𑁩. 𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁

𑁨𑁭𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀢𑀧𑁄𑀤𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀢𑀧𑁄𑀤𑁄 [𑀢𑀧𑁄𑀤𑀸 (𑀲𑀻.)] 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀢𑀧𑁄𑀤𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄 [𑀲𑀼𑀓𑁆𑀔𑀸𑀧𑀬𑀫𑀸𑀦𑁄 (𑀓.)]. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀢𑀧𑁄𑀤𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀺𑀁 𑀏𑀢𑀤𑀯𑁄𑀘 𑁋 ‘‘𑀥𑀸𑀭𑁂𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘𑀸’’𑀢𑀺? ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀢𑁆𑀯𑀁 𑀧𑀦𑀸𑀯𑀼𑀲𑁄, 𑀥𑀸𑀭𑁂𑀲𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘𑀸’’𑀢𑀺? ‘‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀥𑀸𑀭𑁂𑀲𑀺 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸’’𑀢𑀺? ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸𑀢𑀺. 𑀢𑁆𑀯𑀁 𑀧𑀦𑀸𑀯𑀼𑀲𑁄, 𑀥𑀸𑀭𑁂𑀲𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸’’𑀢𑀺? ‘‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼 𑀦 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸𑀢𑀺. 𑀉𑀕𑁆𑀕𑀡𑁆𑀳𑀸𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘; 𑀧𑀭𑀺𑀬𑀸𑀧𑀼𑀡𑀸𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘; 𑀥𑀸𑀭𑁂𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀅𑀢𑁆𑀣𑀲𑀁𑀳𑀺𑀢𑁄, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑁄 𑀘 𑀯𑀺𑀪𑀗𑁆𑀕𑁄 𑀘 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄’’𑀢𑀺. 𑀇𑀤𑀫𑀯𑁄𑀘 𑀲𑀸 𑀤𑁂𑀯𑀢𑀸; 𑀇𑀤𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑁨𑁮𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀢𑀧𑁄𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀢𑀧𑁄𑀤𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺𑀁 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄. 𑀅𑀣 𑀔𑁄 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀢𑀧𑁄𑀤𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀥𑀸𑀭𑁂𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘𑀸’’’𑀢𑀺?

‘‘𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀢𑀁 𑀤𑁂𑀯𑀢𑀁 𑀏𑀢𑀤𑀯𑁄𑀘𑀁 𑁋 ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀢𑁆𑀯𑀁 𑀧𑀦𑀸𑀯𑀼𑀲𑁄, 𑀥𑀸𑀭𑁂𑀲𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘𑀸’𑀢𑀺? ‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀥𑀸𑀭𑁂𑀲𑀺 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸𑀢𑀺. 𑀢𑁆𑀯𑀁 𑀧𑀦𑀸𑀯𑀼𑀲𑁄, 𑀥𑀸𑀭𑁂𑀲𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸’𑀢𑀺? ‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸𑀢𑀺. 𑀉𑀕𑁆𑀕𑀡𑁆𑀳𑀸𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘; 𑀧𑀭𑀺𑀬𑀸𑀧𑀼𑀡𑀸𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘; 𑀥𑀸𑀭𑁂𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘. 𑀅𑀢𑁆𑀣𑀲𑀁𑀳𑀺𑀢𑁄, 𑀪𑀺𑀓𑁆𑀔𑀼, 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑁄 𑀘 𑀯𑀺𑀪𑀗𑁆𑀕𑁄 𑀘 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄’𑀢𑀺. 𑀇𑀤𑀫𑀯𑁄𑀘, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸; 𑀇𑀤𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀤𑁂𑀲𑁂𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀼, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸; 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁; 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺.

𑁨𑁮𑁧. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀅𑀫𑁆𑀳𑀸𑀓𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸𑀢𑀺? 𑀢𑁂𑀲𑀁 𑀦𑁄, 𑀆𑀯𑀼𑀲𑁄 𑀓𑀘𑁆𑀘𑀸𑀦, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’𑀢𑀺. 𑀯𑀺𑀪𑀚𑀢𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀲𑀸𑀭𑀯𑀢𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫 𑀔𑀦𑁆𑀥𑀁 𑀲𑀸𑀔𑀸𑀧𑀮𑀸𑀲𑁂 𑀲𑀸𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬; 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀲𑀺𑀢𑁆𑀯𑀸 𑀅𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣 [𑀫𑀜𑁆𑀜𑁂𑀣 (𑀧𑀻.)]. 𑀲𑁄 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀅𑀤𑁆𑀥𑀸𑀯𑀼𑀲𑁄 𑀓𑀘𑁆𑀘𑀸𑀦, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫; 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀫. 𑀅𑀧𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁; 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀯𑀺𑀪𑀚𑀢𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀕𑀭𑀼𑀁 𑀓𑀭𑀺𑀢𑁆𑀯𑀸’’𑀢𑀺 [𑀅𑀕𑀭𑀼𑀓𑀭𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺 𑁋

𑁨𑁮𑁨. ‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺? 𑀇𑀢𑀺 𑀫𑁂 𑀘𑀓𑁆𑀔𑀼 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀽𑀧𑀸𑀢𑀺 𑁋 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 [𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀦𑁆𑀥𑀁 (𑀓.)] 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺. 𑀇𑀢𑀺 𑀫𑁂 𑀲𑁄𑀢𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀲𑀤𑁆𑀤𑀸𑀢𑀺…𑀧𑁂… 𑀇𑀢𑀺 𑀫𑁂 𑀖𑀸𑀦𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀕𑀦𑁆𑀥𑀸𑀢𑀺… 𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀲𑀸𑀢𑀺… 𑀇𑀢𑀺 𑀫𑁂 𑀓𑀸𑀬𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸𑀢𑀺… 𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀥𑀫𑁆𑀫𑀸𑀢𑀺 𑁋 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺? 𑀇𑀢𑀺 𑀫𑁂 𑀘𑀓𑁆𑀔𑀼 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀽𑀧𑀸𑀢𑀺 𑁋 𑀢𑀢𑁆𑀣 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺. 𑀇𑀢𑀺 𑀫𑁂 𑀲𑁄𑀢𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀲𑀤𑁆𑀤𑀸𑀢𑀺…𑀧𑁂… 𑀇𑀢𑀺 𑀫𑁂 𑀖𑀸𑀦𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀕𑀦𑁆𑀥𑀸𑀢𑀺… 𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀲𑀸𑀢𑀺… 𑀇𑀢𑀺 𑀫𑁂 𑀓𑀸𑀬𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸𑀢𑀺… 𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀥𑀫𑁆𑀫𑀸𑀢𑀺 𑁋 𑀢𑀢𑁆𑀣 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲, 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺.

𑁨𑁮𑁩. ‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺? 𑀇𑀢𑀺 𑀫𑁂 𑀘𑀓𑁆𑀔𑀼 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀽𑀧𑀸𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺. 𑀇𑀢𑀺 𑀫𑁂 𑀲𑁄𑀢𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀲𑀤𑁆𑀤𑀸𑀢𑀺…𑀧𑁂… 𑀇𑀢𑀺 𑀫𑁂 𑀖𑀸𑀦𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀕𑀦𑁆𑀥𑀸𑀢𑀺… 𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀲𑀸𑀢𑀺… 𑀇𑀢𑀺 𑀫𑁂 𑀓𑀸𑀬𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸𑀢𑀺… 𑀇𑀢𑀺 𑀫𑁂 𑀫𑀦𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀥𑀫𑁆𑀫𑀸𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺? 𑀇𑀢𑀺 𑀫𑁂 𑀘𑀓𑁆𑀔𑀼 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀽𑀧𑀸𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦𑀧𑁆𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺. 𑀇𑀢𑀺 𑀫𑁂 𑀲𑁄𑀢𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀲𑀤𑁆𑀤𑀸𑀢𑀺…𑀧𑁂… 𑀇𑀢𑀺 𑀫𑁂 𑀖𑀸𑀦𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀕𑀦𑁆𑀥𑀸𑀢𑀺… 𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀭𑀲𑀸𑀢𑀺… 𑀇𑀢𑀺 𑀫𑁂 𑀓𑀸𑀬𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸𑀢𑀺… 𑀇𑀢𑀺 𑀫𑁂 𑀫𑀦𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀇𑀢𑀺 𑀥𑀫𑁆𑀫𑀸𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦𑀧𑁆𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺.

𑁨𑁮𑁪. ‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺? 𑀬𑀜𑁆𑀘𑀸𑀯𑀼𑀲𑁄, 𑀘𑀓𑁆𑀔𑀼 𑀬𑁂 𑀘 𑀭𑀽𑀧𑀸 𑁋 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺. 𑀬𑀜𑁆𑀘𑀸𑀯𑀼𑀲𑁄, 𑀲𑁄𑀢𑀁 𑀬𑁂 𑀘 𑀲𑀤𑁆𑀤𑀸…𑀧𑁂… 𑀬𑀜𑁆𑀘𑀸𑀯𑀼𑀲𑁄, 𑀖𑀸𑀦𑀁 𑀬𑁂 𑀘 𑀕𑀦𑁆𑀥𑀸… 𑀬𑀸 𑀘𑀸𑀯𑀼𑀲𑁄, 𑀚𑀺𑀯𑁆𑀳𑀸 𑀬𑁂 𑀘 𑀭𑀲𑀸… 𑀬𑁄 𑀘𑀸𑀯𑀼𑀲𑁄, 𑀓𑀸𑀬𑁄 𑀬𑁂 𑀘 𑀨𑁄𑀝𑁆𑀞𑀩𑁆𑀩𑀸… 𑀬𑁄 𑀘𑀸𑀯𑀼𑀲𑁄, 𑀫𑀦𑁄 𑀬𑁂 𑀘 𑀥𑀫𑁆𑀫𑀸 𑁋 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺.

‘‘𑀓𑀣𑀜𑁆𑀘, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺? 𑀬𑀜𑁆𑀘𑀸𑀯𑀼𑀲𑁄, 𑀘𑀓𑁆𑀔𑀼 𑀬𑁂 𑀘 𑀭𑀽𑀧𑀸 𑁋 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺. 𑀬𑀜𑁆𑀘𑀸𑀯𑀼𑀲𑁄, 𑀲𑁄𑀢𑀁 𑀬𑁂 𑀘 𑀲𑀤𑁆𑀤𑀸…𑀧𑁂… 𑀬𑀜𑁆𑀘𑀸𑀯𑀼𑀲𑁄, 𑀖𑀸𑀦𑀁 𑀬𑁂 𑀘 𑀕𑀦𑁆𑀥𑀸… 𑀬𑀸 𑀘𑀸𑀯𑀼𑀲𑁄, 𑀚𑀺𑀯𑁆𑀳𑀸 𑀬𑁂 𑀘 𑀭𑀲𑀸… 𑀬𑁄 𑀘𑀸𑀯𑀼𑀲𑁄, 𑀓𑀸𑀬𑁄 𑀬𑁂 𑀘 𑀨𑁄𑀝𑁆𑀞𑀩𑁆𑀩𑀸… 𑀬𑁄 𑀘𑀸𑀯𑀼𑀲𑁄, 𑀫𑀦𑁄 𑀬𑁂 𑀘 𑀥𑀫𑁆𑀫𑀸 𑁋 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀢𑀤𑀪𑀺𑀦𑀦𑁆𑀤𑀢𑀺, 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺 𑁋 𑀏𑀯𑀁 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺.

𑁨𑁮𑁫. ‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬…𑀧𑁂…

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄, 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺? 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀫𑁆𑀳. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄’’𑀢𑀺.

‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄; 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂 𑀫𑀳𑀸𑀓𑀘𑁆𑀘𑀸𑀦𑁄. 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢𑀁. 𑀏𑀲𑁄, 𑀘𑁂𑀯𑁂𑀢𑀲𑁆𑀲 𑀅𑀢𑁆𑀣𑁄. 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀣𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.