𑁮. 𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀁

𑁩𑁧𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸 [𑀬𑀣𑀸 𑀬𑀣𑀸𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑁩𑁧𑁪. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁; 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’𑀢𑀺. 𑀢𑁂𑀲𑀁 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀅𑀫𑁆𑀳𑀸𑀓𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’’𑀢𑀺. ‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄, 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’𑀢𑀺 𑁋 𑀯𑀺𑀪𑀚𑀢𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

𑁩𑁧𑁫. ‘‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀲𑀸𑀭𑀯𑀢𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫 𑀔𑀦𑁆𑀥𑀁 𑀲𑀸𑀔𑀸𑀧𑀮𑀸𑀲𑁂 𑀲𑀸𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀲𑀺𑀢𑁆𑀯𑀸 𑀅𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣. 𑀲𑁄 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣; 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’’𑀢𑀺. ‘𑀅𑀤𑁆𑀥𑀸𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫; 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀫. 𑀅𑀧𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀯𑀺𑀪𑀚𑀢𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀕𑀭𑀼𑀁 𑀓𑀭𑀺𑀢𑁆𑀯𑀸’𑀢𑀺. ‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’𑀢𑀺. ‘𑀏𑀯𑀫𑀸𑀯𑀼𑀲𑁄’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀏𑀢𑀤𑀯𑁄𑀘 𑁋

‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬, 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’𑀢𑀺. 𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺.

𑁩𑁧𑁬. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀯𑀺𑀓𑁆𑀔𑀺𑀢𑁆𑀢𑀁 𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 […𑀕𑀣𑀺𑀢𑀁 (𑀲𑀻. 𑀧𑀻.)] 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 […𑀯𑀺𑀦𑀺𑀩𑀦𑁆𑀥𑀁 (𑀲𑀻. 𑀧𑀻.)] 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀯𑀺𑀓𑁆𑀔𑀺𑀢𑁆𑀢𑀁 𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀥𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺; 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀯𑀺𑀓𑁆𑀔𑀺𑀢𑁆𑀢𑀁 𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄 𑀆𑀯𑀼𑀲𑁄, 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀯𑀺𑀓𑁆𑀔𑀺𑀢𑁆𑀢𑀁 𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁭. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀦 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀥𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀦 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀦 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀥𑀫𑁆𑀫𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀩𑀳𑀺𑀤𑁆𑀥𑀸 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁮. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀁 [𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀅𑀤𑀼𑀓𑁆𑀔𑀫𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀁 [𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩𑁧𑁯. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀁 [𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀦 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀦 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀦 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀦 𑀉𑀧𑁂𑀓𑁆𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀦 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀦 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀉𑀧𑁂𑀓𑁆𑀔𑀸𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀦 𑀅𑀤𑀼𑀓𑁆𑀔𑀫𑀲𑀼𑀔𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀦 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀕𑀥𑀺𑀢𑀁 𑀦 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀯𑀺𑀦𑀺𑀩𑀦𑁆𑀥𑀁 𑀦 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲𑀸𑀤𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀁 [𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀲𑀡𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩𑁨𑁦. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀦𑀼𑀧𑀸𑀤𑀸 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀲 𑀢𑀁 𑀭𑀽𑀧𑀁 𑀯𑀺𑀧𑀭𑀺𑀡𑀫𑀢𑀺, 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀢𑀲𑁆𑀲 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀸𑀤𑀸𑀦𑀸 𑀉𑀢𑁆𑀢𑀸𑀲𑀯𑀸 𑀘 𑀳𑁄𑀢𑀺 𑀯𑀺𑀖𑀸𑀢𑀯𑀸 𑀘 𑀅𑀧𑁂𑀓𑁆𑀔𑀯𑀸 𑀘 𑀅𑀦𑀼𑀧𑀸𑀤𑀸𑀬 𑀘 𑀧𑀭𑀺𑀢𑀲𑁆𑀲𑀢𑀺. 𑀯𑁂𑀤𑀦𑀁 …𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀲 𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀧𑀭𑀺𑀡𑀫𑀢𑀺, 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀢𑀲𑁆𑀲 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀸𑀤𑀸𑀦𑀸 𑀉𑀢𑁆𑀢𑀸𑀲𑀯𑀸 𑀘 𑀳𑁄𑀢𑀺 𑀯𑀺𑀖𑀸𑀢𑀯𑀸 𑀘 𑀅𑀧𑁂𑀓𑁆𑀔𑀯𑀸 𑀘 𑀅𑀦𑀼𑀧𑀸𑀤𑀸𑀬 𑀘 𑀧𑀭𑀺𑀢𑀲𑁆𑀲𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀼𑀧𑀸𑀤𑀸 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺.

𑁩𑁨𑁧. ‘‘𑀓𑀣𑀜𑁆𑀘𑀸𑀯𑀼𑀲𑁄, 𑀅𑀦𑀼𑀧𑀸𑀤𑀸𑀦𑀸 𑀅𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀲 𑀢𑀁 𑀭𑀽𑀧𑀁 𑀯𑀺𑀧𑀭𑀺𑀡𑀫𑀢𑀺, 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀦 𑀘 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀢𑀲𑁆𑀲 𑀦 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀸𑀤𑀸𑀦𑀸 𑀦 𑀘𑁂𑀯𑀼𑀢𑁆𑀢𑀸𑀲𑀯𑀸 [𑀦 𑀘 𑀉𑀢𑁆𑀢𑀸𑀲𑀯𑀸 (𑀲𑀻.)] 𑀳𑁄𑀢𑀺 𑀦 𑀘 𑀯𑀺𑀖𑀸𑀢𑀯𑀸 𑀦 𑀘 𑀅𑀧𑁂𑀓𑁆𑀔𑀯𑀸 𑀅𑀦𑀼𑀧𑀸𑀤𑀸𑀬 𑀘 𑀦 𑀧𑀭𑀺𑀢𑀲𑁆𑀲𑀢𑀺. 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀲 𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀧𑀭𑀺𑀡𑀫𑀢𑀺, 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀦 𑀘 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀢𑀲𑁆𑀲 𑀦 𑀯𑀺𑀜𑁆𑀜𑀸𑀡𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀸𑀤𑀸𑀦𑀸 𑀦 𑀘𑁂𑀯𑀼𑀢𑁆𑀢𑀸𑀲𑀯𑀸 𑀳𑁄𑀢𑀺 𑀦 𑀘 𑀯𑀺𑀖𑀸𑀢𑀯𑀸 𑀦 𑀘 𑀅𑀧𑁂𑀓𑁆𑀔𑀯𑀸, 𑀅𑀦𑀼𑀧𑀸𑀤𑀸𑀬 𑀘 𑀦 𑀧𑀭𑀺𑀢𑀲𑁆𑀲𑀢𑀺. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀼𑀧𑀸𑀤𑀸 𑀅𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺.

‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’𑀢𑀺. 𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣; 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

𑁩𑁨𑁨. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’’’𑀢𑀺.

‘‘𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀬𑀣𑀸 𑀬𑀣𑀸 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺? 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’𑀢𑀺.

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀫𑁆𑀳. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄’’𑀢𑀺.

‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄; 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄. 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢𑀁. 𑀏𑀲𑁄 𑀘𑁂𑀯𑁂𑀢𑀲𑁆𑀲 [𑀏𑀲𑁄 𑀘𑁂𑀢𑀲𑁆𑀲 (𑀲𑀻. 𑀧𑀻.), 𑀏𑀲𑁄 𑀘𑁂𑀯 𑀢𑀲𑁆𑀲 (𑀲𑁆𑀬𑀸. 𑀓𑀁.), 𑀏𑀲𑁄𑀬𑁂𑀯 𑀢𑀲𑁆𑀲 (𑀓.)] 𑀅𑀢𑁆𑀣𑁄. 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.