𑁨. 𑀉𑀤𑁆𑀥𑀢𑀲𑀼𑀢𑁆𑀢𑀁

𑁩𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁂 𑀉𑀤𑁆𑀥𑀢𑁂 𑀉𑀦𑁆𑀦𑀴𑁂 𑀘𑀧𑀮𑁂 𑀫𑀼𑀔𑀭𑁂 𑀯𑀺𑀓𑀺𑀡𑁆𑀡𑀯𑀸𑀘𑁂 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑁂 𑀅𑀲𑀫𑀸𑀳𑀺𑀢𑁂 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁂 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀭𑀓𑁆𑀔𑀺𑀢𑁂𑀦 𑀓𑀸𑀬𑁂𑀦 [𑀘𑀺𑀢𑁆𑀢𑁂𑀦 (𑀦𑁂𑀢𑁆𑀢𑀺𑀬𑀁)], 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 [𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑁂𑀦 (𑀩𑀳𑀽𑀲𑀼)] 𑀘;

𑀣𑀺𑀦𑀫𑀺𑀤𑁆𑀥𑀸 [𑀣𑀻𑀦𑀫𑀺𑀤𑁆𑀥𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀺𑀪𑀽𑀢𑁂𑀦, 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀺.

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀻𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺. 𑀤𑀼𑀢𑀺𑀬𑀁;