𑁮. 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀁

𑁪𑁩𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀕𑀭𑀯𑀺𑀦𑁆𑀤𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀓𑀸 [𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀸 (𑀓.)] 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦𑀕𑀭𑀯𑀺𑀦𑁆𑀤𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁪𑁩𑁫. ‘‘𑀲𑀘𑁂 𑀯𑁄, 𑀕𑀳𑀧𑀢𑀬𑁄, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁𑀪𑀽𑀢𑀸, 𑀕𑀳𑀧𑀢𑀬𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀲𑀓𑁆𑀓𑀸𑀢𑀩𑁆𑀩𑀸 𑀦 𑀕𑀭𑀼𑀓𑀸𑀢𑀩𑁆𑀩𑀸 𑀦 𑀫𑀸𑀦𑁂𑀢𑀩𑁆𑀩𑀸 𑀦 𑀧𑀽𑀚𑁂𑀢𑀩𑁆𑀩𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀦𑁆𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀏𑀯𑀭𑀽𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀲𑀓𑁆𑀓𑀸𑀢𑀩𑁆𑀩𑀸 𑀦 𑀕𑀭𑀼𑀓𑀸𑀢𑀩𑁆𑀩𑀸 𑀦 𑀫𑀸𑀦𑁂𑀢𑀩𑁆𑀩𑀸 𑀦 𑀧𑀽𑀚𑁂𑀢𑀩𑁆𑀩𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀬𑀫𑁆𑀧𑀺 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀸𑀫 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑁂𑀲𑀁 𑀦𑁄 𑀲𑀫𑀘𑀭𑀺𑀬𑀫𑁆𑀧𑀺 𑀳𑁂𑀢𑀁 𑀉𑀢𑁆𑀢𑀭𑀺 𑀅𑀧𑀲𑁆𑀲𑀢𑀁. 𑀢𑀲𑁆𑀫𑀸 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀲𑀓𑁆𑀓𑀸𑀢𑀩𑁆𑀩𑀸 𑀦 𑀕𑀭𑀼𑀓𑀸𑀢𑀩𑁆𑀩𑀸 𑀦 𑀫𑀸𑀦𑁂𑀢𑀩𑁆𑀩𑀸 𑀦 𑀧𑀽𑀚𑁂𑀢𑀩𑁆𑀩𑀸. 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀲𑀤𑁆𑀤𑁂𑀲𑀼… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀕𑀦𑁆𑀥𑁂𑀲𑀼… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀦𑁆𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀏𑀯𑀭𑀽𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀲𑀓𑁆𑀓𑀸𑀢𑀩𑁆𑀩𑀸 𑀦 𑀕𑀭𑀼𑀓𑀸𑀢𑀩𑁆𑀩𑀸 𑀦 𑀫𑀸𑀦𑁂𑀢𑀩𑁆𑀩𑀸 𑀦 𑀧𑀽𑀚𑁂𑀢𑀩𑁆𑀩𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀬𑀫𑁆𑀧𑀺 𑀳𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀸𑀫 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑁂𑀲𑀁 𑀦𑁄 𑀲𑀫𑀘𑀭𑀺𑀬𑀫𑁆𑀧𑀺 𑀳𑁂𑀢𑀁 𑀉𑀢𑁆𑀢𑀭𑀺 𑀅𑀧𑀲𑁆𑀲𑀢𑀁. 𑀢𑀲𑁆𑀫𑀸 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀲𑀓𑁆𑀓𑀸𑀢𑀩𑁆𑀩𑀸 𑀦 𑀕𑀭𑀼𑀓𑀸𑀢𑀩𑁆𑀩𑀸 𑀦 𑀫𑀸𑀦𑁂𑀢𑀩𑁆𑀩𑀸 𑀦 𑀧𑀽𑀚𑁂𑀢𑀩𑁆𑀩𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣.

𑁪𑁩𑁬. ‘‘𑀲𑀘𑁂 𑀧𑀦 𑀯𑁄, 𑀕𑀳𑀧𑀢𑀬𑁄, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀣𑀁𑀪𑀽𑀢𑀸, 𑀕𑀳𑀧𑀢𑀬𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀯𑀻𑀢𑀭𑀸𑀕𑀸 𑀯𑀻𑀢𑀤𑁄𑀲𑀸 𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀏𑀯𑀭𑀽𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀬𑀫𑁆𑀧𑀺 𑀳𑀺 [𑀫𑀬𑀁 𑀳𑀺 (?)] 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀸𑀫 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑁂𑀲𑀁 𑀦𑁄 𑀲𑀫𑀘𑀭𑀺𑀬𑀫𑁆𑀧𑀺 𑀳𑁂𑀢𑀁 𑀉𑀢𑁆𑀢𑀭𑀺 𑀧𑀲𑁆𑀲𑀢𑀁. 𑀢𑀲𑁆𑀫𑀸 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸. 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀲𑀤𑁆𑀤𑁂𑀲𑀼… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀕𑀦𑁆𑀥𑁂𑀲𑀼… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀻𑀢𑀭𑀸𑀕𑀸 𑀯𑀻𑀢𑀤𑁄𑀲𑀸 𑀯𑀻𑀢𑀫𑁄𑀳𑀸, 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀏𑀯𑀭𑀽𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀬𑀫𑁆𑀧𑀺 𑀳𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀻𑀢𑀭𑀸𑀕𑀸 𑀅𑀯𑀻𑀢𑀤𑁄𑀲𑀸 𑀅𑀯𑀻𑀢𑀫𑁄𑀳𑀸 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸, 𑀲𑀫𑀯𑀺𑀲𑀫𑀁 𑀘𑀭𑀸𑀫 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑁂𑀲𑀁 𑀦𑁄 𑀲𑀫𑀘𑀭𑀺𑀬𑀫𑁆𑀧𑀺 𑀳𑁂𑀢𑀁 𑀉𑀢𑁆𑀢𑀭𑀺 𑀧𑀲𑁆𑀲𑀢𑀁. 𑀢𑀲𑁆𑀫𑀸 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣.

𑁪𑁩𑁭. ‘‘𑀲𑀘𑁂 𑀧𑀦 𑀯𑁄 [𑀲𑀘𑁂 𑀢𑁂 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀕𑀳𑀧𑀢𑀬𑁄, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑁂 𑀧𑀦𑀸𑀬𑀲𑁆𑀫𑀦𑁆𑀢𑀸𑀦𑀁 𑀆𑀓𑀸𑀭𑀸, 𑀓𑁂 𑀅𑀦𑁆𑀯𑀬𑀸, 𑀬𑁂𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀯𑀤𑁂𑀣? 𑀅𑀤𑁆𑀥𑀸 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀯𑀻𑀢𑀭𑀸𑀕𑀸 𑀯𑀸 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀤𑁄𑀲𑀸 𑀯𑀸 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀫𑁄𑀳𑀸 𑀯𑀸 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀢𑀣𑀸 𑀳𑀺 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺. 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀪𑀺𑀭𑀫𑁂𑀬𑁆𑀬𑀼𑀁, 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸 𑀬𑁂 𑀲𑀼𑀢𑁆𑀯𑀸 𑀲𑀼𑀢𑁆𑀯𑀸 𑀅𑀪𑀺𑀭𑀫𑁂𑀬𑁆𑀬𑀼𑀁, 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸 𑀬𑁂 𑀖𑀸𑀬𑀺𑀢𑁆𑀯𑀸 𑀖𑀸𑀬𑀺𑀢𑁆𑀯𑀸 𑀅𑀪𑀺𑀭𑀫𑁂𑀬𑁆𑀬𑀼𑀁, 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸 𑀬𑁂 𑀲𑀸𑀬𑀺𑀢𑁆𑀯𑀸 𑀲𑀸𑀬𑀺𑀢𑁆𑀯𑀸 𑀅𑀪𑀺𑀭𑀫𑁂𑀬𑁆𑀬𑀼𑀁, 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀬𑁂 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀅𑀪𑀺𑀭𑀫𑁂𑀬𑁆𑀬𑀼𑀁. 𑀇𑀫𑁂 𑀔𑁄 𑀦𑁄, 𑀆𑀯𑀼𑀲𑁄, 𑀆𑀓𑀸𑀭𑀸, 𑀇𑀫𑁂 𑀅𑀦𑁆𑀯𑀬𑀸, 𑀬𑁂𑀦 𑀫𑀬𑀁 [𑀬𑁂𑀦 𑀫𑀬𑀁 𑀆𑀬𑀲𑁆𑀫𑀦𑁆𑀢𑁄 (𑀲𑀻. 𑀧𑀻.), 𑀬𑁂𑀦 𑀫𑀬𑀁 𑀆𑀬𑀲𑁆𑀫𑀦𑁆𑀢𑁂 (𑀲𑁆𑀬𑀸. 𑀓𑀁.)] 𑀏𑀯𑀁 𑀯𑀤𑁂𑀫 𑁋 𑀅𑀤𑁆𑀥𑀸 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀯𑀻𑀢𑀭𑀸𑀕𑀸 𑀯𑀸 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀤𑁄𑀲𑀸 𑀯𑀸 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀫𑁄𑀳𑀸 𑀯𑀸 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀕𑀳𑀧𑀢𑀬𑁄, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.