳𑁄𑀢𑀺 𑀑𑀢𑁆𑀢𑀧𑁆𑀧𑀻 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺? ‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀢𑀸𑀧𑀻 𑀳𑁄𑀢𑀺’’.

‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀑𑀢𑁆𑀢𑀧𑁆𑀧𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀑𑀢𑁆𑀢𑀧𑁆𑀧𑀢𑀺, ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀑𑀢𑁆𑀢𑀧𑁆𑀧𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀦 𑀑𑀢𑁆𑀢𑀧𑁆𑀧𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀧𑁆𑀧𑀻 𑀅𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀅𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀅𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬.

‘‘𑀓𑀣𑀜𑁆𑀘𑀸𑀯𑀼𑀲𑁄, 𑀆𑀢𑀸𑀧𑀻 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸…𑀧𑁂… 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀆𑀢𑀸𑀧𑀻 𑀳𑁄𑀢𑀺.

‘‘𑀓𑀣𑀜𑁆𑀘𑀸𑀯𑀼𑀲𑁄, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀑𑀢𑁆𑀢𑀧𑁆𑀧𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀑𑀢𑁆𑀢𑀧𑁆𑀧𑀢𑀺, ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀑𑀢𑁆𑀢𑀧𑁆𑀧𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀑𑀢𑁆𑀢𑀧𑁆𑀧𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀆𑀢𑀸𑀧𑀻 𑀑𑀢𑁆𑀢𑀧𑁆𑀧𑀻 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬 𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀘𑀦𑁆𑀤𑀽𑀧𑀫𑀲𑀼𑀢𑁆𑀢𑀁

𑁧𑁪𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀘𑀦𑁆𑀤𑀽𑀧𑀫𑀸, 𑀪𑀺𑀓𑁆𑀔𑀯𑁂, 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑁋 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸 [𑀅𑀧𑁆𑀧𑀕𑀩𑁆𑀩𑀸 (𑀓.)]. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀚𑀭𑀼𑀤𑀧𑀸𑀦𑀁 𑀯𑀸 𑀑𑀮𑁄𑀓𑁂𑀬𑁆𑀬 𑀧𑀩𑁆𑀩𑀢𑀯𑀺𑀲𑀫𑀁 𑀯𑀸 𑀦𑀤𑀻𑀯𑀺𑀤𑀼𑀕𑁆𑀕𑀁 𑀯𑀸 𑁋 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑁋 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸’’.

‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑁋 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀣𑀁𑀭𑀽𑀧𑁄 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀲𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀆𑀓𑀸𑀲𑁂 𑀧𑀸𑀡𑀺 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀓𑀼𑀮𑁂𑀲𑀼 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺 𑁋 ‘𑀮𑀪𑀦𑁆𑀢𑀼 𑀮𑀸𑀪𑀓𑀸𑀫𑀸, 𑀧𑀼𑀜𑁆𑀜𑀓𑀸𑀫𑀸 𑀓𑀭𑁄𑀦𑁆𑀢𑀼 𑀧𑀼𑀜𑁆𑀜𑀸𑀦𑀻’𑀢𑀺; 𑀬𑀣𑀸𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄, 𑀏𑀯𑀁 𑀧𑀭𑁂𑀲𑀁 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄; 𑀏𑀯𑀭𑀽𑀧𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀓𑀼𑀮𑁂𑀲𑀼 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺 𑁋 ‘𑀮𑀪𑀦𑁆𑀢𑀼 𑀮𑀸𑀪𑀓𑀸𑀫𑀸, 𑀧𑀼𑀜𑁆𑀜𑀓𑀸𑀫𑀸 𑀓𑀭𑁄𑀦𑁆𑀢𑀼 𑀧𑀼𑀜𑁆𑀜𑀸𑀦𑀻’𑀢𑀺; 𑀬𑀣𑀸𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄; 𑀏𑀯𑀁 𑀧𑀭𑁂𑀲𑀁 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀣𑀁𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺, 𑀓𑀣𑀁𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀘𑀺𑀢𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀳𑁄 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀧𑀦 𑀥𑀫𑁆𑀫𑀁 𑀧𑀲𑀻𑀤𑁂𑀬𑁆𑀬𑀼𑀁, 𑀧𑀲𑀦𑁆𑀦𑀸 𑀘 𑀫𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀼’𑀦𑁆𑀢𑀺; 𑀏𑀯𑀭𑀽𑀧𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺.

‘‘𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀘𑀺𑀢𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺 [𑀯𑀺𑀜𑁆𑀜𑀽𑀳𑀺 (?)]. 𑀅𑀳𑁄, 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀧𑀦 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬𑀼𑀁, 𑀆𑀚𑀸𑀦𑀺𑀢𑁆𑀯𑀸 𑀘 𑀧𑀦 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀼’𑀦𑁆𑀢𑀺. 𑀇𑀢𑀺 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀧𑀝𑀺𑀘𑁆𑀘 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 𑀅𑀦𑀼𑀤𑁆𑀤𑀬𑀁 [𑀅𑀦𑀼𑀤𑀬𑀁 (𑀩𑀳𑀽𑀲𑀼) 𑀤𑁆𑀯𑀺𑀢𑁆𑀢𑀓𑀸𑀭𑀡𑀁 𑀧𑀦 𑀕𑀯𑁂𑀲𑀺𑀢𑀩𑁆𑀩𑀁] 𑀧𑀝𑀺𑀘𑁆𑀘 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀏𑀯𑀭𑀽𑀧𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺.

‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀏𑀯𑀁𑀘𑀺𑀢𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀅𑀳𑁄, 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀧𑀦 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬𑀼𑀁, 𑀆𑀚𑀸𑀦𑀺𑀢𑁆𑀯𑀸 𑀘 𑀧𑀦 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀼’𑀦𑁆𑀢𑀺. 𑀇𑀢𑀺 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀧𑀝𑀺𑀘𑁆𑀘 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 𑀅𑀦𑀼𑀤𑁆𑀤𑀬𑀁 𑀧𑀝𑀺𑀘𑁆𑀘 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀓𑀲𑁆𑀲𑀧𑁂𑀦 𑀯𑀸 𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄, 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀓𑀼𑀮𑀽𑀧𑀓𑀲𑀼𑀢𑁆𑀢𑀁

𑁧𑁪𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀣𑀁𑀭𑀽𑀧𑁄 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀽𑀧𑀓𑁄 𑀳𑁄𑀢𑀼𑀁, 𑀓𑀣𑀁𑀭𑀽𑀧𑁄 𑀪𑀺𑀓𑁆𑀔𑀼 𑀦 𑀅𑀭𑀳𑀢𑀺 𑀓𑀼𑀮𑀽𑀧𑀓𑁄 𑀳𑁄𑀢𑀼’’𑀦𑁆𑀢𑀺? 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂… 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀘𑀺𑀢𑁆𑀢𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑁋 ‘𑀤𑁂𑀦𑁆𑀢𑀼𑀬𑁂𑀯 𑀫𑁂, 𑀫𑀸 𑀦𑀸𑀤𑀁𑀲𑀼; 𑀩𑀳𑀼𑀓𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀣𑁄𑀓𑀁; 𑀧𑀡𑀻𑀢𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀮𑀽𑀔𑀁; 𑀲𑀻𑀖𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀤𑀦𑁆𑀥𑀁; 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀅𑀲𑀓𑁆𑀓𑀘𑁆𑀘’𑀦𑁆𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁𑀘𑀺𑀢𑁆𑀢𑀲𑁆𑀲 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀦 𑀤𑁂𑀦𑁆𑀢𑀺, 𑀢𑁂𑀦 𑀪𑀺𑀓𑁆𑀔𑀼 𑀲𑀦𑁆𑀤𑀻𑀬𑀢𑀺; 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀣𑁄𑀓𑀁 𑀤𑁂𑀦𑁆𑀢𑀺, 𑀦𑁄 𑀩𑀳𑀼𑀓𑀁…𑀧𑁂… 𑀮𑀽𑀔𑀁 𑀤𑁂𑀦𑁆𑀢𑀺, 𑀦𑁄 𑀧𑀡𑀻𑀢𑀁… 𑀤𑀦𑁆𑀥𑀁 𑀤𑁂𑀦𑁆𑀢𑀺, 𑀦𑁄 𑀲𑀻𑀖𑀁, 𑀢𑁂𑀦 𑀪𑀺𑀓𑁆𑀔𑀼 𑀲𑀦𑁆𑀤𑀻𑀬𑀢𑀺; 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺, 𑀦𑁄 𑀲𑀓𑁆𑀓𑀘𑁆𑀘𑀁; 𑀢𑁂𑀦 𑀪𑀺𑀓𑁆𑀔𑀼 𑀲𑀦𑁆𑀤𑀻𑀬𑀢𑀺; 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀏𑀯𑀭𑀽𑀧𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀅𑀭𑀳𑀢𑀺 𑀓𑀽𑀮𑀽𑀧𑀓𑁄 𑀳𑁄𑀢𑀼𑀁.

‘‘𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀘𑀺𑀢𑁆𑀢𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑁋 ‘𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀧𑀭𑀓𑀼𑀮𑁂𑀲𑀼 𑁋 𑀤𑁂𑀦𑁆𑀢𑀼𑀬𑁂𑀯 𑀫𑁂, 𑀫𑀸 𑀦𑀸𑀤𑀁𑀲𑀼; 𑀩𑀳𑀼𑀓𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀣𑁄𑀓𑀁; 𑀧𑀡𑀻𑀢𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀮𑀽𑀔𑀁; 𑀤𑀻𑀖𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀤𑀦𑁆𑀥𑀁; 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀅𑀲𑀓𑁆𑀓𑀘𑁆𑀘’𑀦𑁆𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀏𑀯𑀁𑀘𑀺𑀢𑁆𑀢𑀲𑁆𑀲 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀦 𑀤𑁂𑀦𑁆𑀢𑀺; 𑀢𑁂𑀦 𑀪𑀺𑀓𑁆𑀔𑀼 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀣𑁄𑀓𑀁 𑀤𑁂𑀦𑁆𑀢𑀺, 𑀦𑁄 𑀩𑀳𑀼𑀓𑀁; 𑀢𑁂𑀦 𑀪𑀺𑀓𑁆𑀔𑀼 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀮𑀽𑀔𑀁 𑀤𑁂𑀦𑁆𑀢𑀺, 𑀦𑁄 𑀧𑀡𑀻𑀢𑀁; 𑀢𑁂𑀦 𑀪𑀺𑀓𑁆𑀔𑀼 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀤𑀦𑁆𑀥𑀁 𑀤𑁂𑀦𑁆𑀢𑀺, 𑀦𑁄 𑀲𑀻𑀖𑀁; 𑀢𑁂𑀦 𑀪𑀺𑀓𑁆𑀔𑀼 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺, 𑀦𑁄 𑀲𑀓𑁆𑀓𑀘𑁆𑀘𑀁; 𑀢𑁂𑀦 𑀪𑀺𑀓𑁆𑀔𑀼 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀏𑀯𑀭𑀽𑀧𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀽𑀧𑀓𑁄 𑀳𑁄𑀢𑀼𑀁.

‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀏𑀯𑀁𑀘𑀺𑀢𑁆𑀢𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑁋 ‘𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀧𑀭𑀓𑀼𑀮𑁂𑀲𑀼 𑁋 𑀤𑁂𑀦𑁆𑀢𑀼𑀬𑁂𑀯 𑀫𑁂, 𑀫𑀸 𑀦𑀸𑀤𑀁𑀲𑀼; 𑀩𑀳𑀼𑀓𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀣𑁄𑀓𑀁; 𑀧𑀡𑀻𑀢𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀮𑀽𑀔𑀁; 𑀲𑀻𑀖𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀤𑀦𑁆𑀥𑀁; 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀫𑁂 𑀤𑁂𑀦𑁆𑀢𑀼, 𑀫𑀸 𑀅𑀲𑀓𑁆𑀓𑀘𑁆𑀘’𑀦𑁆𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑀲𑁆𑀲 𑀏𑀯𑀁𑀘𑀺𑀢𑁆𑀢𑀲𑁆𑀲 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀦 𑀤𑁂𑀦𑁆𑀢𑀺; 𑀢𑁂𑀦 𑀓𑀲𑁆𑀲𑀧𑁄 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀣𑁄𑀓𑀁 𑀤𑁂𑀦𑁆𑀢𑀺, 𑀦𑁄 𑀩𑀳𑀼𑀓𑀁; 𑀢𑁂𑀦 𑀓𑀲𑁆𑀲𑀧𑁄 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀮𑀽𑀔𑀁 𑀤𑁂𑀦𑁆𑀢𑀺, 𑀦𑁄 𑀧𑀡𑀻𑀢𑀁; 𑀢𑁂𑀦 𑀓𑀲𑁆𑀲𑀧𑁄 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀤𑀦𑁆𑀥𑀁 𑀤𑁂𑀦𑁆𑀢𑀺, 𑀦𑁄 𑀲𑀻𑀖𑀁; 𑀢𑁂𑀦 𑀓𑀲𑁆𑀲𑀧𑁄 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺, 𑀦𑁄 𑀲𑀓𑁆𑀓𑀘𑁆𑀘𑀁; 𑀢𑁂𑀦 𑀓𑀲𑁆𑀲𑀧𑁄 𑀦 𑀲𑀦𑁆𑀤𑀻𑀬𑀢𑀺; 𑀲𑁄 𑀦 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀓𑀲𑁆𑀲𑀧𑁂𑀦 𑀯𑀸 𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄. 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀚𑀺𑀡𑁆𑀡𑀲𑀼𑀢𑁆𑀢𑀁

𑁧𑁪𑁮. 𑀏𑀯𑀁 𑀫𑁂 𑀲𑀼𑀢𑀁…𑀧𑁂… 𑀭𑀸𑀚𑀕𑀳𑁂 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀚𑀺𑀡𑁆𑀡𑁄𑀲𑀺 𑀤𑀸𑀦𑀺 𑀢𑁆𑀯𑀁, 𑀓𑀲𑁆𑀲𑀧, 𑀕𑀭𑀼𑀓𑀸𑀦𑀺 𑀘 𑀢𑁂 𑀇𑀫𑀸𑀦𑀺 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀓𑀲𑁆𑀲𑀧, 𑀕𑀳𑀧𑀢𑀸𑀦𑀺 [𑀕𑀳𑀧𑀢𑀺𑀓𑀸𑀦𑀺 (𑀲𑀻.)] 𑀘𑁂𑀯 𑀘𑀻𑀯𑀭𑀸𑀦𑀺 𑀥𑀸𑀭𑁂𑀳𑀺, 𑀦𑀺𑀫𑀦𑁆𑀢𑀦𑀸𑀦𑀺 𑀘 𑀪𑀼𑀜𑁆𑀚𑀸𑀳𑀺, 𑀫𑀫 𑀘 𑀲𑀦𑁆𑀢𑀺𑀓𑁂 𑀯𑀺𑀳𑀭𑀸𑀳𑀻’’𑀢𑀺.

‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯 𑀧𑀯𑀺𑀯𑁂𑀓𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀲𑀁𑀲𑀝𑁆𑀞𑁄 𑀘𑁂𑀯 𑀅𑀲𑀁𑀲𑀕𑁆𑀕𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 [𑀯𑀻𑀭𑀺𑀬𑀸𑀭𑀩𑁆𑀪𑀲𑁆𑀲 (𑀓.)] 𑀘 𑀯𑀡𑁆𑀡𑀯𑀸𑀤𑀻’’𑀢𑀺.

‘‘𑀓𑀺𑀁 [𑀓𑀁 (𑀓.)] 𑀧𑀦 𑀢𑁆𑀯𑀁, 𑀓𑀲𑁆𑀲𑀧, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯…𑀧𑁂… 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯… 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯… 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯… 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯… 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯… 𑀅𑀲𑀁𑀲𑀝𑁆𑀞𑁄 𑀘𑁂𑀯… 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻’’𑀢𑀺?

‘‘𑀤𑁆𑀯𑁂 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯…𑀧𑁂… 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯… 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯… 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯… 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯… 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯… 𑀅𑀲𑀁𑀲𑀝𑁆𑀞𑁄 𑀘𑁂𑀯… 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻. 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀫𑁆𑀧𑀲𑁆𑀲𑀫𑀸𑀦𑁄, 𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀼𑀁’ [𑀆𑀧𑀚𑁆𑀚𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓𑀁.)]. ‘𑀬𑁂 𑀓𑀺𑀭 𑀢𑁂 𑀅𑀳𑁂𑀲𑀼𑀁 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀲𑀸𑀯𑀓𑀸 𑀢𑁂 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄…𑀧𑁂… 𑀧𑀺𑀡𑁆𑀟𑀧𑀸𑀢𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 …𑀧𑁂… 𑀧𑀁𑀲𑀼𑀓𑀽𑀮𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁… 𑀢𑁂𑀘𑀻𑀯𑀭𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁… 𑀅𑀧𑁆𑀧𑀺𑀘𑁆𑀙𑀸 𑀘𑁂𑀯 𑀅𑀳𑁂𑀲𑀼𑀁… 𑀲𑀦𑁆𑀢𑀼𑀝𑁆𑀞𑀸 𑀘𑁂𑀯 𑀅𑀳𑁂𑀲𑀼𑀁… 𑀧𑀯𑀺𑀯𑀺𑀢𑁆𑀢𑀸 𑀘𑁂𑀯 𑀅𑀳𑁂𑀲𑀼𑀁… 𑀅𑀲𑀁𑀲𑀝𑁆𑀞𑀸 𑀘𑁂𑀯 𑀅𑀳𑁂𑀲𑀼𑀁… 𑀆𑀭𑀤𑁆𑀥𑀯𑀻𑀭𑀺𑀬𑀸 𑀘𑁂𑀯 𑀅𑀳𑁂𑀲𑀼𑀁 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄’𑀢𑀺. 𑀢𑁂 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

‘‘𑀇𑀫𑁂 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯…𑀧𑁂… 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯… 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯… 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯… 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯… 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯… 𑀅𑀲𑀁𑀲𑀝𑁆𑀞𑁄 𑀘𑁂𑀯… 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀓𑀲𑁆𑀲𑀧. 𑀩𑀳𑀼𑀚𑀦𑀳𑀺𑀢𑀸𑀬 𑀓𑀺𑀭 𑀢𑁆𑀯𑀁, 𑀓𑀲𑁆𑀲𑀧, 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀘𑁂𑀯 𑀧𑀁𑀲𑀼𑀓𑀽𑀮𑀸𑀦𑀺 𑀥𑀸𑀭𑁂𑀳𑀺 𑀦𑀺𑀩𑁆𑀩𑀲𑀦𑀸𑀦𑀺, 𑀧𑀺𑀡𑁆𑀟𑀸𑀬 𑀘 𑀘𑀭𑀸𑀳𑀺, 𑀅𑀭𑀜𑁆𑀜𑁂 𑀘 𑀯𑀺𑀳𑀭𑀸𑀳𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀑𑀯𑀸𑀤𑀲𑀼𑀢𑁆𑀢𑀁

𑁧𑁪𑁯. 𑀭𑀸𑀚𑀕𑀳𑁂 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀑𑀯𑀤, 𑀓𑀲𑁆𑀲𑀧, 𑀪𑀺𑀓𑁆𑀔𑀽; 𑀓𑀭𑁄𑀳𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁. 𑀅𑀳𑀁 𑀯𑀸, 𑀓𑀲𑁆𑀲𑀧, 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸; 𑀅𑀳𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺.

‘‘𑀤𑀼𑀩𑁆𑀩𑀘𑀸 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽, 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀅𑀓𑁆𑀔𑀫𑀸, 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄 𑀅𑀦𑀼𑀲𑀸𑀲𑀦𑀺𑀁. 𑀇𑀥𑀸𑀳𑀁, 𑀪𑀦𑁆𑀢𑁂, 𑀅𑀤𑁆𑀤𑀲𑀁 𑀪𑀡𑁆𑀟𑀜𑁆𑀘 [𑀪𑀡𑁆𑀟𑀼𑀜𑁆𑀘 (𑀲𑀻.)] 𑀦𑀸𑀫 𑀪𑀺𑀓𑁆𑀔𑀼𑀁 𑀆𑀦𑀦𑁆𑀤𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀅𑀪𑀺𑀚𑀺𑀓𑀜𑁆𑀘 [𑀆𑀪𑀺𑀜𑁆𑀚𑀺𑀓𑀜𑁆𑀘 (𑀲𑀻. 𑀓.), 𑀆𑀪𑀺𑀚𑁆𑀚𑀺𑀓𑀜𑁆𑀘 (𑀲𑁆𑀬𑀸. 𑀓𑀁.)] 𑀦𑀸𑀫 𑀪𑀺𑀓𑁆𑀔𑀼𑀁 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀦𑁆𑀢𑁂 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀪𑀡𑁆𑀟𑀜𑁆𑀘 𑀪𑀺𑀓𑁆𑀔𑀼𑀁 𑀆𑀦𑀦𑁆𑀤𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀅𑀪𑀺𑀚𑀺𑀓𑀜𑁆𑀘 𑀪𑀺𑀓𑁆𑀔𑀼𑀁 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑁂 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑁂 𑀆𑀫𑀦𑁆𑀢𑁂𑀢𑀻’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀣 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀓𑀺𑀁 𑀦𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣 𑁋 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀣 𑁋 𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀦𑁄 𑀘𑁂 𑀓𑀺𑀭 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣, 𑀅𑀣 𑀓𑀺𑀁 𑀘𑀭𑀳𑀺 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀓𑀺𑀁 𑀚𑀸𑀦𑀦𑁆𑀢𑀸 𑀓𑀺𑀁 𑀧𑀲𑁆𑀲𑀦𑁆𑀢𑀸 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀣 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀘𑁆𑀘𑀬𑁄 𑀦𑁄, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸, 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 𑀬𑀣𑀸𑀅𑀓𑀼𑀲𑀮𑁂 [𑀬𑀣𑀸 𑀩𑀸𑀮𑁂 𑀬𑀣𑀸 𑀫𑀽𑀴𑁆𑀳𑁂 𑀬𑀣𑀸 𑀅𑀓𑀼𑀲𑀮𑁂 (𑀧𑀻.), 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁 (?)], 𑀬𑁂 𑀫𑀬𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀺𑀫𑁆𑀳 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’𑀢𑀺. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺.

‘‘𑀢𑀕𑁆𑀖 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 𑀬𑀣𑀸𑀅𑀓𑀼𑀲𑀮𑁂, 𑀬𑁂 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁂𑀦 𑀅𑀘𑁆𑀘𑀸𑀯𑀤𑀺𑀢𑁆𑀣 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀲𑀼𑀦𑁆𑀤𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀺, 𑀓𑁄 𑀘𑀺𑀭𑀢𑀭𑀁 𑀪𑀸𑀲𑀺𑀲𑁆𑀲𑀢𑀻’𑀢𑀺. 𑀬𑀢𑁄 𑀘 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀣, 𑀢𑀁 𑀯𑁄 𑀫𑀬𑀁 [𑀫𑀬𑀁 𑀅𑀘𑁆𑀘𑀬𑀁 (𑀲𑀻.)] 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺 𑀳𑁂𑀲𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺 𑀆𑀬𑀢𑀺𑀜𑁆𑀘 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀁

𑁧𑁫𑁦. 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 [𑀲𑀸𑀯𑀢𑁆𑀣𑀺, 𑀢𑀢𑁆𑀭-𑀏𑀢𑀤𑀯𑁄𑀘 (𑀲𑀻.)]. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀑𑀯𑀤, 𑀓𑀲𑁆𑀲𑀧, 𑀪𑀺𑀓𑁆𑀔𑀽; 𑀓𑀭𑁄𑀳𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁. 𑀅𑀳𑀁 𑀯𑀸, 𑀓𑀲𑁆𑀲𑀧, 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸; 𑀅𑀳𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺.

‘‘𑀤𑀼𑀩𑁆𑀩𑀘𑀸 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽, 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀓𑁆𑀔𑀫𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄 𑀅𑀦𑀼𑀲𑀸𑀲𑀦𑀺𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀦𑁆𑀢𑁂, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 [𑀳𑀺𑀭𑀺 (𑀲𑀩𑁆𑀩𑀢𑁆𑀣)] 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑀁 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺 [𑀆𑀕𑀘𑁆𑀙𑀦𑁆𑀢𑀺 (𑀲𑀻.)], 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦, 𑀳𑀸𑀬𑀢𑀺 𑀫𑀡𑁆𑀟𑀮𑁂𑀦, 𑀳𑀸𑀬𑀢𑀺 𑀆𑀪𑀸𑀬, 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺 … 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺… 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺.

‘‘‘𑀅𑀲𑁆𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀳𑀺𑀭𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀦𑁄𑀢𑁆𑀢𑀧𑁆𑀧𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀓𑀼𑀲𑀻𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀤𑀼𑀧𑁆𑀧𑀜𑁆𑀜𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀓𑁄𑀥𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀉𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁; ‘𑀦 𑀲𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀸𑀤𑀓𑀸’𑀢𑀺, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀫𑁂𑀢𑀁.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀦𑁆𑀢𑁂, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑀁 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦, 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦, 𑀯𑀟𑁆𑀠𑀢𑀺 𑀆𑀪𑀸𑀬, 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼… 𑀳𑀺𑀭𑀻 𑀅𑀢𑁆𑀣𑀺…𑀧𑁂… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀺.

‘‘‘𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀳𑀺𑀭𑀺𑀫𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀑𑀢𑁆𑀢𑀧𑁆𑀧𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀧𑀜𑁆𑀜𑀯𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀓𑁆𑀓𑁄𑀥𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀦𑀼𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀲𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀸𑀤𑀓𑀸’𑀢𑀺, 𑀪𑀦𑁆𑀢𑁂, 𑀅𑀧𑀭𑀺𑀳𑀸𑀦𑀫𑁂𑀢’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀓𑀲𑁆𑀲𑀧. 𑀬𑀲𑁆𑀲 𑀓𑀲𑁆𑀲𑀘𑀺, 𑀓𑀲𑁆𑀲𑀧, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀓𑀲𑁆𑀲𑀧, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦…𑀧𑁂… 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦. 𑀏𑀯𑀫𑁂𑀯 𑀔𑁄, 𑀓𑀲𑁆𑀲𑀧, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀤𑁆𑀥𑀺. ‘𑀅𑀲𑁆𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀓𑀲𑁆𑀲𑀧, 𑀧𑀭𑀺𑀳𑀸𑀦𑀫𑁂𑀢𑀁; 𑀅𑀳𑀺𑀭𑀺𑀓𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀻… 𑀓𑀼𑀲𑀻𑀢𑁄… 𑀤𑀼𑀧𑁆𑀧𑀜𑁆𑀜𑁄… 𑀓𑁄𑀥𑀦𑁄… ‘𑀉𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀓𑀲𑁆𑀲𑀧, 𑀧𑀭𑀺𑀳𑀸𑀦𑀫𑁂𑀢𑀁; ‘𑀦 𑀲𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀸𑀤𑀓𑀸’𑀢𑀺, 𑀓𑀲𑁆𑀲𑀧, 𑀧𑀭𑀺𑀳𑀸𑀦𑀫𑁂𑀢𑀁.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀓𑀲𑁆𑀲𑀧, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀓𑀲𑁆𑀲𑀧, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦, 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦, 𑀯𑀟𑁆𑀠𑀢𑀺 𑀆𑀪𑀸𑀬, 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦. 𑀏𑀯𑀫𑁂𑀯 𑀔𑁄, 𑀓𑀲𑁆𑀲𑀧, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀺.

‘‘‘𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀓𑀲𑁆𑀲𑀧, 𑀅𑀧𑀭𑀺𑀳𑀸𑀦𑀫𑁂𑀢𑀁; 𑀳𑀺𑀭𑀺𑀫𑀸…𑀧𑁂… 𑀑𑀢𑁆𑀢𑀧𑁆𑀧𑀻… 𑀆𑀭𑀤𑁆𑀥𑀯𑀻𑀭𑀺𑀬𑁄… 𑀧𑀜𑁆𑀜𑀯𑀸… 𑀅𑀓𑁆𑀓𑁄𑀥𑀦𑁄… ‘𑀅𑀦𑀼𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀓𑀲𑁆𑀲𑀧, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀲𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀸𑀤𑀓𑀸’𑀢𑀺, 𑀓𑀲𑁆𑀲𑀧, 𑀅𑀧𑀭𑀺𑀳𑀸𑀦𑀫𑁂𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀢𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀁

𑁧𑁫𑁧. 𑀭𑀸𑀚𑀕𑀳𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂 [𑀲𑀸𑀯𑀢𑁆𑀣𑀺, 𑀆𑀭𑀸𑀫𑁂 (𑀲𑀻.)]. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀑𑀯𑀤, 𑀓𑀲𑁆𑀲𑀧, 𑀪𑀺𑀓𑁆𑀔𑀽; 𑀓𑀭𑁄𑀳𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁. 𑀅𑀳𑀁 𑀯𑀸, 𑀓𑀲𑁆𑀲𑀧, 𑀪𑀺𑀓𑁆𑀔𑀽𑀦𑀁 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸; 𑀅𑀳𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺.

‘‘𑀤𑀼𑀩𑁆𑀩𑀘𑀸 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽, 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀅𑀓𑁆𑀔𑀫𑀸, 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄 𑀅𑀦𑀼𑀲𑀸𑀲𑀦𑀻’’𑀦𑁆𑀢𑀺. ‘‘𑀢𑀣𑀸 𑀳𑀺 𑀧𑀦, 𑀓𑀲𑁆𑀲𑀧, 𑀧𑀼𑀩𑁆𑀩𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀭𑀜𑁆𑀜𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀧𑀺𑀡𑁆𑀟𑀧𑀸𑀢𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀧𑀁𑀲𑀼𑀓𑀽𑀮𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀢𑁂𑀘𑀻𑀯𑀭𑀺𑀓𑀸 𑀘𑁂𑀯 𑀅𑀳𑁂𑀲𑀼𑀁 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀅𑀧𑁆𑀧𑀺𑀘𑁆𑀙𑀸 𑀘𑁂𑀯 𑀅𑀳𑁂𑀲𑀼𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀲𑀦𑁆𑀢𑀼𑀝𑁆𑀞𑀸 𑀘𑁂𑀯 𑀅𑀳𑁂𑀲𑀼𑀁 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀧𑀯𑀺𑀯𑀺𑀢𑁆𑀢𑀸 𑀘𑁂𑀯 𑀅𑀳𑁂𑀲𑀼𑀁 𑀧𑀯𑀺𑀯𑁂𑀓𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀅𑀲𑀁𑀲𑀝𑁆𑀞𑀸 𑀘𑁂𑀯 𑀅𑀳𑁂𑀲𑀼𑀁 𑀅𑀲𑀁𑀲𑀕𑁆𑀕𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄, 𑀆𑀭𑀤𑁆𑀥𑀯𑀻𑀭𑀺𑀬𑀸 𑀘𑁂𑀯 𑀅𑀳𑁂𑀲𑀼𑀁 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀦𑁄.

‘‘𑀢𑀢𑁆𑀭 𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀯𑀡𑁆𑀡𑀯𑀸𑀤𑀻, 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯 𑀧𑀯𑀺𑀯𑁂𑀓𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀅𑀲𑀁𑀲𑀝𑁆𑀞𑁄 𑀘𑁂𑀯 𑀅𑀲𑀁𑀲𑀕𑁆𑀕𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀢𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀺 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀦𑀸𑀫𑀸𑀬𑀁 𑀪𑀺𑀓𑁆𑀔𑀼, 𑀪𑀤𑁆𑀤𑀓𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀸𑀓𑀸𑀫𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼; 𑀏𑀳𑀺, 𑀪𑀺𑀓𑁆𑀔𑀼, 𑀇𑀤𑀁 𑀆𑀲𑀦𑀁 𑀦𑀺𑀲𑀻𑀤𑀸𑀳𑀻’’’𑀢𑀺.

‘‘𑀢𑀢𑁆𑀭, 𑀓𑀲𑁆𑀲𑀧, 𑀦𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀓𑀺𑀭 𑀲𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀆𑀭𑀜𑁆𑀜𑀺𑀓𑁄 𑀘𑁂𑀯 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀯…𑀧𑁂… 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀯… 𑀢𑁂𑀘𑀻𑀯𑀭𑀺𑀓𑁄 𑀘𑁂𑀯… 𑀅𑀧𑁆𑀧𑀺𑀘𑁆𑀙𑁄 𑀘𑁂𑀯… 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯… 𑀧𑀯𑀺𑀯𑀺𑀢𑁆𑀢𑁄 𑀘𑁂𑀯… 𑀅𑀲𑀁𑀲𑀝𑁆𑀞𑁄 𑀘𑁂𑀯… 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀘 𑀯𑀡𑁆𑀡𑀯𑀸𑀤𑀻, 𑀢𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀺 𑁋 𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀦𑀸𑀫𑀸𑀬𑀁 𑀪𑀺𑀓𑁆𑀔𑀼, 𑀪𑀤𑁆𑀤𑀓𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀸𑀓𑀸𑀫𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼; 𑀏𑀳𑀺, 𑀪𑀺𑀓𑁆𑀔𑀼, 𑀇𑀤𑀁 𑀆𑀲𑀦𑀁 𑀦𑀺𑀲𑀻𑀤𑀸𑀳𑀻’𑀢𑀺. 𑀢𑁂 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺; 𑀢𑁂𑀲𑀁 𑀢𑀁 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

‘‘𑀏𑀢𑀭𑀳𑀺 𑀧𑀦, 𑀓𑀲𑁆𑀲𑀧, 𑀣𑁂𑀭𑀸 𑀪𑀺𑀓𑁆𑀔𑀽 𑀦 𑀘𑁂𑀯 𑀆𑀭𑀜𑁆𑀜𑀺𑀓𑀸 𑀦 𑀘 𑀆𑀭𑀜𑁆𑀜𑀺𑀓𑀢𑁆𑀢𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀧𑀺𑀡𑁆𑀟𑀧𑀸𑀢𑀺𑀓𑀸 𑀦 𑀘 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀧𑀁𑀲𑀼𑀓𑀽𑀮𑀺𑀓𑀸 𑀦 𑀘 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀢𑁂𑀘𑀻𑀯𑀭𑀺𑀓𑀸 𑀦 𑀘 𑀢𑁂𑀘𑀻𑀯𑀭𑀺𑀓𑀢𑁆𑀢𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀅𑀧𑁆𑀧𑀺𑀘𑁆𑀙𑀸 𑀦 𑀘 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀲𑀦𑁆𑀢𑀼𑀝𑁆𑀞𑀸 𑀦 𑀘 𑀲𑀦𑁆𑀢𑀼𑀝𑁆𑀞𑀺𑀬𑀸 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀧𑀯𑀺𑀯𑀺𑀢𑁆𑀢𑀸 𑀦 𑀘 𑀧𑀯𑀺𑀯𑁂𑀓𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀅𑀲𑀁𑀲𑀝𑁆𑀞𑀸 𑀦 𑀘 𑀅𑀲𑀁𑀲𑀕𑁆𑀕𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄, 𑀦 𑀘𑁂𑀯 𑀆𑀭𑀤𑁆𑀥𑀯𑀻𑀭𑀺𑀬𑀸 𑀦 𑀘 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄.

‘‘𑀢𑀢𑁆𑀭 𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀜𑀸𑀢𑁄 𑀬𑀲𑀲𑁆𑀲𑀻 𑀮𑀸𑀪𑀻 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀢𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀺 𑁋 ‘𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀦𑀸𑀫𑀸𑀬𑀁 𑀪𑀺𑀓𑁆𑀔𑀼, 𑀪𑀤𑁆𑀤𑀓𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀲𑀩𑁆𑀭𑀳𑁆𑀫𑀘𑀸𑀭𑀺𑀓𑀸𑀫𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼; 𑀏𑀳𑀺, 𑀪𑀺𑀓𑁆𑀔𑀼, 𑀇𑀤𑀁 𑀆𑀲𑀦𑀁 𑀦𑀺𑀲𑀻𑀤𑀸𑀳𑀻’’’𑀢𑀺.

‘‘𑀢𑀢𑁆𑀭, 𑀓𑀲𑁆𑀲𑀧, 𑀦𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀓𑀺𑀭 𑀲𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀜𑀸𑀢𑁄 𑀬𑀲𑀲𑁆𑀲𑀻 𑀮𑀸𑀪𑀻 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀢𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀺 𑁋 𑀏𑀳𑀺, 𑀪𑀺𑀓𑁆𑀔𑀼, 𑀓𑁄 𑀦𑀸𑀫𑀸𑀬𑀁 𑀪𑀺𑀓𑁆𑀔𑀼, 𑀪𑀤𑁆𑀤𑀓𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀲𑀩𑁆𑀭𑀳𑁆𑀫𑀘𑀸𑀭𑀺𑀓𑀸𑀫𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼; 𑀏𑀳𑀺, 𑀪𑀺𑀓𑁆𑀔𑀼, 𑀇𑀤𑀁 𑀆𑀲𑀦𑀁 𑀦𑀺𑀲𑀻𑀤𑀸𑀳𑀻’𑀢𑀺. 𑀢𑁂 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀢𑀁 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀬𑀜𑁆𑀳𑀺 𑀢𑀁, 𑀓𑀲𑁆𑀲𑀧, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀧𑀤𑁆𑀤𑀼𑀢𑀸 𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁂𑀦 𑀅𑀪𑀺𑀧𑀢𑁆𑀣𑀦𑀸 [𑀅𑀪𑀺𑀪𑀯𑀦𑀸 (𑀲𑀻.)] 𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀅𑀪𑀺𑀧𑀢𑁆𑀣𑀦𑁂𑀦𑀸’𑀢𑀺 [𑀩𑁆𑀭𑀳𑁆𑀫𑀘𑀸𑀭𑀺𑀅𑀪𑀺𑀪𑀯𑀦𑁂𑀦𑀸𑀢𑀺 (𑀲𑀻.)], 𑀏𑀢𑀭𑀳𑀺 𑀢𑀁, 𑀓𑀲𑁆𑀲𑀧, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀧𑀤𑁆𑀤𑀼𑀢𑀸 𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀽𑀧𑀤𑁆𑀤𑀯𑁂𑀦 𑀅𑀪𑀺𑀧𑀢𑁆𑀣𑀦𑀸 𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀅𑀪𑀺𑀧𑀢𑁆𑀣𑀦𑁂𑀦𑀸’’’𑀢𑀺. 𑀅𑀝𑁆𑀞𑀫𑀁.

𑁯. 𑀛𑀸𑀦𑀸𑀪𑀺𑀜𑁆𑀜𑀲𑀼𑀢𑁆𑀢𑀁

𑁧𑁫𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺’’.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀸𑀫𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀫𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 …𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀫𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀫𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀫𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁, 𑀢𑀺𑀭𑁄𑀓𑀼𑀝𑁆𑀝𑀁, 𑀢𑀺𑀭𑁄𑀧𑀸𑀓𑀸𑀭𑀁, 𑀢𑀺𑀭𑁄𑀧𑀩𑁆𑀩𑀢𑀁, 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀸𑀫𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀫𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀸𑀫𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀸𑀫𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀸𑀫𑀺 𑀧𑀭𑀺𑀫𑀚𑁆𑀚𑀸𑀫𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀫𑀺, 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘, 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸…𑀧𑁂… 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀫𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀫𑀺, 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁… 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁… 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁… 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁… 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁… 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁… 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁… 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺, 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 𑁋 ‘𑀇𑀫𑁂 𑀯𑀢, 𑀪𑁄𑀦𑁆𑀢𑁄, 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸, 𑀇𑀫𑁂 𑀯𑀸 𑀧𑀦, 𑀪𑁄𑀦𑁆𑀢𑁄, 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀉𑀧𑀲𑁆𑀲𑀬𑀲𑀼𑀢𑁆𑀢𑀁

𑁧𑁫𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫, 𑀪𑀦𑁆𑀢𑁂 𑀓𑀲𑁆𑀲𑀧, 𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀕𑀘𑁆𑀙 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀩𑀳𑀼𑀓𑀺𑀘𑁆𑀘𑁄 𑀢𑁆𑀯𑀁 𑀩𑀳𑀼𑀓𑀭𑀡𑀻𑀬𑁄’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫, 𑀪𑀦𑁆𑀢𑁂 𑀓𑀲𑁆𑀲𑀧, 𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀕𑀘𑁆𑀙 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀩𑀳𑀼𑀓𑀺𑀘𑁆𑀘𑁄 𑀢𑁆𑀯𑀁 𑀩𑀳𑀼𑀓𑀭𑀡𑀻𑀬𑁄’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫, 𑀪𑀦𑁆𑀢𑁂 𑀓𑀲𑁆𑀲𑀧, 𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀣𑀼𑀮𑁆𑀮𑀢𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀻 𑀅𑀦𑀢𑁆𑀢𑀫𑀦𑀸 𑀅𑀦𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑁋 ‘‘𑀓𑀺𑀁 𑀧𑀦 𑀅𑀬𑁆𑀬𑁄 𑀫𑀳𑀸𑀓𑀲𑁆𑀲𑀧𑁄, 𑀅𑀬𑁆𑀬𑀲𑁆𑀲 𑀆𑀦𑀦𑁆𑀤𑀲𑁆𑀲 𑀯𑁂𑀤𑁂𑀳𑀫𑀼𑀦𑀺𑀦𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀁 𑀪𑀸𑀲𑀺𑀢𑀩𑁆𑀩𑀁 𑀫𑀜𑁆𑀜𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀽𑀘𑀺𑀯𑀸𑀡𑀺𑀚𑀓𑁄 𑀲𑀽𑀘𑀺𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀽𑀘𑀺𑀁 𑀯𑀺𑀓𑁆𑀓𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬; 𑀏𑀯𑀫𑁂𑀯 𑀅𑀬𑁆𑀬𑁄 𑀫𑀳𑀸𑀓𑀲𑁆𑀲𑀧𑁄 𑀅𑀬𑁆𑀬𑀲𑁆𑀲 𑀆𑀦𑀦𑁆𑀤𑀲𑁆𑀲 𑀯𑁂𑀤𑁂𑀳𑀫𑀼𑀦𑀺𑀦𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀁 𑀪𑀸𑀲𑀺𑀢𑀩𑁆𑀩𑀁 𑀫𑀜𑁆𑀜𑀢𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑀼𑀮𑁆𑀮𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀇𑀫𑀁 𑀯𑀸𑀘𑀁 𑀪𑀸𑀲𑀫𑀸𑀦𑀸𑀬. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀳𑀁 𑀲𑀽𑀘𑀺𑀯𑀸𑀡𑀺𑀚𑀓𑁄, 𑀢𑁆𑀯𑀁 𑀲𑀽𑀘𑀺𑀓𑀸𑀭𑁄; 𑀉𑀤𑀸𑀳𑀼 𑀅𑀳𑀁 𑀲𑀽𑀘𑀺𑀓𑀸𑀭𑁄, 𑀢𑁆𑀯𑀁 𑀲𑀽𑀘𑀺𑀯𑀸𑀡𑀺𑀚𑀓𑁄’’𑀢𑀺? ‘‘𑀔𑀫, 𑀪𑀦𑁆𑀢𑁂 𑀓𑀲𑁆𑀲𑀧, 𑀩𑀸𑀮𑁄 𑀫𑀸𑀢𑀼𑀕𑀸𑀫𑁄’’𑀢𑀺. ‘‘𑀆𑀕𑀫𑁂𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀫𑀸 𑀢𑁂 𑀲𑀗𑁆𑀖𑁄 𑀉𑀢𑁆𑀢𑀭𑀺 𑀉𑀧𑀧𑀭𑀺𑀓𑁆𑀔𑀺’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀧𑀺 𑀦𑀼 𑀢𑁆𑀯𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀦𑀻𑀢𑁄 𑁋 ‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀆𑀦𑀦𑁆𑀤𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀦𑀻𑀢𑁄 𑁋 ‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺…𑀧𑁂…. (𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀅𑀪𑀺𑀜𑁆𑀜𑀸𑀦𑀁 𑀏𑀯𑀁 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.)

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀧𑀺 𑀦𑀼 𑀢𑁆𑀯𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀦𑀻𑀢𑁄 𑁋 ‘𑀅𑀳𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀆𑀦𑀦𑁆𑀤𑁄𑀧𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀦𑀻𑀢𑁄 𑁋 ‘𑀅𑀳𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’’𑀢𑀺.

‘‘𑀲𑀢𑁆𑀢𑀭𑀢𑀦𑀁 𑀯𑀸, 𑀆𑀯𑀼𑀲𑁄, 𑀦𑀸𑀕𑀁 𑀅𑀟𑁆𑀠𑀝𑁆𑀞𑀫𑀭𑀢𑀦𑀁 𑀯𑀸 𑀢𑀸𑀮𑀧𑀢𑁆𑀢𑀺𑀓𑀸𑀬 𑀙𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀬𑁄 𑀫𑁂 𑀙 𑀅𑀪𑀺𑀜𑁆𑀜𑀸 𑀙𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺.

𑀘𑀯𑀺𑀢𑁆𑀣 𑀘 𑀧𑀦 𑀣𑀼𑀮𑁆𑀮𑀢𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀻 𑀩𑁆𑀭𑀳𑁆𑀫𑀘𑀭𑀺𑀬𑀫𑁆𑀳𑀸𑀢𑀺. 𑀤𑀲𑀫𑀁.

𑁧𑁧. 𑀘𑀻𑀯𑀭𑀲𑀼𑀢𑁆𑀢𑀁

𑁧𑁫𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀤𑀓𑁆𑀔𑀺𑀡𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀢𑀺𑀁𑀲𑀫𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄 𑀪𑀺𑀓𑁆𑀔𑀽 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀸 𑀪𑀯𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀓𑀼𑀫𑀸𑀭𑀪𑀽𑀢𑀸. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀤𑀓𑁆𑀔𑀺𑀡𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀯𑁂𑀴𑀼𑀯𑀦𑀁 𑀓𑀮𑀦𑁆𑀤𑀓𑀦𑀺𑀯𑀸𑀧𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀓𑀼𑀮𑁂𑀲𑀼 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺?

‘‘𑀢𑀬𑁄 𑀔𑁄, 𑀪𑀦𑁆𑀢𑁂 𑀓𑀲𑁆𑀲𑀧, 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀓𑀼𑀮𑁂𑀲𑀼 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢𑀁 𑁋 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀫𑀸 𑀧𑀸𑀧𑀺𑀘𑁆𑀙𑀸 𑀧𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼𑀁 [𑀯𑀺𑀦𑀬𑀧𑀺𑀝𑀓𑁂 𑀘𑀽𑀴𑀯𑀕𑁆𑀕𑁂 𑀲𑀁𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀯𑀚𑀺𑀭𑀩𑀼𑀤𑁆𑀥𑀺𑀬𑀁 𑀅𑀜𑁆𑀜𑀣𑀸 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄], 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘. 𑀇𑀫𑁂 𑀔𑁄, 𑀪𑀦𑁆𑀢𑁂 𑀓𑀲𑁆𑀲𑀧, 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀓𑀼𑀮𑁂𑀲𑀼 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺.

‘‘𑀅𑀣 𑀓𑀺𑀜𑁆𑀘𑀭𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺? 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺. 𑀑𑀮𑀼𑀚𑁆𑀚𑀢𑀺 [𑀉𑀮𑁆𑀮𑀼𑀚𑁆𑀚𑀢𑀺 (𑀲𑀻. 𑀅𑀝𑁆𑀞𑀓𑀣𑀸𑀲𑀼 𑀘)] 𑀔𑁄 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀭𑀺𑀲𑀸; 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂, 𑀆𑀯𑀼𑀲𑁄, 𑀦𑀯𑀧𑁆𑀧𑀸𑀬𑀸. 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺.

‘‘𑀅𑀧𑀺 𑀫𑁂, 𑀪𑀦𑁆𑀢𑁂 𑀓𑀲𑁆𑀲𑀧, 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀸𑀦𑀺 𑀚𑀸𑀢𑀸𑀦𑀺. 𑀅𑀣 𑀘 𑀧𑀦 𑀫𑀬𑀁 𑀅𑀚𑁆𑀚𑀸𑀧𑀺 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸’’𑀢𑀺. ‘‘𑀢𑀣𑀸 𑀳𑀺 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺, 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺. 𑀑𑀮𑀼𑀚𑁆𑀚𑀢𑀺 𑀔𑁄 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀭𑀺𑀲𑀸; 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂, 𑀆𑀯𑀼𑀲𑁄, 𑀦𑀯𑀧𑁆𑀧𑀸𑀬𑀸. [𑀧𑀮𑀼𑀚𑁆𑀚𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀆𑀦𑀦𑁆𑀤 𑀧𑀭𑀺𑀲𑀸 (𑀓. 𑀲𑀻.)] 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑁋 ‘‘𑀅𑀬𑁆𑀬𑁂𑀦 𑀓𑀺𑀭 𑀫𑀳𑀸𑀓𑀲𑁆𑀲𑀧𑁂𑀦 𑀅𑀬𑁆𑀬𑁄 𑀆𑀦𑀦𑁆𑀤𑁄 𑀯𑁂𑀤𑁂𑀳𑀫𑀼𑀦𑀺 𑀓𑀼𑀫𑀸𑀭𑀓𑀯𑀸𑀤𑁂𑀦 𑀅𑀧𑀲𑀸𑀤𑀺𑀢𑁄’’𑀢𑀺.

𑀅𑀣 𑀔𑁄 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀦𑀢𑁆𑀢𑀫𑀦𑀸 𑀅𑀦𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑁋 ‘‘𑀓𑀺𑀁 𑀧𑀦 𑀅𑀬𑁆𑀬𑁄 𑀫𑀳𑀸𑀓𑀲𑁆𑀲𑀧𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀲𑀫𑀸𑀦𑁄 𑀅𑀬𑁆𑀬𑀁 𑀆𑀦𑀦𑁆𑀤𑀁 𑀯𑁂𑀤𑁂𑀳𑀫𑀼𑀦𑀺𑀁 𑀓𑀼𑀫𑀸𑀭𑀓𑀯𑀸𑀤𑁂𑀦 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀢𑀻’’𑀢𑀺! 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑀼𑀮𑁆𑀮𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀇𑀫𑀁 𑀯𑀸𑀘𑀁 𑀪𑀸𑀲𑀫𑀸𑀦𑀸𑀬.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀢𑀕𑁆𑀖𑀸𑀯𑀼𑀲𑁄 𑀆𑀦𑀦𑁆𑀤, 𑀣𑀼𑀮𑁆𑀮𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸 𑀯𑀸𑀘𑀸 𑀪𑀸𑀲𑀺𑀢𑀸. 𑀬𑀢𑁆𑀯𑀸𑀳𑀁, 𑀆𑀯𑀼𑀲𑁄, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦𑀸𑀪𑀺𑀚𑀸𑀦𑀸𑀫𑀺 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀺𑀢𑀸 [𑀉𑀤𑁆𑀤𑀺𑀲𑀺𑀢𑀼𑀁 (𑀲𑀻. 𑀧𑀻. 𑀓.)], 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀧𑀼𑀩𑁆𑀩𑁂 𑀫𑁂, 𑀆𑀯𑀼𑀲𑁄, 𑀅𑀕𑀸𑀭𑀺𑀓𑀪𑀽𑀢𑀲𑁆𑀲 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄 [𑀭𑀚𑁄𑀧𑀣𑁄 (𑀲𑀻.)], 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀓𑀸𑀭𑁂𑀢𑁆𑀯𑀸 [𑀓𑀭𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀢𑁂 𑀉𑀤𑁆𑀤𑀺𑀲𑁆𑀲 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀁.

𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀤𑁆𑀤𑀲𑀁 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀩𑀳𑀼𑀧𑀼𑀢𑁆𑀢𑁂 𑀘𑁂𑀢𑀺𑀬𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀲𑀢𑁆𑀣𑀸𑀭𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁; 𑀲𑀼𑀕𑀢𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁; 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁; 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺; 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘𑀬𑁄 𑀔𑁄, 𑀓𑀲𑁆𑀲𑀧, 𑀏𑀯𑀁 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑀁 𑀲𑀸𑀯𑀓𑀁 𑀅𑀚𑀸𑀦𑀜𑁆𑀜𑁂𑀯 𑀯𑀤𑁂𑀬𑁆𑀬 𑀚𑀸𑀦𑀸𑀫𑀻𑀢𑀺, 𑀅𑀧𑀲𑁆𑀲𑀜𑁆𑀜𑁂𑀯 𑀯𑀤𑁂𑀬𑁆𑀬 𑀧𑀲𑁆𑀲𑀸𑀫𑀻𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬. 𑀅𑀳𑀁 𑀔𑁄 𑀧𑀦, 𑀓𑀲𑁆𑀲𑀧, 𑀚𑀸𑀦𑀜𑁆𑀜𑁂𑀯 𑀯𑀤𑀸𑀫𑀺 𑀚𑀸𑀦𑀸𑀫𑀻𑀢𑀺, 𑀧𑀲𑁆𑀲𑀜𑁆𑀜𑁂𑀯 𑀯𑀤𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺.

𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀲𑀩𑁆𑀩𑀁 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀺 𑀦 𑀯𑀺𑀚𑀳𑀺𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

‘‘𑀅𑀣 𑀔𑁄 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑀢𑁆𑀢𑀸𑀳𑀫𑁂𑀯 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀭𑀡𑁄 [𑀲𑀸𑀡𑁄 (𑀲𑀻.)] 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺𑀁’’. 𑀅𑀝𑁆𑀞𑀫𑀺𑀬𑀸 𑀅𑀜𑁆𑀜𑀸 𑀉𑀤𑀧𑀸𑀤𑀺.

‘‘𑀅𑀣 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀦𑀺𑀲𑀻𑀤𑀢𑀼, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. 𑀦𑀺𑀲𑀻𑀤𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁, 𑀓𑀲𑁆𑀲𑀧, 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀻’𑀢𑀺. ‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’𑀢𑀺. ‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺. ‘𑀥𑀸𑀭𑁂𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺. ‘‘𑀲𑁄 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀪𑀕𑀯𑀢𑁄 𑀧𑀸𑀤𑀸𑀲𑀺𑀁. 𑀅𑀳𑀁 𑀧𑀦 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀺 𑀧𑀝𑀺𑀧𑀚𑁆𑀚𑀺𑀁’’.

‘‘𑀬𑀜𑁆𑀳𑀺 𑀢𑀁, 𑀆𑀯𑀼𑀲𑁄, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀪𑀕𑀯𑀢𑁄 𑀧𑀼𑀢𑁆𑀢𑁄 𑀑𑀭𑀲𑁄 𑀫𑀼𑀔𑀢𑁄 𑀚𑀸𑀢𑁄 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄 𑀥𑀫𑁆𑀫𑀤𑀸𑀬𑀸𑀤𑁄, 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 [𑀧𑀝𑀺𑀕𑁆𑀕𑀳𑁂𑀢𑀸 (𑀲𑀻.)] 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺, 𑀫𑀫𑀁 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀪𑀕𑀯𑀢𑁄 𑀧𑀼𑀢𑁆𑀢𑁄 𑀑𑀭𑀲𑁄 𑀫𑀼𑀔𑀢𑁄 𑀚𑀸𑀢𑁄 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄 𑀥𑀫𑁆𑀫𑀤𑀸𑀬𑀸𑀤𑁄, 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’’’𑀢𑀺.

‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀁 𑀔𑁄, 𑀆𑀯𑀼𑀲𑁄, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺…𑀧𑁂… (𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀅𑀪𑀺𑀜𑁆𑀜𑀸𑀦𑀁 𑀏𑀯𑀁 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄).

‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀲𑀢𑁆𑀢𑀭𑀢𑀦𑀁 𑀯𑀸, 𑀆𑀯𑀼𑀲𑁄, 𑀦𑀸𑀕𑀁 𑀅𑀟𑁆𑀠𑀝𑁆𑀞𑀫𑀭𑀢𑀦𑀁 𑀯𑀸 𑀢𑀸𑀮𑀧𑀢𑁆𑀢𑀺𑀓𑀸𑀬 𑀙𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀬𑁄 𑀫𑁂 𑀙 𑀅𑀪𑀺𑀜𑁆𑀜𑀸 𑀙𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺.

𑀘𑀯𑀺𑀢𑁆𑀣 𑀘 𑀧𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀩𑁆𑀭𑀳𑁆𑀫𑀘𑀭𑀺𑀬𑀫𑁆𑀳𑀸𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀧𑀭𑀁𑀫𑀭𑀡𑀲𑀼𑀢𑁆𑀢𑀁

𑁧𑁫𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀓𑀲𑁆𑀲𑀧, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀯𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀦𑁂𑀯 𑀳𑁄𑀢𑀺, 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀯𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀲𑁆𑀫𑀸 𑀘𑁂𑀢𑀁, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀦 𑀳𑁂𑀢𑀁, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢𑀁 𑀦𑀸𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺.

‘‘𑀅𑀣 𑀓𑀺𑀜𑁆𑀘𑀭𑀳𑀸𑀯𑀼𑀲𑁄, 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀇𑀤𑀁 ‘𑀤𑀼𑀓𑁆𑀔’𑀦𑁆𑀢𑀺 𑀔𑁄, 𑀆𑀯𑀼𑀲𑁄, 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸; 𑀅𑀬𑀁 ‘𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸; 𑀅𑀬𑀁 ‘𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸; 𑀅𑀬𑀁 ‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺. ‘‘𑀓𑀲𑁆𑀫𑀸 𑀘𑁂𑀢𑀁, 𑀆𑀯𑀼𑀲𑁄, 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀏𑀢𑀜𑁆𑀳𑀺, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢𑀁 𑀏𑀢𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀏𑀢𑀁 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀁 𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺. 𑀤𑁆𑀯𑀸𑀤𑀲𑀫𑀁.

𑁧𑁩. 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀲𑀼𑀢𑁆𑀢𑀁

𑁧𑁫𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀧𑀼𑀩𑁆𑀩𑁂 𑀅𑀧𑁆𑀧𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀳𑁂𑀲𑀼𑀁 𑀩𑀳𑀼𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀺𑀁𑀲𑀼? 𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀭𑀳𑀺 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀻’’𑀢𑀺? ‘‘𑀏𑀯𑀜𑁆𑀘𑁂𑀢𑀁, 𑀓𑀲𑁆𑀲𑀧, 𑀳𑁄𑀢𑀺 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀼 𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂, 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑁄𑀦𑁆𑀢𑀺 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀺. 𑀦 𑀢𑀸𑀯, 𑀓𑀲𑁆𑀲𑀧, 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺 𑀬𑀸𑀯 𑀦 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁄 𑀘 𑀔𑁄, 𑀓𑀲𑁆𑀲𑀧, 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀓𑀲𑁆𑀲𑀧, 𑀦 𑀢𑀸𑀯 𑀚𑀸𑀢𑀭𑀽𑀧𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺 𑀬𑀸𑀯 𑀦 𑀚𑀸𑀢𑀭𑀽𑀧𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁄 𑀘 𑀔𑁄, 𑀓𑀲𑁆𑀲𑀧, 𑀚𑀸𑀢𑀭𑀽𑀧𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀚𑀸𑀢𑀭𑀽𑀧𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀓𑀲𑁆𑀲𑀧, 𑀦 𑀢𑀸𑀯 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺 𑀬𑀸𑀯 𑀦 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁄 𑀘 𑀔𑁄, 𑀓𑀲𑁆𑀲𑀧, 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺.

‘‘𑀦 𑀔𑁄, 𑀓𑀲𑁆𑀲𑀧, 𑀧𑀣𑀯𑀻𑀥𑀸𑀢𑀼 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀦 𑀆𑀧𑁄𑀥𑀸𑀢𑀼 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀦 𑀢𑁂𑀚𑁄𑀥𑀸𑀢𑀼 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀦 𑀯𑀸𑀬𑁄𑀥𑀸𑀢𑀼 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀢𑀺; 𑀅𑀣 𑀔𑁄 𑀇𑀥𑁂𑀯 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑁄𑀖𑀧𑀼𑀭𑀺𑀲𑀸 𑀬𑁂 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀓𑀲𑁆𑀲𑀧, 𑀦𑀸𑀯𑀸 𑀆𑀤𑀺𑀓𑁂𑀦𑁂𑀯 𑀑𑀧𑀺𑀮𑀯𑀢𑀺; 𑀦 𑀔𑁄, 𑀓𑀲𑁆𑀲𑀧, 𑀏𑀯𑀁 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺.

‘‘𑀧𑀜𑁆𑀘 𑀔𑁄𑀫𑁂, 𑀓𑀲𑁆𑀲𑀧, 𑀑𑀓𑁆𑀓𑀫𑀦𑀺𑀬𑀸 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀲𑀫𑁆𑀫𑁄𑀲𑀸𑀬 𑀅𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀓𑀲𑁆𑀲𑀧, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸, 𑀲𑀫𑀸𑀥𑀺𑀲𑁆𑀫𑀺𑀁 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸 𑁋 𑀇𑀫𑁂 𑀔𑁄, 𑀓𑀲𑁆𑀲𑀧, 𑀧𑀜𑁆𑀘 𑀑𑀓𑁆𑀓𑀫𑀦𑀺𑀬𑀸 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀲𑀫𑁆𑀫𑁄𑀲𑀸𑀬 𑀅𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀧𑀜𑁆𑀘 𑀔𑁄𑀫𑁂, 𑀓𑀲𑁆𑀲𑀧, 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀓𑀲𑁆𑀲𑀧, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀣𑀭𑀺 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀥𑀫𑁆𑀫𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀗𑁆𑀖𑁂 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀲𑀧𑁆𑀧𑀢𑀺𑀲𑁆𑀲𑀸 𑁋 𑀇𑀫𑁂 𑀔𑁄, 𑀓𑀲𑁆𑀲𑀧, 𑀧𑀜𑁆𑀘 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀢𑁂𑀭𑀲𑀫𑀁.

𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.