𑁩. 𑀲𑀻𑀳𑀸𑀣𑁂𑀭𑀻𑀕𑀸𑀣𑀸

𑁭𑁭. ‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸;

𑀅𑀳𑁄𑀲𑀺𑀁 𑀉𑀤𑁆𑀥𑀢𑀸 𑀧𑀼𑀩𑁆𑀩𑁂, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁭𑁮. ‘‘𑀧𑀭𑀺𑀬𑀼𑀝𑁆𑀞𑀺𑀢𑀸 𑀓𑁆𑀮𑁂𑀲𑁂𑀳𑀺, 𑀲𑀼𑀪𑀲𑀜𑁆𑀜𑀸𑀦𑀼𑀯𑀢𑁆𑀢𑀺𑀦𑀻;

𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦 𑀮𑀪𑀺𑀁, 𑀭𑀸𑀕𑀘𑀺𑀢𑁆𑀢𑀯𑀲𑀸𑀦𑀼𑀕𑀸.

𑁭𑁯. ‘‘𑀓𑀺𑀲𑀸 𑀧𑀡𑁆𑀟𑀼 𑀯𑀺𑀯𑀡𑁆𑀡𑀸 𑀘, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀘𑀸𑀭𑀺𑀳𑀁;

𑀦𑀸𑀳𑀁 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀯𑀺𑀦𑁆𑀤𑀺𑀁 𑀲𑀼𑀤𑀼𑀓𑁆𑀔𑀺𑀢𑀸.

𑁮𑁦. ‘‘𑀢𑀢𑁄 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀯𑀺𑀲𑀺𑀁 𑀯𑀦𑀫𑀦𑁆𑀢𑀭𑀁;

𑀯𑀭𑀁 𑀫𑁂 𑀇𑀥 𑀉𑀩𑁆𑀩𑀦𑁆𑀥𑀁, 𑀬𑀜𑁆𑀘 𑀳𑀻𑀦𑀁 𑀧𑀼𑀦𑀸𑀘𑀭𑁂.

𑁮𑁧. ‘‘𑀤𑀴𑁆𑀳𑀧𑀸𑀲𑀁 [𑀤𑀴𑁆𑀳𑀁 𑀧𑀸𑀲𑀁 (𑀲𑀻.)] 𑀓𑀭𑀺𑀢𑁆𑀯𑀸𑀦, 𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀺𑀬;

𑀧𑀓𑁆𑀔𑀺𑀧𑀺𑀁 𑀧𑀸𑀲𑀁 𑀕𑀻𑀯𑀸𑀬𑀁, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺.

… 𑀲𑀻𑀳𑀸 𑀣𑁂𑀭𑀻….