𑁧𑁦. 𑀲𑁂𑀭𑀻𑀲𑀓𑀯𑀺𑀫𑀸𑀦𑀯𑀢𑁆𑀣𑀼

𑁧𑁨𑁨𑁮. [𑀧𑁂. 𑀯. 𑁬𑁦𑁪] 𑀲𑀼𑀡𑁄𑀣 𑀬𑀓𑁆𑀔𑀲𑁆𑀲 𑀘 𑀯𑀸𑀡𑀺𑀚𑀸𑀦 𑀘, 𑀲𑀫𑀸𑀕𑀫𑁄 𑀬𑀢𑁆𑀣 𑀢𑀤𑀸 𑀅𑀳𑁄𑀲𑀺;

𑀬𑀣𑀸 𑀓𑀣𑀁 𑀇𑀢𑀭𑀺𑀢𑀭𑁂𑀦 𑀘𑀸𑀧𑀺, 𑀲𑀼𑀪𑀸𑀲𑀺𑀢𑀁 𑀢𑀜𑁆𑀘 𑀲𑀼𑀡𑀸𑀣 𑀲𑀩𑁆𑀩𑁂.

𑁧𑁨𑁨𑁯. ‘‘𑀬𑁄 𑀲𑁄 𑀅𑀳𑀼 𑀭𑀸𑀚𑀸 𑀧𑀸𑀬𑀸𑀲𑀺 𑀦𑀸𑀫 [𑀦𑀸𑀫𑁄 (𑀲𑀻.)], 𑀪𑀼𑀫𑁆𑀫𑀸𑀦𑀁 𑀲𑀳𑀩𑁆𑀬𑀕𑀢𑁄 𑀬𑀲𑀲𑁆𑀲𑀻;

𑀲𑁄 𑀫𑁄𑀤𑀫𑀸𑀦𑁄𑀯 𑀲𑀓𑁂 𑀯𑀺𑀫𑀸𑀦𑁂, 𑀅𑀫𑀸𑀦𑀼𑀲𑁄 𑀫𑀸𑀦𑀼𑀲𑁂 𑀅𑀚𑁆𑀛𑀪𑀸𑀲𑀻𑀢𑀺.

𑁧𑁨𑁩𑁦. ‘‘𑀯𑀗𑁆𑀓𑁂 𑀅𑀭𑀜𑁆𑀜𑁂 𑀅𑀫𑀦𑀼𑀲𑁆𑀲𑀝𑁆𑀞𑀸𑀦𑁂, 𑀓𑀦𑁆𑀢𑀸𑀭𑁂 𑀅𑀧𑁆𑀧𑁄𑀤𑀓𑁂 𑀅𑀧𑁆𑀧𑀪𑀓𑁆𑀔𑁂;

𑀲𑀼𑀤𑀼𑀕𑁆𑀕𑀫𑁂 𑀯𑀡𑁆𑀡𑀼𑀧𑀣𑀲𑁆𑀲 𑀫𑀚𑁆𑀛𑁂, 𑀯𑀗𑁆𑀓𑀁 𑀪𑀬𑀸 [𑀥𑀗𑁆𑀓𑀁𑀪𑀬𑀸 (𑀓.)] 𑀦𑀝𑁆𑀞𑀫𑀦𑀸 𑀫𑀦𑀼𑀲𑁆𑀲𑀸.

𑁧𑁨𑁩𑁧. ‘‘𑀦𑀬𑀺𑀥 𑀨𑀮𑀸 𑀫𑀽𑀮𑀫𑀬𑀸 𑀘 𑀲𑀦𑁆𑀢𑀺, 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺 𑀓𑀼𑀢𑁄𑀥 𑀪𑀓𑁆𑀔𑁄;

𑀅𑀜𑁆𑀜𑀢𑁆𑀭 𑀧𑀁𑀲𑀽𑀳𑀺 𑀘 𑀯𑀸𑀮𑀼𑀓𑀸𑀳𑀺 𑀘, 𑀢𑀢𑀸𑀳𑀺 𑀉𑀡𑁆𑀳𑀸𑀳𑀺 𑀘 𑀤𑀸𑀭𑀼𑀡𑀸𑀳𑀺 𑀘.

𑁧𑁨𑁩𑁨. ‘‘𑀉𑀚𑁆𑀚𑀗𑁆𑀕𑀮𑀁 𑀢𑀢𑁆𑀢𑀫𑀺𑀯𑀁 𑀓𑀧𑀸𑀮𑀁, 𑀅𑀦𑀸𑀬𑀲𑀁 𑀧𑀭𑀮𑁄𑀓𑁂𑀦 𑀢𑀼𑀮𑁆𑀬𑀁;

𑀮𑀼𑀤𑁆𑀤𑀸𑀦𑀫𑀸𑀯𑀸𑀲𑀫𑀺𑀤𑀁 𑀧𑀼𑀭𑀸𑀡𑀁, 𑀪𑀽𑀫𑀺𑀧𑁆𑀧𑀤𑁂𑀲𑁄 𑀅𑀪𑀺𑀲𑀢𑁆𑀢𑀭𑀽𑀧𑁄.

𑁧𑁨𑁩𑁩. ‘‘𑀅𑀣 𑀢𑀼𑀫𑁆𑀳𑁂 𑀓𑁂𑀦 [𑀓𑁂𑀦 𑀦𑀼 (𑀲𑁆𑀬𑀸. 𑀓.)] 𑀯𑀡𑁆𑀡𑁂𑀦, 𑀓𑀺𑀫𑀸𑀲𑀫𑀸𑀦𑀸 𑀇𑀫𑀁 𑀧𑀤𑁂𑀲𑀁 𑀳𑀺;

𑀅𑀦𑀼𑀧𑀯𑀺𑀝𑁆𑀞𑀸 𑀲𑀳𑀲𑀸 𑀲𑀫𑁂𑀘𑁆𑀘, 𑀮𑁄𑀪𑀸 𑀪𑀬𑀸 𑀅𑀣 𑀯𑀸 𑀲𑀫𑁆𑀧𑀫𑀽𑀴𑁆𑀳𑀸’’𑀢𑀺.

𑁧𑁨𑁩𑁪. ‘‘𑀫𑀕𑀥𑁂𑀲𑀼 𑀅𑀗𑁆𑀕𑁂𑀲𑀼 𑀘 𑀲𑀢𑁆𑀣𑀯𑀸𑀳𑀸, 𑀆𑀭𑁄𑀧𑀬𑀺𑀢𑁆𑀯𑀸 𑀧𑀡𑀺𑀬𑀁 𑀧𑀼𑀣𑀼𑀢𑁆𑀢𑀁;

𑀢𑁂 𑀬𑀸𑀫𑀲𑁂 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀁, 𑀥𑀦𑀢𑁆𑀣𑀺𑀓𑀸 𑀉𑀤𑁆𑀤𑀬𑀁 𑀧𑀢𑁆𑀣𑀬𑀸𑀦𑀸.

𑁧𑁨𑁩𑁫. ‘‘𑀤𑀺𑀯𑀸 𑀧𑀺𑀧𑀸𑀲𑀁 𑀦𑀥𑀺𑀯𑀸𑀲𑀬𑀦𑁆𑀢𑀸, 𑀬𑁄𑀕𑁆𑀕𑀸𑀦𑀼𑀓𑀫𑁆𑀧𑀜𑁆𑀘 𑀲𑀫𑁂𑀓𑁆𑀔𑀫𑀸𑀦𑀸,

𑀏𑀢𑁂𑀦 𑀯𑁂𑀕𑁂𑀦 𑀆𑀬𑀸𑀫 𑀲𑀩𑁆𑀩𑁂 [𑀲𑀩𑁆𑀩𑁂 𑀢𑁂 (𑀓.)], 𑀭𑀢𑁆𑀢𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀯𑀺𑀓𑀸𑀮𑁂.

𑁧𑁨𑁩𑁬. ‘‘𑀢𑁂 𑀤𑀼𑀧𑁆𑀧𑀬𑀸𑀢𑀸 𑀅𑀧𑀭𑀤𑁆𑀥𑀫𑀕𑁆𑀕𑀸, 𑀅𑀦𑁆𑀥𑀸𑀓𑀼𑀮𑀸 𑀯𑀺𑀧𑁆𑀧𑀦𑀝𑁆𑀞𑀸 𑀅𑀭𑀜𑁆𑀜𑁂;

𑀲𑀼𑀤𑀼𑀕𑁆𑀕𑀫𑁂 𑀯𑀡𑁆𑀡𑀼𑀧𑀣𑀲𑁆𑀲 𑀫𑀚𑁆𑀛𑁂, 𑀤𑀺𑀲𑀁 𑀦 𑀚𑀸𑀦𑀸𑀫 𑀧𑀫𑀽𑀴𑁆𑀳𑀘𑀺𑀢𑁆𑀢𑀸.

𑁧𑁨𑁩𑁭. ‘‘𑀇𑀤𑀜𑁆𑀘 𑀤𑀺𑀲𑁆𑀯𑀸𑀦 𑀅𑀤𑀺𑀝𑁆𑀞𑀧𑀼𑀩𑁆𑀩𑀁, 𑀯𑀺𑀫𑀸𑀦𑀲𑁂𑀝𑁆𑀞𑀜𑁆𑀘 𑀢𑀯𑀜𑁆𑀘 𑀬𑀓𑁆𑀔;

𑀢𑀢𑀼𑀢𑁆𑀢𑀭𑀺𑀁 𑀚𑀻𑀯𑀺𑀢𑀫𑀸𑀲𑀫𑀸𑀦𑀸, 𑀤𑀺𑀲𑁆𑀯𑀸 𑀧𑀢𑀻𑀢𑀸 𑀲𑀼𑀫𑀦𑀸 𑀉𑀤𑀕𑁆𑀕𑀸’’𑀢𑀺.

𑁧𑁨𑁩𑁮. ‘‘𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀇𑀫𑀜𑁆𑀘 𑀯𑀡𑁆𑀡𑀼𑀁 [𑀯𑀦𑀁 (𑀲𑁆𑀬𑀸.), 𑀯𑀡𑁆𑀡𑀁 (𑀓.)], 𑀯𑁂𑀢𑁆𑀢𑀸𑀘𑀭𑀁 [𑀯𑁂𑀢𑁆𑀢𑀁 𑀧𑀭𑀁 (𑀲𑁆𑀬𑀸.), 𑀯𑁂𑀢𑁆𑀢𑀸𑀘𑀸𑀭𑀁 (𑀓.)] 𑀲𑀗𑁆𑀓𑀼𑀧𑀣𑀜𑁆𑀘 𑀫𑀕𑁆𑀕𑀁;

𑀦𑀤𑀺𑀬𑁄 𑀧𑀦 𑀧𑀩𑁆𑀩𑀢𑀸𑀦𑀜𑁆𑀘 𑀤𑀼𑀕𑁆𑀕𑀸, 𑀧𑀼𑀣𑀼𑀤𑁆𑀤𑀺𑀲𑀸 𑀕𑀘𑁆𑀙𑀣 𑀪𑁄𑀕𑀳𑁂𑀢𑀼.

𑁧𑁨𑁩𑁯. ‘‘𑀧𑀓𑁆𑀔𑀦𑁆𑀤𑀺𑀬𑀸𑀦 𑀯𑀺𑀚𑀺𑀢𑀁 𑀧𑀭𑁂𑀲𑀁, 𑀯𑁂𑀭𑀚𑁆𑀚𑀓𑁂 𑀫𑀸𑀦𑀼𑀲𑁂 𑀧𑁂𑀓𑁆𑀔𑀫𑀸𑀦𑀸;

𑀬𑀁 𑀯𑁄 𑀲𑀼𑀢𑀁 𑀯𑀸 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁, 𑀅𑀘𑁆𑀙𑁂𑀭𑀓𑀁 𑀢𑀁 𑀯𑁄 𑀲𑀼𑀡𑁄𑀫 𑀢𑀸𑀢𑀸’’𑀢𑀺.

𑁧𑁨𑁪𑁦. ‘‘𑀇𑀢𑁄𑀧𑀺 𑀅𑀘𑁆𑀙𑁂𑀭𑀢𑀭𑀁 𑀓𑀼𑀫𑀸𑀭, 𑀦 𑀢𑁄 𑀲𑀼𑀢𑀁 𑀯𑀸 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁;

𑀅𑀢𑀻𑀢𑀫𑀸𑀦𑀼𑀲𑁆𑀲𑀓𑀫𑁂𑀯 𑀲𑀩𑁆𑀩𑀁, 𑀤𑀺𑀲𑁆𑀯𑀸𑀦 𑀢𑀧𑁆𑀧𑀸𑀫 𑀅𑀦𑁄𑀫𑀯𑀡𑁆𑀡𑀁.

𑁧𑁨𑁪𑁧. ‘‘𑀯𑁂𑀳𑀸𑀬𑀲𑀁 𑀧𑁄𑀓𑁆𑀔𑀭𑀜𑁆𑀜𑁄 𑀲𑀯𑀦𑁆𑀢𑀺, 𑀧𑀳𑀽𑀢𑀫𑀮𑁆𑀬𑀸 [𑀧𑀳𑀽𑀢𑀫𑀸𑀮𑁆𑀬𑀸 (𑀲𑁆𑀬𑀸.)] 𑀩𑀳𑀼𑀧𑀼𑀡𑁆𑀟𑀭𑀻𑀓𑀸;

𑀤𑀼𑀫𑀸 𑀘𑀺𑀫𑁂 [𑀤𑀼𑀫𑀸 𑀘 𑀢𑁂 (𑀲𑁆𑀬𑀸. 𑀓.)] 𑀦𑀺𑀘𑁆𑀘𑀨𑀮𑀽𑀧𑀧𑀦𑁆𑀦𑀸, 𑀅𑀢𑀻𑀯 𑀕𑀦𑁆𑀥𑀸 𑀲𑀼𑀭𑀪𑀺𑀁 𑀧𑀯𑀸𑀬𑀦𑁆𑀢𑀺.

𑁧𑁨𑁪𑁨. ‘‘𑀯𑁂𑀴𑀽𑀭𑀺𑀬𑀣𑀫𑁆𑀪𑀸 𑀲𑀢𑀫𑀼𑀲𑁆𑀲𑀺𑀢𑀸𑀲𑁂, 𑀲𑀺𑀮𑀸𑀧𑀯𑀸𑀴𑀲𑁆𑀲 𑀘 𑀆𑀬𑀢𑀁𑀲𑀸;

𑀫𑀲𑀸𑀭𑀕𑀮𑁆𑀮𑀸 𑀲𑀳𑀮𑁄𑀳𑀺𑀢𑀗𑁆𑀕𑀸, 𑀣𑀫𑁆𑀪𑀸 𑀇𑀫𑁂 𑀚𑁄𑀢𑀺𑀭𑀲𑀸𑀫𑀬𑀸𑀲𑁂.

𑁧𑁨𑁪𑁩. ‘‘𑀲𑀳𑀲𑁆𑀲𑀣𑀫𑁆𑀪𑀁 𑀅𑀢𑀼𑀮𑀸𑀦𑀼𑀪𑀸𑀯𑀁, 𑀢𑁂𑀲𑀽𑀧𑀭𑀺 𑀲𑀸𑀥𑀼𑀫𑀺𑀤𑀁 𑀯𑀺𑀫𑀸𑀦𑀁;

𑀭𑀢𑀦𑀦𑁆𑀢𑀭𑀁 𑀓𑀜𑁆𑀘𑀦𑀯𑁂𑀤𑀺𑀫𑀺𑀲𑁆𑀲𑀁, 𑀢𑀧𑀦𑀻𑀬𑀧𑀝𑁆𑀝𑁂𑀳𑀺 𑀘 𑀲𑀸𑀥𑀼𑀙𑀦𑁆𑀦𑀁.

𑁧𑁨𑁪𑁪. ‘‘𑀚𑀫𑁆𑀩𑁄𑀦𑀤𑀼𑀢𑁆𑀢𑀢𑁆𑀢𑀫𑀺𑀤𑀁 𑀲𑀼𑀫𑀝𑁆𑀞𑁄, 𑀧𑀸𑀲𑀸𑀤𑀲𑁄𑀧𑀸𑀡𑀨𑀮𑀽𑀧𑀧𑀦𑁆𑀦𑁄;

𑀤𑀴𑁆𑀳𑁄 𑀘 𑀯𑀕𑁆𑀕𑀼 𑀘 𑀲𑀼𑀲𑀗𑁆𑀕𑀢𑁄 𑀘 [𑀯𑀕𑁆𑀕𑀼 𑀲𑀼𑀫𑀼𑀔𑁄 𑀲𑀼𑀲𑀗𑁆𑀕𑀢𑁄 (𑀲𑀻.)], 𑀅𑀢𑀻𑀯 𑀦𑀺𑀚𑁆𑀛𑀸𑀦𑀔𑀫𑁄 𑀫𑀦𑀼𑀜𑁆𑀜𑁄.

𑁧𑁨𑁪𑁫. ‘‘𑀭𑀢𑀦𑀦𑁆𑀢𑀭𑀲𑁆𑀫𑀺𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀧𑀭𑀺𑀯𑀸𑀭𑀺𑀢𑁄 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦;

𑀫𑀼𑀭𑀚𑀆𑀮𑀫𑁆𑀩𑀭𑀢𑀽𑀭𑀺𑀬𑀖𑀼𑀝𑁆𑀞𑁄, 𑀅𑀪𑀺𑀯𑀦𑁆𑀤𑀺𑀢𑁄𑀲𑀺 𑀣𑀼𑀢𑀺𑀯𑀦𑁆𑀤𑀦𑀸𑀬.

𑁧𑁨𑁪𑁬. ‘‘𑀲𑁄 𑀫𑁄𑀤𑀲𑀺 𑀦𑀸𑀭𑀺𑀕𑀡𑀧𑁆𑀧𑀩𑁄𑀥𑀦𑁄, 𑀯𑀺𑀫𑀸𑀦𑀧𑀸𑀲𑀸𑀤𑀯𑀭𑁂 𑀫𑀦𑁄𑀭𑀫𑁂;

𑀅𑀘𑀺𑀦𑁆𑀢𑀺𑀬𑁄 𑀲𑀩𑁆𑀩𑀕𑀼𑀡𑀽𑀧𑀧𑀦𑁆𑀦𑁄, 𑀭𑀸𑀚𑀸 𑀬𑀣𑀸 𑀯𑁂𑀲𑁆𑀲𑀯𑀡𑁄 𑀦𑀴𑀺𑀦𑁆𑀬𑀸 [𑀦𑀴𑀺𑀜𑁆𑀜𑀁 (𑀓.)].

𑁧𑁨𑁪𑁭. ‘‘𑀤𑁂𑀯𑁄 𑀦𑀼 𑀆𑀲𑀺 𑀉𑀤𑀯𑀸𑀲𑀺 𑀬𑀓𑁆𑀔𑁄, 𑀉𑀤𑀸𑀳𑀼 𑀤𑁂𑀯𑀺𑀦𑁆𑀤𑁄 𑀫𑀦𑀼𑀲𑁆𑀲𑀪𑀽𑀢𑁄;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸, 𑀆𑀘𑀺𑀓𑁆𑀔 𑀓𑁄 𑀦𑀸𑀫 𑀢𑀼𑀯𑀁𑀲𑀺 𑀬𑀓𑁆𑀔𑁄’’𑀢𑀺.

𑁧𑁨𑁪𑁮. ‘‘𑀲𑁂𑀭𑀻𑀲𑀓𑁄 [𑀲𑁂𑀭𑀺𑀲𑁆𑀲𑀓𑁄 (𑀲𑀻. 𑀲𑁆𑀬𑀸.)] 𑀦𑀸𑀫 𑀅𑀳𑀫𑁆𑀳𑀺 𑀬𑀓𑁆𑀔𑁄, 𑀓𑀦𑁆𑀢𑀸𑀭𑀺𑀬𑁄 𑀯𑀡𑁆𑀡𑀼𑀧𑀣𑀫𑁆𑀳𑀺 𑀕𑀼𑀢𑁆𑀢𑁄;

𑀇𑀫𑀁 𑀧𑀤𑁂𑀲𑀁 𑀅𑀪𑀺𑀧𑀸𑀮𑀬𑀸𑀫𑀺, 𑀯𑀘𑀦𑀓𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀭𑀜𑁆𑀜𑁄’’𑀢𑀺.

𑁧𑁨𑁪𑁯. ‘‘𑀅𑀥𑀺𑀘𑁆𑀘𑀮𑀤𑁆𑀥𑀁 𑀧𑀭𑀺𑀡𑀸𑀫𑀚𑀁 𑀢𑁂, 𑀲𑀬𑀁 𑀓𑀢𑀁 𑀉𑀤𑀸𑀳𑀼 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀫𑀦𑀼𑀜𑁆𑀜’’𑀦𑁆𑀢𑀺.

𑁧𑁨𑁫𑁦. ‘‘𑀦𑀸𑀥𑀺𑀘𑁆𑀘𑀮𑀤𑁆𑀥𑀁 𑀦 𑀧𑀭𑀺𑀡𑀸𑀫𑀚𑀁 𑀫𑁂, 𑀦 𑀲𑀬𑀁 𑀓𑀢𑀁 𑀦 𑀳𑀺 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;

𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀫𑀦𑀼𑀜𑁆𑀜’’𑀦𑁆𑀢𑀺.

𑁧𑁨𑁫𑁧. ‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀧𑀼𑀘𑁆𑀙𑀦𑁆𑀢𑀺 𑀢𑀁 𑀯𑀸𑀡𑀺𑀚𑀸 𑀲𑀢𑁆𑀣𑀯𑀸𑀳𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺.

𑁧𑁨𑁫𑁨. ‘‘𑀫𑀫𑀁 𑀧𑀸𑀬𑀸𑀲𑀻𑀢𑀺 𑀅𑀳𑀼 𑀲𑀫𑀜𑁆𑀜𑀸, 𑀭𑀚𑁆𑀚𑀁 𑀬𑀤𑀸 𑀓𑀸𑀭𑀬𑀺𑀁 𑀓𑁄𑀲𑀮𑀸𑀦𑀁;

𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀓𑀤𑀭𑀺𑀬𑁄 𑀧𑀸𑀧𑀥𑀫𑁆𑀫𑁄, 𑀉𑀘𑁆𑀙𑁂𑀤𑀯𑀸𑀤𑀻 𑀘 𑀢𑀤𑀸 𑀅𑀳𑁄𑀲𑀺𑀁.

𑁧𑁨𑁫𑁩. ‘‘𑀲𑀫𑀡𑁄 𑀘 𑀔𑁄 𑀆𑀲𑀺 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀉𑀴𑀸𑀭𑁄;

𑀲𑁄 𑀫𑁂 𑀢𑀤𑀸 𑀥𑀫𑁆𑀫𑀓𑀣𑀁 𑀅𑀪𑀸𑀲𑀺 [𑀅𑀓𑀸𑀲𑀺 (𑀲𑀻.)], 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀯𑀺𑀦𑁄𑀤𑀬𑀻 𑀫𑁂.

𑁧𑁨𑁫𑁪. ‘‘𑀢𑀸𑀳𑀁 𑀢𑀲𑁆𑀲 [𑀢𑀸𑀳𑀁 (𑀓.)] 𑀥𑀫𑁆𑀫𑀓𑀣𑀁 𑀲𑀼𑀡𑀺𑀢𑁆𑀯𑀸, 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑀬𑀺𑀲𑁆𑀲𑀁;

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀅𑀳𑁄𑀲𑀺𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀺𑀲𑁆𑀲𑀁;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀅𑀪𑀸𑀡𑀺𑀁, 𑀲𑀓𑁂𑀦 𑀤𑀸𑀭𑁂𑀦 𑀘 𑀅𑀳𑁄𑀲𑀺 𑀢𑀼𑀝𑁆𑀞𑁄.

𑁧𑁨𑁫𑁫. ‘‘𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀢𑁂𑀳𑁂𑀯 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺.

𑁧𑁨𑁫𑁬. ‘‘𑀲𑀘𑁆𑀘𑀁 𑀓𑀺𑀭𑀸𑀳𑀁𑀲𑀼 𑀦𑀭𑀸 𑀲𑀧𑀜𑁆𑀜𑀸, 𑀅𑀦𑀜𑁆𑀜𑀣𑀸 𑀯𑀘𑀦𑀁 𑀧𑀡𑁆𑀟𑀺𑀢𑀸𑀦𑀁;

𑀬𑀳𑀺𑀁 𑀬𑀳𑀺𑀁 𑀕𑀘𑁆𑀙𑀢𑀺 𑀧𑀼𑀜𑁆𑀜𑀓𑀫𑁆𑀫𑁄, 𑀢𑀳𑀺𑀁 𑀢𑀳𑀺𑀁 𑀫𑁄𑀤𑀢𑀺 𑀓𑀸𑀫𑀓𑀸𑀫𑀻.

𑁧𑁨𑁫𑁭. ‘‘𑀬𑀳𑀺𑀁 𑀬𑀳𑀺𑀁 𑀲𑁄𑀓𑀧𑀭𑀺𑀤𑁆𑀤𑀯𑁄 𑀘, 𑀯𑀥𑁄 𑀘 𑀩𑀦𑁆𑀥𑁄 𑀘 𑀧𑀭𑀺𑀓𑁆𑀓𑀺𑀮𑁂𑀲𑁄;

𑀢𑀳𑀺𑀁 𑀢𑀳𑀺𑀁 𑀕𑀘𑁆𑀙𑀢𑀺 𑀧𑀸𑀧𑀓𑀫𑁆𑀫𑁄, 𑀦 𑀫𑀼𑀘𑁆𑀘𑀢𑀺 𑀤𑀼𑀕𑁆𑀕𑀢𑀺𑀬𑀸 𑀓𑀤𑀸𑀘𑀻’’𑀢𑀺.

𑁧𑁨𑁫𑁮. ‘‘𑀲𑀫𑁆𑀫𑀽𑀴𑁆𑀳𑀭𑀽𑀧𑁄𑀯 𑀚𑀦𑁄 𑀅𑀳𑁄𑀲𑀺, 𑀅𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑁂 𑀓𑀮𑀮𑀻𑀓𑀢𑁄𑀯;

𑀚𑀦𑀲𑁆𑀲𑀺𑀫𑀲𑁆𑀲 𑀢𑀼𑀬𑁆𑀳𑀜𑁆𑀘 𑀓𑀼𑀫𑀸𑀭, 𑀅𑀧𑁆𑀧𑀘𑁆𑀘𑀬𑁄 𑀓𑁂𑀦 𑀦𑀼 𑀔𑁄 𑀅𑀳𑁄𑀲𑀻’’𑀢𑀺.

𑁧𑁨𑁫𑁯. ‘‘𑀇𑀫𑁂 𑀘 𑀲𑀺𑀭𑀻𑀲𑀯𑀦𑀸 [𑀇𑀫𑁂 𑀲𑀺𑀭𑀻𑀲𑀽𑀧𑀯𑀦𑀸 𑀘 (𑀲𑀻.), 𑀇𑀫𑁂𑀧𑀺 𑀲𑀺𑀭𑀻𑀲𑀯𑀦𑀸 𑀘 (𑀧𑀻. 𑀓.)] 𑀢𑀸𑀢𑀸, 𑀤𑀺𑀩𑁆𑀩𑀸 [𑀤𑀺𑀩𑁆𑀩𑀸 𑀘 (𑀧𑀻. 𑀓.)] 𑀕𑀦𑁆𑀥𑀸 𑀲𑀼𑀭𑀪𑀻 [𑀲𑀼𑀭𑀪𑀺𑀁 (𑀲𑀻. 𑀓.)] 𑀲𑀫𑁆𑀧𑀯𑀦𑁆𑀢𑀺 [𑀲𑀫𑁆𑀧𑀯𑀸𑀬𑀦𑁆𑀢𑀺 (𑀓.)];

𑀢𑁂 𑀲𑀫𑁆𑀧𑀯𑀸𑀬𑀦𑁆𑀢𑀺 𑀇𑀫𑀁 𑀯𑀺𑀫𑀸𑀦𑀁, 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀢𑀫𑀁 𑀦𑀺𑀳𑀦𑁆𑀢𑁆𑀯𑀸.

𑁧𑁨𑁬𑁦. ‘‘𑀇𑀫𑁂𑀲𑀜𑁆𑀘 𑀔𑁄 𑀯𑀲𑁆𑀲𑀲𑀢𑀘𑁆𑀘𑀬𑁂𑀦, 𑀲𑀺𑀧𑀸𑀝𑀺𑀓𑀸 𑀨𑀮𑀢𑀺 𑀏𑀓𑀫𑁂𑀓𑀸;

𑀫𑀸𑀦𑀼𑀲𑁆𑀲𑀓𑀁 𑀯𑀲𑁆𑀲𑀲𑀢𑀁 𑀅𑀢𑀻𑀢𑀁, 𑀬𑀤𑀕𑁆𑀕𑁂 𑀓𑀸𑀬𑀫𑁆𑀳𑀺 𑀇𑀥𑀽𑀧𑀧𑀦𑁆𑀦𑁄.

𑁧𑁨𑁬𑁧. ‘‘𑀤𑀺𑀲𑁆𑀯𑀸𑀦𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘, 𑀅𑀲𑁆𑀫𑀺𑀁 𑀯𑀺𑀫𑀸𑀦𑁂 𑀞𑀢𑁆𑀯𑀸𑀦 𑀢𑀸𑀢𑀸;

𑀆𑀬𑀼𑀓𑁆𑀔𑀬𑀸 𑀧𑀼𑀜𑁆𑀜𑀓𑁆𑀔𑀬𑀸 𑀘𑀯𑀺𑀲𑁆𑀲𑀁, 𑀢𑁂𑀦𑁂𑀯 𑀲𑁄𑀓𑁂𑀦 𑀧𑀫𑀼𑀘𑁆𑀙𑀺𑀢𑁄𑀲𑁆𑀫𑀻’’𑀢𑀺 [𑀲𑀫𑀼𑀘𑁆𑀙𑀺𑀢𑁄𑀲𑁆𑀫𑀻𑀢𑀺 (𑀧𑀻. 𑀓.)].

𑁧𑁨𑁬𑁨. ‘‘𑀓𑀣𑀁 𑀦𑀼 𑀲𑁄𑀘𑁂𑀬𑁆𑀬 𑀢𑀣𑀸𑀯𑀺𑀥𑁄 𑀲𑁄, 𑀮𑀤𑁆𑀥𑀸 𑀯𑀺𑀫𑀸𑀦𑀁 𑀅𑀢𑀼𑀮𑀁 𑀘𑀺𑀭𑀸𑀬;

𑀬𑁂 𑀘𑀸𑀧𑀺 𑀔𑁄 𑀇𑀢𑁆𑀢𑀭𑀫𑀼𑀧𑀧𑀦𑁆𑀦𑀸, 𑀢𑁂 𑀦𑀽𑀦 𑀲𑁄𑀘𑁂𑀬𑁆𑀬𑀼𑀁 𑀧𑀭𑀺𑀢𑁆𑀢𑀧𑀼𑀜𑁆𑀜𑀸’’𑀢𑀺.

𑁧𑁨𑁬𑁩. ‘‘𑀅𑀦𑀼𑀘𑁆𑀙𑀯𑀺𑀁 𑀑𑀯𑀤𑀺𑀬𑀜𑁆𑀘 𑀫𑁂 𑀢𑀁, 𑀬𑀁 𑀫𑀁 𑀢𑀼𑀫𑁆𑀳𑁂 𑀧𑁂𑀬𑁆𑀬𑀯𑀸𑀘𑀁 𑀯𑀤𑁂𑀣;

𑀢𑀼𑀫𑁆𑀳𑁂 𑀘 𑀔𑁄 𑀢𑀸𑀢𑀸 𑀫𑀬𑀸𑀦𑀼𑀕𑀼𑀢𑁆𑀢𑀸, 𑀬𑁂𑀦𑀺𑀘𑁆𑀙𑀓𑀁 𑀢𑁂𑀦 𑀧𑀮𑁂𑀣 𑀲𑁄𑀢𑁆𑀣𑀺’’𑀦𑁆𑀢𑀺.

𑁧𑁨𑁬𑁪. ‘‘𑀕𑀦𑁆𑀢𑁆𑀯𑀸 𑀫𑀬𑀁 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀁, 𑀥𑀦𑀢𑁆𑀣𑀺𑀓𑀸 𑀉𑀤𑁆𑀤𑀬𑀁 𑀧𑀢𑁆𑀣𑀬𑀸𑀦𑀸;

𑀬𑀣𑀸𑀧𑀬𑁄𑀕𑀸 𑀧𑀭𑀺𑀧𑀼𑀡𑁆𑀡𑀘𑀸𑀕𑀸, 𑀓𑀸𑀳𑀸𑀫 𑀲𑁂𑀭𑀻𑀲𑀫𑀳𑀁 𑀉𑀴𑀸𑀭’’𑀦𑁆𑀢𑀺.

𑁧𑁨𑁬𑁫. ‘‘𑀫𑀸 𑀘𑁂𑀯 𑀲𑁂𑀭𑀻𑀲𑀫𑀳𑀁 𑀅𑀓𑀢𑁆𑀣, 𑀲𑀩𑁆𑀩𑀜𑁆𑀘 𑀯𑁄 𑀪𑀯𑀺𑀲𑁆𑀲𑀢𑀺 𑀬𑀁 𑀯𑀤𑁂𑀣;

𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀯𑀺𑀯𑀚𑁆𑀚𑀬𑀸𑀣, 𑀥𑀫𑁆𑀫𑀸𑀦𑀼𑀬𑁄𑀕𑀜𑁆𑀘 𑀅𑀥𑀺𑀝𑁆𑀞𑀳𑀸𑀣.

𑁧𑁨𑁬𑁬. ‘‘𑀉𑀧𑀸𑀲𑀓𑁄 𑀅𑀢𑁆𑀣𑀺 𑀇𑀫𑀫𑁆𑀳𑀺 𑀲𑀗𑁆𑀖𑁂, 𑀩𑀳𑀼𑀲𑁆𑀲𑀼𑀢𑁄 𑀲𑀻𑀮𑀯𑀢𑀽𑀧𑀧𑀦𑁆𑀦𑁄;

𑀲𑀤𑁆𑀥𑁄 𑀘 𑀘𑀸𑀕𑀻 𑀘 𑀲𑀼𑀧𑁂𑀲𑀮𑁄 𑀘, 𑀯𑀺𑀘𑀓𑁆𑀔𑀡𑁄 𑀲𑀦𑁆𑀢𑀼𑀲𑀺𑀢𑁄 𑀫𑀼𑀢𑀻𑀫𑀸.

𑁧𑁨𑁬𑁭. ‘‘𑀲𑀜𑁆𑀚𑀸𑀦𑀫𑀸𑀦𑁄 𑀦 𑀫𑀼𑀲𑀸 𑀪𑀡𑁂𑀬𑁆𑀬, 𑀧𑀭𑀽𑀧𑀖𑀸𑀢𑀸𑀬 𑀦 𑀘𑁂𑀢𑀬𑁂𑀬𑁆𑀬;

𑀯𑁂𑀪𑀽𑀢𑀺𑀓𑀁 𑀧𑁂𑀲𑀼𑀡𑀁 𑀦𑁄 𑀓𑀭𑁂𑀬𑁆𑀬, 𑀲𑀡𑁆𑀳𑀜𑁆𑀘 𑀯𑀸𑀘𑀁 𑀲𑀔𑀺𑀮𑀁 𑀪𑀡𑁂𑀬𑁆𑀬.

𑁧𑁨𑁬𑁮. ‘‘𑀲𑀕𑀸𑀭𑀯𑁄 𑀲𑀧𑁆𑀧𑀝𑀺𑀲𑁆𑀲𑁄 𑀯𑀺𑀦𑀻𑀢𑁄, 𑀅𑀧𑀸𑀧𑀓𑁄 𑀅𑀥𑀺𑀲𑀻𑀮𑁂 𑀯𑀺𑀲𑀼𑀤𑁆𑀥𑁄;

𑀲𑁄 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺 𑀚𑀦𑁆𑀢𑀼, 𑀥𑀫𑁆𑀫𑁂𑀦 𑀧𑁄𑀲𑁂𑀢𑀺 𑀅𑀭𑀺𑀬𑀯𑀼𑀢𑁆𑀢𑀺.

𑁧𑁨𑁬𑁯. ‘‘𑀫𑀜𑁆𑀜𑁂 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀭𑀡𑀸, 𑀪𑁄𑀕𑀸𑀦𑀺 𑀧𑀭𑀺𑀬𑁂𑀲𑀢𑀺 𑀦 𑀅𑀢𑁆𑀢𑀳𑁂𑀢𑀼;

𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀬𑁄 [𑀲𑁄 (?)] 𑀅𑀘𑁆𑀘𑀬𑁂𑀦, 𑀦𑁂𑀓𑁆𑀔𑀫𑁆𑀫𑀧𑁄𑀡𑁄 𑀘𑀭𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁.

𑁧𑁨𑁭𑁦. ‘‘𑀉𑀚𑀽 𑀅𑀯𑀗𑁆𑀓𑁄 𑀅𑀲𑀞𑁄 𑀅𑀫𑀸𑀬𑁄, 𑀦 𑀮𑁂𑀲𑀓𑀧𑁆𑀧𑁂𑀦 𑀘 𑀯𑁄𑀳𑀭𑁂𑀬𑁆𑀬;

𑀲𑁄 𑀢𑀸𑀤𑀺𑀲𑁄 𑀲𑀼𑀓𑀢𑀓𑀫𑁆𑀫𑀓𑀸𑀭𑀻, 𑀥𑀫𑁆𑀫𑁂 𑀞𑀺𑀢𑁄 𑀓𑀺𑀦𑁆𑀢𑀺 𑀮𑀪𑁂𑀣 𑀤𑀼𑀓𑁆𑀔𑀁.

𑁧𑁨𑁭𑁧. ‘‘𑀢𑀁 𑀓𑀸𑀭𑀡𑀸 𑀧𑀸𑀢𑀼𑀓𑀢𑁄𑀫𑁆𑀳𑀺 𑀅𑀢𑁆𑀢𑀦𑀸, 𑀢𑀲𑁆𑀫𑀸 𑀥𑀫𑁆𑀫𑀁 𑀧𑀲𑁆𑀲𑀣 𑀯𑀸𑀡𑀺𑀚𑀸𑀲𑁂;

𑀅𑀜𑁆𑀜𑀢𑁆𑀭 𑀢𑁂𑀦𑀺𑀳 𑀪𑀲𑁆𑀫𑀻 [𑀪𑀲𑁆𑀫𑀺 (𑀲𑁆𑀬𑀸.), 𑀪𑀲𑁆𑀫 (𑀓.)] 𑀪𑀯𑁂𑀣, 𑀅𑀦𑁆𑀥𑀸𑀓𑀼𑀮𑀸 𑀯𑀺𑀧𑁆𑀧𑀦𑀝𑁆𑀞𑀸 𑀅𑀭𑀜𑁆𑀜𑁂;

𑀢𑀁 𑀔𑀺𑀧𑁆𑀧𑀫𑀸𑀦𑁂𑀦 𑀮𑀳𑀼𑀁 𑀧𑀭𑁂𑀦, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄’’𑀢𑀺.

𑁧𑁨𑁭𑁨. ‘‘𑀓𑀺𑀁 𑀦𑀸𑀫 𑀲𑁄 𑀓𑀺𑀜𑁆𑀘 𑀓𑀭𑁄𑀢𑀺 𑀓𑀫𑁆𑀫𑀁,

𑀓𑀺𑀁 𑀦𑀸𑀫𑀥𑁂𑀬𑁆𑀬𑀁 𑀓𑀺𑀁 𑀧𑀦 𑀢𑀲𑁆𑀲 𑀕𑁄𑀢𑁆𑀢𑀁;

𑀫𑀬𑀫𑁆𑀧𑀺 𑀦𑀁 𑀤𑀝𑁆𑀞𑀼𑀓𑀸𑀫𑀫𑁆𑀳 𑀬𑀓𑁆𑀔, 𑀬𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀇𑀥𑀸𑀕𑀢𑁄𑀲𑀺;

𑀮𑀸𑀪𑀸 𑀳𑀺 𑀢𑀲𑁆𑀲, 𑀬𑀲𑁆𑀲 𑀢𑀼𑀯𑀁 𑀧𑀺𑀳𑁂𑀲𑀻’’𑀢𑀺.

𑁧𑁨𑁭𑁩. ‘‘𑀬𑁄 𑀓𑀧𑁆𑀧𑀓𑁄 𑀲𑀫𑁆𑀪𑀯𑀦𑀸𑀫𑀥𑁂𑀬𑁆𑀬𑁄,

𑀉𑀧𑀸𑀲𑀓𑁄 𑀓𑁄𑀘𑁆𑀙𑀨𑀮𑀽𑀧𑀚𑀻𑀯𑀻;

𑀚𑀸𑀦𑀸𑀣 𑀦𑀁 𑀢𑀼𑀫𑁆𑀳𑀸𑀓𑀁 𑀧𑁂𑀲𑀺𑀬𑁄 𑀲𑁄,

𑀫𑀸 𑀔𑁄 𑀦𑀁 𑀳𑀻𑀴𑀺𑀢𑁆𑀣 𑀲𑀼𑀧𑁂𑀲𑀮𑁄 𑀲𑁄’’𑀢𑀺.

𑁧𑁨𑁭𑁪. ‘‘𑀚𑀸𑀦𑀸𑀫𑀲𑁂 𑀬𑀁 𑀢𑁆𑀯𑀁 𑀧𑀯𑀤𑁂𑀲𑀺 [𑀯𑀤𑁂𑀲𑀺 (𑀲𑀻.)] 𑀬𑀓𑁆𑀔,

𑀦 𑀔𑁄 𑀦𑀁 𑀚𑀸𑀦𑀸𑀫 𑀲 𑀏𑀤𑀺𑀲𑁄𑀢𑀺;

𑀫𑀬𑀫𑁆𑀧𑀺 𑀦𑀁 𑀧𑀽𑀚𑀬𑀺𑀲𑁆𑀲𑀸𑀫 𑀬𑀓𑁆𑀔,

𑀲𑀼𑀢𑁆𑀯𑀸𑀦 𑀢𑀼𑀬𑁆𑀳𑀁 𑀯𑀘𑀦𑀁 𑀉𑀴𑀸𑀭’’𑀦𑁆𑀢𑀺.

𑁧𑁨𑁭𑁫. ‘‘𑀬𑁂 𑀓𑁂𑀘𑀺 𑀇𑀫𑀲𑁆𑀫𑀺𑀁 𑀲𑀢𑁆𑀣𑁂 𑀫𑀦𑀼𑀲𑁆𑀲𑀸,

𑀤𑀳𑀭𑀸 𑀫𑀳𑀦𑁆𑀢𑀸 𑀅𑀣𑀯𑀸𑀧𑀺 𑀫𑀚𑁆𑀛𑀺𑀫𑀸;

𑀲𑀩𑁆𑀩𑁂𑀯 𑀢𑁂 𑀆𑀮𑀫𑁆𑀩𑀦𑁆𑀢𑀼 𑀯𑀺𑀫𑀸𑀦𑀁,

𑀧𑀲𑁆𑀲𑀦𑁆𑀢𑀼 𑀧𑀼𑀜𑁆𑀜𑀸𑀦𑀁 𑀨𑀮𑀁 𑀓𑀤𑀭𑀺𑀬𑀸’’𑀢𑀺.

𑁧𑁨𑁭𑁬. 𑀢𑁂 𑀢𑀢𑁆𑀣 𑀲𑀩𑁆𑀩𑁂𑀯 ‘𑀅𑀳𑀁 𑀧𑀼𑀭𑁂’𑀢𑀺,

𑀢𑀁 𑀓𑀧𑁆𑀧𑀓𑀁 𑀢𑀢𑁆𑀣 𑀧𑀼𑀭𑀓𑁆𑀔𑀢𑁆𑀯𑀸 [𑀧𑀼𑀭𑀓𑁆𑀔𑀺𑀧𑀺𑀢𑁆𑀯𑀸 (𑀲𑀻.)];

𑀲𑀩𑁆𑀩𑁂𑀯 𑀢𑁂 𑀆𑀮𑀫𑁆𑀩𑀺𑀁𑀲𑀼 𑀯𑀺𑀫𑀸𑀦𑀁,

𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲.

𑁧𑁨𑁭𑁭. 𑀢𑁂 𑀢𑀢𑁆𑀣 𑀲𑀩𑁆𑀩𑁂𑀯 ‘𑀅𑀳𑀁 𑀧𑀼𑀭𑁂’𑀢𑀺, 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑀬𑀺𑀁𑀲𑀼;

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸 𑀅𑀳𑁂𑀲𑀼𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀺𑀁𑀲𑀼;

𑀅𑀫𑀚𑁆𑀚𑀧𑀸 𑀦𑁄 𑀘 𑀫𑀼𑀲𑀸 𑀪𑀡𑀺𑀁𑀲𑀼, 𑀲𑀓𑁂𑀦 𑀤𑀸𑀭𑁂𑀦 𑀘 𑀅𑀳𑁂𑀲𑀼𑀁 𑀢𑀼𑀝𑁆𑀞𑀸.

𑁧𑁨𑁭𑁮. 𑀢𑁂 𑀢𑀢𑁆𑀣 𑀲𑀩𑁆𑀩𑁂𑀯 ‘𑀅𑀳𑀁 𑀧𑀼𑀭𑁂’𑀢𑀺, 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑀬𑀺𑀢𑁆𑀯𑀸;

𑀧𑀓𑁆𑀓𑀸𑀫𑀺 𑀲𑀢𑁆𑀣𑁄 𑀅𑀦𑀼𑀫𑁄𑀤𑀫𑀸𑀦𑁄, 𑀬𑀓𑁆𑀔𑀺𑀤𑁆𑀥𑀺𑀬𑀸 𑀅𑀦𑀼𑀫𑀢𑁄 𑀧𑀼𑀦𑀧𑁆𑀧𑀼𑀦𑀁.

𑁧𑁨𑁭𑁯. ‘‘𑀕𑀦𑁆𑀢𑁆𑀯𑀸𑀦 𑀢𑁂 𑀲𑀺𑀦𑁆𑀥𑀼𑀲𑁄𑀯𑀻𑀭𑀪𑀽𑀫𑀺𑀁, 𑀥𑀦𑀢𑁆𑀣𑀺𑀓𑀸 𑀉𑀤𑁆𑀤𑀬𑀁 [𑀉𑀤𑀬 (𑀧𑀻. 𑀓.)] 𑀧𑀢𑁆𑀣𑀬𑀸𑀦𑀸;

𑀬𑀣𑀸𑀧𑀬𑁄𑀕𑀸 𑀧𑀭𑀺𑀧𑀼𑀡𑁆𑀡𑀮𑀸𑀪𑀸, 𑀧𑀘𑁆𑀘𑀸𑀕𑀫𑀼𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑀓𑁆𑀔𑀢𑀁.

𑁧𑁨𑁮𑁦. ‘‘𑀕𑀦𑁆𑀢𑁆𑀯𑀸𑀦 𑀢𑁂 𑀲𑀗𑁆𑀖𑀭𑀁 𑀲𑁄𑀢𑁆𑀣𑀺𑀯𑀦𑁆𑀢𑁄,

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀆𑀦𑀦𑁆𑀤𑀻 𑀯𑀺𑀢𑁆𑀢𑀸 [𑀆𑀦𑀦𑁆𑀤𑀘𑀺𑀢𑁆𑀢𑀸 (𑀲𑁆𑀬𑀸.), 𑀆𑀦𑀦𑁆𑀤𑀻𑀘𑀺𑀢𑁆𑀢𑀸 (𑀓.)] 𑀲𑀼𑀫𑀦𑀸 𑀧𑀢𑀻𑀢𑀸,

𑀅𑀓𑀁𑀲𑀼 𑀲𑁂𑀭𑀻𑀲𑀫𑀳𑀁 𑀉𑀴𑀸𑀭𑀁;

𑀲𑁂𑀭𑀻𑀲𑀓𑀁 𑀢𑁂 𑀧𑀭𑀺𑀯𑁂𑀡𑀁 𑀫𑀸𑀧𑀬𑀺𑀁𑀲𑀼.

𑁧𑁨𑁮𑁧. 𑀏𑀢𑀸𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑀸𑀦 𑀲𑁂𑀯𑀦𑀸,

𑀫𑀳𑀢𑁆𑀣𑀺𑀓𑀸 𑀥𑀫𑁆𑀫𑀕𑀼𑀡𑀸𑀦 𑀲𑁂𑀯𑀦𑀸;

𑀏𑀓𑀲𑁆𑀲 𑀅𑀢𑁆𑀣𑀸𑀬 𑀉𑀧𑀸𑀲𑀓𑀲𑁆𑀲,

𑀲𑀩𑁆𑀩𑁂𑀯 𑀲𑀢𑁆𑀢𑀸 𑀲𑀼𑀔𑀺𑀢𑀸 [𑀲𑀼𑀔𑀺𑀦𑁄 (𑀧𑀻. 𑀓.)] 𑀅𑀳𑁂𑀲𑀼𑀦𑁆𑀢𑀺.

𑀲𑁂𑀭𑀻𑀲𑀓𑀯𑀺𑀫𑀸𑀦𑀁 𑀤𑀲𑀫𑀁.