𑁫. 𑀫𑀸𑀦𑀢𑁆𑀣𑀤𑁆𑀥𑀲𑀼𑀢𑁆𑀢𑀁

𑁨𑁦𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀸𑀦𑀢𑁆𑀣𑀤𑁆𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀢𑀺. 𑀲𑁄 𑀦𑁂𑀯 𑀫𑀸𑀢𑀭𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀧𑀺𑀢𑀭𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀚𑁂𑀝𑁆𑀞𑀪𑀸𑀢𑀭𑀁 𑀅𑀪𑀺𑀯𑀸𑀤𑁂𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀣 𑀔𑁄 𑀫𑀸𑀦𑀢𑁆𑀣𑀤𑁆𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁. 𑀲𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀮𑀧𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀢𑀁 𑀆𑀮𑀧𑀺𑀲𑁆𑀲𑀸𑀫𑀺. 𑀦𑁄 𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀮𑀧𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀦𑀸𑀮𑀧𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀦𑀸𑀮𑀧𑀺. 𑀅𑀣 𑀔𑁄 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘𑀦𑀸𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’𑀢𑀺 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀸𑀦𑀢𑁆𑀣𑀤𑁆𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀸𑀦𑀢𑁆𑀣𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦 𑀫𑀸𑀦𑀁 𑀩𑁆𑀭𑀸𑀳𑁆𑀫𑀡 𑀲𑀸𑀥𑀼, 𑀅𑀢𑁆𑀣𑀺𑀓𑀲𑁆𑀲𑀻𑀥 𑀩𑁆𑀭𑀸𑀳𑁆𑀫𑀡;

𑀬𑁂𑀦 𑀅𑀢𑁆𑀣𑁂𑀦 𑀆𑀕𑀘𑁆𑀙𑀺, 𑀢𑀫𑁂𑀯𑀫𑀦𑀼𑀩𑁆𑀭𑀽𑀳𑀬𑁂’’𑀢𑀺.

𑀅𑀣 𑀔𑁄 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀘𑀺𑀢𑁆𑀢𑀁 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀸𑀢𑀻’’𑀢𑀺 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑁋 ‘‘𑀫𑀸𑀦𑀢𑁆𑀣𑀤𑁆𑀥𑀸𑀳𑀁, 𑀪𑁄 𑀕𑁄𑀢𑀫, 𑀫𑀸𑀦𑀢𑁆𑀣𑀤𑁆𑀥𑀸𑀳𑀁, 𑀪𑁄 𑀕𑁄𑀢𑀫𑀸’’𑀢𑀺. 𑀅𑀣 𑀔𑁄 𑀲𑀸 𑀧𑀭𑀺𑀲𑀸 𑀅𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 [𑀅𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 (𑀓.)] 𑀅𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀅𑀬𑀜𑁆𑀳𑀺 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀦𑁂𑀯 𑀫𑀸𑀢𑀭𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀧𑀺𑀢𑀭𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑀺, 𑀦 𑀚𑁂𑀝𑁆𑀞𑀪𑀸𑀢𑀭𑀁 𑀅𑀪𑀺𑀯𑀸𑀤𑁂𑀢𑀺; 𑀅𑀣 𑀘 𑀧𑀦 𑀲𑀫𑀡𑁂 𑀕𑁄𑀢𑀫𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀢𑀻’𑀢𑀺. 𑀅𑀣 𑀔𑁄 𑀪𑀕𑀯𑀸 𑀫𑀸𑀦𑀢𑁆𑀣𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀩𑁆𑀭𑀸𑀳𑁆𑀫𑀡, 𑀉𑀝𑁆𑀞𑁂𑀳𑀺, 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤. 𑀬𑀢𑁄 𑀢𑁂 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀦𑁆𑀦’’𑀦𑁆𑀢𑀺. 𑀅𑀣 𑀔𑁄 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑁂𑀲𑀼 𑀦 𑀫𑀸𑀦𑀁 𑀓𑀬𑀺𑀭𑀸𑀣, 𑀓𑁂𑀲𑀼 𑀘𑀲𑁆𑀲 𑀲𑀕𑀸𑀭𑀯𑁄;

𑀓𑁆𑀬𑀲𑁆𑀲 𑀅𑀧𑀘𑀺𑀢𑀸 𑀅𑀲𑁆𑀲𑀼, 𑀓𑁆𑀬𑀲𑁆𑀲𑀼 𑀲𑀸𑀥𑀼 𑀲𑀼𑀧𑀽𑀚𑀺𑀢𑀸’’𑀢𑀺.

‘‘𑀫𑀸𑀢𑀭𑀺 𑀧𑀺𑀢𑀭𑀺 𑀘𑀸𑀧𑀺, 𑀅𑀣𑁄 𑀚𑁂𑀝𑁆𑀞𑀫𑁆𑀳𑀺 𑀪𑀸𑀢𑀭𑀺;

𑀆𑀘𑀭𑀺𑀬𑁂 𑀘𑀢𑀼𑀢𑁆𑀣𑀫𑁆𑀳𑀺,

𑀢𑁂𑀲𑀼 𑀦 𑀫𑀸𑀦𑀁 𑀓𑀬𑀺𑀭𑀸𑀣;

𑀢𑁂𑀲𑀼 𑀅𑀲𑁆𑀲 𑀲𑀕𑀸𑀭𑀯𑁄,

𑀢𑁆𑀬𑀲𑁆𑀲 𑀅𑀧𑀘𑀺𑀢𑀸 𑀅𑀲𑁆𑀲𑀼;

𑀢𑁆𑀬𑀲𑁆𑀲𑀼 𑀲𑀸𑀥𑀼 𑀲𑀼𑀧𑀽𑀚𑀺𑀢𑀸.

‘‘𑀅𑀭𑀳𑀦𑁆𑀢𑁂 𑀲𑀻𑀢𑀻𑀪𑀽𑀢𑁂, 𑀓𑀢𑀓𑀺𑀘𑁆𑀘𑁂 𑀅𑀦𑀸𑀲𑀯𑁂;

𑀦𑀺𑀳𑀘𑁆𑀘 𑀫𑀸𑀦𑀁 𑀅𑀣𑀤𑁆𑀥𑁄, 𑀢𑁂 𑀦𑀫𑀲𑁆𑀲𑁂 𑀅𑀦𑀼𑀢𑁆𑀢𑀭𑁂’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀫𑀸𑀦𑀢𑁆𑀣𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.