𑁬. 𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀯𑀢𑁆𑀣𑀼

𑁨𑁧𑁭. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁨𑁧𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁨𑁧𑁯. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁨𑁦. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁨𑁨𑁧. ‘‘𑀲𑁄𑀡𑀤𑀺𑀦𑁆𑀦𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀦𑀸𑀴𑀦𑁆𑀤𑀸𑀬𑀁 𑀉𑀧𑀸𑀲𑀺𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸.

𑁨𑁨𑁨. ‘‘𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁨𑁩. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁨𑁨𑁪. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁨𑁨𑁫. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁨𑁨𑁬. ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁨𑁭. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀁 𑀙𑀝𑁆𑀞𑀁.