𑁫. 𑀲𑁄𑀡𑀯𑀕𑁆𑀕𑁄 [𑀫𑀳𑀸𑀯𑀕𑁆𑀕 (𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺)]

𑁧. 𑀧𑀺𑀬𑀢𑀭𑀲𑀼𑀢𑁆𑀢𑀁

𑁪𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑁂, 𑀫𑀮𑁆𑀮𑀺𑀓𑁂, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺?

‘‘𑀦𑀢𑁆𑀣𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄. 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺? ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀫𑀮𑁆𑀮𑀺𑀓𑁂, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑀸𑀲𑀸𑀤𑀸 𑀑𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀢𑁂, 𑀫𑀮𑁆𑀮𑀺𑀓𑁂, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀫𑀁 𑀏𑀢𑀤𑀯𑁄𑀘 𑁋 ‘𑀦𑀢𑁆𑀣𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄. 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘𑀁 𑁋 ‘𑀫𑀬𑁆𑀳𑀫𑁆𑀧𑀺 𑀔𑁄, 𑀫𑀮𑁆𑀮𑀺𑀓𑁂, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸,

𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺;

𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁,

𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄’’𑀢𑀺. 𑀧𑀞𑀫𑀁;

𑁨. 𑀅𑀧𑁆𑀧𑀸𑀬𑀼𑀓𑀲𑀼𑀢𑁆𑀢𑀁

𑁪𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 [𑀧𑀝𑀺𑀲𑀮𑁆𑀮𑀸𑀡𑀸 (𑀲𑀻.)] 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀅𑀧𑁆𑀧𑀸𑀬𑀼𑀓𑀸 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀫𑀸𑀢𑀸 𑀅𑀳𑁄𑀲𑀺, 𑀲𑀢𑁆𑀢𑀸𑀳𑀚𑀸𑀢𑁂 𑀪𑀕𑀯𑀢𑀺 𑀪𑀕𑀯𑀢𑁄 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺, 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀻’’𑀢𑀺.

‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤 [𑀏𑀯𑀫𑁂𑀢𑀁 𑀆𑀦𑀦𑁆𑀤 𑀏𑀯𑀫𑁂𑀢𑀁 𑀆𑀦𑀦𑁆𑀤 (𑀲𑁆𑀬𑀸.)], 𑀅𑀧𑁆𑀧𑀸𑀬𑀼𑀓𑀸 𑀳𑀺, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑁄 𑀳𑁄𑀦𑁆𑀢𑀺. 𑀲𑀢𑁆𑀢𑀸𑀳𑀚𑀸𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑁄 𑀓𑀸𑀮𑀁 𑀓𑀭𑁄𑀦𑁆𑀢𑀺, 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀓𑁂𑀘𑀺 𑀪𑀽𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀬𑁂 𑀯𑀸𑀧𑀺,

𑀲𑀩𑁆𑀩𑁂 𑀕𑀫𑀺𑀲𑁆𑀲𑀦𑁆𑀢𑀺 𑀧𑀳𑀸𑀬 𑀤𑁂𑀳𑀁;

𑀢𑀁 𑀲𑀩𑁆𑀩𑀚𑀸𑀦𑀺𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸,

𑀆𑀢𑀸𑀧𑀺𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸’’𑀢𑀺. 𑀤𑀼𑀢𑀺𑀬𑀁;

𑁩. 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀲𑀼𑀢𑁆𑀢𑀁

𑁪𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦𑀸𑀫 𑀓𑀼𑀝𑁆𑀞𑀻 𑀅𑀳𑁄𑀲𑀺 𑁋 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄, 𑀫𑀦𑀼𑀲𑁆𑀲𑀓𑀧𑀡𑁄, 𑀫𑀦𑀼𑀲𑁆𑀲𑀯𑀭𑀸𑀓𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀅𑀤𑁆𑀤𑀲𑀸 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀢𑀁 𑀫𑀳𑀸𑀚𑀦𑀓𑀸𑀬𑀁 𑀤𑀽𑀭𑀢𑁄𑀯 𑀲𑀦𑁆𑀦𑀺𑀧𑀢𑀺𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀏𑀢𑁆𑀣 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀪𑀸𑀚𑀻𑀬𑀢𑀺 [𑀪𑀸𑀚𑀻𑀬𑀺𑀲𑁆𑀲𑀢𑀺 (𑀲𑀻.)]. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑁄 𑀫𑀳𑀸𑀚𑀦𑀓𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁. 𑀅𑀧𑁆𑀧𑁂𑀯 𑀦𑀸𑀫𑁂𑀢𑁆𑀣 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀮𑀪𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀬𑁂𑀦 𑀲𑁄 𑀫𑀳𑀸𑀚𑀦𑀓𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀪𑀕𑀯𑀦𑁆𑀢𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀏𑀢𑁆𑀣 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀪𑀸𑀚𑀻𑀬𑀢𑀺. 𑀲𑀫𑀡𑁄 𑀅𑀬𑀁 𑀕𑁄𑀢𑀫𑁄 𑀧𑀭𑀺𑀲𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺. 𑀢𑀢𑁆𑀣𑁂𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑁋 ‘‘𑀅𑀳𑀫𑁆𑀧𑀺 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀩𑁆𑀩𑀸𑀯𑀦𑁆𑀢𑀁 𑀧𑀭𑀺𑀲𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀸𑀓𑀸𑀲𑀺 ‘‘𑀓𑁄 𑀦𑀼 𑀔𑁄 𑀇𑀥 𑀪𑀩𑁆𑀩𑁄 𑀥𑀫𑁆𑀫𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺? 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑀼𑀧𑁆𑀧𑀩𑀼𑀤𑁆𑀥𑀁 𑀓𑀼𑀝𑁆𑀞𑀺𑀁 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀇𑀥 𑀪𑀩𑁆𑀩𑁄 𑀥𑀫𑁆𑀫𑀁 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺. 𑀲𑀼𑀧𑁆𑀧𑀩𑀼𑀤𑁆𑀥𑀁 𑀓𑀼𑀝𑁆𑀞𑀺𑀁 𑀆𑀭𑀩𑁆𑀪 𑀆𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 [𑀆𑀦𑀼𑀧𑀼𑀩𑁆𑀩𑀺𑀓𑀣𑀁 (𑀲𑀻.), 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 (𑀲𑁆𑀬𑀸. 𑀧𑀻. 𑀓.)] 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁; 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀗𑁆𑀓𑀺𑀮𑁂𑀲𑀁; 𑀦𑁂𑀓𑁆𑀔𑀫𑁆𑀫𑁂 [𑀦𑁂𑀓𑁆𑀔𑀫𑁆𑀫𑁂 𑀘 (𑀲𑀻. 𑀲𑁆𑀬𑀸. 𑀧𑀻.)] 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀲𑀼𑀧𑁆𑀧𑀩𑀼𑀤𑁆𑀥𑀁 𑀓𑀼𑀝𑁆𑀞𑀺𑀁 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀓𑀼𑀝𑁆𑀞𑀺𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀁 𑀲𑀼𑀧𑁆𑀧𑀩𑀼𑀤𑁆𑀥𑀁 𑀓𑀼𑀝𑁆𑀞𑀺𑀁 𑀕𑀸𑀯𑀻 𑀢𑀭𑀼𑀡𑀯𑀘𑁆𑀙𑀸 𑀅𑀥𑀺𑀧𑀢𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁄 𑀲𑁄, 𑀪𑀦𑁆𑀢𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦𑀸𑀫 𑀓𑀼𑀝𑁆𑀞𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄, 𑀲𑁄 𑀓𑀸𑀮𑀗𑁆𑀓𑀢𑁄. 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺?

‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻; 𑀧𑀘𑁆𑀘𑀧𑀸𑀤𑀺 𑀥𑀫𑁆𑀫𑀲𑁆𑀲𑀸𑀦𑀼𑀥𑀫𑁆𑀫𑀁; 𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀺. 𑀲𑀼𑀧𑁆𑀧𑀩𑀼𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀓𑀼𑀝𑁆𑀞𑀻 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀅𑀳𑁄𑀲𑀺 𑁋 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄, 𑀫𑀦𑀼𑀲𑁆𑀲𑀓𑀧𑀡𑁄, 𑀫𑀦𑀼𑀲𑁆𑀲𑀯𑀭𑀸𑀓𑁄’’𑀢𑀺?

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀼𑀝𑁆𑀞𑀻 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀅𑀤𑁆𑀤𑀲 𑀢𑀕𑀭𑀲𑀺𑀔𑀺𑀁 [𑀢𑀕𑁆𑀕𑀭𑀲𑀺𑀔𑀺𑀁 (𑀓.)] 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑁆𑀯𑀸𑀬𑀁 𑀓𑀼𑀝𑁆𑀞𑀻 𑀓𑀼𑀝𑁆𑀞𑀺𑀘𑀻𑀯𑀭𑁂𑀦 𑀯𑀺𑀘𑀭𑀢𑀻’𑀢𑀺? 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀅𑀧𑀲𑀩𑁆𑀬𑀢𑁄 [𑀅𑀧𑀩𑁆𑀬𑀸𑀫𑀢𑁄 (𑀲𑁆𑀬𑀸. 𑀲𑀁. 𑀦𑀺. 𑁧.𑁨𑁫𑁫)] 𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀣. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀓𑀼𑀝𑁆𑀞𑀻 𑀅𑀳𑁄𑀲𑀺 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄, 𑀫𑀦𑀼𑀲𑁆𑀲𑀓𑀧𑀡𑁄, 𑀫𑀦𑀼𑀲𑁆𑀲𑀯𑀭𑀸𑀓𑁄. 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺 𑀲𑀻𑀮𑀁 𑀲𑀫𑀸𑀤𑀺𑀬𑀺 𑀲𑀼𑀢𑀁 𑀲𑀫𑀸𑀤𑀺𑀬𑀺 𑀘𑀸𑀕𑀁 𑀲𑀫𑀸𑀤𑀺𑀬𑀺 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺. 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀘𑀸𑀕𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀜𑁆𑀜𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑁄 𑀢𑀢𑁆𑀣 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀘𑀓𑁆𑀔𑀼𑀫𑀸 𑀯𑀺𑀲𑀫𑀸𑀦𑀻𑀯, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂;

𑀧𑀡𑁆𑀟𑀺𑀢𑁄 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺. 𑀢𑀢𑀺𑀬𑀁;

𑁪. 𑀓𑀼𑀫𑀸𑀭𑀓𑀲𑀼𑀢𑁆𑀢𑀁

𑁪𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀓𑀼𑀫𑀸𑀭𑀓𑀸 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀫𑀘𑁆𑀙𑀓𑁂 𑀩𑀸𑀥𑁂𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀲𑀫𑁆𑀩𑀳𑀼𑀮𑁂 𑀓𑀼𑀫𑀸𑀭𑀓𑁂 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀫𑀘𑁆𑀙𑀓𑁂 𑀩𑀸𑀥𑁂𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀓𑀼𑀫𑀸𑀭𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀓𑀼𑀫𑀸𑀭𑀓𑁂 𑀏𑀢𑀤𑀯𑁄𑀘 𑁋 ‘‘𑀪𑀸𑀬𑀣 𑀯𑁄, 𑀢𑀼𑀫𑁆𑀳𑁂 𑀓𑀼𑀫𑀸𑀭𑀓𑀸, 𑀤𑀼𑀓𑁆𑀔𑀲𑁆𑀲, 𑀅𑀧𑁆𑀧𑀺𑀬𑀁 𑀯𑁄 𑀤𑀼𑀓𑁆𑀔’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂, 𑀪𑀸𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀤𑀼𑀓𑁆𑀔𑀲𑁆𑀲, 𑀅𑀧𑁆𑀧𑀺𑀬𑀁 𑀦𑁄 𑀤𑀼𑀓𑁆𑀔’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀣 𑀓𑀭𑁄𑀣 𑀯𑀸;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁂𑀘𑁆𑀘𑀧𑀺 [𑀉𑀧𑀘𑁆𑀘𑀧𑀺 (𑀓.), 𑀉𑀧𑁆𑀧𑀘𑁆𑀘𑀧𑀺 (?), 𑀉𑀧𑁆𑀧𑀢𑀺𑀢𑁆𑀯𑀸𑀧𑀺 𑀇𑀢𑀺 𑀅𑀢𑁆𑀣𑁄] 𑀧𑀮𑀸𑀬𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑀁;

𑁫. 𑀉𑀧𑁄𑀲𑀣𑀲𑀼𑀢𑁆𑀢𑀁

𑁪𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂, 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 [𑀘𑀻𑀯𑀭𑀁 (𑀲𑀩𑁆𑀩𑀢𑁆𑀣)] 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄; 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀫𑀚𑁆𑀛𑀺𑀫𑁄 𑀬𑀸𑀫𑁄; 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂, 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄; 𑀉𑀤𑁆𑀥𑀲𑁆𑀢𑁄 𑀅𑀭𑀼𑀡𑁄; 𑀦𑀦𑁆𑀤𑀺𑀫𑀼𑀔𑀻 𑀭𑀢𑁆𑀢𑀺; 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀁 𑀦𑀼 𑀔𑁄 𑀪𑀕𑀯𑀸 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳 𑁋 ‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀩𑁆𑀩𑀸𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀸𑀓𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀲𑁆𑀲𑀻𑀮𑀁 𑀧𑀸𑀧𑀥𑀫𑁆𑀫𑀁 𑀅𑀲𑀼𑀘𑀺𑀁 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀁 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀁 𑀅𑀲𑀫𑀡𑀁 𑀲𑀫𑀡𑀧𑀝𑀺𑀜𑁆𑀜𑀁 𑀅𑀩𑁆𑀭𑀳𑁆𑀫𑀘𑀸𑀭𑀺𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀁 𑀅𑀦𑁆𑀢𑁄𑀧𑀽𑀢𑀺𑀁 𑀅𑀯𑀲𑁆𑀲𑀼𑀢𑀁 𑀓𑀲𑀫𑁆𑀩𑀼𑀚𑀸𑀢𑀁 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄, 𑀤𑀺𑀝𑁆𑀞𑁄𑀲𑀺 𑀪𑀕𑀯𑀢𑀸; 𑀦𑀢𑁆𑀣𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 [𑀅𑀣 𑀔𑁄 (𑀲𑀩𑁆𑀩𑀢𑁆𑀣), 𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦 𑀧𑀲𑁆𑀲𑀺𑀢𑀩𑁆𑀩𑀁], 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄, 𑀤𑀺𑀝𑁆𑀞𑁄𑀲𑀺 𑀪𑀕𑀯𑀢𑀸; 𑀦𑀢𑁆𑀣𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀸𑀫𑀺𑀢𑁄, 𑀪𑀦𑁆𑀢𑁂, 𑀲𑁄 𑀧𑀼𑀕𑁆𑀕𑀮𑁄 𑀫𑀬𑀸. 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀲𑀸. 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀩𑁆𑀪𑀼𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦! 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑁂𑀲𑁆𑀲𑀢𑀻’’𑀢𑀺!

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦 𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 [𑀦 𑀤𑀸𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀚𑁆𑀚𑀢𑀕𑁆𑀕𑁂 (𑀅. 𑀦𑀺. 𑁮.𑁨𑁦)] 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺. 𑀢𑀼𑀫𑁆𑀳𑁂𑀯 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬.

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞?

‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄, 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄. 𑀬𑀫𑁆𑀧𑀺 [𑀬𑀁 (𑀲𑀻. 𑀲𑁆𑀬𑀸. 𑀓.)], 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂 [𑀅𑀬𑀫𑁆𑀧𑀺 (𑀲𑀩𑁆𑀩𑀢𑁆𑀣)], 𑀫𑀳𑀸𑀲𑀫𑀼𑀤𑁆𑀤𑁂 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺. 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁 𑀢𑀁 𑀔𑀺𑀧𑁆𑀧𑀫𑁂𑀯 [𑀔𑀺𑀧𑁆𑀧𑀜𑁆𑀜𑁂𑀯 (𑀲𑀻.), 𑀔𑀺𑀧𑁆𑀧𑀁𑀬𑁂𑀯 (𑀓.)] 𑀢𑀻𑀭𑀁 𑀯𑀸𑀳𑁂𑀢𑀺, 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺, 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀢𑀻𑀭𑀁 𑀯𑀸𑀳𑁂𑀢𑀺 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻, 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 [𑀧𑀢𑁆𑀢𑀸 (𑀲𑁆𑀬𑀸. 𑀧𑀻. 𑀓.)] 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺; ‘𑀫𑀳𑀸𑀲𑀫𑀼𑀤𑁆𑀤𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, ‘𑀫𑀳𑀸𑀲𑀫𑀼𑀤𑁆𑀤𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀸 𑀘 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀘 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑁆𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄. 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀕𑁄 𑀫𑀲𑀸𑀭𑀕𑀮𑁆𑀮𑀁. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀕𑁄 [𑀮𑁄𑀳𑀺𑀢𑀗𑁆𑀓𑁄 (𑀲𑀻. 𑀧𑀻.), 𑀮𑁄𑀳𑀺𑀢𑀓𑁄 (?)] 𑀫𑀲𑀸𑀭𑀕𑀮𑁆𑀮𑀁; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄. 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄 [𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 (𑀲𑀻. 𑀧𑀻., 𑀅. 𑀦𑀺. 𑁮.𑁧𑁯)] 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀢𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸, 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸…𑀧𑁂… 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸; 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀫𑀳𑀸𑀲𑀫𑀼𑀤𑁆𑀤𑁂 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄, 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸, 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸, 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺; 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀢𑀻𑀭𑀁 𑀯𑀸𑀳𑁂𑀢𑀺, 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄, 𑀦 𑀢𑁂𑀦 𑀲𑀗𑁆𑀖𑁄 𑀲𑀁𑀯𑀲𑀢𑀺; 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑁄, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀗𑁆𑀖𑀫𑁆𑀳𑀸, 𑀲𑀗𑁆𑀖𑁄 𑀘 𑀢𑁂𑀦. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄, 𑀦 𑀢𑁂𑀦 𑀲𑀗𑁆𑀖𑁄 𑀲𑀁𑀯𑀲𑀢𑀺; 𑀔𑀺𑀧𑁆𑀧𑀫𑁂𑀯 𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑁄, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀗𑁆𑀖𑀫𑁆𑀳𑀸, 𑀲𑀗𑁆𑀖𑁄 𑀘 𑀢𑁂𑀦; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, ‘𑀫𑀳𑀸𑀲𑀫𑀼𑀤𑁆𑀤𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑀸, 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀢𑁂 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 [𑀧𑀩𑁆𑀩𑀚𑀺𑀢𑀸 (𑀓. 𑀲𑀻.)] 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, ‘𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑀸, 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀢𑁂 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, ‘𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀘 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀩𑀳𑀽 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀩𑀳𑀽 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀕𑁄 𑀫𑀲𑀸𑀭𑀕𑀮𑁆𑀮𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄; 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸, 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑀢𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄; 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀺, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄 [𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 (𑀲𑀻.)]. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀻, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺. 𑀧𑀜𑁆𑀘𑀫𑀁;

𑁬. 𑀲𑁄𑀡𑀲𑀼𑀢𑁆𑀢𑀁

𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀯𑀦𑁆𑀢𑀻𑀲𑀼 𑀯𑀺𑀳𑀭𑀢𑀺 𑀓𑀼𑀭𑀭𑀖𑀭𑁂 [𑀓𑀼𑀭𑀼𑀭𑀖𑀭𑁂 (𑀲𑁆𑀬𑀸. 𑀫𑀳𑀸𑀯. 𑁨𑁫𑁭), 𑀓𑀼𑀮𑀖𑀭𑁂 (𑀓.)] 𑀧𑀯𑀢𑁆𑀢𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺.

𑀅𑀣 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑀣𑀸 𑀬𑀣𑀸 𑀔𑁄 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀬𑀣𑀸 𑀬𑀣𑀸 𑀔𑁄 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀏𑀢𑀤𑀯𑁄𑀘 𑁋 ‘‘𑀤𑀼𑀓𑁆𑀓𑀭𑀁 𑀔𑁄, 𑀲𑁄𑀡, 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀗𑁆𑀖 𑀢𑁆𑀯𑀁, 𑀲𑁄𑀡, 𑀢𑀢𑁆𑀣𑁂𑀯 𑀆𑀕𑀸𑀭𑀺𑀓𑀪𑀽𑀢𑁄 𑀲𑀫𑀸𑀦𑁄 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚 𑀓𑀸𑀮𑀬𑀼𑀢𑁆𑀢𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀬𑁄 𑀅𑀳𑁄𑀲𑀺 𑀧𑀩𑁆𑀩𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀲𑁄 𑀧𑀝𑀺𑀧𑀲𑁆𑀲𑀫𑁆𑀪𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀏𑀢𑀤𑀯𑁄𑀘 𑁋 ‘‘𑀤𑀼𑀓𑁆𑀓𑀭𑀁 𑀔𑁄, 𑀲𑁄𑀡, 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀗𑁆𑀖 𑀢𑁆𑀯𑀁, 𑀲𑁄𑀡, 𑀢𑀢𑁆𑀣𑁂𑀯 𑀆𑀕𑀸𑀭𑀺𑀓𑀪𑀽𑀢𑁄 𑀲𑀫𑀸𑀦𑁄 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚 𑀓𑀸𑀮𑀬𑀼𑀢𑁆𑀢𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀬𑁄 𑀅𑀳𑁄𑀲𑀺 𑀧𑀩𑁆𑀩𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀲𑁄 𑀧𑀝𑀺𑀧𑀲𑁆𑀲𑀫𑁆𑀪𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑀣𑀸 𑀬𑀣𑀸 𑀔𑁄 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀬𑀣𑀸 𑀬𑀣𑀸 𑀔𑁄 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀧𑀩𑁆𑀩𑀸𑀚𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄 [𑀅𑀯𑀦𑁆𑀢𑀺 𑀤𑀓𑁆𑀔𑀺𑀡𑀧𑀣𑁄 (𑀲𑀻.)] 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀉𑀧𑀲𑀫𑁆𑀧𑀸𑀤𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲 [𑀯𑀲𑁆𑀲𑀁𑀯𑀼𑀢𑁆𑀣𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀦 𑀔𑁄 𑀫𑁂 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄, 𑀅𑀧𑀺 𑀘 𑀲𑀼𑀢𑁄𑀬𑁂𑀯 𑀫𑁂 𑀲𑁄 𑀪𑀕𑀯𑀸 𑁋 ‘𑀈𑀤𑀺𑀲𑁄 𑀘 𑀈𑀤𑀺𑀲𑁄 𑀘𑀸’𑀢𑀺. 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀦 𑀔𑁄 𑀫𑁂 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄, 𑀅𑀧𑀺 𑀘 𑀲𑀼𑀢𑁄𑀬𑁂𑀯 𑀫𑁂 𑀲𑁄 𑀪𑀕𑀯𑀸 𑁋 𑀈𑀤𑀺𑀲𑁄 𑀘 𑀈𑀤𑀺𑀲𑁄 𑀘𑀸’𑀢𑀺. 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 ( ) [(𑀕𑀘𑁆𑀙𑁂𑀬𑁆𑀬𑀸𑀳𑀁 𑀪𑀦𑁆𑀢𑁂 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑀸𑀢𑀻𑀢𑀺 (𑀫𑀳𑀸𑀯. 𑁨𑁫𑁭)].

‘‘𑀲𑀸𑀥𑀼 𑀲𑀸𑀥𑀼, 𑀲𑁄𑀡; 𑀕𑀘𑁆𑀙 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 [𑀲𑀫𑀸𑀲𑀫𑁆𑀩𑀼𑀤𑁆𑀥𑀦𑁆𑀢𑀺 (𑀲𑀩𑁆𑀩𑀢𑁆𑀣)]. 𑀤𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀢𑀫𑀸𑀦𑀲𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀬𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀕𑀁. 𑀤𑀺𑀲𑁆𑀯𑀸𑀦 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 [𑀨𑀸𑀲𑀼𑀯𑀺𑀳𑀸𑀭𑀜𑁆𑀘 (𑀲𑀻.)] 𑀧𑀼𑀘𑁆𑀙 𑁋 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 [𑀨𑀸𑀲𑀼𑀯𑀺𑀳𑀸𑀭𑀜𑁆𑀘 (𑀲𑀻.)] 𑀧𑀼𑀘𑁆𑀙𑀢𑀻’’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 [𑀨𑀸𑀲𑀼𑀯𑀺𑀳𑀸𑀭𑀜𑁆𑀘 (𑀲𑀻.)] 𑀧𑀼𑀘𑁆𑀙𑀢𑀻’’𑀢𑀺.

‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀦𑁆𑀢𑁄𑀲𑀻’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸, 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘𑀸𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀦 𑀧𑀺𑀡𑁆𑀟𑀓𑁂𑀦 𑀓𑀺𑀮𑀦𑁆𑀢𑁄𑀫𑁆𑀳𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲𑀸𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀲𑁆𑀲 𑀔𑁄 𑀫𑀁 𑀪𑀕𑀯𑀸 𑀆𑀡𑀸𑀧𑁂𑀢𑀺 𑁋 ‘𑀇𑀫𑀲𑁆𑀲𑀸𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’𑀢𑀺, 𑀇𑀘𑁆𑀙𑀢𑀺 𑀪𑀕𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼𑀁, 𑀇𑀘𑁆𑀙𑀢𑀺 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀲𑁄𑀡𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼’’𑀦𑁆𑀢𑀺. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀺.

𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀅𑀚𑁆𑀛𑁂𑀲𑀺 𑁋 ‘‘𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀼 𑀥𑀫𑁆𑀫𑁄 𑀪𑀸𑀲𑀺𑀢𑀼’’𑀦𑁆𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 𑀲𑀩𑁆𑀩𑀸𑀦𑁂𑀯 𑀲𑀭𑁂𑀦 𑀅𑀪𑀡𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀅𑀩𑁆𑀪𑀦𑀼𑀫𑁄𑀤𑀺 𑁋 ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼, 𑀲𑀼𑀕𑁆𑀕𑀳𑀺𑀢𑀸𑀦𑀺 𑀢𑁂, 𑀪𑀺𑀓𑁆𑀔𑀼, 𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 𑀲𑀼𑀫𑀦𑀲𑀺𑀓𑀢𑀸𑀦𑀺 𑀲𑀽𑀧𑀥𑀸𑀭𑀺𑀢𑀸𑀦𑀺, 𑀓𑀮𑁆𑀬𑀸𑀡𑀺𑀬𑀸𑀲𑀺 [𑀓𑀮𑁆𑀬𑀸𑀡𑀺𑀬𑀸 𑀘 (𑀓.), 𑀓𑀮𑁆𑀬𑀸𑀡𑀺𑀬𑀸 𑀘𑀸𑀲𑀺 (?)] 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀓𑀢𑀺 𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀏𑀓𑀯𑀲𑁆𑀲𑁄 𑀅𑀳𑀁 𑀪𑀕𑀯𑀸’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻’’𑀢𑀺? ‘‘𑀘𑀺𑀭𑀁 𑀤𑀺𑀝𑁆𑀞𑁄 [𑀘𑀺𑀭𑀤𑀺𑀝𑁆𑀞𑁄 (𑀲𑀻.)] 𑀫𑁂, 𑀪𑀦𑁆𑀢𑁂, 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄; 𑀅𑀧𑀺 𑀘 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀁;

𑀅𑀭𑀺𑀬𑁄 𑀦 𑀭𑀫𑀢𑀻 𑀧𑀸𑀧𑁂, 𑀧𑀸𑀧𑁂 𑀦 𑀭𑀫𑀢𑀻 𑀲𑀼𑀘𑀻’’𑀢𑀺. 𑀙𑀝𑁆𑀞𑀁;

𑁭. 𑀓𑀗𑁆𑀔𑀸𑀭𑁂𑀯𑀢𑀲𑀼𑀢𑁆𑀢𑀁

𑁪𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀓𑀗𑁆𑀔𑀸𑀭𑁂𑀯𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀢𑁆𑀢𑀦𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀗𑁆𑀔𑀸𑀭𑁂𑀯𑀢𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀢𑁆𑀢𑀦𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀸 𑀓𑀸𑀘𑀺 𑀓𑀗𑁆𑀔𑀸 𑀇𑀥 𑀯𑀸 𑀳𑀼𑀭𑀁 𑀯𑀸,

𑀲𑀓𑀯𑁂𑀤𑀺𑀬𑀸 𑀯𑀸 𑀧𑀭𑀯𑁂𑀤𑀺𑀬𑀸 𑀯𑀸;

𑀬𑁂 𑀛𑀸𑀬𑀺𑀦𑁄 𑀢𑀸 𑀧𑀚𑀳𑀦𑁆𑀢𑀺 𑀲𑀩𑁆𑀩𑀸,

𑀆𑀢𑀸𑀧𑀺𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸’’𑀢𑀺. 𑀲𑀢𑁆𑀢𑀫𑀁;

𑁮. 𑀲𑀗𑁆𑀖𑀪𑁂𑀤𑀲𑀼𑀢𑁆𑀢𑀁

𑁪𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀤𑀳𑀼𑀧𑁄𑀲𑀣𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀅𑀤𑁆𑀤𑀲𑀸 𑀔𑁄 𑀤𑁂𑀯𑀤𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀗𑁆𑀖𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀗𑁆𑀖𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸’𑀢𑀺. 𑀅𑀚𑁆𑀚, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀉𑀧𑁄𑀲𑀣𑀜𑁆𑀘 𑀓𑀭𑀺𑀲𑁆𑀲𑀢𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼, 𑀲𑀸𑀥𑀼 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁 [𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼𑀁, 𑀲𑀸𑀥𑀼𑀁 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁 (𑀓.)];

𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀁, 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭’’𑀦𑁆𑀢𑀺. 𑀅𑀝𑁆𑀞𑀫𑀁;

𑁯. 𑀲𑀥𑀸𑀬𑀫𑀸𑀦𑀲𑀼𑀢𑁆𑀢𑀁

𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀫𑀸𑀡𑀯𑀓𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀲𑀥𑀸𑀬𑀫𑀸𑀦𑀭𑀽𑀧𑀸 [𑀲𑀤𑁆𑀤𑀸𑀬𑀫𑀸𑀦𑀭𑀽𑀧𑀸 (𑀲𑁆𑀬𑀸. 𑀧𑀻. 𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁), 𑀧𑀣𑀸𑀬𑀫𑀸𑀦𑀭𑀽𑀧𑀸 (𑀓.), 𑀯𑀥𑀸𑀬𑀫𑀸𑀦𑀭𑀽𑀧𑀸 (𑀓. 𑀲𑀻., 𑀓. 𑀅𑀝𑁆𑀞.), 𑀲𑀤𑁆𑀥𑀸𑀬𑀫𑀸𑀦𑀭𑀽𑀧𑀸 (?), 𑀲𑀤𑁆𑀥𑀼𑀥𑀸𑀢𑀼𑀬𑀸 𑀲𑀥𑀼𑀥𑀸𑀢𑀼𑀬𑀸 𑀯𑀸 𑀲𑀺𑀤𑁆𑀥𑀫𑀺𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁] 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂 𑀫𑀸𑀡𑀯𑀓𑁂 𑀅𑀯𑀺𑀤𑀽𑀭𑁂 𑀲𑀥𑀸𑀬𑀫𑀸𑀦𑀭𑀽𑀧𑁂 𑀅𑀢𑀺𑀓𑁆𑀓𑀦𑁆𑀢𑁂.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽’’𑀢𑀺. 𑀦𑀯𑀫𑀁;

𑁧𑁦. 𑀘𑀽𑀴𑀧𑀦𑁆𑀣𑀓𑀲𑀼𑀢𑁆𑀢𑀁

𑁫𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 [𑀘𑀼𑀮𑁆𑀮𑀧𑀦𑁆𑀣𑀓𑁄 (𑀲𑀻.), 𑀘𑀽𑀮𑀧𑀦𑁆𑀣𑀓𑁄 (𑀧𑀻.)] 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀘𑀽𑀴𑀧𑀦𑁆𑀣𑀓𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀞𑀺𑀢𑁂𑀦 𑀓𑀸𑀬𑁂𑀦 𑀞𑀺𑀢𑁂𑀦 𑀘𑁂𑀢𑀲𑀸,

𑀢𑀺𑀝𑁆𑀞𑀁 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀸𑀦𑁄;

𑀏𑀢𑀁 [𑀏𑀯𑀁 (𑀓.)] 𑀲𑀢𑀺𑀁 𑀪𑀺𑀓𑁆𑀔𑀼 𑀅𑀥𑀺𑀝𑁆𑀞𑀳𑀸𑀦𑁄,

𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁;

𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁,

𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’𑀢𑀺. 𑀤𑀲𑀫𑀁;

𑀲𑁄𑀡𑀯𑀕𑁆𑀕𑁄 [𑀲𑁄𑀡𑀣𑁂𑀭𑀯𑀕𑁆𑀕𑁄 (𑀲𑁆𑀬𑀸. 𑀓𑀁. 𑀓.) 𑀫𑀳𑀸𑀯𑀕𑁆𑀕𑁄 (𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺)] 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.