𑁨. 𑀘𑀺𑀢𑁆𑀢𑀮𑀢𑀸𑀯𑀕𑁆𑀕𑁄

𑁧. 𑀤𑀸𑀲𑀺𑀯𑀺𑀫𑀸𑀦𑀯𑀢𑁆𑀣𑀼

𑁧𑁫𑁭. ‘‘𑀅𑀧𑀺 𑀲𑀓𑁆𑀓𑁄𑀯 𑀤𑁂𑀯𑀺𑀦𑁆𑀤𑁄, 𑀭𑀫𑁆𑀫𑁂 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀲𑀺, 𑀦𑀸𑀭𑀻𑀕𑀡𑀧𑀼𑀭𑀓𑁆𑀔𑀢𑀸;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁫𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁫𑁯. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁬𑁦. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁧. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀤𑀸𑀲𑀻 𑀅𑀳𑁄𑀲𑀺𑀁 𑀧𑀭𑀧𑁂𑀲𑁆𑀲𑀺𑀬𑀸 [𑀧𑀭𑀧𑁂𑀲𑀺𑀬𑀸 (𑀓.)] 𑀓𑀼𑀮𑁂.

𑁧𑁬𑁨. ‘‘𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀢𑀲𑁆𑀲𑀸 𑀫𑁂 𑀦𑀺𑀓𑁆𑀓𑀫𑁄 𑀆𑀲𑀺, 𑀲𑀸𑀲𑀦𑁂 𑀢𑀲𑁆𑀲 𑀢𑀸𑀤𑀺𑀦𑁄.

𑁧𑁬𑁩. ‘‘𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄, 𑀦𑁂𑀯 𑀅𑀢𑁆𑀣𑁂𑀢𑁆𑀣 𑀲𑀡𑁆𑀞𑀦𑀁 [𑀲𑀦𑁆𑀣𑀦𑀁 (𑀲𑀻. 𑀲𑁆𑀬𑀸. 𑀧𑀻.)];

𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀕𑁆𑀕𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄.

𑁧𑁬𑁪. ‘‘𑀅𑀓𑀡𑁆𑀝𑀓𑁄 𑀅𑀕𑀳𑀦𑁄, 𑀉𑀚𑀼 𑀲𑀩𑁆𑀪𑀺 𑀧𑀯𑁂𑀤𑀺𑀢𑁄;

𑀦𑀺𑀓𑁆𑀓𑀫𑀲𑁆𑀲 𑀨𑀮𑀁 𑀧𑀲𑁆𑀲, 𑀬𑀣𑀺𑀤𑀁 𑀧𑀸𑀧𑀼𑀡𑀺𑀢𑁆𑀣𑀺𑀓𑀸.

𑁧𑁬𑁫. ‘‘𑀆𑀫𑀦𑁆𑀢𑀦𑀺𑀓𑀸 𑀭𑀜𑁆𑀜𑁄𑀫𑁆𑀳𑀺, 𑀲𑀓𑁆𑀓𑀲𑁆𑀲 𑀯𑀲𑀯𑀢𑁆𑀢𑀺𑀦𑁄;

𑀲𑀝𑁆𑀞𑀺 𑀢𑀼𑀭𑀺𑀬 [𑀢𑀼𑀭𑀺𑀬 (𑀲𑀻. 𑀲𑁆𑀬𑀸. 𑀧𑀻.)] 𑀲𑀳𑀲𑁆𑀲𑀸𑀦𑀺, 𑀧𑀝𑀺𑀩𑁄𑀥𑀁 𑀓𑀭𑁄𑀦𑁆𑀢𑀺 𑀫𑁂.

𑁧𑁬𑁬. ‘‘𑀆𑀮𑀫𑁆𑀩𑁄 𑀕𑀕𑁆𑀕𑀭𑁄 [𑀕𑀕𑁆𑀕𑀫𑁄 (𑀲𑁆𑀬𑀸.), 𑀪𑀕𑁆𑀕𑀭𑁄 (𑀓.)] 𑀪𑀻𑀫𑁄 [𑀪𑀺𑀫𑁆𑀫𑁄 (𑀓.)], 𑀲𑀸𑀥𑀼𑀯𑀸𑀤𑀻 𑀘 𑀲𑀁𑀲𑀬𑁄;

𑀧𑁄𑀓𑁆𑀔𑀭𑁄 𑀘 𑀲𑀼𑀨𑀲𑁆𑀲𑁄 𑀘, 𑀯𑀺𑀡𑀸𑀫𑁄𑀓𑁆𑀔𑀸 [𑀯𑀺𑀮𑀸𑀫𑁄𑀓𑁆𑀔𑀸 (𑀓.)] 𑀘 𑀦𑀸𑀭𑀺𑀬𑁄.

𑁧𑁬𑁭. ‘‘𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀲𑁄𑀡𑀤𑀺𑀦𑁆𑀦𑀸 𑀲𑀼𑀘𑀺𑀫𑁆𑀳𑀺𑀢𑀸 [𑀲𑀼𑀘𑀺𑀫𑁆𑀪𑀺𑀓𑀸 (𑀲𑁆𑀬𑀸.)];

𑀅𑀮𑀫𑁆𑀩𑀼𑀲𑀸 𑀫𑀺𑀲𑁆𑀲𑀓𑁂𑀲𑀻 𑀘, 𑀧𑀼𑀡𑁆𑀟𑀭𑀻𑀓𑀸𑀢𑀺 𑀤𑀸𑀭𑀼𑀡𑀻.

𑁧𑁬𑁮. ‘‘𑀏𑀡𑀻𑀨𑀲𑁆𑀲𑀸 𑀲𑀼𑀨𑀲𑁆𑀲𑀸 𑀘, 𑀲𑀼𑀪𑀤𑁆𑀤𑀸 𑀫𑀼𑀤𑀼𑀯𑀸𑀤𑀺𑀦𑀻;

𑀏𑀢𑀸 𑀘𑀜𑁆𑀜𑀸 𑀘 𑀲𑁂𑀬𑁆𑀬𑀸𑀲𑁂, 𑀅𑀘𑁆𑀙𑀭𑀸𑀦𑀁 𑀧𑀩𑁄𑀥𑀺𑀓𑀸.

𑁧𑁬𑁯. ‘‘𑀢𑀸 𑀫𑀁 𑀓𑀸𑀮𑁂𑀦𑀼𑀧𑀸𑀕𑀦𑁆𑀢𑁆𑀯𑀸, 𑀅𑀪𑀺𑀪𑀸𑀲𑀦𑁆𑀢𑀺 𑀤𑁂𑀯𑀢𑀸;

𑀳𑀦𑁆𑀤 𑀦𑀘𑁆𑀘𑀸𑀫 𑀕𑀸𑀬𑀸𑀫, 𑀳𑀦𑁆𑀤 𑀢𑀁 𑀭𑀫𑀬𑀸𑀫𑀲𑁂.

𑁧𑁭𑁦. ‘‘𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀓𑀢𑀧𑀼𑀜𑁆𑀜𑀸𑀦𑀫𑁂𑀯𑀺𑀤𑀁;

𑀅𑀲𑁄𑀓𑀁 𑀦𑀦𑁆𑀤𑀦𑀁 𑀭𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀁.

𑁧𑁭𑁧. ‘‘𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀦𑀢𑁆𑀣𑀺 𑀧𑀭𑀢𑁆𑀣 𑀘;

𑀲𑀼𑀔𑀜𑁆𑀘 𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀘𑁂𑀯 𑀧𑀭𑀢𑁆𑀣 𑀘.

𑁧𑁭𑁨. ‘‘𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁;

𑀓𑀢𑀧𑀼𑀜𑁆𑀜𑀸 𑀳𑀺 𑀫𑁄𑀤𑀦𑁆𑀢𑀺, 𑀲𑀕𑁆𑀕𑁂 𑀪𑁄𑀕𑀲𑀫𑀗𑁆𑀕𑀺𑀦𑁄’’𑀢𑀺.

𑀤𑀸𑀲𑀺𑀯𑀺𑀫𑀸𑀦𑀁 𑀧𑀞𑀫𑀁.

𑁨. 𑀮𑀔𑀼𑀫𑀸𑀯𑀺𑀫𑀸𑀦𑀯𑀢𑁆𑀣𑀼

𑁧𑁭𑁩. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁭𑁪. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁭𑁫. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁭𑁬. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁭𑁭. ‘‘𑀓𑁂𑀯𑀝𑁆𑀝𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀅𑀳𑀼 𑀫𑀬𑁆𑀳𑀁 𑀦𑀺𑀯𑁂𑀲𑀦𑀁;

𑀢𑀢𑁆𑀣 𑀲𑀜𑁆𑀘𑀭𑀫𑀸𑀦𑀸𑀦𑀁, 𑀲𑀸𑀯𑀓𑀸𑀦𑀁 𑀫𑀳𑁂𑀲𑀺𑀦𑀁.

𑁧𑁭𑁮. ‘‘𑀑𑀤𑀦𑀁 𑀓𑀼𑀫𑁆𑀫𑀸𑀲𑀁 [𑀲𑀸𑀓𑀁 (𑀲𑀻.)] 𑀟𑀸𑀓𑀁, 𑀮𑁄𑀡𑀲𑁄𑀯𑀻𑀭𑀓𑀜𑁆𑀘𑀳𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁭𑁯. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁧𑁮𑁦. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁧𑁮𑁧. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁧𑁮𑁨. ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁮𑁩. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻𑀢𑀺.

‘‘𑀫𑀫 𑀘, 𑀪𑀦𑁆𑀢𑁂, 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑁂𑀬𑁆𑀬𑀸𑀲𑀺 𑁋 ‘𑀮𑀔𑀼𑀫𑀸 𑀦𑀸𑀫,𑀪𑀦𑁆𑀢𑁂,𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀫𑀁 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂 𑀩𑁆𑀬𑀸𑀓𑀭𑁂𑀬𑁆𑀬 [𑀩𑁆𑀬𑀸𑀓𑀭𑁂𑀬𑁆𑀬𑀸𑀢𑀺 (?)]. 𑀢𑀁 𑀪𑀕𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀩𑁆𑀬𑀸𑀓𑀸𑀲𑀻’’𑀢𑀺.

𑀮𑀔𑀼𑀫𑀸𑀯𑀺𑀫𑀸𑀦𑀁 𑀤𑀼𑀢𑀺𑀬𑀁.

𑁩. 𑀆𑀘𑀸𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀢𑁆𑀣𑀼

𑁧𑁮𑁫. ‘‘𑀧𑀺𑀡𑁆𑀟𑀸𑀬 𑀢𑁂 𑀘𑀭𑀦𑁆𑀢𑀲𑁆𑀲, 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀢𑀺𑀝𑁆𑀞𑀢𑁄;

𑀤𑀮𑀺𑀤𑁆𑀤𑀸 𑀓𑀧𑀡𑀸 𑀦𑀸𑀭𑀻, 𑀧𑀭𑀸𑀕𑀸𑀭𑀁 𑀅𑀧𑀲𑁆𑀲𑀺𑀢𑀸 [𑀅𑀯𑀲𑁆𑀲𑀺𑀢𑀸 (𑀲𑀻.)].

𑁧𑁮𑁬. ‘‘𑀬𑀸 𑀢𑁂 𑀅𑀤𑀸𑀲𑀺 𑀆𑀘𑀸𑀫𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀸 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀓𑀁 𑀦𑀼 𑀲𑀸 𑀤𑀺𑀲𑀢𑀁 𑀕𑀢𑀸’’𑀢𑀺.

𑁧𑁮𑁭. ‘‘𑀧𑀺𑀡𑁆𑀟𑀸𑀬 𑀫𑁂 𑀘𑀭𑀦𑁆𑀢𑀲𑁆𑀲, 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀢𑀺𑀝𑁆𑀞𑀢𑁄;

𑀤𑀮𑀺𑀤𑁆𑀤𑀸 𑀓𑀧𑀡𑀸 𑀦𑀸𑀭𑀻, 𑀧𑀭𑀸𑀕𑀸𑀭𑀁 𑀅𑀧𑀲𑁆𑀲𑀺𑀢𑀸.

𑁧𑁮𑁮. ‘‘𑀬𑀸 𑀫𑁂 𑀅𑀤𑀸𑀲𑀺 𑀆𑀘𑀸𑀫𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀸 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀇𑀢𑁄 𑀘𑀼𑀢𑀸.

𑁧𑁮𑁯. ‘‘𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀦𑀸𑀫, 𑀲𑀦𑁆𑀢𑀺 𑀤𑁂𑀯𑀸 𑀫𑀳𑀺𑀤𑁆𑀥𑀺𑀓𑀸;

𑀢𑀢𑁆𑀣 𑀲𑀸 𑀲𑀼𑀔𑀺𑀢𑀸 𑀦𑀸𑀭𑀻, 𑀫𑁄𑀤𑀢𑀸𑀘𑀸𑀫𑀤𑀸𑀬𑀺𑀓𑀸’’𑀢𑀺.

𑁧𑁯𑁦. ‘‘𑀅𑀳𑁄 𑀤𑀸𑀦𑀁 𑀯𑀭𑀸𑀓𑀺𑀬𑀸, 𑀓𑀲𑁆𑀲𑀧𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁;

𑀧𑀭𑀸𑀪𑀢𑁂𑀦 𑀤𑀸𑀦𑁂𑀦, 𑀇𑀚𑁆𑀛𑀺𑀢𑁆𑀣 𑀯𑀢 𑀤𑀓𑁆𑀔𑀺𑀡𑀸.

𑁧𑁯𑁧. ‘‘𑀬𑀸 𑀫𑀳𑁂𑀲𑀺𑀢𑁆𑀢𑀁 𑀓𑀸𑀭𑁂𑀬𑁆𑀬, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀭𑀸𑀚𑀺𑀦𑁄;

𑀦𑀸𑀭𑀻 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀻, 𑀪𑀢𑁆𑀢𑀼 𑀘𑀸𑀦𑁄𑀫𑀤𑀲𑁆𑀲𑀺𑀓𑀸;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁧𑁯𑁨. ‘‘𑀲𑀢𑀁 𑀦𑀺𑀓𑁆𑀔𑀸 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑁧𑁯𑁩. ‘‘𑀲𑀢𑀁 𑀳𑁂𑀫𑀯𑀢𑀸 𑀦𑀸𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸;

𑀲𑀼𑀯𑀡𑁆𑀡𑀓𑀘𑁆𑀙𑀸 𑀫𑀸𑀢𑀗𑁆𑀕𑀸, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸 [𑀳𑁂𑀫𑀓𑀧𑁆𑀧𑀦𑀺𑀯𑀸𑀲𑀲𑀸 (𑀲𑁆𑀬𑀸. 𑀓.)];

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁧𑁯𑁪. ‘‘𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀁, 𑀇𑀲𑁆𑀲𑀭𑀁 𑀬𑁄𑀥 𑀓𑀸𑀭𑀬𑁂;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀆𑀘𑀸𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀁 𑀢𑀢𑀺𑀬𑀁.

𑁪. 𑀘𑀡𑁆𑀟𑀸𑀮𑀺𑀯𑀺𑀫𑀸𑀦𑀯𑀢𑁆𑀣𑀼

𑁧𑁯𑁫. ‘‘𑀘𑀡𑁆𑀟𑀸𑀮𑀺 𑀯𑀦𑁆𑀤 𑀧𑀸𑀤𑀸𑀦𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀢𑀫𑁂𑀯 [𑀢𑀯𑁂𑀯 (𑀲𑀻.)] 𑀅𑀦𑀼𑀓𑀫𑁆𑀧𑀸𑀬, 𑀅𑀝𑁆𑀞𑀸𑀲𑀺 𑀇𑀲𑀺𑀲𑀢𑁆𑀢𑀫𑁄 [𑀇𑀲𑀺𑀲𑀼𑀢𑁆𑀢𑀫𑁄 (𑀲𑀻.)].

𑁧𑁯𑁬. ‘‘𑀅𑀪𑀺𑀧𑁆𑀧𑀲𑀸𑀤𑁂𑀳𑀺 𑀫𑀦𑀁, 𑀅𑀭𑀳𑀦𑁆𑀢𑀫𑁆𑀳𑀺 𑀢𑀸𑀤𑀺𑀦𑀺 [𑀢𑀸𑀤𑀺𑀦𑁂 (𑀲𑁆𑀬𑀸. 𑀓.)];

𑀔𑀺𑀧𑁆𑀧𑀁 𑀧𑀜𑁆𑀚𑀮𑀺𑀓𑀸 𑀯𑀦𑁆𑀤, 𑀧𑀭𑀺𑀢𑁆𑀢𑀁 𑀢𑀯 𑀚𑀻𑀯𑀺𑀢’’𑀦𑁆𑀢𑀺.

𑁧𑁯𑁭. 𑀘𑁄𑀤𑀺𑀢𑀸 𑀪𑀸𑀯𑀺𑀢𑀢𑁆𑀢𑁂𑀦, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦𑀸;

𑀘𑀡𑁆𑀟𑀸𑀮𑀻 𑀯𑀦𑁆𑀤𑀺 𑀧𑀸𑀤𑀸𑀦𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁯𑁮. 𑀢𑀫𑁂𑀦𑀁 𑀅𑀯𑀥𑀻 𑀕𑀸𑀯𑀻, 𑀘𑀡𑁆𑀟𑀸𑀮𑀺𑀁 𑀧𑀜𑁆𑀚𑀮𑀺𑀁 𑀞𑀺𑀢𑀁;

𑀦𑀫𑀲𑁆𑀲𑀫𑀸𑀦𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀦𑁆𑀥𑀓𑀸𑀭𑁂 𑀧𑀪𑀗𑁆𑀓𑀭𑀦𑁆𑀢𑀺.

𑁧𑁯𑁯. ‘‘𑀔𑀻𑀡𑀸𑀲𑀯𑀁 𑀯𑀺𑀕𑀢𑀭𑀚𑀁 𑀅𑀦𑁂𑀚𑀁, 𑀏𑀓𑀁 𑀅𑀭𑀜𑁆𑀜𑀫𑁆𑀳𑀺 𑀭𑀳𑁄 𑀦𑀺𑀲𑀺𑀦𑁆𑀦𑀁;

𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀸𑀫𑀺 𑀢𑀁 𑀯𑀻𑀭 𑀫𑀳𑀸𑀦𑀼𑀪𑀸𑀯’’𑀦𑁆𑀢𑀺.

𑁨𑁦𑁦. ‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀚𑀮𑀺𑀢𑀸 𑀫𑀳𑀸𑀬𑀲𑀸, 𑀯𑀺𑀫𑀸𑀦𑀫𑁄𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀸;

𑀧𑀭𑀺𑀯𑀸𑀭𑀺𑀢𑀸 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦 [𑀅𑀘𑁆𑀙𑀭𑀸𑀦𑀁 𑀕𑀡𑁂𑀦 (𑀲𑀻.)], 𑀓𑀸 𑀢𑁆𑀯𑀁 𑀲𑀼𑀪𑁂 𑀤𑁂𑀯𑀢𑁂 𑀯𑀦𑁆𑀤𑀲𑁂 𑀫𑀫’’𑀦𑁆𑀢𑀺.

𑁨𑁦𑁧. ‘‘𑀅𑀳𑀁 𑀪𑀤𑁆𑀤𑀦𑁆𑀢𑁂 𑀘𑀡𑁆𑀟𑀸𑀮𑀻, 𑀢𑀬𑀸 𑀯𑀻𑀭𑁂𑀦 [𑀣𑁂𑀭𑁂𑀦 (𑀓.)] 𑀧𑁂𑀲𑀺𑀢𑀸;

𑀯𑀦𑁆𑀤𑀺𑀁 𑀅𑀭𑀳𑀢𑁄 𑀧𑀸𑀤𑁂, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁦𑁨. ‘‘𑀲𑀸𑀳𑀁 𑀯𑀦𑁆𑀤𑀺𑀢𑁆𑀯𑀸 [𑀯𑀦𑁆𑀤𑀺𑀢𑁆𑀯 (𑀲𑀻.)] 𑀧𑀸𑀤𑀸𑀦𑀺, 𑀘𑀼𑀢𑀸 𑀘𑀡𑁆𑀟𑀸𑀮𑀬𑁄𑀦𑀺𑀬𑀸;

𑀯𑀺𑀫𑀸𑀦𑀁 𑀲𑀩𑁆𑀩𑀢𑁄 𑀪𑀤𑁆𑀤𑀁, 𑀉𑀧𑀧𑀦𑁆𑀦𑀫𑁆𑀳𑀺 𑀦𑀦𑁆𑀤𑀦𑁂.

𑁨𑁦𑁩. ‘‘𑀅𑀘𑁆𑀙𑀭𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀧𑀼𑀭𑀓𑁆𑀔𑀢𑁆𑀯𑀸𑀦 [𑀧𑀼𑀭𑀓𑁆𑀔𑀺𑀢𑁆𑀯𑀸 𑀫𑀁 (𑀲𑁆𑀬𑀸. 𑀓.)] 𑀢𑀺𑀝𑁆𑀞𑀢𑀺;

𑀢𑀸𑀲𑀸𑀳𑀁 𑀧𑀯𑀭𑀸 𑀲𑁂𑀝𑁆𑀞𑀸, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸.

𑁨𑁦𑁪. ‘‘𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸, 𑀲𑀫𑁆𑀧𑀚𑀸𑀦𑀸 𑀧𑀝𑀺𑀲𑁆𑀲𑀢𑀸 [𑀧𑀢𑀺𑀲𑁆𑀲𑀢𑀸 (𑀲𑀻. 𑀲𑁆𑀬𑀸.)];

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀢𑀁 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺.

𑁨𑁦𑁫. 𑀇𑀤𑀁 𑀯𑀢𑁆𑀯𑀸𑀦 𑀘𑀡𑁆𑀟𑀸𑀮𑀻, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀦𑀻;

𑀯𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁄 𑀧𑀸𑀤𑁂, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸𑀢𑀺 [𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀢𑀻𑀢𑀺 (𑀲𑁆𑀬𑀸. 𑀓.)].

𑀘𑀡𑁆𑀟𑀸𑀮𑀺𑀯𑀺𑀫𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀯𑀢𑁆𑀣𑀼

𑁨𑁦𑁬. ‘‘𑀦𑀻𑀮𑀸 𑀧𑀻𑀢𑀸 𑀘 𑀓𑀸𑀴𑀸 𑀘, 𑀫𑀜𑁆𑀚𑀺𑀝𑁆𑀞𑀸 [𑀫𑀜𑁆𑀚𑁂𑀝𑁆𑀞𑀸 (𑀲𑀻.), 𑀫𑀜𑁆𑀚𑀝𑁆𑀞𑀸 (𑀧𑀻.)] 𑀅𑀣 𑀮𑁄𑀳𑀺𑀢𑀸;

𑀉𑀘𑁆𑀘𑀸𑀯𑀘𑀸𑀦𑀁 𑀯𑀡𑁆𑀡𑀸𑀦𑀁, 𑀓𑀺𑀜𑁆𑀚𑀓𑁆𑀔𑀧𑀭𑀺𑀯𑀸𑀭𑀺𑀢𑀸.

𑁨𑁦𑁭. ‘‘𑀫𑀦𑁆𑀤𑀸𑀭𑀯𑀸𑀦𑀁 𑀧𑀼𑀧𑁆𑀨𑀸𑀦𑀁, 𑀫𑀸𑀮𑀁 𑀥𑀸𑀭𑁂𑀲𑀺 𑀫𑀼𑀤𑁆𑀥𑀦𑀺;

𑀦𑀬𑀺𑀫𑁂 𑀅𑀜𑁆𑀜𑁂𑀲𑀼 𑀓𑀸𑀬𑁂𑀲𑀼, 𑀭𑀼𑀓𑁆𑀔𑀸 𑀲𑀦𑁆𑀢𑀺 𑀲𑀼𑀫𑁂𑀥𑀲𑁂.

𑁨𑁦𑁮. ‘‘𑀓𑁂𑀦 𑀓𑀸𑀬𑀁 𑀉𑀧𑀧𑀦𑁆𑀦𑀸, 𑀢𑀸𑀯𑀢𑀺𑀁𑀲𑀁 𑀬𑀲𑀲𑁆𑀲𑀺𑀦𑀻;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁨𑁦𑁯. ‘‘𑀪𑀤𑁆𑀤𑀺𑀢𑁆𑀣𑀺𑀓𑀸𑀢𑀺 [𑀪𑀤𑁆𑀤𑀺𑀢𑁆𑀣𑀻𑀢𑀺 (𑀲𑀻.)] 𑀫𑀁 𑀅𑀜𑁆𑀜𑀁𑀲𑀼, 𑀓𑀺𑀫𑀺𑀮𑀸𑀬𑀁 𑀉𑀧𑀸𑀲𑀺𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸.

𑁨𑁧𑁦. ‘‘𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁧𑁧. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁨𑁧𑁨. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁨𑁧𑁩. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁨𑁧𑁪. ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀻.

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸 [𑀓𑀢𑀸𑀯𑀓𑀸𑀲𑀸 𑀓𑀢𑀓𑀼𑀲𑀮𑀸 (𑀓.)],

𑀲𑀬𑀁 𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦𑀁.

𑁨𑁧𑁫. ‘‘𑀪𑀺𑀓𑁆𑀔𑀽 𑀘𑀸𑀳𑀁 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓𑁂, 𑀅𑀪𑁄𑀚𑀬𑀺𑀁 𑀢𑀧𑀲𑁆𑀲𑀺𑀬𑀼𑀕𑀁 𑀫𑀳𑀸𑀫𑀼𑀦𑀺𑀁;

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸 [𑀓𑀢𑀸𑀯𑀓𑀸𑀲𑀸 𑀓𑀢𑀓𑀼𑀲𑀮𑀸 (𑀓.)], 𑀲𑀬𑀁 𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦𑀁.

𑁨𑁧𑁬. ‘‘𑀅𑀝𑁆𑀞𑀗𑁆𑀕𑀺𑀓𑀁 𑀅𑀧𑀭𑀺𑀫𑀺𑀢𑀁 𑀲𑀼𑀔𑀸𑀯𑀳𑀁, 𑀉𑀧𑁄𑀲𑀣𑀁 𑀲𑀢𑀢𑀫𑀼𑀧𑀸𑀯𑀲𑀺𑀁 𑀅𑀳𑀁;

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸 [𑀓𑀢𑀸𑀯𑀓𑀸𑀲𑀸 𑀓𑀢𑀓𑀼𑀲𑀮𑀸 (𑀓.)], 𑀲𑀬𑀁 𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦’’𑀦𑁆𑀢𑀺.

𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀁 [𑀪𑀤𑁆𑀤𑀺𑀢𑁆𑀣𑀺𑀓𑀸𑀯𑀺𑀫𑀸𑀦𑀁 (𑀲𑁆𑀬𑀸.)] 𑀧𑀜𑁆𑀘𑀫𑀁.

𑁬. 𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀯𑀢𑁆𑀣𑀼

𑁨𑁧𑁭. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁨𑁧𑁮. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁨𑁧𑁯. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁨𑁦. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁨𑁨𑁧. ‘‘𑀲𑁄𑀡𑀤𑀺𑀦𑁆𑀦𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀦𑀸𑀴𑀦𑁆𑀤𑀸𑀬𑀁 𑀉𑀧𑀸𑀲𑀺𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸.

𑁨𑁨𑁨. ‘‘𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁨𑁩. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁨𑁨𑁪. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;