𑁯. 𑀫𑀸𑀢𑀼𑀧𑁄𑀲𑀓𑀲𑀼𑀢𑁆𑀢𑀁

𑁨𑁦𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀫𑀸𑀢𑀼𑀧𑁄𑀲𑀓𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀸𑀢𑀼𑀧𑁄𑀲𑀓𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀸𑀫𑀺, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀫𑀺. 𑀓𑀘𑁆𑀘𑀸𑀳𑀁, 𑀪𑁄 𑀕𑁄𑀢𑀫, 𑀏𑀯𑀁𑀓𑀸𑀭𑀻 𑀓𑀺𑀘𑁆𑀘𑀓𑀸𑀭𑀻 𑀳𑁄𑀫𑀻’’𑀢𑀺? ‘‘𑀢𑀕𑁆𑀖 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁𑀓𑀸𑀭𑀻 𑀓𑀺𑀘𑁆𑀘𑀓𑀸𑀭𑀻 𑀳𑁄𑀲𑀺. 𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀢𑀺, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺, 𑀩𑀳𑀼𑀁 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺.

‘‘𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀫𑀘𑁆𑀘𑁄 𑀥𑀫𑁆𑀫𑁂𑀦 𑀧𑁄𑀲𑀢𑀺;

𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀫𑀸𑀢𑀼𑀧𑁄𑀲𑀓𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.