𑁪. 𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑁄

𑁧. 𑀪𑀽𑀢𑀲𑀼𑀢𑁆𑀢𑀁

𑁩𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀯𑀼𑀢𑁆𑀢𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀸𑀭𑀸𑀬𑀦𑁂 [𑀧𑀸𑀭𑀸𑀬𑀡𑁂 (𑀲𑀻.)] 𑀅𑀚𑀺𑀢𑀧𑀜𑁆𑀳𑁂 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

‘‘𑀇𑀫𑀲𑁆𑀲 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺…𑀧𑁂… 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀯𑀼𑀢𑁆𑀢𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀸𑀭𑀸𑀬𑀦𑁂 𑀅𑀚𑀺𑀢𑀧𑀜𑁆𑀳𑁂 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

‘‘𑀇𑀫𑀲𑁆𑀲 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

‘‘𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀲𑁆𑀲𑀲𑀻’’𑀢𑀺? 𑀪𑀽𑀢𑀫𑀺𑀤𑀦𑁆𑀢𑀺, 𑀪𑀦𑁆𑀢𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀦𑁆𑀢𑁂, 𑀲𑁂𑀓𑁆𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀦𑁆𑀢𑁂, 𑀲𑀗𑁆𑀔𑀸𑀢𑀥𑀫𑁆𑀫𑁄 𑀳𑁄𑀢𑀺? 𑀪𑀽𑀢𑀫𑀺𑀤𑀦𑁆𑀢𑀺, 𑀪𑀦𑁆𑀢𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀦𑁆𑀢𑁂, 𑀲𑀗𑁆𑀔𑀸𑀢𑀥𑀫𑁆𑀫𑁄 𑀳𑁄𑀢𑀺. 𑀇𑀢𑀺 𑀔𑁄, 𑀪𑀦𑁆𑀢𑁂, 𑀬𑀁 𑀢𑀁 𑀯𑀼𑀢𑁆𑀢𑀁 𑀧𑀸𑀭𑀸𑀬𑀦𑁂 𑀅𑀚𑀺𑀢𑀧𑀜𑁆𑀳𑁂 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

‘‘𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢, 𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁂𑀓𑁆𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀔𑀸𑀢𑀥𑀫𑁆𑀫𑁄 𑀳𑁄𑀢𑀺? 𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸 𑀬𑀁 𑀪𑀽𑀢𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀔𑀸𑀢𑀥𑀫𑁆𑀫𑁄 𑀳𑁄𑀢𑀺. 𑀇𑀢𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀢𑀁 𑀯𑀼𑀢𑁆𑀢𑀁 𑀧𑀸𑀭𑀸𑀬𑀦𑁂 𑀅𑀚𑀺𑀢𑀧𑀜𑁆𑀳𑁂 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

‘‘𑀇𑀫𑀲𑁆𑀲 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀧𑀞𑀫𑀁.

𑁨. 𑀓𑀴𑀸𑀭𑀲𑀼𑀢𑁆𑀢𑀁

𑁩𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀓𑀴𑀸𑀭𑀔𑀢𑁆𑀢𑀺𑀬𑁄 𑀪𑀺𑀓𑁆𑀔𑀼 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑀴𑀸𑀭𑀔𑀢𑁆𑀢𑀺𑀬𑁄 𑀪𑀺𑀓𑁆𑀔𑀼 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑁄𑀴𑀺𑀬𑀨𑀕𑁆𑀕𑀼𑀦𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑁄𑀢𑀺. 𑀦 𑀳𑀺 𑀦𑀽𑀦 𑀲𑁄 𑀆𑀬𑀲𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀲𑁆𑀲𑀸𑀲𑀫𑀮𑀢𑁆𑀣𑀸𑀢𑀺. 𑀢𑁂𑀦 𑀳𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀲𑁆𑀲𑀸𑀲𑀁 𑀧𑀢𑁆𑀢𑁄’’𑀢𑀺?

‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀓𑀗𑁆𑀔𑀸𑀫𑀻’’𑀢𑀺. ‘‘𑀆𑀬𑀢𑀺𑀁, 𑀧𑀦𑀸𑀯𑀼𑀲𑁄’’𑀢𑀺?

‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀯𑀺𑀘𑀺𑀓𑀺𑀘𑁆𑀙𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀁, 𑀆𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸, 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀫𑀻’’𑀢𑀺? ‘‘𑀦 𑀔𑁄, 𑀪𑀦𑁆𑀢𑁂, 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 [𑀅𑀢𑁆𑀣𑁄 𑀘 (𑀲𑁆𑀬𑀸. 𑀓𑀁. 𑀓.)] 𑀯𑀼𑀢𑁆𑀢𑁄’’𑀢𑀺. ‘‘𑀬𑁂𑀦 𑀓𑁂𑀦𑀘𑀺𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀬𑀸𑀬𑁂𑀦 𑀓𑀼𑀮𑀧𑀼𑀢𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀅𑀣 𑀔𑁄 𑀩𑁆𑀬𑀸𑀓𑀢𑀁 𑀩𑁆𑀬𑀸𑀓𑀢𑀢𑁄 𑀤𑀝𑁆𑀞𑀩𑁆𑀩’’𑀦𑁆𑀢𑀺. ‘‘𑀦𑀦𑀼 𑀅𑀳𑀫𑁆𑀧𑀺, 𑀪𑀦𑁆𑀢𑁂, 𑀏𑀯𑀁 𑀯𑀤𑀸𑀫𑀺 𑁋 ‘𑀦 𑀔𑁄, 𑀪𑀦𑁆𑀢𑁂, 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄’’’𑀢𑀺.

‘‘𑀲𑀘𑁂 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀚𑀸𑀦𑀢𑀸 𑀧𑀦 𑀢𑀬𑀸, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀣𑀁 𑀧𑀲𑁆𑀲𑀢𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺?

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀚𑀸𑀦𑀢𑀸 𑀧𑀦 𑀢𑀬𑀸, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀣𑀁 𑀧𑀲𑁆𑀲𑀢𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺; 𑀏𑀯𑀁 𑀧𑀼𑀝𑁆𑀞𑁄𑀳𑀁 [𑀧𑀼𑀝𑁆𑀞𑁄 𑀅𑀳𑀁 (𑀲𑁆𑀬𑀸. 𑀓𑀁.), 𑀧𑀼𑀝𑁆𑀞𑀸𑀳𑀁 (𑀧𑀻. 𑀓.)], 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀬𑀁𑀦𑀺𑀤𑀸𑀦𑀸, 𑀆𑀯𑀼𑀲𑁄, 𑀚𑀸𑀢𑀺, 𑀢𑀲𑁆𑀲 𑀦𑀺𑀤𑀸𑀦𑀲𑁆𑀲 𑀔𑀬𑀸 𑀔𑀻𑀡𑀲𑁆𑀫𑀺𑀁 𑀔𑀻𑀡𑀸𑀫𑁆𑀳𑀻𑀢𑀺 𑀯𑀺𑀤𑀺𑀢𑀁. 𑀔𑀻𑀡𑀸𑀫𑁆𑀳𑀻𑀢𑀺 𑀯𑀺𑀤𑀺𑀢𑁆𑀯𑀸 𑁋 𑀔𑀻𑀡𑀸𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀚𑀸𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑁄 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀚𑀸𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀚𑀸𑀢𑀺 𑀔𑁄, 𑀆𑀯𑀼𑀲𑁄, 𑀪𑀯𑀦𑀺𑀤𑀸𑀦𑀸 𑀪𑀯𑀲𑀫𑀼𑀤𑀬𑀸 𑀪𑀯𑀚𑀸𑀢𑀺𑀓𑀸 𑀪𑀯𑀧𑁆𑀧𑀪𑀯𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀪𑀯𑁄 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄’𑀢𑀺? 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀪𑀯𑁄 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀪𑀯𑁄 𑀔𑁄, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀦𑀺𑀤𑀸𑀦𑁄 𑀉𑀧𑀸𑀤𑀸𑀦𑀲𑀫𑀼𑀤𑀬𑁄 𑀉𑀧𑀸𑀤𑀸𑀦𑀚𑀸𑀢𑀺𑀓𑁄 𑀉𑀧𑀸𑀤𑀸𑀦𑀧𑁆𑀧𑀪𑀯𑁄’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀉𑀧𑀸𑀤𑀸𑀦𑀁 𑀧𑀦𑀸𑀯𑀼𑀲𑁄…𑀧𑁂… 𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 𑀢𑀡𑁆𑀳𑀸 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 𑀢𑀡𑁆𑀳𑀸 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀢𑀡𑁆𑀳𑀸 𑀔𑁄, 𑀆𑀯𑀼𑀲𑁄, 𑀯𑁂𑀤𑀦𑀸𑀦𑀺𑀤𑀸𑀦𑀸 𑀯𑁂𑀤𑀦𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀚𑀸𑀢𑀺𑀓𑀸 𑀯𑁂𑀤𑀦𑀸𑀧𑀪𑀯𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀚𑀸𑀦𑀢𑁄 𑀧𑀦 𑀢𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀣𑀁 𑀧𑀲𑁆𑀲𑀢𑁄 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦 𑀉𑀧𑀝𑁆𑀞𑀸𑀲𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀚𑀸𑀦𑀢𑁄 𑀧𑀦 𑀢𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀣𑀁 𑀧𑀲𑁆𑀲𑀢𑁄 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦 𑀉𑀧𑀝𑁆𑀞𑀸𑀲𑀻’𑀢𑀺 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀢𑀺𑀲𑁆𑀲𑁄 𑀔𑁄 𑀇𑀫𑀸, 𑀆𑀯𑀼𑀲𑁄, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸 𑀔𑁄, 𑀆𑀯𑀼𑀲𑁄, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀤𑀺𑀢𑀁 [𑀯𑀺𑀤𑀺𑀢𑀸 (𑀝𑀻𑀓𑀸)], 𑀬𑀸 𑀯𑁂𑀤𑀦𑀸𑀲𑀼 𑀦𑀦𑁆𑀤𑀻 𑀲𑀸 𑀦 𑀉𑀧𑀝𑁆𑀞𑀸𑀲𑀻’𑀢𑀺. 𑀏𑀯𑀁, 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢. 𑀅𑀬𑀫𑁆𑀧𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀬𑀸𑀬𑁄, 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀯𑁂𑀬𑁆𑀬𑀸𑀓𑀭𑀡𑀸𑀬 𑁋 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀯𑀺𑀫𑁄𑀓𑁆𑀔𑀸 𑀧𑀦 𑀢𑀬𑀸, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺? 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁 𑀯𑀺𑀫𑁄𑀓𑁆𑀔𑀸 𑀧𑀦 𑀢𑀬𑀸, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀢𑀁 𑀓𑀭𑀡𑀻𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀅𑀚𑁆𑀛𑀢𑁆𑀢𑀁 𑀯𑀺𑀫𑁄𑀓𑁆𑀔𑀸 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸 𑀢𑀣𑀸 𑀲𑀢𑁄 𑀯𑀺𑀳𑀭𑀸𑀫𑀺 𑀬𑀣𑀸 𑀲𑀢𑀁 𑀯𑀺𑀳𑀭𑀦𑁆𑀢𑀁 𑀆𑀲𑀯𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀦𑀸𑀯𑀚𑀸𑀦𑀸𑀫𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢. 𑀅𑀬𑀫𑁆𑀧𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀬𑀸𑀬𑁄 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀯𑁂𑀬𑁆𑀬𑀸𑀓𑀭𑀡𑀸𑀬 𑁋 𑀬𑁂 𑀆𑀲𑀯𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸 𑀢𑁂𑀲𑁆𑀯𑀸𑀳𑀁 𑀦 𑀓𑀗𑁆𑀔𑀸𑀫𑀺, 𑀢𑁂 𑀫𑁂 𑀧𑀳𑀻𑀦𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀧𑀞𑀫𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀢𑀲𑁆𑀲 𑀫𑁂 𑀅𑀳𑁄𑀲𑀺 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀬𑀢𑁄 𑀘 𑀔𑁄 𑀫𑁂, 𑀆𑀯𑀼𑀲𑁄, 𑀪𑀕𑀯𑀸 𑀧𑀞𑀫𑀁 𑀧𑀜𑁆𑀳𑀁 𑀅𑀦𑀼𑀫𑁄𑀤𑀺, 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑁋 𑀤𑀺𑀯𑀲𑀁 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀤𑀺𑀯𑀲𑀫𑁆𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺. 𑀭𑀢𑁆𑀢𑀺𑀁 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀭𑀢𑁆𑀢𑀺𑀫𑁆𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺. 𑀭𑀢𑁆𑀢𑀺𑀦𑁆𑀤𑀺𑀯𑀁 [𑀭𑀢𑁆𑀢𑀺𑀤𑀺𑀯𑀁 (𑀓.)] 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀭𑀢𑁆𑀢𑀺𑀦𑁆𑀤𑀺𑀯𑀫𑁆𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺. 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬…𑀧𑁂… 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁…𑀧𑁂… 𑀢𑀻𑀡𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬…𑀧𑁂… 𑀢𑀻𑀡𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁…𑀧𑁂… 𑀘𑀢𑁆𑀢𑀸𑀭𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬…𑀧𑁂… 𑀘𑀢𑁆𑀢𑀸𑀭𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁…𑀧𑁂… 𑀧𑀜𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬…𑀧𑁂… 𑀧𑀜𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁…𑀧𑁂… 𑀙 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬…𑀧𑁂… 𑀙 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁…𑀧𑁂… 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀻’’𑀢𑀺.

𑀅𑀣 𑀔𑁄 𑀓𑀴𑀸𑀭𑀔𑀢𑁆𑀢𑀺𑀬𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑀴𑀸𑀭𑀔𑀢𑁆𑀢𑀺𑀬𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀢𑀸, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄 𑁋 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀧𑀞𑀫𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀢𑀲𑁆𑀲 𑀫𑁂 𑀅𑀳𑁄𑀲𑀺 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀬𑀢𑁄 𑀘 𑀔𑁄 𑀫𑁂, 𑀆𑀯𑀼𑀲𑁄, 𑀪𑀕𑀯𑀸 𑀧𑀞𑀫𑀁 𑀧𑀜𑁆𑀳𑀁 𑀅𑀦𑀼𑀫𑁄𑀤𑀺, 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑁋 𑀤𑀺𑀯𑀲𑀁 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀤𑀺𑀯𑀲𑀫𑁆𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺; 𑀭𑀢𑁆𑀢𑀺𑀁 𑀘𑁂𑀧𑀺…𑀧𑁂… 𑀭𑀢𑁆𑀢𑀺𑀦𑁆𑀤𑀺𑀯𑀁 𑀘𑁂𑀧𑀺 𑀫𑀁 𑀪𑀕𑀯𑀸…𑀧𑁂… 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸…𑀧𑁂… 𑀢𑀻𑀡𑀺… 𑀘𑀢𑁆𑀢𑀸𑀭𑀺… 𑀧𑀜𑁆𑀘… 𑀙… 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀺 𑀫𑀁 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀻’’𑀢𑀺.

‘‘𑀲𑀸 𑀳𑀺, 𑀪𑀺𑀓𑁆𑀔𑀼, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑀺𑀯𑀲𑀁 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀤𑀺𑀯𑀲𑀫𑁆𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺. 𑀭𑀢𑁆𑀢𑀺𑀁 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀭𑀢𑁆𑀢𑀺𑀫𑁆𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬…𑀧𑁂… 𑀭𑀢𑁆𑀢𑀺𑀦𑁆𑀤𑀺𑀯𑀁 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑁆𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀢𑀻𑀡𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀢𑀻𑀡𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀘𑀢𑁆𑀢𑀸𑀭𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀘𑀢𑁆𑀢𑀸𑀭𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀧𑀜𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀧𑀜𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀙 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀙 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬… 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀘𑁂𑀧𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺𑀧𑀺 𑀫𑁂 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀭𑀺𑀬𑀸𑀬𑁂𑀳𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀁

𑁩𑁩. 𑀲𑀸𑀯𑀢𑁆𑀣𑀺𑀬𑀁…𑀧𑁂… ‘‘𑀘𑀢𑀼𑀘𑀢𑁆𑀢𑀸𑀭𑀻𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀜𑀸𑀡𑀯𑀢𑁆𑀣𑀽𑀦𑀺 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀸𑀦𑀺 [𑀓𑀢𑀫𑀸𑀦𑀺 𑀘 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀘𑀢𑀼𑀘𑀢𑁆𑀢𑀸𑀭𑀻𑀲𑀁 𑀜𑀸𑀡𑀯𑀢𑁆𑀣𑀽𑀦𑀺? 𑀚𑀭𑀸𑀫𑀭𑀡𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀜𑀸𑀡𑀁, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀚𑀸𑀢𑀺𑀬𑀸 𑀜𑀸𑀡𑀁, 𑀚𑀸𑀢𑀺𑀲𑀫𑀼𑀤𑀬𑁂 𑀜𑀸𑀡𑀁, 𑀚𑀸𑀢𑀺𑀦𑀺𑀭𑁄𑀥𑁂 𑀜𑀸𑀡𑀁, 𑀚𑀸𑀢𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀪𑀯𑁂 𑀜𑀸𑀡𑀁, 𑀪𑀯𑀲𑀫𑀼𑀤𑀬𑁂 𑀜𑀸𑀡𑀁, 𑀪𑀯𑀦𑀺𑀭𑁄𑀥𑁂 𑀜𑀸𑀡𑀁, 𑀪𑀯𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀉𑀧𑀸𑀤𑀸𑀦𑁂 𑀜𑀸𑀡𑀁, 𑀉𑀧𑀸𑀤𑀸𑀦𑀲𑀫𑀼𑀤𑀬𑁂 𑀜𑀸𑀡𑀁, 𑀉𑀧𑀸𑀤𑀸𑀦𑀦𑀺𑀭𑁄𑀥𑁂 𑀜𑀸𑀡𑀁, 𑀉𑀧𑀸𑀤𑀸𑀦𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀢𑀡𑁆𑀳𑀸𑀬 𑀜𑀸𑀡𑀁, 𑀢𑀡𑁆𑀳𑀸𑀲𑀫𑀼𑀤𑀬𑁂 𑀜𑀸𑀡𑀁, 𑀢𑀡𑁆𑀳𑀸𑀦𑀺𑀭𑁄𑀥𑁂 𑀜𑀸𑀡𑀁, 𑀢𑀡𑁆𑀳𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀯𑁂𑀤𑀦𑀸𑀬 𑀜𑀸𑀡𑀁, 𑀯𑁂𑀤𑀦𑀸𑀲𑀫𑀼𑀤𑀬𑁂 𑀜𑀸𑀡𑀁, 𑀯𑁂𑀤𑀦𑀸𑀦𑀺𑀭𑁄𑀥𑁂 𑀜𑀸𑀡𑀁, 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁; 𑀨𑀲𑁆𑀲𑁂 𑀜𑀸𑀡𑀁…𑀧𑁂… 𑀲𑀴𑀸𑀬𑀢𑀦𑁂 𑀜𑀸𑀡𑀁… 𑀦𑀸𑀫𑀭𑀽𑀧𑁂 𑀜𑀸𑀡𑀁… 𑀯𑀺𑀜𑁆𑀜𑀸𑀡𑁂 𑀜𑀸𑀡𑀁… 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁, 𑀲𑀗𑁆𑀔𑀸𑀭𑀲𑀫𑀼𑀤𑀬𑁂 𑀜𑀸𑀡𑀁, 𑀲𑀗𑁆𑀔𑀸𑀭𑀦𑀺𑀭𑁄𑀥𑁂 𑀜𑀸𑀡𑀁, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁. 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀘𑀢𑁆𑀢𑀸𑀭𑀻𑀲𑀁 𑀜𑀸𑀡𑀯𑀢𑁆𑀣𑀽𑀦𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀭𑀸. 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀁. 𑀇𑀢𑀺 𑀅𑀬𑀜𑁆𑀘 𑀚𑀭𑀸, 𑀇𑀤𑀜𑁆𑀘 𑀫𑀭𑀡𑀁; 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁.

‘‘𑀚𑀸𑀢𑀺𑀲𑀫𑀼𑀤𑀬𑀸 𑀚𑀭𑀸𑀫𑀭𑀡𑀲𑀫𑀼𑀤𑀬𑁄; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄; 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀚𑀭𑀸𑀫𑀭𑀡𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀇𑀤𑀫𑀲𑁆𑀲 𑀥𑀫𑁆𑀫𑁂 𑀜𑀸𑀡𑀁. 𑀲𑁄 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀤𑀺𑀝𑁆𑀞𑁂𑀦 𑀯𑀺𑀤𑀺𑀢𑁂𑀦 𑀅𑀓𑀸𑀮𑀺𑀓𑁂𑀦 𑀧𑀢𑁆𑀢𑁂𑀦 𑀧𑀭𑀺𑀬𑁄𑀕𑀸𑀴𑁆𑀳𑁂𑀦 𑀅𑀢𑀻𑀢𑀸𑀦𑀸𑀕𑀢𑁂𑀦 𑀬𑀁 𑀦𑁂𑀢𑀺.

‘‘𑀬𑁂 𑀔𑁄 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀅𑀩𑁆𑀪𑀜𑁆𑀜𑀁𑀲𑀼, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀻𑀢𑀺. 𑀇𑀤𑀫𑀲𑁆𑀲 𑀅𑀦𑁆𑀯𑀬𑁂 𑀜𑀸𑀡𑀁.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀸𑀦𑀺 𑁋 𑀥𑀫𑁆𑀫𑁂 𑀜𑀸𑀡𑀜𑁆𑀘 𑀅𑀦𑁆𑀯𑀬𑁂 𑀜𑀸𑀡𑀜𑁆𑀘. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀧𑀲𑁆𑀲𑀢𑀺 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀲𑁂𑀓𑁆𑀔𑀸𑀬 𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀇𑀢𑀺𑀧𑀺, 𑀅𑀫𑀢𑀤𑁆𑀯𑀸𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀇𑀢𑀺𑀧𑀻𑀢𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀪𑀯𑁄… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀁… 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂 𑀢𑀡𑁆𑀳𑀸… 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑁄… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀴𑀸𑀬𑀢𑀦𑀁… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀁 … 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸? 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑁋 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸.

‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀲𑀗𑁆𑀔𑀸𑀭𑀲𑀫𑀼𑀤𑀬𑁄; 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀲𑀗𑁆𑀔𑀸𑀭𑁂 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀇𑀤𑀫𑀲𑁆𑀲 𑀥𑀫𑁆𑀫𑁂 𑀜𑀸𑀡𑀁. 𑀲𑁄 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀤𑀺𑀝𑁆𑀞𑁂𑀦 𑀯𑀺𑀤𑀺𑀢𑁂𑀦 𑀅𑀓𑀸𑀮𑀺𑀓𑁂𑀦 𑀧𑀢𑁆𑀢𑁂𑀦 𑀧𑀭𑀺𑀬𑁄𑀕𑀸𑀴𑁆𑀳𑁂𑀦 𑀅𑀢𑀻𑀢𑀸𑀦𑀸𑀕𑀢𑁂𑀦 𑀬𑀁 𑀦𑁂𑀢𑀺.

‘‘𑀬𑁂 𑀔𑁄 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀗𑁆𑀔𑀸𑀭𑁂 𑀅𑀩𑁆𑀪𑀜𑁆𑀜𑀁𑀲𑀼, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀁𑀲𑀼, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀅𑀩𑁆𑀪𑀜𑁆𑀜𑀁𑀲𑀼, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀗𑁆𑀔𑀸𑀭𑁂 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀅𑀪𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀺. 𑀇𑀤𑀫𑀲𑁆𑀲 𑀅𑀦𑁆𑀯𑀬𑁂 𑀜𑀸𑀡𑀁.

𑁪. 𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀁

𑁩𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀲𑀢𑁆𑀢𑀲𑀢𑁆𑀢𑀭𑀺 𑀯𑁄, 𑀪𑀺𑀓𑁆𑀔𑀯𑁂, 𑀜𑀸𑀡𑀯𑀢𑁆𑀣𑀽𑀦𑀺 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀲𑀢𑁆𑀢𑀭𑀺 𑀜𑀸𑀡𑀯𑀢𑁆𑀣𑀽𑀦𑀺? 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁; 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁; 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁; 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁; 𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡𑀁.

‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀜𑀸𑀡𑀁…𑀧𑁂… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀜𑀸𑀡𑀁… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀜𑀸𑀡𑀁… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺 𑀜𑀸𑀡𑀁… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀜𑀸𑀡𑀁… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀜𑀸𑀡𑀁… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀜𑀸𑀡𑀁… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀜𑀸𑀡𑀁… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀜𑀸𑀡𑀁; 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁; 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁; 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁; 𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡𑀁. 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀲𑀢𑁆𑀢𑀭𑀺 𑀜𑀸𑀡𑀯𑀢𑁆𑀣𑀽𑀦𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀁

𑁩𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’𑀦𑁆𑀢𑀺? ‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’𑀢𑀺 𑀪𑀕𑀯𑀸 𑀅𑀯𑁄𑀘, ‘𑀓𑀢𑀫𑀁 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑀁 𑀚𑀭𑀸𑀫𑀭𑀡𑀁 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’𑀦𑁆𑀢𑀺, 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀼, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺.

‘‘𑀓𑀢𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀚𑀸𑀢𑀺, 𑀓𑀲𑁆𑀲 𑀘 𑀧𑀦𑀸𑀬𑀁 𑀚𑀸𑀢𑀻’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘, ‘‘‘𑀓𑀢𑀫𑀸 𑀚𑀸𑀢𑀺, 𑀓𑀲𑁆𑀲 𑀘 𑀧𑀦𑀸𑀬𑀁 𑀚𑀸𑀢𑀻’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑀸 𑀚𑀸𑀢𑀺 𑀅𑀜𑁆𑀜𑀲𑁆𑀲 𑀘 𑀧𑀦𑀸𑀬𑀁 𑀚𑀸𑀢𑀻’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀼, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’’𑀢𑀺.

‘‘𑀓𑀢𑀫𑁄 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑁄, 𑀓𑀲𑁆𑀲 𑀘 𑀧𑀦𑀸𑀬𑀁 𑀪𑀯𑁄’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘, ‘‘‘𑀓𑀢𑀫𑁄 𑀪𑀯𑁄, 𑀓𑀲𑁆𑀲 𑀘 𑀧𑀦𑀸𑀬𑀁 𑀪𑀯𑁄’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑁄 𑀪𑀯𑁄 𑀅𑀜𑁆𑀜𑀲𑁆𑀲 𑀘 𑀧𑀦𑀸𑀬𑀁 𑀪𑀯𑁄’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺; 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀼, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺…𑀧𑁂… ‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’’𑀦𑁆𑀢𑀺.

‘‘𑀓𑀢𑀫𑁂 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀔𑀸𑀭𑀸, 𑀓𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘, ‘‘‘𑀓𑀢𑀫𑁂 𑀲𑀗𑁆𑀔𑀸𑀭𑀸 𑀓𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀼, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺; 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀪𑀺𑀓𑁆𑀔𑀼, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀼, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’’𑀢𑀺.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀼, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. ‘𑀓𑀢𑀫𑀁 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀭𑀸𑀫𑀭𑀡𑀁, 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡𑀁’ 𑀇𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸. 𑀲𑀩𑁆𑀩𑀸𑀦𑀺𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀼, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. ‘𑀓𑀢𑀫𑀸 𑀚𑀸𑀢𑀺, 𑀓𑀲𑁆𑀲 𑀘 𑀧𑀦𑀸𑀬𑀁 𑀚𑀸𑀢𑀺’ 𑀇𑀢𑀺 𑀯𑀸, ‘𑀅𑀜𑁆𑀜𑀸 𑀚𑀸𑀢𑀺, 𑀅𑀜𑁆𑀜𑀲𑁆𑀲 𑀘 𑀧𑀦𑀸𑀬𑀁 𑀚𑀸𑀢𑀺’ 𑀇𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸. 𑀲𑀩𑁆𑀩𑀸𑀦𑀺𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀼, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. 𑀓𑀢𑀫𑁄 𑀪𑀯𑁄…𑀧𑁂… 𑀓𑀢𑀫𑀁 𑀉𑀧𑀸𑀤𑀸𑀦𑀁… 𑀓𑀢𑀫𑀸 𑀢𑀡𑁆𑀳𑀸… 𑀓𑀢𑀫𑀸 𑀯𑁂𑀤𑀦𑀸… 𑀓𑀢𑀫𑁄 𑀨𑀲𑁆𑀲𑁄… 𑀓𑀢𑀫𑀁 𑀲𑀴𑀸𑀬𑀢𑀦𑀁… 𑀓𑀢𑀫𑀁 𑀦𑀸𑀫𑀭𑀽𑀧𑀁… 𑀓𑀢𑀫𑀁 𑀯𑀺𑀜𑁆𑀜𑀸𑀡𑀁…𑀧𑁂….

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀼, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. ‘𑀓𑀢𑀫𑁂 𑀲𑀗𑁆𑀔𑀸𑀭𑀸, 𑀓𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’ 𑀇𑀢𑀺 𑀯𑀸, ‘𑀅𑀜𑁆𑀜𑁂 𑀲𑀗𑁆𑀔𑀸𑀭𑀸, 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’ 𑀇𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁, 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸. 𑀲𑀩𑁆𑀩𑀸𑀦𑀺𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀁

𑁩𑁬. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘‘𑀓𑀢𑀫𑀁 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑀁 𑀚𑀭𑀸𑀫𑀭𑀡𑀁, 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀯𑁂, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺.

‘‘𑀓𑀢𑀫𑀸 𑀚𑀸𑀢𑀺…𑀧𑁂… 𑀓𑀢𑀫𑁄 𑀪𑀯𑁄… 𑀓𑀢𑀫𑀁 𑀉𑀧𑀸𑀤𑀸𑀦𑀁… 𑀓𑀢𑀫𑀸 𑀢𑀡𑁆𑀳𑀸… 𑀓𑀢𑀫𑀸 𑀯𑁂𑀤𑀦𑀸… 𑀓𑀢𑀫𑁄 𑀨𑀲𑁆𑀲𑁄… 𑀓𑀢𑀫𑀁 𑀲𑀴𑀸𑀬𑀢𑀦𑀁… 𑀓𑀢𑀫𑀁 𑀦𑀸𑀫𑀭𑀽𑀧𑀁… 𑀓𑀢𑀫𑀁 𑀯𑀺𑀜𑁆𑀜𑀸𑀡𑀁… 𑀓𑀢𑀫𑁂 𑀲𑀗𑁆𑀔𑀸𑀭𑀸, 𑀓𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀬𑁄 𑀯𑀤𑁂𑀬𑁆𑀬, ‘𑀅𑀜𑁆𑀜𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’𑀢𑀺 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀬𑁄 𑀯𑀤𑁂𑀬𑁆𑀬, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺. 𑀏𑀢𑁂 𑀢𑁂, 𑀪𑀺𑀓𑁆𑀔𑀯𑁂, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’’𑀢𑀺.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀯𑁂, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. ‘𑀓𑀢𑀫𑀁 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀭𑀸𑀫𑀭𑀡𑀁, 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡𑀁’ 𑀇𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁, 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸. 𑀲𑀩𑁆𑀩𑀸𑀦𑀺𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯, 𑀪𑀺𑀓𑁆𑀔𑀯𑁂, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺. 𑀓𑀢𑀫𑀸 𑀚𑀸𑀢𑀺…𑀧𑁂… 𑀓𑀢𑀫𑁄 𑀪𑀯𑁄… 𑀓𑀢𑀫𑀁 𑀉𑀧𑀸𑀤𑀸𑀦𑀁… 𑀓𑀢𑀫𑀸 𑀢𑀡𑁆𑀳𑀸… 𑀓𑀢𑀫𑀸 𑀯𑁂𑀤𑀦𑀸… 𑀓𑀢𑀫𑁄 𑀨𑀲𑁆𑀲𑁄… 𑀓𑀢𑀫𑀁 𑀲𑀴𑀸𑀬𑀢𑀦𑀁… 𑀓𑀢𑀫𑀁 𑀦𑀸𑀫𑀭𑀽𑀧𑀁… 𑀓𑀢𑀫𑀁 𑀯𑀺𑀜𑁆𑀜𑀸𑀡𑀁… ‘𑀓𑀢𑀫𑁂 𑀲𑀗𑁆𑀔𑀸𑀭𑀸, 𑀓𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’ 𑀇𑀢𑀺 𑀯𑀸, ‘𑀅𑀜𑁆𑀜𑁂 𑀲𑀗𑁆𑀔𑀸𑀭𑀸, 𑀅𑀜𑁆𑀜𑀲𑁆𑀲 𑀘 𑀧𑀦𑀺𑀫𑁂 𑀲𑀗𑁆𑀔𑀸𑀭𑀸’ 𑀇𑀢𑀺 𑀯𑀸; ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁’ 𑀇𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁’ 𑀇𑀢𑀺 𑀯𑀸. 𑀲𑀩𑁆𑀩𑀸𑀦𑀺𑀲𑁆𑀲 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀦𑀢𑀼𑀫𑁆𑀳𑀲𑀼𑀢𑁆𑀢𑀁

𑁩𑁭. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑁄 𑀢𑀼𑀫𑁆𑀳𑀸𑀓𑀁 𑀦𑀧𑀺 𑀅𑀜𑁆𑀜𑁂𑀲𑀁. 𑀧𑀼𑀭𑀸𑀡𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀁 𑀯𑁂𑀤𑀦𑀺𑀬𑀁 𑀤𑀝𑁆𑀞𑀩𑁆𑀩𑀁’’.

‘‘𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀜𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺; 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺, 𑀬𑀤𑀺𑀤𑀁 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺. 𑀲𑀢𑁆𑀢𑀫𑀁.

𑁮. 𑀘𑁂𑀢𑀦𑀸𑀲𑀼𑀢𑁆𑀢𑀁

𑁩𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺 𑀬𑀜𑁆𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 [𑀆𑀭𑀫𑀡𑀫𑁂𑀢𑀁 (?)] 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’’.

‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀦𑁄 𑀘𑁂 𑀧𑀓𑀧𑁆𑀧𑁂𑀢𑀺, 𑀅𑀣 𑀘𑁂 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁄 𑀘𑁂𑀯 𑀘𑁂𑀢𑁂𑀢𑀺 𑀦𑁄 𑀘 𑀧𑀓𑀧𑁆𑀧𑁂𑀢𑀺 𑀦𑁄 𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀅𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀅𑀯𑀺𑀭𑀽𑀴𑁆𑀳𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀺. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀁

𑁩𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺 𑀬𑀜𑁆𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁; 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄; 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸…𑀧𑁂… 𑀢𑀡𑁆𑀳𑀸… 𑀉𑀧𑀸𑀤𑀸𑀦𑀁… 𑀪𑀯𑁄… 𑀚𑀸𑀢𑀺… 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’’.

‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀦𑁄 𑀘𑁂 𑀧𑀓𑀧𑁆𑀧𑁂𑀢𑀺, 𑀅𑀣 𑀘𑁂 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁄 𑀘𑁂𑀯 𑀘𑁂𑀢𑁂𑀢𑀺 𑀦𑁄 𑀘 𑀧𑀓𑀧𑁆𑀧𑁂𑀢𑀺 𑀦𑁄 𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀅𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀅𑀯𑀺𑀭𑀽𑀴𑁆𑀳𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀦 𑀳𑁄𑀢𑀺. 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀢𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀁

𑁪𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺 𑀬𑀜𑁆𑀘 𑀅𑀦𑀼𑀲𑁂𑀢𑀺 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀦𑀢𑀺 𑀳𑁄𑀢𑀺. 𑀦𑀢𑀺𑀬𑀸 𑀲𑀢𑀺 𑀆𑀕𑀢𑀺𑀕𑀢𑀺 𑀳𑁄𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁂 𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’’.

‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺 𑀦𑁄 𑀘𑁂 𑀧𑀓𑀧𑁆𑀧𑁂𑀢𑀺 𑀅𑀣 𑀘𑁂 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀦𑀢𑀺 𑀳𑁄𑀢𑀺. 𑀦𑀢𑀺𑀬𑀸 𑀲𑀢𑀺 𑀆𑀕𑀢𑀺𑀕𑀢𑀺 𑀳𑁄𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁂 𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁄 𑀘𑁂𑀯 𑀘𑁂𑀢𑁂𑀢𑀺 𑀦𑁄 𑀘 𑀧𑀓𑀧𑁆𑀧𑁂𑀢𑀺 𑀦𑁄 𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀆𑀭𑀫𑁆𑀫𑀡𑁂 𑀅𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀅𑀯𑀺𑀭𑀽𑀴𑁆𑀳𑁂 𑀦𑀢𑀺 𑀦 𑀳𑁄𑀢𑀺. 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀤𑀲𑀫𑀁.

𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀪𑀽𑀢𑀫𑀺𑀤𑀁 𑀓𑀴𑀸𑀭𑀜𑁆𑀘, 𑀤𑀼𑀯𑁂 𑀘 𑀜𑀸𑀡𑀯𑀢𑁆𑀣𑀽𑀦𑀺;

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀘 𑀤𑁆𑀯𑁂, 𑀦𑀢𑀼𑀫𑁆𑀳𑀸 𑀘𑁂𑀢𑀦𑀸 𑀢𑀬𑁄𑀢𑀺.