𑁩. 𑀑𑀧𑀫𑁆𑀫𑀯𑀕𑁆𑀕𑁄

𑁧. 𑀓𑀓𑀘𑀽𑀧𑀫𑀲𑀼𑀢𑁆𑀢𑀁

𑁨𑁨𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀯𑁂𑀮𑀁 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺 𑁋 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀬𑀲𑁆𑀫𑀢𑁄 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀲𑀫𑁆𑀫𑀼𑀔𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦𑀸𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀫𑁆𑀫𑀼𑀔𑀸 𑀆𑀬𑀲𑁆𑀫𑀢𑁄 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀯𑁂𑀮𑀁 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺 𑁋 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀬𑀲𑁆𑀫𑀢𑁄 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀲𑀫𑁆𑀫𑀼𑀔𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦𑀸𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀫𑁆𑀫𑀼𑀔𑀸 𑀆𑀬𑀲𑁆𑀫𑀢𑁄 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀻’’𑀢𑀺.

𑁨𑁨𑁩. 𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀫𑁄𑀴𑀺𑀬𑀨𑀕𑁆𑀕𑀼𑀦𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀨𑀕𑁆𑀕𑀼𑀦, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑁄𑀴𑀺𑀬𑀨𑀕𑁆𑀕𑀼𑀦𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀨𑀕𑁆𑀕𑀼𑀦, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑁄𑀴𑀺𑀬𑀨𑀕𑁆𑀕𑀼𑀦𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀨𑀕𑁆𑀕𑀼𑀦, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀯𑁂𑀮𑀁 𑀲𑀁𑀲𑀝𑁆𑀞𑁄 𑀯𑀺𑀳𑀭𑀲𑀺? 𑀏𑀯𑀁 𑀲𑀁𑀲𑀝𑁆𑀞𑁄 𑀓𑀺𑀭 𑀢𑁆𑀯𑀁, 𑀨𑀕𑁆𑀕𑀼𑀦, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀲𑀺 𑁋 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀲𑀫𑁆𑀫𑀼𑀔𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦 𑀢𑁆𑀯𑀁 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀲𑀺. 𑀲𑀘𑁂 𑀧𑀦 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀫𑁆𑀫𑀼𑀔𑀸 𑀢𑀼𑀬𑁆𑀳𑀁 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀢𑁂𑀦 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄 𑀓𑀺𑀭 𑀢𑁆𑀯𑀁, 𑀨𑀕𑁆𑀕𑀼𑀦, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀦𑀦𑀼 𑀢𑁆𑀯𑀁, 𑀨𑀕𑁆𑀕𑀼𑀦, 𑀓𑀼𑀮𑀧𑀼𑀢𑁆𑀢𑁄 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺.

𑁨𑁨𑁪. ‘‘𑀦 𑀔𑁄 𑀢𑁂 𑀏𑀢𑀁, 𑀨𑀕𑁆𑀕𑀼𑀦, 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀲𑁆𑀲, 𑀬𑀁 𑀢𑁆𑀯𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀯𑁂𑀮𑀁 𑀲𑀁𑀲𑀝𑁆𑀞𑁄 𑀯𑀺𑀳𑀭𑁂𑀬𑁆𑀬𑀸𑀲𑀺. 𑀢𑀲𑁆𑀫𑀸𑀢𑀺𑀳, 𑀨𑀕𑁆𑀕𑀼𑀦, 𑀢𑀯 𑀘𑁂𑀧𑀺 𑀓𑁄𑀘𑀺 𑀲𑀫𑁆𑀫𑀼𑀔𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬, 𑀢𑀢𑁆𑀭𑀸𑀧𑀺 𑀢𑁆𑀯𑀁, 𑀨𑀕𑁆𑀕𑀼𑀦, 𑀬𑁂 𑀕𑁂𑀳𑀲𑀺𑀢𑀸 [𑀕𑁂𑀳𑀲𑁆𑀲𑀺𑀢𑀸 (?)] 𑀙𑀦𑁆𑀤𑀸 𑀬𑁂 𑀕𑁂𑀳𑀲𑀺𑀢𑀸 𑀯𑀺𑀢𑀓𑁆𑀓𑀸 𑀢𑁂 𑀧𑀚𑀳𑁂𑀬𑁆𑀬𑀸𑀲𑀺. 𑀢𑀢𑁆𑀭𑀸𑀧𑀺 𑀢𑁂, 𑀨𑀕𑁆𑀕𑀼𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀘𑁂𑀯 𑀫𑁂 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀦 𑀤𑁄𑀲𑀦𑁆𑀢𑀭𑁄’𑀢𑀺. 𑀏𑀯𑀜𑁆𑀳𑀺 𑀢𑁂, 𑀨𑀕𑁆𑀕𑀼𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀨𑀕𑁆𑀕𑀼𑀦, 𑀢𑀯 𑀘𑁂𑀧𑀺 𑀓𑁄𑀘𑀺 𑀲𑀫𑁆𑀫𑀼𑀔𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀮𑁂𑀟𑁆𑀟𑀼𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀤𑀡𑁆𑀟𑁂𑀦 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀲𑀢𑁆𑀣𑁂𑀦 𑀧𑀳𑀸𑀭𑀁 𑀤𑀤𑁂𑀬𑁆𑀬. 𑀢𑀢𑁆𑀭𑀸𑀧𑀺 𑀢𑁆𑀯𑀁, 𑀨𑀕𑁆𑀕𑀼𑀦, 𑀬𑁂 𑀕𑁂𑀳𑀲𑀺𑀢𑀸 𑀙𑀦𑁆𑀤𑀸 𑀬𑁂 𑀕𑁂𑀳𑀲𑀺𑀢𑀸 𑀯𑀺𑀢𑀓𑁆𑀓𑀸 𑀢𑁂 𑀧𑀚𑀳𑁂𑀬𑁆𑀬𑀸𑀲𑀺. 𑀢𑀢𑁆𑀭𑀸𑀧𑀺 𑀢𑁂, 𑀨𑀕𑁆𑀕𑀼𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀦 𑀘𑁂𑀯 𑀫𑁂 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀦 𑀤𑁄𑀲𑀦𑁆𑀢𑀭𑁄’𑀢𑀺. 𑀏𑀯𑀜𑁆𑀳𑀺 𑀢𑁂, 𑀨𑀕𑁆𑀕𑀼𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀨𑀕𑁆𑀕𑀼𑀦, 𑀢𑀯 𑀘𑁂𑀧𑀺 𑀓𑁄𑀘𑀺 𑀲𑀫𑁆𑀫𑀼𑀔𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬, 𑀢𑀢𑁆𑀭𑀸𑀧𑀺 𑀢𑁆𑀯𑀁, 𑀨𑀕𑁆𑀕𑀼𑀦, 𑀬𑁂 𑀕𑁂𑀳𑀲𑀺𑀢𑀸 𑀙𑀦𑁆𑀤𑀸 𑀬𑁂 𑀕𑁂𑀳𑀲𑀺𑀢𑀸 𑀯𑀺𑀢𑀓𑁆𑀓𑀸 𑀢𑁂 𑀧𑀚𑀳𑁂𑀬𑁆𑀬𑀸𑀲𑀺. 𑀢𑀢𑁆𑀭𑀸𑀧𑀺 𑀢𑁂, 𑀨𑀕𑁆𑀕𑀼𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀦 𑀘𑁂𑀯 𑀫𑁂 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀦 𑀤𑁄𑀲𑀦𑁆𑀢𑀭𑁄’𑀢𑀺. 𑀏𑀯𑀜𑁆𑀳𑀺 𑀢𑁂, 𑀨𑀕𑁆𑀕𑀼𑀦, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀨𑀕𑁆𑀕𑀼𑀦, 𑀢𑀯 𑀘𑁂𑀧𑀺 𑀓𑁄𑀘𑀺 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀮𑁂𑀟𑁆𑀟𑀼𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀤𑀡𑁆𑀟𑁂𑀦 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀲𑀢𑁆𑀣𑁂𑀦 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀢𑀢𑁆𑀭𑀸𑀧𑀺 𑀢𑁆𑀯𑀁, 𑀨𑀕𑁆𑀕𑀼𑀦, 𑀬𑁂 𑀕𑁂𑀳𑀲𑀺𑀢𑀸 𑀙𑀦𑁆𑀤𑀸 𑀬𑁂 𑀕𑁂𑀳𑀲𑀺𑀢𑀸 𑀯𑀺𑀢𑀓𑁆𑀓𑀸 𑀢𑁂 𑀧𑀚𑀳𑁂𑀬𑁆𑀬𑀸𑀲𑀺. 𑀢𑀢𑁆𑀭𑀸𑀧𑀺 𑀢𑁂, 𑀨𑀕𑁆𑀕𑀼𑀦, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀦 𑀘𑁂𑀯 𑀫𑁂 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀦 𑀤𑁄𑀲𑀦𑁆𑀢𑀭𑁄’𑀢𑀺. 𑀏𑀯𑀜𑁆𑀳𑀺 𑀢𑁂, 𑀨𑀕𑁆𑀕𑀼𑀦, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑁨𑁨𑁫. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀭𑀸𑀥𑀬𑀺𑀁𑀲𑀼 𑀯𑀢 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀏𑀓𑀁 𑀲𑀫𑀬𑀁 𑀘𑀺𑀢𑁆𑀢𑀁. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺𑀁 𑁋 𑀅𑀳𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀸𑀲𑀦𑀪𑁄𑀚𑀦𑀁 𑀪𑀼𑀜𑁆𑀚𑀸𑀫𑀺. 𑀏𑀓𑀸𑀲𑀦𑀪𑁄𑀚𑀦𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀜𑁆𑀚𑀫𑀸𑀦𑁄 𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀸𑀫𑀺 𑀅𑀧𑁆𑀧𑀸𑀢𑀗𑁆𑀓𑀢𑀜𑁆𑀘 𑀮𑀳𑀼𑀝𑁆𑀞𑀸𑀦𑀜𑁆𑀘 𑀩𑀮𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀜𑁆𑀘. 𑀏𑀣 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀏𑀓𑀸𑀲𑀦𑀪𑁄𑀚𑀦𑀁 𑀪𑀼𑀜𑁆𑀚𑀣. 𑀏𑀓𑀸𑀲𑀦𑀪𑁄𑀚𑀦𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀪𑀼𑀜𑁆𑀚𑀫𑀸𑀦𑀸 𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀺𑀲𑁆𑀲𑀣 𑀅𑀧𑁆𑀧𑀸𑀢𑀗𑁆𑀓𑀢𑀜𑁆𑀘 𑀮𑀳𑀼𑀝𑁆𑀞𑀸𑀦𑀜𑁆𑀘 𑀩𑀮𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀜𑁆𑀘𑀸𑀢𑀺. 𑀦 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀦𑀼𑀲𑀸𑀲𑀦𑀻 𑀓𑀭𑀡𑀻𑀬𑀸 𑀅𑀳𑁄𑀲𑀺; 𑀲𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀫𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀳𑁄𑀲𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀽𑀫𑀺𑀬𑀁 𑀘𑀢𑀼𑀫𑀳𑀸𑀧𑀣𑁂 𑀆𑀚𑀜𑁆𑀜𑀭𑀣𑁄 𑀬𑀼𑀢𑁆𑀢𑁄 𑀅𑀲𑁆𑀲 𑀞𑀺𑀢𑁄 𑀑𑀥𑀲𑁆𑀢𑀧𑀢𑁄𑀤𑁄. 𑀢𑀫𑁂𑀦𑀁 𑀤𑀓𑁆𑀔𑁄 𑀬𑁄𑀕𑁆𑀕𑀸𑀘𑀭𑀺𑀬𑁄 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀅𑀪𑀺𑀭𑀼𑀳𑀺𑀢𑁆𑀯𑀸, 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀭𑀲𑁆𑀫𑀺𑀬𑁄 𑀕𑀳𑁂𑀢𑁆𑀯𑀸, 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀧𑀢𑁄𑀤𑀁 𑀕𑀳𑁂𑀢𑁆𑀯𑀸, 𑀬𑁂𑀦𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀲𑀸𑀭𑁂𑀬𑁆𑀬𑀧𑀺 𑀧𑀘𑁆𑀘𑀸𑀲𑀸𑀭𑁂𑀬𑁆𑀬𑀧𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀦 𑀫𑁂 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀦𑀼𑀲𑀸𑀲𑀦𑀻 𑀓𑀭𑀡𑀻𑀬𑀸 𑀅𑀳𑁄𑀲𑀺, 𑀲𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀫𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀳𑁄𑀲𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀅𑀓𑀼𑀲𑀮𑀁 𑀧𑀚𑀳𑀣, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀆𑀬𑁄𑀕𑀁 𑀓𑀭𑁄𑀣. 𑀏𑀯𑀜𑁆𑀳𑀺 𑀢𑀼𑀫𑁆𑀳𑁂𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁. 𑀢𑀜𑁆𑀘𑀲𑁆𑀲 𑀏𑀴𑀡𑁆𑀟𑁂𑀳𑀺 𑀲𑀜𑁆𑀙𑀦𑁆𑀦𑀁. 𑀢𑀲𑁆𑀲 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀢𑁆𑀣𑀓𑀸𑀫𑁄 𑀳𑀺𑀢𑀓𑀸𑀫𑁄 𑀬𑁄𑀕𑀓𑁆𑀔𑁂𑀫𑀓𑀸𑀫𑁄. 𑀲𑁄 𑀬𑀸 𑀢𑀸 𑀲𑀸𑀮𑀮𑀝𑁆𑀞𑀺𑀬𑁄 𑀓𑀼𑀝𑀺𑀮𑀸 𑀑𑀚𑀸𑀧𑀳𑀭𑀡𑀺𑀬𑁄 [𑀑𑀚𑀳𑀭𑀡𑀺𑀬𑁄 (𑀓.)] 𑀢𑀸 𑀙𑁂𑀢𑁆𑀯𑀸 [𑀢𑀘𑁆𑀙𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑀳𑀺𑀤𑁆𑀥𑀸 𑀦𑀻𑀳𑀭𑁂𑀬𑁆𑀬, 𑀅𑀦𑁆𑀢𑁄𑀯𑀦𑀁 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀬𑁆𑀬. 𑀬𑀸 𑀧𑀦 𑀢𑀸 𑀲𑀸𑀮𑀮𑀝𑁆𑀞𑀺𑀬𑁄 𑀉𑀚𑀼𑀓𑀸 𑀲𑀼𑀚𑀸𑀢𑀸 𑀢𑀸 𑀲𑀫𑁆𑀫𑀸 𑀧𑀭𑀺𑀳𑀭𑁂𑀬𑁆𑀬. 𑀏𑀯𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀸𑀮𑀯𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀅𑀓𑀼𑀲𑀮𑀁 𑀧𑀚𑀳𑀣, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀆𑀬𑁄𑀕𑀁 𑀓𑀭𑁄𑀣. 𑀏𑀯𑀜𑁆𑀳𑀺 𑀢𑀼𑀫𑁆𑀳𑁂𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣.

𑁨𑁨𑁬. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀯𑁂𑀤𑁂𑀳𑀺𑀓𑀸 𑀦𑀸𑀫 𑀕𑀳𑀧𑀢𑀸𑀦𑀻 𑀅𑀳𑁄𑀲𑀺. 𑀯𑁂𑀤𑁂𑀳𑀺𑀓𑀸𑀬, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀸𑀦𑀺𑀬𑀸 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑁄𑀭𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀦𑀺𑀯𑀸𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀉𑀧𑀲𑀦𑁆𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻’𑀢𑀺. 𑀯𑁂𑀤𑁂𑀳𑀺𑀓𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀸𑀦𑀺𑀬𑀸 𑀓𑀸𑀴𑀻 𑀦𑀸𑀫 𑀤𑀸𑀲𑀻 𑀅𑀳𑁄𑀲𑀺 𑀤𑀓𑁆𑀔𑀸 𑀅𑀦𑀮𑀲𑀸 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀺𑀬𑀸 𑀤𑀸𑀲𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘𑀫𑀬𑁆𑀳𑀁 𑀔𑁄 𑀅𑀬𑁆𑀬𑀸𑀬 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘‘𑀲𑁄𑀭𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀦𑀺𑀯𑀸𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀉𑀧𑀲𑀦𑁆𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻’’𑀢𑀺. 𑀓𑀺𑀁 𑀦𑀼 𑀔𑁄 𑀫𑁂 𑀅𑀬𑁆𑀬𑀸 𑀲𑀦𑁆𑀢𑀁𑀬𑁂𑀯 𑀦𑀼 𑀔𑁄 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺 𑀉𑀤𑀸𑀳𑀼 𑀅𑀲𑀦𑁆𑀢𑀁 𑀉𑀤𑀸𑀳𑀼 𑀫𑀬𑁆𑀳𑀫𑁂𑀯𑁂𑀢𑁂 [𑀫𑀬𑁆𑀳𑁂𑀯𑁂𑀢𑁂 (𑀲𑀻. 𑀧𑀻.)] 𑀓𑀫𑁆𑀫𑀦𑁆𑀢𑀸 𑀲𑀼𑀲𑀁𑀯𑀺𑀳𑀺𑀢𑀸 𑀬𑁂𑀦 𑀫𑁂 𑀅𑀬𑁆𑀬𑀸 𑀲𑀦𑁆𑀢𑀁𑀬𑁂𑀯 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺, 𑀦𑁄 𑀅𑀲𑀦𑁆𑀢𑀁? 𑀬𑀁𑀦𑀽𑀦𑀸𑀳𑀁 𑀅𑀬𑁆𑀬𑀁 𑀯𑀻𑀫𑀁𑀲𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀻 𑀤𑀸𑀲𑀻 𑀤𑀺𑀯𑀸 𑀉𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻 𑀓𑀸𑀴𑀺𑀁 𑀤𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘𑀳𑁂 𑀚𑁂 𑀓𑀸𑀴𑀻’𑀢𑀺. ‘𑀓𑀺𑀁, 𑀅𑀬𑁆𑀬𑁂’𑀢𑀺? ‘𑀓𑀺𑀁, 𑀚𑁂, 𑀤𑀺𑀯𑀸 𑀉𑀝𑁆𑀞𑀸𑀲𑀻’𑀢𑀺? ‘𑀦 𑀔𑁆𑀯𑀬𑁆𑀬𑁂 [𑀦 𑀔𑁄 𑀅𑀬𑁆𑀬𑁂 (𑀲𑀻. 𑀧𑀻.)], 𑀓𑀺𑀜𑁆𑀘𑀻’𑀢𑀺. ‘𑀦𑁄 𑀯𑀢 𑀭𑁂 𑀓𑀺𑀜𑁆𑀘𑀺, 𑀧𑀸𑀧𑀺 𑀤𑀸𑀲𑀺 [𑀧𑀸𑀧𑀤𑀸𑀲𑀺 (𑀲𑁆𑀬𑀸. 𑀓.)], 𑀤𑀺𑀯𑀸 𑀉𑀝𑁆𑀞𑀸𑀲𑀻’𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀸𑀓𑀼𑀝𑀺𑀁 [𑀪𑀽𑀓𑀼𑀝𑀺𑀁 (𑀲𑀻. 𑀧𑀻.), 𑀪𑀓𑀼𑀝𑀻𑀁 (𑀲𑁆𑀬𑀸.)] 𑀅𑀓𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀺𑀬𑀸 𑀤𑀸𑀲𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘𑀲𑀦𑁆𑀢𑀁𑀬𑁂𑀯 𑀔𑁄 𑀫𑁂 𑀅𑀬𑁆𑀬𑀸 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺, 𑀦𑁄 𑀅𑀲𑀦𑁆𑀢𑀁; 𑀫𑀬𑁆𑀳𑀫𑁂𑀯𑁂𑀢𑁂 𑀓𑀫𑁆𑀫𑀦𑁆𑀢𑀸 𑀲𑀼𑀲𑀁𑀯𑀺𑀳𑀺𑀢𑀸, 𑀬𑁂𑀦 𑀫𑁂 𑀅𑀬𑁆𑀬𑀸 𑀲𑀦𑁆𑀢𑀁𑀬𑁂𑀯 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺, 𑀦𑁄 𑀅𑀲𑀦𑁆𑀢𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀬𑁆𑀬𑀁 𑀯𑀻𑀫𑀁𑀲𑁂𑀬𑁆𑀬’’’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀻 𑀤𑀸𑀲𑀻 𑀤𑀺𑀯𑀸𑀢𑀭𑀁𑀬𑁂𑀯 𑀉𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻 𑀓𑀸𑀴𑀺𑀁 𑀤𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘𑀳𑁂 𑀚𑁂, 𑀓𑀸𑀴𑀻’𑀢𑀺. ‘𑀓𑀺𑀁, 𑀅𑀬𑁆𑀬𑁂’𑀢𑀺? ‘𑀓𑀺𑀁, 𑀚𑁂, 𑀤𑀺𑀯𑀸𑀢𑀭𑀁 𑀉𑀝𑁆𑀞𑀸𑀲𑀻’𑀢𑀺? ‘𑀦 𑀔𑁆𑀯𑀬𑁆𑀬𑁂, 𑀓𑀺𑀜𑁆𑀘𑀻’𑀢𑀺. ‘𑀦𑁄 𑀯𑀢 𑀭𑁂 𑀓𑀺𑀜𑁆𑀘𑀺, 𑀧𑀸𑀧𑀺 𑀤𑀸𑀲𑀺, 𑀤𑀺𑀯𑀸𑀢𑀭𑀁 𑀉𑀝𑁆𑀞𑀸𑀲𑀻’𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀦𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀺𑀬𑀸 𑀤𑀸𑀲𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘𑀲𑀦𑁆𑀢𑀁𑀬𑁂𑀯 𑀔𑁄 𑀫𑁂 𑀅𑀬𑁆𑀬𑀸 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺, 𑀦𑁄 𑀅𑀲𑀦𑁆𑀢𑀁. 𑀫𑀬𑁆𑀳𑀫𑁂𑀯𑁂𑀢𑁂 𑀓𑀫𑁆𑀫𑀦𑁆𑀢𑀸 𑀲𑀼𑀲𑀁𑀯𑀺𑀳𑀺𑀢𑀸, 𑀬𑁂𑀦 𑀫𑁂 𑀅𑀬𑁆𑀬𑀸 𑀲𑀦𑁆𑀢𑀁𑀬𑁂𑀯 𑀅𑀚𑁆𑀛𑀢𑁆𑀢𑀁 𑀓𑁄𑀧𑀁 𑀦 𑀧𑀸𑀢𑀼𑀓𑀭𑁄𑀢𑀺, 𑀦𑁄 𑀅𑀲𑀦𑁆𑀢𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀬𑁆𑀬𑀁 𑀯𑀻𑀫𑀁𑀲𑁂𑀬𑁆𑀬’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀻 𑀤𑀸𑀲𑀻 𑀤𑀺𑀯𑀸𑀢𑀭𑀁𑀬𑁂𑀯 𑀉𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻 𑀓𑀸𑀴𑀺𑀁 𑀤𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘𑀳𑁂 𑀚𑁂, 𑀓𑀸𑀴𑀻’𑀢𑀺. ‘𑀓𑀺𑀁, 𑀅𑀬𑁆𑀬𑁂’𑀢𑀺? ‘𑀓𑀺𑀁, 𑀚𑁂, 𑀤𑀺𑀯𑀸 𑀉𑀝𑁆𑀞𑀸𑀲𑀻’𑀢𑀺? ‘𑀦 𑀔𑁆𑀯𑀬𑁆𑀬𑁂, 𑀓𑀺𑀜𑁆𑀘𑀻’𑀢𑀺. ‘𑀦𑁄 𑀯𑀢 𑀭𑁂 𑀓𑀺𑀜𑁆𑀘𑀺, 𑀧𑀸𑀧𑀺 𑀤𑀸𑀲𑀺, 𑀤𑀺𑀯𑀸 𑀉𑀝𑁆𑀞𑀸𑀲𑀻’𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀕𑁆𑀕𑀴𑀲𑀽𑀘𑀺𑀁 𑀕𑀳𑁂𑀢𑁆𑀯𑀸 𑀲𑀻𑀲𑁂 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑀻𑀲𑀁 𑀯𑁄𑀪𑀺𑀦𑁆𑀤𑀺 [𑀯𑀺 + 𑀅𑀯 + 𑀪𑀺𑀦𑁆𑀤𑀺 = 𑀯𑁄𑀪𑀺𑀦𑁆𑀤𑀺]. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀴𑀻 𑀤𑀸𑀲𑀻 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀮𑁄𑀳𑀺𑀢𑁂𑀦 𑀕𑀮𑀦𑁆𑀢𑁂𑀦 𑀧𑀝𑀺𑀯𑀺𑀲𑁆𑀲𑀓𑀸𑀦𑀁 𑀉𑀚𑁆𑀛𑀸𑀧𑁂𑀲𑀺 𑁋 ‘𑀧𑀲𑁆𑀲𑀣𑀬𑁆𑀬𑁂, 𑀲𑁄𑀭𑀢𑀸𑀬 𑀓𑀫𑁆𑀫𑀁; 𑀧𑀲𑁆𑀲𑀣𑀬𑁆𑀬𑁂, 𑀦𑀺𑀯𑀸𑀢𑀸𑀬 𑀓𑀫𑁆𑀫𑀁, 𑀧𑀲𑁆𑀲𑀣𑀬𑁆𑀬𑁂, 𑀉𑀧𑀲𑀦𑁆𑀢𑀸𑀬 𑀓𑀫𑁆𑀫𑀁! 𑀓𑀣𑀜𑁆𑀳𑀺 𑀦𑀸𑀫 𑀏𑀓𑀤𑀸𑀲𑀺𑀓𑀸𑀬 𑀤𑀺𑀯𑀸 𑀉𑀝𑁆𑀞𑀸𑀲𑀻𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀕𑁆𑀕𑀴𑀲𑀽𑀘𑀺𑀁 𑀕𑀳𑁂𑀢𑁆𑀯𑀸 𑀲𑀻𑀲𑁂 𑀧𑀳𑀸𑀭𑀁 𑀤𑀲𑁆𑀲𑀢𑀺, 𑀲𑀻𑀲𑀁 𑀯𑁄𑀪𑀺𑀦𑁆𑀤𑀺𑀲𑁆𑀲𑀢𑀻’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀳𑀺𑀓𑀸𑀬 𑀕𑀳𑀧𑀢𑀸𑀦𑀺𑀬𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺 𑁋 ‘𑀘𑀡𑁆𑀟𑀻 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀅𑀦𑀺𑀯𑀸𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻, 𑀅𑀦𑀼𑀧𑀲𑀦𑁆𑀢𑀸 𑀯𑁂𑀤𑁂𑀳𑀺𑀓𑀸 𑀕𑀳𑀧𑀢𑀸𑀦𑀻’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀢𑀸𑀯𑀤𑁂𑀯 𑀲𑁄𑀭𑀢𑀲𑁄𑀭𑀢𑁄 𑀳𑁄𑀢𑀺 𑀦𑀺𑀯𑀸𑀢𑀦𑀺𑀯𑀸𑀢𑁄 𑀳𑁄𑀢𑀺 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀳𑁄𑀢𑀺 𑀬𑀸𑀯 𑀦 𑀅𑀫𑀦𑀸𑀧𑀸 𑀯𑀘𑀦𑀧𑀣𑀸 𑀨𑀼𑀲𑀦𑁆𑀢𑀺. 𑀬𑀢𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀅𑀫𑀦𑀸𑀧𑀸 𑀯𑀘𑀦𑀧𑀣𑀸 𑀨𑀼𑀲𑀦𑁆𑀢𑀺, 𑀅𑀣 𑀪𑀺𑀓𑁆𑀔𑀼 ‘𑀲𑁄𑀭𑀢𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄, ‘𑀦𑀺𑀯𑀸𑀢𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄, ‘𑀉𑀧𑀲𑀦𑁆𑀢𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 ‘𑀲𑀼𑀯𑀘𑁄’𑀢𑀺 𑀯𑀤𑀸𑀫𑀺 𑀬𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀲𑀼𑀯𑀘𑁄 𑀳𑁄𑀢𑀺, 𑀲𑁄𑀯𑀘𑀲𑁆𑀲𑀢𑀁 𑀆𑀧𑀚𑁆𑀚𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀮𑀪𑀫𑀸𑀦𑁄 𑀦 𑀲𑀼𑀯𑀘𑁄 𑀳𑁄𑀢𑀺, 𑀦 𑀲𑁄𑀯𑀘𑀲𑁆𑀲𑀢𑀁 𑀆𑀧𑀚𑁆𑀚𑀢𑀺. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁𑀬𑁂𑀯 𑀲𑀓𑁆𑀓𑀭𑁄𑀦𑁆𑀢𑁄, 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄, 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑁄, 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄, 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 [𑀥𑀫𑁆𑀫𑀁 𑀬𑁂𑀯 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀲𑀼𑀯𑀘𑁄 𑀳𑁄𑀢𑀺, 𑀲𑁄𑀯𑀘𑀲𑁆𑀲𑀢𑀁 𑀆𑀧𑀚𑁆𑀚𑀢𑀺, 𑀢𑀫𑀳𑀁 ‘𑀲𑀼𑀯𑀘𑁄’𑀢𑀺 𑀯𑀤𑀸𑀫𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀥𑀫𑁆𑀫𑀁𑀬𑁂𑀯 𑀲𑀓𑁆𑀓𑀭𑁄𑀦𑁆𑀢𑀸, 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑀸, 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑀸, 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑀸, 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑀸 𑀲𑀼𑀯𑀘𑀸 𑀪𑀯𑀺𑀲𑁆𑀲𑀸𑀫, 𑀲𑁄𑀯𑀘𑀲𑁆𑀲𑀢𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁨𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀯𑀘𑀦𑀧𑀣𑀸 𑀬𑁂𑀳𑀺 𑀯𑁄 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑁋 𑀓𑀸𑀮𑁂𑀦 𑀯𑀸 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸 𑀤𑁄𑀲𑀦𑁆𑀢𑀭𑀸 𑀯𑀸. 𑀓𑀸𑀮𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀤𑁄𑀲𑀦𑁆𑀢𑀭𑀸 𑀯𑀸. 𑀢𑀢𑁆𑀭𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀘𑁂𑀯 𑀦𑁄 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫 𑀫𑁂𑀢𑁆𑀢𑀘𑀺𑀢𑁆𑀢𑀸, 𑀦 𑀤𑁄𑀲𑀦𑁆𑀢𑀭𑀸. 𑀢𑀜𑁆𑀘 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑀻. 𑀲𑁆𑀬𑀸. 𑀧𑀻.), 𑀅𑀩𑁆𑀬𑀸𑀧𑀚𑁆𑀚𑁂𑀦 (𑀓.) 𑀅𑀗𑁆𑀕𑀼𑀢𑁆𑀢𑀭𑀢𑀺𑀓𑀦𑀺𑀧𑀸𑀢𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁨𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓𑀁 [𑀓𑀼𑀤𑁆𑀤𑀸𑀮𑀧𑀺𑀝𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀆𑀤𑀸𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀅𑀧𑀣𑀯𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀢𑀢𑁆𑀭 𑀢𑀢𑁆𑀭 𑀯𑀺𑀔𑀡𑁂𑀬𑁆𑀬 [𑀔𑀡𑁂𑀬𑁆𑀬 (𑀲𑀻. 𑀲𑁆𑀬𑀸. 𑀧𑀻.)], 𑀢𑀢𑁆𑀭 𑀢𑀢𑁆𑀭 𑀯𑀺𑀓𑀺𑀭𑁂𑀬𑁆𑀬, 𑀢𑀢𑁆𑀭 𑀢𑀢𑁆𑀭 𑀑𑀝𑁆𑀞𑀼𑀪𑁂𑀬𑁆𑀬, 𑀢𑀢𑁆𑀭 𑀢𑀢𑁆𑀭 𑀑𑀫𑀼𑀢𑁆𑀢𑁂𑀬𑁆𑀬 𑁋 ‘𑀅𑀧𑀣𑀯𑀻 𑀪𑀯𑀲𑀺, 𑀅𑀧𑀣𑀯𑀻 𑀪𑀯𑀲𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀅𑀧𑀣𑀯𑀺𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀬𑀜𑁆𑀳𑀺, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀻 𑀕𑀫𑁆𑀪𑀻𑀭𑀸 𑀅𑀧𑁆𑀧𑀫𑁂𑀬𑁆𑀬𑀸. 𑀲𑀸 𑀦 𑀲𑀼𑀓𑀭𑀸 𑀅𑀧𑀣𑀯𑀻 𑀓𑀸𑀢𑀼𑀁; 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀯𑀘𑀦𑀧𑀣𑀸 𑀬𑁂𑀳𑀺 𑀯𑁄 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑁋 𑀓𑀸𑀮𑁂𑀦 𑀯𑀸 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸 𑀤𑁄𑀲𑀦𑁆𑀢𑀭𑀸 𑀯𑀸. 𑀓𑀸𑀮𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀤𑁄𑀲𑀦𑁆𑀢𑀭𑀸 𑀯𑀸. 𑀢𑀢𑁆𑀭𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀘𑁂𑀯 𑀦𑁄 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫 𑀫𑁂𑀢𑁆𑀢𑀘𑀺𑀢𑁆𑀢𑀸 𑀦 𑀤𑁄𑀲𑀦𑁆𑀢𑀭𑀸. 𑀢𑀜𑁆𑀘 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀧𑀣𑀯𑀺𑀲𑀫𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁨𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀮𑀸𑀔𑀁 𑀯𑀸 𑀳𑀮𑀺𑀤𑁆𑀤𑀺𑀁 𑀯𑀸 𑀦𑀻𑀮𑀁 𑀯𑀸 𑀫𑀜𑁆𑀚𑀺𑀝𑁆𑀞𑀁 𑀯𑀸 𑀆𑀤𑀸𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀇𑀫𑀲𑁆𑀫𑀺𑀁 𑀆𑀓𑀸𑀲𑁂 𑀭𑀽𑀧𑀁 𑀮𑀺𑀔𑀺𑀲𑁆𑀲𑀸𑀫𑀺, 𑀭𑀽𑀧𑀧𑀸𑀢𑀼𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀇𑀫𑀲𑁆𑀫𑀺𑀁 𑀆𑀓𑀸𑀲𑁂 𑀭𑀽𑀧𑀁 𑀮𑀺𑀔𑁂𑀬𑁆𑀬, 𑀭𑀽𑀧𑀧𑀸𑀢𑀼𑀪𑀸𑀯𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀬𑀜𑁆𑀳𑀺, 𑀪𑀦𑁆𑀢𑁂, 𑀆𑀓𑀸𑀲𑁄 𑀅𑀭𑀽𑀧𑀻 𑀅𑀦𑀺𑀤𑀲𑁆𑀲𑀦𑁄. 𑀢𑀢𑁆𑀣 𑀦 𑀲𑀼𑀓𑀭𑀁 𑀭𑀽𑀧𑀁 𑀮𑀺𑀔𑀺𑀢𑀼𑀁, 𑀭𑀽𑀧𑀧𑀸𑀢𑀼𑀪𑀸𑀯𑀁 𑀓𑀸𑀢𑀼𑀁; 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀯𑀘𑀦𑀧𑀣𑀸 𑀬𑁂𑀳𑀺 𑀯𑁄 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀓𑀸𑀮𑁂𑀦 𑀯𑀸 𑀅𑀓𑀸𑀮𑁂𑀦 𑀯𑀸 …𑀧𑁂… ‘𑀦 𑀘𑁂𑀯… 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀆𑀓𑀸𑀲𑀲𑀫𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁩𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀆𑀤𑀺𑀢𑁆𑀢𑀁 𑀢𑀺𑀡𑀼𑀓𑁆𑀓𑀁 𑀆𑀤𑀸𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀇𑀫𑀸𑀬 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀕𑀗𑁆𑀕𑀁 𑀦𑀤𑀺𑀁 𑀲𑀦𑁆𑀢𑀸𑀧𑁂𑀲𑁆𑀲𑀸𑀫𑀺 𑀲𑀁𑀧𑀭𑀺𑀢𑀸𑀧𑁂𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀕𑀗𑁆𑀕𑀁 𑀦𑀤𑀺𑀁 𑀲𑀦𑁆𑀢𑀸𑀧𑁂𑀬𑁆𑀬 𑀲𑀁𑀧𑀭𑀺𑀢𑀸𑀧𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀕𑀗𑁆𑀕𑀸 𑀳𑀺, 𑀪𑀦𑁆𑀢𑁂, 𑀦𑀤𑀻 𑀕𑀫𑁆𑀪𑀻𑀭𑀸 𑀅𑀧𑁆𑀧𑀫𑁂𑀬𑁆𑀬𑀸. 𑀲𑀸 𑀦 𑀲𑀼𑀓𑀭𑀸 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀲𑀦𑁆𑀢𑀸𑀧𑁂𑀢𑀼𑀁 𑀲𑀁𑀧𑀭𑀺𑀢𑀸𑀧𑁂𑀢𑀼𑀁; 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀯𑀘𑀦𑀧𑀣𑀸 𑀬𑁂𑀳𑀺 𑀯𑁄 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀓𑀸𑀮𑁂𑀦 𑀯𑀸 𑀅𑀓𑀸𑀮𑁂𑀦 𑀯𑀸…𑀧𑁂… ‘𑀦 𑀘𑁂𑀯… 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀕𑀗𑁆𑀕𑀸𑀲𑀫𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁩𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀺𑀴𑀸𑀭𑀪𑀲𑁆𑀢𑀸 𑀫𑀤𑁆𑀤𑀺𑀢𑀸 𑀲𑀼𑀫𑀤𑁆𑀤𑀺𑀢𑀸 𑀲𑀼𑀧𑀭𑀺𑀫𑀤𑁆𑀤𑀺𑀢𑀸, 𑀫𑀼𑀤𑀼𑀓𑀸 𑀢𑀽𑀮𑀺𑀦𑀻 𑀙𑀺𑀦𑁆𑀦𑀲𑀲𑁆𑀲𑀭𑀸 𑀙𑀺𑀦𑁆𑀦𑀪𑀩𑁆𑀪𑀭𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀝𑁆𑀞𑀁 𑀯𑀸 𑀓𑀣𑀮𑀁 [𑀓𑀞𑀮𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀸 𑀆𑀤𑀸𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀇𑀫𑀁 𑀩𑀺𑀴𑀸𑀭𑀪𑀲𑁆𑀢𑀁 𑀫𑀤𑁆𑀤𑀺𑀢𑀁 𑀲𑀼𑀫𑀤𑁆𑀤𑀺𑀢𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀁, 𑀫𑀼𑀤𑀼𑀓𑀁 𑀢𑀽𑀮𑀺𑀦𑀺𑀁, 𑀙𑀺𑀦𑁆𑀦𑀲𑀲𑁆𑀲𑀭𑀁 𑀙𑀺𑀦𑁆𑀦𑀪𑀩𑁆𑀪𑀭𑀁 𑀓𑀝𑁆𑀞𑁂𑀦 𑀯𑀸 𑀓𑀣𑀮𑁂𑀦 𑀯𑀸 𑀲𑀭𑀲𑀭𑀁 𑀓𑀭𑀺𑀲𑁆𑀲𑀸𑀫𑀺 𑀪𑀭𑀪𑀭𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀫𑀼𑀁 𑀩𑀺𑀴𑀸𑀭𑀪𑀲𑁆𑀢𑀁 𑀫𑀤𑁆𑀤𑀺𑀢𑀁 𑀲𑀼𑀫𑀤𑁆𑀤𑀺𑀢𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀁, 𑀫𑀼𑀤𑀼𑀓𑀁 𑀢𑀽𑀮𑀺𑀦𑀺𑀁, 𑀙𑀺𑀦𑁆𑀦𑀲𑀲𑁆𑀲𑀭𑀁 𑀙𑀺𑀦𑁆𑀦𑀪𑀩𑁆𑀪𑀭𑀁 𑀓𑀝𑁆𑀞𑁂𑀦 𑀯𑀸 𑀓𑀣𑀮𑁂𑀦 𑀯𑀸 𑀲𑀭𑀲𑀭𑀁 𑀓𑀭𑁂𑀬𑁆𑀬, 𑀪𑀭𑀪𑀭𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀫𑀼 𑀳𑀺, 𑀪𑀦𑁆𑀢𑁂, 𑀩𑀺𑀴𑀸𑀭𑀪𑀲𑁆𑀢𑀸 𑀫𑀤𑁆𑀤𑀺𑀢𑀸 𑀲𑀼𑀫𑀤𑁆𑀤𑀺𑀢𑀸 𑀲𑀼𑀧𑀭𑀺𑀫𑀤𑁆𑀤𑀺𑀢𑀸, 𑀫𑀼𑀤𑀼𑀓𑀸 𑀢𑀽𑀮𑀺𑀦𑀻, 𑀙𑀺𑀦𑁆𑀦𑀲𑀲𑁆𑀲𑀭𑀸 𑀙𑀺𑀦𑁆𑀦𑀪𑀩𑁆𑀪𑀭𑀸. 𑀲𑀸 𑀦 𑀲𑀼𑀓𑀭𑀸 𑀓𑀝𑁆𑀞𑁂𑀦 𑀯𑀸 𑀓𑀣𑀮𑁂𑀦 𑀯𑀸 𑀲𑀭𑀲𑀭𑀁 𑀓𑀸𑀢𑀼𑀁 𑀪𑀭𑀪𑀭𑀁 𑀓𑀸𑀢𑀼𑀁; 𑀬𑀸𑀯𑀤𑁂𑀯 𑀘 𑀧𑀦 𑀲𑁄 𑀧𑀼𑀭𑀺𑀲𑁄 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀯𑀘𑀦𑀧𑀣𑀸 𑀬𑁂𑀳𑀺 𑀯𑁄 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀓𑀸𑀮𑁂𑀦 𑀯𑀸 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸 𑀤𑁄𑀲𑀦𑁆𑀢𑀭𑀸 𑀯𑀸. 𑀓𑀸𑀮𑁂𑀦 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀓𑀸𑀮𑁂𑀦 𑀯𑀸; 𑀪𑀽𑀢𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀪𑀽𑀢𑁂𑀦 𑀯𑀸; 𑀲𑀡𑁆𑀳𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀨𑀭𑀼𑀲𑁂𑀦 𑀯𑀸; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀅𑀦𑀢𑁆𑀣𑀲𑀁𑀳𑀺𑀢𑁂𑀦 𑀯𑀸; 𑀫𑁂𑀢𑁆𑀢𑀘𑀺𑀢𑁆𑀢𑀸 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁 𑀤𑁄𑀲𑀦𑁆𑀢𑀭𑀸 𑀯𑀸. 𑀢𑀢𑁆𑀭𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀘𑁂𑀯 𑀦𑁄 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫 𑀫𑁂𑀢𑁆𑀢𑀘𑀺𑀢𑁆𑀢𑀸 𑀦 𑀤𑁄𑀲𑀦𑁆𑀢𑀭𑀸. 𑀢𑀜𑁆𑀘 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀩𑀺𑀴𑀸𑀭𑀪𑀲𑁆𑀢𑀸𑀲𑀫𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁩𑁨. ‘‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀓𑀓𑀘𑁂𑀦 𑀘𑁄𑀭𑀸 𑀑𑀘𑀭𑀓𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑀦𑁆𑀢𑁂𑀬𑁆𑀬𑀼𑀁, 𑀢𑀢𑁆𑀭𑀸𑀧𑀺 𑀬𑁄 𑀫𑀦𑁄 𑀧𑀤𑀽𑀲𑁂𑀬𑁆𑀬, 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄. 𑀢𑀢𑁆𑀭𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀘𑁂𑀯 𑀦𑁄 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀧𑀸𑀧𑀺𑀓𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑁆𑀲𑀸𑀫, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀘 𑀯𑀺𑀳𑀭𑀺𑀲𑁆𑀲𑀸𑀫 𑀫𑁂𑀢𑁆𑀢𑀘𑀺𑀢𑁆𑀢𑀸 𑀦 𑀤𑁄𑀲𑀦𑁆𑀢𑀭𑀸. 𑀢𑀜𑁆𑀘 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫 𑀢𑀤𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁨𑁩𑁩. ‘‘𑀇𑀫𑀜𑁆𑀘 [𑀇𑀫𑀜𑁆𑀘𑁂 (?)] 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀓𑀓𑀘𑀽𑀧𑀫𑀁 𑀑𑀯𑀸𑀤𑀁 𑀅𑀪𑀺𑀓𑁆𑀔𑀡𑀁 𑀫𑀦𑀲𑀺 𑀓𑀭𑁂𑀬𑁆𑀬𑀸𑀣. 𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀯𑀘𑀦𑀧𑀣𑀁, 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸, 𑀬𑀁 𑀢𑀼𑀫𑁆𑀳𑁂 𑀦𑀸𑀥𑀺𑀯𑀸𑀲𑁂𑀬𑁆𑀬𑀸𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀇𑀫𑀁 𑀓𑀓𑀘𑀽𑀧𑀫𑀁 𑀑𑀯𑀸𑀤𑀁 𑀅𑀪𑀺𑀓𑁆𑀔𑀡𑀁 𑀫𑀦𑀲𑀺𑀓𑀭𑁄𑀣. 𑀢𑀁 𑀯𑁄 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀓𑀓𑀘𑀽𑀧𑀫𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀁

𑁨𑁩𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀭𑀺𑀝𑁆𑀞𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 [𑀕𑀦𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 (𑀓.)] 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑁋 ‘‘𑀅𑀭𑀺𑀝𑁆𑀞𑀲𑁆𑀲 𑀓𑀺𑀭 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺. ‘‘𑀏𑀯𑀁𑀩𑁆𑀬𑀸𑀔𑁄 [𑀏𑀯𑀁 𑀔𑁄 (?) 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀬𑁂𑀯𑀲𑁆𑀲 ‘‘𑀏𑀯𑀁𑀩𑁆𑀬𑀸𑀔𑁄’’𑀢𑀺] 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺.

𑀅𑀣 𑀔𑁄 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺 𑀲𑀫𑀦𑀼𑀕𑀸𑀳𑀦𑁆𑀢𑀺 [𑀲𑀫𑀦𑀼𑀕𑁆𑀕𑀸𑀳𑀦𑁆𑀢𑀺 (𑀲𑁆𑀬𑀸.)] 𑀲𑀫𑀦𑀼𑀪𑀸𑀲𑀦𑁆𑀢𑀺 𑁋 ‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀅𑀯𑀘, 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺; 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁 [𑀅𑀩𑁆𑀪𑀸𑀘𑀺𑀓𑁆𑀔𑀦𑀁 (𑀓.)], 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀯𑀼𑀲𑁄 𑀅𑀭𑀺𑀝𑁆𑀞, 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸,𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺. 𑀏𑀯𑀫𑁆𑀧𑀺 𑀔𑁄 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 [𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 (𑀲𑁆𑀬𑀸. 𑀯𑀺𑀦𑀬𑁂𑀧𑀺)] 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀢𑀤𑁂𑀯 [𑀢𑀣𑁂𑀯 𑀢𑀁 (𑀯𑀺𑀦𑀬𑁂)] 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘‘𑀏𑀯𑀁𑀩𑁆𑀬𑀸𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺.

𑁨𑁩𑁫. 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀭𑀺𑀝𑁆𑀞𑀲𑁆𑀲 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺. 𑀅𑀲𑁆𑀲𑀼𑀫𑁆𑀳 𑀔𑁄 𑀫𑀬𑀁, 𑀪𑀦𑁆𑀢𑁂 𑁋 ‘𑀅𑀭𑀺𑀝𑁆𑀞𑀲𑁆𑀲 𑀓𑀺𑀭 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀤𑀯𑁄𑀘𑀼𑀫𑁆𑀳 𑁋 ‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺?

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀅𑀫𑁆𑀳𑁂 𑀏𑀢𑀤𑀯𑁄𑀘 𑁋 ‘𑀏𑀯𑀁𑀩𑁆𑀬𑀸𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 𑀲𑀫𑀦𑀼𑀬𑀼𑀜𑁆𑀚𑀺𑀫𑁆𑀳 𑀲𑀫𑀦𑀼𑀕𑀸𑀳𑀺𑀫𑁆𑀳 𑀲𑀫𑀦𑀼𑀪𑀸𑀲𑀺𑀫𑁆𑀳 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀅𑀯𑀘, 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺; 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀯𑀼𑀲𑁄 𑀅𑀭𑀺𑀝𑁆𑀞, 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀅𑀫𑁆𑀳𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀢𑀤𑁂𑀯 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘𑀏𑀯𑀁𑀩𑁆𑀬𑀸𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺. 𑀬𑀢𑁄 𑀔𑁄 𑀫𑀬𑀁, 𑀪𑀦𑁆𑀢𑁂, 𑀦𑀸𑀲𑀓𑁆𑀔𑀺𑀫𑁆𑀳 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀫𑀬𑀁 𑀏𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀫𑀸’’𑀢𑀺.

𑁨𑁩𑁬. 𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀬𑁂𑀦 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀅𑀭𑀺𑀝𑁆𑀞, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺?

‘‘𑀏𑀯𑀁𑀩𑁆𑀬𑀸𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺. ‘‘𑀓𑀲𑁆𑀲 𑀔𑁄 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀬𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀲𑀺? 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸? 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀣 𑀘 𑀧𑀦 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀲𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀲𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀲𑀺. 𑀢𑀜𑁆𑀳𑀺 𑀢𑁂, 𑀫𑁄𑀖𑀧𑀼𑀭𑀺𑀲, 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀸𑀬𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀉𑀲𑁆𑀫𑀻𑀓𑀢𑁄𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂’’𑀢𑀺? ‘‘𑀓𑀺𑀜𑁆𑀳𑀺 [𑀓𑀺𑀁𑀢𑀺 (𑀓.)] 𑀲𑀺𑀬𑀸, 𑀪𑀦𑁆𑀢𑁂; 𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀢𑁂𑀦 𑀲𑀓𑁂𑀦 𑀧𑀸𑀧𑀓𑁂𑀦 𑀤𑀺𑀝𑁆𑀞𑀺𑀕𑀢𑁂𑀦. 𑀇𑀥𑀸𑀳𑀁 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺.

𑁨𑁩𑁭. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀼𑀫𑁆𑀳𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣 𑀬𑀣𑀸𑀬𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀳𑀺 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸; 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀲𑀸𑀥𑀼, 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀣. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸…𑀧𑁂… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀣 𑀘 𑀧𑀦𑀸𑀬𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭𑁂𑀯 𑀓𑀸𑀫𑁂𑀳𑀺 𑀅𑀜𑁆𑀜𑀢𑁆𑀭 𑀓𑀸𑀫𑀲𑀜𑁆𑀜𑀸𑀬 𑀅𑀜𑁆𑀜𑀢𑁆𑀭 𑀓𑀸𑀫𑀯𑀺𑀢𑀓𑁆𑀓𑁂𑀳𑀺 𑀓𑀸𑀫𑁂 𑀧𑀝𑀺𑀲𑁂𑀯𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺’’.

𑁨𑁩𑁮. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀢𑀁 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄. 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁. 𑀢𑀫𑁂𑀦𑀁 𑀪𑁄𑀕𑁂 𑀯𑀸 𑀦𑀗𑁆𑀕𑀼𑀝𑁆𑀞𑁂 𑀯𑀸 𑀕𑀡𑁆𑀳𑁂𑀬𑁆𑀬. 𑀢𑀲𑁆𑀲 𑀲𑁄 𑀅𑀮𑀕𑀤𑁆𑀤𑁄 𑀧𑀝𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 [𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂 𑀟𑀁𑀲𑁂𑀬𑁆𑀬 [𑀟𑀲𑁂𑀬𑁆𑀬 (𑀲𑀻. 𑀧𑀻.)]. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀢𑀁 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸𑀦𑀁.

𑁨𑁩𑁯. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀁 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀦 𑀘𑁂𑀯 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀦 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘 [𑀦 𑀘 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 (?)]. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸𑀦𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄. 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁. 𑀢𑀫𑁂𑀦𑀁 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑀺𑀢𑁆𑀯𑀸, 𑀕𑀻𑀯𑀸𑀬 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀁 𑀯𑀸 𑀩𑀸𑀳𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀪𑁄𑀕𑁂𑀳𑀺 𑀧𑀮𑀺𑀯𑁂𑀞𑁂𑀬𑁆𑀬, 𑀅𑀣 𑀔𑁄 𑀲𑁄 𑀦𑁂𑀯 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀁 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀦 𑀘𑁂𑀯 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀦 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀫𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀣, 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣. 𑀬𑀲𑁆𑀲 𑀘 𑀧𑀦 𑀫𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀆𑀚𑀸𑀦𑁂𑀬𑁆𑀬𑀸𑀣, 𑀅𑀳𑀁 𑀯𑁄 𑀢𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄, 𑀬𑁂 𑀯𑀸 𑀧𑀦𑀸𑀲𑁆𑀲𑀼 𑀯𑀺𑀬𑀢𑁆𑀢𑀸 𑀪𑀺𑀓𑁆𑀔𑀽.

𑁨𑁪𑁦. ‘‘𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄. 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀉𑀤𑀓𑀡𑁆𑀡𑀯𑀁, 𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁; 𑀦 𑀘𑀲𑁆𑀲 𑀦𑀸𑀯𑀸 𑀲𑀦𑁆𑀢𑀸𑀭𑀡𑀻 𑀉𑀢𑁆𑀢𑀭𑀲𑁂𑀢𑀼 𑀯𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀫𑀳𑀸𑀉𑀤𑀓𑀡𑁆𑀡𑀯𑁄, 𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁; 𑀦𑀢𑁆𑀣𑀺 𑀘 𑀦𑀸𑀯𑀸 𑀲𑀦𑁆𑀢𑀸𑀭𑀡𑀻 𑀉𑀢𑁆𑀢𑀭𑀲𑁂𑀢𑀼 𑀯𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬. 𑀬𑀁𑀦𑀽𑀦𑀸𑀳𑀁 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀲𑀁𑀓𑀟𑁆𑀠𑀺𑀢𑁆𑀯𑀸, 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸, 𑀢𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀉𑀢𑁆𑀢𑀭𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀲𑀁𑀓𑀟𑁆𑀠𑀺𑀢𑁆𑀯𑀸, 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀉𑀢𑁆𑀢𑀭𑁂𑀬𑁆𑀬. 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 [𑀢𑀺𑀡𑁆𑀡𑀲𑁆𑀲 (𑀧𑀻. 𑀓.)] 𑀧𑀸𑀭𑀗𑁆𑀕𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀩𑀳𑀼𑀓𑀸𑀭𑁄 𑀔𑁄 𑀫𑁂 𑀅𑀬𑀁 𑀓𑀼𑀮𑁆𑀮𑁄; 𑀇𑀫𑀸𑀳𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀉𑀢𑁆𑀢𑀺𑀡𑁆𑀡𑁄. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀓𑀼𑀮𑁆𑀮𑀁 𑀲𑀻𑀲𑁂 𑀯𑀸 𑀆𑀭𑁄𑀧𑁂𑀢𑁆𑀯𑀸 𑀔𑀦𑁆𑀥𑁂 𑀯𑀸 𑀉𑀘𑁆𑀘𑀸𑀭𑁂𑀢𑁆𑀯𑀸 [𑀉𑀘𑁆𑀘𑁄𑀧𑁂𑀢𑁆𑀯𑀸 (𑀓.)] 𑀬𑁂𑀦 𑀓𑀸𑀫𑀁 𑀧𑀓𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀏𑀯𑀁𑀓𑀸𑀭𑀻 𑀢𑀲𑁆𑀫𑀺𑀁 𑀓𑀼𑀮𑁆𑀮𑁂 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀓𑀣𑀁𑀓𑀸𑀭𑀻 𑀘 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀓𑀼𑀮𑁆𑀮𑁂 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲? 𑀇𑀥, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 𑀧𑀸𑀭𑀗𑁆𑀕𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀩𑀳𑀼𑀓𑀸𑀭𑁄 𑀔𑁄 𑀫𑁂 𑀅𑀬𑀁 𑀓𑀼𑀮𑁆𑀮𑁄; 𑀇𑀫𑀸𑀳𑀁 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀫𑀸𑀦𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀉𑀢𑁆𑀢𑀺𑀡𑁆𑀡𑁄. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀓𑀼𑀮𑁆𑀮𑀁 𑀣𑀮𑁂 𑀯𑀸 𑀉𑀲𑁆𑀲𑀸𑀤𑁂𑀢𑁆𑀯𑀸 [𑀉𑀲𑁆𑀲𑀸𑀭𑁂𑀢𑁆𑀯𑀸 (𑀓.)] 𑀉𑀤𑀓𑁂 𑀯𑀸 𑀑𑀧𑀺𑀮𑀸𑀧𑁂𑀢𑁆𑀯𑀸 𑀬𑁂𑀦 𑀓𑀸𑀫𑀁 𑀧𑀓𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀏𑀯𑀁𑀓𑀸𑀭𑀻 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀓𑀼𑀮𑁆𑀮𑁂 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑁆𑀮𑀽𑀧𑀫𑁄 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬. 𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑀺𑀢𑀁, 𑀆𑀚𑀸𑀦𑀦𑁆𑀢𑁂𑀳𑀺 𑀥𑀫𑁆𑀫𑀸𑀧𑀺 𑀯𑁄 𑀧𑀳𑀸𑀢𑀩𑁆𑀩𑀸 𑀧𑀕𑁂𑀯 𑀅𑀥𑀫𑁆𑀫𑀸.

𑁨𑁪𑁧. ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀭𑀽𑀧𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀯𑁂𑀤𑀦𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀲𑀜𑁆𑀜𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀲𑀗𑁆𑀔𑀸𑀭𑁂 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁, 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸 𑀢𑀫𑁆𑀧𑀺 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑁋 𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺 𑁋 𑀢𑀫𑁆𑀧𑀺 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄, 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀯𑁂𑀤𑀦𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀲𑀜𑁆𑀜𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀲𑀗𑁆𑀔𑀸𑀭𑁂 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁, 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺; 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑁋 𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺 𑁋 𑀢𑀫𑁆𑀧𑀺 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀲𑀢𑀺 𑀦 𑀧𑀭𑀺𑀢𑀲𑁆𑀲𑀢𑀻’’𑀢𑀺.

𑁨𑁪𑁨. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀺𑀤𑁆𑀥𑀸 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸’’𑀢𑀺? ‘‘𑀲𑀺𑀬𑀸, 𑀪𑀺𑀓𑁆𑀔𑀽’’𑀢𑀺 𑁋 𑀪𑀕𑀯𑀸 𑀅𑀯𑁄𑀘. ‘‘𑀇𑀥 𑀪𑀺𑀓𑁆𑀔𑀼 𑀏𑀓𑀘𑁆𑀘𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀫𑁂 𑀦𑀢𑁆𑀣𑀺; 𑀲𑀺𑀬𑀸 𑀯𑀢 𑀫𑁂, 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀩𑀳𑀺𑀤𑁆𑀥𑀸 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀩𑀳𑀺𑀤𑁆𑀥𑀸 𑀅𑀲𑀢𑀺 𑀅𑀧𑀭𑀺𑀢𑀲𑁆𑀲𑀦𑀸’’𑀢𑀺? ‘‘𑀲𑀺𑀬𑀸, 𑀪𑀺𑀓𑁆𑀔𑀽’’𑀢𑀺 𑁋 𑀪𑀕𑀯𑀸 𑀅𑀯𑁄𑀘. ‘‘𑀇𑀥 𑀪𑀺𑀓𑁆𑀔𑀼 𑀏𑀓𑀘𑁆𑀘𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀫𑁂 𑀦𑀢𑁆𑀣𑀺; 𑀲𑀺𑀬𑀸 𑀯𑀢 𑀫𑁂, 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀩𑀳𑀺𑀤𑁆𑀥𑀸 𑀅𑀲𑀢𑀺 𑀅𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻’’𑀢𑀺.

‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀅𑀚𑁆𑀛𑀢𑁆𑀢𑀁 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸’’𑀢𑀺? ‘‘𑀲𑀺𑀬𑀸, 𑀪𑀺𑀓𑁆𑀔𑀽’’𑀢𑀺 𑁋 𑀪𑀕𑀯𑀸 𑀅𑀯𑁄𑀘. ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑀼𑀡𑀸𑀢𑀺 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸 𑀲𑀩𑁆𑀩𑁂𑀲𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀦𑀁 𑀲𑀫𑀼𑀕𑁆𑀖𑀸𑀢𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀬 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀢𑀡𑁆𑀳𑀸𑀓𑁆𑀔𑀬𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀦𑀲𑁆𑀲𑀼 𑀦𑀸𑀫 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀅𑀚𑁆𑀛𑀢𑁆𑀢𑀁 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻’’𑀢𑀺.

‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀅𑀚𑁆𑀛𑀢𑁆𑀢𑀁 𑀅𑀲𑀢𑀺 𑀅𑀧𑀭𑀺𑀢𑀲𑁆𑀲𑀦𑀸’’𑀢𑀺? ‘‘𑀲𑀺𑀬𑀸, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. ‘‘𑀇𑀥, 𑀪𑀺𑀓𑁆𑀔𑀼, 𑀏𑀓𑀘𑁆𑀘𑀲𑁆𑀲 𑀦 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑀼𑀡𑀸𑀢𑀺 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸 𑀲𑀩𑁆𑀩𑁂𑀲𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀦𑀁 𑀲𑀫𑀼𑀕𑁆𑀖𑀸𑀢𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀬 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀢𑀡𑁆𑀳𑀸𑀓𑁆𑀔𑀬𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲. 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀦𑀲𑁆𑀲𑀼 𑀦𑀸𑀫 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀅𑀚𑁆𑀛𑀢𑁆𑀢𑀁 𑀅𑀲𑀢𑀺 𑀅𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺’’.

𑁨𑁪𑁩. ‘‘𑀢𑀁 [𑀢𑀜𑁆𑀘 (𑀓.)], 𑀪𑀺𑀓𑁆𑀔𑀯𑁂, 𑀧𑀭𑀺𑀕𑁆𑀕𑀳𑀁 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀣, 𑀬𑁆𑀯𑀸𑀲𑁆𑀲 [𑀬𑁆𑀯𑀸𑀲𑁆𑀲𑀼 (𑀓.)] 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀢𑀺𑀝𑁆𑀞𑁂𑀬𑁆𑀬. 𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀧𑀭𑀺𑀕𑁆𑀕𑀳𑀁 𑀬𑁆𑀯𑀸𑀲𑁆𑀲 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂. 𑀅𑀳𑀫𑁆𑀧𑀺 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀕𑁆𑀕𑀳𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁆𑀯𑀸𑀲𑁆𑀲 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀢𑀺𑀝𑁆𑀞𑁂𑀬𑁆𑀬.

‘‘𑀢𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑁂𑀣, 𑀬𑀁𑀲 [𑀬𑀲𑁆𑀲 (𑀲𑁆𑀬𑀸. 𑀓.)] 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀬𑀁𑀲 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂. 𑀅𑀳𑀫𑁆𑀧𑀺 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁𑀲 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸.

‘‘𑀢𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀬𑁂𑀣 𑀬𑀁𑀲 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀬𑀁𑀲 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂. 𑀅𑀳𑀫𑁆𑀧𑀺 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁𑀲 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀬𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’.

𑁨𑁪𑁪. ‘‘𑀅𑀢𑁆𑀢𑀦𑀺 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀫𑁂 𑀢𑀺 𑀅𑀲𑁆𑀲𑀸’’𑀢𑀺?

‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀢𑁆𑀢𑀦𑀺𑀬𑁂 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀢𑁆𑀢𑀸 𑀫𑁂 𑀢𑀺 𑀅𑀲𑁆𑀲𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀢𑁆𑀢𑀦𑀺 𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀺𑀬𑁂 𑀘 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑁂, 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑁋 ‘𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸, 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’𑀢𑀺 𑁋 𑀦𑀦𑀸𑀬𑀁 [𑀦 𑀘 𑀔𑁄𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀓𑁂𑀯𑀮𑁄 𑀧𑀭𑀺𑀧𑀽𑀭𑁄 𑀩𑀸𑀮𑀥𑀫𑁆𑀫𑁄’’’𑀢𑀺?

‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂, 𑀓𑁂𑀯𑀮𑁄 𑀳𑀺, 𑀪𑀦𑁆𑀢𑁂, 𑀧𑀭𑀺𑀧𑀽𑀭𑁄 [𑀓𑁂𑀯𑀮𑁄 𑀧𑀭𑀺𑀧𑀽𑀭𑁄 (𑀲𑀻. 𑀧𑀻.)] 𑀩𑀸𑀮𑀥𑀫𑁆𑀫𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸, 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸, 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸, 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸, 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁’’.

𑁨𑁪𑁫. ‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀚𑁆𑀚𑀢𑀺 [𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀇𑀢𑀺𑀧𑀺, 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀇𑀢𑀺𑀧𑀺, 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀇𑀢𑀺𑀧𑀺, 𑀦𑀺𑀭𑀕𑁆𑀕𑀴𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀇𑀢𑀺𑀧𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀺, 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑁄𑀦𑁄𑀩𑁆𑀪𑀯𑀺𑀓𑁄 𑀚𑀸𑀢𑀺𑀲𑀁𑀲𑀸𑀭𑁄 𑀧𑀳𑀻𑀦𑁄 𑀳𑁄𑀢𑀺, 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸 𑀳𑁄𑀢𑀺, 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀁𑀓𑀢𑀸𑀦𑀺, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺, 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺.

𑁨𑁪𑁬. ‘‘𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀅𑀦𑁆𑀯𑁂𑀲𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺 𑁋 ‘𑀇𑀤𑀁 𑀦𑀺𑀲𑁆𑀲𑀺𑀢𑀁 𑀢𑀣𑀸𑀕𑀢𑀲𑁆𑀲 𑀯𑀺𑀜𑁆𑀜𑀸𑀡’𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀢𑀣𑀸𑀕𑀢𑀁 𑀅𑀦𑀦𑀼𑀯𑀺𑀚𑁆𑀚𑁄𑀢𑀺 𑀯𑀤𑀸𑀫𑀺. 𑀏𑀯𑀁𑀯𑀸𑀤𑀺𑀁 𑀔𑁄 𑀫𑀁, 𑀪𑀺𑀓𑁆𑀔𑀯𑁂, 𑀏𑀯𑀫𑀓𑁆𑀔𑀸𑀬𑀺𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀸𑀧𑁂𑀢𑀻’𑀢𑀺. 𑀬𑀣𑀸 𑀘𑀸𑀳𑀁 𑀦, 𑀪𑀺𑀓𑁆𑀔𑀯𑁂 [𑀪𑀺𑀓𑁆𑀔𑀯𑁂 𑀦 (𑀲𑀻. 𑀲𑁆𑀬𑀸. 𑀧𑀻.)], 𑀬𑀣𑀸 𑀘𑀸𑀳𑀁 𑀦 𑀯𑀤𑀸𑀫𑀺, 𑀢𑀣𑀸 𑀫𑀁 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀸𑀧𑁂𑀢𑀻’𑀢𑀺. 𑀧𑀼𑀩𑁆𑀩𑁂 𑀘𑀸𑀳𑀁 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀘 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀸𑀧𑁂𑀫𑀺, 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥𑀁. 𑀢𑀢𑁆𑀭 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑁂 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺, 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀦 𑀳𑁄𑀢𑀺 𑀆𑀖𑀸𑀢𑁄 𑀦 𑀅𑀧𑁆𑀧𑀘𑁆𑀘𑀬𑁄 𑀦 𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺.

‘‘𑀢𑀢𑁆𑀭 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑁂 𑀢𑀣𑀸𑀕𑀢𑀁 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀦 𑀳𑁄𑀢𑀺 𑀆𑀦𑀦𑁆𑀤𑁄 𑀦 𑀲𑁄𑀫𑀦𑀲𑁆𑀲𑀁 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀢𑀢𑁆𑀭 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀸 𑀢𑀣𑀸𑀕𑀢𑀁 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁 𑀔𑁄 𑀇𑀤𑀁 𑀧𑀼𑀩𑁆𑀩𑁂 𑀧𑀭𑀺𑀜𑁆𑀜𑀸𑀢𑀁 𑀢𑀢𑁆𑀣 𑀫𑁂 𑀏𑀯𑀭𑀽𑀧𑀸 𑀓𑀸𑀭𑀸 [𑀲𑀓𑁆𑀓𑀸𑀭𑀸 (𑀓.)] 𑀓𑀭𑀻𑀬𑀦𑁆𑀢𑀻’𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀘𑁂𑀧𑀺 𑀧𑀭𑁂 𑀅𑀓𑁆𑀓𑁄𑀲𑁂𑀬𑁆𑀬𑀼𑀁 𑀧𑀭𑀺𑀪𑀸𑀲𑁂𑀬𑁆𑀬𑀼𑀁 𑀭𑁄𑀲𑁂𑀬𑁆𑀬𑀼𑀁 𑀯𑀺𑀳𑁂𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂 𑀳𑀺 𑀦 𑀆𑀖𑀸𑀢𑁄 𑀦 𑀅𑀧𑁆𑀧𑀘𑁆𑀘𑀬𑁄 𑀦 𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺 𑀓𑀭𑀡𑀻𑀬𑀸. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀘𑁂𑀧𑀺 𑀧𑀭𑁂 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄 𑀦 𑀲𑁄𑀫𑀦𑀲𑁆𑀲𑀁 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀘𑁂𑀧𑀺 𑀧𑀭𑁂 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀬𑀁 𑀔𑁄 𑀇𑀤𑀁 𑀧𑀼𑀩𑁆𑀩𑁂 𑀧𑀭𑀺𑀜𑁆𑀜𑀸𑀢𑀁, 𑀢𑀢𑁆𑀣 𑀫𑁂 [𑀢𑀢𑁆𑀣 𑀦𑁄 (𑀓.) 𑀢𑀢𑁆𑀣 + 𑀇𑀫𑁂𑀢𑀺 𑀧𑀤𑀘𑁆𑀙𑁂𑀤𑁄] 𑀏𑀯𑀭𑀽𑀧𑀸 𑀓𑀸𑀭𑀸 𑀓𑀭𑀻𑀬𑀦𑁆𑀢𑀻’𑀢𑀺.

𑁨𑁪𑁭. ‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀁 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀲𑀸 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀲𑀸 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀗𑁆𑀔𑀸𑀭𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑁂 𑀧𑀚𑀳𑀣; 𑀢𑁂 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀬𑀁 𑀇𑀫𑀲𑁆𑀫𑀺𑀁 𑀚𑁂𑀢𑀯𑀦𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁, 𑀢𑀁 𑀚𑀦𑁄 𑀳𑀭𑁂𑀬𑁆𑀬 𑀯𑀸 𑀤𑀳𑁂𑀬𑁆𑀬 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬. 𑀅𑀧𑀺 𑀦𑀼 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀫𑁆𑀳𑁂 𑀚𑀦𑁄 𑀳𑀭𑀢𑀺 𑀯𑀸 𑀤𑀳𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀢𑀻’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀦 𑀳𑀺 𑀦𑁄 𑀏𑀢𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂…𑀧𑁂… 𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂… 𑀲𑀗𑁆𑀔𑀸𑀭𑀸, 𑀪𑀺𑀓𑁆𑀔𑀯𑁂…𑀧𑁂… 𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺.

𑁨𑁪𑁮. ‘‘𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸, 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀲𑀩𑁆𑀩𑁂 𑀢𑁂 𑀑𑀧𑀧𑀸𑀢𑀺𑀓𑀸, 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀭𑀸𑀕𑀤𑁄𑀲𑀫𑁄𑀳𑀸 𑀢𑀦𑀼𑀪𑀽𑀢𑀸, 𑀲𑀩𑁆𑀩𑁂 𑀢𑁂 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸, 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸, 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑀸. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀲𑀩𑁆𑀩𑁂 𑀢𑁂 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑀸. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁄 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀫𑀬𑀸 𑀥𑀫𑁆𑀫𑁂 𑀉𑀢𑁆𑀢𑀸𑀦𑁂 𑀯𑀺𑀯𑀝𑁂 𑀧𑀓𑀸𑀲𑀺𑀢𑁂 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁂 𑀬𑁂𑀲𑀁 𑀫𑀬𑀺 𑀲𑀤𑁆𑀥𑀸𑀫𑀢𑁆𑀢𑀁 𑀧𑁂𑀫𑀫𑀢𑁆𑀢𑀁 𑀲𑀩𑁆𑀩𑁂 𑀢𑁂 𑀲𑀕𑁆𑀕𑀧𑀭𑀸𑀬𑀦𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀯𑀫𑁆𑀫𑀺𑀓𑀲𑀼𑀢𑁆𑀢𑀁

𑁨𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀅𑀦𑁆𑀥𑀯𑀦𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀅𑀦𑁆𑀥𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋

‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼, 𑀅𑀬𑀁 𑀯𑀫𑁆𑀫𑀺𑀓𑁄 [𑀯𑀫𑁆𑀫𑀻𑀓𑁄 (𑀓𑀢𑁆𑀣𑀘𑀺) 𑀲𑀓𑁆𑀓𑀢𑀸𑀦𑀼𑀭𑀽𑀧𑀁] 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀮𑀗𑁆𑀕𑀺𑀁 ‘𑀮𑀗𑁆𑀕𑀻, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀮𑀗𑁆𑀕𑀺𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀉𑀤𑁆𑀥𑀼𑀫𑀸𑀬𑀺𑀓𑀁. ‘𑀉𑀤𑁆𑀥𑀼𑀫𑀸𑀬𑀺𑀓𑀸, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀉𑀤𑁆𑀥𑀼𑀫𑀸𑀬𑀺𑀓𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀤𑁆𑀯𑀺𑀥𑀸𑀧𑀣𑀁. ‘𑀤𑁆𑀯𑀺𑀥𑀸𑀧𑀣𑁄, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀤𑁆𑀯𑀺𑀥𑀸𑀧𑀣𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀘𑀗𑁆𑀕𑀯𑀸𑀭𑀁 [𑀧𑀗𑁆𑀓𑀯𑀸𑀭𑀁 (𑀲𑁆𑀬𑀸.), 𑀘𑀗𑁆𑀓𑀯𑀸𑀭𑀁 (𑀓.)]. ‘𑀘𑀗𑁆𑀕𑀯𑀸𑀭𑁄, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀘𑀗𑁆𑀕𑀯𑀸𑀭𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀓𑀼𑀫𑁆𑀫𑀁. ‘𑀓𑀼𑀫𑁆𑀫𑁄, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀓𑀼𑀫𑁆𑀫𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀅𑀲𑀺𑀲𑀽𑀦𑀁. ‘𑀅𑀲𑀺𑀲𑀽𑀦𑀸, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀅𑀲𑀺𑀲𑀽𑀦𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀫𑀁𑀲𑀧𑁂𑀲𑀺𑀁. ‘𑀫𑀁𑀲𑀧𑁂𑀲𑀺, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀉𑀓𑁆𑀔𑀺𑀧 𑀫𑀁𑀲𑀧𑁂𑀲𑀺𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬 𑀅𑀤𑁆𑀤𑀲 𑀦𑀸𑀕𑀁. ‘𑀦𑀸𑀕𑁄, 𑀪𑀤𑀦𑁆𑀢𑁂’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀢𑀺𑀝𑁆𑀞𑀢𑀼 𑀦𑀸𑀕𑁄, 𑀫𑀸 𑀦𑀸𑀕𑀁 𑀖𑀝𑁆𑀝𑁂𑀲𑀺; 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸’’’𑀢𑀺.

‘‘𑀇𑀫𑁂 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀜𑁆𑀳𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀬𑀣𑀸 𑀘 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀲𑀺. 𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀼, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁄 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀯𑀸, 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸, 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸’’𑀢𑀺 𑁋 𑀇𑀤𑀫𑀯𑁄𑀘 𑀲𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑁨𑁫𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀅𑀦𑁆𑀥𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺’. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸’𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑁄 𑀲𑀼𑀫𑁂𑀥𑁄 𑀲𑀢𑁆𑀣𑀁 𑀆𑀤𑀸𑀬…𑀧𑁂… 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺. 𑀇𑀤𑀫𑀯𑁄𑀘, 𑀪𑀦𑁆𑀢𑁂, 𑀲𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀫𑁆𑀫𑀺𑀓𑁄, 𑀓𑀸 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸, 𑀓𑀸 𑀤𑀺𑀯𑀸 𑀧𑀚𑁆𑀚𑀮𑀦𑀸, 𑀓𑁄 𑀩𑁆𑀭𑀸𑀳𑁆𑀫𑀡𑁄, 𑀓𑁄 𑀲𑀼𑀫𑁂𑀥𑁄, 𑀓𑀺𑀁 𑀲𑀢𑁆𑀣𑀁, 𑀓𑀺𑀁 𑀅𑀪𑀺𑀓𑁆𑀔𑀡𑀁, 𑀓𑀸 𑀮𑀗𑁆𑀕𑀻, 𑀓𑀸 𑀉𑀤𑁆𑀥𑀼𑀫𑀸𑀬𑀺𑀓𑀸, 𑀓𑁄 𑀤𑁆𑀯𑀺𑀥𑀸𑀧𑀣𑁄, 𑀓𑀺𑀁 𑀘𑀗𑁆𑀕𑀯𑀸𑀭𑀁, 𑀓𑁄 𑀓𑀼𑀫𑁆𑀫𑁄, 𑀓𑀸 𑀅𑀲𑀺𑀲𑀽𑀦𑀸, 𑀓𑀸 𑀫𑀁𑀲𑀧𑁂𑀲𑀺, 𑀓𑁄 𑀦𑀸𑀕𑁄’’’𑀢𑀺?

𑁨𑁫𑁧. ‘‘‘𑀯𑀫𑁆𑀫𑀺𑀓𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀁, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦-𑀧𑀭𑀺𑀫𑀤𑁆𑀤𑀦𑀪𑁂𑀤𑀦-𑀯𑀺𑀤𑁆𑀥𑀁𑀲𑀦-𑀥𑀫𑁆𑀫𑀲𑁆𑀲.

‘‘𑀬𑀁 𑀔𑁄, 𑀪𑀺𑀓𑁆𑀔𑀼, 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 [𑀓𑀫𑁆𑀫𑀦𑁆𑀢𑀁 (𑀓.)] 𑀆𑀭𑀩𑁆𑀪 𑀭𑀢𑁆𑀢𑀺𑀁 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑁋 𑀅𑀬𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸. 𑀬𑀁 𑀔𑁄, 𑀪𑀺𑀓𑁆𑀔𑀼, 𑀭𑀢𑁆𑀢𑀺𑀁 𑀅𑀦𑀼𑀯𑀺𑀢𑀓𑁆𑀓𑁂𑀢𑁆𑀯𑀸 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 ‘𑀫𑀦𑀲𑀸’ [( ) 𑀦𑀢𑁆𑀣𑀺 (𑀲𑀻. 𑀲𑁆𑀬𑀸.)] 𑁋 𑀅𑀬𑀁 𑀤𑀺𑀯𑀸 𑀧𑀚𑁆𑀚𑀮𑀦𑀸.

‘‘‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. ‘𑀲𑀼𑀫𑁂𑀥𑁄’𑀢𑀺 𑀔𑁄 𑀪𑀺𑀓𑁆𑀔𑀼 𑀲𑁂𑀓𑁆𑀔𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀅𑀥𑀺𑀯𑀘𑀦𑀁.

‘‘‘𑀲𑀢𑁆𑀣’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀸𑀬𑁂𑀢𑀁 𑀧𑀜𑁆𑀜𑀸𑀬 𑀅𑀥𑀺𑀯𑀘𑀦𑀁. ‘𑀅𑀪𑀺𑀓𑁆𑀔𑀡’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘‘𑀮𑀗𑁆𑀕𑀻’𑀢𑀺 𑀔𑁄, 𑀪𑀺𑀓𑁆𑀔𑀼, 𑀅𑀯𑀺𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀓𑁆𑀔𑀺𑀧 𑀮𑀗𑁆𑀕𑀺𑀁, 𑀧𑀚𑀳 𑀅𑀯𑀺𑀚𑁆𑀚𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀉𑀤𑁆𑀥𑀼𑀫𑀸𑀬𑀺𑀓𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀓𑁆𑀔𑀺𑀧 𑀉𑀤𑁆𑀥𑀼𑀫𑀸𑀬𑀺𑀓𑀁, 𑀧𑀚𑀳 𑀓𑁄𑀥𑀽𑀧𑀸𑀬𑀸𑀲𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀤𑁆𑀯𑀺𑀥𑀸𑀧𑀣𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀓𑁆𑀔𑀺𑀧 𑀤𑁆𑀯𑀺𑀥𑀸𑀧𑀣𑀁, 𑀧𑀚𑀳 𑀯𑀺𑀘𑀺𑀓𑀺𑀘𑁆𑀙𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀘𑀗𑁆𑀕𑀯𑀸𑀭’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀦𑀻𑀯𑀭𑀡𑀸𑀦𑀁 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲, 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲, 𑀣𑀻𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀲𑁆𑀲, 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲. 𑀉𑀓𑁆𑀔𑀺𑀧 𑀘𑀗𑁆𑀕𑀯𑀸𑀭𑀁, 𑀧𑀚𑀳 𑀧𑀜𑁆𑀘 𑀦𑀻𑀯𑀭𑀡𑁂; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀓𑀼𑀫𑁆𑀫𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑁆𑀲. 𑀉𑀓𑁆𑀔𑀺𑀧 𑀓𑀼𑀫𑁆𑀫𑀁, 𑀧𑀚𑀳 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀅𑀲𑀺𑀲𑀽𑀦𑀸’𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀲𑀤𑁆𑀤𑀸𑀦𑀁…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀕𑀦𑁆𑀥𑀸𑀦𑀁…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀲𑀸𑀦𑀁…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀉𑀓𑁆𑀔𑀺𑀧 𑀅𑀲𑀺𑀲𑀽𑀦𑀁, 𑀧𑀚𑀳 𑀧𑀜𑁆𑀘 𑀓𑀸𑀫𑀕𑀼𑀡𑁂; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀫𑀁𑀲𑀧𑁂𑀲𑀻’𑀢𑀺 𑀔𑁄, 𑀪𑀺𑀓𑁆𑀔𑀼, 𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀓𑁆𑀔𑀺𑀧 𑀫𑀁𑀲𑀧𑁂𑀲𑀺𑀁, 𑀧𑀚𑀳 𑀦𑀦𑁆𑀤𑀻𑀭𑀸𑀕𑀁; 𑀅𑀪𑀺𑀓𑁆𑀔𑀡, 𑀲𑀼𑀫𑁂𑀥, 𑀲𑀢𑁆𑀣𑀁 𑀆𑀤𑀸𑀬𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄.

‘‘‘𑀦𑀸𑀕𑁄’𑀢𑀺 𑀔𑁄, 𑀪𑀺𑀓𑁆𑀔𑀼, 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀅𑀥𑀺𑀯𑀘𑀦𑀁. 𑀢𑀺𑀝𑁆𑀞𑀢𑀼 𑀦𑀸𑀕𑁄, 𑀫𑀸 𑀦𑀸𑀕𑀁 𑀖𑀝𑁆𑀝𑁂𑀲𑀺; 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀯𑀫𑁆𑀫𑀺𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀁

𑁨𑁫𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀚𑀸𑀢𑀺𑀪𑀽𑀫𑀓𑀸 𑀪𑀺𑀓𑁆𑀔𑀽 𑀚𑀸𑀢𑀺𑀪𑀽𑀫𑀺𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀪𑀽𑀫𑀺𑀬𑀁 𑀚𑀸𑀢𑀺𑀪𑀽𑀫𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀏𑀯𑀁 𑀲𑀫𑁆𑀪𑀸𑀯𑀺𑀢𑁄 𑁋 ‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄 𑀲𑀦𑁆𑀢𑀼𑀝𑁆𑀞𑀺𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀧𑀯𑀺𑀯𑀺𑀢𑁆𑀢𑁄 𑀧𑀯𑀺𑀯𑁂𑀓𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀅𑀲𑀁𑀲𑀝𑁆𑀞𑁄 𑀅𑀲𑀁𑀲𑀕𑁆𑀕𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀻𑀮𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄 𑀲𑀦𑁆𑀤𑀲𑁆𑀲𑀓𑁄 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦’’’𑀦𑁆𑀢𑀺? ‘‘𑀧𑀼𑀡𑁆𑀡𑁄 𑀦𑀸𑀫, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀚𑀸𑀢𑀺𑀪𑀽𑀫𑀺𑀬𑀁 𑀚𑀸𑀢𑀺𑀪𑀽𑀫𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀏𑀯𑀁 𑀲𑀫𑁆𑀪𑀸𑀯𑀺𑀢𑁄 𑁋 ‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄…𑀧𑁂… 𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄 𑀲𑀦𑁆𑀤𑀲𑁆𑀲𑀓𑁄 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦’’’𑀦𑁆𑀢𑀺.

𑁨𑁫𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀮𑀸𑀪𑀸 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲, 𑀲𑀼𑀮𑀤𑁆𑀥𑀮𑀸𑀪𑀸 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲, 𑀬𑀲𑁆𑀲 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀢𑀜𑁆𑀘 𑀲𑀢𑁆𑀣𑀸 𑀅𑀩𑁆𑀪𑀦𑀼𑀫𑁄𑀤𑀢𑀺. 𑀅𑀧𑁆𑀧𑁂𑀯 𑀦𑀸𑀫 𑀫𑀬𑀫𑁆𑀧𑀺 𑀓𑀤𑀸𑀘𑀺 𑀓𑀭𑀳𑀘𑀺 𑀆𑀬𑀲𑁆𑀫𑀢𑀸 𑀧𑀼𑀡𑁆𑀡𑁂𑀦 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀘𑁆𑀙𑁂𑀬𑁆𑀬𑀸𑀫 [𑀲𑀫𑀸𑀕𑀫𑀁 𑀕𑀘𑁆𑀙𑁂𑀬𑁆𑀬 (𑀓.)], 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺.

𑁨𑁫𑁪. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑁋 ‘‘𑀪𑀕𑀯𑀸 𑀓𑀺𑀭 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄; 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺.

𑁨𑁫𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬.

𑁨𑁫𑁬. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀲 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀡𑁆𑀡𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀅𑀪𑀺𑀡𑁆𑀳𑀁 𑀓𑀺𑀢𑁆𑀢𑀬𑀫𑀸𑀦𑁄 𑀅𑀳𑁄𑀲𑀺, 𑀲𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦 𑀧𑀓𑁆𑀓𑀦𑁆𑀢𑁄 𑀤𑀺𑀯𑀸𑀯𑀺𑀳𑀸𑀭𑀸𑀬𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀭𑀫𑀸𑀦𑀭𑀽𑀧𑁄 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺 𑀲𑀻𑀲𑀸𑀦𑀼𑀮𑁄𑀓𑀻. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀧𑀼𑀡𑁆𑀡𑁂𑀦 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

𑁨𑁫𑁭. ‘‘𑀪𑀕𑀯𑀢𑀺 𑀦𑁄, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀏𑀯𑀫𑀸𑀯𑀼𑀲𑁄’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀢𑁆𑀣𑀁…𑀧𑁂… 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀢𑁆𑀣𑀁…𑀧𑁂… 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁…𑀧𑁂… 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁…𑀧𑁂… 𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀓𑀺𑀫𑀢𑁆𑀣𑀁 𑀘𑀭𑀳𑀸𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’𑀦𑁆𑀢𑀺…𑀧𑁂… 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺… 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺… 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺… ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄, 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀬𑀣𑀸𑀓𑀣𑀁 𑀧𑀦𑀸𑀯𑀼𑀲𑁄, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

𑁨𑁫𑁮. ‘‘𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬 [𑀧𑀜𑁆𑀜𑀸𑀧𑁂𑀲𑁆𑀲 (𑀲𑀻. 𑀲𑁆𑀬𑀸.) 𑀏𑀯𑀫𑀜𑁆𑀜𑀢𑁆𑀣𑀧𑀺]. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄, 𑀪𑀕𑀯𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬. 𑀅𑀜𑁆𑀜𑀢𑁆𑀭 𑀘𑁂, 𑀆𑀯𑀼𑀲𑁄, 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀪𑀯𑀺𑀲𑁆𑀲, 𑀧𑀼𑀣𑀼𑀚𑁆𑀚𑀦𑁄 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬. 𑀧𑀼𑀣𑀼𑀚𑁆𑀚𑀦𑁄 𑀳𑀺, 𑀆𑀯𑀼𑀲𑁄, 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺. 𑀢𑁂𑀦 𑀳𑀸𑀯𑀼𑀲𑁄, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺; 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺.

𑁨𑁫𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀦𑁆𑀢𑀲𑁆𑀲 𑀲𑀸𑀓𑁂𑀢𑁂 𑀓𑀺𑀜𑁆𑀘𑀺𑀤𑁂𑀯 𑀅𑀘𑁆𑀘𑀸𑀬𑀺𑀓𑀁 𑀓𑀭𑀡𑀻𑀬𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀢𑀲𑁆𑀲 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀲𑀸𑀓𑁂𑀢𑀁 𑀲𑀢𑁆𑀢 𑀭𑀣𑀯𑀺𑀦𑀻𑀢𑀸𑀦𑀺 𑀉𑀧𑀝𑁆𑀞𑀧𑁂𑀬𑁆𑀬𑀼𑀁. 𑀅𑀣 𑀔𑁄, 𑀆𑀯𑀼𑀲𑁄, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀸𑀯𑀢𑁆𑀣𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀸 𑀧𑀞𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬, 𑀧𑀞𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀧𑀞𑀫𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀤𑀼𑀢𑀺𑀬𑁂𑀦 𑀭𑀣𑀯𑀺𑀦𑀻𑀢𑁂𑀦 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀢𑀢𑀺𑀬𑁂𑀦 𑀭𑀣𑀯𑀺𑀦𑀻𑀢𑁂𑀦 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀘𑀢𑀼𑀢𑁆𑀣𑁂𑀦 𑀭𑀣𑀯𑀺𑀦𑀻𑀢𑁂𑀦 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀧𑀜𑁆𑀘𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀙𑀝𑁆𑀞𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀢𑁆𑀢𑀫𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀲𑀢𑁆𑀢𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀲𑀢𑁆𑀢𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀸𑀓𑁂𑀢𑀁 𑀅𑀦𑀼𑀧𑀸𑀧𑀼𑀡𑁂𑀬𑁆𑀬 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀁. 𑀢𑀫𑁂𑀦𑀁 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀕𑀢𑀁 𑀲𑀫𑀸𑀦𑀁 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀇𑀫𑀺𑀦𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀭𑀣𑀯𑀺𑀦𑀻𑀢𑁂𑀦 𑀲𑀸𑀯𑀢𑁆𑀣𑀺𑀬𑀸 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭’𑀦𑁆𑀢𑀺? 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁄, 𑀆𑀯𑀼𑀲𑁄, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺?

‘‘𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀔𑁄, 𑀆𑀯𑀼𑀲𑁄, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀇𑀥 𑀫𑁂 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀦𑁆𑀢𑀲𑁆𑀲 𑀲𑀸𑀓𑁂𑀢𑁂 𑀓𑀺𑀜𑁆𑀘𑀺𑀤𑁂𑀯 𑀅𑀘𑁆𑀘𑀸𑀬𑀺𑀓𑀁 𑀓𑀭𑀡𑀻𑀬𑀁 𑀉𑀧𑁆𑀧𑀚𑁆𑀚𑀺 [𑀉𑀧𑁆𑀧𑀚𑁆𑀚𑀢𑀺 (𑀓.)]. 𑀢𑀲𑁆𑀲 𑀫𑁂 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀲𑀸𑀓𑁂𑀢𑀁 𑀲𑀢𑁆𑀢 𑀭𑀣𑀯𑀺𑀦𑀻𑀢𑀸𑀦𑀺 𑀉𑀧𑀝𑁆𑀞𑀧𑁂𑀲𑀼𑀁. 𑀅𑀣 𑀔𑁆𑀯𑀸𑀳𑀁 𑀲𑀸𑀯𑀢𑁆𑀣𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀸 𑀧𑀞𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀧𑀞𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀧𑀞𑀫𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀤𑀼𑀢𑀺𑀬𑁂𑀦 𑀭𑀣𑀯𑀺𑀦𑀻𑀢𑁂𑀦 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀤𑀼𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁, 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀢𑀢𑀺𑀬𑁂𑀦 𑀭𑀣𑀯𑀺𑀦𑀻𑀢𑁂𑀦 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀢𑀢𑀺𑀬𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁, 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀘𑀢𑀼𑀢𑁆𑀣𑁂𑀦 𑀭𑀣𑀯𑀺𑀦𑀻𑀢𑁂𑀦 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀘𑀢𑀼𑀢𑁆𑀣𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁, 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀧𑀜𑁆𑀘𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀧𑀜𑁆𑀘𑀫𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁, 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀙𑀝𑁆𑀞𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀢𑁆𑀢𑀫𑀁 𑀭𑀣𑀯𑀺𑀦𑀻𑀢𑀁 𑀧𑀸𑀧𑀼𑀡𑀺𑀁, 𑀙𑀝𑁆𑀞𑀁 𑀭𑀣𑀯𑀺𑀦𑀻𑀢𑀁 𑀯𑀺𑀲𑁆𑀲𑀚𑁆𑀚𑀺𑀁, 𑀲𑀢𑁆𑀢𑀫𑀁 𑀭𑀣𑀯𑀺𑀦𑀻𑀢𑀁 𑀅𑀪𑀺𑀭𑀼𑀳𑀺𑀁. 𑀲𑀢𑁆𑀢𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭’𑀦𑁆𑀢𑀺. 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀔𑁄, 𑀆𑀯𑀼𑀲𑁄, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀢𑁆𑀣𑀸, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀢𑁆𑀣𑀸, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀸, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀸, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀸, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺.

𑁨𑁬𑁦. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄𑀦𑀸𑀫𑁄 𑀆𑀬𑀲𑁆𑀫𑀸, 𑀓𑀣𑀜𑁆𑀘 𑀧𑀦𑀸𑀬𑀲𑁆𑀫𑀦𑁆𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀦𑁆𑀢𑀻’’𑀢𑀺? ‘‘𑀧𑀼𑀡𑁆𑀡𑁄𑀢𑀺 𑀔𑁄 𑀫𑁂, 𑀆𑀯𑀼𑀲𑁄, 𑀦𑀸𑀫𑀁; 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄𑀢𑀺 𑀘 𑀧𑀦 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀦𑁆𑀢𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄! 𑀬𑀣𑀸 𑀢𑀁 𑀲𑀼𑀢𑀯𑀢𑀸 𑀲𑀸𑀯𑀓𑁂𑀦 𑀲𑀫𑁆𑀫𑀤𑁂𑀯 𑀲𑀢𑁆𑀣𑀼𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑁂𑀦, 𑀏𑀯𑀫𑁂𑀯 𑀆𑀬𑀲𑁆𑀫𑀢𑀸 𑀧𑀼𑀡𑁆𑀡𑁂𑀦 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁂𑀦 𑀕𑀫𑁆𑀪𑀻𑀭𑀸 𑀕𑀫𑁆𑀪𑀻𑀭𑀧𑀜𑁆𑀳𑀸 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲 𑀩𑁆𑀬𑀸𑀓𑀢𑀸. 𑀮𑀸𑀪𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀲𑀼𑀮𑀤𑁆𑀥𑀮𑀸𑀪𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀬𑁂 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀮𑀪𑀦𑁆𑀢𑀺 𑀤𑀲𑁆𑀲𑀦𑀸𑀬, 𑀮𑀪𑀦𑁆𑀢𑀺 𑀧𑀬𑀺𑀭𑀽𑀧𑀸𑀲𑀦𑀸𑀬. 𑀘𑁂𑀮𑀡𑁆𑀟𑀼𑀓𑁂𑀦 [𑀘𑁂𑀮𑀡𑁆𑀟𑀓𑁂𑀦 (𑀓.), 𑀘𑁂𑀮𑀡𑁆𑀟𑀼𑀧𑁂𑀓𑁂𑀦 (?)] 𑀘𑁂𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀫𑀼𑀤𑁆𑀥𑀦𑀸 𑀧𑀭𑀺𑀳𑀭𑀦𑁆𑀢𑀸 𑀮𑀪𑁂𑀬𑁆𑀬𑀼𑀁 𑀤𑀲𑁆𑀲𑀦𑀸𑀬, 𑀮𑀪𑁂𑀬𑁆𑀬𑀼𑀁 𑀧𑀬𑀺𑀭𑀽𑀧𑀸𑀲𑀦𑀸𑀬, 𑀢𑁂𑀲𑀫𑁆𑀧𑀺 𑀮𑀸𑀪𑀸 𑀢𑁂𑀲𑀫𑁆𑀧𑀺 𑀲𑀼𑀮𑀤𑁆𑀥𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀮𑀸𑀪𑀸 𑀅𑀫𑁆𑀳𑀸𑀓𑀫𑁆𑀧𑀺 𑀲𑀼𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀮𑀪𑀸𑀫 𑀤𑀲𑁆𑀲𑀦𑀸𑀬, 𑀮𑀪𑀸𑀫 𑀧𑀬𑀺𑀭𑀽𑀧𑀸𑀲𑀦𑀸𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀸𑀫𑁄 𑀆𑀬𑀲𑁆𑀫𑀸, 𑀓𑀣𑀜𑁆𑀘 𑀧𑀦𑀸𑀬𑀲𑁆𑀫𑀦𑁆𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀦𑁆𑀢𑀻’’𑀢𑀺? ‘‘𑀉𑀧𑀢𑀺𑀲𑁆𑀲𑁄𑀢𑀺 𑀔𑁄 𑀫𑁂, 𑀆𑀯𑀼𑀲𑁄, 𑀦𑀸𑀫𑀁; 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀘 𑀧𑀦 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀦𑁆𑀢𑀻’’𑀢𑀺. ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭, 𑀪𑁄 [𑀔𑁄 (𑀓.)], 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳 𑁋 ‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’𑀢𑀺. 𑀲𑀘𑁂 𑀳𑀺 𑀫𑀬𑀁 𑀚𑀸𑀦𑁂𑀬𑁆𑀬𑀸𑀫 ‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’𑀢𑀺, 𑀏𑀢𑁆𑀢𑀓𑀫𑁆𑀧𑀺 𑀦𑁄 𑀦𑀧𑁆𑀧𑀝𑀺𑀪𑀸𑀲𑁂𑀬𑁆𑀬 [𑀦𑀧𑁆𑀧𑀝𑀺𑀪𑁂𑀬𑁆𑀬 (?)]. 𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄! 𑀬𑀣𑀸 𑀢𑀁 𑀲𑀼𑀢𑀯𑀢𑀸 𑀲𑀸𑀯𑀓𑁂𑀦 𑀲𑀫𑁆𑀫𑀤𑁂𑀯 𑀲𑀢𑁆𑀣𑀼𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑁂𑀦, 𑀏𑀯𑀫𑁂𑀯 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀕𑀫𑁆𑀪𑀻𑀭𑀸 𑀕𑀫𑁆𑀪𑀻𑀭𑀧𑀜𑁆𑀳𑀸 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲 𑀧𑀼𑀘𑁆𑀙𑀺𑀢𑀸. 𑀮𑀸𑀪𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀼𑀮𑀤𑁆𑀥𑀮𑀸𑀪𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀬𑁂 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀮𑀪𑀦𑁆𑀢𑀺 𑀤𑀲𑁆𑀲𑀦𑀸𑀬, 𑀮𑀪𑀦𑁆𑀢𑀺 𑀧𑀬𑀺𑀭𑀽𑀧𑀸𑀲𑀦𑀸𑀬. 𑀘𑁂𑀮𑀡𑁆𑀟𑀼𑀓𑁂𑀦 𑀘𑁂𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀫𑀼𑀤𑁆𑀥𑀦𑀸 𑀧𑀭𑀺𑀳𑀭𑀦𑁆𑀢𑀸 𑀮𑀪𑁂𑀬𑁆𑀬𑀼𑀁 𑀤𑀲𑁆𑀲𑀦𑀸𑀬, 𑀮𑀪𑁂𑀬𑁆𑀬𑀼𑀁 𑀧𑀬𑀺𑀭𑀽𑀧𑀸𑀲𑀦𑀸𑀬, 𑀢𑁂𑀲𑀫𑁆𑀧𑀺 𑀮𑀸𑀪𑀸 𑀢𑁂𑀲𑀫𑁆𑀧𑀺 𑀲𑀼𑀮𑀤𑁆𑀥𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀮𑀸𑀪𑀸 𑀅𑀫𑁆𑀳𑀸𑀓𑀫𑁆𑀧𑀺 𑀲𑀼𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀮𑀪𑀸𑀫 𑀤𑀲𑁆𑀲𑀦𑀸𑀬, 𑀮𑀪𑀸𑀫 𑀧𑀬𑀺𑀭𑀽𑀧𑀸𑀲𑀦𑀸𑀬𑀸’’𑀢𑀺.

𑀇𑀢𑀺𑀳 𑀢𑁂 𑀉𑀪𑁄𑀧𑀺 𑀫𑀳𑀸𑀦𑀸𑀕𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀫𑀦𑀼𑀫𑁄𑀤𑀺𑀁𑀲𑀽𑀢𑀺.

𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀦𑀺𑀯𑀸𑀧𑀲𑀼𑀢𑁆𑀢𑀁