𑁭. 𑀓𑀡𑁆𑀟𑀓𑀯𑀺𑀫𑀸𑀦𑀯𑀢𑁆𑀣𑀼

𑁧𑁧𑁭𑁧. ‘‘𑀧𑀼𑀡𑁆𑀡𑀫𑀸𑀲𑁂 𑀬𑀣𑀸 𑀘𑀦𑁆𑀤𑁄, 𑀦𑀓𑁆𑀔𑀢𑁆𑀢𑀧𑀭𑀺𑀯𑀸𑀭𑀺𑀢𑁄;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀢𑀺, 𑀢𑀸𑀭𑀓𑀸𑀥𑀺𑀧𑀢𑀻 𑀲𑀲𑀻.

𑁧𑁧𑁭𑁨. ‘‘𑀢𑀣𑀽𑀧𑀫𑀁 𑀇𑀤𑀁 𑀩𑁆𑀬𑀫𑁆𑀳𑀁, 𑀤𑀺𑀩𑁆𑀩𑀁 𑀤𑁂𑀯𑀧𑀼𑀭𑀫𑁆𑀳𑀺 𑀘;

𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀭𑀁𑀲𑀺𑀫𑀸.

𑁧𑁧𑁭𑁩. ‘‘𑀯𑁂𑀴𑀼𑀭𑀺𑀬𑀲𑀼𑀯𑀡𑁆𑀡𑀲𑁆𑀲, 𑀨𑀮𑀺𑀓𑀸 𑀭𑀽𑀧𑀺𑀬𑀲𑁆𑀲 𑀘;

𑀫𑀲𑀸𑀭𑀕𑀮𑁆𑀮𑀫𑀼𑀢𑁆𑀢𑀸𑀳𑀺, 𑀮𑁄𑀳𑀺𑀢𑀗𑁆𑀕𑀫𑀡𑀻𑀳𑀺 𑀘.

𑁧𑁧𑁭𑁪. ‘‘𑀘𑀺𑀢𑁆𑀭𑀸 𑀫𑀦𑁄𑀭𑀫𑀸 𑀪𑀽𑀫𑀺, 𑀯𑁂𑀴𑀽𑀭𑀺𑀬𑀲𑁆𑀲 𑀲𑀦𑁆𑀣𑀢𑀸;

𑀓𑀽𑀝𑀸𑀕𑀸𑀭𑀸 𑀲𑀼𑀪𑀸 𑀭𑀫𑁆𑀫𑀸, 𑀧𑀸𑀲𑀸𑀤𑁄 𑀢𑁂 𑀲𑀼𑀫𑀸𑀧𑀺𑀢𑁄.

𑁧𑁧𑁭𑁫. ‘‘𑀭𑀫𑁆𑀫𑀸 𑀘 𑀢𑁂 𑀧𑁄𑀓𑁆𑀔𑀭𑀡𑀻, 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀯𑀺𑀧𑁆𑀧𑀲𑀦𑁆𑀦𑀸, 𑀲𑁄𑀯𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸.

𑁧𑁧𑁭𑁬. ‘‘𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸 [𑀲𑀫𑁄𑀢𑁆𑀣𑀢𑀸 (𑀓.), 𑀲𑀫𑁄𑀕𑀢𑀸 (𑀲𑁆𑀬𑀸.)];

𑀲𑀼𑀭𑀪𑀺𑀁 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀮𑀼𑀢𑁂𑀭𑀺𑀢𑀸.

𑁧𑁧𑁭𑁭. ‘‘𑀢𑀲𑁆𑀲𑀸 𑀢𑁂 𑀉𑀪𑀢𑁄 𑀧𑀲𑁆𑀲𑁂, 𑀯𑀦𑀕𑀼𑀫𑁆𑀩𑀸 𑀲𑀼𑀫𑀸𑀧𑀺𑀢𑀸;

𑀉𑀧𑁂𑀢𑀸 𑀧𑀼𑀧𑁆𑀨𑀭𑀼𑀓𑁆𑀔𑁂𑀳𑀺, 𑀨𑀮𑀭𑀼𑀓𑁆𑀔𑁂𑀳𑀺 𑀘𑀽𑀪𑀬𑀁.

𑁧𑁧𑁭𑁮. ‘‘𑀲𑁄𑀯𑀡𑁆𑀡𑀧𑀸𑀤𑁂 𑀧𑀮𑁆𑀮𑀗𑁆𑀓𑁂, 𑀫𑀼𑀤𑀼𑀓𑁂 𑀕𑁄𑀡𑀓𑀢𑁆𑀣𑀢𑁂 [𑀘𑁄𑀮𑀲𑀦𑁆𑀣𑀢𑁂 (𑀲𑀻.)];

𑀦𑀺𑀲𑀺𑀦𑁆𑀦𑀁 𑀤𑁂𑀯𑀭𑀸𑀚𑀁𑀯, 𑀉𑀧𑀢𑀺𑀝𑁆𑀞𑀦𑁆𑀢𑀺 𑀅𑀘𑁆𑀙𑀭𑀸.

𑁧𑁧𑁭𑁯. ‘‘𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀫𑀸𑀮𑀸𑀯𑀺𑀪𑀽𑀲𑀺𑀢𑀸;

𑀭𑀫𑁂𑀦𑁆𑀢𑀺 𑀢𑀁 𑀫𑀳𑀺𑀤𑁆𑀥𑀺𑀓𑀁, 𑀯𑀲𑀯𑀢𑁆𑀢𑀻𑀯 𑀫𑁄𑀤𑀲𑀺.

𑁧𑁧𑁮𑁦. ‘‘𑀪𑁂𑀭𑀺𑀲𑀗𑁆𑀔𑀫𑀼𑀤𑀺𑀗𑁆𑀕𑀸𑀳𑀺, 𑀯𑀻𑀡𑀸𑀳𑀺 𑀧𑀡𑀯𑁂𑀳𑀺 𑀘;

𑀭𑀫𑀲𑀺 𑀭𑀢𑀺𑀲𑀫𑁆𑀧𑀦𑁆𑀦𑁄, 𑀦𑀘𑁆𑀘𑀕𑀻𑀢𑁂 𑀲𑀼𑀯𑀸𑀤𑀺𑀢𑁂.

𑁧𑁧𑁮𑁧. ‘‘𑀤𑀺𑀩𑁆𑀩𑀸 𑀢𑁂 𑀯𑀺𑀯𑀺𑀥𑀸 𑀭𑀽𑀧𑀸, 𑀤𑀺𑀩𑁆𑀩𑀸 𑀲𑀤𑁆𑀤𑀸 𑀅𑀣𑁄 𑀭𑀲𑀸;

𑀕𑀦𑁆𑀥𑀸 𑀘 𑀢𑁂 𑀅𑀥𑀺𑀧𑁆𑀧𑁂𑀢𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸.

𑁧𑁧𑁮𑁨. ‘‘𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀧𑀯𑀭𑁂, 𑀤𑁂𑀯𑀧𑀼𑀢𑁆𑀢 𑀫𑀳𑀧𑁆𑀧𑀪𑁄;

𑀅𑀢𑀺𑀭𑁄𑀘𑀲𑀺 𑀯𑀡𑁆𑀡𑁂𑀦, 𑀉𑀤𑀬𑀦𑁆𑀢𑁄𑀯 𑀪𑀸𑀡𑀼𑀫𑀸.

𑁧𑁧𑁮𑁩. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁧𑁧𑁮𑁪. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀫𑀦𑁄…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁧𑁮𑁫. ‘‘𑀅𑀳𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑀸𑀓𑀺𑀬𑀸𑀦𑀁 𑀧𑀼𑀭𑀼𑀢𑁆𑀢𑀫𑁂;

𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀓𑀡𑁆𑀟𑀓𑁄 𑀲𑀳𑀚𑁄 𑀅𑀳𑀁.

𑁧𑁧𑁮𑁬. ‘‘𑀬𑀤𑀸 𑀲𑁄 𑀅𑀟𑁆𑀠𑀭𑀢𑁆𑀢𑀸𑀬𑀁, 𑀩𑁄𑀥𑀸𑀬 𑀫𑀪𑀺𑀦𑀺𑀓𑁆𑀔𑀫𑀺;

𑀲𑁄 𑀫𑀁 𑀫𑀼𑀤𑀽𑀳𑀺 𑀧𑀸𑀡𑀻𑀳𑀺, 𑀚𑀸𑀮𑀺 [𑀚𑀸𑀮 (𑀲𑀻.)] 𑀢𑀫𑁆𑀩𑀦𑀔𑁂𑀳𑀺 𑀘.

𑁧𑁧𑁮𑁭. ‘‘𑀲𑀢𑁆𑀣𑀺𑀁 𑀆𑀓𑁄𑀝𑀬𑀺𑀢𑁆𑀯𑀸𑀦, 𑀯𑀳 𑀲𑀫𑁆𑀫𑀸𑀢𑀺 𑀘𑀩𑁆𑀭𑀯𑀺;

𑀅𑀳𑀁 𑀮𑁄𑀓𑀁 𑀢𑀸𑀭𑀬𑀺𑀲𑁆𑀲𑀁, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁧𑁮𑁮. ‘‘𑀢𑀁 𑀫𑁂 𑀕𑀺𑀭𑀁 𑀲𑀼𑀡𑀦𑁆𑀢𑀲𑁆𑀲, 𑀳𑀸𑀲𑁄 𑀫𑁂 𑀯𑀺𑀧𑀼𑀮𑁄 𑀅𑀳𑀼;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀪𑀺𑀲𑀻𑀲𑀺𑀁 [𑀅𑀪𑀺𑀲𑀺𑀁𑀲𑀺𑀁 (𑀲𑀻.), 𑀅𑀪𑀺𑀲𑀻𑀲𑀺 (𑀧𑀻.)] 𑀢𑀤𑀸 𑀅𑀳𑀁.

𑁧𑁧𑁮𑁯. ‘‘𑀅𑀪𑀺𑀭𑀽𑀴𑁆𑀳𑀜𑁆𑀘 𑀫𑀁 𑀜𑀢𑁆𑀯𑀸, 𑀲𑀓𑁆𑀬𑀧𑀼𑀢𑁆𑀢𑀁 𑀫𑀳𑀸𑀬𑀲𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀫𑀼𑀤𑀺𑀢𑁄, 𑀯𑀳𑀺𑀲𑁆𑀲𑀁 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁧𑁧𑁯𑁦. ‘‘𑀧𑀭𑁂𑀲𑀁 𑀯𑀺𑀚𑀺𑀢𑀁 𑀕𑀦𑁆𑀢𑁆𑀯𑀸, 𑀉𑀕𑁆𑀕𑀢𑀲𑁆𑀫𑀺𑀁 𑀤𑀺𑀯𑀸𑀓𑀭𑁂 [𑀤𑀺𑀯𑀗𑁆𑀓𑀭𑁂 (𑀲𑁆𑀬𑀸. 𑀓.)];

𑀫𑀫𑀁 𑀙𑀦𑁆𑀦𑀜𑁆𑀘 𑀑𑀳𑀸𑀬, 𑀅𑀦𑀧𑁂𑀓𑁆𑀔𑁄 𑀲𑁄 𑀅𑀧𑀓𑁆𑀓𑀫𑀺.

𑁧𑁧𑁯𑁧. ‘‘𑀢𑀲𑁆𑀲 𑀢𑀫𑁆𑀩𑀦𑀔𑁂 𑀧𑀸𑀤𑁂, 𑀚𑀺𑀯𑁆𑀳𑀸𑀬 𑀧𑀭𑀺𑀮𑁂𑀳𑀺𑀲𑀁;

𑀕𑀘𑁆𑀙𑀦𑁆𑀢𑀜𑁆𑀘 𑀫𑀳𑀸𑀯𑀻𑀭𑀁, 𑀭𑀼𑀤𑀫𑀸𑀦𑁄 𑀉𑀤𑀺𑀓𑁆𑀔𑀺𑀲𑀁.

𑁧𑁧𑁯𑁨. ‘‘𑀅𑀤𑀲𑁆𑀲𑀦𑁂𑀦𑀳𑀁 𑀢𑀲𑁆𑀲, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄;

𑀅𑀮𑀢𑁆𑀣𑀁 𑀕𑀭𑀼𑀓𑀸𑀩𑀸𑀥𑀁, 𑀔𑀺𑀧𑁆𑀧𑀁 𑀫𑁂 𑀫𑀭𑀡𑀁 𑀅𑀳𑀼.

𑁧𑁧𑁯𑁩. ‘‘𑀢𑀲𑁆𑀲𑁂𑀯 𑀆𑀦𑀼𑀪𑀸𑀯𑁂𑀦, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀺𑀤𑀁;

𑀲𑀩𑁆𑀩𑀓𑀸𑀫𑀕𑀼𑀡𑁄𑀧𑁂𑀢𑀁, 𑀤𑀺𑀩𑁆𑀩𑀁 𑀤𑁂𑀯𑀧𑀼𑀭𑀫𑁆𑀳𑀺 𑀘.

𑁧𑁧𑁯𑁪. ‘‘𑀬𑀜𑁆𑀘 𑀫𑁂 𑀅𑀳𑀼𑀯𑀸 𑀳𑀸𑀲𑁄, 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦 𑀩𑁄𑀥𑀺𑀬𑀸;

𑀢𑁂𑀦𑁂𑀯 𑀓𑀼𑀲𑀮𑀫𑀽𑀮𑁂𑀦, 𑀨𑀼𑀲𑀺𑀲𑁆𑀲𑀁 𑀆𑀲𑀯𑀓𑁆𑀔𑀬𑀁.

𑁧𑁧𑁯𑁫. ‘‘𑀲𑀘𑁂 𑀳𑀺 𑀪𑀦𑁆𑀢𑁂 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀲𑀢𑁆𑀣𑀼 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀫𑀫𑀸𑀧𑀺 𑀦𑀁 𑀯𑀘𑀦𑁂𑀦, 𑀲𑀺𑀭𑀲𑀸 𑀯𑀚𑁆𑀚𑀸𑀲𑀺 𑀯𑀦𑁆𑀤𑀦𑀁.

𑁧𑁧𑁯𑁬. ‘‘𑀅𑀳𑀫𑁆𑀧𑀺 𑀤𑀝𑁆𑀞𑀼𑀁 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀳𑁄𑀢𑀺, 𑀮𑁄𑀓𑀦𑀸𑀣𑀸𑀦 𑀢𑀸𑀤𑀺𑀦’’𑀦𑁆𑀢𑀺.

𑁧𑁧𑁯𑁭. 𑀲𑁄 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺;

𑀲𑀼𑀢𑁆𑀯𑀸 𑀕𑀺𑀭𑀁 𑀘𑀓𑁆𑀔𑀼𑀫𑀢𑁄, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺.

𑁧𑁧𑁯𑁮. 𑀯𑀺𑀲𑁄𑀥𑁂𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀁, 𑀯𑀺𑀘𑀺𑀓𑀺𑀘𑁆𑀙𑀁 𑀯𑀢𑀸𑀦𑀺 𑀘;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸𑀢𑀺 [𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀢𑀻𑀢𑀺 (𑀓.)].

𑀓𑀡𑁆𑀟𑀓𑀯𑀺𑀫𑀸𑀦𑀁 𑀲𑀢𑁆𑀢𑀫𑀁.