𑁧. 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁

𑁨𑁭𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀯𑁄, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 [𑀬𑀁 (𑀦𑁂𑀢𑁆𑀢𑀺𑀧𑀸𑀴𑀺)] 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 [𑀅𑀲𑀁𑀳𑀺𑀭𑀁 (𑀲𑁆𑀬𑀸. 𑀓𑀁. 𑀓.)] 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁 [𑀓𑀺𑀘𑁆𑀘𑀁 𑀆𑀢𑀧𑁆𑀧𑀁 (𑀲𑀻. 𑀓.)], 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀺’’ [𑀫𑀼𑀦𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑁨𑁭𑁩. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺? ‘𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀲𑀗𑁆𑀔𑀸𑀭𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺? ‘𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀲𑀗𑁆𑀔𑀸𑀭𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, ‘𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀢𑀺.

𑁨𑁭𑁪. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺? ‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀲𑀺𑀬𑀁…𑀧𑁂… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀁 𑀧𑀝𑀺𑀓𑀗𑁆𑀔𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺? ‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺, 𑀏𑀯𑀁𑀯𑁂𑀤𑀦𑁄 𑀲𑀺𑀬𑀁 … 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… ‘𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀺 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀁 𑀦𑀧𑁆𑀧𑀝𑀺𑀓𑀗𑁆𑀔𑀢𑀺.

𑁨𑁭𑁫. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁 𑁋 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀁𑀳𑀻𑀭𑀢𑀺.

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

‘‘‘𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀯𑁄, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀻’𑀢𑀺 𑁋 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.