𑁧𑁦. 𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀁

𑁨𑁧𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀬𑀁 𑀦𑀺𑀫𑀺𑀢𑁆𑀢𑀁 𑀆𑀕𑀫𑁆𑀫 𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀓𑀼𑀲𑀮𑀽𑀧𑀲𑀁𑀳𑀺𑀢𑀁. 𑀢𑀲𑁆𑀲 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 [𑀏𑀓𑁄𑀤𑀺𑀪𑁄𑀢𑀺 (𑀲𑁆𑀬𑀸. 𑀓.)] 𑀲𑀫𑀸𑀥𑀺𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀧𑀮𑀕𑀡𑁆𑀟𑁄 𑀯𑀸 𑀧𑀮𑀕𑀡𑁆𑀟𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀔𑀼𑀫𑀸𑀬 𑀆𑀡𑀺𑀬𑀸 𑀑𑀴𑀸𑀭𑀺𑀓𑀁 𑀆𑀡𑀺𑀁 𑀅𑀪𑀺𑀦𑀺𑀳𑀦𑁂𑀬𑁆𑀬 𑀅𑀪𑀺𑀦𑀻𑀳𑀭𑁂𑀬𑁆𑀬 𑀅𑀪𑀺𑀦𑀺𑀯𑀢𑁆𑀢𑁂𑀬𑁆𑀬 [𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬 (𑀲𑀻. 𑀧𑀻.)]; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀬𑀁 𑀦𑀺𑀫𑀺𑀢𑁆𑀢𑀁 𑀆𑀕𑀫𑁆𑀫 𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀓𑀼𑀲𑀮𑀽𑀧𑀲𑀁𑀳𑀺𑀢𑀁. 𑀢𑀲𑁆𑀲 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺.

𑁨𑁧𑁭. ‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄 𑁋 ‘𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀅𑀓𑀼𑀲𑀮𑀸, 𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀲𑀸𑀯𑀚𑁆𑀚𑀸, 𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀤𑀼𑀓𑁆𑀔𑀯𑀺𑀧𑀸𑀓𑀸’𑀢𑀺. 𑀢𑀲𑁆𑀲 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑀁 𑀉𑀧𑀧𑀭𑀺𑀓𑁆𑀔𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀺𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀼𑀦𑁄 𑀢𑀫𑁆𑀳𑀸𑀧𑀺 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄 𑁋 ‘𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀅𑀓𑀼𑀲𑀮𑀸, 𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀲𑀸𑀯𑀚𑁆𑀚𑀸, 𑀇𑀢𑀺𑀧𑀺𑀫𑁂 𑀯𑀺𑀢𑀓𑁆𑀓𑀸 𑀤𑀼𑀓𑁆𑀔𑀯𑀺𑀧𑀸𑀓𑀸’𑀢𑀺. 𑀢𑀲𑁆𑀲 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑀁 𑀉𑀧𑀧𑀭𑀺𑀓𑁆𑀔𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺.

𑁨𑁧𑁮. ‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑀁 𑀉𑀧𑀧𑀭𑀺𑀓𑁆𑀔𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑁄 𑀆𑀧𑀚𑁆𑀚𑀺𑀢𑀩𑁆𑀩𑁄. 𑀢𑀲𑁆𑀲 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑀁 𑀆𑀧𑀚𑁆𑀚𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀆𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑁄 𑀅𑀲𑁆𑀲; 𑀲𑁄 𑀦𑀺𑀫𑀻𑀮𑁂𑀬𑁆𑀬 𑀯𑀸 𑀅𑀜𑁆𑀜𑁂𑀦 𑀯𑀸 𑀅𑀧𑀮𑁄𑀓𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑀁 𑀉𑀧𑀧𑀭𑀺𑀓𑁆𑀔𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺.

𑁨𑁧𑁯. ‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑀁 𑀆𑀧𑀚𑁆𑀚𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀢𑀲𑁆𑀲 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀲𑀻𑀖𑀁 𑀕𑀘𑁆𑀙𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀻𑀖𑀁 𑀕𑀘𑁆𑀙𑀸𑀫𑀺? 𑀬𑀁𑀦𑀽𑀦𑀸𑀳𑀁 𑀲𑀡𑀺𑀓𑀁 𑀕𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀡𑀺𑀓𑀁 𑀕𑀘𑁆𑀙𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀡𑀺𑀓𑀁 𑀕𑀘𑁆𑀙𑀸𑀫𑀺? 𑀬𑀁𑀦𑀽𑀦𑀸𑀳𑀁 𑀢𑀺𑀝𑁆𑀞𑁂𑀬𑁆𑀬’𑀦𑁆𑀢𑀺. 𑀲𑁄 𑀢𑀺𑀝𑁆𑀞𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀞𑀺𑀢𑁄? 𑀬𑀁𑀦𑀽𑀦𑀸𑀳𑀁 𑀦𑀺𑀲𑀻𑀤𑁂𑀬𑁆𑀬’𑀦𑁆𑀢𑀺. 𑀲𑁄 𑀦𑀺𑀲𑀻𑀤𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀦𑀺𑀲𑀺𑀦𑁆𑀦𑁄? 𑀬𑀁𑀦𑀽𑀦𑀸𑀳𑀁 𑀦𑀺𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀦𑀺𑀧𑀚𑁆𑀚𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀑𑀴𑀸𑀭𑀺𑀓𑀁 𑀑𑀴𑀸𑀭𑀺𑀓𑀁 𑀇𑀭𑀺𑀬𑀸𑀧𑀣𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 [𑀅𑀪𑀺𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 (𑀲𑁆𑀬𑀸.)] 𑀲𑀼𑀔𑀼𑀫𑀁 𑀲𑀼𑀔𑀼𑀫𑀁 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑀁 𑀆𑀧𑀚𑁆𑀚𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺.

𑁨𑁨𑁦. ‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬 [𑀤𑀦𑁆𑀢𑁂 + 𑀅𑀪𑀺𑀤𑀦𑁆𑀢𑀁 + 𑀆𑀥𑀸𑀬𑀸𑀢𑀺 𑀝𑀻𑀓𑀸𑀬𑀁 𑀧𑀤𑀘𑁆𑀙𑁂𑀤𑁄, 𑀤𑀦𑁆𑀢𑁂𑀪𑀻𑀢𑀺 𑀧𑀦𑁂𑀢𑁆𑀣 𑀓𑀭𑀡𑀢𑁆𑀣𑁄 𑀬𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺] 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑀩𑁆𑀩𑀁 𑀅𑀪𑀺𑀲𑀦𑁆𑀢𑀸𑀧𑁂𑀢𑀩𑁆𑀩𑀁. 𑀢𑀲𑁆𑀲 𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀢𑁄 𑀅𑀪𑀺𑀦𑀺𑀧𑁆𑀧𑀻𑀴𑀬𑀢𑁄 𑀅𑀪𑀺𑀲𑀦𑁆𑀢𑀸𑀧𑀬𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀼𑀩𑁆𑀩𑀮𑀢𑀭𑀁 𑀧𑀼𑀭𑀺𑀲𑀁 𑀲𑀻𑀲𑁂 𑀯𑀸 𑀕𑀮𑁂 𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀕𑁆𑀕𑀡𑁆𑀳𑁂𑀬𑁆𑀬 𑀅𑀪𑀺𑀦𑀺𑀧𑁆𑀧𑀻𑀴𑁂𑀬𑁆𑀬 𑀅𑀪𑀺𑀲𑀦𑁆𑀢𑀸𑀧𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀼𑀦𑁄 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀯 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑀩𑁆𑀩𑀁 𑀅𑀪𑀺𑀲𑀦𑁆𑀢𑀸𑀧𑁂𑀢𑀩𑁆𑀩𑀁. 𑀢𑀲𑁆𑀲 𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀢𑁄 𑀅𑀪𑀺𑀦𑀺𑀧𑁆𑀧𑀻𑀴𑀬𑀢𑁄 𑀅𑀪𑀺𑀲𑀦𑁆𑀢𑀸𑀧𑀬𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺.

𑁨𑁨𑁧. ‘‘𑀬𑀢𑁄 𑀔𑁄 [𑀬𑀢𑁄 𑀘 𑀔𑁄 (𑀲𑁆𑀬𑀸. 𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀬𑀁 𑀦𑀺𑀫𑀺𑀢𑁆𑀢𑀁 𑀆𑀕𑀫𑁆𑀫 𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺, 𑀢𑀲𑁆𑀲 𑀢𑀫𑁆𑀳𑀸 𑀦𑀺𑀫𑀺𑀢𑁆𑀢𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀆𑀤𑀻𑀦𑀯𑀁 𑀉𑀧𑀧𑀭𑀺𑀓𑁆𑀔𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑀁 𑀆𑀧𑀚𑁆𑀚𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑁂𑀲𑀫𑁆𑀧𑀺 𑀯𑀺𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀢𑁄 𑀅𑀪𑀺𑀦𑀺𑀧𑁆𑀧𑀻𑀴𑀬𑀢𑁄 𑀅𑀪𑀺𑀲𑀦𑁆𑀢𑀸𑀧𑀬𑀢𑁄 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀧𑀺 𑀤𑁄𑀲𑀽𑀧𑀲𑀁𑀳𑀺𑀢𑀸𑀧𑀺 𑀫𑁄𑀳𑀽𑀧𑀲𑀁𑀳𑀺𑀢𑀸𑀧𑀺 𑀢𑁂 𑀧𑀳𑀻𑀬𑀦𑁆𑀢𑀺 𑀢𑁂 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀲𑀻 𑀯𑀺𑀢𑀓𑁆𑀓𑀧𑀭𑀺𑀬𑀸𑀬𑀧𑀣𑁂𑀲𑀼. 𑀬𑀁 𑀯𑀺𑀢𑀓𑁆𑀓𑀁 𑀆𑀓𑀗𑁆𑀔𑀺𑀲𑁆𑀲𑀢𑀺 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀺, 𑀬𑀁 𑀯𑀺𑀢𑀓𑁆𑀓𑀁 𑀦𑀸𑀓𑀗𑁆𑀔𑀺𑀲𑁆𑀲𑀢𑀺 𑀦 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀺. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 [𑀯𑀸𑀯𑀢𑁆𑀢𑀬𑀺 (𑀲𑀻. 𑀧𑀻.)] 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀲𑀻𑀳𑀦𑀸𑀤𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.