𑁪. 𑀔𑀻𑀭𑀲𑀼𑀢𑁆𑀢𑀁

𑁧𑁨𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺? ‘‘𑀬𑀣𑀸 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁 𑀬𑀁 𑀦𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀲𑀸𑀥𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀏𑀢𑀤𑁂𑀯, 𑀪𑀺𑀓𑁆𑀔𑀯𑁂, 𑀩𑀳𑀼𑀢𑀭𑀁 𑀬𑀁 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀘𑀢𑀼𑀢𑁆𑀣𑀁.