𑁬. 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀁

𑁧𑁮𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀅𑀧𑁆𑀧𑀳𑀻𑀦𑀸, 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 [𑀘𑁂𑀢𑀲𑁄𑀯𑀺𑀦𑀺𑀩𑀤𑁆𑀥𑀸 (𑀲𑀻.), 𑀘𑁂𑀢𑁄𑀯𑀺𑀦𑀺𑀩𑀤𑁆𑀥𑀸 (𑀲𑀸𑀭𑀢𑁆𑀣𑀤𑀻𑀧𑀦𑀻𑀝𑀻𑀓𑀸)] 𑀅𑀲𑀫𑀼𑀘𑁆𑀙𑀺𑀦𑁆𑀦𑀸, 𑀲𑁄 𑀯𑀢𑀺𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀓𑀢𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀅𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀞𑀫𑁄 𑀘𑁂𑀢𑁄𑀔𑀺𑀮𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀤𑀼𑀢𑀺𑀬𑁄 𑀘𑁂𑀢𑁄𑀔𑀺𑀮𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀢𑀢𑀺𑀬𑁄 𑀘𑁂𑀢𑁄𑀔𑀺𑀮𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀘𑀢𑀼𑀢𑁆𑀣𑁄 𑀘𑁂𑀢𑁄𑀔𑀺𑀮𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀜𑁆𑀘𑀫𑁄 𑀘𑁂𑀢𑁄𑀔𑀺𑀮𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺. 𑀇𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀅𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀺.

𑁧𑁮𑁬. ‘‘𑀓𑀢𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 [𑀅𑀯𑀺𑀕𑀢𑀭𑀸𑀕𑁄 (𑀓𑀢𑁆𑀣𑀘𑀺)] 𑀳𑁄𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑁄 𑀅𑀯𑀺𑀕𑀢𑀧𑁂𑀫𑁄 𑀅𑀯𑀺𑀕𑀢𑀧𑀺𑀧𑀸𑀲𑁄 𑀅𑀯𑀺𑀕𑀢𑀧𑀭𑀺𑀴𑀸𑀳𑁄 𑀅𑀯𑀺𑀕𑀢𑀢𑀡𑁆𑀳𑁄. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑁄 𑀅𑀯𑀺𑀕𑀢𑀧𑁂𑀫𑁄 𑀅𑀯𑀺𑀕𑀢𑀧𑀺𑀧𑀸𑀲𑁄 𑀅𑀯𑀺𑀕𑀢𑀧𑀭𑀺𑀴𑀸𑀳𑁄 𑀅𑀯𑀺𑀕𑀢𑀢𑀡𑁆𑀳𑁄, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀞𑀫𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀤𑀼𑀢𑀺𑀬𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀢𑀢𑀺𑀬𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀘𑀢𑀼𑀢𑁆𑀣𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑁋 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑁋 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀜𑁆𑀘𑀫𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀇𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑁄𑀦𑁆𑀢𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀅𑀧𑁆𑀧𑀳𑀻𑀦𑀸, 𑀇𑀫𑁂 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸, 𑀲𑁄 𑀯𑀢𑀺𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁮𑁭. ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀧𑀳𑀻𑀦𑀸, 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸, 𑀲𑁄 𑀯𑀢𑀺𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀓𑀢𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀲𑀫𑁆𑀧𑀲𑀻𑀤𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀲𑀫𑁆𑀧𑀲𑀻𑀤𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀞𑀫𑁄 𑀘𑁂𑀢𑁄𑀔𑀺𑀮𑁄 𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀲𑀫𑁆𑀧𑀲𑀻𑀤𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀤𑀼𑀢𑀺𑀬𑁄 𑀘𑁂𑀢𑁄𑀔𑀺𑀮𑁄 𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀲𑀫𑁆𑀧𑀲𑀻𑀤𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀢𑀢𑀺𑀬𑁄 𑀘𑁂𑀢𑁄𑀔𑀺𑀮𑁄 𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀬 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀲𑀫𑁆𑀧𑀲𑀻𑀤𑀢𑀺…𑀧𑁂… 𑀏𑀯𑀫𑀲𑁆𑀲𑀸𑀬𑀁 𑀘𑀢𑀼𑀢𑁆𑀣𑁄 𑀘𑁂𑀢𑁄𑀔𑀺𑀮𑁄 𑀧𑀳𑀻𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀦 𑀓𑀼𑀧𑀺𑀢𑁄 𑀳𑁄𑀢𑀺 𑀦 𑀅𑀦𑀢𑁆𑀢𑀫𑀦𑁄 [𑀅𑀢𑁆𑀢𑀫𑀦𑁄 (𑀲𑀻. 𑀧𑀻.)] 𑀅𑀦𑀸𑀳𑀢𑀘𑀺𑀢𑁆𑀢𑁄 𑀅𑀔𑀺𑀮𑀚𑀸𑀢𑁄. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀦 𑀓𑀼𑀧𑀺𑀢𑁄 𑀳𑁄𑀢𑀺 𑀦 𑀅𑀦𑀢𑁆𑀢𑀫𑀦𑁄 𑀅𑀦𑀸𑀳𑀢𑀘𑀺𑀢𑁆𑀢𑁄 𑀅𑀔𑀺𑀮𑀚𑀸𑀢𑁄, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀜𑁆𑀘𑀫𑁄 𑀘𑁂𑀢𑁄𑀔𑀺𑀮𑁄 𑀧𑀳𑀻𑀦𑁄 𑀳𑁄𑀢𑀺. 𑀇𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺.

𑁧𑁮𑁮. ‘‘𑀓𑀢𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀫𑁂 𑀯𑀻𑀢𑀭𑀸𑀕𑁄 𑀳𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀯𑀺𑀕𑀢𑀧𑁂𑀫𑁄 𑀯𑀺𑀕𑀢𑀧𑀺𑀧𑀸𑀲𑁄 𑀯𑀺𑀕𑀢𑀧𑀭𑀺𑀴𑀸𑀳𑁄 𑀯𑀺𑀕𑀢𑀢𑀡𑁆𑀳𑁄. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀫𑁂 𑀯𑀻𑀢𑀭𑀸𑀕𑁄 𑀳𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀯𑀺𑀕𑀢𑀧𑁂𑀫𑁄 𑀯𑀺𑀕𑀢𑀧𑀺𑀧𑀸𑀲𑁄 𑀯𑀺𑀕𑀢𑀧𑀭𑀺𑀴𑀸𑀳𑁄 𑀯𑀺𑀕𑀢𑀢𑀡𑁆𑀳𑁄, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀞𑀫𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀯𑀻𑀢𑀭𑀸𑀕𑁄 𑀳𑁄𑀢𑀺…𑀧𑁂… 𑀭𑀽𑀧𑁂 𑀯𑀻𑀢𑀭𑀸𑀕𑁄 𑀳𑁄𑀢𑀺…𑀧𑁂… 𑀦 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀘𑀢𑀼𑀢𑁆𑀣𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑁋 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑁋 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬. 𑀬𑀲𑁆𑀲 𑀘𑀺𑀢𑁆𑀢𑀁 𑀦𑀫𑀢𑀺 𑀆𑀢𑀧𑁆𑀧𑀸𑀬 𑀅𑀦𑀼𑀬𑁄𑀕𑀸𑀬 𑀲𑀸𑀢𑀘𑁆𑀘𑀸𑀬 𑀧𑀥𑀸𑀦𑀸𑀬, 𑀏𑀯𑀫𑀲𑁆𑀲𑀸𑀬𑀁 𑀧𑀜𑁆𑀘𑀫𑁄 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑁄 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀇𑀫𑀸𑀲𑁆𑀲 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑁄𑀦𑁆𑀢𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀇𑀫𑁂 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀧𑀳𑀻𑀦𑀸, 𑀇𑀫𑁂 𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸, 𑀲𑁄 𑀯𑀢𑀺𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑁧𑁮𑁯. ‘‘𑀲𑁄 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀉𑀲𑁆𑀲𑁄𑀴𑁆𑀳𑀻𑀬𑁂𑀯 𑀧𑀜𑁆𑀘𑀫𑀻. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀉𑀲𑁆𑀲𑁄𑀴𑁆𑀳𑀻𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀤𑀸𑀬, 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸. 𑀢𑀸𑀦𑀲𑁆𑀲𑀼 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢𑀺𑀫𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑁂𑀬𑁆𑀬𑀼’𑀦𑁆𑀢𑀺. 𑀅𑀣 𑀔𑁄 𑀪𑀩𑁆𑀩𑀸𑀯 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀉𑀲𑁆𑀲𑁄𑀴𑁆𑀳𑀺𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀤𑀸𑀬, 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.