𑁬. 𑀧𑀞𑀫𑀦𑀸𑀯𑀸𑀯𑀺𑀫𑀸𑀦𑀯𑀢𑁆𑀣𑀼

𑁪𑁩. ‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀁, 𑀦𑀸𑀭𑀺 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀧𑀤𑁆𑀫𑀁 [𑀧𑀤𑀼𑀫𑀁 (𑀲𑀻. 𑀲𑁆𑀬𑀸.)] 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸.

𑁪𑁪. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁪𑁫. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁪𑁬. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁭. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀢𑀲𑀺𑀢𑁂 𑀓𑀺𑀮𑀦𑁆𑀢𑁂, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀅𑀤𑀸𑀲𑀺𑀁.

𑁪𑁮. ‘‘𑀬𑁄 𑀯𑁂 𑀓𑀺𑀮𑀦𑁆𑀢𑀸𑀦 𑀧𑀺𑀧𑀸𑀲𑀺𑀢𑀸𑀦𑀁, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀤𑀤𑀸𑀢𑀺;

𑀲𑀻𑀢𑁄𑀤𑀓𑀸 [𑀲𑀻𑀢𑁄𑀤𑀺𑀓𑀸 (𑀲𑀻.)] 𑀢𑀲𑁆𑀲 𑀪𑀯𑀦𑁆𑀢𑀺 𑀦𑀚𑁆𑀚𑁄, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸.

𑁪𑁯. ‘‘𑀢𑀁 𑀆𑀧𑀕𑀸 [𑀢𑀫𑀸𑀧𑀕𑀸 (𑀲𑀻. 𑀓.)] 𑀅𑀦𑀼𑀧𑀭𑀺𑀬𑀦𑁆𑀢𑀺 𑀲𑀩𑁆𑀩𑀤𑀸, 𑀲𑀻𑀢𑁄𑀤𑀓𑀸 𑀯𑀸𑀮𑀼𑀓𑀲𑀦𑁆𑀣𑀢𑀸 𑀦𑀤𑀻;

𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸.

𑁫𑁦. ‘‘𑀢𑀁 𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀯𑀺𑀫𑀸𑀦𑀲𑁂𑀝𑁆𑀞𑀁 𑀪𑀼𑀲𑀲𑁄𑀪𑀫𑀸𑀦𑀁;

𑀢𑀲𑁆𑀲𑀻𑀥 [𑀢𑀲𑁆𑀲𑁂𑀯 (𑀲𑁆𑀬𑀸.)] 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀓𑀢𑀸 [𑀓𑀢𑀧𑀼𑀜𑁆𑀜𑀸 (𑀲𑀻.)] 𑀮𑀪𑀦𑁆𑀢𑀺.

𑁫𑁧. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁫𑁨. ‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀧𑀞𑀫𑀦𑀸𑀯𑀸𑀯𑀺𑀫𑀸𑀦𑀁 𑀙𑀝𑁆𑀞𑀁.