𑁧𑁦. 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀁

𑁪𑁫𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑀚𑀗𑁆𑀕𑀮𑀸𑀬𑀁 [𑀓𑀚𑀗𑁆𑀕𑀮𑀸𑀬𑀁 (𑀲𑀻. 𑀧𑀻.), 𑀓𑀚𑁆𑀚𑀗𑁆𑀕𑀮𑀸𑀬𑀁 (𑀲𑁆𑀬𑀸. 𑀓𑀁.)] 𑀯𑀺𑀳𑀭𑀢𑀺 𑀲𑀼𑀯𑁂𑀴𑀼𑀯𑀦𑁂 [𑀯𑁂𑀴𑀼𑀯𑀦𑁂 (𑀲𑁆𑀬𑀸. 𑀓𑀁.), 𑀫𑀼𑀔𑁂𑀮𑀼𑀯𑀦𑁂 (𑀲𑀻. 𑀧𑀻.)]. 𑀅𑀣 𑀔𑁄 𑀉𑀢𑁆𑀢𑀭𑁄 𑀫𑀸𑀡𑀯𑁄 𑀧𑀸𑀭𑀸𑀲𑀺𑀯𑀺𑀬𑀦𑁆𑀢𑁂𑀯𑀸𑀲𑀻 [𑀧𑀸𑀭𑀸𑀲𑀭𑀺𑀬𑀦𑁆𑀢𑁂𑀯𑀸𑀲𑀻 (𑀲𑀻. 𑀧𑀻.), 𑀧𑀸𑀭𑀸𑀲𑀺𑀭𑀺𑀬𑀦𑁆𑀢𑁂𑀯𑀸𑀲𑀻 (𑀲𑁆𑀬𑀸. 𑀓𑀁.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀉𑀢𑁆𑀢𑀭𑀁 𑀫𑀸𑀡𑀯𑀁 𑀧𑀸𑀭𑀸𑀲𑀺𑀯𑀺𑀬𑀦𑁆𑀢𑁂𑀯𑀸𑀲𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀺, 𑀉𑀢𑁆𑀢𑀭, 𑀧𑀸𑀭𑀸𑀲𑀺𑀯𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦’’𑀦𑁆𑀢𑀺? ‘‘𑀤𑁂𑀲𑁂𑀢𑀺, 𑀪𑁄 𑀕𑁄𑀢𑀫, 𑀧𑀸𑀭𑀸𑀲𑀺𑀯𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀉𑀢𑁆𑀢𑀭, 𑀤𑁂𑀲𑁂𑀢𑀺 𑀧𑀸𑀭𑀸𑀲𑀺𑀯𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦’’𑀦𑁆𑀢𑀺? ‘‘𑀇𑀥, 𑀪𑁄 𑀕𑁄𑀢𑀫, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺 𑁋 𑀏𑀯𑀁 𑀔𑁄, 𑀪𑁄 𑀕𑁄𑀢𑀫, 𑀤𑁂𑀲𑁂𑀢𑀺 𑀧𑀸𑀭𑀸𑀲𑀺𑀯𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦’’𑀦𑁆𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀔𑁄, 𑀉𑀢𑁆𑀢𑀭, 𑀅𑀦𑁆𑀥𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀥𑀺𑀭𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀪𑀯𑀺𑀲𑁆𑀲𑀢𑀺; 𑀬𑀣𑀸 𑀧𑀸𑀭𑀸𑀲𑀺𑀯𑀺𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁. 𑀅𑀦𑁆𑀥𑁄 𑀳𑀺, 𑀉𑀢𑁆𑀢𑀭, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀩𑀥𑀺𑀭𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀉𑀢𑁆𑀢𑀭𑁄 𑀫𑀸𑀡𑀯𑁄 𑀧𑀸𑀭𑀸𑀲𑀺𑀯𑀺𑀬𑀦𑁆𑀢𑁂𑀯𑀸𑀲𑀻 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺.

𑀅𑀣 𑀔𑁄 𑀪𑀕𑀯𑀸 𑀉𑀢𑁆𑀢𑀭𑀁 𑀫𑀸𑀡𑀯𑀁 𑀧𑀸𑀭𑀸𑀲𑀺𑀯𑀺𑀬𑀦𑁆𑀢𑁂𑀯𑀸𑀲𑀺𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑀣𑀸 𑀔𑁄, 𑀆𑀦𑀦𑁆𑀤, 𑀤𑁂𑀲𑁂𑀢𑀺 𑀧𑀸𑀭𑀸𑀲𑀺𑀯𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁, 𑀅𑀜𑁆𑀜𑀣𑀸 𑀘 𑀧𑀦𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀳𑁄𑀢𑀻’’𑀢𑀺. ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄 𑀬𑀁 𑀪𑀕𑀯𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀤𑁂𑀲𑁂𑀬𑁆𑀬. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁪𑁫𑁪. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀳𑁄𑀢𑀺? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀉𑀫𑁆𑀫𑀻𑀮𑁂𑀢𑁆𑀯𑀸 𑀯𑀸 𑀦𑀺𑀫𑀻𑀮𑁂𑀬𑁆𑀬, 𑀦𑀺𑀫𑀻𑀮𑁂𑀢𑁆𑀯𑀸 𑀯𑀸 𑀉𑀫𑁆𑀫𑀻𑀮𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼.

𑁪𑁫𑁫. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀮𑀯𑀸 𑀧𑀼𑀭𑀺𑀲𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀅𑀘𑁆𑀙𑀭𑀁 [𑀅𑀘𑁆𑀙𑀭𑀺𑀓𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀧𑀳𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀲𑀤𑁆𑀤𑁂𑀲𑀼.

𑁪𑁫𑁬. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀈𑀲𑀓𑀁𑀧𑁄𑀡𑁂 [𑀈𑀲𑀓𑀧𑁄𑀡𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀈𑀲𑀓𑀨𑀡𑁂 (𑀲𑀻. 𑀅𑀝𑁆𑀞.), ‘‘𑀫𑀚𑁆𑀛𑁂 𑀉𑀘𑁆𑀘𑀁 𑀳𑀼𑀢𑁆𑀯𑀸’’𑀢𑀺 𑀝𑀻𑀓𑀸𑀬 𑀲𑀁𑀲𑀦𑁆𑀤𑀺𑀢𑀩𑁆𑀩𑀸] 𑀧𑀤𑀼𑀫𑀧𑀮𑀸𑀲𑁂 [𑀧𑀤𑀼𑀫𑀺𑀦𑀺𑀧𑀢𑁆𑀢𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀤𑀓𑀨𑀼𑀲𑀺𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀕𑀦𑁆𑀥𑁂𑀲𑀼.

𑁪𑁫𑁭. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀮𑀯𑀸 𑀧𑀼𑀭𑀺𑀲𑁄 𑀚𑀺𑀯𑁆𑀳𑀕𑁆𑀕𑁂 𑀔𑁂𑀴𑀧𑀺𑀡𑁆𑀟𑀁 𑀲𑀁𑀬𑀽𑀳𑀺𑀢𑁆𑀯𑀸 𑀅𑀧𑁆𑀧𑀓𑀲𑀺𑀭𑁂𑀦 𑀯𑀫𑁂𑀬𑁆𑀬 [𑀲𑀦𑁆𑀥𑀫𑁂𑀬𑁆𑀬 (𑀓.)]; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼.

𑁪𑁫𑁮. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼.

𑁪𑁫𑁯. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀉𑀧𑁆𑀧𑀦𑁆𑀦𑀁 𑀔𑁄 𑀫𑁂 𑀇𑀤𑀁 𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁, 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁. 𑀢𑀜𑁆𑀘 𑀔𑁄 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑁋 𑀉𑀧𑁂𑀓𑁆𑀔𑀸’𑀢𑀺. 𑀢𑀲𑁆𑀲 𑀢𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺; 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁂 [𑀤𑀺𑀯𑀲𑀲𑀦𑁆𑀢𑁂𑀢𑁆𑀢𑁂 (𑀲𑀻.)] 𑀅𑀬𑁄𑀓𑀝𑀸𑀳𑁂 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀦𑀺𑀧𑀸𑀢𑁂𑀬𑁆𑀬. 𑀤𑀦𑁆𑀥𑁄, 𑀆𑀦𑀦𑁆𑀤, 𑀉𑀤𑀓𑀨𑀼𑀲𑀺𑀢𑀸𑀦𑀁 𑀦𑀺𑀧𑀸𑀢𑁄, 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯𑀁𑀲𑀻𑀖𑀁 𑀏𑀯𑀁𑀢𑀼𑀯𑀝𑀁 𑀏𑀯𑀁𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀅𑀫𑀦𑀸𑀧𑀁 𑀉𑀧𑁆𑀧𑀦𑁆𑀦𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀳𑁄𑀢𑀺.

𑁪𑁬𑁦. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑁂𑀔𑁄 𑀳𑁄𑀢𑀺 𑀧𑀸𑀝𑀺𑀧𑀤𑁄? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀢𑁂𑀦 𑀉𑀧𑁆𑀧𑀦𑁆𑀦𑁂𑀦 𑀫𑀦𑀸𑀧𑁂𑀦 𑀉𑀧𑁆𑀧𑀦𑁆𑀦𑁂𑀦 𑀅𑀫𑀦𑀸𑀧𑁂𑀦 𑀉𑀧𑁆𑀧𑀦𑁆𑀦𑁂𑀦 𑀫𑀦𑀸𑀧𑀸𑀫𑀦𑀸𑀧𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀢𑁂𑀦 𑀉𑀧𑁆𑀧𑀦𑁆𑀦𑁂𑀦 𑀫𑀦𑀸𑀧𑁂𑀦 𑀉𑀧𑁆𑀧𑀦𑁆𑀦𑁂𑀦 𑀅𑀫𑀦𑀸𑀧𑁂𑀦 𑀉𑀧𑁆𑀧𑀦𑁆𑀦𑁂𑀦 𑀫𑀦𑀸𑀧𑀸𑀫𑀦𑀸𑀧𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑁂𑀔𑁄 𑀳𑁄𑀢𑀺 𑀧𑀸𑀝𑀺𑀧𑀤𑁄.

𑁪𑁬𑁧. ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀅𑀭𑀺𑀬𑁄 𑀳𑁄𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑁂 [𑀧𑀝𑀺𑀓𑁆𑀓𑀽𑀮𑁂 (𑀲𑀩𑁆𑀩𑀢𑁆𑀣)] 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑁪𑁬𑁨. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁, 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀫𑁆𑀧𑀺 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀭𑀺𑀬𑁄 𑀳𑁄𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄.

𑁪𑁬𑁩. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀤𑁂𑀲𑀺𑀢𑀸 𑀫𑀬𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸, 𑀤𑁂𑀲𑀺𑀢𑁄 𑀲𑁂𑀔𑁄 𑀧𑀸𑀝𑀺𑀧𑀤𑁄, 𑀤𑁂𑀲𑀺𑀢𑁄 𑀅𑀭𑀺𑀬𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄. 𑀬𑀁 𑀔𑁄, 𑀆𑀦𑀦𑁆𑀤, 𑀲𑀢𑁆𑀣𑀸𑀭𑀸 𑀓𑀭𑀡𑀻𑀬𑀁 𑀲𑀸𑀯𑀓𑀸𑀦𑀁 𑀳𑀺𑀢𑁂𑀲𑀺𑀦𑀸 𑀅𑀦𑀼𑀓𑀫𑁆𑀧𑀓𑁂𑀦 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀓𑀢𑀁 𑀯𑁄 𑀢𑀁 𑀫𑀬𑀸. 𑀏𑀢𑀸𑀦𑀺, 𑀆𑀦𑀦𑁆𑀤, 𑀭𑀼𑀓𑁆𑀔𑀫𑀽𑀮𑀸𑀦𑀺, 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺, 𑀛𑀸𑀬𑀣𑀸𑀦𑀦𑁆𑀤, 𑀫𑀸 𑀧𑀫𑀸𑀤𑀢𑁆𑀣, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀲𑀴𑀸𑀬𑀢𑀦𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.