𑁯. 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀁

𑁩𑁨𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀭𑀡𑀯𑀺𑀪𑀗𑁆𑀕𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀦 𑀓𑀸𑀫𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀜𑁆𑀚𑁂𑀬𑁆𑀬 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀏𑀢𑁂 𑀔𑁄, 𑀪𑀺𑀓𑁆𑀔𑀯𑁂 [𑀏𑀢𑁂 𑀔𑁄 (𑀲𑀻.), 𑀏𑀢𑁂 𑀢𑁂 (𑀲𑁆𑀬𑀸. 𑀓𑀁. 𑀧𑀻.)], 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀉𑀲𑁆𑀲𑀸𑀤𑀦𑀜𑁆𑀘 𑀚𑀜𑁆𑀜𑀸, 𑀅𑀧𑀲𑀸𑀤𑀦𑀜𑁆𑀘 𑀚𑀜𑁆𑀜𑀸; 𑀉𑀲𑁆𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀅𑀧𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀦𑁂𑀯𑀼𑀲𑁆𑀲𑀸𑀤𑁂𑀬𑁆𑀬, 𑀦 𑀅𑀧𑀲𑀸𑀤𑁂𑀬𑁆𑀬 [𑀦𑀸𑀧𑀲𑀸𑀤𑁂𑀬𑁆𑀬 (𑀲𑀻.)], 𑀥𑀫𑁆𑀫𑀫𑁂𑀯 𑀤𑁂𑀲𑁂𑀬𑁆𑀬. 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸; 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬. 𑀭𑀳𑁄𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬, 𑀲𑀫𑁆𑀫𑀼𑀔𑀸 𑀦 𑀔𑀻𑀡𑀁 [𑀦𑀸𑀢𑀺𑀔𑀻𑀡𑀁 (𑀲𑁆𑀬𑀸. 𑀓𑀁. 𑀓.)] 𑀪𑀡𑁂. 𑀅𑀢𑀭𑀫𑀸𑀦𑁄𑀯 𑀪𑀸𑀲𑁂𑀬𑁆𑀬, 𑀦𑁄 𑀢𑀭𑀫𑀸𑀦𑁄. 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸𑀢𑀺 𑁋 𑀅𑀬𑀫𑀼𑀤𑁆𑀤𑁂𑀲𑁄 𑀅𑀭𑀡𑀯𑀺𑀪𑀗𑁆𑀕𑀲𑁆𑀲.

𑁩𑁨𑁪. ‘‘‘𑀦 𑀓𑀸𑀫𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀜𑁆𑀚𑁂𑀬𑁆𑀬 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢’𑀦𑁆𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀬𑁄 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀬𑁄 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑁄𑀕𑁄 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀬𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀬𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑁄𑀕𑁄 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. ‘𑀦 𑀓𑀸𑀫𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢’𑀦𑁆𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁨𑁫. ‘‘‘𑀏𑀢𑁂 𑀔𑁄 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. ‘𑀏𑀢𑁂 𑀔𑁄 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁨𑁬. ‘‘‘𑀉𑀲𑁆𑀲𑀸𑀤𑀦𑀜𑁆𑀘 𑀚𑀜𑁆𑀜𑀸, 𑀅𑀧𑀲𑀸𑀤𑀦𑀜𑁆𑀘 𑀚𑀜𑁆𑀜𑀸; 𑀉𑀲𑁆𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀅𑀧𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀦𑁂𑀯𑀼𑀲𑁆𑀲𑀸𑀤𑁂𑀬𑁆𑀬, 𑀦 𑀅𑀧𑀲𑀸𑀤𑁂𑀬𑁆𑀬, 𑀥𑀫𑁆𑀫𑀫𑁂𑀯 𑀤𑁂𑀲𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀲𑁆𑀲𑀸𑀤𑀦𑀸 𑀘 𑀳𑁄𑀢𑀺 𑀅𑀧𑀲𑀸𑀤𑀦𑀸 𑀘, 𑀦𑁄 𑀘 𑀥𑀫𑁆𑀫𑀤𑁂𑀲𑀦𑀸? ‘𑀬𑁂 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 [𑀇𑀢𑀺 𑀧𑀭𑀁 (𑀓.)] 𑀇𑀢𑁆𑀣𑁂𑀓𑁂 𑀅𑀧𑀲𑀸𑀤𑁂𑀢𑀺.

‘‘‘𑀬𑁂 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑀸 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 𑀇𑀢𑁆𑀣𑁂𑀓𑁂 𑀉𑀲𑁆𑀲𑀸𑀤𑁂𑀢𑀺.

‘‘‘𑀬𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 𑀇𑀢𑁆𑀣𑁂𑀓𑁂 𑀅𑀧𑀲𑀸𑀤𑁂𑀢𑀺.

‘‘‘𑀬𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑀸 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 𑀇𑀢𑁆𑀣𑁂𑀓𑁂 𑀉𑀲𑁆𑀲𑀸𑀤𑁂𑀢𑀺.

‘‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀪𑀯𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀻𑀦𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 𑀇𑀢𑁆𑀣𑁂𑀓𑁂 𑀅𑀧𑀲𑀸𑀤𑁂𑀢𑀺.

‘‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀪𑀯𑀲𑀁𑀬𑁄𑀚𑀦𑀁 𑀧𑀳𑀻𑀦𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀇𑀢𑀺 𑀯𑀤𑀁 𑀇𑀢𑁆𑀣𑁂𑀓𑁂 𑀉𑀲𑁆𑀲𑀸𑀤𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀉𑀲𑁆𑀲𑀸𑀤𑀦𑀸 𑀘 𑀳𑁄𑀢𑀺 𑀅𑀧𑀲𑀸𑀤𑀦𑀸 𑀘, 𑀦𑁄 𑀘 𑀥𑀫𑁆𑀫𑀤𑁂𑀲𑀦𑀸.

𑁩𑁨𑁭. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀦𑁂𑀯𑀼𑀲𑁆𑀲𑀸𑀤𑀦𑀸 𑀳𑁄𑀢𑀺 𑀦 𑀅𑀧𑀲𑀸𑀤𑀦𑀸, 𑀥𑀫𑁆𑀫𑀤𑁂𑀲𑀦𑀸 𑀘 [𑀥𑀫𑁆𑀫𑀤𑁂𑀲𑀦𑀸𑀯 (𑀲𑁆𑀬𑀸. 𑀓𑀁.)]? ‘𑀬𑁂 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀅𑀦𑀼𑀬𑁄𑀕𑁄 𑀘 𑀔𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺.

‘‘‘𑀬𑁂 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑀸 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀅𑀦𑀦𑀼𑀬𑁄𑀕𑁄 𑀘 𑀔𑁄, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺.

‘‘‘𑀬𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀅𑀦𑀼𑀬𑁄𑀕𑁄 𑀘 𑀔𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺.

‘‘‘𑀬𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑀸 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀅𑀦𑀦𑀼𑀬𑁄𑀕𑁄 𑀘 𑀔𑁄, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺.

‘‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀪𑀯𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀻𑀦𑀁, 𑀲𑀩𑁆𑀩𑁂 𑀢𑁂 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀪𑀯𑀲𑀁𑀬𑁄𑀚𑀦𑁂 𑀘 𑀔𑁄 𑀅𑀧𑁆𑀧𑀳𑀻𑀦𑁂 𑀪𑀯𑁄𑀧𑀺 𑀅𑀧𑁆𑀧𑀳𑀻𑀦𑁄 𑀳𑁄𑀢𑀻’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺.

‘‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀪𑀯𑀲𑀁𑀬𑁄𑀚𑀦𑀁 𑀧𑀳𑀻𑀦𑀁, 𑀲𑀩𑁆𑀩𑁂 𑀢𑁂 𑀅𑀤𑀼𑀓𑁆𑀔𑀸 𑀅𑀦𑀼𑀧𑀖𑀸𑀢𑀸 𑀅𑀦𑀼𑀧𑀸𑀬𑀸𑀲𑀸 𑀅𑀧𑀭𑀺𑀴𑀸𑀳𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’𑀢𑀺 𑁋 𑀦 𑀏𑀯𑀫𑀸𑀳. ‘𑀪𑀯𑀲𑀁𑀬𑁄𑀚𑀦𑁂 𑀘 𑀔𑁄 𑀧𑀳𑀻𑀦𑁂 𑀪𑀯𑁄𑀧𑀺 𑀧𑀳𑀻𑀦𑁄 𑀳𑁄𑀢𑀻’𑀢𑀺 𑁋 𑀇𑀢𑀺 𑀯𑀤𑀁 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀯𑀼𑀲𑁆𑀲𑀸𑀤𑀦𑀸 𑀳𑁄𑀢𑀺 𑀦 𑀅𑀧𑀲𑀸𑀤𑀦𑀸, 𑀥𑀫𑁆𑀫𑀤𑁂𑀲𑀦𑀸 𑀘. ‘𑀉𑀲𑁆𑀲𑀸𑀤𑀦𑀜𑁆𑀘 𑀚𑀜𑁆𑀜𑀸, 𑀅𑀧𑀲𑀸𑀤𑀦𑀜𑁆𑀘 𑀚𑀜𑁆𑀜𑀸; 𑀉𑀲𑁆𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀅𑀧𑀲𑀸𑀤𑀦𑀜𑁆𑀘 𑀜𑀢𑁆𑀯𑀸 𑀦𑁂𑀯𑀼𑀲𑁆𑀲𑀸𑀤𑁂𑀬𑁆𑀬, 𑀦 𑀅𑀧𑀲𑀸𑀤𑁂𑀬𑁆𑀬, 𑀥𑀫𑁆𑀫𑀫𑁂𑀯 𑀤𑁂𑀲𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁨𑁮. ‘‘‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸; 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀲𑀼𑀔𑀁 𑀫𑀻𑀴𑁆𑀳𑀲𑀼𑀔𑀁 𑀧𑀼𑀣𑀼𑀚𑁆𑀚𑀦𑀲𑀼𑀔𑀁 𑀅𑀦𑀭𑀺𑀬𑀲𑀼𑀔𑀁. ‘𑀦 𑀆𑀲𑁂𑀯𑀺𑀢𑀩𑁆𑀩𑀁, 𑀦 𑀪𑀸𑀯𑁂𑀢𑀩𑁆𑀩𑀁, 𑀦 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀪𑀸𑀬𑀺𑀢𑀩𑁆𑀩𑀁 𑀏𑀢𑀲𑁆𑀲 𑀲𑀼𑀔𑀲𑁆𑀲𑀸’𑀢𑀺 𑁋 𑀯𑀤𑀸𑀫𑀺. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁. ‘𑀆𑀲𑁂𑀯𑀺𑀢𑀩𑁆𑀩𑀁, 𑀪𑀸𑀯𑁂𑀢𑀩𑁆𑀩𑀁, 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀦 𑀪𑀸𑀬𑀺𑀢𑀩𑁆𑀩𑀁 𑀏𑀢𑀲𑁆𑀲 𑀲𑀼𑀔𑀲𑁆𑀲𑀸’𑀢𑀺 𑁋 𑀯𑀤𑀸𑀫𑀺. ‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸; 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁨𑁯. ‘‘‘𑀭𑀳𑁄𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬, 𑀲𑀫𑁆𑀫𑀼𑀔𑀸 𑀦 𑀔𑀻𑀡𑀁 𑀪𑀡𑁂’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀁 𑀚𑀜𑁆𑀜𑀸 𑀭𑀳𑁄𑀯𑀸𑀤𑀁 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀲𑀲𑀓𑁆𑀓𑀁 [𑀲𑀫𑁆𑀧𑀢𑁆𑀢𑀁 (𑀓.)] 𑀢𑀁 𑀭𑀳𑁄𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬. 𑀬𑀫𑁆𑀧𑀺 𑀚𑀜𑁆𑀜𑀸 𑀭𑀳𑁄𑀯𑀸𑀤𑀁 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀢𑀲𑁆𑀲𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀯𑀘𑀦𑀸𑀬. 𑀬𑀜𑁆𑀘 𑀔𑁄 𑀚𑀜𑁆𑀜𑀸 𑀭𑀳𑁄𑀯𑀸𑀤𑀁 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀅𑀲𑁆𑀲 𑀢𑀲𑁆𑀲 𑀭𑀳𑁄𑀯𑀸𑀤𑀲𑁆𑀲 𑀯𑀘𑀦𑀸𑀬. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀁 𑀚𑀜𑁆𑀜𑀸 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑀁 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀲𑀲𑀓𑁆𑀓𑀁 𑀢𑀁 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬. 𑀬𑀫𑁆𑀧𑀺 𑀚𑀜𑁆𑀜𑀸 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑀁 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀢𑀲𑁆𑀲𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀯𑀘𑀦𑀸𑀬. 𑀬𑀜𑁆𑀘 𑀔𑁄 𑀚𑀜𑁆𑀜𑀸 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑀁 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀅𑀲𑁆𑀲 𑀢𑀲𑁆𑀲 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑀲𑁆𑀲 𑀯𑀘𑀦𑀸𑀬. ‘𑀭𑀳𑁄𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬, 𑀲𑀫𑁆𑀫𑀼𑀔𑀸 𑀦 𑀔𑀻𑀡𑀁 𑀪𑀡𑁂’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁩𑁦. ‘‘‘𑀅𑀢𑀭𑀫𑀸𑀦𑁄𑀯 𑀪𑀸𑀲𑁂𑀬𑁆𑀬 𑀦𑁄 𑀢𑀭𑀫𑀸𑀦𑁄’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀭𑀫𑀸𑀦𑀲𑁆𑀲 𑀪𑀸𑀲𑀢𑁄 𑀓𑀸𑀬𑁄𑀧𑀺 𑀓𑀺𑀮𑀫𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀉𑀧𑀳𑀜𑁆𑀜𑀢𑀺 [𑀊𑀳𑀜𑁆𑀜𑀢𑀺 (𑀲𑀻.)], 𑀲𑀭𑁄𑀧𑀺 𑀉𑀧𑀳𑀜𑁆𑀜𑀢𑀺 [𑀊𑀳𑀜𑁆𑀜𑀢𑀺 (𑀲𑀻.)], 𑀓𑀡𑁆𑀞𑁄𑀧𑀺 𑀆𑀢𑀼𑀭𑀻𑀬𑀢𑀺, 𑀅𑀯𑀺𑀲𑀝𑁆𑀞𑀫𑁆𑀧𑀺 𑀳𑁄𑀢𑀺 𑀅𑀯𑀺𑀜𑁆𑀜𑁂𑀬𑁆𑀬𑀁 𑀢𑀭𑀫𑀸𑀦𑀲𑁆𑀲 𑀪𑀸𑀲𑀺𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀅𑀢𑀭𑀫𑀸𑀦𑀲𑁆𑀲 𑀪𑀸𑀲𑀢𑁄 𑀓𑀸𑀬𑁄𑀧𑀺 𑀦 𑀓𑀺𑀮𑀫𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑀳𑀜𑁆𑀜𑀢𑀺, 𑀲𑀭𑁄𑀧𑀺 𑀦 𑀉𑀧𑀳𑀜𑁆𑀜𑀢𑀺, 𑀓𑀡𑁆𑀞𑁄𑀧𑀺 𑀦 𑀆𑀢𑀼𑀭𑀻𑀬𑀢𑀺, 𑀯𑀺𑀲𑀝𑁆𑀞𑀫𑁆𑀧𑀺 𑀳𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑀁 𑀅𑀢𑀭𑀫𑀸𑀦𑀲𑁆𑀲 𑀪𑀸𑀲𑀺𑀢𑀁. ‘𑀅𑀢𑀭𑀫𑀸𑀦𑁄𑀯 𑀪𑀸𑀲𑁂𑀬𑁆𑀬, 𑀦𑁄 𑀢𑀭𑀫𑀸𑀦𑁄’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁩𑁧. ‘‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺 𑀲𑀫𑀜𑁆𑀜𑀸𑀬 𑀘 𑀅𑀢𑀺𑀲𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀢𑀤𑁂𑀯𑁂𑀓𑀘𑁆𑀘𑁂𑀲𑀼 𑀚𑀦𑀧𑀤𑁂𑀲𑀼 ‘𑀧𑀸𑀢𑀻’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑀢𑁆𑀢’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀯𑀺𑀢𑁆𑀢’𑀦𑁆𑀢𑀺 [𑀯𑀺𑀝𑁆𑀞𑀦𑁆𑀢𑀺 (𑀲𑁆𑀬𑀸. 𑀓𑀁.)] 𑀲𑀜𑁆𑀚𑀸𑀦𑀦𑁆𑀢𑀺, ‘𑀲𑀭𑀸𑀯’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺 ‘𑀥𑀸𑀭𑁄𑀧’𑀦𑁆𑀢𑀺 [𑀳𑀭𑁄𑀲𑀦𑁆𑀢𑀺 (𑀲𑁆𑀬𑀸. 𑀓𑀁.)] 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑁄𑀡’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑀺𑀲𑀻𑀮𑀯’𑀦𑁆𑀢𑀺 [𑀧𑀺𑀲𑀻𑀮𑀦𑁆𑀢𑀺 (𑀲𑀻. 𑀧𑀻.), 𑀧𑀺𑀧𑀺𑀮𑀦𑁆𑀢𑀺 (𑀲𑁆𑀬𑀸. 𑀓𑀁.)] 𑀲𑀜𑁆𑀚𑀸𑀦𑀦𑁆𑀢𑀺. 𑀇𑀢𑀺 𑀬𑀣𑀸 𑀬𑀣𑀸 𑀦𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀲𑀜𑁆𑀚𑀸𑀦𑀦𑁆𑀢𑀺 𑀢𑀣𑀸 𑀢𑀣𑀸 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 [𑀧𑀭𑀸𑀫𑀲𑁆𑀲 (𑀲𑀻.)] 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺 𑀲𑀫𑀜𑁆𑀜𑀸𑀬 𑀘 𑀅𑀢𑀺𑀲𑀸𑀭𑁄.

𑁩𑁩𑁨. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀦𑀪𑀺𑀦𑀺𑀯𑁂𑀲𑁄 𑀳𑁄𑀢𑀺 𑀲𑀫𑀜𑁆𑀜𑀸𑀬 𑀘 𑀅𑀦𑀢𑀺𑀲𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀢𑀤𑁂𑀯𑁂𑀓𑀘𑁆𑀘𑁂𑀲𑀼 𑀚𑀦𑀧𑀤𑁂𑀲𑀼 ‘𑀧𑀸𑀢𑀻’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑀢𑁆𑀢’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀯𑀺𑀢𑁆𑀢’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀲𑀭𑀸𑀯’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀥𑀸𑀭𑁄𑀧’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑁄𑀡’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, ‘𑀧𑀺𑀲𑀻𑀮𑀯’𑀦𑁆𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀇𑀢𑀺 𑀬𑀣𑀸 𑀬𑀣𑀸 𑀦𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀲𑀜𑁆𑀚𑀸𑀦𑀦𑁆𑀢𑀺 ‘𑀇𑀤𑀁 𑀓𑀺𑀭 𑀫𑁂 [𑀇𑀤𑀁 𑀓𑀺𑀭 𑀢𑁂 𑀘 (𑀓.)] 𑀆𑀬𑀲𑁆𑀫𑀦𑁆𑀢𑁄 𑀲𑀦𑁆𑀥𑀸𑀬 𑀯𑁄𑀳𑀭𑀦𑁆𑀢𑀻’𑀢𑀺 𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀦𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀲𑀫𑀜𑁆𑀜𑀸𑀬 𑀘 𑀅𑀦𑀢𑀺𑀲𑀸𑀭𑁄. ‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁩𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄 𑀲𑁄𑀫𑀦𑀲𑁆𑀲𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑁄𑀕𑁄 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁪. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑁄𑀕𑁄 𑀤𑀼𑀓𑁆𑀔𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁫. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁬. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀉𑀲𑁆𑀲𑀸𑀤𑀦𑀸 𑀘 𑀅𑀧𑀲𑀸𑀤𑀦𑀸 𑀘 𑀦𑁄 𑀘 𑀥𑀫𑁆𑀫𑀤𑁂𑀲𑀦𑀸, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀦𑁂𑀯𑀼𑀲𑁆𑀲𑀸𑀤𑀦𑀸 𑀘 𑀦 𑀅𑀧𑀲𑀸𑀤𑀦𑀸 𑀘 𑀥𑀫𑁆𑀫𑀤𑁂𑀲𑀦𑀸 𑀘, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁭. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀓𑀸𑀫𑀲𑀼𑀔𑀁 𑀫𑀻𑀴𑁆𑀳𑀲𑀼𑀔𑀁 𑀧𑁄𑀣𑀼𑀚𑁆𑀚𑀦𑀲𑀼𑀔𑀁 𑀅𑀦𑀭𑀺𑀬𑀲𑀼𑀔𑀁, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁮. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀭𑀳𑁄𑀯𑀸𑀤𑁄 𑀅𑀪𑀽𑀢𑁄 𑀅𑀢𑀘𑁆𑀙𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀭𑀳𑁄𑀯𑀸𑀤𑁄 𑀪𑀽𑀢𑁄 𑀢𑀘𑁆𑀙𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀭𑀳𑁄𑀯𑀸𑀤𑁄 𑀪𑀽𑀢𑁄 𑀢𑀘𑁆𑀙𑁄 𑀅𑀢𑁆𑀣𑀲𑀁𑀳𑀺𑀢𑁄, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁩𑁯. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑁄 𑀅𑀪𑀽𑀢𑁄 𑀅𑀢𑀘𑁆𑀙𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑁄 𑀪𑀽𑀢𑁄 𑀢𑀘𑁆𑀙𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀲𑀫𑁆𑀫𑀼𑀔𑀸 𑀔𑀻𑀡𑀯𑀸𑀤𑁄 𑀪𑀽𑀢𑁄 𑀢𑀘𑁆𑀙𑁄 𑀅𑀢𑁆𑀣𑀲𑀁𑀳𑀺𑀢𑁄, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁪𑁦. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀢𑀭𑀫𑀸𑀦𑀲𑁆𑀲 𑀪𑀸𑀲𑀺𑀢𑀁, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀅𑀢𑀭𑀫𑀸𑀦𑀲𑁆𑀲 𑀪𑀸𑀲𑀺𑀢𑀁, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

𑁩𑁪𑁧. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀪𑀺𑀦𑀺𑀯𑁂𑀲𑁄 𑀲𑀫𑀜𑁆𑀜𑀸𑀬 𑀘 𑀅𑀢𑀺𑀲𑀸𑀭𑁄, 𑀲𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀲𑀉𑀧𑀖𑀸𑀢𑁄 𑀲𑀉𑀧𑀸𑀬𑀸𑀲𑁄 𑀲𑀧𑀭𑀺𑀴𑀸𑀳𑁄; 𑀫𑀺𑀘𑁆𑀙𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀲𑀭𑀡𑁄. 𑀢𑀢𑁆𑀭 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀦𑀪𑀺𑀦𑀺𑀯𑁂𑀲𑁄 𑀲𑀫𑀜𑁆𑀜𑀸𑀬 𑀘 𑀅𑀦𑀢𑀺𑀲𑀸𑀭𑁄, 𑀅𑀤𑀼𑀓𑁆𑀔𑁄 𑀏𑀲𑁄 𑀥𑀫𑁆𑀫𑁄 𑀅𑀦𑀼𑀧𑀖𑀸𑀢𑁄 𑀅𑀦𑀼𑀧𑀸𑀬𑀸𑀲𑁄 𑀅𑀧𑀭𑀺𑀴𑀸𑀳𑁄; 𑀲𑀫𑁆𑀫𑀸𑀧𑀝𑀺𑀧𑀤𑀸. 𑀢𑀲𑁆𑀫𑀸 𑀏𑀲𑁄 𑀥𑀫𑁆𑀫𑁄 𑀅𑀭𑀡𑁄.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀲𑀭𑀡𑀜𑁆𑀘 𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀸𑀫, 𑀅𑀭𑀡𑀜𑁆𑀘 𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀸𑀫; 𑀲𑀭𑀡𑀜𑁆𑀘 𑀥𑀫𑁆𑀫𑀁 𑀜𑀢𑁆𑀯𑀸 𑀅𑀭𑀡𑀜𑁆𑀘 𑀥𑀫𑁆𑀫𑀁 𑀜𑀢𑁆𑀯𑀸 𑀅𑀭𑀡𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀸’𑀢𑀺 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀲𑀼𑀪𑀽𑀢𑀺 𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀅𑀭𑀡𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.