𑁪. 𑀫𑁂𑀖𑀺𑀬𑀯𑀕𑁆𑀕𑁄

𑁧. 𑀫𑁂𑀖𑀺𑀬𑀲𑀼𑀢𑁆𑀢𑀁

𑁩𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀘𑀸𑀮𑀺𑀓𑀸𑀬𑀁 𑀯𑀺𑀳𑀭𑀢𑀺 𑀘𑀸𑀮𑀺𑀓𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀚𑀦𑁆𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼’’𑀦𑁆𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀫𑁂𑀖𑀺𑀬, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑀦𑁆𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. [𑀉𑀧𑀲𑀗𑁆𑀓𑀫𑀺𑀢𑁆𑀯𑀸 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁯.𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 [𑀉𑀧𑀲𑀗𑁆𑀓𑀫𑀺𑀢𑁆𑀯𑀸 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁯.𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 [𑀚𑀗𑁆𑀖𑀯𑀺𑀳𑀸𑀭𑀁 (𑀓.)] 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 [𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲𑀸 𑀔𑁄 (𑀲𑀻. 𑀲𑁆𑀬𑀸. 𑀧𑀻.), 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲 (𑀓.)] 𑀅𑀫𑁆𑀩𑀯𑀦𑀁 𑀧𑀸𑀲𑀸𑀤𑀺𑀓𑀁 𑀫𑀦𑀼𑀜𑁆𑀜𑀁 𑀭𑀫𑀡𑀻𑀬𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀸𑀲𑀸𑀤𑀺𑀓𑀁 𑀯𑀢𑀺𑀤𑀁 𑀅𑀫𑁆𑀩𑀯𑀦𑀁 𑀫𑀦𑀼𑀜𑁆𑀜𑀁 [𑀇𑀤𑀁 𑀧𑀤𑀁 𑀯𑀺𑀤𑁂𑀲𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀅𑀗𑁆𑀕𑀼𑀢𑁆𑀢𑀭𑁂𑀧𑀺] 𑀭𑀫𑀡𑀻𑀬𑀁. 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬𑀸𑀳𑀁 𑀇𑀫𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑀦𑁆𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 [𑀉𑀧𑀲𑀗𑁆𑀓𑀫𑀺𑀢𑁆𑀯𑀸 (𑀲𑀩𑁆𑀩𑀢𑁆𑀣)]. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀦𑁆𑀢𑁂 [𑀉𑀧𑀲𑀗𑁆𑀓𑀫𑀺𑀢𑁆𑀯𑀸 (𑀲𑀩𑁆𑀩𑀢𑁆𑀣)], 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 [𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲𑀁 (𑀲𑀩𑁆𑀩𑀢𑁆𑀣)] 𑀅𑀫𑁆𑀩𑀯𑀦𑀁 𑀧𑀸𑀲𑀸𑀤𑀺𑀓𑀁 𑀫𑀦𑀼𑀜𑁆𑀜𑀁 𑀭𑀫𑀡𑀻𑀬𑀁. 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀧𑀸𑀲𑀸𑀤𑀺𑀓𑀁 𑀯𑀢𑀺𑀤𑀁 𑀅𑀫𑁆𑀩𑀯𑀦𑀁 𑀫𑀦𑀼𑀜𑁆𑀜𑀁 𑀭𑀫𑀡𑀻𑀬𑀁. 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬𑀸𑀳𑀁 𑀇𑀫𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’𑀢𑀺. 𑀲𑀘𑁂 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 [𑀅𑀦𑀼𑀚𑀸𑀦𑁂𑀬𑁆𑀬 (𑀅. 𑀦𑀺. 𑁯.𑁩)], 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑁂𑀖𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀳𑀺 𑀢𑀸𑀯, 𑀫𑁂𑀖𑀺𑀬, 𑀏𑀓𑀓𑀫𑁆𑀳𑀺 [𑀏𑀓𑀓𑀫𑁆𑀳𑀸 (𑀲𑀻. 𑀧𑀻.), 𑀏𑀓𑀓𑁄𑀫𑁆𑀳𑀺 (𑀲𑁆𑀬𑀸.)] 𑀢𑀸𑀯, 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀢𑁄, 𑀪𑀦𑁆𑀢𑁂, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀭𑀡𑀻𑀬𑀁, 𑀦𑀢𑁆𑀣𑀺 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄. 𑀫𑀬𑁆𑀳𑀁 𑀔𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀢𑀺𑀘𑀬𑁄. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑁂𑀖𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀳𑀺 𑀢𑀸𑀯, 𑀫𑁂𑀖𑀺𑀬, 𑀏𑀓𑀓𑀫𑁆𑀳𑀺 𑀢𑀸𑀯, 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀢𑁄, 𑀪𑀦𑁆𑀢𑁂, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀦𑀢𑁆𑀣𑀺 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄. 𑀫𑀬𑁆𑀳𑀁 𑀔𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀢𑀺𑀘𑀬𑁄. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺. ‘‘𑀧𑀥𑀸𑀦𑀦𑁆𑀢𑀺 𑀔𑁄, 𑀫𑁂𑀖𑀺𑀬, 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫? 𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀫𑁂𑀖𑀺𑀬, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀢𑀁 𑀅𑀫𑁆𑀩𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀫𑁆𑀩𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 [𑀅𑀚𑁆𑀛𑁄𑀕𑀳𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀢𑀬𑁄 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 [𑀯𑀺𑀢𑀓𑁆𑀓𑁄𑀢𑀺 (𑀲𑀻. 𑀧𑀻. 𑀓.)].

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀤𑁆𑀥𑀸𑀬 𑀘 𑀯𑀢𑀫𑁆𑀳𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. 𑀅𑀣 𑀘 𑀧𑀦𑀺𑀫𑁂𑀳𑀺 𑀢𑀻𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁂𑀦, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦’’.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀢𑀬𑁄 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀲𑀤𑁆𑀥𑀸𑀬 𑀘 𑀯𑀢𑀫𑁆𑀳𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. 𑀅𑀣 𑀘 𑀧𑀦𑀺𑀫𑁂𑀳𑀺 𑀢𑀻𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁂𑀦, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦’’’.

‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘?

‘‘𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀧𑀞𑀫𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀲𑀦𑁆𑀢𑀼𑀝𑁆𑀞𑀺𑀓𑀣𑀸, 𑀧𑀯𑀺𑀯𑁂𑀓𑀓𑀣𑀸, 𑀅𑀲𑀁𑀲𑀕𑁆𑀕𑀓𑀣𑀸, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸, 𑀲𑀻𑀮𑀓𑀣𑀸, 𑀲𑀫𑀸𑀥𑀺𑀓𑀣𑀸, 𑀧𑀜𑁆𑀜𑀸𑀓𑀣𑀸, 𑀯𑀺𑀫𑀼𑀢𑁆𑀢𑀺𑀓𑀣𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸; 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀅𑀧𑀭𑀺𑀧𑀸𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀢𑀢𑀺𑀬𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 [𑀉𑀧𑁆𑀧𑀸𑀤𑀸𑀬 (𑀲𑁆𑀬𑀸.)], 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀢𑀺. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀬𑀁 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀺𑀲𑁆𑀲𑀢𑀺, 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀺𑀲𑁆𑀲𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀬𑀁 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀲𑀦𑁆𑀢𑀼𑀝𑁆𑀞𑀺𑀓𑀣𑀸, 𑀧𑀯𑀺𑀯𑁂𑀓𑀓𑀣𑀸, 𑀅𑀲𑀁𑀲𑀕𑁆𑀕𑀓𑀣𑀸, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸, 𑀲𑀻𑀮𑀓𑀣𑀸, 𑀲𑀫𑀸𑀥𑀺𑀓𑀣𑀸, 𑀧𑀜𑁆𑀜𑀸𑀓𑀣𑀸, 𑀯𑀺𑀫𑀼𑀢𑁆𑀢𑀺𑀓𑀣𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸; 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀬𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀺𑀲𑁆𑀲𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀬𑀁 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸.

‘‘𑀢𑁂𑀦 𑀘 𑀧𑀦, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸 𑁋 𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬, 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬, 𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄 𑀳𑀺, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺, 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀔𑀼𑀤𑁆𑀤𑀸 𑀯𑀺𑀢𑀓𑁆𑀓𑀸 𑀲𑀼𑀔𑀼𑀫𑀸 𑀯𑀺𑀢𑀓𑁆𑀓𑀸,

𑀅𑀦𑀼𑀕𑀢𑀸 [𑀅𑀦𑀼𑀕𑁆𑀕𑀢𑀸 (𑀲𑀻. 𑀓. 𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁)] 𑀫𑀦𑀲𑁄 𑀉𑀧𑁆𑀧𑀺𑀮𑀸𑀯𑀸 [𑀉𑀩𑁆𑀩𑀺𑀮𑀸𑀧𑀸 (𑀲𑀻. 𑀲𑁆𑀬𑀸. 𑀧𑀻.)];

𑀏𑀢𑁂 𑀅𑀯𑀺𑀤𑁆𑀯𑀸 𑀫𑀦𑀲𑁄 𑀯𑀺𑀢𑀓𑁆𑀓𑁂,

𑀳𑀼𑀭𑀸 𑀳𑀼𑀭𑀁 𑀥𑀸𑀯𑀢𑀺 𑀪𑀦𑁆𑀢𑀘𑀺𑀢𑁆𑀢𑁄.

‘‘𑀏𑀢𑁂 𑀘 𑀯𑀺𑀤𑁆𑀯𑀸 𑀫𑀦𑀲𑁄 𑀯𑀺𑀢𑀓𑁆𑀓𑁂,

𑀆𑀢𑀸𑀧𑀺𑀬𑁄 𑀲𑀁𑀯𑀭𑀢𑀻 𑀲𑀢𑀻𑀫𑀸;

𑀅𑀦𑀼𑀕𑀢𑁂 𑀫𑀦𑀲𑁄 𑀉𑀧𑁆𑀧𑀺𑀮𑀸𑀯𑁂,

𑀅𑀲𑁂𑀲𑀫𑁂𑀢𑁂 𑀧𑀚𑀳𑀸𑀲𑀺 𑀩𑀼𑀤𑁆𑀥𑁄’’𑀢𑀺. 𑀧𑀞𑀫𑀁;

𑁨. 𑀉𑀤𑁆𑀥𑀢𑀲𑀼𑀢𑁆𑀢𑀁

𑁩𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁂 𑀉𑀤𑁆𑀥𑀢𑁂 𑀉𑀦𑁆𑀦𑀴𑁂 𑀘𑀧𑀮𑁂 𑀫𑀼𑀔𑀭𑁂 𑀯𑀺𑀓𑀺𑀡𑁆𑀡𑀯𑀸𑀘𑁂 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑁂 𑀅𑀲𑀫𑀸𑀳𑀺𑀢𑁂 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁂 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀭𑀓𑁆𑀔𑀺𑀢𑁂𑀦 𑀓𑀸𑀬𑁂𑀦 [𑀘𑀺𑀢𑁆𑀢𑁂𑀦 (𑀦𑁂𑀢𑁆𑀢𑀺𑀬𑀁)], 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 [𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑁂𑀦 (𑀩𑀳𑀽𑀲𑀼)] 𑀘;

𑀣𑀺𑀦𑀫𑀺𑀤𑁆𑀥𑀸 [𑀣𑀻𑀦𑀫𑀺𑀤𑁆𑀥𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀺𑀪𑀽𑀢𑁂𑀦, 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀺.

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀻𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺. 𑀤𑀼𑀢𑀺𑀬𑀁;

𑁩. 𑀕𑁄𑀧𑀸𑀮𑀓𑀲𑀼𑀢𑁆𑀢𑀁

𑁩𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀕𑁄𑀧𑀸𑀮𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀕𑁄𑀧𑀸𑀮𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 [𑀲𑀫𑀸𑀤𑀸𑀧𑁂𑀲𑀺 (?)] 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺.

𑀅𑀣 𑀔𑁄 𑀲𑁄 𑀕𑁄𑀧𑀸𑀮𑀓𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 [𑀲𑀫𑀸𑀤𑀺𑀧𑀺𑀢𑁄 (?)] 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑁄 𑀕𑁄𑀧𑀸𑀮𑀓𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀲𑁄 𑀕𑁄𑀧𑀸𑀮𑀓𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀳𑀽𑀢𑀁 𑀅𑀧𑁆𑀧𑁄𑀤𑀓𑀧𑀸𑀬𑀲𑀁 [𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀁 (𑀲𑀩𑁆𑀩𑀢𑁆𑀣)] 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀦𑀯𑀜𑁆𑀘 𑀲𑀧𑁆𑀧𑀺𑀁 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 𑀕𑁄𑀧𑀸𑀮𑀓𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀧𑁆𑀧𑁄𑀤𑀓𑀧𑀸𑀬𑀲𑁂𑀦 [𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑁂𑀦 𑀘 (𑀲𑁆𑀬𑀸. 𑀧𑀻.)] 𑀦𑀯𑁂𑀦 𑀘 𑀲𑀧𑁆𑀧𑀺𑀦𑀸 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀲𑁄 𑀕𑁄𑀧𑀸𑀮𑀓𑁄 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀕𑁄𑀧𑀸𑀮𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀢𑀁 𑀕𑁄𑀧𑀸𑀮𑀓𑀁 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁂𑀦, 𑀪𑀦𑁆𑀢𑁂, 𑀕𑁄𑀧𑀸𑀮𑀓𑁂𑀦 𑀅𑀚𑁆𑀚 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀧𑁆𑀧𑁄𑀤𑀓𑀧𑀸𑀬𑀲𑁂𑀦 𑀦𑀯𑁂𑀦 𑀘 𑀲𑀧𑁆𑀧𑀺𑀦𑀸 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑀺𑀢𑁄 𑀲𑀫𑁆𑀧𑀯𑀸𑀭𑀺𑀢𑁄 𑀲𑁄 𑀓𑀺𑀭, 𑀪𑀦𑁆𑀢𑁂, 𑀕𑁄𑀧𑀸𑀮𑀓𑁄 𑀅𑀜𑁆𑀜𑀢𑀭𑁂𑀦 𑀧𑀼𑀭𑀺𑀲𑁂𑀦 𑀲𑀻𑀫𑀦𑁆𑀢𑀭𑀺𑀓𑀸𑀬 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀤𑀺𑀲𑁄 𑀤𑀺𑀲𑀁 𑀬𑀁 𑀢𑀁 𑀓𑀬𑀺𑀭𑀸, 𑀯𑁂𑀭𑀻 𑀯𑀸 𑀧𑀦 𑀯𑁂𑀭𑀺𑀦𑀁;

𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂’’𑀢𑀺. 𑀢𑀢𑀺𑀬𑀁;

𑁪. 𑀬𑀓𑁆𑀔𑀧𑀳𑀸𑀭𑀲𑀼𑀢𑁆𑀢𑀁

𑁩𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀧𑁄𑀢𑀓𑀦𑁆𑀤𑀭𑀸𑀬𑀁 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀺 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀅𑀜𑁆𑀜𑀢𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀬𑀓𑁆𑀔𑀸 𑀲𑀳𑀸𑀬𑀓𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀕𑀘𑁆𑀙𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀤𑁆𑀤𑀲𑀁𑀲𑀼 𑀔𑁄 𑀢𑁂 𑀬𑀓𑁆𑀔𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀚𑀼𑀡𑁆𑀳𑀸𑀬 𑀭𑀢𑁆𑀢𑀺𑀬𑀸 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀺 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀏𑀓𑁄 𑀬𑀓𑁆𑀔𑁄 𑀤𑀼𑀢𑀺𑀬𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀲𑀫𑁆𑀫, 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀤𑀸𑀢𑀼’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀲𑀫𑁆𑀫, 𑀫𑀸 𑀲𑀫𑀡𑀁 𑀆𑀲𑀸𑀤𑁂𑀲𑀺. 𑀉𑀴𑀸𑀭𑁄 𑀲𑁄, 𑀲𑀫𑁆𑀫, 𑀲𑀫𑀡𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀲𑀫𑁆𑀫, 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀤𑀸𑀢𑀼’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀲𑀫𑁆𑀫, 𑀫𑀸 𑀲𑀫𑀡𑀁 𑀆𑀲𑀸𑀤𑁂𑀲𑀺. 𑀉𑀴𑀸𑀭𑁄 𑀲𑁄, 𑀲𑀫𑁆𑀫, 𑀲𑀫𑀡𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀲𑀫𑁆𑀫, 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀤𑀸𑀢𑀼’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀲𑀫𑁆𑀫, 𑀫𑀸 𑀲𑀫𑀡𑀁 𑀆𑀲𑀸𑀤𑁂𑀲𑀺. 𑀉𑀴𑀸𑀭𑁄 𑀲𑁄, 𑀲𑀫𑁆𑀫, 𑀲𑀫𑀡𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀅𑀣 𑀔𑁄 𑀲𑁄 𑀬𑀓𑁆𑀔𑁄 𑀢𑀁 𑀬𑀓𑁆𑀔𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀅𑀤𑀸𑀲𑀺. 𑀢𑀸𑀯 𑀫𑀳𑀸 𑀧𑀳𑀸𑀭𑁄 𑀅𑀳𑁄𑀲𑀺, 𑀅𑀧𑀺 𑀢𑁂𑀦 𑀧𑀳𑀸𑀭𑁂𑀦 𑀲𑀢𑁆𑀢𑀭𑀢𑀦𑀁 𑀯𑀸 𑀅𑀟𑁆𑀠𑀝𑁆𑀞𑀫𑀭𑀢𑀦𑀁 𑀯𑀸 𑀦𑀸𑀕𑀁 𑀑𑀲𑀸𑀤𑁂𑀬𑁆𑀬, 𑀫𑀳𑀦𑁆𑀢𑀁 𑀯𑀸 𑀧𑀩𑁆𑀩𑀢𑀓𑀽𑀝𑀁 𑀧𑀤𑀸𑀮𑁂𑀬𑁆𑀬. 𑀅𑀣 𑀘 𑀧𑀦 𑀲𑁄 𑀬𑀓𑁆𑀔𑁄 ‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀫𑀳𑀸𑀦𑀺𑀭𑀬𑀁 𑀅𑀧𑀢𑀸𑀲𑀺 [𑀅𑀯𑀢𑁆𑀣𑀸𑀲𑀺 (𑀓. 𑀲𑀻.)].

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑁂𑀦 𑀬𑀓𑁆𑀔𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀻𑀲𑁂 𑀧𑀳𑀸𑀭𑀁 𑀤𑀻𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀦 𑀓𑀺𑀜𑁆𑀘𑀺 𑀤𑀼𑀓𑁆𑀔’’𑀦𑁆𑀢𑀺? ‘‘𑀔𑀫𑀦𑀻𑀬𑀁 𑀫𑁂, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀸𑀧𑀦𑀻𑀬𑀁 𑀫𑁂, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦; 𑀅𑀧𑀺 𑀘 𑀫𑁂 𑀲𑀻𑀲𑀁 𑀣𑁄𑀓𑀁 𑀤𑀼𑀓𑁆𑀔’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢! 𑀬𑀸𑀯 [𑀬𑀁 𑀢𑁆𑀯𑀁 (𑀲𑀻. 𑀓.), 𑀬𑀁 (𑀲𑁆𑀬𑀸.)] 𑀫𑀳𑀺𑀤𑁆𑀥𑀺𑀓𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀦𑀼𑀪𑀸𑀯𑁄! 𑀇𑀥 𑀢𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑀭𑁄 𑀬𑀓𑁆𑀔𑁄 𑀲𑀻𑀲𑁂 𑀧𑀳𑀸𑀭𑀁 𑀅𑀤𑀸𑀲𑀺. 𑀢𑀸𑀯 𑀫𑀳𑀸 𑀧𑀳𑀸𑀭𑁄 𑀅𑀳𑁄𑀲𑀺, 𑀅𑀧𑀺 𑀢𑁂𑀦 𑀧𑀳𑀸𑀭𑁂𑀦 𑀲𑀢𑁆𑀢𑀭𑀢𑀦𑀁 𑀯𑀸 𑀅𑀟𑁆𑀠𑀝𑁆𑀞𑀫𑀭𑀢𑀦𑀁 𑀯𑀸 𑀦𑀸𑀕𑀁 𑀑𑀲𑀸𑀤𑁂𑀬𑁆𑀬, 𑀫𑀳𑀦𑁆𑀢𑀁 𑀯𑀸 𑀧𑀩𑁆𑀩𑀢𑀓𑀽𑀝𑀁 𑀧𑀤𑀸𑀮𑁂𑀬𑁆𑀬, 𑀅𑀣 𑀘 𑀧𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀯𑀫𑀸𑀳 𑁋 ‘𑀔𑀫𑀦𑀻𑀬𑀁 𑀫𑁂, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀸𑀧𑀦𑀻𑀬𑀁 𑀫𑁂, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦; 𑀅𑀧𑀺 𑀘 𑀫𑁂 𑀲𑀻𑀲𑀁 𑀣𑁄𑀓𑀁 𑀤𑀼𑀓𑁆𑀔’’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦! 𑀬𑀸𑀯 [𑀬𑀁 (𑀲𑁆𑀬𑀸.)] 𑀫𑀳𑀺𑀤𑁆𑀥𑀺𑀓𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀸𑀦𑀼𑀪𑀸𑀯𑁄 𑀬𑀢𑁆𑀭 𑀳𑀺 𑀦𑀸𑀫 𑀬𑀓𑁆𑀔𑀫𑁆𑀧𑀺 𑀧𑀲𑁆𑀲𑀺𑀲𑁆𑀲𑀢𑀺! 𑀫𑀬𑀁 𑀧𑀦𑁂𑀢𑀭𑀳𑀺 𑀧𑀁𑀲𑀼𑀧𑀺𑀲𑀸𑀘𑀓𑀫𑁆𑀧𑀺 𑀦 𑀧𑀲𑁆𑀲𑀸𑀫𑀸’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀫𑀳𑀸𑀦𑀸𑀕𑀸𑀦𑀁 𑀇𑀫𑀁 𑀏𑀯𑀭𑀽𑀧𑀁 𑀓𑀣𑀸𑀲𑀮𑁆𑀮𑀸𑀧𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑁄𑀧𑀦𑁂𑀬𑁆𑀬𑁂 𑀦 𑀓𑀼𑀧𑁆𑀧𑀢𑀺;

𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀦𑀸𑀕𑀲𑀼𑀢𑁆𑀢𑀁

𑁩𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀽𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀏𑀢𑀭𑀳𑀺 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀽𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀳𑀢𑁆𑀣𑀺𑀦𑀸𑀕𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀮𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺. 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀢𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘𑀲𑁆𑀲 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀢𑀺, 𑀑𑀕𑀸𑀳𑀸 𑀘𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺. 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀅𑀣 𑀔𑁄 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀏𑀢𑀭𑀳𑀺 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀮𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘 𑀫𑁂 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀸 𑀅𑀧𑀓𑁆𑀓𑀫𑁆𑀫 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀪𑀤𑁆𑀤𑀲𑀸𑀮𑀫𑀽𑀮𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 [𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀭 𑀲𑀼𑀤𑀁 (𑀲𑁆𑀬𑀸. 𑀧𑀻. 𑀓.)] 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺 𑀢𑀁 𑀧𑀤𑁂𑀲𑀁 [𑀅𑀧𑁆𑀧𑀳𑀭𑀺𑀢𑀜𑁆𑀘 𑀓𑀭𑁄𑀢𑀺, 𑀲𑁄𑀡𑁆𑀟𑀸𑀬 (𑀩𑀳𑀽𑀲𑀼)] 𑀅𑀧𑁆𑀧𑀳𑀭𑀺𑀢𑀁 𑀓𑀭𑁄𑀢𑀺, 𑀲𑁄𑀡𑁆𑀟𑀸𑀬 𑀘 [𑀅𑀧𑁆𑀧𑀳𑀭𑀺𑀢𑀜𑁆𑀘 𑀓𑀭𑁄𑀢𑀺, 𑀲𑁄𑀡𑁆𑀟𑀸𑀬 (𑀩𑀳𑀽𑀲𑀼)] 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺 [𑀉𑀧𑀝𑁆𑀞𑀧𑁂𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺𑀁 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀽𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺, 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀦𑀸𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺, 𑀅𑀦𑀸𑀓𑀺𑀡𑁆𑀡𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀻’’𑀢𑀺.

𑀢𑀲𑁆𑀲𑀧𑀺 𑀔𑁄 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺𑀁 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀮𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀺𑀁, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀺𑀁𑀲𑀼, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀅𑀧𑀸𑀬𑀺𑀁, 𑀑𑀕𑀸𑀳𑀸 𑀘 𑀫𑁂 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀅𑀕𑀫𑀁𑀲𑀼, 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀦𑀸𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀮𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀅𑀘𑁆𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀦 𑀔𑀸𑀤𑀦𑁆𑀢𑀺, 𑀅𑀦𑀸𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘 𑀫𑁂 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀦 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀅𑀦𑀸𑀓𑀺𑀡𑁆𑀡𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀯𑀺𑀯𑁂𑀓𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀘 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀏𑀢𑀁 [𑀏𑀯𑀁 (𑀓.)] 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄;

𑀲𑀫𑁂𑀢𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦, 𑀬𑀤𑁂𑀓𑁄 𑀭𑀫𑀢𑀻 𑀫𑀦𑁄’’𑀢𑀺. 𑀧𑀜𑁆𑀘𑀫𑀁;

𑁬. 𑀧𑀺𑀡𑁆𑀟𑁄𑀮𑀲𑀼𑀢𑁆𑀢𑀁

𑁩𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀆𑀭𑀜𑁆𑀜𑀺𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀢𑁂𑀘𑀻𑀯𑀭𑀺𑀓𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 [𑀆𑀭𑀤𑁆𑀥𑀯𑀺𑀭𑀺𑀬𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀥𑀼𑀢𑀯𑀸𑀤𑁄 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀆𑀭𑀜𑁆𑀜𑀺𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀁 𑀧𑀁𑀲𑀼𑀓𑀽𑀮𑀺𑀓𑀁 𑀢𑁂𑀘𑀻𑀯𑀭𑀺𑀓𑀁 𑀅𑀧𑁆𑀧𑀺𑀘𑁆𑀙𑀁 𑀲𑀦𑁆𑀢𑀼𑀝𑁆𑀞𑀁 𑀧𑀯𑀺𑀯𑀺𑀢𑁆𑀢𑀁 𑀅𑀲𑀁𑀲𑀝𑁆𑀞𑀁 𑀆𑀭𑀤𑁆𑀥𑀯𑀻𑀭𑀺𑀬𑀁 𑀥𑀼𑀢𑀯𑀸𑀤𑀁 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄 [𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄 (𑀲𑁆𑀬𑀸. 𑀧𑀻. 𑀓.)], 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑀙𑀝𑁆𑀞𑀁;

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁩𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀧𑁆𑀧𑀺𑀘𑁆𑀙𑀁 𑀲𑀦𑁆𑀢𑀼𑀝𑁆𑀞𑀁 𑀧𑀯𑀺𑀯𑀺𑀢𑁆𑀢𑀁 𑀅𑀲𑀁𑀲𑀝𑁆𑀞𑀁 𑀆𑀭𑀤𑁆𑀥𑀯𑀻𑀭𑀺𑀬𑀁 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀥𑀺𑀘𑁂𑀢𑀲𑁄 𑀅𑀧𑁆𑀧𑀫𑀚𑁆𑀚𑀢𑁄,

𑀫𑀼𑀦𑀺𑀦𑁄 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄;

𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄,

𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺. 𑀲𑀢𑁆𑀢𑀫𑀁;

𑁮. 𑀲𑀼𑀦𑁆𑀤𑀭𑀻𑀲𑀼𑀢𑁆𑀢𑀁

𑁩𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺 𑀅𑀕𑀭𑀼𑀓𑀢𑀸 𑀅𑀫𑀸𑀦𑀺𑀢𑀸 𑀅𑀧𑀽𑀚𑀺𑀢𑀸 𑀅𑀦𑀧𑀘𑀺𑀢𑀸 𑀦 𑀮𑀸𑀪𑀺𑀦𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁.

𑀅𑀣 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀬𑁂𑀦 𑀲𑀼𑀦𑁆𑀤𑀭𑀻 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀦𑁆𑀤𑀭𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀲𑁆𑀲𑀳𑀲𑀺 𑀢𑁆𑀯𑀁, 𑀪𑀕𑀺𑀦𑀺, 𑀜𑀸𑀢𑀻𑀦𑀁 𑀅𑀢𑁆𑀣𑀁 𑀓𑀸𑀢𑀼’’𑀦𑁆𑀢𑀺? ‘‘𑀓𑁆𑀬𑀸𑀳𑀁, 𑀅𑀬𑁆𑀬𑀸, 𑀓𑀭𑁄𑀫𑀺? 𑀓𑀺𑀁 𑀫𑀬𑀸 𑀦 𑀲𑀓𑁆𑀓𑀸 [𑀓𑀺𑀁 𑀫𑀬𑀸 𑀲𑀓𑁆𑀓𑀸 (𑀲𑁆𑀬𑀸. 𑀧𑀻.)] 𑀓𑀸𑀢𑀼𑀁? 𑀚𑀻𑀯𑀺𑀢𑀫𑁆𑀧𑀺 𑀫𑁂 𑀧𑀭𑀺𑀘𑁆𑀘𑀢𑁆𑀢𑀁 𑀜𑀸𑀢𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺.

‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀁 𑀕𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑀸’’𑀢𑀺 𑀔𑁄 𑀲𑀼𑀦𑁆𑀤𑀭𑀻 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺.

𑀬𑀤𑀸 𑀢𑁂 𑀅𑀜𑁆𑀜𑀺𑀁𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑁋 ‘‘𑀯𑁄𑀤𑀺𑀝𑁆𑀞𑀸 𑀔𑁄 𑀲𑀼𑀦𑁆𑀤𑀭𑀻 𑀧𑀭𑀺𑀩𑁆𑀩𑀸𑀚𑀺𑀓𑀸 𑀩𑀳𑀼𑀚𑀦𑁂𑀦 𑀅𑀪𑀺𑀓𑁆𑀔𑀡𑀁 𑀚𑁂𑀢𑀯𑀦𑀁 𑀕𑀘𑁆𑀙𑀢𑀻’’𑀢𑀺 [𑀕𑀘𑁆𑀙𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀅𑀣 𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀚𑁂𑀢𑀯𑀦𑀲𑁆𑀲 𑀧𑀭𑀺𑀔𑀸𑀓𑀽𑀧𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 [𑀦𑀺𑀔𑀦𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀸 𑀲𑀸, 𑀫𑀳𑀸𑀭𑀸𑀚, 𑀲𑀼𑀦𑁆𑀤𑀭𑀻 𑀧𑀭𑀺𑀩𑁆𑀩𑀸𑀚𑀺𑀓𑀸; 𑀲𑀸 𑀦𑁄 𑀦 𑀤𑀺𑀲𑁆𑀲𑀢𑀻’’𑀢𑀺. ‘‘𑀓𑀢𑁆𑀣 𑀧𑀦 𑀢𑀼𑀫𑁆𑀳𑁂 𑀆𑀲𑀗𑁆𑀓𑀣𑀸’’𑀢𑀺? ‘‘𑀚𑁂𑀢𑀯𑀦𑁂, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀚𑁂𑀢𑀯𑀦𑀁 𑀯𑀺𑀘𑀺𑀦𑀣𑀸’’𑀢𑀺.

𑀅𑀣 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀚𑁂𑀢𑀯𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀁 𑀧𑀭𑀺𑀔𑀸𑀓𑀽𑀧𑀸 𑀉𑀤𑁆𑀥𑀭𑀺𑀢𑁆𑀯𑀸 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀯𑁂𑀲𑁂𑀢𑁆𑀯𑀸 𑀭𑀣𑀺𑀬𑀸𑀬 𑀭𑀣𑀺𑀬𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀉𑀚𑁆𑀛𑀸𑀧𑁂𑀲𑀼𑀁 𑁋

‘‘𑀧𑀲𑁆𑀲𑀣𑀸𑀬𑁆𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫𑀁! 𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀫𑀼𑀲𑀸𑀯𑀸𑀤𑀺𑀦𑁄 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺! 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁? 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸, 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀓𑀣𑀜𑁆𑀳𑀺 𑀦𑀸𑀫 𑀧𑀼𑀭𑀺𑀲𑁄 𑀧𑀼𑀭𑀺𑀲𑀓𑀺𑀘𑁆𑀘𑀁 𑀓𑀭𑀺𑀢𑁆𑀯𑀸 𑀇𑀢𑁆𑀣𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀢𑀻’’𑀢𑀺!

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀯𑀺𑀳𑁂𑀲𑀦𑁆𑀢𑀺 𑁋

‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀫𑀼𑀲𑀸𑀯𑀸𑀤𑀺𑀦𑁄 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺! 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁? 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸, 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀓𑀣𑀜𑁆𑀳𑀺 𑀦𑀸𑀫 𑀧𑀼𑀭𑀺𑀲𑁄 𑀧𑀼𑀭𑀺𑀲𑀓𑀺𑀘𑁆𑀘𑀁 𑀓𑀭𑀺𑀢𑁆𑀯𑀸 𑀇𑀢𑁆𑀣𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀢𑀻’’𑀢𑀺!

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀯𑀺𑀳𑁂𑀲𑀦𑁆𑀢𑀺 𑁋 ‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀫𑀼𑀲𑀸𑀯𑀸𑀤𑀺𑀦𑁄 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺. 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁. 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁? 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸, 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀓𑀣𑀜𑁆𑀳𑀺 𑀦𑀸𑀫 𑀧𑀼𑀭𑀺𑀲𑁄 𑀧𑀼𑀭𑀺𑀲𑀓𑀺𑀘𑁆𑀘𑀁 𑀓𑀭𑀺𑀢𑁆𑀯𑀸 𑀇𑀢𑁆𑀣𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀢𑀻’’’𑀢𑀺!

‘‘𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀤𑁄 𑀘𑀺𑀭𑀁 𑀪𑀯𑀺𑀲𑁆𑀲𑀢𑀺 𑀲𑀢𑁆𑀢𑀸𑀳𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀬𑁂 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀯𑀺𑀳𑁂𑀲𑀦𑁆𑀢𑀺, 𑀢𑁂 𑀢𑀼𑀫𑁆𑀳𑁂 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀣 𑁋

‘‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺,

𑀬𑁄 𑀯𑀸𑀧𑀺 [𑀬𑁄 𑀘𑀸𑀧𑀺 (𑀲𑀻. 𑀧𑀻. 𑀓.)] 𑀓𑀢𑁆𑀯𑀸 𑀦 𑀓𑀭𑁄𑀫𑀺 𑀘𑀸𑀳;

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺,

𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀬𑁂 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀯𑀺𑀳𑁂𑀲𑀦𑁆𑀢𑀺 𑀢𑁂 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀦𑁆𑀢𑀺 𑁋

‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺,

𑀬𑁄 𑀯𑀸𑀧𑀺 𑀓𑀢𑁆𑀯𑀸 𑀦 𑀓𑀭𑁄𑀫𑀺𑀘𑀸𑀳;

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺,

𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’𑀢𑀺.

𑀫𑀦𑀼𑀲𑁆𑀲𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀭𑀓𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸. 𑀦𑀬𑀺𑀫𑁂𑀳𑀺 𑀓𑀢𑀁. 𑀲𑀧𑀦𑁆𑀢𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’’𑀢𑀺. 𑀦𑁂𑀯 𑀲𑁄 𑀲𑀤𑁆𑀤𑁄 𑀘𑀺𑀭𑀁 𑀅𑀳𑁄𑀲𑀺. 𑀲𑀢𑁆𑀢𑀸𑀳𑀫𑁂𑀯 𑀅𑀳𑁄𑀲𑀺. 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀤𑀯𑁄𑀘𑀼𑀁 𑁋

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁 𑀪𑀦𑁆𑀢𑁂 𑀪𑀕𑀯𑀢𑀸 𑁋 ‘𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀤𑁄 𑀘𑀺𑀭𑀁 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀢𑀸𑀳𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀻’𑀢𑀺. 𑀅𑀦𑁆𑀢𑀭𑀳𑀺𑀢𑁄 𑀲𑁄, 𑀪𑀦𑁆𑀢𑁂, 𑀲𑀤𑁆𑀤𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀢𑀼𑀤𑀦𑁆𑀢𑀺 𑀯𑀸𑀘𑀸𑀬 𑀚𑀦𑀸 𑀅𑀲𑀜𑁆𑀜𑀢𑀸,

𑀲𑀭𑁂𑀳𑀺 𑀲𑀗𑁆𑀕𑀸𑀫𑀕𑀢𑀁𑀯 𑀓𑀼𑀜𑁆𑀚𑀭𑀁;

𑀲𑀼𑀢𑁆𑀯𑀸𑀦 𑀯𑀸𑀓𑁆𑀬𑀁 𑀨𑀭𑀼𑀲𑀁 𑀉𑀤𑀻𑀭𑀺𑀢𑀁,

𑀅𑀥𑀺𑀯𑀸𑀲𑀬𑁂 𑀪𑀺𑀓𑁆𑀔𑀼 𑀅𑀤𑀼𑀝𑁆𑀞𑀘𑀺𑀢𑁆𑀢𑁄’’𑀢𑀺. 𑀅𑀝𑁆𑀞𑀫𑀁;

𑁯. 𑀉𑀧𑀲𑁂𑀦𑀲𑀼𑀢𑁆𑀢𑀁

𑁩𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀲𑁆𑀲 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀲𑀢𑁆𑀣𑀸 𑀘 𑀫𑁂 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄; 𑀲𑁆𑀯𑀸𑀓𑁆𑀔𑀸𑀢𑁂 𑀘𑀫𑁆𑀳𑀺 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄; 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀘 𑀫𑁂 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸; 𑀲𑀻𑀮𑁂𑀲𑀼 𑀘𑀫𑁆𑀳𑀺 𑀧𑀭𑀺𑀧𑀽𑀭𑀓𑀸𑀭𑀻; 𑀲𑀼𑀲𑀫𑀸𑀳𑀺𑀢𑁄 𑀘𑀫𑁆𑀳𑀺 𑀏𑀓𑀕𑁆𑀕𑀘𑀺𑀢𑁆𑀢𑁄; 𑀅𑀭𑀳𑀸 𑀘𑀫𑁆𑀳𑀺 𑀔𑀻𑀡𑀸𑀲𑀯𑁄; 𑀫𑀳𑀺𑀤𑁆𑀥𑀺𑀓𑁄 𑀘𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄. 𑀪𑀤𑁆𑀤𑀓𑀁 𑀫𑁂 𑀚𑀻𑀯𑀺𑀢𑀁, 𑀪𑀤𑁆𑀤𑀓𑀁 𑀫𑀭𑀡’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀲𑁆𑀲 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀁 𑀚𑀻𑀯𑀺𑀢𑀁 𑀦 𑀢𑀧𑀢𑀺, 𑀫𑀭𑀡𑀦𑁆𑀢𑁂 𑀦 𑀲𑁄𑀘𑀢𑀺;

𑀲 𑀯𑁂 𑀤𑀺𑀝𑁆𑀞𑀧𑀤𑁄 𑀥𑀻𑀭𑁄, 𑀲𑁄𑀓𑀫𑀚𑁆𑀛𑁂 𑀦 𑀲𑁄𑀘𑀢𑀺.

‘‘𑀉𑀘𑁆𑀙𑀺𑀦𑁆𑀦𑀪𑀯𑀢𑀡𑁆𑀳𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺. 𑀦𑀯𑀫𑀁;

𑁧𑁦. 𑀲𑀸𑀭𑀺𑀧𑀼𑀢𑁆𑀢𑀉𑀧𑀲𑀫𑀲𑀼𑀢𑁆𑀢𑀁

𑁪𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀢𑁆𑀢𑀦𑁄 𑀉𑀧𑀲𑀫𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀢𑁆𑀢𑀦𑁄 𑀉𑀧𑀲𑀫𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀉𑀧𑀲𑀦𑁆𑀢𑀲𑀦𑁆𑀢𑀘𑀺𑀢𑁆𑀢𑀲𑁆𑀲, 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀫𑀼𑀢𑁆𑀢𑁄 𑀲𑁄 𑀫𑀸𑀭𑀩𑀦𑁆𑀥𑀦𑀸’’𑀢𑀺. 𑀤𑀲𑀫𑀁;

𑀫𑁂𑀖𑀺𑀬𑀯𑀕𑁆𑀕𑁄 𑀘𑀢𑀼𑀢𑁆𑀣𑁄 𑀦𑀺𑀝𑁆𑀞𑀺𑀢𑁄.