𑁯. 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀁

𑁪𑁩𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀢𑀫𑁂𑀦 𑀔𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀳𑀸𑀭𑁂𑀦 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀲𑀻’’𑀢𑀺? ‘‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀸𑀫𑀻’’𑀢𑀺. ‘‘𑀲𑀸𑀥𑀼, 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁂𑀦 𑀓𑀺𑀭 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀲𑀺. 𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁄 𑀏𑀲𑁄 [𑀳𑁂𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀲𑀸𑀭𑀺𑀧𑀼𑀢𑁆𑀢, 𑀬𑀤𑀺𑀤𑀁 𑁋 𑀲𑀼𑀜𑁆𑀜𑀢𑀸. 𑀢𑀲𑁆𑀫𑀸𑀢𑀺𑀳, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀘𑁂 𑀆𑀓𑀗𑁆𑀔𑁂𑀬𑁆𑀬 𑁋 ‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 [𑀏𑀢𑀭𑀳𑀺 𑀩𑀳𑀼𑀮𑀁 (𑀲𑀻. 𑀧𑀻.)] 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀅𑀢𑁆𑀣𑀺 𑀫𑁂 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁩𑁯. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀢𑀢𑁆𑀣 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀕𑀦𑁆𑀥𑁂𑀲𑀼… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼 … 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀅𑀢𑁆𑀣𑀺 𑀫𑁂 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁, 𑀬𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀁, 𑀬𑁂𑀦 𑀘 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀺𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀫𑁄𑀳𑁄 𑀯𑀸 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁦. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀧𑁆𑀧𑀳𑀻𑀦𑀸 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀧𑀳𑀻𑀦𑀸 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁧. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀧𑁆𑀧𑀳𑀻𑀦𑀸 𑀔𑁄 𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀧𑀳𑀻𑀦𑀸 𑀔𑁄 𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁨. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀧𑀭𑀺𑀜𑁆𑀜𑀸𑀢𑀸 𑀦𑀼 𑀔𑁄 𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀧𑀭𑀺𑀜𑁆𑀜𑀸𑀢𑀸 𑀔𑁄 𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀧𑀭𑀺𑀜𑁆𑀜𑀸𑀢𑀸 𑀔𑁄 𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁩. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸 𑀦𑀼 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁪. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸 𑀦𑀼 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁫. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸 𑀦𑀼 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁬. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸𑀦𑀺 𑀦𑀼 𑀔𑁄 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸𑀦𑀺 𑀔𑁄 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸𑀦𑀺 𑀔𑁄 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁭. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸𑀦𑀺 𑀦𑀼 𑀔𑁄 𑀫𑁂 𑀧𑀜𑁆𑀘 𑀩𑀮𑀸𑀦𑀻’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸𑀦𑀺 𑀔𑁄 𑀫𑁂 𑀧𑀜𑁆𑀘 𑀩𑀮𑀸𑀦𑀻’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸𑀦𑀺 𑀔𑁄 𑀫𑁂 𑀧𑀜𑁆𑀘 𑀩𑀮𑀸𑀦𑀻’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁮. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸 𑀦𑀼 𑀔𑁄 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸 𑀔𑁄 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸 𑀔𑁄 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁪𑁯. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑁄 𑀦𑀼 𑀔𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑁄 𑀔𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑁄 𑀔𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁫𑁦. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀪𑀸𑀯𑀺𑀢𑀸 𑀦𑀼 𑀔𑁄 𑀫𑁂 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀸𑀯𑀺𑀢𑀸 𑀔𑁄 𑀫𑁂 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀸𑀯𑀺𑀢𑀸 𑀔𑁄 𑀫𑁂 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁫𑁧. ‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀲𑀘𑁆𑀙𑀺𑀓𑀢𑀸 𑀦𑀼 𑀔𑁄 𑀫𑁂 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸’𑀢𑀺? 𑀲𑀘𑁂, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀲𑀘𑁆𑀙𑀺𑀓𑀢𑀸 𑀔𑁄 𑀫𑁂 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀯𑀺𑀚𑁆𑀚𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀲𑀘𑁆𑀙𑀺𑀓𑀢𑀸 𑀔𑁄 𑀫𑁂 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸’𑀢𑀺, 𑀢𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑁪𑁫𑁨. ‘‘𑀬𑁂 𑀳𑀺 𑀓𑁂𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀲𑀼𑀁. 𑀬𑁂𑀧𑀺 𑀳𑀺 𑀓𑁂𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀲𑁆𑀲𑀦𑁆𑀢𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀏𑀯𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳, 𑀲𑀸𑀭𑀺𑀧𑀼𑀢𑁆𑀢 [𑀯𑁄 𑀲𑀸𑀭𑀺𑀧𑀼𑀢𑁆𑀢 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 (𑀲𑀻. 𑀧𑀻.)], ‘𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀲𑁄𑀥𑁂𑀲𑁆𑀲𑀸𑀫𑀸’𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.