𑁨. 𑀯𑀺𑀫𑀮𑀸𑀣𑁂𑀭𑀻𑀕𑀸𑀣𑀸

𑁭𑁨. ‘‘𑀫𑀢𑁆𑀢𑀸 𑀯𑀡𑁆𑀡𑁂𑀦 𑀭𑀽𑀧𑁂𑀦, 𑀲𑁄𑀪𑀕𑁆𑀕𑁂𑀦 𑀬𑀲𑁂𑀦 𑀘;

𑀬𑁄𑀩𑁆𑀩𑀦𑁂𑀦 𑀘𑀼𑀧𑀢𑁆𑀣𑀤𑁆𑀥𑀸, 𑀅𑀜𑁆𑀜𑀸𑀲𑀫𑀢𑀺𑀫𑀜𑁆𑀜𑀺𑀳𑀁.

𑁭𑁩. ‘‘𑀯𑀺𑀪𑀽𑀲𑁂𑀢𑁆𑀯𑀸 𑀇𑀫𑀁 𑀓𑀸𑀬𑀁, 𑀲𑀼𑀘𑀺𑀢𑁆𑀢𑀁 𑀩𑀸𑀮𑀮𑀸𑀧𑀦𑀁;

𑀅𑀝𑁆𑀞𑀸𑀲𑀺𑀁 𑀯𑁂𑀲𑀺𑀤𑁆𑀯𑀸𑀭𑀫𑁆𑀳𑀺, 𑀮𑀼𑀤𑁆𑀤𑁄 𑀧𑀸𑀲𑀫𑀺𑀯𑁄𑀟𑁆𑀟𑀺𑀬.

𑁭𑁪. ‘‘𑀧𑀺𑀮𑀦𑁆𑀥𑀦𑀁 𑀯𑀺𑀤𑀁𑀲𑁂𑀦𑁆𑀢𑀻, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀓𑀁 𑀩𑀳𑀼𑀁;

𑀅𑀓𑀸𑀲𑀺𑀁 𑀯𑀺𑀯𑀺𑀥𑀁 𑀫𑀸𑀬𑀁, 𑀉𑀚𑁆𑀚𑀕𑁆𑀖𑀦𑁆𑀢𑀻 𑀩𑀳𑀼𑀁 𑀚𑀦𑀁.

𑁭𑁫. ‘‘𑀲𑀸𑀚𑁆𑀚 𑀧𑀺𑀡𑁆𑀟𑀁 𑀘𑀭𑀺𑀢𑁆𑀯𑀸𑀦, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀺𑀲𑀺𑀦𑁆𑀦𑀸 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀅𑀯𑀺𑀢𑀓𑁆𑀓𑀲𑁆𑀲 𑀮𑀸𑀪𑀺𑀦𑀻.

𑁭𑁬. ‘‘𑀲𑀩𑁆𑀩𑁂 𑀬𑁄𑀕𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀯𑀺𑀫𑀮𑀸 𑀧𑀼𑀭𑀸𑀡𑀕𑀡𑀺𑀓𑀸 𑀣𑁂𑀭𑀻….