𑁨. 𑀆𑀳𑀸𑀭𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀁

𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂…𑀧𑁂… 𑀏𑀢𑀤𑀯𑁄𑀘 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 [𑀓𑀩𑀴𑀺𑀁𑀓𑀸𑀭𑁄 (𑀲𑀻. 𑀧𑀻.), 𑀓𑀯𑀴𑀻𑀓𑀸𑀭𑁄 (𑀲𑁆𑀬𑀸. 𑀓𑀁.)] 𑀆𑀳𑀸𑀭𑁄 𑁋 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬’’.

‘‘𑀇𑀫𑁂, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸? 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸 𑀢𑀡𑁆𑀳𑀸𑀲𑀫𑀼𑀤𑀬𑀸 𑀢𑀡𑁆𑀳𑀸𑀚𑀸𑀢𑀺𑀓𑀸 𑀢𑀡𑁆𑀳𑀸𑀧𑀪𑀯𑀸. 𑀢𑀡𑁆𑀳𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸? 𑀢𑀡𑁆𑀳𑀸 𑀯𑁂𑀤𑀦𑀸𑀦𑀺𑀤𑀸𑀦𑀸 𑀯𑁂𑀤𑀦𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀚𑀸𑀢𑀺𑀓𑀸 𑀯𑁂𑀤𑀦𑀸𑀧𑀪𑀯𑀸. 𑀯𑁂𑀤𑀦𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸? 𑀯𑁂𑀤𑀦𑀸 𑀨𑀲𑁆𑀲𑀦𑀺𑀤𑀸𑀦𑀸 𑀨𑀲𑁆𑀲𑀲𑀫𑀼𑀤𑀬𑀸 𑀨𑀲𑁆𑀲𑀚𑀸𑀢𑀺𑀓𑀸 𑀨𑀲𑁆𑀲𑀧𑀪𑀯𑀸. 𑀨𑀲𑁆𑀲𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄? 𑀨𑀲𑁆𑀲𑁄 𑀲𑀴𑀸𑀬𑀢𑀦𑀦𑀺𑀤𑀸𑀦𑁄 𑀲𑀴𑀸𑀬𑀢𑀦𑀲𑀫𑀼𑀤𑀬𑁄 𑀲𑀴𑀸𑀬𑀢𑀦𑀚𑀸𑀢𑀺𑀓𑁄 𑀲𑀴𑀸𑀬𑀢𑀦𑀧𑀪𑀯𑁄. 𑀲𑀴𑀸𑀬𑀢𑀦𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁? 𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑀦𑀺𑀤𑀸𑀦𑀁 𑀦𑀸𑀫𑀭𑀽𑀧𑀲𑀫𑀼𑀤𑀬𑀁 𑀦𑀸𑀫𑀭𑀽𑀧𑀚𑀸𑀢𑀺𑀓𑀁 𑀦𑀸𑀫𑀭𑀽𑀧𑀧𑀪𑀯𑀁. 𑀦𑀸𑀫𑀭𑀽𑀧𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁? 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀦𑀺𑀤𑀸𑀦𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀯𑀺𑀜𑁆𑀜𑀸𑀡𑀚𑀸𑀢𑀺𑀓𑀁 𑀯𑀺𑀜𑁆𑀜𑀸𑀡𑀧𑀪𑀯𑀁. 𑀯𑀺𑀜𑁆𑀜𑀸𑀡𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁? 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀲𑀗𑁆𑀔𑀸𑀭𑀚𑀸𑀢𑀺𑀓𑀁 𑀲𑀗𑁆𑀔𑀸𑀭𑀧𑀪𑀯𑀁. 𑀲𑀗𑁆𑀔𑀸𑀭𑀸 𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸? 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀦𑀺𑀤𑀸𑀦𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀚𑀸𑀢𑀺𑀓𑀸 𑀅𑀯𑀺𑀚𑁆𑀚𑀸𑀧𑀪𑀯𑀸.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄 …𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑀼𑀢𑁆𑀢𑀁

𑁧𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘‘𑀆𑀳𑀸𑀭𑁂𑀢𑀻’𑀢𑀺 𑀅𑀳𑀁 𑀦 𑀯𑀤𑀸𑀫𑀺. ‘𑀆𑀳𑀸𑀭𑁂𑀢𑀻’𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 𑁋 ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀆𑀳𑀸𑀭𑁂𑀢𑀻’𑀢𑀺? 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺. 𑀏𑀯𑀁 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑁄, 𑀢𑀲𑁆𑀫𑀺𑀁 𑀪𑀽𑀢𑁂 𑀲𑀢𑀺 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀨𑀼𑀲𑀢𑀻’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘‘𑀨𑀼𑀲𑀢𑀻’𑀢𑀺 𑀅𑀳𑀁 𑀦 𑀯𑀤𑀸𑀫𑀺. ‘𑀨𑀼𑀲𑀢𑀻’𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 𑁋 ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀨𑀼𑀲𑀢𑀻’𑀢𑀺? 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺. 𑀏𑀯𑀁 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘𑀓𑀺𑀁𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀨𑀲𑁆𑀲𑁄’𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀬𑀢𑀻’’𑀢𑀺 [𑀯𑁂𑀤𑀺𑀬𑀢𑀻𑀢𑀺 (𑀲𑀻. 𑀧𑀻. 𑀓.)]? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘‘𑀯𑁂𑀤𑀬𑀢𑀻’𑀢𑀺 𑀅𑀳𑀁 𑀦 𑀯𑀤𑀸𑀫𑀺. ‘𑀯𑁂𑀤𑀬𑀢𑀻’𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 𑁋 ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀬𑀢𑀻’𑀢𑀺? 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺. 𑀏𑀯𑀁 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘𑀓𑀺𑀁𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀯𑁂𑀤𑀦𑀸’𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀢𑀲𑀢𑀻’’𑀢𑀺 [𑀢𑀡𑁆𑀳𑀻𑀬𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁.)]? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘‘𑀢𑀲𑀢𑀻’𑀢𑀺 𑀅𑀳𑀁 𑀦 𑀯𑀤𑀸𑀫𑀺. ‘𑀢𑀲𑀢𑀻’𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 𑁋 ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀢𑀲𑀢𑀻’𑀢𑀺? 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺. 𑀏𑀯𑀁 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘𑀓𑀺𑀁𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀢𑀡𑁆𑀳𑀸’𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’’𑀦𑁆𑀢𑀺.

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀤𑀺𑀬𑀢𑀻’’𑀢𑀺? ‘‘𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘‘𑀉𑀧𑀸𑀤𑀺𑀬𑀢𑀻’𑀢𑀺 𑀅𑀳𑀁 𑀦 𑀯𑀤𑀸𑀫𑀺. ‘𑀉𑀧𑀸𑀤𑀺𑀬𑀢𑀻’𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 𑁋 ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀤𑀺𑀬𑀢𑀻’𑀢𑀺? 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺. 𑀏𑀯𑀁 𑀫𑀁 𑀅𑀯𑀤𑀦𑁆𑀢𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘𑀓𑀺𑀁𑀧𑀘𑁆𑀘𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀤𑀸𑀦’𑀦𑁆𑀢𑀺, 𑀏𑀲 𑀓𑀮𑁆𑀮𑁄 𑀧𑀜𑁆𑀳𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁 𑁋 ‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁; 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀙𑀦𑁆𑀦𑀁 𑀢𑁆𑀯𑁂𑀯, 𑀨𑀕𑁆𑀕𑀼𑀦, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄; 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄; 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄; 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄; 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺; 𑀚𑀸𑀢𑀺𑀁…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸; 𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 [𑀩𑁆𑀭𑀸𑀳𑁆𑀫𑀜𑁆𑀜𑀢𑁆𑀣𑀁 (𑀲𑁆𑀬𑀸. 𑀓𑀁.) 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀚𑀭𑀸𑀫𑀭𑀡𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺; 𑀚𑀸𑀢𑀺𑀁…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸; 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺’’?

‘‘𑀚𑀭𑀸𑀫𑀭𑀡𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺; 𑀚𑀸𑀢𑀺𑀁…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺. 𑀇𑀫𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦𑀧𑁆𑀧𑀚𑀸𑀦𑀦𑁆𑀢𑀺. 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂 𑀥𑀫𑁆𑀫𑁂 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂 𑀥𑀫𑁆𑀫𑁂 𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺?

‘‘𑀚𑀭𑀸𑀫𑀭𑀡𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺; 𑀚𑀸𑀢𑀺𑀁…𑀧𑁂… 𑀪𑀯𑀁… 𑀉𑀧𑀸𑀤𑀸𑀦𑀁… 𑀢𑀡𑁆𑀳𑀁… 𑀯𑁂𑀤𑀦𑀁… 𑀨𑀲𑁆𑀲𑀁… 𑀲𑀴𑀸𑀬𑀢𑀦𑀁… 𑀦𑀸𑀫𑀭𑀽𑀧𑀁… 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀸𑀭𑁂 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺. 𑀇𑀫𑁂 𑀥𑀫𑁆𑀫𑁂 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀧𑀚𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀦𑁆𑀢𑀺. 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸, 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸. 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑀘𑁆𑀘𑀸𑀦𑀕𑁄𑀢𑁆𑀢𑀲𑀼𑀢𑁆𑀢𑀁

𑁧𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀘𑁆𑀘𑀸𑀦𑀕𑁄𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀓𑀘𑁆𑀘𑀸𑀦𑀕𑁄𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺?

‘‘𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁆𑀯𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑁋 𑀅𑀢𑁆𑀣𑀺𑀢𑀜𑁆𑀘𑁂𑀯 𑀦𑀢𑁆𑀣𑀺𑀢𑀜𑁆𑀘. 𑀮𑁄𑀓𑀲𑀫𑀼𑀤𑀬𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸 𑀲𑀸 𑀦 𑀳𑁄𑀢𑀺. 𑀮𑁄𑀓𑀦𑀺𑀭𑁄𑀥𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀅𑀢𑁆𑀣𑀺𑀢𑀸 𑀲𑀸 𑀦 𑀳𑁄𑀢𑀺. 𑀉𑀧𑀬𑀼𑀧𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑁄 [𑀉𑀧𑀸𑀬𑀼𑀧𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀔𑁆𑀯𑀸𑀬𑀁, 𑀓𑀘𑁆𑀘𑀸𑀦, 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦. 𑀢𑀜𑁆𑀘𑀸𑀬𑀁 𑀉𑀧𑀬𑀼𑀧𑀸𑀤𑀸𑀦𑀁 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀁 𑀅𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀁 𑀦 𑀉𑀧𑁂𑀢𑀺 𑀦 𑀉𑀧𑀸𑀤𑀺𑀬𑀢𑀺 𑀦𑀸𑀥𑀺𑀝𑁆𑀞𑀸𑀢𑀺 𑁋 ‘𑀅𑀢𑁆𑀢𑀸 𑀫𑁂’𑀢𑀺. ‘𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀚𑁆𑀛𑀢𑀻’𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀧𑀭𑀧𑀘𑁆𑀘𑀬𑀸 𑀜𑀸𑀡𑀫𑁂𑀯𑀲𑁆𑀲 𑀏𑀢𑁆𑀣 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀓𑀘𑁆𑀘𑀸𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺.

‘‘‘𑀲𑀩𑁆𑀩𑀁 𑀅𑀢𑁆𑀣𑀻’𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄. ‘𑀲𑀩𑁆𑀩𑀁 𑀦𑀢𑁆𑀣𑀻’𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄. 𑀏𑀢𑁂 𑀢𑁂, 𑀓𑀘𑁆𑀘𑀸𑀦, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺. 𑀧𑀜𑁆𑀘𑀫𑀁.

𑁬. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀁

𑁧𑁬. 𑀲𑀸𑀯𑀢𑁆𑀣𑀺𑀬𑀁 …𑀧𑁂… 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀥𑀫𑁆𑀫𑀓𑀣𑀺𑀓𑁄 𑀥𑀫𑁆𑀫𑀓𑀣𑀺𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑀓𑀣𑀺𑀓𑁄 𑀳𑁄𑀢𑀻’’𑀢𑀺?

‘‘𑀚𑀭𑀸𑀫𑀭𑀡𑀲𑁆𑀲 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, ‘𑀥𑀫𑁆𑀫𑀓𑀣𑀺𑀓𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬. 𑀚𑀭𑀸𑀫𑀭𑀡𑀲𑁆𑀲 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, ‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬. 𑀚𑀭𑀸𑀫𑀭𑀡𑀲𑁆𑀲 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, ‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬.

‘‘𑀚𑀸𑀢𑀺𑀬𑀸 𑀘𑁂 𑀪𑀺𑀓𑁆𑀔𑀼…𑀧𑁂… 𑀪𑀯𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀉𑀧𑀸𑀤𑀸𑀦𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀢𑀡𑁆𑀳𑀸𑀬 𑀘𑁂 𑀪𑀺𑀓𑁆𑀔𑀼… 𑀯𑁂𑀤𑀦𑀸𑀬 𑀘𑁂 𑀪𑀺𑀓𑁆𑀔𑀼… 𑀨𑀲𑁆𑀲𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀲𑀴𑀸𑀬𑀢𑀦𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀦𑀸𑀫𑀭𑀽𑀧𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀯𑀺𑀜𑁆𑀜𑀸𑀡𑀲𑁆𑀲 𑀘𑁂 𑀪𑀺𑀓𑁆𑀔𑀼… 𑀲𑀗𑁆𑀔𑀸𑀭𑀸𑀦𑀁 𑀘𑁂 𑀪𑀺𑀓𑁆𑀔𑀼… 𑀅𑀯𑀺𑀚𑁆𑀚𑀸𑀬 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, ‘𑀥𑀫𑁆𑀫𑀓𑀣𑀺𑀓𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬. 𑀅𑀯𑀺𑀚𑁆𑀚𑀸𑀬 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, ‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬. 𑀅𑀯𑀺𑀚𑁆𑀚𑀸𑀬 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, ‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺.

𑁭. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀁

𑁧𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙𑁂𑀬𑁆𑀬𑀸𑀫 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀓𑀜𑁆𑀘𑀺𑀤𑁂𑀯 [𑀓𑀺𑀜𑁆𑀘𑀺𑀤𑁂𑀯 (𑀓.)] 𑀤𑁂𑀲𑀁, 𑀲𑀘𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺.

‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀓𑀲𑁆𑀲𑀧, 𑀧𑀜𑁆𑀳𑀲𑁆𑀲; 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀼𑀘𑁆𑀙𑁂𑀬𑁆𑀬𑀸𑀫 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀓𑀜𑁆𑀘𑀺𑀤𑁂𑀯 𑀤𑁂𑀲𑀁, 𑀲𑀘𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺. ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀓𑀲𑁆𑀲𑀧, 𑀧𑀜𑁆𑀳𑀲𑁆𑀲; 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄…𑀧𑁂… 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀧𑀦 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀩𑀳𑀼𑀤𑁂𑀯 𑀧𑀼𑀘𑁆𑀙𑀺𑀢𑀼𑀓𑀸𑀫𑀸’’𑀢𑀺. ‘‘𑀧𑀼𑀘𑁆𑀙, 𑀓𑀲𑁆𑀲𑀧, 𑀬𑀤𑀸𑀓𑀗𑁆𑀔𑀲𑀻’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, ‘𑀲𑀬𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀧𑀭𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀧𑀦 𑀪𑁄 𑀕𑁄𑀢𑀫, 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀦𑀢𑁆𑀣𑀺 𑀤𑀼𑀓𑁆𑀔’𑀦𑁆𑀢𑀺? ‘𑀦 𑀔𑁄, 𑀓𑀲𑁆𑀲𑀧, 𑀦𑀢𑁆𑀣𑀺 𑀤𑀼𑀓𑁆𑀔𑀁. 𑀅𑀢𑁆𑀣𑀺 𑀔𑁄, 𑀓𑀲𑁆𑀲𑀧, 𑀤𑀼𑀓𑁆𑀔’𑀦𑁆𑀢𑀺. ‘𑀢𑁂𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀦 𑀧𑀲𑁆𑀲𑀢𑀻’𑀢𑀺. ‘𑀦 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔𑀁 𑀦 𑀚𑀸𑀦𑀸𑀫𑀺, 𑀦 𑀧𑀲𑁆𑀲𑀸𑀫𑀺. 𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔𑀁; 𑀧𑀲𑁆𑀲𑀸𑀫𑀺 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔’’’𑀦𑁆𑀢𑀺.

‘‘𑀓𑀺 𑀦𑀼 𑀔𑁄, 𑀪𑁄 𑀕𑁄𑀢𑀫, ‘𑀲𑀬𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀧𑀭𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀦𑀢𑁆𑀣𑀺 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦 𑀔𑁄, 𑀓𑀲𑁆𑀲𑀧, 𑀦𑀢𑁆𑀣𑀺 𑀤𑀼𑀓𑁆𑀔𑀁, 𑀅𑀢𑁆𑀣𑀺 𑀔𑁄, 𑀓𑀲𑁆𑀲𑀧, 𑀤𑀼𑀓𑁆𑀔’𑀦𑁆𑀢𑀺 𑀯𑀤𑁂𑀲𑀺. ‘𑀢𑁂𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔𑀁 𑀦 𑀚𑀸𑀦𑀸𑀫𑀺 𑀦 𑀧𑀲𑁆𑀲𑀸𑀫𑀺. 𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔𑀁; 𑀧𑀲𑁆𑀲𑀸𑀫𑀺 𑀔𑁆𑀯𑀸𑀳𑀁, 𑀓𑀲𑁆𑀲𑀧, 𑀤𑀼𑀓𑁆𑀔’𑀦𑁆𑀢𑀺 𑀯𑀤𑁂𑀲𑀺. 𑀆𑀘𑀺𑀓𑁆𑀔𑀢𑀼 𑀘 [𑀅𑀬𑀁 𑀘𑀓𑀸𑀭𑁄 𑀲𑀻. 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀤𑀼𑀓𑁆𑀔𑀁. 𑀤𑁂𑀲𑁂𑀢𑀼 𑀘 [𑀅𑀬𑀁 𑀘𑀓𑀸𑀭𑁄 𑀲𑀻. 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀤𑀼𑀓𑁆𑀔’’𑀦𑁆𑀢𑀺.

‘‘‘𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’𑀢𑀺 [𑀧𑀝𑀺𑀲𑀁𑀯𑁂𑀤𑀺𑀬𑀢𑀻𑀢𑀺 (𑀲𑀻. 𑀧𑀻. 𑀓.)] 𑀔𑁄, 𑀓𑀲𑁆𑀲𑀧, 𑀆𑀤𑀺𑀢𑁄 𑀲𑀢𑁄 ‘𑀲𑀬𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀯𑀤𑀁 𑀲𑀲𑁆𑀲𑀢𑀁 𑀏𑀢𑀁 𑀧𑀭𑁂𑀢𑀺. ‘𑀅𑀜𑁆𑀜𑁄 𑀓𑀭𑁄𑀢𑀺 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀬𑀢𑀻’𑀢𑀺 𑀔𑁄, 𑀓𑀲𑁆𑀲𑀧, 𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄 ‘𑀧𑀭𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀯𑀤𑀁 𑀉𑀘𑁆𑀙𑁂𑀤𑀁 𑀏𑀢𑀁 𑀧𑀭𑁂𑀢𑀺. 𑀏𑀢𑁂 𑀢𑁂, 𑀓𑀲𑁆𑀲𑀧, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬…𑀧𑁂… 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

‘‘𑀬𑁄 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀲𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀢𑀺. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 [𑀅𑀘𑁆𑀘𑀬𑁂𑀦 𑀧𑀭𑀺𑀯𑀼𑀝𑁆𑀞𑀧𑀭𑀺𑀯𑀸𑀲𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] (𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀁) 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀽 𑀆𑀓𑀗𑁆𑀔𑀫𑀸𑀦𑀸 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀧𑀩𑁆𑀩𑀸𑀚𑁂𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀧𑀺 𑀘 𑀫𑀬𑀸 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸’’𑀢𑀺.

‘‘𑀲𑀘𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀢𑀺. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 [𑀅𑀘𑁆𑀘𑀬𑁂𑀦 𑀧𑀭𑀺𑀯𑀼𑀝𑁆𑀞𑀧𑀭𑀺𑀯𑀸𑀲𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] (𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀁) 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀽 𑀆𑀓𑀗𑁆𑀔𑀫𑀸𑀦𑀸 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀧𑀩𑁆𑀩𑀸𑀚𑁂𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀳𑀁 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀲𑁆𑀲𑀸𑀫𑀺, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 [𑀅𑀘𑁆𑀘𑀬𑁂𑀦 𑀧𑀭𑀺𑀯𑀼𑀝𑁆𑀞𑀧𑀭𑀺𑀯𑀸𑀲𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] (𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀁) 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀼 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀼 𑀪𑀺𑀓𑁆𑀔𑀼𑀪𑀸𑀯𑀸𑀬𑀸’’𑀢𑀺.

𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀲𑀢𑁆𑀢𑀫𑀁.

𑁮. 𑀢𑀺𑀫𑁆𑀩𑀭𑀼𑀓𑀲𑀼𑀢𑁆𑀢𑀁

𑁧𑁮. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀢𑀺𑀫𑁆𑀩𑀭𑀼𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀢𑀺𑀫𑁆𑀩𑀭𑀼𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀪𑀕𑀯𑀸 𑀅𑀯𑁄𑀘. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀦𑀢𑁆𑀣𑀺 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? ‘𑀦 𑀔𑁄, 𑀢𑀺𑀫𑁆𑀩𑀭𑀼𑀓, 𑀦𑀢𑁆𑀣𑀺 𑀲𑀼𑀔𑀤𑀼𑀓𑁆𑀔𑀁; 𑀅𑀢𑁆𑀣𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺. ‘𑀢𑁂𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀲𑀼𑀔𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀦 𑀧𑀲𑁆𑀲𑀢𑀻’𑀢𑀺? ‘𑀦 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔𑀁 𑀦 𑀚𑀸𑀦𑀸𑀫𑀺, 𑀦 𑀧𑀲𑁆𑀲𑀸𑀫𑀺. 𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔𑀁; 𑀧𑀲𑁆𑀲𑀸𑀫𑀺 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔’’’𑀦𑁆𑀢𑀺.

‘‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀢𑀺𑀫𑁆𑀩𑀭𑀼𑀓𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀦𑀢𑁆𑀣𑀺 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦 𑀔𑁄, 𑀢𑀺𑀫𑁆𑀩𑀭𑀼𑀓, 𑀦𑀢𑁆𑀣𑀺 𑀲𑀼𑀔𑀤𑀼𑀓𑁆𑀔𑀁; 𑀅𑀢𑁆𑀣𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀯𑀤𑁂𑀲𑀺. ‘𑀢𑁂𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀲𑀼𑀔𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀦 𑀧𑀲𑁆𑀲𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔𑀁 𑀦 𑀚𑀸𑀦𑀸𑀫𑀺, 𑀦 𑀧𑀲𑁆𑀲𑀸𑀫𑀺. 𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔𑀁; 𑀧𑀲𑁆𑀲𑀸𑀫𑀺 𑀔𑁆𑀯𑀸𑀳𑀁, 𑀢𑀺𑀫𑁆𑀩𑀭𑀼𑀓, 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀯𑀤𑁂𑀲𑀺. 𑀆𑀘𑀺𑀓𑁆𑀔𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑀼𑀔𑀤𑀼𑀓𑁆𑀔𑀁. 𑀤𑁂𑀲𑁂𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺.

‘‘‘𑀲𑀸 𑀯𑁂𑀤𑀦𑀸, 𑀲𑁄 𑀯𑁂𑀤𑀬𑀢𑀻’𑀢𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀆𑀤𑀺𑀢𑁄 𑀲𑀢𑁄 ‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀏𑀯𑀫𑁆𑀧𑀸𑀳𑀁 𑀦 𑀯𑀤𑀸𑀫𑀺. ‘𑀅𑀜𑁆𑀜𑀸 𑀯𑁂𑀤𑀦𑀸, 𑀅𑀜𑁆𑀜𑁄 𑀯𑁂𑀤𑀬𑀢𑀻’𑀢𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄 ‘𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺 𑀏𑀯𑀫𑁆𑀧𑀸𑀳𑀁 𑀦 𑀯𑀤𑀸𑀫𑀺. 𑀏𑀢𑁂 𑀢𑁂, 𑀢𑀺𑀫𑁆𑀩𑀭𑀼𑀓, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀢𑀺𑀫𑁆𑀩𑀭𑀼𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀁

𑁧𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀏𑀯𑀫𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄. 𑀇𑀢𑀺 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀁, 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁, 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄 𑀲𑀴𑁂𑀯𑀸𑀬𑀢𑀦𑀸𑀦𑀺 [𑀲𑀴𑀸𑀬𑀢𑀦𑀸𑀦𑀺 (𑀓.)], 𑀬𑁂𑀳𑀺 𑀨𑀼𑀝𑁆𑀞𑁄 𑀩𑀸𑀮𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑀬𑀢𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦’’.

‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀏𑀯𑀫𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄. 𑀇𑀢𑀺 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀁, 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁, 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄 𑀲𑀴𑁂𑀯𑀸𑀬𑀢𑀦𑀸𑀦𑀺, 𑀬𑁂𑀳𑀺 𑀨𑀼𑀝𑁆𑀞𑁄 𑀧𑀡𑁆𑀟𑀺𑀢𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑀬𑀢𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦’’.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀓𑁄 𑀯𑀺𑀲𑁂𑀲𑁄 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 [𑀅𑀥𑀺𑀧𑁆𑀧𑀸𑀬𑁄 (𑀲𑀻. 𑀧𑀻. 𑀓.), 𑀅𑀥𑀺𑀧𑁆𑀧𑀸𑀬𑀲𑁄 (𑀲𑁆𑀬𑀸. 𑀓𑀁.) 𑀅𑀥𑀺 + 𑀧 + 𑀬𑀲𑀼 + 𑀡 + 𑀲𑀻 = 𑀅𑀥𑀺𑀧𑁆𑀧𑀬𑀸𑀲𑁄] 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀧𑀡𑁆𑀟𑀺𑀢𑀲𑁆𑀲 𑀩𑀸𑀮𑁂𑀦𑀸’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸, 𑀪𑀕𑀯𑀁𑀦𑁂𑀢𑁆𑀢𑀺𑀓𑀸, 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀩𑀸𑀮𑀲𑁆𑀲 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀸 𑀲𑀸 𑀘 𑀢𑀡𑁆𑀳𑀸 𑀅𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀅𑀘𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀢𑀲𑁆𑀫𑀸 𑀩𑀸𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄 𑀳𑁄𑀢𑀺, 𑀲𑁄 𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺. 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀧𑀡𑁆𑀟𑀺𑀢𑀲𑁆𑀲 𑀧𑀳𑀻𑀦𑀸, 𑀲𑀸 𑀘 𑀢𑀡𑁆𑀳𑀸 𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀘𑀭𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀢𑀲𑁆𑀫𑀸 𑀧𑀡𑁆𑀟𑀺𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀦 𑀓𑀸𑀬𑀽𑀧𑀕𑁄 𑀳𑁄𑀢𑀺. 𑀲𑁄 𑀅𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺. 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑁂𑀲𑁄, 𑀅𑀬𑀁 𑀅𑀥𑀺𑀧𑁆𑀧𑀬𑀸𑀲𑁄, 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀧𑀡𑁆𑀟𑀺𑀢𑀲𑁆𑀲 𑀩𑀸𑀮𑁂𑀦 𑀬𑀤𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺. 𑀦𑀯𑀫𑀁.

𑁧𑁦. 𑀧𑀘𑁆𑀘𑀬𑀲𑀼𑀢𑁆𑀢𑀁

𑁨𑁦. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀘 𑀥𑀫𑁆𑀫𑁂. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄? 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁. 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁, 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑀁 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀅𑀪𑀺𑀲𑀫𑁂𑀢𑀺. 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀪𑀺𑀲𑀫𑁂𑀢𑁆𑀯𑀸 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀸𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺. ‘𑀧𑀲𑁆𑀲𑀣𑀸’𑀢𑀺 𑀘𑀸𑀳 𑁋 ‘𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀁’’’.

‘‘𑀪𑀯𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀸𑀢𑀺…𑀧𑁂… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀪𑀯𑁄… 𑀢𑀡𑁆𑀳𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀁… 𑀯𑁂𑀤𑀦𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸… 𑀨𑀲𑁆𑀲𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑁄… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀴𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀦𑀸𑀫𑀭𑀽𑀧𑀁… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀁, 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑀁 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀅𑀪𑀺𑀲𑀫𑁂𑀢𑀺. 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀪𑀺𑀲𑀫𑁂𑀢𑁆𑀯𑀸 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀸𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺. ‘𑀧𑀲𑁆𑀲𑀣𑀸’𑀢𑀺 𑀘𑀸𑀳 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸’. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀬𑀸 𑀢𑀢𑁆𑀭 𑀢𑀣𑀢𑀸 𑀅𑀯𑀺𑀢𑀣𑀢𑀸 𑀅𑀦𑀜𑁆𑀜𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸? 𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁. 𑀚𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀪𑀯𑁄, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄. 𑀉𑀧𑀸𑀤𑀸𑀦𑀁 𑀪𑀺𑀓𑁆𑀔𑀯𑁂…𑀧𑁂… 𑀢𑀡𑁆𑀳𑀸, 𑀪𑀺𑀓𑁆𑀔𑀯𑁂… 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂… 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂… 𑀲𑀴𑀸𑀬𑀢𑀦𑀁, 𑀪𑀺𑀓𑁆𑀔𑀯𑁂… 𑀦𑀸𑀫𑀭𑀽𑀧𑀁, 𑀪𑀺𑀓𑁆𑀔𑀯𑁂… 𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂… 𑀲𑀗𑁆𑀔𑀸𑀭𑀸, 𑀪𑀺𑀓𑁆𑀔𑀯𑁂… 𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 ‘𑀅𑀬𑀜𑁆𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀇𑀫𑁂 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’ 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀲𑁄 𑀯𑀢 𑀧𑀼𑀩𑁆𑀩𑀦𑁆𑀢𑀁 𑀯𑀸 𑀧𑀝𑀺𑀥𑀸𑀯𑀺𑀲𑁆𑀲𑀢𑀺 𑁋 ‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 [𑀦𑀼 𑀔𑁆𑀯𑀸𑀳𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺; 𑀅𑀧𑀭𑀦𑁆𑀢𑀁 𑀯𑀸 𑀉𑀧𑀥𑀸𑀯𑀺𑀲𑁆𑀲𑀢𑀺 [𑀅𑀧𑀥𑀸𑀯𑀺𑀲𑁆𑀲𑀢𑀺 (𑀓.)] 𑁋 ‘𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺; 𑀏𑀢𑀭𑀳𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀪𑀯𑀺𑀲𑁆𑀲𑀢𑀺 𑁋 ‘𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀬𑀜𑁆𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀇𑀫𑁂 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸’’𑀢𑀺. 𑀤𑀲𑀫𑀁.

𑀆𑀳𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀳𑀸𑀭𑀁 𑀨𑀕𑁆𑀕𑀼𑀦𑁄 𑀘𑁂𑀯, 𑀤𑁆𑀯𑁂 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀓𑀘𑁆𑀘𑀸𑀦𑀕𑁄𑀢𑁆𑀢𑁄 𑀥𑀫𑁆𑀫𑀓𑀣𑀺𑀓𑀁, 𑀅𑀘𑁂𑀮𑀁 𑀢𑀺𑀫𑁆𑀩𑀭𑀼𑀓𑁂𑀦 𑀘;

𑀩𑀸𑀮𑀧𑀡𑁆𑀟𑀺𑀢𑀢𑁄 𑀘𑁂𑀯, 𑀤𑀲𑀫𑁄 𑀧𑀘𑁆𑀘𑀬𑁂𑀦 𑀘𑀸𑀢𑀺.