𑁭. 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀁

𑁩𑁦𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀙 𑀨𑀲𑁆𑀲𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸 𑀯𑁂𑀤𑀺𑀢𑀩𑁆𑀩𑀸, 𑀙𑀢𑁆𑀢𑀺𑀁𑀲 𑀲𑀢𑁆𑀢𑀧𑀤𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀢𑁆𑀭 𑀇𑀤𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀧𑀚𑀳𑀣, 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀺, 𑀲𑁄 𑀯𑀼𑀘𑁆𑀘𑀢𑀺 𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀁 [𑀬𑁄𑀕𑀸𑀘𑀭𑀺𑀬𑀸𑀦𑀁 (𑀓.)] 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’𑀢𑀺 𑁋 𑀅𑀬𑀫𑀼𑀤𑁆𑀤𑁂𑀲𑁄 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑁆𑀲.

𑁩𑁦𑁫. ‘‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? ‘𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀫𑀦𑀸𑀬𑀢𑀦𑀁 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? ‘𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀥𑀫𑁆𑀫𑀸𑀬𑀢𑀦𑀁 𑁋 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? ‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀁 𑀖𑀸𑀦𑀯𑀺𑀜𑁆𑀜𑀸𑀡𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑁋 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀙 𑀨𑀲𑁆𑀲𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? ‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑁋 𑀙 𑀨𑀲𑁆𑀲𑀓𑀸𑀬𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? ‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀻𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀻𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀻𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀻𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺, 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀻𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺, 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀻𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺. 𑀇𑀢𑀺 𑀙 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸, 𑀙 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸, 𑀙 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀸, 𑀅𑀝𑁆𑀞𑀸𑀭𑀲 𑀫𑀦𑁄𑀧𑀯𑀺𑀘𑀸𑀭𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁦𑁬. ‘‘‘𑀙𑀢𑁆𑀢𑀺𑀁𑀲 𑀲𑀢𑁆𑀢𑀧𑀤𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙 𑀕𑁂𑀳𑀲𑀺𑀢𑀸𑀦𑀺 [𑀕𑁂𑀳𑀲𑁆𑀲𑀺𑀢𑀸𑀦𑀺 (?)] 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 [𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀺 (𑀝𑀻𑀓𑀸)] 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸. 𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀁 𑀯𑀸 𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀲𑁄𑀫𑀦𑀲𑁆𑀲𑀁. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀲𑀤𑁆𑀤𑀸𑀦𑀁… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀕𑀦𑁆𑀥𑀸𑀦𑀁… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀲𑀸𑀦𑀁… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀁… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁…𑀧𑁂… 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀲𑁄𑀫𑀦𑀲𑁆𑀲𑀁. 𑀇𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺.

‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺? 𑀭𑀽𑀧𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 [𑀯𑀺𑀧𑀭𑀺𑀡𑀸𑀫𑀁 𑀯𑀺𑀭𑀸𑀕𑀁 𑀦𑀺𑀭𑁄𑀥𑀁 (𑀓.)], ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀁. 𑀲𑀤𑁆𑀤𑀸𑀦𑀁𑀢𑁆𑀯𑁂𑀯… 𑀕𑀦𑁆𑀥𑀸𑀦𑀁𑀢𑁆𑀯𑁂𑀯… 𑀭𑀲𑀸𑀦𑀁𑀢𑁆𑀯𑁂𑀯… 𑀨𑁄𑀝𑁆𑀞𑀩𑁆𑀩𑀸𑀦𑀁𑀢𑁆𑀯𑁂𑀯… 𑀥𑀫𑁆𑀫𑀸𑀦𑀁𑀢𑁆𑀯𑁂 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁, ‘𑀧𑀼𑀩𑁆𑀩𑁂 𑀘𑁂𑀯 𑀥𑀫𑁆𑀫𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀁. 𑀇𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺.

𑁩𑁦𑁭. ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁…𑀧𑁂… 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀲𑀤𑁆𑀤𑀸𑀦𑀁… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀕𑀦𑁆𑀥𑀸𑀦𑀁… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀲𑀸𑀦𑀁… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀁… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀮𑀸𑀪𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀅𑀧𑁆𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀤𑁄𑀫𑀦𑀲𑁆𑀲𑀁. 𑀇𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺.

‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀭𑀽𑀧𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁, ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 [𑀓𑀤𑀸𑀲𑁆𑀲𑀼 (𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀤𑁄𑀫𑀦𑀲𑁆𑀲𑀁. 𑀲𑀤𑁆𑀤𑀸𑀦𑀁𑀢𑁆𑀯𑁂𑀯…𑀧𑁂… 𑀕𑀦𑁆𑀥𑀸𑀦𑀁𑀢𑁆𑀯𑁂𑀯… 𑀭𑀲𑀸𑀦𑀁𑀢𑁆𑀯𑁂𑀯… 𑀨𑁄𑀝𑁆𑀞𑀩𑁆𑀩𑀸𑀦𑀁𑀢𑁆𑀯𑁂𑀯… 𑀥𑀫𑁆𑀫𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁, ‘𑀧𑀼𑀩𑁆𑀩𑁂 𑀘𑁂𑀯 𑀥𑀫𑁆𑀫𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀤𑁄𑀫𑀦𑀲𑁆𑀲𑀁. 𑀇𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺.

𑁩𑁦𑁮. ‘‘𑀢𑀢𑁆𑀣 𑀓𑀢𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸? 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 ( ) [(𑀫𑀦𑁆𑀤𑀲𑁆𑀲) (𑀓.)] 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑁄𑀥𑀺𑀚𑀺𑀦𑀲𑁆𑀲 𑀅𑀯𑀺𑀧𑀸𑀓𑀚𑀺𑀦𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀸 [𑀲𑀸𑀬𑀁 (𑀓.)] 𑀉𑀧𑁂𑀓𑁆𑀔𑀸 ‘𑀕𑁂𑀳𑀲𑀺𑀢𑀸’𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑁄𑀥𑀺𑀚𑀺𑀦𑀲𑁆𑀲 𑀅𑀯𑀺𑀧𑀸𑀓𑀚𑀺𑀦𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀥𑀫𑁆𑀫𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 ‘𑀕𑁂𑀳𑀲𑀺𑀢𑀸’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸.

‘‘𑀢𑀢𑁆𑀣 𑀓𑀢𑀫𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸? 𑀭𑀽𑀧𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁, ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 ‘𑀦𑁂𑀓𑁆𑀔𑀫𑁆𑀫𑀲𑀺𑀢𑀸’𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁆𑀤𑀸𑀦𑀁𑀢𑁆𑀯𑁂𑀯… 𑀕𑀦𑁆𑀥𑀸𑀦𑀁𑀢𑁆𑀯𑁂𑀯… 𑀭𑀲𑀸𑀦𑀁𑀢𑁆𑀯𑁂𑀯… 𑀨𑁄𑀝𑁆𑀞𑀩𑁆𑀩𑀸𑀦𑀁𑀢𑁆𑀯𑁂𑀯… 𑀥𑀫𑁆𑀫𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁, ‘𑀧𑀼𑀩𑁆𑀩𑁂 𑀘𑁂𑀯 𑀥𑀫𑁆𑀫𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀥𑀫𑁆𑀫𑀁 𑀲𑀸 𑀅𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 ‘𑀦𑁂𑀓𑁆𑀔𑀫𑁆𑀫𑀲𑀺𑀢𑀸’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸. ‘𑀙𑀢𑁆𑀢𑀺𑀁𑀲 𑀲𑀢𑁆𑀢𑀧𑀤𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁦𑁯. ‘‘𑀢𑀢𑁆𑀭 𑀇𑀤𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀧𑀚𑀳𑀣𑀸’’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀸𑀬 𑀢𑀸𑀦𑀺 𑀆𑀕𑀫𑁆𑀫 𑀬𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀧𑀚𑀳𑀣, 𑀢𑀸𑀦𑀺 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀸𑀬 𑀢𑀸𑀦𑀺 𑀆𑀕𑀫𑁆𑀫 𑀬𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀧𑀚𑀳𑀣, 𑀢𑀸𑀦𑀺 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑀢𑀸 𑀦𑀺𑀲𑁆𑀲𑀸𑀬 𑀢𑀸 𑀆𑀕𑀫𑁆𑀫 𑀬𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸 𑀢𑀸 𑀧𑀚𑀳𑀣, 𑀢𑀸 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑀸𑀲𑀁 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑀸𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀸𑀬 𑀢𑀸𑀦𑀺 𑀆𑀕𑀫𑁆𑀫 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀧𑀚𑀳𑀣, 𑀢𑀸𑀦𑀺 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑀢𑀸 𑀦𑀺𑀲𑁆𑀲𑀸𑀬 𑀢𑀸 𑀆𑀕𑀫𑁆𑀫 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀢𑀸𑀦𑀺 𑀧𑀚𑀳𑀣, 𑀢𑀸𑀦𑀺 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

𑁩𑁧𑁦. ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸, 𑀅𑀢𑁆𑀣𑀺 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀭𑀽𑀧𑁂𑀲𑀼, 𑀅𑀢𑁆𑀣𑀺 𑀲𑀤𑁆𑀤𑁂𑀲𑀼, 𑀅𑀢𑁆𑀣𑀺 𑀕𑀦𑁆𑀥𑁂𑀲𑀼, 𑀅𑀢𑁆𑀣𑀺 𑀭𑀲𑁂𑀲𑀼, 𑀅𑀢𑁆𑀣𑀺 𑀨𑁄𑀝𑁆𑀞𑀩𑁆𑀩𑁂𑀲𑀼 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀅𑀢𑁆𑀣𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀅𑀢𑁆𑀣𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀅𑀢𑁆𑀣𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑀺𑀲𑁆𑀲𑀺𑀢𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀕𑀫𑁆𑀫 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸 𑀢𑀁 𑀧𑀚𑀳𑀣, 𑀢𑀁 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑀺𑀲𑁆𑀲𑀸 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺.

‘‘𑀅𑀢𑀫𑁆𑀫𑀬𑀢𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀬 𑀅𑀢𑀫𑁆𑀫𑀬𑀢𑀁 𑀆𑀕𑀫𑁆𑀫 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸 𑀢𑀁 𑀧𑀚𑀳𑀣, 𑀢𑀁 𑀲𑀫𑀢𑀺𑀓𑁆𑀓𑀫𑀣. 𑀏𑀯𑀫𑁂𑀢𑀺𑀲𑁆𑀲𑀸 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑀺𑀲𑁆𑀲𑀸 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺. ‘𑀢𑀢𑁆𑀭 𑀇𑀤𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀧𑀚𑀳𑀣𑀸’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁧𑁧. ‘‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁; 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺; 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀦 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀦𑀢𑁆𑀢𑀫𑀦𑀢𑀸 𑀘 𑀅𑀢𑁆𑀢𑀫𑀦𑀢𑀸 𑀘 𑁋 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀺. ‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁧𑁨. ‘‘‘𑀲𑁄 𑀯𑀼𑀘𑁆𑀘𑀢𑀺 𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’𑀢𑀺 𑁋 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀉𑀢𑁆𑀢𑀭𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸. 𑀅𑀲𑁆𑀲𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀜𑁆𑀜𑁂𑀯 𑀤𑀺𑀲𑀁 𑀥𑀸𑀯𑀢𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀉𑀢𑁆𑀢𑀭𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸. 𑀕𑁄𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀕𑁄𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀉𑀢𑁆𑀢𑀭𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸. 𑀢𑀣𑀸𑀕𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀭𑀺𑀲𑀤𑀫𑁆𑀫𑁄 𑀲𑀸𑀭𑀺𑀢𑁄 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺. 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀏𑀓𑀸 𑀤𑀺𑀲𑀸; 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸; 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺 𑁋 𑀅𑀬𑀁 𑀢𑀢𑀺𑀬𑀸 𑀤𑀺𑀲𑀸; 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀘𑀢𑀼𑀢𑁆𑀣𑀻 𑀤𑀺𑀲𑀸; 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀧𑀜𑁆𑀘𑀫𑀻 𑀤𑀺𑀲𑀸; 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀙𑀝𑁆𑀞𑀻 𑀤𑀺𑀲𑀸; 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀲𑀢𑁆𑀢𑀫𑀻 𑀤𑀺𑀲𑀸; 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀝𑁆𑀞𑀫𑀻 𑀤𑀺𑀲𑀸. 𑀢𑀣𑀸𑀕𑀢𑁂𑀦, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀭𑀺𑀲𑀤𑀫𑁆𑀫𑁄 𑀲𑀸𑀭𑀺𑀢𑁄 𑀇𑀫𑀸 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺. ‘𑀲𑁄 𑀯𑀼𑀘𑁆𑀘𑀢𑀺 𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.