𑁭. 𑀯𑀦𑀧𑀢𑁆𑀣𑀲𑀼𑀢𑁆𑀢𑀁

𑁧𑁯𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁯𑁧. ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺, 𑀢𑀲𑁆𑀲 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸 𑀢𑀫𑁆𑀳𑀸 𑀯𑀦𑀧𑀢𑁆𑀣𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦 𑀯𑀢𑁆𑀣𑀩𑁆𑀩𑀁.

𑁧𑁯𑁨. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼…𑀧𑁂… 𑀦 𑀲𑁂𑀦𑀸𑀲𑀦𑀳𑁂𑀢𑀼…𑀧𑁂… 𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀣 𑀘 𑀧𑀦 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀔𑀸𑀧𑀺 𑀢𑀫𑁆𑀳𑀸 𑀯𑀦𑀧𑀢𑁆𑀣𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦 𑀯𑀢𑁆𑀣𑀩𑁆𑀩𑀁.

𑁧𑁯𑁩. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼…𑀧𑁂… 𑀦 𑀲𑁂𑀦𑀸𑀲𑀦𑀳𑁂𑀢𑀼…𑀧𑁂… 𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀣 𑀘 𑀧𑀦 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀔𑀸𑀧𑀺 𑀢𑀲𑁆𑀫𑀺𑀁 𑀯𑀦𑀧𑀢𑁆𑀣𑁂 𑀯𑀢𑁆𑀣𑀩𑁆𑀩𑀁, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁.

𑁧𑁯𑁪. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀬𑀸𑀯𑀚𑀻𑀯𑀫𑁆𑀧𑀺 𑀢𑀲𑁆𑀫𑀺𑀁 𑀯𑀦𑀧𑀢𑁆𑀣𑁂 𑀯𑀢𑁆𑀣𑀩𑁆𑀩𑀁, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁.

𑁧𑁯𑁫. ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺 …𑀧𑁂… 𑀅𑀜𑁆𑀜𑀢𑀭𑀁 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺…𑀧𑁂… 𑀅𑀜𑁆𑀜𑀢𑀭𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺…𑀧𑁂… 𑀅𑀜𑁆𑀜𑀢𑀭𑀁 𑀚𑀦𑀧𑀤𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺…𑀧𑁂… 𑀅𑀜𑁆𑀜𑀢𑀭𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄.

𑁧𑁯𑁬. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼…𑀧𑁂… 𑀦 𑀲𑁂𑀦𑀸𑀲𑀦𑀳𑁂𑀢𑀼…𑀧𑁂… 𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀣 𑀘 𑀧𑀦 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀦𑀼𑀧𑀸𑀧𑀼𑀡𑀸𑀫𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀔𑀸𑀧𑀺 𑀲𑁄 𑀧𑀼𑀕𑁆𑀕𑀮𑁄 𑀆𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄.

𑁧𑁯𑁭. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼…𑀧𑁂… 𑀦 𑀲𑁂𑀦𑀸𑀲𑀦𑀳𑁂𑀢𑀼…𑀧𑁂… 𑀦 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀣 𑀘 𑀧𑀦 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀔𑀸𑀧𑀺 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁.

𑁧𑁯𑁮. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀲 𑀢𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀢𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀳𑀁 𑀔𑁄 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑁂 𑀇𑀫𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀅𑀦𑀼𑀧𑀝𑁆𑀞𑀺𑀢𑀸 𑀘𑁂𑀯 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑀭𑀺𑀓𑁆𑀔𑀻𑀡𑀸 𑀘 𑀆𑀲𑀯𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀦𑀼𑀧𑁆𑀧𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀧𑀸𑀧𑀼𑀡𑀸𑀫𑀺. 𑀬𑁂 𑀘 𑀔𑁄 𑀇𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑁋 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑁋 𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀬𑀸𑀯𑀚𑀻𑀯𑀫𑁆𑀧𑀺 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁂𑀦𑀧𑀻’’𑀢𑀺 [𑀅𑀧𑀺 𑀧𑀡𑀼𑀚𑁆𑀚𑀫𑀸𑀦𑁂𑀦𑀸𑀢𑀺 (?)].

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀯𑀦𑀧𑀢𑁆𑀣𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.