𑁫. 𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀁

𑁪𑁬𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑀁’’.

𑁪𑁬𑁯. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀁? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’𑀢𑀺. 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂 𑀔𑁄 𑀫𑁄𑀴𑀺𑀩𑀤𑁆𑀥𑀸𑀳𑀺 [𑀫𑁄𑀴𑀺𑀩𑀦𑁆𑀥𑀸𑀳𑀺 (𑀲𑁆𑀬𑀸. 𑀓𑀁. 𑀓.)] 𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀺 𑀧𑀭𑀺𑀘𑀸𑀭𑁂𑀦𑁆𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀓𑀺𑀁𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀫𑁂𑀲𑀼 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀸𑀫𑀸𑀦𑀁 𑀧𑀳𑀸𑀦𑀫𑀸𑀳𑀁𑀲𑀼, 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺? 𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’𑀢𑀺 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀁 𑀔𑁄 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀫𑁂𑀲𑀼 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀸𑀫𑀸𑀦𑀁 𑀧𑀳𑀸𑀦𑀫𑀸𑀳𑀁𑀲𑀼, 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀇𑀫𑁂 𑀳𑀺 𑀫𑀬𑀁 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀸𑀫𑀸’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀫𑀸𑀮𑀼𑀯𑀸𑀲𑀺𑀧𑀸𑀝𑀺𑀓𑀸 𑀨𑀮𑁂𑀬𑁆𑀬. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀫𑀸𑀮𑀼𑀯𑀸𑀩𑀻𑀚𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀮𑀫𑀽𑀮𑁂 𑀦𑀺𑀧𑀢𑁂𑀬𑁆𑀬. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀬𑀸 𑀢𑀲𑁆𑀫𑀺𑀁 𑀲𑀸𑀮𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀸 𑀪𑀻𑀢𑀸 𑀲𑀁𑀯𑀺𑀕𑁆𑀕𑀸 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀲𑀸𑀮𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀏𑀯𑀁 𑀲𑀫𑀲𑁆𑀲𑀸𑀲𑁂𑀬𑁆𑀬𑀼𑀁 𑁋 ‘𑀫𑀸 𑀪𑀯𑀁 𑀪𑀸𑀬𑀺, 𑀫𑀸 𑀪𑀯𑀁 𑀪𑀸𑀬𑀺; 𑀅𑀧𑁆𑀧𑁂𑀯 𑀦𑀸𑀫𑁂𑀢𑀁 𑀫𑀸𑀮𑀼𑀯𑀸𑀩𑀻𑀚𑀁 𑀫𑁄𑀭𑁄 𑀯𑀸 𑀕𑀺𑀮𑁂𑀬𑁆𑀬 [𑀫𑁄𑀭𑁄 𑀯𑀸 𑀕𑀺𑀮𑁂𑀬𑁆𑀬, 𑀕𑁄𑀥𑀸 𑀯𑀸 𑀔𑀸𑀤𑁂𑀬𑁆𑀬 (𑀓.)], 𑀫𑀕𑁄 𑀯𑀸 𑀔𑀸𑀤𑁂𑀬𑁆𑀬, 𑀤𑀯𑀟𑀸𑀳𑁄 [𑀯𑀦𑀤𑀸𑀳𑁄 (𑀓.)] 𑀯𑀸 𑀟𑀳𑁂𑀬𑁆𑀬, 𑀯𑀦𑀓𑀫𑁆𑀫𑀺𑀓𑀸 𑀯𑀸 𑀉𑀤𑁆𑀥𑀭𑁂𑀬𑁆𑀬𑀼𑀁, 𑀉𑀧𑀘𑀺𑀓𑀸 𑀯𑀸 𑀉𑀝𑁆𑀞𑀳𑁂𑀬𑁆𑀬𑀼𑀁 [𑀉𑀤𑁆𑀭𑀪𑁂𑀬𑁆𑀬𑀼𑀁 (𑀲𑀻. 𑀧𑀻. 𑀓.)], 𑀅𑀩𑀻𑀚𑀁 𑀯𑀸 𑀧𑀦𑀲𑁆𑀲𑀸’𑀢𑀺. 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀫𑀸𑀮𑀼𑀯𑀸𑀩𑀻𑀚𑀁 𑀦𑁂𑀯 𑀫𑁄𑀭𑁄 𑀕𑀺𑀮𑁂𑀬𑁆𑀬, 𑀦 𑀫𑀕𑁄 𑀔𑀸𑀤𑁂𑀬𑁆𑀬, 𑀦 𑀤𑀯𑀟𑀸𑀳𑁄 𑀟𑀳𑁂𑀬𑁆𑀬, 𑀦 𑀯𑀦𑀓𑀫𑁆𑀫𑀺𑀓𑀸 𑀉𑀤𑁆𑀥𑀭𑁂𑀬𑁆𑀬𑀼𑀁, 𑀦 𑀉𑀧𑀘𑀺𑀓𑀸 𑀉𑀝𑁆𑀞𑀳𑁂𑀬𑁆𑀬𑀼𑀁, 𑀩𑀻𑀚𑀜𑁆𑀘 𑀧𑀦𑀲𑁆𑀲 𑀢𑀁 𑀧𑀸𑀯𑀼𑀲𑁆𑀲𑀓𑁂𑀦 𑀫𑁂𑀖𑁂𑀦 𑀅𑀪𑀺𑀧𑁆𑀧𑀯𑀼𑀝𑁆𑀞𑀁 𑀲𑀫𑁆𑀫𑀤𑁂𑀯 𑀯𑀺𑀭𑀼𑀳𑁂𑀬𑁆𑀬. 𑀲𑀸𑀲𑁆𑀲 𑀫𑀸𑀮𑀼𑀯𑀸𑀮𑀢𑀸 𑀢𑀭𑀼𑀡𑀸 𑀫𑀼𑀤𑀼𑀓𑀸 𑀮𑁄𑀫𑀲𑀸 𑀯𑀺𑀮𑀫𑁆𑀩𑀺𑀦𑀻, 𑀲𑀸 𑀢𑀁 𑀲𑀸𑀮𑀁 𑀉𑀧𑀦𑀺𑀲𑁂𑀯𑁂𑀬𑁆𑀬. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀲𑀸𑀮𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀏𑀯𑀫𑀲𑁆𑀲 𑁋 ‘𑀓𑀺𑀁𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀸𑀮𑀼𑀯𑀸𑀩𑀻𑀚𑁂 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀏𑀯𑀁 𑀲𑀫𑀲𑁆𑀲𑀸𑀲𑁂𑀲𑀼𑀁 [𑀲𑀫𑀲𑁆𑀲𑀸𑀲𑁂𑀬𑁆𑀬𑀼𑀁 (𑀓.)] 𑁋 ‘‘𑀫𑀸 𑀪𑀯𑀁 𑀪𑀸𑀬𑀺 𑀫𑀸 𑀪𑀯𑀁 𑀪𑀸𑀬𑀺, 𑀅𑀧𑁆𑀧𑁂𑀯 𑀦𑀸𑀫𑁂𑀢𑀁 𑀫𑀸𑀮𑀼𑀯𑀸𑀩𑀻𑀚𑀁 𑀫𑁄𑀭𑁄 𑀯𑀸 𑀕𑀺𑀮𑁂𑀬𑁆𑀬, 𑀫𑀕𑁄 𑀯𑀸 𑀔𑀸𑀤𑁂𑀬𑁆𑀬, 𑀤𑀯𑀟𑀸𑀳𑁄 𑀯𑀸 𑀟𑀳𑁂𑀬𑁆𑀬, 𑀯𑀦𑀓𑀫𑁆𑀫𑀺𑀓𑀸 𑀯𑀸 𑀉𑀤𑁆𑀥𑀭𑁂𑀬𑁆𑀬𑀼𑀁, 𑀉𑀧𑀘𑀺𑀓𑀸 𑀯𑀸 𑀉𑀝𑁆𑀞𑀳𑁂𑀬𑁆𑀬𑀼𑀁, 𑀅𑀩𑀻𑀚𑀁 𑀯𑀸 𑀧𑀦𑀲𑁆𑀲𑀸’’𑀢𑀺; 𑀲𑀼𑀔𑁄 𑀇𑀫𑀺𑀲𑁆𑀲𑀸 𑀫𑀸𑀮𑀼𑀯𑀸𑀮𑀢𑀸𑀬 𑀢𑀭𑀼𑀡𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀯𑀺𑀮𑀫𑁆𑀩𑀺𑀦𑀺𑀬𑀸 𑀲𑀫𑁆𑀨𑀲𑁆𑀲𑁄’𑀢𑀺. 𑀲𑀸 𑀢𑀁 𑀲𑀸𑀮𑀁 𑀅𑀦𑀼𑀧𑀭𑀺𑀳𑀭𑁂𑀬𑁆𑀬. 𑀲𑀸 𑀢𑀁 𑀲𑀸𑀮𑀁 𑀅𑀦𑀼𑀧𑀭𑀺𑀳𑀭𑀺𑀢𑁆𑀯𑀸 𑀉𑀧𑀭𑀺 𑀯𑀺𑀝𑀪𑀺𑀁 [𑀯𑀺𑀝𑀧𑀁 (𑀲𑁆𑀬𑀸. 𑀝𑁆𑀞.)] 𑀓𑀭𑁂𑀬𑁆𑀬. 𑀉𑀧𑀭𑀺 𑀯𑀺𑀝𑀪𑀺𑀁 𑀓𑀭𑀺𑀢𑁆𑀯𑀸 𑀑𑀖𑀦𑀁 𑀚𑀦𑁂𑀬𑁆𑀬. 𑀑𑀖𑀦𑀁 𑀚𑀦𑁂𑀢𑁆𑀯𑀸 𑀬𑁂 𑀢𑀲𑁆𑀲 𑀲𑀸𑀮𑀲𑁆𑀲 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀔𑀦𑁆𑀥𑀸 𑀢𑁂 𑀧𑀤𑀸𑀮𑁂𑀬𑁆𑀬. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀲𑀸𑀮𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀏𑀯𑀫𑀲𑁆𑀲 𑁋 ‘𑀇𑀤𑀁 𑀔𑁄 𑀢𑁂 𑀪𑁄𑀦𑁆𑀢𑁄 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀸𑀮𑀼𑀯𑀸𑀩𑀻𑀚𑁂 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀏𑀯𑀁 𑀲𑀫𑀲𑁆𑀲𑀸𑀲𑁂𑀲𑀼𑀁 [𑀲𑀫𑀲𑁆𑀲𑀸𑀲𑁂𑀬𑁆𑀬𑀼𑀁 (𑀓.)] 𑁋 ‘‘𑀫𑀸 𑀪𑀯𑀁 𑀪𑀸𑀬𑀺 𑀫𑀸 𑀪𑀯𑀁 𑀪𑀸𑀬𑀺, 𑀅𑀧𑁆𑀧𑁂𑀯 𑀦𑀸𑀫𑁂𑀢𑀁 𑀫𑀸𑀮𑀼𑀯𑀸𑀩𑀻𑀚𑀁 𑀫𑁄𑀭𑁄 𑀯𑀸 𑀕𑀺𑀮𑁂𑀬𑁆𑀬, 𑀫𑀕𑁄 𑀯𑀸 𑀔𑀸𑀤𑁂𑀬𑁆𑀬, 𑀤𑀯𑀟𑀸𑀳𑁄 𑀯𑀸 𑀟𑀳𑁂𑀬𑁆𑀬, 𑀯𑀦𑀓𑀫𑁆𑀫𑀺𑀓𑀸 𑀯𑀸 𑀉𑀤𑁆𑀥𑀭𑁂𑀬𑁆𑀬𑀼𑀁, 𑀉𑀧𑀘𑀺𑀓𑀸 𑀯𑀸 𑀉𑀝𑁆𑀞𑀳𑁂𑀬𑁆𑀬𑀼𑀁 𑀅𑀩𑀻𑀚𑀁 𑀯𑀸 𑀧𑀦𑀲𑁆𑀲𑀸’’𑀢𑀺. 𑀬𑀜𑁆𑀘𑀸𑀳𑀁 [𑀬𑀁 𑀯𑀸𑀳𑀁 (𑀓.), 𑀲𑁆𑀯𑀸𑀳𑀁 (𑀲𑁆𑀬𑀸. 𑀓𑀁.)] 𑀫𑀸𑀮𑀼𑀯𑀸𑀩𑀻𑀚𑀳𑁂𑀢𑀼 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀸𑀫𑀻’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀺 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 ‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’𑀢𑀺. 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂 𑀫𑁄𑀴𑀺𑀩𑀤𑁆𑀥𑀸𑀳𑀺 𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀺 𑀧𑀭𑀺𑀘𑀸𑀭𑁂𑀦𑁆𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀓𑀺𑀁𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀫𑁂𑀲𑀼 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀸𑀫𑀸𑀦𑀁 𑀧𑀳𑀸𑀦𑀫𑀸𑀳𑀁𑀲𑀼, 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺? 𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’𑀢𑀺. 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀁 𑀔𑁄 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀫𑁂𑀲𑀼 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀓𑀸𑀫𑀸𑀦𑀁 𑀧𑀳𑀸𑀦𑀫𑀸𑀳𑀁𑀲𑀼, 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀫𑁂 𑀳𑀺 𑀫𑀬𑀁 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀸𑀫𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀁.

𑁪𑁭𑁦. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀘𑁂𑀮𑀓𑁄 𑀳𑁄𑀢𑀺 𑀫𑀼𑀢𑁆𑀢𑀸𑀘𑀸𑀭𑁄 𑀳𑀢𑁆𑀣𑀸𑀧𑀮𑁂𑀔𑀦𑁄, 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄, 𑀦𑀸𑀪𑀺𑀳𑀝𑀁, 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁, 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁, 𑀦 𑀤𑀡𑁆𑀟𑀫𑀦𑁆𑀢𑀭𑀁, 𑀦 𑀫𑀼𑀲𑀮𑀫𑀦𑁆𑀢𑀭𑀁, 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀦 𑀕𑀩𑁆𑀪𑀺𑀦𑀺𑀬𑀸, 𑀦 𑀧𑀸𑀬𑀫𑀸𑀦𑀸𑀬, 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬, 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼, 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻, 𑀦 𑀫𑀘𑁆𑀙𑀁, 𑀦 𑀫𑀁𑀲𑀁, 𑀦 𑀲𑀼𑀭𑀁, 𑀦 𑀫𑁂𑀭𑀬𑀁, 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺. 𑀲𑁄 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄, 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄. 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀢𑀺, 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺… 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺. 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀦𑀻𑀯𑀸𑀭𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀳𑀝𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀓𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀆𑀘𑀸𑀫𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀕𑁄𑀫𑀬𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀲𑁄 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀴𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀉𑀮𑀽𑀓𑀧𑀓𑁆𑀔𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀉𑀩𑁆𑀪𑀝𑁆𑀞𑀓𑁄𑀧𑀺 𑀳𑁄𑀢𑀺, 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑁄, 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺, 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 [𑀧𑀲𑁆𑀲 𑀫. 𑀦𑀺. 𑁧.𑁧𑁫𑁫 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂], 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀦𑁂𑀓𑀯𑀺𑀳𑀺𑀢𑀁 𑀓𑀸𑀬𑀲𑁆𑀲 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀯𑀺𑀧𑀸𑀓𑀁.

𑁪𑁭𑁧. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀓𑀢𑀺𑀬𑀸 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀅𑀪𑀺𑀓𑁆𑀔𑀡𑀁 𑀭𑀸𑀕𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀧𑀓𑀢𑀺𑀬𑀸 𑀢𑀺𑀩𑁆𑀩𑀤𑁄𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀅𑀪𑀺𑀓𑁆𑀔𑀡𑀁 𑀤𑁄𑀲𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀧𑀓𑀢𑀺𑀬𑀸 𑀢𑀺𑀩𑁆𑀩𑀫𑁄𑀳𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀅𑀪𑀺𑀓𑁆𑀔𑀡𑀁 𑀫𑁄𑀳𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑁄 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦, 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦, 𑀅𑀲𑁆𑀲𑀼𑀫𑀼𑀔𑁄𑀧𑀺 𑀭𑀼𑀤𑀫𑀸𑀦𑁄 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁.

𑁪𑁭𑁨. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀓𑀢𑀺𑀬𑀸 𑀦 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀦 𑀅𑀪𑀺𑀓𑁆𑀔𑀡𑀁 𑀭𑀸𑀕𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀧𑀓𑀢𑀺𑀬𑀸 𑀦 𑀢𑀺𑀩𑁆𑀩𑀤𑁄𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀦 𑀅𑀪𑀺𑀓𑁆𑀔𑀡𑀁 𑀤𑁄𑀲𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀧𑀓𑀢𑀺𑀬𑀸 𑀦 𑀢𑀺𑀩𑁆𑀩𑀫𑁄𑀳𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀦 𑀅𑀪𑀺𑀓𑁆𑀔𑀡𑀁 𑀫𑁄𑀳𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀥𑀫𑁆𑀫𑀲𑀫𑀸𑀤𑀸𑀦𑀸𑀦𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.