𑁪. 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀺𑀡𑀓𑀝𑁆𑀞𑀲𑀼𑀢𑁆𑀢𑀁

𑁧𑁨𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁 [𑀅𑀦𑀫𑀢𑀕𑁆𑀕𑀸𑀬𑀁 (𑀧𑀻. 𑀓.)] 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀬𑀁 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀢𑀁 𑀙𑁂𑀢𑁆𑀯𑀸 [𑀢𑀘𑁆𑀙𑁂𑀢𑁆𑀯𑀸 (𑀩𑀳𑀽𑀲𑀼)] 𑀏𑀓𑀚𑁆𑀛𑀁 𑀲𑀁𑀳𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀁 𑀘𑀢𑀼𑀭𑀗𑁆𑀕𑀼𑀮𑀁 𑀖𑀝𑀺𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑁂𑀬𑁆𑀬 𑁋 ‘𑀅𑀬𑀁 𑀫𑁂 𑀫𑀸𑀢𑀸, 𑀢𑀲𑁆𑀲𑀸 𑀫𑁂 𑀫𑀸𑀢𑀼 𑀅𑀬𑀁 𑀫𑀸𑀢𑀸’𑀢𑀺, 𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀯 [𑀅𑀧𑀭𑀺𑀬𑀸𑀤𑀺𑀡𑁆𑀡𑀸𑀯 (𑀲𑀻.)] 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀫𑀸𑀢𑀭𑁄 𑀅𑀲𑁆𑀲𑀼, 𑀅𑀣 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀓𑀝𑀲𑀻 [𑀓𑀝𑀲𑀺 (𑀲𑀻. 𑀧𑀻. 𑀓.) 𑀓𑀝𑀸 𑀙𑀯𑀸 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀝𑀲𑀻] 𑀯𑀟𑁆𑀠𑀺𑀢𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀧𑀞𑀫𑀁.

𑁨. 𑀧𑀣𑀯𑀻𑀲𑀼𑀢𑁆𑀢𑀁

𑁧𑁨𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀓𑁄𑀮𑀝𑁆𑀞𑀺𑀫𑀢𑁆𑀢𑀁 𑀓𑁄𑀮𑀝𑁆𑀞𑀺𑀫𑀢𑁆𑀢𑀁 𑀫𑀢𑁆𑀢𑀺𑀓𑀸𑀕𑀼𑀴𑀺𑀓𑀁 𑀓𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑁂𑀬𑁆𑀬 𑁋 ‘𑀅𑀬𑀁 𑀫𑁂 𑀧𑀺𑀢𑀸, 𑀢𑀲𑁆𑀲 𑀫𑁂 𑀧𑀺𑀢𑀼 𑀅𑀬𑀁 𑀧𑀺𑀢𑀸’𑀢𑀺, 𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀯 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀺𑀢𑀼𑀧𑀺𑀢𑀭𑁄 𑀅𑀲𑁆𑀲𑀼, 𑀅𑀣𑀸𑀬𑀁 𑀫𑀳𑀸𑀧𑀣𑀯𑀻 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀓𑀝𑀲𑀻 𑀯𑀟𑁆𑀠𑀺𑀢𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀅𑀲𑁆𑀲𑀼𑀲𑀼𑀢𑁆𑀢𑀁

𑁧𑁨𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 [𑀭𑀼𑀤𑀦𑁆𑀢𑀸𑀦𑀁 (𑀲𑀻.)] 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 [𑀧𑀲𑁆𑀲𑀦𑁆𑀤𑀁 (𑀓. 𑀲𑀻.), 𑀧𑀲𑀦𑁆𑀤𑀁 (𑀲𑁆𑀬𑀸. 𑀓𑀁.), 𑀧𑀲𑀦𑁆𑀦𑀁 (𑀧𑀻. 𑀓.)] 𑀧𑀕𑁆𑀖𑀭𑀺𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺? ‘‘𑀬𑀣𑀸 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁 𑀬𑀁 𑀦𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀲𑀸𑀥𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀏𑀢𑀤𑁂𑀯, 𑀪𑀺𑀓𑁆𑀔𑀯𑁂, 𑀩𑀳𑀼𑀢𑀭𑀁 𑀬𑀁 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁; 𑀢𑁂𑀲𑀁 𑀯𑀸 𑀫𑀸𑀢𑀼𑀫𑀭𑀡𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀺𑀢𑀼𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁 …𑀧𑁂… 𑀪𑀸𑀢𑀼𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁… 𑀪𑀕𑀺𑀦𑀺𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁… 𑀧𑀼𑀢𑁆𑀢𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁… 𑀥𑀻𑀢𑀼𑀫𑀭𑀡𑀁 𑀧𑀘𑁆𑀘𑀦𑀼𑀪𑀽𑀢𑀁… 𑀜𑀸𑀢𑀺𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁… 𑀪𑁄𑀕𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀭𑁄𑀕𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀢𑁂𑀲𑀁 𑀯𑁄 𑀭𑁄𑀕𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄 …𑀧𑁂… 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀔𑀻𑀭𑀲𑀼𑀢𑁆𑀢𑀁

𑁧𑁨𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺? ‘‘𑀬𑀣𑀸 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁 𑀬𑀁 𑀦𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀲𑀸𑀥𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀏𑀢𑀤𑁂𑀯, 𑀪𑀺𑀓𑁆𑀔𑀯𑁂, 𑀩𑀳𑀼𑀢𑀭𑀁 𑀬𑀁 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀫𑀸𑀢𑀼𑀣𑀜𑁆𑀜𑀁 𑀧𑀻𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀩𑁆𑀩𑀢𑀲𑀼𑀢𑁆𑀢𑀁

𑁧𑁨𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀆𑀭𑀸𑀫𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀯𑀤𑀻𑀖𑁄 𑀦𑀼 𑀔𑁄, 𑀪𑀦𑁆𑀢𑁂, 𑀓𑀧𑁆𑀧𑁄’’𑀢𑀺? ‘‘𑀤𑀻𑀖𑁄 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄. 𑀲𑁄 𑀦 𑀲𑀼𑀓𑀭𑁄 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺.

‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀫𑀳𑀸𑀲𑁂𑀮𑁄 𑀧𑀩𑁆𑀩𑀢𑁄 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦 𑀅𑀘𑁆𑀙𑀺𑀦𑁆𑀦𑁄 𑀅𑀲𑀼𑀲𑀺𑀭𑁄 𑀏𑀓𑀕𑁆𑀖𑀦𑁄. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀓𑀸𑀲𑀺𑀓𑁂𑀦 𑀯𑀢𑁆𑀣𑁂𑀦 𑀲𑀓𑀺𑀁 𑀲𑀓𑀺𑀁 𑀧𑀭𑀺𑀫𑀚𑁆𑀚𑁂𑀬𑁆𑀬. 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀼, 𑀫𑀳𑀸𑀲𑁂𑀮𑁄 𑀧𑀩𑁆𑀩𑀢𑁄 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀓𑀧𑁆𑀧𑁄. 𑀏𑀯𑀁 𑀤𑀻𑀖𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄. 𑀏𑀯𑀁 𑀤𑀻𑀖𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑀸𑀦𑀁 𑀦𑁂𑀓𑁄 𑀓𑀧𑁆𑀧𑁄 𑀲𑀁𑀲𑀺𑀢𑁄, 𑀦𑁂𑀓𑀁 𑀓𑀧𑁆𑀧𑀲𑀢𑀁 𑀲𑀁𑀲𑀺𑀢𑀁, 𑀦𑁂𑀓𑀁 𑀓𑀧𑁆𑀧𑀲𑀳𑀲𑁆𑀲𑀁 𑀲𑀁𑀲𑀺𑀢𑀁, 𑀦𑁂𑀓𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀲𑀁𑀲𑀺𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀼, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺…𑀧𑁂… 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀼, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀲𑀸𑀲𑀧𑀲𑀼𑀢𑁆𑀢𑀁

𑁧𑁨𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀯𑀤𑀻𑀖𑁄, 𑀦𑀼 𑀔𑁄, 𑀪𑀦𑁆𑀢𑁂, 𑀓𑀧𑁆𑀧𑁄’’𑀢𑀺? ‘‘𑀤𑀻𑀖𑁄 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄. 𑀲𑁄 𑀦 𑀲𑀼𑀓𑀭𑁄 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀇𑀢𑀺 𑀯𑀸…𑀧𑁂… 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺.

‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀆𑀬𑀲𑀁 𑀦𑀕𑀭𑀁 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀧𑀼𑀡𑁆𑀡𑀁 𑀲𑀸𑀲𑀧𑀸𑀦𑀁 𑀕𑀼𑀴𑀺𑀓𑀸𑀩𑀤𑁆𑀥𑀁 [𑀘𑀽𑀴𑀺𑀓𑀸𑀩𑀤𑁆𑀥𑀁 (𑀲𑀻. 𑀧𑀻.)]. 𑀢𑀢𑁄 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀲𑀸𑀲𑀧𑀁 𑀉𑀤𑁆𑀥𑀭𑁂𑀬𑁆𑀬. 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀼 𑀫𑀳𑀸𑀲𑀸𑀲𑀧𑀭𑀸𑀲𑀺 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀓𑀧𑁆𑀧𑁄. 𑀏𑀯𑀁 𑀤𑀻𑀖𑁄 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄. 𑀏𑀯𑀁 𑀤𑀻𑀖𑀸𑀦𑀁 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑀸𑀦𑀁 𑀦𑁂𑀓𑁄 𑀓𑀧𑁆𑀧𑁄 𑀲𑀁𑀲𑀺𑀢𑁄, 𑀦𑁂𑀓𑀁 𑀓𑀧𑁆𑀧𑀲𑀢𑀁 𑀲𑀁𑀲𑀺𑀢𑀁, 𑀦𑁂𑀓𑀁 𑀓𑀧𑁆𑀧𑀲𑀳𑀲𑁆𑀲𑀁 𑀲𑀁𑀲𑀺𑀢𑀁, 𑀦𑁂𑀓𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀲𑀁𑀲𑀺𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀼, 𑀲𑀁𑀲𑀸𑀭𑁄 …𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀸𑀯𑀓𑀲𑀼𑀢𑁆𑀢𑀁

𑁧𑁩𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀻𑀯𑀩𑀳𑀼𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀩𑀳𑀼𑀓𑀸 𑀔𑁄, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 𑁋 ‘𑀏𑀢𑁆𑀢𑀓𑀸 𑀓𑀧𑁆𑀧𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’’𑀢𑀺.

‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀪𑀺𑀓𑁆𑀔𑀯𑁂’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀇𑀥𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀲𑀸𑀯𑀓𑀸 𑀯𑀲𑁆𑀲𑀲𑀢𑀸𑀬𑀼𑀓𑀸 𑀯𑀲𑁆𑀲𑀲𑀢𑀚𑀻𑀯𑀺𑀦𑁄. 𑀢𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀁. 𑀅𑀦𑀦𑀼𑀲𑁆𑀲𑀭𑀺𑀢𑀸𑀯 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀓𑀧𑁆𑀧𑀸 𑀅𑀲𑁆𑀲𑀼, 𑀅𑀣 𑀔𑁄 𑀢𑁂 𑀘𑀢𑁆𑀢𑀸𑀭𑁄 𑀲𑀸𑀯𑀓𑀸 𑀯𑀲𑁆𑀲𑀲𑀢𑀸𑀬𑀼𑀓𑀸 𑀯𑀲𑁆𑀲𑀲𑀢𑀚𑀻𑀯𑀺𑀦𑁄 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀓𑀸𑀮𑀁 𑀓𑀭𑁂𑀬𑁆𑀬𑀼𑀁. 𑀏𑀯𑀁 𑀩𑀳𑀼𑀓𑀸 𑀔𑁄, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 𑁋 ‘𑀏𑀢𑁆𑀢𑀓𑀸 𑀓𑀧𑁆𑀧𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀕𑀗𑁆𑀕𑀸𑀲𑀼𑀢𑁆𑀢𑀁

𑁧𑁩𑁧. 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀯𑀩𑀳𑀼𑀓𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀩𑀳𑀼𑀓𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 𑁋 ‘𑀏𑀢𑁆𑀢𑀓𑀸 𑀓𑀧𑁆𑀧𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’’𑀢𑀺.

‘‘𑀲𑀓𑁆𑀓𑀸 𑀧𑀦, 𑀪𑁄 𑀕𑁄𑀢𑀫, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀬𑀢𑁄 𑀘𑀸𑀬𑀁 𑀕𑀗𑁆𑀕𑀸 𑀦𑀤𑀻 𑀧𑀪𑀯𑀢𑀺 𑀬𑀢𑁆𑀣 𑀘 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀢𑀺, 𑀬𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀯𑀸𑀮𑀺𑀓𑀸 𑀲𑀸 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 𑁋 ‘𑀏𑀢𑁆𑀢𑀓𑀸 𑀯𑀸𑀮𑀺𑀓𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀺𑀓𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀺𑀓𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀺𑀓𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’𑀢𑀺. 𑀢𑀢𑁄 𑀩𑀳𑀼𑀢𑀭𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 𑁋 ‘𑀏𑀢𑁆𑀢𑀓𑀸 𑀓𑀧𑁆𑀧𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀩𑁆𑀭𑀸𑀳𑁆𑀫𑀡, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀓𑀝𑀲𑀻 𑀯𑀟𑁆𑀠𑀺𑀢𑀸. 𑀬𑀸𑀯𑀜𑁆𑀘𑀺𑀤𑀁, 𑀩𑁆𑀭𑀸𑀳𑁆𑀫𑀡, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀤𑀡𑁆𑀟𑀲𑀼𑀢𑁆𑀢𑀁

𑁧𑁩𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀡𑁆𑀟𑁄 𑀉𑀧𑀭𑀺𑀯𑁂𑀳𑀸𑀲𑀁 𑀔𑀺𑀢𑁆𑀢𑁄 𑀲𑀓𑀺𑀫𑁆𑀧𑀺 𑀫𑀽𑀮𑁂𑀦 𑀦𑀺𑀧𑀢𑀢𑀺, 𑀲𑀓𑀺𑀫𑁆𑀧𑀺 𑀫𑀚𑁆𑀛𑁂𑀦 𑀦𑀺𑀧𑀢𑀢𑀺, 𑀲𑀓𑀺𑀫𑁆𑀧𑀺 𑀅𑀦𑁆𑀢𑁂𑀦 𑀦𑀺𑀧𑀢𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀲𑀢𑁆𑀢𑀸 𑀢𑀡𑁆𑀳𑀸𑀲𑀁𑀬𑁄𑀚𑀦𑀸 𑀲𑀦𑁆𑀥𑀸𑀯𑀦𑁆𑀢𑀸 𑀲𑀁𑀲𑀭𑀦𑁆𑀢𑀸 𑀲𑀓𑀺𑀫𑁆𑀧𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀦𑁆𑀢𑀺, 𑀲𑀓𑀺𑀫𑁆𑀧𑀺 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁧𑁩𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀏𑀓𑀧𑀼𑀕𑁆𑀕𑀮𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀁 𑀲𑀦𑁆𑀥𑀸𑀯𑀢𑁄 𑀲𑀁𑀲𑀭𑀢𑁄 𑀲𑀺𑀬𑀸 𑀏𑀯𑀁 𑀫𑀳𑀸 𑀅𑀝𑁆𑀞𑀺𑀓𑀗𑁆𑀓𑀮𑁄 𑀅𑀝𑁆𑀞𑀺𑀧𑀼𑀜𑁆𑀚𑁄 𑀅𑀝𑁆𑀞𑀺𑀭𑀸𑀲𑀺 𑀬𑀣𑀸𑀬𑀁 𑀯𑁂𑀧𑀼𑀮𑁆𑀮𑁄 𑀧𑀩𑁆𑀩𑀢𑁄, 𑀲𑀘𑁂 𑀲𑀁𑀳𑀸𑀭𑀓𑁄 𑀅𑀲𑁆𑀲, 𑀲𑀫𑁆𑀪𑀢𑀜𑁆𑀘 𑀦 𑀯𑀺𑀦𑀲𑁆𑀲𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀏𑀓𑀲𑁆𑀲𑁂𑀓𑁂𑀦 𑀓𑀧𑁆𑀧𑁂𑀦, 𑀧𑀼𑀕𑁆𑀕𑀮𑀲𑁆𑀲𑀝𑁆𑀞𑀺𑀲𑀜𑁆𑀘𑀬𑁄;

𑀲𑀺𑀬𑀸 𑀧𑀩𑁆𑀩𑀢𑀲𑀫𑁄 𑀭𑀸𑀲𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

‘‘𑀲𑁄 𑀔𑁄 𑀧𑀦𑀸𑀬𑀁 𑀅𑀓𑁆𑀔𑀸𑀢𑁄, 𑀯𑁂𑀧𑀼𑀮𑁆𑀮𑁄 𑀧𑀩𑁆𑀩𑀢𑁄 𑀫𑀳𑀸;

𑀉𑀢𑁆𑀢𑀭𑁄 𑀕𑀺𑀚𑁆𑀛𑀓𑀽𑀝𑀲𑁆𑀲, 𑀫𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑁂.

‘‘𑀬𑀢𑁄 𑀘 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

‘‘𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁𑀧𑀭𑀫𑀁, 𑀲𑀦𑁆𑀥𑀸𑀯𑀺𑀢𑁆𑀯𑀸𑀦 𑀧𑀼𑀕𑁆𑀕𑀮𑁄;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀸’’𑀢𑀺. 𑀤𑀲𑀫𑀁;

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀢𑀺𑀡𑀓𑀝𑁆𑀞𑀜𑁆𑀘 𑀧𑀣𑀯𑀻, 𑀅𑀲𑁆𑀲𑀼 𑀔𑀻𑀭𑀜𑁆𑀘 𑀧𑀩𑁆𑀩𑀢𑀁;

𑀲𑀸𑀲𑀧𑀸 𑀲𑀸𑀯𑀓𑀸 𑀕𑀗𑁆𑀕𑀸, 𑀤𑀡𑁆𑀟𑁄 𑀘 𑀧𑀼𑀕𑁆𑀕𑀮𑁂𑀦 𑀘𑀸𑀢𑀺.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀤𑀼𑀕𑁆𑀕𑀢𑀲𑀼𑀢𑁆𑀢𑀁

𑁧𑁩𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀼 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀬𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑁂𑀬𑁆𑀬𑀸𑀣 𑀤𑀼𑀕𑁆𑀕𑀢𑀁 𑀤𑀼𑀭𑀽𑀧𑁂𑀢𑀁 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀫𑁆𑀳𑁂𑀳𑀺𑀧𑀺 𑀏𑀯𑀭𑀽𑀧𑀁 𑀧𑀘𑁆𑀘𑀦𑀼𑀪𑀽𑀢𑀁 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼…𑀧𑁂… 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀧𑀞𑀫𑀁.

𑁨. 𑀲𑀼𑀔𑀺𑀢𑀲𑀼𑀢𑁆𑀢𑀁

𑁧𑁩𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀬𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑁂𑀬𑁆𑀬𑀸𑀣 𑀲𑀼𑀔𑀺𑀢𑀁 𑀲𑀼𑀲𑀚𑁆𑀚𑀺𑀢𑀁, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀫𑁆𑀳𑁂𑀳𑀺𑀧𑀺 𑀏𑀯𑀭𑀽𑀧𑀁 𑀧𑀘𑁆𑀘𑀦𑀼𑀪𑀽𑀢𑀁 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀢𑀺𑀁𑀲𑀫𑀢𑁆𑀢𑀲𑀼𑀢𑁆𑀢𑀁

𑁧𑁩𑁬. 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 [𑀧𑀸𑀞𑁂𑀬𑁆𑀬𑀓𑀸 (𑀓𑀢𑁆𑀣𑀘𑀺) 𑀯𑀺𑀦𑀬𑀧𑀺𑀝𑀓𑁂 𑀫𑀳𑀸𑀯𑀕𑁆𑀕𑁂 𑀓𑀣𑀺𑀦𑀓𑁆𑀔𑀦𑁆𑀥𑀓𑁂𑀧𑀺] 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸 𑀲𑀩𑁆𑀩𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸 𑀲𑀩𑁆𑀩𑁂 𑀢𑁂𑀘𑀻𑀯𑀭𑀺𑀓𑀸 𑀲𑀩𑁆𑀩𑁂 𑀲𑀲𑀁𑀬𑁄𑀚𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸 𑀲𑀩𑁆𑀩𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸 𑀲𑀩𑁆𑀩𑁂 𑀢𑁂𑀘𑀻𑀯𑀭𑀺𑀓𑀸 𑀲𑀩𑁆𑀩𑁂 𑀲𑀲𑀁𑀬𑁄𑀚𑀦𑀸. 𑀬𑀁𑀦𑀽𑀦𑀸𑀳𑀁 𑀇𑀫𑁂𑀲𑀁 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁 𑀬𑀣𑀸 𑀦𑁂𑀲𑀁 𑀇𑀫𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺? ‘‘𑀬𑀣𑀸 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁, 𑀬𑀁 𑀦𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀲𑀸𑀥𑀼 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀏𑀢𑀤𑁂𑀯, 𑀪𑀺𑀓𑁆𑀔𑀯𑁂, 𑀩𑀳𑀼𑀢𑀭𑀁, 𑀬𑀁 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀕𑀼𑀦𑁆𑀦𑀁 𑀲𑀢𑀁 𑀕𑁄𑀪𑀽𑀢𑀸𑀦𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀫𑀳𑀺𑀁𑀲𑀸𑀦𑀁 [𑀫𑀳𑀺𑀲𑀸𑀦𑀁 (𑀲𑀻. 𑀧𑀻.)] 𑀲𑀢𑀁 𑀫𑀳𑀺𑀁𑀲𑀪𑀽𑀢𑀸𑀦𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁 …𑀧𑁂… 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀉𑀭𑀩𑁆𑀪𑀸𑀦𑀁 𑀲𑀢𑀁 𑀉𑀭𑀩𑁆𑀪𑀪𑀽𑀢𑀸𑀦𑀁…𑀧𑁂… 𑀅𑀚𑀸𑀦𑀁 𑀲𑀢𑀁 𑀅𑀚𑀪𑀽𑀢𑀸𑀦𑀁… 𑀫𑀺𑀕𑀸𑀦𑀁 𑀲𑀢𑀁 𑀫𑀺𑀕𑀪𑀽𑀢𑀸𑀦𑀁… 𑀓𑀼𑀓𑁆𑀓𑀼𑀝𑀸𑀦𑀁 𑀲𑀢𑀁 𑀓𑀼𑀓𑁆𑀓𑀼𑀝𑀪𑀽𑀢𑀸𑀦𑀁… 𑀲𑀽𑀓𑀭𑀸𑀦𑀁 𑀲𑀢𑀁 𑀲𑀽𑀓𑀭𑀪𑀽𑀢𑀸𑀦𑀁… 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀘𑁄𑀭𑀸 𑀕𑀸𑀫𑀖𑀸𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀘𑁄𑀭𑀸 𑀧𑀸𑀭𑀺𑀧𑀦𑁆𑀣𑀺𑀓𑀸𑀢𑀺 𑀕𑀳𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁. 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀘𑁄𑀭𑀸 𑀧𑀸𑀭𑀤𑀸𑀭𑀺𑀓𑀸𑀢𑀺 𑀕𑀳𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀦 𑀢𑁆𑀯𑁂𑀯 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺.

‘‘𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀢𑀺𑀁𑀲𑀫𑀢𑁆𑀢𑀸𑀦𑀁 𑀧𑀸𑀯𑁂𑀬𑁆𑀬𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽’’𑀢𑀺. 𑀢𑀢𑀺𑀬𑀁.

𑁪. 𑀫𑀸𑀢𑀼𑀲𑀼𑀢𑁆𑀢𑀁

𑁧𑁩𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦𑀫𑀸𑀢𑀸𑀪𑀽𑀢𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀺𑀢𑀼𑀲𑀼𑀢𑁆𑀢𑀁

𑁧𑁩𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄…𑀧𑁂… 𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦𑀧𑀺𑀢𑀸𑀪𑀽𑀢𑀧𑀼𑀩𑁆𑀩𑁄 …𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀪𑀸𑀢𑀼𑀲𑀼𑀢𑁆𑀢𑀁

𑁧𑁩𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦𑀪𑀸𑀢𑀸𑀪𑀽𑀢𑀧𑀼𑀩𑁆𑀩𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀪𑀕𑀺𑀦𑀺𑀲𑀼𑀢𑁆𑀢𑀁

𑁧𑁪𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦𑀪𑀕𑀺𑀦𑀺𑀪𑀽𑀢𑀧𑀼𑀩𑁆𑀩𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀧𑀼𑀢𑁆𑀢𑀲𑀼𑀢𑁆𑀢𑀁

𑁧𑁪𑁧. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦𑀧𑀼𑀢𑁆𑀢𑀪𑀽𑀢𑀧𑀼𑀩𑁆𑀩𑁄…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀥𑀻𑀢𑀼𑀲𑀼𑀢𑁆𑀢𑀁

𑁧𑁪𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄 𑀬𑁄 𑀦 𑀥𑀻𑀢𑀸𑀪𑀽𑀢𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀓𑀝𑀲𑀻 𑀯𑀟𑁆𑀠𑀺𑀢𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀲𑀼𑀢𑁆𑀢𑀁

𑁧𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀯𑁂𑀧𑀼𑀮𑁆𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 ‘𑀧𑀸𑀘𑀻𑀦𑀯𑀁𑀲𑁄’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 ‘𑀢𑀺𑀯𑀭𑀸’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀢𑀺𑀯𑀭𑀸𑀦𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀘𑀢𑁆𑀢𑀸𑀭𑀻𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀢𑀺𑀯𑀭𑀸, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀧𑀸𑀘𑀻𑀦𑀯𑀁𑀲𑀁 𑀧𑀩𑁆𑀩𑀢𑀁 𑀘𑀢𑀽𑀳𑁂𑀦 𑀆𑀭𑁄𑀳𑀦𑁆𑀢𑀺, 𑀘𑀢𑀽𑀳𑁂𑀦 𑀑𑀭𑁄𑀳𑀦𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀥𑀼𑀭𑀲𑀜𑁆𑀚𑀻𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀲𑀸 𑀘𑁂𑀯𑀺𑀫𑀲𑁆𑀲 𑀧𑀩𑁆𑀩𑀢𑀲𑁆𑀲 𑀲𑀫𑀜𑁆𑀜𑀸 𑀅𑀦𑁆𑀢𑀭𑀳𑀺𑀢𑀸, 𑀢𑁂 𑀘 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀢𑀸, 𑀲𑁄 𑀘 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀤𑁆𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀯𑁂𑀧𑀼𑀮𑁆𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 ‘𑀯𑀗𑁆𑀓𑀓𑁄’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 ‘𑀭𑁄𑀳𑀺𑀢𑀲𑁆𑀲𑀸’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀭𑁄𑀳𑀺𑀢𑀲𑁆𑀲𑀸𑀦𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀭𑁄𑀳𑀺𑀢𑀲𑁆𑀲𑀸, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀯𑀗𑁆𑀓𑀓𑀁 𑀧𑀩𑁆𑀩𑀢𑀁 𑀢𑀻𑀳𑁂𑀦 𑀆𑀭𑁄𑀳𑀦𑁆𑀢𑀺, 𑀢𑀻𑀳𑁂𑀦 𑀑𑀭𑁄𑀳𑀦𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀲𑀼𑀢𑁆𑀢𑀭𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀲𑀸 𑀘𑁂𑀯𑀺𑀫𑀲𑁆𑀲 𑀧𑀩𑁆𑀩𑀢𑀲𑁆𑀲 𑀲𑀫𑀜𑁆𑀜𑀸 𑀅𑀦𑁆𑀢𑀭𑀳𑀺𑀢𑀸, 𑀢𑁂 𑀘 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀢𑀸, 𑀲𑁄 𑀘 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀯𑁂𑀧𑀼𑀮𑁆𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 ‘𑀲𑀼𑀧𑀲𑁆𑀲𑁄’𑀢𑁆𑀯𑁂𑀯 [𑀲𑀼𑀨𑀲𑁆𑀲𑁄𑀢𑁆𑀯𑁂𑀯 (𑀲𑀻.)] 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 ‘𑀲𑀼𑀧𑁆𑀧𑀺𑀬𑀸’𑀢𑁆𑀯𑁂𑀯 [𑀅𑀧𑁆𑀧𑀺𑀬𑀸𑀢𑁆𑀯𑁂𑀯 (𑀲𑀻.)] 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀲𑀼𑀧𑁆𑀧𑀺𑀬𑀸𑀦𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀲𑀼𑀧𑁆𑀧𑀺𑀬𑀸, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀲𑀼𑀧𑀲𑁆𑀲𑀁 𑀧𑀩𑁆𑀩𑀢𑀁 𑀤𑁆𑀯𑀻𑀳𑁂𑀦 𑀆𑀭𑁄𑀳𑀦𑁆𑀢𑀺, 𑀤𑁆𑀯𑀻𑀳𑁂𑀦 𑀑𑀭𑁄𑀳𑀦𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀺𑀲𑁆𑀲𑀪𑀸𑀭𑀤𑁆𑀯𑀸𑀚𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀲𑀸 𑀘𑁂𑀯𑀺𑀫𑀲𑁆𑀲 𑀧𑀩𑁆𑀩𑀢𑀲𑁆𑀲 𑀲𑀫𑀜𑁆𑀜𑀸 𑀅𑀦𑁆𑀢𑀭𑀳𑀺𑀢𑀸, 𑀢𑁂 𑀘 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀢𑀸, 𑀲𑁄 𑀘 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀤𑁆𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸…𑀧𑁂… 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀏𑀢𑀭𑀳𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀯𑁂𑀧𑀼𑀮𑁆𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 ‘𑀯𑁂𑀧𑀼𑀮𑁆𑀮𑁄’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 ‘𑀫𑀸𑀕𑀥𑀓𑀸’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀫𑀸𑀕𑀥𑀓𑀸𑀦𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀆𑀬𑀼𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 [𑀮𑀳𑀼𑀲𑀁 (𑀲𑀻.)]; 𑀬𑁄 𑀘𑀺𑀭𑀁 𑀚𑀻𑀯𑀢𑀺 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀫𑀸𑀕𑀥𑀓𑀸, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀯𑁂𑀧𑀼𑀮𑁆𑀮𑀁 𑀧𑀩𑁆𑀩𑀢𑀁 𑀫𑀼𑀳𑀼𑀢𑁆𑀢𑁂𑀦 𑀆𑀭𑁄𑀳𑀦𑁆𑀢𑀺 𑀫𑀼𑀳𑀼𑀢𑁆𑀢𑁂𑀦 𑀑𑀭𑁄𑀳𑀦𑁆𑀢𑀺. 𑀏𑀢𑀭𑀳𑀺 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄. 𑀫𑀬𑁆𑀳𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀪𑀯𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀲𑀫𑀬𑁄 𑀬𑀸 𑀅𑀬𑀜𑁆𑀘𑁂𑀯𑀺𑀫𑀲𑁆𑀲 𑀧𑀩𑁆𑀩𑀢𑀲𑁆𑀲 𑀲𑀫𑀜𑁆𑀜𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀇𑀫𑁂 𑀘 𑀫𑀦𑀼𑀲𑁆𑀲𑀸 𑀓𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀤𑁆𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀧𑀸𑀘𑀻𑀦𑀯𑀁𑀲𑁄 𑀢𑀺𑀯𑀭𑀸𑀦𑀁, 𑀭𑁄𑀳𑀺𑀢𑀲𑁆𑀲𑀸𑀦 𑀯𑀗𑁆𑀓𑀓𑁄;

𑀲𑀼𑀧𑁆𑀧𑀺𑀬𑀸𑀦𑀁 𑀲𑀼𑀧𑀲𑁆𑀲𑁄𑀢𑀺, 𑀫𑀸𑀕𑀥𑀸𑀦𑀜𑁆𑀘 𑀯𑁂𑀧𑀼𑀮𑁆𑀮𑁄.

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺. 𑀤𑀲𑀫𑀁;

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀼𑀕𑁆𑀕𑀢𑀁 𑀲𑀼𑀔𑀺𑀢𑀜𑁆𑀘𑁂𑀯, 𑀢𑀺𑀁𑀲 𑀫𑀸𑀢𑀸𑀧𑀺𑀢𑁂𑀦 𑀘;

𑀪𑀸𑀢𑀸 𑀪𑀕𑀺𑀦𑀻 𑀧𑀼𑀢𑁆𑀢𑁄 𑀘, 𑀥𑀻𑀢𑀸 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀁.

𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.