𑁬. 𑀅𑀪𑀺𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀅𑀧𑀤𑀸𑀦𑀁

𑁧𑁪𑁩. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

𑁧𑁪𑁪. ‘‘𑀢𑀤𑀸𑀳𑀁 𑀩𑀦𑁆𑀥𑀼𑀫𑀢𑀺𑀬𑀁, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀸𑀓𑀼𑀮𑁂;

𑀚𑀸𑀢𑀸 𑀲𑀼𑀭𑀽𑀧𑀸 𑀤𑀬𑀺𑀢𑀸, 𑀧𑀽𑀚𑀦𑀻𑀬𑀸 𑀚𑀦𑀲𑁆𑀲 𑀘.

𑁧𑁪𑁫. ‘‘𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀯𑀻𑀭𑀁, 𑀯𑀺𑀧𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸 𑀲𑀭𑀡𑀁, 𑀉𑀧𑁂𑀲𑀺𑀁 𑀦𑀭𑀦𑀸𑀬𑀓𑀁.

𑁧𑁪𑁬. ‘‘𑀲𑀻𑀮𑁂𑀲𑀼 𑀲𑀁𑀯𑀼𑀢𑀸 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀼𑀢𑁂 𑀘 𑀦𑀭𑀼𑀢𑁆𑀢𑀫𑁂;

𑀥𑀸𑀢𑀼𑀣𑀽𑀧𑀲𑁆𑀲 𑀉𑀧𑀭𑀺, 𑀲𑁄𑀡𑁆𑀡𑀘𑁆𑀙𑀢𑁆𑀢𑀫𑀧𑀽𑀚𑀬𑀺𑀁.

𑁧𑁪𑁭. ‘‘𑀫𑀼𑀢𑁆𑀢𑀘𑀸𑀕𑀸 𑀲𑀻𑀮𑀯𑀢𑀻, 𑀬𑀸𑀯𑀚𑀻𑀯𑀁 𑀢𑀢𑁄 𑀘𑀼𑀢𑀸;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑀸 𑀅𑀳𑀁.

𑁧𑁪𑁮. ‘‘𑀢𑀤𑀸 𑀤𑀲𑀳𑀺 𑀞𑀸𑀦𑁂𑀳𑀺, 𑀅𑀥𑀺𑀪𑁄𑀢𑁆𑀯𑀸𑀦 𑀲𑁂𑀲𑀓𑁂 [𑀅𑀥𑀺𑀪𑁄𑀢𑁆𑀯𑀸 𑀅𑀲𑁂𑀲𑀢𑁄 (𑀲𑁆𑀬𑀸.)];

𑀭𑀽𑀧𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺, 𑀭𑀲𑁂𑀳𑀺 𑀨𑀼𑀲𑀦𑁂𑀳𑀺 𑀘.

𑁧𑁪𑁯. ‘‘𑀆𑀬𑀼𑀦𑀸𑀧𑀺 𑀘 𑀯𑀡𑁆𑀡𑁂𑀦, 𑀲𑀼𑀔𑁂𑀦 𑀬𑀲𑀲𑀸𑀧𑀺 𑀘;

𑀢𑀣𑁂𑀯𑀸𑀥𑀺𑀧𑀢𑁂𑀬𑁆𑀬𑁂𑀦, 𑀅𑀥𑀺𑀕𑀬𑁆𑀳 𑀯𑀺𑀭𑁄𑀘𑀳𑀁.

𑁧𑁫𑁦. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸𑀳𑀁 𑀓𑀧𑀺𑀮𑀯𑁆𑀳𑀬𑁂;

𑀥𑀻𑀢𑀸 𑀔𑁂𑀫𑀓𑀲𑀓𑁆𑀓𑀲𑁆𑀲, 𑀦𑀦𑁆𑀤𑀸 𑀦𑀸𑀫𑀸𑀢𑀺 𑀯𑀺𑀲𑁆𑀲𑀼𑀢𑀸.

𑁧𑁫𑁧. ‘‘𑀅𑀪𑀺𑀭𑀽𑀧𑀲𑀫𑁆𑀧𑀤𑀫𑁆𑀧𑀺 [𑀅𑀪𑀺𑀭𑀼𑀧𑀁 𑀉𑀧𑀧𑀤𑀁 (𑀲𑀻.), 𑀅𑀪𑀺𑀭𑀼𑀧𑀁 𑀉𑀧𑁆𑀧𑀸𑀤𑀁 (𑀧𑀻.)], 𑀅𑀳𑀼 𑀫𑁂 𑀓𑀦𑁆𑀢𑀺𑀲𑀽𑀘𑀓𑀁;

𑀬𑀤𑀸𑀳𑀁 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸, 𑀭𑀽𑀧𑀮𑀸𑀯𑀜𑁆𑀜𑀪𑀽𑀲𑀺𑀢𑀸.

𑁧𑁫𑁨. ‘‘𑀢𑀤𑀸 [𑀢𑀤𑀸 𑀫𑀫𑀢𑁆𑀣𑀁 (𑀲𑀻.), 𑀇𑀥 𑀫𑀫𑀢𑁆𑀢𑁂 (𑀲𑁆𑀬𑀸. 𑀓.)] 𑀫𑀢𑁆𑀣𑁂 𑀲𑀓𑁆𑀬𑀸𑀦𑀁, 𑀯𑀺𑀯𑀸𑀤𑁄 𑀲𑀼𑀫𑀳𑀸 𑀅𑀳𑀼;

𑀧𑀩𑁆𑀩𑀸𑀚𑁂𑀲𑀺 𑀢𑀢𑁄 𑀢𑀸𑀢𑁄, 𑀫𑀸 𑀲𑀓𑁆𑀬𑀸 𑀯𑀺𑀦𑀲𑁆𑀲𑀺𑀁𑀲𑀼𑀢𑀺.

𑁧𑁫𑁩. ‘‘𑀧𑀩𑁆𑀩𑀚𑀺𑀢𑁆𑀯𑀸 𑀢𑀣𑀸𑀕𑀢𑀁, 𑀭𑀽𑀧𑀤𑁂𑀲𑁆𑀲𑀺𑀁 𑀦𑀭𑀼𑀢𑁆𑀢𑀫𑀁;

𑀲𑀼𑀢𑁆𑀯𑀸𑀦 𑀦𑁄𑀧𑀕𑀘𑁆𑀙𑀸𑀫𑀺, 𑀫𑀫 𑀭𑀽𑀧𑁂𑀦 𑀕𑀩𑁆𑀩𑀺𑀢𑀸.

𑁧𑁫𑁪. ‘‘𑀑𑀯𑀸𑀤𑀫𑁆𑀧𑀺 𑀦 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑀤𑀲𑁆𑀲𑀦𑀪𑀻𑀭𑀼𑀢𑀸;

𑀢𑀤𑀸 𑀚𑀺𑀦𑁄 𑀉𑀧𑀸𑀬𑁂𑀦, 𑀉𑀧𑀦𑁂𑀢𑁆𑀯𑀸 𑀲𑀲𑀦𑁆𑀢𑀺𑀓𑀁.

𑁧𑁫𑁫. ‘‘𑀢𑀺𑀲𑁆𑀲𑀺𑀢𑁆𑀣𑀺𑀬𑁄 [𑀢𑀺𑀲𑁆𑀲𑁄 𑀣𑀻𑀬𑁄 (𑀲𑀻. 𑀧𑀻.)] 𑀦𑀺𑀤𑀲𑁆𑀲𑁂𑀲𑀺, 𑀇𑀤𑁆𑀥𑀺𑀬𑀸 𑀫𑀕𑁆𑀕𑀓𑁄𑀯𑀺𑀤𑁄;

𑀅𑀘𑁆𑀙𑀭𑀸𑀭𑀽𑀧𑀲𑀤𑀺𑀲𑀁, 𑀢𑀭𑀼𑀡𑀺𑀁 𑀚𑀭𑀺𑀢𑀁 [𑀚𑀭𑀺𑀓𑀁 (𑀲𑁆𑀬𑀸. 𑀓.)] 𑀫𑀢𑀁.

𑁧𑁫𑁬. ‘‘𑀢𑀸𑀬𑁄 𑀤𑀺𑀲𑁆𑀯𑀸 𑀲𑀼𑀲𑀁𑀯𑀺𑀕𑁆𑀕𑀸, 𑀯𑀺𑀭𑀢𑁆𑀢𑀸𑀲𑁂 𑀓𑀴𑁂𑀯𑀭𑁂;

𑀅𑀝𑁆𑀞𑀸𑀲𑀺𑀁 𑀪𑀯𑀦𑀺𑀩𑁆𑀩𑀺𑀦𑁆𑀤𑀸, 𑀢𑀤𑀸 𑀫𑀁 𑀆𑀳 𑀦𑀸𑀬𑀓𑁄.

𑁧𑁫𑁭. ‘‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

𑁧𑁫𑁮. ‘‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁.

𑁧𑁫𑁯. ‘‘‘𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀢𑀢𑁄 𑀲𑀓𑀸𑀬 𑀧𑀜𑁆𑀜𑀸𑀬, 𑀅𑀪𑀺𑀦𑀺𑀩𑁆𑀩𑀺𑀚𑁆𑀛 𑀯𑀘𑁆𑀙𑀲𑀺’.

𑁧𑁬𑁦. ‘‘𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀯𑀺𑀘𑀭𑀦𑁆𑀢𑀺𑀬𑀸 [𑀯𑀺𑀘𑀭𑀦𑁆𑀢𑁆𑀯𑀸𑀥 (𑀲𑀻.), 𑀯𑀺𑀘𑀺𑀦𑀦𑁆𑀢𑀻𑀥 (𑀲𑁆𑀬𑀸. 𑀧𑀻.)] 𑀬𑁄𑀦𑀺𑀲𑁄;

𑀬𑀣𑀸𑀪𑀽𑀢𑀁 𑀅𑀬𑀁 𑀓𑀸𑀬𑁄, 𑀤𑀺𑀝𑁆𑀞𑁄 𑀲𑀦𑁆𑀢𑀭𑀩𑀸𑀳𑀺𑀭𑁄.

𑁧𑁬𑁧. ‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀳𑀁 𑀓𑀸𑀬𑁂, 𑀅𑀚𑁆𑀛𑀢𑁆𑀢𑀜𑁆𑀘 𑀯𑀺𑀭𑀚𑁆𑀚𑀳𑀁;

𑀅𑀧𑁆𑀧𑀫𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑀸, 𑀉𑀧𑀲𑀦𑁆𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸.

𑁧𑁬𑁨. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

𑁧𑁬𑁩. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁬𑁪. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀫 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

𑁧𑁬𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁧𑁬𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀅𑀪𑀺𑀭𑀽𑀧𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀪𑀺𑀭𑀽𑀧𑀦𑀦𑁆𑀤𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀙𑀝𑁆𑀞𑀁.