𑁫. 𑀓𑀼𑀜𑁆𑀚𑀭𑀯𑀺𑀫𑀸𑀦𑀯𑀢𑁆𑀣𑀼

𑁩𑁧. ‘‘𑀓𑀼𑀜𑁆𑀚𑀭𑁄 𑀢𑁂 𑀯𑀭𑀸𑀭𑁄𑀳𑁄, 𑀦𑀸𑀦𑀸𑀭𑀢𑀦𑀓𑀧𑁆𑀧𑀦𑁄;

𑀭𑀼𑀘𑀺𑀭𑁄 𑀣𑀸𑀫𑀯𑀸 𑀚𑀯𑀲𑀫𑁆𑀧𑀦𑁆𑀦𑁄, 𑀆𑀓𑀸𑀲𑀫𑁆𑀳𑀺 𑀲𑀫𑀻𑀳𑀢𑀺.

𑁩𑁨. ‘‘𑀧𑀤𑀼𑀫𑀺 𑀧𑀤𑁆𑀫 [𑀧𑀤𑀼𑀫… (𑀲𑀻. 𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺] 𑀧𑀢𑁆𑀢𑀓𑁆𑀔𑀺, 𑀧𑀤𑁆𑀫𑀼𑀧𑁆𑀧𑀮𑀚𑀼𑀢𑀺𑀦𑁆𑀥𑀭𑁄;

𑀧𑀤𑁆𑀫𑀘𑀼𑀡𑁆𑀡𑀸𑀪𑀺𑀓𑀺𑀡𑁆𑀡𑀗𑁆𑀕𑁄, 𑀲𑁄𑀡𑁆𑀡𑀧𑁄𑀓𑁆𑀔𑀭𑀫𑀸𑀮𑀥𑀸 [… 𑀫𑀸𑀮𑀯𑀸 (𑀲𑀻. 𑀲𑁆𑀬𑀸.)].

𑁩𑁩. ‘‘𑀧𑀤𑀼𑀫𑀸𑀦𑀼𑀲𑀝𑀁 𑀫𑀕𑁆𑀕𑀁, 𑀧𑀤𑁆𑀫𑀧𑀢𑁆𑀢𑀯𑀺𑀪𑀽𑀲𑀺𑀢𑀁.

𑀞𑀺𑀢𑀁 𑀯𑀕𑁆𑀕𑀼𑀫𑀦𑀼𑀕𑁆𑀖𑀸𑀢𑀻, 𑀫𑀺𑀢𑀁 𑀕𑀘𑁆𑀙𑀢𑀺 𑀯𑀸𑀭𑀡𑁄.

𑁩𑁪. ‘‘𑀢𑀲𑁆𑀲 𑀧𑀓𑁆𑀓𑀫𑀫𑀸𑀦𑀲𑁆𑀲, 𑀲𑁄𑀡𑁆𑀡𑀓𑀁𑀲𑀸 𑀭𑀢𑀺𑀲𑁆𑀲𑀭𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀼𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁩𑁫. ‘‘𑀢𑀲𑁆𑀲 𑀦𑀸𑀕𑀲𑁆𑀲 𑀔𑀦𑁆𑀥𑀫𑁆𑀳𑀺, 𑀲𑀼𑀘𑀺𑀯𑀢𑁆𑀣𑀸 𑀅𑀮𑀗𑁆𑀓𑀢𑀸;

𑀫𑀳𑀦𑁆𑀢𑀁 𑀅𑀘𑁆𑀙𑀭𑀸𑀲𑀗𑁆𑀖𑀁, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀲𑀺.

𑁩𑁬. ‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸’’𑀢𑀺;

𑁩𑁭. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁩𑁮. ‘‘𑀤𑀺𑀲𑁆𑀯𑀸𑀦 𑀕𑀼𑀡𑀲𑀫𑁆𑀧𑀦𑁆𑀦𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀲𑀢𑀁;

𑀅𑀤𑀸𑀲𑀺𑀁 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁, 𑀆𑀲𑀦𑀁 𑀤𑀼𑀲𑁆𑀲𑀲𑀦𑁆𑀣𑀢𑀁.

𑁩𑁯. ‘‘𑀉𑀧𑀟𑁆𑀠𑀁 𑀧𑀤𑁆𑀫𑀫𑀸𑀮𑀸𑀳𑀁, 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄;

𑀅𑀩𑁆𑀪𑁄𑀓𑀺𑀭𑀺𑀲𑁆𑀲𑀁 𑀧𑀢𑁆𑀢𑁂𑀳𑀺, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁦. ‘‘𑀢𑀲𑁆𑀲 𑀓𑀫𑁆𑀫𑀓𑀼𑀲𑀮𑀲𑁆𑀲 [𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲 (𑀲𑀻. 𑀧𑀻.)], 𑀇𑀤𑀁 𑀫𑁂 𑀈𑀤𑀺𑀲𑀁 𑀨𑀮𑀁;

𑀲𑀓𑁆𑀓𑀸𑀭𑁄 𑀕𑀭𑀼𑀓𑀸𑀭𑁄 𑀘, 𑀤𑁂𑀯𑀸𑀦𑀁 𑀅𑀧𑀘𑀺𑀢𑀸 𑀅𑀳𑀁.

𑁪𑁧. ‘‘𑀬𑁄 𑀯𑁂 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀧𑀲𑀦𑁆𑀦𑁄 𑀆𑀲𑀦𑀁 𑀤𑀚𑁆𑀚𑀸, 𑀏𑀯𑀁 𑀦𑀦𑁆𑀤𑁂 𑀬𑀣𑀸 𑀅𑀳𑀁.

𑁪𑁨. ‘‘𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦 [𑀅𑀢𑁆𑀣𑀓𑀸𑀫𑁂𑀦 (𑀓.)], 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀆𑀲𑀦𑀁 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦’’𑀦𑁆𑀢𑀺.

𑀓𑀼𑀜𑁆𑀚𑀭𑀯𑀺𑀫𑀸𑀦𑀁 𑀧𑀜𑁆𑀘𑀫𑀁.