𑁩. 𑀤𑀲𑀩𑀮𑀯𑀕𑁆𑀕𑁄

𑁧. 𑀤𑀲𑀩𑀮𑀲𑀼𑀢𑁆𑀢𑀁

𑁨𑁧. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀢𑀽𑀳𑀺 𑀘 𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺 𑁋 𑀇𑀢𑀺 𑀭𑀽𑀧𑀁 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀜𑁆𑀜𑀸 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀗𑁆𑀔𑀸𑀭𑀸 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀤𑀲𑀩𑀮𑀲𑀼𑀢𑁆𑀢𑀁

𑁨𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀢𑀽𑀳𑀺 𑀘 𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀢𑀺 𑁋 ‘𑀇𑀢𑀺 𑀭𑀽𑀧𑀁 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀜𑁆𑀜𑀸 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀗𑁆𑀔𑀸𑀭𑀸 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺; 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺’’’.

‘‘𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀅𑀮𑀫𑁂𑀯 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀯𑀻𑀭𑀺𑀬𑀁 𑀆𑀭𑀪𑀺𑀢𑀼𑀁 𑁋 ‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 [𑀦𑀳𑀸𑀭𑀼 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼, 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 [𑀅𑀯𑀲𑀼𑀲𑁆𑀲𑀢𑀼 𑀫. 𑀦𑀺. 𑁨.𑁧𑁮𑁪] 𑀫𑀁𑀲𑀮𑁄𑀳𑀺𑀢𑀁. 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁, 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀻𑀢𑁄 𑀯𑀺𑀳𑀭𑀢𑀺 𑀯𑁄𑀓𑀺𑀡𑁆𑀡𑁄 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀳𑀦𑁆𑀢𑀜𑁆𑀘 𑀲𑀤𑀢𑁆𑀣𑀁 𑀧𑀭𑀺𑀳𑀸𑀧𑁂𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀔𑀁 𑀯𑀺𑀳𑀭𑀢𑀺 𑀧𑀯𑀺𑀯𑀺𑀢𑁆𑀢𑁄 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀫𑀳𑀦𑁆𑀢𑀜𑁆𑀘 𑀲𑀤𑀢𑁆𑀣𑀁 𑀧𑀭𑀺𑀧𑀽𑀭𑁂𑀢𑀺. 𑀦, 𑀪𑀺𑀓𑁆𑀔𑀯𑁂, 𑀳𑀻𑀦𑁂𑀦 𑀅𑀕𑁆𑀕𑀲𑁆𑀲 𑀧𑀢𑁆𑀢𑀺 𑀳𑁄𑀢𑀺. 𑀅𑀕𑁆𑀕𑁂𑀦 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀲𑁆𑀲 𑀧𑀢𑁆𑀢𑀺 𑀳𑁄𑀢𑀺. 𑀫𑀡𑁆𑀟𑀧𑁂𑀬𑁆𑀬𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀆𑀭𑀪𑀣 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬, 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. ‘𑀏𑀯𑀁 𑀦𑁄 𑀅𑀬𑀁 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸 𑀅𑀯𑀜𑁆𑀛𑀸 𑀪𑀯𑀺𑀲𑁆𑀲𑀢𑀺 𑀲𑀨𑀮𑀸 𑀲𑀉𑀤𑁆𑀭𑀬𑀸. 𑀬𑁂𑀲𑀜𑁆𑀘 [𑀬𑁂𑀲𑀁 (𑀲𑀻. 𑀲𑁆𑀬𑀸. 𑀓𑀁.), 𑀬𑁂𑀲𑀁 𑀳𑀺 (𑀧𑀻. 𑀓.)] 𑀫𑀬𑀁 𑀧𑀭𑀺𑀪𑀼𑀜𑁆𑀚𑀸𑀫 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀢𑁂𑀲𑀁 𑀢𑁂 𑀓𑀸𑀭𑀸 𑀅𑀫𑁆𑀳𑁂𑀲𑀼 𑀫𑀳𑀧𑁆𑀨𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑀁 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼𑀁; 𑀧𑀭𑀢𑁆𑀣𑀁 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼𑀁; 𑀉𑀪𑀬𑀢𑁆𑀣𑀁 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀉𑀧𑀦𑀺𑀲𑀲𑀼𑀢𑁆𑀢𑀁

𑁨𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀚𑀸𑀦𑀢𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺, 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀓𑀺𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺? 𑀇𑀢𑀺 𑀭𑀽𑀧𑀁 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸…𑀧𑁂… 𑀇𑀢𑀺 𑀲𑀜𑁆𑀜𑀸… 𑀇𑀢𑀺 𑀲𑀗𑁆𑀔𑀸𑀭𑀸… 𑀇𑀢𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺’’.

‘‘𑀬𑀫𑁆𑀧𑀺𑀲𑁆𑀲 𑀢𑀁, 𑀪𑀺𑀓𑁆𑀔𑀯𑁂, 𑀔𑀬𑀲𑁆𑀫𑀺𑀁 𑀔𑀬𑁂𑀜𑁆𑀜𑀸𑀡𑀁, 𑀢𑀫𑁆𑀧𑀺 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀔𑀬𑁂𑀜𑀸𑀡𑀲𑁆𑀲 𑀉𑀧𑀦𑀺𑀲𑀸? ‘𑀯𑀺𑀫𑀼𑀢𑁆𑀢𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀯𑀺𑀫𑀼𑀢𑁆𑀢𑀺𑀫𑁆𑀧𑀸𑀳𑀁 [𑀯𑀺𑀫𑀼𑀢𑁆𑀢𑀺𑀫𑁆𑀧𑀳𑀁 (𑀲𑀻. 𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀯𑀺𑀫𑀼𑀢𑁆𑀢𑀺𑀬𑀸 𑀉𑀧𑀦𑀺𑀲𑀸? ‘𑀯𑀺𑀭𑀸𑀕𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀯𑀺𑀭𑀸𑀕𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀯𑀺𑀭𑀸𑀕𑀲𑁆𑀲 𑀉𑀧𑀦𑀺𑀲𑀸? ‘𑀦𑀺𑀩𑁆𑀩𑀺𑀤𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀦𑀺𑀩𑁆𑀩𑀺𑀤𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀺𑀤𑀸𑀬 𑀉𑀧𑀦𑀺𑀲𑀸? ‘𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑁆𑀲 𑀉𑀧𑀦𑀺𑀲𑀸? ‘𑀲𑀫𑀸𑀥𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀫𑀸𑀥𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁.

‘‘𑀓𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑀸? ‘𑀲𑀼𑀔’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀼𑀔𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀲𑀼𑀔𑀲𑁆𑀲 𑀉𑀧𑀦𑀺𑀲𑀸? ‘𑀧𑀲𑁆𑀲𑀤𑁆𑀥𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀲𑁆𑀲𑀤𑁆𑀥𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑀦𑀺𑀲𑀸? ‘𑀧𑀻𑀢𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀻𑀢𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀬𑀸 𑀉𑀧𑀦𑀺𑀲𑀸? ‘𑀧𑀸𑀫𑁄𑀚𑁆𑀚’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀸𑀫𑁄𑀚𑁆𑀚𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀧𑀸𑀫𑁄𑀚𑁆𑀚𑀲𑁆𑀲 𑀉𑀧𑀦𑀺𑀲𑀸? ‘𑀲𑀤𑁆𑀥𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀤𑁆𑀥𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁.

‘‘𑀓𑀸 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀬 𑀉𑀧𑀦𑀺𑀲𑀸? ‘𑀤𑀼𑀓𑁆𑀔’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀤𑀼𑀓𑁆𑀔𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀉𑀧𑀦𑀺𑀲𑀸? ‘𑀚𑀸𑀢𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀚𑀸𑀢𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀬𑀸 𑀉𑀧𑀦𑀺𑀲𑀸? ‘𑀪𑀯𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀪𑀯𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀪𑀯𑀲𑁆𑀲 𑀉𑀧𑀦𑀺𑀲𑀸? ‘𑀉𑀧𑀸𑀤𑀸𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀉𑀧𑀸𑀤𑀸𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀲𑁆𑀲 𑀉𑀧𑀦𑀺𑀲𑀸? ‘𑀢𑀡𑁆𑀳𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀢𑀡𑁆𑀳𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑀁 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑀁.

‘‘𑀓𑀸 𑀘, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀬 𑀉𑀧𑀦𑀺𑀲𑀸? ‘𑀯𑁂𑀤𑀦𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁…𑀧𑁂… ‘𑀨𑀲𑁆𑀲𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁… ‘𑀲𑀴𑀸𑀬𑀢𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁… ‘𑀦𑀸𑀫𑀭𑀽𑀧’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁… ‘𑀯𑀺𑀜𑁆𑀜𑀸𑀡’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁… ‘𑀲𑀗𑁆𑀔𑀸𑀭𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀗𑁆𑀔𑀸𑀭𑁂𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀉𑀧𑀦𑀺𑀲𑁂 𑀯𑀤𑀸𑀫𑀺, 𑀦𑁄 𑀅𑀦𑀼𑀧𑀦𑀺𑀲𑁂. 𑀓𑀸 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸𑀦𑀁 𑀉𑀧𑀦𑀺𑀲𑀸? ‘𑀅𑀯𑀺𑀚𑁆𑀚𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀽𑀧𑀦𑀺𑀲𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀽𑀧𑀦𑀺𑀲𑀁 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀽𑀧𑀦𑀺𑀲𑀁 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀽𑀧𑀦𑀺𑀲𑁄 𑀨𑀲𑁆𑀲𑁄, 𑀨𑀲𑁆𑀲𑀽𑀧𑀦𑀺𑀲𑀸 𑀯𑁂𑀤𑀦𑀸, 𑀯𑁂𑀤𑀦𑀽𑀧𑀦𑀺𑀲𑀸 𑀢𑀡𑁆𑀳𑀸, 𑀢𑀡𑁆𑀳𑀽𑀧𑀦𑀺𑀲𑀁 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀽𑀧𑀦𑀺𑀲𑁄 𑀪𑀯𑁄, 𑀪𑀯𑀽𑀧𑀦𑀺𑀲𑀸 𑀚𑀸𑀢𑀺, 𑀚𑀸𑀢𑀽𑀧𑀦𑀺𑀲𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸, 𑀲𑀤𑁆𑀥𑀽𑀧𑀦𑀺𑀲𑀁 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑀽𑀧𑀦𑀺𑀲𑀸 𑀧𑀻𑀢𑀺, 𑀧𑀻𑀢𑀽𑀧𑀦𑀺𑀲𑀸 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀽𑀧𑀦𑀺𑀲𑀁 𑀲𑀼𑀔𑀁, 𑀲𑀼𑀔𑀽𑀧𑀦𑀺𑀲𑁄 𑀲𑀫𑀸𑀥𑀺, 𑀲𑀫𑀸𑀥𑀽𑀧𑀦𑀺𑀲𑀁 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀽𑀧𑀦𑀺𑀲𑀸 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀽𑀧𑀦𑀺𑀲𑁄 𑀯𑀺𑀭𑀸𑀕𑁄, 𑀯𑀺𑀭𑀸𑀕𑀽𑀧𑀦𑀺𑀲𑀸 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀽𑀧𑀦𑀺𑀲𑀁 𑀔𑀬𑁂𑀜𑀸𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺. 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂 [𑀓𑀼𑀲𑁆𑀲𑀼𑀩𑁆𑀪𑁂 (𑀲𑀻. 𑀲𑁆𑀬𑀸. 𑀓𑀁.), 𑀓𑀼𑀲𑀼𑀩𑁆𑀪𑁂 (𑀧𑀻.) 𑀡𑁆𑀯𑀸𑀤𑀺 𑁧𑁨𑁯 𑀲𑀼𑀢𑁆𑀢𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀼𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀫𑀳𑀸𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀫𑀳𑀸𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀭𑀺𑀧𑀽𑀭𑁂𑀦𑁆𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀽𑀧𑀦𑀺𑀲𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀽𑀧𑀦𑀺𑀲𑀁 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀽𑀧𑀦𑀺𑀲𑀁 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀽𑀧𑀦𑀺𑀲𑁄 𑀨𑀲𑁆𑀲𑁄, 𑀨𑀲𑁆𑀲𑀽𑀧𑀦𑀺𑀲𑀸 𑀯𑁂𑀤𑀦𑀸, 𑀯𑁂𑀤𑀦𑀽𑀧𑀦𑀺𑀲𑀸 𑀢𑀡𑁆𑀳𑀸, 𑀢𑀡𑁆𑀳𑀽𑀧𑀦𑀺𑀲𑀁 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀽𑀧𑀦𑀺𑀲𑁄 𑀪𑀯𑁄, 𑀪𑀯𑀽𑀧𑀦𑀺𑀲𑀸 𑀚𑀸𑀢𑀺, 𑀚𑀸𑀢𑀽𑀧𑀦𑀺𑀲𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸, 𑀲𑀤𑁆𑀥𑀽𑀧𑀦𑀺𑀲𑀁 𑀧𑀸𑀫𑁄𑀚𑁆𑀚𑀁, 𑀧𑀸𑀫𑁄𑀚𑁆𑀚𑀽𑀧𑀦𑀺𑀲𑀸 𑀧𑀻𑀢𑀺, 𑀧𑀻𑀢𑀽𑀧𑀦𑀺𑀲𑀸 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀽𑀧𑀦𑀺𑀲𑀁 𑀲𑀼𑀔𑀁, 𑀲𑀼𑀔𑀽𑀧𑀦𑀺𑀲𑁄 𑀲𑀫𑀸𑀥𑀺, 𑀲𑀫𑀸𑀥𑀽𑀧𑀦𑀺𑀲𑀁 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀽𑀧𑀦𑀺𑀲𑀸 𑀦𑀺𑀩𑁆𑀩𑀺𑀤𑀸, 𑀦𑀺𑀩𑁆𑀩𑀺𑀤𑀽𑀧𑀦𑀺𑀲𑁄 𑀯𑀺𑀭𑀸𑀕𑁄, 𑀯𑀺𑀭𑀸𑀕𑀽𑀧𑀦𑀺𑀲𑀸 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀽𑀧𑀦𑀺𑀲𑀁 𑀔𑀬𑁂𑀜𑀸𑀡’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀁

𑁨𑁪. 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀦𑁆𑀢𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀧𑀭𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀥, 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀡𑁄 𑀕𑁄𑀢𑀫𑁄 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻? 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑀸 𑀘 𑀫𑀬𑀁 𑀯𑀼𑀢𑁆𑀢𑀯𑀸𑀤𑀺𑀦𑁄 𑀘𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀲𑁆𑀲𑀸𑀫, 𑀦 𑀘 𑀲𑀫𑀡𑀁 𑀕𑁄𑀢𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀸𑀫, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 [𑀯𑀸𑀤𑀸𑀦𑀼𑀯𑀸𑀤𑁄 (𑀓.) 𑀤𑀻. 𑀦𑀺. 𑁧.𑁩𑁮𑁧] 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺?

‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀧𑀭𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀧𑀭𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀸𑀯𑀢𑀓𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀅𑀳𑁄𑀲𑀺 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤, 𑀬𑀣𑀸 𑀢𑀁 𑀲𑀸𑀭𑀺𑀧𑀼𑀢𑁆𑀢𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀆𑀦𑀦𑁆𑀤, 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀫𑀬𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀅𑀲𑁆𑀲, 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀏𑀓𑀫𑀺𑀤𑀸𑀳𑀁, 𑀆𑀦𑀦𑁆𑀤, 𑀲𑀫𑀬𑀁 𑀇𑀥𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁆𑀯𑀸𑀳𑀁, 𑀆𑀦𑀦𑁆𑀤, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀆𑀦𑀦𑁆𑀤, 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’’𑀦𑁆𑀢𑀺.

‘‘𑀅𑀣 𑀔𑁆𑀯𑀸𑀳𑀁, 𑀆𑀦𑀦𑁆𑀤, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀫𑀁, 𑀆𑀦𑀦𑁆𑀤, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘𑀲𑀦𑁆𑀢𑀸𑀯𑀼𑀲𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀧𑀭𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀸𑀯𑀼𑀲𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀕𑁄𑀢𑀫, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀥 𑀦𑁄 𑀆𑀬𑀲𑁆𑀫𑀸 𑀕𑁄𑀢𑀫𑁄 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻? 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑀸 𑀘 𑀫𑀬𑀁 𑀯𑀼𑀢𑁆𑀢𑀯𑀸𑀤𑀺𑀦𑁄 𑀘𑁂𑀯 𑀆𑀬𑀲𑁆𑀫𑀢𑁄 𑀕𑁄𑀢𑀫𑀲𑁆𑀲 𑀅𑀲𑁆𑀲𑀸𑀫, 𑀦 𑀘 𑀆𑀬𑀲𑁆𑀫𑀦𑁆𑀢𑀁 𑀕𑁄𑀢𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀸𑀫, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’’𑀢𑀺?

‘‘𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀆𑀦𑀦𑁆𑀤, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘𑀁 𑁋 ‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀫𑀬𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀅𑀲𑁆𑀲, 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’’𑀢𑀺.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀏𑀓𑁂𑀦 𑀧𑀤𑁂𑀦 𑀲𑀩𑁆𑀩𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺. 𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀏𑀲𑁂𑀯𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀼𑀘𑁆𑀘𑀫𑀸𑀦𑁄 𑀕𑀫𑁆𑀪𑀻𑀭𑁄 𑀘𑁂𑀯 𑀅𑀲𑁆𑀲 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’’𑀢𑀺?

‘‘𑀢𑁂𑀦 𑀳𑀸𑀦𑀦𑁆𑀤, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀪𑀸𑀢𑀽’’𑀢𑀺. ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀚𑀭𑀸𑀫𑀭𑀡𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯’𑀦𑁆𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀚𑀭𑀸𑀫𑀭𑀡𑀁 𑀔𑁄, 𑀆𑀯𑀼𑀲𑁄, 𑀚𑀸𑀢𑀺𑀦𑀺𑀤𑀸𑀦𑀁 𑀚𑀸𑀢𑀺𑀲𑀫𑀼𑀤𑀬𑀁 𑀚𑀸𑀢𑀺𑀚𑀸𑀢𑀺𑀓𑀁 𑀚𑀸𑀢𑀺𑀧𑀪𑀯’𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁.

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀚𑀸𑀢𑀺 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀚𑀸𑀢𑀺 𑀔𑁄, 𑀆𑀯𑀼𑀲𑁄, 𑀪𑀯𑀦𑀺𑀤𑀸𑀦𑀸 𑀪𑀯𑀲𑀫𑀼𑀤𑀬𑀸 𑀪𑀯𑀚𑀸𑀢𑀺𑀓𑀸 𑀪𑀯𑀧𑁆𑀧𑀪𑀯𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁.

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀪𑀯𑁄 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀪𑀯𑁄 𑀔𑁄, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀦𑀺𑀤𑀸𑀦𑁄 𑀉𑀧𑀸𑀤𑀸𑀦𑀲𑀫𑀼𑀤𑀬𑁄 𑀉𑀧𑀸𑀤𑀸𑀦𑀚𑀸𑀢𑀺𑀓𑁄 𑀉𑀧𑀸𑀤𑀸𑀦𑀧𑁆𑀧𑀪𑀯𑁄’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁.

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 𑀉𑀧𑀸𑀤𑀸𑀦𑀁 𑀧𑀦𑀸𑀯𑀼𑀲𑁄…𑀧𑁂… 𑀢𑀡𑁆𑀳𑀸 𑀧𑀦𑀸𑀯𑀼𑀲𑁄…𑀧𑁂… 𑀯𑁂𑀤𑀦𑀸 𑀧𑀦𑀸𑀯𑀼𑀲𑁄…𑀧𑁂… 𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀨𑀲𑁆𑀲𑁄 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀨𑀲𑁆𑀲𑁄 𑀔𑁄, 𑀆𑀯𑀼𑀲𑁄, 𑀲𑀴𑀸𑀬𑀢𑀦𑀦𑀺𑀤𑀸𑀦𑁄 𑀲𑀴𑀸𑀬𑀢𑀦𑀲𑀫𑀼𑀤𑀬𑁄 𑀲𑀴𑀸𑀬𑀢𑀦𑀚𑀸𑀢𑀺𑀓𑁄 𑀲𑀴𑀸𑀬𑀢𑀦𑀧𑁆𑀧𑀪𑀯𑁄’𑀢𑀺. ‘𑀙𑀦𑁆𑀦𑀁𑀢𑁆𑀯𑁂𑀯, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄; 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄; 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄; 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄; 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀪𑀽𑀫𑀺𑀚𑀲𑀼𑀢𑁆𑀢𑀁

𑁨𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀪𑀽𑀫𑀺𑀚𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀦𑁆𑀢𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀥 𑀦𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀕𑀯𑀸 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻, 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑀸 𑀘 𑀫𑀬𑀁 𑀯𑀼𑀢𑁆𑀢𑀯𑀸𑀤𑀺𑀦𑁄 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀸𑀫, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀸𑀫, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺?

‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀆𑀯𑀼𑀲𑁄, 𑀲𑀼𑀔𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂…𑀧𑁂. … 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀆𑀬𑀲𑁆𑀫𑀢𑀸 𑀪𑀽𑀫𑀺𑀚𑁂𑀦 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀸𑀯𑀢𑀓𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀆𑀬𑀲𑁆𑀫𑀢𑀸 𑀪𑀽𑀫𑀺𑀚𑁂𑀦 𑀲𑀤𑁆𑀥𑀺𑀁 𑀅𑀳𑁄𑀲𑀺 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤, 𑀬𑀣𑀸 𑀢𑀁 𑀲𑀸𑀭𑀺𑀧𑀼𑀢𑁆𑀢𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀆𑀦𑀦𑁆𑀤, 𑀲𑀼𑀔𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀫𑀬𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀅𑀲𑁆𑀲, 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀸𑀤𑀸 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀓𑀫𑁆𑀫𑀯𑀸𑀤𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀓𑀸𑀬𑁂 𑀯𑀸 𑀳𑀸𑀦𑀦𑁆𑀤, 𑀲𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀯𑀸𑀘𑀸𑀬 𑀯𑀸 𑀳𑀸𑀦𑀦𑁆𑀤, 𑀲𑀢𑀺 𑀯𑀘𑀻𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀫𑀦𑁂 𑀯𑀸 𑀳𑀸𑀦𑀦𑁆𑀤, 𑀲𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀘.

‘‘𑀲𑀸𑀫𑀁 𑀯𑀸 𑀢𑀁, 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 [𑀬𑀁𑀧𑀘𑁆𑀘𑀬𑀸𑀬 (𑀲𑁆𑀬𑀸. 𑀓𑀁.), 𑀬𑀁𑀧𑀘𑁆𑀘𑀬𑀸 𑀬𑀁 (𑀓.)] 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀧𑀭𑁂 𑀯𑀸 𑀢𑀁 [𑀧𑀭𑁂 𑀯𑀸𑀲𑁆𑀲 𑀢𑀁 (𑀲𑀻. 𑀧𑀻.), 𑀧𑀭𑁂 𑀯𑀸𑀬𑀢𑀁 (𑀲𑁆𑀬𑀸. 𑀓𑀁.)], 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀲𑀸𑀫𑀁 𑀯𑀸 𑀢𑀁, 𑀆𑀦𑀦𑁆𑀤, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀧𑀭𑁂 𑀯𑀸 𑀢𑀁, 𑀆𑀦𑀦𑁆𑀤, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤…𑀧𑁂… 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀲𑀸𑀫𑀁 𑀯𑀸 𑀢𑀁, 𑀆𑀦𑀦𑁆𑀤, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀧𑀭𑁂 𑀯𑀸 𑀢𑀁, 𑀆𑀦𑀦𑁆𑀤, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤…𑀧𑁂… 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀆𑀦𑀦𑁆𑀤, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀇𑀫𑁂𑀲𑀼, 𑀆𑀦𑀦𑁆𑀤, 𑀥𑀫𑁆𑀫𑁂𑀲𑀼 𑀅𑀯𑀺𑀚𑁆𑀚𑀸 𑀅𑀦𑀼𑀧𑀢𑀺𑀢𑀸. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀆𑀦𑀦𑁆𑀤, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑁄 𑀓𑀸𑀬𑁄 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑀸 𑀯𑀸𑀘𑀸 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑁄 𑀫𑀦𑁄 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀔𑁂𑀢𑁆𑀢𑀁 𑀢𑀁 𑀦 𑀳𑁄𑀢𑀺…𑀧𑁂… 𑀯𑀢𑁆𑀣𑀼 𑀢𑀁 𑀦 𑀳𑁄𑀢𑀺…𑀧𑁂… 𑀆𑀬𑀢𑀦𑀁 𑀢𑀁 𑀦 𑀳𑁄𑀢𑀺…𑀧𑁂… 𑀅𑀥𑀺𑀓𑀭𑀡𑀁 𑀢𑀁 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀉𑀧𑀯𑀸𑀡𑀲𑀼𑀢𑁆𑀢𑀁

𑁨𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀲𑀦𑁆𑀢𑀺 𑀧𑀦, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀥 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑀸 𑀘 𑀫𑀬𑀁 𑀯𑀼𑀢𑁆𑀢𑀯𑀸𑀤𑀺𑀦𑁄 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀸𑀫, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀸𑀫, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺?

‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑁄, 𑀉𑀧𑀯𑀸𑀡, 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀫𑀬𑀸. 𑀓𑀺𑀁 𑀧𑀝𑀺𑀘𑁆𑀘? 𑀨𑀲𑁆𑀲𑀁 𑀧𑀝𑀺𑀘𑁆𑀘. 𑀇𑀢𑀺 𑀯𑀤𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀅𑀲𑁆𑀲, 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀢𑀢𑁆𑀭, 𑀉𑀧𑀯𑀸𑀡, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

‘‘𑀢𑀢𑁆𑀭, 𑀉𑀧𑀯𑀸𑀡, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀧𑀘𑁆𑀘𑀬𑀲𑀼𑀢𑁆𑀢𑀁

𑁨𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀭𑀸. 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄; 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀁. 𑀇𑀢𑀺 𑀅𑀬𑀜𑁆𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀚𑀸𑀢𑀺𑀲𑀫𑀼𑀤𑀬𑀸 𑀚𑀭𑀸𑀫𑀭𑀡𑀲𑀫𑀼𑀤𑀬𑁄; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀪𑀯𑁄… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀁… 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸… 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑁄… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀴𑀸𑀬𑀢𑀦𑀁… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀁… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁…?

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸? 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑁋 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀲𑀗𑁆𑀔𑀸𑀭𑀲𑀫𑀼𑀤𑀬𑁄; 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀧𑀘𑁆𑀘𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀧𑀘𑁆𑀘𑀬𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀧𑀘𑁆𑀘𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀧𑀲𑁆𑀲𑀢𑀺 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀲𑁂𑀓𑁆𑀔𑀸𑀬 𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀇𑀢𑀺𑀧𑀺, 𑀅𑀫𑀢𑀤𑁆𑀯𑀸𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀇𑀢𑀺𑀧𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁨𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀢𑀢𑁆𑀭 𑀔𑁄…𑀧𑁂… 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀭𑀸𑀫𑀭𑀡𑀁 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀁 𑀧𑀚𑀸𑀦𑀸𑀢𑀺…𑀧𑁂… 𑀪𑀯𑀁 𑀧𑀚𑀸𑀦𑀸𑀢𑀺… 𑀉𑀧𑀸𑀤𑀸𑀦𑀁 𑀧𑀚𑀸𑀦𑀸𑀢𑀺… 𑀢𑀡𑁆𑀳𑀁 𑀧𑀚𑀸𑀦𑀸𑀢𑀺… 𑀯𑁂𑀤𑀦𑀁 𑀧𑀚𑀸𑀦𑀸𑀢𑀺… 𑀨𑀲𑁆𑀲𑀁 𑀧𑀚𑀸𑀦𑀸𑀢𑀺… 𑀲𑀴𑀸𑀬𑀢𑀦𑀁 𑀧𑀚𑀸𑀦𑀸𑀢𑀺… 𑀦𑀸𑀫𑀭𑀽𑀧𑀁 𑀧𑀚𑀸𑀦𑀸𑀢𑀺… 𑀯𑀺𑀜𑁆𑀜𑀸𑀡𑀁 𑀧𑀚𑀸𑀦𑀸𑀢𑀺… 𑀲𑀗𑁆𑀔𑀸𑀭𑁂 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀭𑀸. 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄; 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀁. 𑀇𑀢𑀺 𑀅𑀬𑀁 𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀚𑀸𑀢𑀺𑀲𑀫𑀼𑀤𑀬𑀸 𑀚𑀭𑀸𑀫𑀭𑀡𑀲𑀫𑀼𑀤𑀬𑁄; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀪𑀯𑁄… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀁… 𑀯𑁂𑀤𑀦𑀸… 𑀨𑀲𑁆𑀲𑁄… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁….

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀚𑀭𑀸𑀫𑀭𑀡𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀸𑀢𑀺𑀁 𑀧𑀚𑀸𑀦𑀸𑀢𑀺…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁 … 𑀲𑀗𑁆𑀔𑀸𑀭𑁂… 𑀲𑀗𑁆𑀔𑀸𑀭𑀲𑀫𑀼𑀤𑀬𑀁… 𑀲𑀗𑁆𑀔𑀸𑀭𑀦𑀺𑀭𑁄𑀥𑀁… 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀧𑀲𑁆𑀲𑀢𑀺 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀲𑁂𑀓𑁆𑀔𑀸𑀬 𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀇𑀢𑀺𑀧𑀺, 𑀅𑀫𑀢𑀤𑁆𑀯𑀸𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀇𑀢𑀺𑀧𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁨𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀢𑀢𑁆𑀭 𑀔𑁄…𑀧𑁂… 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀸𑀢𑀺𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂… 𑀲𑀗𑁆𑀔𑀸𑀭𑀲𑀫𑀼𑀤𑀬𑀁… 𑀲𑀗𑁆𑀔𑀸𑀭𑀦𑀺𑀭𑁄𑀥𑀁… 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦 𑀧𑀭𑀺𑀚𑀸𑀦𑀦𑁆𑀢𑀺. 𑀦 𑀫𑁂𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸. 𑀦 𑀘 𑀧𑀦𑁂𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺’’.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀚𑀸𑀢𑀺𑀁 𑀧𑀭𑀺𑀚𑀸𑀦𑀦𑁆𑀢𑀺…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀭𑀺𑀚𑀸𑀦𑀦𑁆𑀢𑀺. 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸. 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁩𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀢𑀢𑁆𑀭 𑀔𑁄…𑀧𑁂… 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺 𑀢𑁂 𑀯𑀢 𑀚𑀭𑀸𑀫𑀭𑀡𑀁 𑀲𑀫𑀢𑀺𑀓𑁆𑀓𑀫𑁆𑀫 𑀞𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀚𑀸𑀢𑀺𑀁 𑀦𑀧𑁆𑀧𑀚𑀸𑀦𑀦𑁆𑀢𑀺…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺 𑀢𑁂 𑀯𑀢 𑀲𑀗𑁆𑀔𑀸𑀭𑁂 𑀲𑀫𑀢𑀺𑀓𑁆𑀓𑀫𑁆𑀫 𑀞𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺’’.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺 𑀢𑁂 𑀯𑀢 𑀚𑀭𑀸𑀫𑀭𑀡𑀁 𑀲𑀫𑀢𑀺𑀓𑁆𑀓𑀫𑁆𑀫 𑀞𑀲𑁆𑀲𑀦𑁆𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀚𑀸𑀢𑀺𑀁 𑀧𑀚𑀸𑀦𑀦𑁆𑀢𑀺…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺. 𑀢𑁂 𑀯𑀢 𑀲𑀗𑁆𑀔𑀸𑀭𑁂 𑀲𑀫𑀢𑀺𑀓𑁆𑀓𑀫𑁆𑀫 𑀞𑀲𑁆𑀲𑀦𑁆𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀤𑀲𑀫𑀁.

𑀤𑀲𑀩𑀮𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀤𑀲𑀩𑀮𑀸 𑀉𑀧𑀦𑀺𑀲𑀸 𑀘, 𑀅𑀜𑁆𑀜𑀢𑀺𑀢𑁆𑀣𑀺𑀬𑀪𑀽𑀫𑀺𑀚𑁄;

𑀉𑀧𑀯𑀸𑀡𑁄 𑀧𑀘𑁆𑀘𑀬𑁄 𑀪𑀺𑀓𑁆𑀔𑀼, 𑀤𑁆𑀯𑁂 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺.