𑁩. 𑀦𑀸𑀕𑀯𑀺𑀫𑀸𑀦𑀯𑀢𑁆𑀣𑀼

𑁭𑁦𑁫. ‘‘𑀅𑀮𑀗𑁆𑀓𑀢𑀸 𑀫𑀡𑀺𑀓𑀜𑁆𑀘𑀦𑀸𑀘𑀺𑀢𑀁, 𑀲𑁄𑀯𑀡𑁆𑀡𑀚𑀸𑀮𑀘𑀺𑀢𑀁 𑀫𑀳𑀦𑁆𑀢𑀁;

𑀅𑀪𑀺𑀭𑀼𑀬𑁆𑀳 𑀕𑀚𑀯𑀭𑀁 𑀲𑀼𑀓𑀧𑁆𑀧𑀺𑀢𑀁, 𑀇𑀥𑀸𑀕𑀫𑀸 𑀯𑁂𑀳𑀸𑀬𑀲𑀁 [𑀯𑁂𑀳𑀸𑀲𑀬𑀁 (𑀲𑀻.)] 𑀅𑀦𑁆𑀢𑀮𑀺𑀓𑁆𑀔𑁂.

𑁭𑁦𑁬. ‘‘𑀦𑀸𑀕𑀲𑁆𑀲 𑀤𑀦𑁆𑀢𑁂𑀲𑀼 𑀤𑀼𑀯𑁂𑀲𑀼 𑀦𑀺𑀫𑁆𑀫𑀺𑀢𑀸, 𑀅𑀘𑁆𑀙𑁄𑀤𑀓𑀸 [𑀅𑀘𑁆𑀙𑁄𑀤𑀺𑀓𑀸 (𑀲𑀻. 𑀓.)] 𑀧𑀤𑀼𑀫𑀺𑀦𑀺𑀬𑁄 𑀲𑀼𑀨𑀼𑀮𑁆𑀮𑀸;

𑀧𑀤𑀼𑀫𑁂𑀲𑀼 𑀘 𑀢𑀼𑀭𑀺𑀬𑀕𑀡𑀸 𑀧𑀪𑀺𑀚𑁆𑀚𑀭𑁂, 𑀇𑀫𑀸 𑀘 𑀦𑀘𑁆𑀘𑀦𑁆𑀢𑀺 𑀫𑀦𑁄𑀳𑀭𑀸𑀬𑁄.

𑁭𑁦𑁭. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁭𑁦𑁮. ‘‘𑀩𑀸𑀭𑀸𑀡𑀲𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀩𑀼𑀤𑁆𑀥𑀲𑁆𑀲𑀳𑀁 𑀯𑀢𑁆𑀣𑀬𑀼𑀕𑀁 𑀅𑀤𑀸𑀲𑀺𑀁;

𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸 [𑀯𑀦𑁆𑀤𑀺𑀢𑁆𑀯 (𑀲𑀻.)] 𑀙𑀫𑀸 𑀦𑀺𑀲𑀻𑀤𑀺𑀁, 𑀯𑀺𑀢𑁆𑀢𑀸 𑀘𑀳𑀁 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺𑀁.

𑁭𑁦𑁯. ‘‘𑀩𑀼𑀤𑁆𑀥𑁄 𑀘 𑀫𑁂 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄, 𑀅𑀤𑁂𑀲𑀬𑀺 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀁;

𑀅𑀲𑀗𑁆𑀔𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀲𑁆𑀲𑀢𑀁, 𑀫𑀕𑁆𑀕𑀁 𑀅𑀤𑁂𑀲𑀬𑀺 [𑀅𑀤𑁂𑀲𑁂𑀲𑀺 (𑀲𑀻.)] 𑀬𑀢𑁄 𑀯𑀺𑀚𑀸𑀦𑀺𑀲𑀁;

𑁭𑁧𑁦. ‘‘𑀅𑀧𑁆𑀧𑀸𑀬𑀼𑀓𑀻 𑀓𑀸𑀮𑀓𑀢𑀸 𑀢𑀢𑁄 𑀘𑀼𑀢𑀸, 𑀉𑀧𑀧𑀦𑁆𑀦𑀸 𑀢𑀺𑀤𑀲𑀕𑀡𑀁 𑀬𑀲𑀲𑁆𑀲𑀺𑀦𑀻;

𑀲𑀓𑁆𑀓𑀲𑁆𑀲𑀳𑀁 𑀅𑀜𑁆𑀜𑀢𑀭𑀸 𑀧𑀚𑀸𑀧𑀢𑀺, 𑀬𑀲𑀼𑀢𑁆𑀢𑀭𑀸 𑀦𑀸𑀫 𑀤𑀺𑀲𑀸𑀲𑀼 𑀯𑀺𑀲𑁆𑀲𑀼𑀢𑀸’’𑀢𑀺.

𑀦𑀸𑀕𑀯𑀺𑀫𑀸𑀦𑀁 𑀢𑀢𑀺𑀬𑀁.