𑁨. 𑀆𑀦𑀦𑁆𑀤𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁

𑁨𑁭𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀪𑀸𑀲𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀻’’𑀢𑀺? ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀆𑀦𑀦𑁆𑀤𑁄 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀻’’𑀢𑀺? ‘‘𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺𑀁 𑀲𑀫𑀸𑀤𑀧𑁂𑀲𑀺𑀁 𑀲𑀫𑀼𑀢𑁆𑀢𑁂𑀚𑁂𑀲𑀺𑀁 𑀲𑀫𑁆𑀧𑀳𑀁𑀲𑁂𑀲𑀺𑀁, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀺𑀁 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀺’’.

𑁨𑁭𑁭. ‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺? 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀲𑀗𑁆𑀔𑀸𑀭𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺? 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀲𑀗𑁆𑀔𑀸𑀭𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺? 𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀲𑀺𑀬𑀁…𑀧𑁂… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺? 𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀲𑀺𑀬𑀁…𑀧𑁂… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺? 𑀇𑀥, 𑀆𑀯𑀼𑀲𑁄, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺? 𑀇𑀥, 𑀆𑀯𑀼𑀲𑁄, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺.

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺𑀁 𑀲𑀫𑀸𑀤𑀧𑁂𑀲𑀺𑀁 𑀲𑀫𑀼𑀢𑁆𑀢𑁂𑀚𑁂𑀲𑀺𑀁 𑀲𑀫𑁆𑀧𑀳𑀁𑀲𑁂𑀲𑀺𑀁, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀺’’𑀦𑁆𑀢𑀺.

𑁨𑁭𑁮. ‘‘𑀲𑀸𑀥𑀼, 𑀲𑀸𑀥𑀼, 𑀆𑀦𑀦𑁆𑀤! 𑀲𑀸𑀥𑀼 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀺 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀓𑀣𑀜𑁆𑀘, 𑀆𑀦𑀦𑁆𑀤, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺. 𑀓𑀣𑀜𑁆𑀘, 𑀆𑀦𑀦𑁆𑀤, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺. 𑀓𑀣𑀜𑁆𑀘, 𑀆𑀦𑀦𑁆𑀤, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺. 𑀓𑀣𑀜𑁆𑀘, 𑀆𑀦𑀦𑁆𑀤, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺. 𑀓𑀣𑀜𑁆𑀘, 𑀆𑀦𑀦𑁆𑀤, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺. 𑀓𑀣𑀜𑁆𑀘, 𑀆𑀦𑀦𑁆𑀤, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺…𑀧𑁂… 𑀏𑀯𑀁 𑀔𑁄, 𑀆𑀦𑀦𑁆𑀤, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺.

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀆𑀦𑀦𑁆𑀤𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.